Batumelebi

დღეს, 14 ივნისს, შეზღუდული შესაძლებლობის მქონე პირთა უფლებების დაცვის დღესთან დაკავშირებით ბათუმში მსვლელობა გაიმართა.

მსვლელობაში მონაწილეობა შეზღუდული შესაძლებლობის მქონე პირებმა, მათმა მხარდაჭერებმა და ამ საკითხზე მომუშავე ორგანიზაციებმა მიიღეს.

„ერთად შევცვალოთ“ – ასე ერქვა აქციას, რომელიც დღის ოთხ საათზე, ევროპის მოედანზე დაიწყო და ბათუმის ცენტრალურ პარკში დასრულდა.

აქცია ორგანიზაციების – „ცვლილებები თანაბარი უფლებებისთვის” და “კოალიცია დამოუკიდებელი ცხოვრებისთვის” ინიციატივით გაიმართა, ევროკავშირის პროექტის ფარგლებში.

აქციის ერთ-ერთი მონაწილის, 14 წლის ეტლით მოსარგებლე ანიტა ტაკიძის თქმით, მისი მთავარი გამოწვევა თავისუფლად გადაადგილებაა.

მან გვითხრა, რომ აქციას შეუერთდა, რადგან სურს ბათუმში ქუჩები ადაპტირებული იყოს და ეტლით მოსარგებლეებსა და სხვა შეზღუდული შესაძლებლობის მქონე ადამიანებს თავისუფლად გადაადგილების საშუალება ჰქონდეთ.

„ჩვენი უფლებები მინდა შევახსენო ხალხს. ჩვენც ჩვეულებრივი მოქალაქეები ვართ და ადაპტირებული გარემო გვჭირდება საცხოვრებლად.

ავტობუსის მძღოლები ხშირად არ წევენ ავტობუსის პანდუსებს. ეზარებათ, ეტლით მოსარგებლეებს როცა ხედავენ, არ სიამოვნებთ და არ ჩამოდიან საჭიდან.

დამხმარის გარეშე ჩვენ ვერ შევძლებთ ავტობუსში ასვლას. წესით, დამოუკიდებლად ცხოვრების უფლება ყველას აქვს, ჩვენ ამ უფლების გამოყენება გვინდა, რისთვისაც სხვების ხელშეწყობა გვჭირდება“.

ანიტა ფსიქოლოგობას აპირებს. ამბობს, რომ სკოლა, სადაც სწავლობს, ადაპტირებულია, მაგრამ საქართველოს ბევრ სკოლა დღემდე არაადაპტირებულია და აუცილებელია, რომ ეს პრობლემა საბოლოოდ მოგვარდეს, რათა ყველა შშმ პირს მიეცეს განათლების მიღების საშუალება.

„გარემო, რომელიც შეზღუდული შესაძლებლობის მქონე ადამიანებს ზღუდავს გადაადგილებაში, ინფორმაციის მიღებაში, განათლებაში, დასაქმებაში და მათ შორის, ამ გარემოებებში შედის საზოგადოების დამოკიდებულებები, რომელიც არ არის ჯანსაღი და სტერეოტიპებითაა გაჯერებული, უნდა შეცვალოს.

გვინდა, რომ რაც შეიძლება მეტი ადამიანი ჩაერთოს ამ კამპანიაში. მთელი ივნისი ჩვენი უფლებების დაცვისაა“, – ამბობს თომა კაკაბაძე, ორგანიზაციის – „ცვლილებები თანაბარი უფლებებისთვის“ თავმჯდომარე.

თომას თქმით, ორგანიზაცია ივლისის განმავლობაში 7 ვიდეოს გამოაქვეყნებს და საზოგადოებას გააცნობს სხვადასხვა რეგიონში მცხოვრებ შშმ პირებს, რომლებიც იმ მთავარ გამოწვევებზე ისაუბრებენ, რასაც თავიანთ მუნიციპალიტეტებში ხვდებიან.

ბათუმში შეზღუდული შესაძლებლობის მქონე პირების უმთავრეს გამოწვევად თომა კაკაბაძე ინფრასტრუქტურულ მიუწვდომლობას ასახელებს. მისი თქმით, ეტაპობრივად გვარდება რაღაც საკითხები, თუმცა ეს არ არის საკმარისი.

„ჩვენ არ უნდა გვიწევდეს კონკრეტული ლოკაციების არჩევა, რათა სერვისებით სარგებლობა შევძლოთ. ჩვენ უნდა შეგვეძლოს ნებისმიერ ადგილზე მისვლა და ის სიკეთეები, რაც საზოგადოების დანარჩენი ნაწილისთვისაა ხელმისაწვდომი, ჩვენთვისაც უნდა იყოს ხელმისაწვდომი“.

აქციის მსვლელობისას, როცა მონაწილეებმა ევროპის მოედნიდან ბათუმის ცენტრალურ პარკში გადაწყვიტეს გადანაცვლება, თომა არაადაპტირებულ გადასასვლელთან გაჩერდა და კიდევ ერთხელ აღნიშნა, რომ ისინი სწორედ ამ სიტუაციის შეცვლას ითხოვენ.

აქციის კიდევ ერთმა მონაწილემ, ნატალი სხალთელმა გვითხრა, რომ ის სმენის არმქონე 18 წლის გოგოს დედაა.

მათ აქცია ნახევარი საათით ადრე საქართველოს ყრუთა კავშირის ფილიალის, აჭარის ადგილობრივი ორგანიზაციის შენობიდან დაიწყეს ევროპის მოედნის მიმართულებით.

ნატალი ამბობს, რომ სურდათ გზად უფრო მეტ ადამიანს ენახა მათი ტრანსპარანტები და მოთხოვნები.

„მართალია, მსვლელობის მონაწილეები ჟესტურად აჟღერებდნენ მოთხოვნებს, თუმცა მე  ვცდილობდი, მათი სათქმელი ხმამაღლაც გამეჟღერებინა.

ნატალია საქართველოს განათლების სამინისტროსგან ჟესტური ენის გაკვეთილების დაფინანსებას ითხოვს სმენის არმქონეების მშობლებისთვის და სხვა მსურველთათვის, რათა მშობლებს შვილებთან სრულყოფილი ურთიერთობის საშუალება მიეცეთ.

„ჩვენ არ გვაქვს შემდგარი დედაშვილური, მამაშვილური ურთიერთობები საკუთარ შვილებთან, რაც ყოვლად მიუღებელი და ძალიან სამწუხაროა“ – ამბობს ნატალი.

მისი თქმით, მის შვილს განათლების მიღება საკუთარი ქალაქისგან შორს, ქუთაისის სპეცსკოლაში მოუწია, ახლა უკვე ზრდასრულია და სჭირდება მეტი კომუნიკაციის საშუალება ადამიანებთან.

ჩემპიონთა ლიგის პირველ საკვალიფიკაციო ეტაპზე „დინამო ბათუმის“ მეტოქე ბრატისლავას საფეხბურთო კლუბი „სლოვანი“ იქნება.

პირველი საკვალიფიკაციო ეტაპის მატჩები 5-6 ივლისს გაიმართება, საპასუხო მატჩები კი – 12-13 ივლისს.

ისტორიაში პირველად „დინამო ბათუმი“ საქართველოს 2021 წლის ჩემპიონია.

„დინამო ბათუმის“ შემადგენლობაში აღარ იქნება ხვიჩა კვარაცხელია, რომელიც ნაპოლში მიდის. პირველი საკვალიფიკაციო ეტაპის მატჩებში მონაწილეობას მიიღებს ზურიკო დავითაშვილი, რომელიც „დინამო ბათუმში“ ტულის “არსენალიდან” გადმოვიდა.

„დინამო ბათუმის“ მეტოქე გუნდის მთავარი მწვრთნელი ვლადიმერ ვაისია, ის 2016-2020 წლებში საქართველოს ეროვნული ნაკრების მწვრთნელი იყო.

ამავე კლუბში თამაშობენ ქართველი ფეხბურთელები – საქართველოს ნაკრების კაპიტანი გურამ კაშია და ნაკრების ყოფილი კაპიტანი ჯაბა კანკავა.

წილისყრა დღეს, 14 ივნისს, ნიონში, უეფას შტაბ-ბინაში გაიმართა.

ბათუმის საკრებულოს აპარატის ყოფილი თანამშრომლის, გია აბულაძის სამსახურში აღდგენაზე სასამართლომ გადაწყვეტილება 19 აპრილს მიიღო, თუმცა შესაბამისი გადაწყვეტილება უმუშევრად დარჩენილ პირს დღემდე არ ჩააბარა. გია აბულაძემ გადაწყვეტილების უზრუნველყოფის მოთხოვნით ისევ ბათუმის სასამართლოს მიმართა. „გადაწყვეტილება არ ჩაგვბარებია“, – ამბობენ  ბათუმის საკრებულოშიც.

იმ გარემოებით, რომ „გადაწყვეტილება არ ჩაჰბარებიათ“,  საკრებულოში ისარგებლეს და თანამდებობაზე, რომელიც გია აბულაძის გათავისუფლების შემდეგ ვაკანტური იყო, კონკურსი გამოაცხადეს.

გია აბულაძე ბათუმის საკრებულოს აპარატის ჯანდაცვის და სოციალური საკითხების კომისიის სპეციალისტის თანამდებობაზე მუშაობდა. ის 2021 წლის 25 მაისს გაათავისუფლეს სამსახურიდან, მას შემდეგ, რაც მან  ფეისბუქზე გიორგი გახარიას მხარდასაჭერი პოსტი გაავრცელა.

„სასამართლომ დაადასტურა, რომ პოლიტიკური ნიშნით მოხდა ჩემი სამსახურიდან გათავისუფლება და არავითარი სხვა საფუძველი არ არსებობდა,“ – ამბობდა გია აბულაძე სასამართლოს გადაწყვეტილების გამოცხადების შემდეგ.

საკრებულოს ინტერესებს სასამართლოში გია აბულაძის წინააღმდეგ იურისტი ირაკლი თავართქილაძე იცავდა. კითხვაზე, მოიგო თუ არა გია აბულაძემ სასამართლოში დავა, მანაც გვიპასუხა, რომ გადაწყვეტილება არ ჩაჰბარებიათ, თავად კი ბოლო სხდომას არ ესწრებოდა.

ირაკლი თავართქილაძის განმარტებით, საკრებულოს კანონი არ დაურღვევია, როცა გია აბულაძის თანამდებობაზე კონკურსი გამოაცხადა, მიუხედავად იმისა, რომ აქ კარგად იციან, გადაწყვეტილება მათ ნებისმიერ დროს შეიძლება ჩაჰბარდეთ.

კითხვაზე, თუ დაარღვევდა კანონს საკრებულო, სასამართლო გადაწყვეტილებას რომ დალოდებოდა, იურისტი  ირაკლი თავართქილაძე ისევ იმეორებს, რომ კანონი არ დაურღვევიათ.

გია აბულაძის ინტერესებს სასამართლოში „საერთაშორისო გამჭვირვალობა საქართველო“ იცავდა. იურისტი მარიამ შაინიძე ამბობს, რომ სასამართლოს განმარტებით მოსამართლემ გადაწყვეტილება ამ დრომდე ვერ მოამზადა, მიზეზად კი სასამართლოს გადატვირთულობას ასახელებენ.

ბათუმში, ახალ ბულვარში, შტორმის დროს ჩამონგრეული პირსი მოქალაქეებისთვის სახიფათოა. ამის მიუხედავად ბავშვები დაზიანებულ პირსს ზღვაში ჩასახტომად იყენებენ.

პირსი კერძო მოიჯარის მფლობელობაშია, თუმცა მის ამჟამინდელ მდგომარეობაზე ზრუნვა ევალება როგორც მოიჯარეს, ისე ბათუმის მერიას და ბათუმის ბულვარს.

„ბათუმის ბულვარის“ ადმინისტრაციაში ამბობენ, რომ  პირსთან დაამაგრეს საინფორმაციო ბანერები, ასევე, ადგილი შემოსაზღვრეს ლენტით, თუმცა ეს ლენტი ხალხმა მოგლიჯა.

„ასევე პირსს ფლობს კერძო მოიჯარე, შესაბამისად, იქ დაცვის თანამშრომელი ჰყავთ. იყო ლენტები არაერთხელ გაკრული. მაგრამ თვითონ მოქალაქეების მხრიდან არ ხდება დაცვა უსაფრთხოების ზომების. რამდენჯერმე ჩამოგლიჯეს, იყო ასეთი შემთხვევა.

თან ეს ბავშვები პრომენადიდან კი არ შედიან, ზღვიდან ადიან. ჩვენი მხრიდანაც სამაშველო სამსახურიც გაფრთხილებულია და სხვა ბერკეტი ამ ეტაპზე არ გვაქვს,“ – უთხრა „ბათუმელებს“ ბულვარის დირექტორის მოადგილემ, სოფო გუჯაბიძემ.

„ბათუმელებმა“ ბათუმის მერიას ჰკითხა, როდის მოხდება დანგრეული პირსის დემონტაჟი ან აღდგენა.

„საკითხის თაობაზე მიმდინარეობს ერთობლივი მუშაობა ყველა შესაბამისი უწყების მხრიდან. გადაწყვეტილება უახლოეს პერიოდში იქნება მიღებული,“ – გვიპასუხეს  ბათუმის მერიაში.

„ბათუმის ბულვარში“ კი გვითხრეს, რომ დამატებით გააფრთხილებენ სამაშველო სამსახურს, რომ პირსს განსაკუთრებული ყურადღება მიაქციონ.

დღეს, 14 ივნისს, საქართველოში შეზღუდული შესაძლებლობის მქონე პირთა უფლებების დაცვის დღე აღინიშნება. ამ დღის მიზანია, შშმ პირთა შესახებ საზოგადოების ცნობიერების ამაღლება და ამ პირთა უფლებრივ მდგომარეობაზე კიდევ ერთხელ ყურადღების გამახვილება.

სახალხო დამცველი ამ დღეს განცხადებით გამოეხმაურა, სადაც საუბრობს იმ პრობლემებზე, რომლებიც ჯერ კიდევ ვერ დაძლია სახელმწიფომ შშმ პირთა უფლებების სრული და ეფექტიანი დაცვისთვის. მისი თქმით, კვლავ პრობლემაა შეზღუდული შესაძლებლობის მქონე პირებისთვის ფიზიკური გარემოს, ინფორმაციის, კომუნიკაციის საშუალებებისა და სხვადასხვა მომსახურების მისაწვდომობა, ასევე, სერვისებისა და დამხმარე საშუალებების ნაკლებობა და სოციალურ-ეკონომიკური მხარდაჭერის სიმწირეა.

„აქტუალური რჩება შშმ ბავშვთა საგანმანათლებლო პროცესში სათანადო ჩართვა. დღის წესრიგში დგას სასწავლო დაწესებულებების სივრცის, სასწავლო რესურსებისა და პროცესის მისაწვდომობის უზრუნველსაყოფად ეფექტური ზომების მიღების აუცილებლობა. ასევე, ინკლუზიური განათლების სპეციალისტების დროულად და საჭირო რაოდენობით მობილიზება, მათ შორის, სკოლამდელი აღზრდის საფეხურზე.

სირთულეებთანაა დაკავშირებული შშმ პირთა შრომისა და დასაქმების უფლების რეალიზება. მათ დასაქმებაში ხელშემშლელი ბარიერებია მიუწვდომელი გარემო და სერვისები, ფორმალური განათლების არქონა და თავად დამსაქმებლების დისკრიმინაციული დამოკიდებულება შშმ პირების მიმართ“, – წერს სახალხო დამცველი.

ის ასევე ყურადღებას ამახვილებს შშმ პირთა სათანადო საცხოვრებლით უზრუნველყოფის უფლებაზე და ამბობს, რომ „სახელმწიფოს არასაკმარისი მცდელობების გამო, ქვეყანაში არსებულ სოციალური საცხოვრისების აბსოლუტურ უმრავლესობაში სრულად ან ნაწილობრივ უგულებელყოფილია შშმ პირების საჭიროებები. მათ შორის, იკვეთება საცხოვრისების ფიზიკური გარემოს მიუწვდომლობა, გადატვირთულობა, მხარდამჭერი სერვისების არარსებობა.

მუნიციპალურ დონეზე გამოწვევას წარმოადგენს საჭიროებების კვლევაზე დაფუძნებული სერვისების  დანერგვა/გაძლიერება, ასევე, შშმ პირთა საკითხებზე მომუშავე ადგილობრივ საბჭოებში სხვადასხვა შეზღუდვის მქონე პირთა მონაწილეობა და სათათბირო ორგანოების ეფექტიანი ფუნქციონირება.

საკმარისი არ არის ფსიქიკური ჯანმრთელობის სფეროში გატარებული ღონისძიებები. არსებითად არ გაზრდილა სათემო სერვისების რაოდენობა და გეოგრაფიული დაფარვის არეალი. ჯერ კიდევ არ შექმნილა სფეროს დეინსტიტუციონალიზაციის სტრატეგია.

ასევე გამოწვევად რჩება შშმ პირთა დიდი ზომის დაწესებულებების დეინსტიტუციონალიზაციის პროცესი“, – ამბობს სახალხო დამცველი.

მისი თქმით, გადაუჭრელია სტატუსის მინიჭების სამართლიან სისტემაზე გადასვლის საკითხიც, „მოქმედი მოდელის მიხედვით განსაზღვრული სოციალური პაკეტის ოდენობა არ არის მორგებული შშმ პირების ინდივიდუალურ საჭიროებებზე და მინიმალურადაც ვერ უზრუნველყოფს მათ დაკმაყოფილებას“.

მისი თქმით, კვლავ დაბალია საზოგადოების ცნობიერება შშმ პირებთან დაკავშირებულ საკითხებზე, რაც გამოიხატება მათ მიერ გამოყენებულ არასწორ ტერმინებსა და სტერეოტიპულ ხედვებში. აღნიშნული ხელს უწყობს ჯგუფის სტიგმატიზაციას, ქმნის ბარიერებს და აფერხებს შშმ პირთა საზოგადოებრივ ცხოვრებაში ჩართვას.

„თუ გადაწყვეტილება იქნება უსამართლო, ყველაფერს ფარდას ავხდი,“ – საქართველოს პრემიერ-მინისტრის, ირაკლი ღარიბაშვილის ერთ-ერთი ბოლო ცნობილი კომენტარი, რომელშიც იგი 23-24 ივნისს ევროკავშირის წევრობის კანდიდატის სტატუსთან მისაღები  გადაწყვეტილების შესახებ იმუქრება, „ინსტაგრამის“ ოფიციალურ გვერდზე 200-299 დოლარითაა დასპონსორებული.

ასევე დასპონსორებულია უკრაინაში რუსეთის სრულმასშტაბიანი ომის შესახებ პრემიერის ერთ-ერთი პირველი განცხადება – „ამ ომით მხოლოდ უკრაინა დაზარალდება“. ამ განცხადების რეკლამირებისთვის 25 თებერვალს, ომის მეორე დღეს, ირაკლი ღარიბაშვილის ფეისბუქგვერდზე 300-ზე მეტი დოლარია გადახდილი.

საქართველოს პრემიერ-მინისტრს, ირაკლი ღარიბაშვილს ოფიციალურ „ფეისბუქ“ და „ინსტაგრამ“ გვერდებზე რეკლამებში, ბოლო ორ წლის განმავლობაში, 139 436 დოლარი აქვს გადახდილი.

მათ შორის, ბოლო სამ თვეში, რაც რუსეთის სრულმასშტაბიანი ომი მიმდინარეობს უკრაინაში – 14 მარტიდან 11 ივნისამდე პერიოდში – 19 373 დოლარი. 

„ბათუმელები“ დაინტერესდა საქართველოს პრემიერ-მინისტრის, ირაკლი ღარიბაშვილის ოფიციალურ „ფეისბუქგვერდსა“ „ინსტაგრამგვერდზე“ რეკლამირებისთვის დახარჯული თანხებით, მათი წარმომავლობითა და ამ რეკლამების შინაარსით.

ღია მონაცემების მიხედვით, აღნიშნული თანხიდან, საქართველოს მთავრობის ოფიციალურმა გვერდმა – საქართველოს მთავრობა, დააფინანსა  66 069 დოლარით  578 რეკლამა. თავად საქართველოს მთავრობის გვერდზე რეკლამაში კი, ამავე პერიოდში, 32 688 დოლარია დახარჯული, 868 რეკლამის დასასპონსორებლად. 

პრემიერ-მინისტრის ოფიციალური გვერდების [ფეისბუქი და ინსტაგრამი] რეკლამებიდან 20 258 დოლარით დაასპონსორა 71 რეკლამა თავდაცვის სამინისტროს სტრატეგიული კომუნიკაციების ოფიციალურმა გვერდმა – თავდაცვის სამინისტროს სტრატკომი. თავად აღნიშნულ გვერდზე კი სტრატკომს 1 895 დოლარი აქვს დახარჯული 36 რეკლამისთვის.

ირაკლი ღარიბაშვილის ოფიციალურ ფეისბუქგვერდზე 195 რეკლამისთვის გამოყენებული დაფინანსების წყაროს შესახებ განაცხადში [disclaimer] თავად გვერდი Irakli Garibashvili გვხვდება და მონაცემების მიხედვით, სულ, 2020 წლის 4 აგვისტოდან ამ დრომდე, დახარჯული აქვს 33 428 დოლარი. 

ირაკლი ღარიბაშვილის გვერდზე რეკლამებისთვის 14 367 დოლარის გადამხდელად მითითებულია Georgian Dream [„ქართული ოცნება“]. კიდევ ერთ გადამხდელად მითითებულია ფიზიკური პირი პაატა გამჯაშვილი – Paata Gamjashvili. მის სახელთან დაკავშირებულია 5 314 დოლარის ოდენობის 79 რეკლამა. 

პაატა გამჯაშვილი მოხვდა სამართლიანი არჩევნებისა და დემოკრატიის საერთაშორისო საზოგადოების მიერ ჩატარებული სოციალური მედიის მონიტორინგის 2021 წლის 26 ივლისს გამოქვეყნებულ ანგარიშში – ფარული საინფორმაციო კამპანიის კავშირი სამთავრობო უწყებებთან.

ანგარიშში ნათქვამი იყო, რომ გამჯაშვილის პირადი პროფილი მართავდა ფეისბუქჯგუფს ირაკლი ღარიბაშვილის მხარდამჭერები. ამავე ანგარიშში ასევე ვკითხულობთ, რომ

გამჯაშვილის ფეისბუქპროფილზე, აპრილის დასაწყისში, სამუშაო ადგილად თავდაცვის სამინისტრო იყო მითითებული, თუმცა მოგვიანებით ეს ინფორმაცია წაიშალა. ამასთან, 2020 წლის აგვისტო-ოქტომბრის პერიოდში, ირაკლი ღარიბაშვილის ოფიციალურ ფეისბუქგვერდზე რეკლამების განმთავსებლად მისი სახელი და ელფოსტა იყო მითითებული. 2020 წლის ნოემბრიდან 2021 წლის მარტის ჩათვლით კი, როდესაც გვერდზე რეკლამები თავად ირაკლი ღარიბაშვილისა და თავდაცვის სამინისტროს სტრატკომის სახელით (disclaimer) ქვეყნდებოდა, კვლავ გამჯაშვილის საკონტაქტო ინფორმაცია იყო მითითებული.

ამ დროისთვის [14 ივნისი, 2022] პაატა გამჯაშვილის პირადი პროფილი აღარ არის აღნიშნული ჯგუფის ადმინისტრატორების სიაში და არც პირად პროფილზე განთავსებულ ინფორმაციაში აქვს მითითებული საქართველოს თავდაცვის სამინისტროში მუშაობის შესახებ.

პაატა გამჯაშვილს „ბათუმელები“ ფეისბუქის მეშვეობით დაუკავშირდა და ჰკითხა, იმ პერიოდში, როდესაც პრემიერ-მინისტრის ოფიციალურ გვერდებზე რეკლამაში გადამხდელად იყო მითითებული, რა თანამდებობას იკავებდა, ახლაც თუ მუშაობს იმავე პოზიციაზე და მისი სახელით გადახდილი თანხა თავისი იყო თუ ბიუჯეტიდან გამოყოფილი.

პაატა გამჯაშვილმა გვიპასუხა, რომ არ სურდა ინტერვიუს მოცემა ან კონკრეტულად ამ შეკითხვებზე პასუხის გაცემა. რის შემდეგაც პროფილი, რომლითაც „ბათუმელების” რეპორტიორი ეკონტაქტებოდა, დაბლოკა.

2021 წლის 21 თებერვლიდან, როდესაც ირაკლი ღარიბაშვილი მეორედ დაინიშნა საქართველოს პრემიერ-მინისტრად, დღემდე საქართველოს მთავრობისა და თავდაცვის სტრატკომის მიერ ღარიბაშვილის გვერდისთვის დაფინანსდა დაახლოებით 600 რეკლამა. მათ შორის 100-ზე მეტი პოსტი არის ტელეკომპანია „იმედის“ ვიდეოპროდუქტი – პირდაპირი ჩართვა, სიუჟეტი, რეპორტაჟი ან გადაცემა, რომელიც ბრენდირებულია. რეკლამები ეთმობა ასევე „მაესტროსა“ და „რუსთავი 2“-ს მასალებსაც. ასევე, ვხვდებით ვიდეომასალებს, რომლებიც, სავარაუდოდ, პრემიერის პრესსამსახურის მიერაა მომზადებული და არ არის ბრენდირებული.

ზოგადად, პრემიერის ოფიციალურ გვერდზე დასპონსორებული რეკლამები სხვადასხვა სახისაა – კომენტარი, ფოტო, მილოცვა, ღია წერილი და ა.შ. მათ შორის, ირაკლი ღარიბაშვილი ღია წერილი მიხეილ სააკაშვილის საქართველოში ჩამოსვლის შესაძლო მიზეზებთან დაკავშირებით, საქართველოს მთავრობის გვერდის ანგარიშიდანაა დასპონსორებული  და 5, 6 და 7 ოქტომბერს დაახლოებით 200-ზე მეტი დოლარია დახარჯული. ასევე, თავად ირაკლი ღარიბაშვილის ფოტოები ოჯახთან, სასულიერო პირებთან ან დიპლომატებთან ერთად. 

24 თებერვლიდან 13 ივნისამდე პერიოდში, მას შემდეგ, რაც რუსეთი უკრაინას დაესხა თავს, ირაკლი ღარიბაშვილის გვერდზე დაახლოებით 94 რეკლამას ეძებს „მეტას“ სისტემა. ამ პერიოდში ყველა გადახდა ირაკლი ღარიბაშვილის ოფიციალური გვერდიდან განხორციელდა.

საქართველოს პრემიერ-მინისტრის გვერდზე დარეკლამებულია პოსტები და სატელევიზიო კომენტარები, რომლებიც ისედაც შუქდება მედიაში, ისევე, როგორც მოწოდებები გვერდის გამოწერასთან დაკავშირებით. ამ კატეგორიაში ბოლო დროს დასპონსორებულ რეკლამებში იორდანიაში მიწის ნაკვეთის საქართველოსთვის საჩუქრად გადმოცემის ცერემონიაზე გადაღებული ფოტოა წარმოდგენილი.

ირაკლი ღარიბაშვილის ოფიციალური „ფეისბუქგვერდი“ შეიქმნა 2012 წლის 4 ნოემბერს სახელწოდებით – Irakli Garibashvili Official. 2015 წლის 26 იანვარს სახელი შეიცვალა და დღემდე წარმოდგენილია, როგორც Irakli Garibashvili. გვერდი ვერიფიცირებულია და 377 200-ზე მეტი გამომწერი ჰყავს. ამ გვერდზე მიმაგრებულ „ინსტაგრამგვერდს“ კი 3 800-ზე მეტი გამომწერი ჰყავს.

უწყების პასუხს, მიღების შემთხვევაში, აქვე შემოგთავაზებთ.

საქართველოს ჯანდაცვის მინისტრის, ზურა აზარაშვილის 13 ივნისის ბრძანებით, Covid19-ის საწინააღმდეგო ვაქცინის მეორე ბუსტერდოზით აცრა ჩაუტარდება 50 წლის და უფროსი ასაკის ყველა მსურველს.

ბრძანებაში აღნიშნულია, რომ „განსაკუთრებული რეკომენდაციაა“ ამ ასაკის იმუნოკომპრომეტირებული და ქრონიკული დაავადებების მქონე პირების, ასევე ხანგრძლივი მოვლის თავშესაფარში მცხოვრები პირების აცრა მეორე ბუსტერდოზით.

მეორე ბუსტერდოზით აცრა ჩაუტარდება ასევე 12-49 წლის ასაკის იმუნოკომპრომეტირებული და ქრონიკული დაავადებების მქონე პირებს. ამასთან, 12-17 წლის ასაკობრივ ჯგუფში მეორე ბუსტერდოზა ტარდება ამცრელი დაწესებულებისთვის ექიმის მიმართვის წარდგენის საფუძველზე, ხოლო 18-49 წლის ასაკობრივ ჯგუფში – დაავადების დამადასტურებელი ნებისმიერი დოკუმენტის წარდგენის შემთხვევაში;

მეორე ბუსტერდოზით აიცრება სამედიცინო დაწესებულებაში დასაქმებული პერსონალიც.

„ვაქცინის მეორე ბუსტერდოზის ჩატარება 18-49 წლის ასაკობრივ ჯგუფში დასაშვებია სწავლის, მკურნალობის ან სხვა მიზნით საზღვარგარეთ გამგზავრების შემთხვევაში, მიმღები ქვეყნის რეგულაციების შესაბამისად. მოგზაურობის მიზნებისთვის მეორე ბუსტერდოზის ჩასატარებლად, მოქალაქემ ამცრელ დაწესებულებას უნდა წარუდგინოს ბილეთის ჯავშანი.

ვაქცინის მეორე ბუსტერდოზით ადმინისტრირება უნდა განხორციელდეს პირველი ბუსტერდოზით ვაქცინაციის დასრულებიდან მინიმუმ 4 თვის შემდეგ. მე-2 ბუსტერდოზად შესაძლებელია გამოყენებული იყოს იგივე ან სხვა ვაქცინა.“ – აღნიშნულია ჯანდაცვის მინისტრის ბრძანებაში.

ამავე თემაზე:

დაავადებათა კონტროლის ეროვნული ცენტრის ინფორმაციით, ბოლო შვიდი დღის განმავლობაში საქართველოში კორონავირუსის 515 ახალი შემთხვევა დადასტურდა. აქედან კოვიდის 26 ახალი შემთხვევა დადასტურდა აჭარაში.

ამავე პერიოდში კოვიდის დიაგნოზით გარდაიცვალა 3 პაციენტი.

გასულ 7 დღეში ჩატარდა 100 232 კვლევა ტესტით. დადებითობის 7-დღიანი მაჩვენებელი  0.51 პროცენტია.

დაავადებათა კონტროლის ეროვნული ცენტრის ინფორმაციით, ქვეყანაში უპირატესად ცირკულირებს ომიკრონის B.A.2 შტამი.

„ბიძინა ივანიშვილის სანქცირება, პირდაპირ არის ხალხზე დადებული სანქცია“ – განაცხადა „ქართული ოცნების“ თავმჯდომარემ ირაკლი კობახიძემ. ასევე მმართველი პარტიის სხვა ლიდერები ორკესტრირებულად იმეორებენ, რომ „ასეთი“ ანუ ივანიშვილის დამსანქცირებელი ევროპა არ უნდათ. ამ უარს კი ისინი „ქართველი ხალხის“ სახელით იტყვიან. არის თუ არა ბიძინა ივანიშვილი საქართველო და ქართველი ხალხი? – ამ თემაზე საბჭოთა წარსულის მკვლევარი, ირაკლი ხვადაგიანი ესაუბრა „ბათუმელებს“.

• ბატონო ირაკლი, თქვენ, როგორც საქართველოს ერთ-ერთი მოქალაქე, მიიჩნევთ თუ არა, რომ ბიძინა ივანიშვილის დასანქცირება ქართველი ხალხის დასანქცირებაა. ეთანხმებით ირაკლი კობახიძის ამ განცხადებას?

ეს, რა თქმა უნდა, აბსურდია. „ქართული ოცნების“ სპიკერები იმდენად გასული არიან ლოგიკის, ეთიკის ფარგლებიდან, რომ აღარც გვიკვირს და თითქოს მივეჩვიეთ კიდეც, მხოლოდ სპორტული ინტერესით შეიძლება ვუყურებდეთ, თუ სადამდე შეიძლება დაეშვან.

დარჩა მხოლოდ თავიანთი ელექტორატის რაღაც ნაწილი, რომელიც უკრიტიკოდ მიიღებს და გადაყლაპავს ყველა აბსურდს, რითაც დიდი ხანია კვებავს „ქართული ოცნება“. ეს განცხადებებიც მათზეა გათვლილი, თორემ ოდნავ მოაზროვნე ადამიანშიც კი უკვე ფიზიოლოგიურ რეაქციას იწვევს.

მსგავსი განცხადებები არის ძალიან მახინჯი და კარიკატურული ფორმა იმის, რაც წინა თაობებს ახსოვთ და უნახავთ. ბელადომანიის, პიროვნების კულტის კარიკატურული ფორმა, რომ თურმე ბიძინაა ყველაფერი – ერის ღირსება ივანიშვილია, მთავარი ღირებულება ივანიშვილია. ახლა აღმოჩნდა, რომ თუ სანქციები შეეხება, ეს ნიშნავს, რომ საქართველოს მოქალაქეებს უწესებენ სანქციებს. დიდი ხანია ამ პოლიტიკურ ძალას ამ რიტორიკის გარდა არაფერი აქვს შესათავაზებელი მოქალაქეებისთვის.

• რას ნიშნავს ეს, როცა მთელ ერსა და ერთ პიროვნებას შორის ტოლობის ნიშანს სვამენ? 

ეს რაღაცნაირად ამ პოლიტიკური რეჟიმის ჩიხური მდგომარეობის ამსახველია, რომელსაც მართლა არაფერი დარჩა, ვერაფრით ვერ შეცვლის ამ პროპაგანდას, რადგან მთელი ხელისუფლება ეს არის ერთი ადამიანის, ამ კონკრეტული ოლიგარქის მოსამსახურეთა ვერტიკალი, რომელმაც, ფაქტობრივად, მიიტაცა სახელმწიფო. მთელი „ქართული ოცნება“ ივანიშვილის პირადი კომპანიაა, რომელმაც მიისაკუთრა სახელმწიფო ინსტიტუციები და ამის იქეთ არც რაიმე ამოცანა, რაიმე იდეა არ დგას.

ახლა ისეთი სიტუაციაა შექმნილი, ძალიან ცხადად ჩანს, რომ მათ უწევთ არჩევანის გაკეთება – ან უნდა წარმოჩინდნენ ღიად პრორუსულ ძალად, რაზეც დგას მათი ფინანსური ძალაუფლება, ან რაღაც ურთიერთობის ენა უნდა გამონახონ დასავლეთთან. ეს იმას ნიშნავს, რომ შემდეგ მათ შეექმნებათ ამ ძალაუფლების დაკარგვის საფრთხე, რადგან დასავლური სამყაროსთვის ამ ტიპის ურთიერთობა ძირეულად მიუღებელია.

აი, ამის ფონზე „ქართული ოცნება“ განწირული სიჯიუტით აგრძელებს ტოტალურად დამამცირებელ რიტორიკას, რომ თურმე ამ ქვეყნის წარსული, აწმყოც და მომავალიც მხოლოდ და მხოლოდ ბიძინა ივანიშვილის ირგვლივაა კონცენტრირებული და მისი ფინანსური კეთილდღეობა და უსაფრთხოება არის მთავარი ღირებულება, რომლის გარშემოც უნდა იყოს მთელი საზოგადოება. რეალურად, ჩვენი მომავალი ამ ყველაფერს უნდა შეეწიროს.

• მთავრობას ხომ ჩვენ, მოქალაქეები ვქირაობთ. დღეს, როცა მთავრობის წევრების განცხადებებს უსმენთ, რა განცდა გაქვთ – ივანიშვილის სამსახურშია მთავრობა და თუ ხალხის? 

როგორც უკვე ვთქვი, დღეს მთელი სახელმწიფო სისტემა ერთი კონკრეტული ადამიანის და მისი მოსამსახურე კლერკების მიერაა მიტაცებული. სწორედ ეს ტერმინი მიესადაგება ამ ტიპის რეჟიმის და კონკრეტულად „ქართული ოცნების“ მმართველებს, რადგან ეს არის სახელმწიფოს მიტაცება.

ჩვენ აღარ გვაქვს დამოუკიდებელი სახელმწიფო ინსტიტუტები, მოქალაქეებთან ანგარიშვალდებული ინსტიტუტები და თუ რამე ჯერ კიდევ განგვასხვავებს რუსეთისგან, ბელარუსისგან ან სხვა მსგავსი ავტორიტარული და დიქტატორული ქვეყნებისგან არის ის, რომ ჯერ კიდევ დარჩენილია გარკვეული თავისუფლების კუნძულები ოპოზიციური პოლიტიკური პარტიების, ხელისუფლების გავლენისგან დარჩენილი მედიის და სამოქალაქო საზოგადოების ორგანიზაციების სახით. სხვა ყველაფერს აკონტროლებს ამ ერთი ადამიანის მოსამსახურეთა ფენა. გასაგებია, რომ ისინი არ გამოხატავენ საერთო ინტერესებს და სასაცილოდ არ ჰყოფნით, მართლა ვერ იგებენ, ორგანულად ვერ აღიქვამენ, როდესაც მოქალაქე მათგან ანგარიშვალდებულებას ითხოვს.

იქნება ეს პარლამენტარი, მინისტრი, ბიუროკრატიის მოხელე, პოლიციელი თუ სკოლის დირექტორი, ვერ იაზრებს, რომ ისინი ჩვენ დავიქირავეთ, ჩვენი, მოქალაქეების ხარჯზე არსებობენ, დროებითი მოხელეები არიან და ჩვენს ინტერესებზე უნდა მუშაობდნენ.

• კობახიძე ამბობს, რომ ივანიშვილი თავისი შემოსავლის 90 პროცენტს ქველმოქმედებაში ხარჯავს. თქვენ, როგორც საქართველოს მოქალაქე, გრძნობთ ივანიშვილის ქველმოქმედების სიკეთეებს?

ესეც არის ძველი, გაცვეთილი რიტორიკა, რითაც 2012 წელში უზრუნველყო ამ პოლიტიკურმა ძალამ არჩევნებში გამარჯვება. ქველმოქმედება არის ის, რომელზეც შემდეგ ანგარიშებს აღარ უყენებენ ადამიანებს. აღარ უყენებენ პირობებს, რომ რადგან გაგიკეთე, ახლა ჩემი ერთგული უნდა იყო.

ახლა ბევრად ნათლად გამოჩნდა, რომ ეს „ქველმოქმედება“ არ იყო კლასიკური გაგებით ქველმოქმედება, არამედ იყო კაპიტალდაბანდება გარკვეულ ჯგუფებში, საზოგადოების გარკვეულ ფენებში, ე.წ. ძველი, საბჭოური ყაიდის ინტელიგენციაში და აი, ამ პიარის ნაწილი იყო.

შემდეგ ამ მაფიოზური პრინციპით ორგანიზებულ და მასზე დაქვემდებარებულ  მოსამსახურეთა ფენით ივანიშვილმა მთელი სახელმწიფო მიიტაცა და გაცილებით მეტი მიითვისა და ამოიღო ეს კაპიტალდაბანდება, ვიდრე ე.წ. ქველმოქმედებაში დახარჯა.

ყველა გონიერ მოქალაქეს სასაცილოდ არ ჰყოფნის ეს და იცის, ხვდება, რომ რუსული ოლიგარქიული ფორმით წარმოებულ „ქველმოქმედებას“ ვერ ექნება კეთილშობილური მიზნები, რადგან დღეს მთელი ქვეყანა ივანიშვილის კერძო კომპანიადაა გადაქცეული.

• საქართველოს მოქალაქის სახელით „ოცნება“, ფაქტობრივად, ევროკავშირისკენ მიმავალ გზას კეტავს ქვეყნისთვის. როგორი უნდა იყოს მოქალაქეების პასუხი ამ განცხადებებზე, რას უპასუხებდით ირაკლი კობახიძეს?

ევროპის გზას რაც შეეხება, დღეს არის კრიტიკული მომენტი, დიდი გადალაგების, შესაძლებლობის და პერსპექტივის გაჩენის, რომელიც საუკუნეების განმავლობაში იშვიათად ხდება და რომლის გამოყენებაც აუცილებელია. ამიტომ მთელი საზოგადოება უნდა იყოს მობილიზებული ამისკენ და ჩანს კიდევაც ეს განწყობები საზოგადოებაში.

უკრაინაზე რუსეთის თავდასხმის, რუსული აგრესიის ფონზე, რუსეთის რეალური სახის ფონზე ხდება ეს ყველაფერი და ჩვენთვისაც ეს არის საუკეთესო შანსი ევროპასთან ინტეგრაციის.

როგორც უკრაინა ურთიერთობს დასავლეთთან დღეს, ახსენებს წარსულში დაშვებულ შეცდომებს და ფაქტობრივად, შეტევის დიპლომატია აქვს, ახსენებს მის პასუხისმგებლობას და გულგრილობას წარსულში ამ თემის მიმართ, ამის ფონზე კი განიმტკიცებს როგორც სამხედრო, ასევე პოლიტიკურ გარანტიებს, რომ იქნება ინტეგრირებული ძლიერი დასავლური ქოლგის ქვეშ.

ამის ფონზე ჩვენ ვხედავთ, რომ საქართველო ამ მმართველი რეჟიმის მიერ ანესთეზირებულია, რომ უბრალოდ ვერ ამოძრავდეს და ვერ გამოიყენოს ეს შანსი.

ცხადად ჩანს, რომ საზოგადოების აბსოლუტური უმრავლესობა სხვა განზომილებაშია, სოლიდარულია უკრაინის მიმართ, ესმის, თუ რა ხდება ამ კონტინენტზე, ამ სამყაროში, სად უნდა იყოს ჩვენი ქვეყანა მომავალში და მმართველი პარტიის წარმომადგენლები, სახელმწიფო ინსტიტუტები და მათი ხელმძღვანელები იდენტიფიცირდებიან პრორუსულ ბანაკში. აი, ეს არის რეალური განხეთქილება, აცდენა და პარალელური რეალობები.

მესმის, მმართველი პოლიტიკური რეჟიმის რიტორიკა და ეს განწირული მცდელობა, რომ რაღაცნაირად აჩვენონ თითქოს მათ არაფერი აშინებთ და სტაბილურად არიან. მაგრამ დიდი ალბათობით მათ მოუწევთ რეალობას ჩახედონ თვალებში და რაღაც ფორმით, დათმონ ძალაუფლება.

ეს პოლიტიკური ძალა, ფაქტობრივად, ყველაფერს გააკეთებს იმისთვის, რომ ევროპულ სივრცეში ჩვენი ინტეგრაცია არ რეალიზდეს, ეს მათთვის თვითმკვლელობას უდრის, რადგან ავტორიტარული რეჟიმი ვერაფრით იქნება ევროპული სივრცის ნაწილი. ისინი აცნობიერებენ, რომ კანდიდატის სტატუსზე უარის თქმის შემთხვევაში, ამ შანსის ჩაშლის შემთხვევაში, ამას საზოგადოება ჩუმად არ შეხვდება. კიდეც რომ შეხვდეს, არც რუსულ ბანაკში დარჩენა ნიშნავს „ოცნებისთვის“ გარანტიებს, გამომდინარე იქიდან, რომ რუსული ბანაკი არ არის უსაფრთხო და პოლიტიკური ძალის თუ პირადი კომფორტის უზრუნველმყოფელი.

შიდა კრიზისი და ჩამოშლის საფრთხე – ორმხრივად წამგებიან მდგომარეობაში იმყოფება „ოცნება“ და აქედან გამომდინარე აიხსნება ეს უკიდურესად აგრესიული, უხეში, ბრიყვული და შეურაცხმყოფელი გამოხტომები, რომელიც ამ რეჟიმის წარმომადგენლებს აქვთ.

ამ პოლიტიკის მთავარი სუბიექტი კი არსად ჩანს, თითქოს ივანიშვილი არ არსებობს. მისი პირით გველაპარაკებიან ნულოვანი პოლიტიკური წარსულის თუ ავტორიტეტის მქონე ივანიშვილის კომპანიის კლერკები – ღარიბაშვილი, კობახიძე, კალაძე თუ ვოლსკი.

• ივანიშვილთან გაქვთ კითხვები? რას ეტყოდით მას, როგორც საქართველოს მოქალაქე?

არანაირი კითხვა არ მაქვს ივანიშვილთან. დიდი ხანია გასაგებია, რას წარმოადგენს, რა ამოძრავებს ამ ადამიანს. ვფიქრობ, მას ახალ რეალობაში უნდა დაუსვან კითხვები დამოუკიდებელმა საგამოძიებო და სასამართლო ორგანოებმა იმაზე, თუ როგორ მიიტაცა და მიითვისა ამ ადამიანმა მთელი ქვეყნის და საზოგადოების რესურსები. ფაქტობრივად, თავისი პირადი უსაფრთხოების და კეთილდღეობის უზრუნველყოფის გამო მთელი ქვეყნის და ხალხის უსაფრთხოება დააყენა კითხვის ნიშნის ქვეშ. აი, ამ კითხვებზე პასუხის გაცემა მას აუცილებლად მოუწევს.

• საქართველოს ისტორიაში გეგულებათ ისეთი პიროვნება, რომელმაც ტოლობის ნიშანი დასვა მასა და ერს შორის?

ჩვენ, მოქალაქეებს, რასთანაც გვინდა რომ ვასოცირდებოდეთ, ამ ქვეყნებს მსგავსი რამ არ ახასიათებთ. ეს ახასიათებს ტოტალიტარულ რეჟიმებს და ამის გამოცდილება, სამწუხაროდ, გვაქვს.

პუტინი ეს არის რუსეთი, რუსეთი ეს არის პუტინი; სტალინი იყო საბჭოთა კავშირი და საბჭოთა კავშირი იყო სტალინი; ლენინი იყო პარტია და პარტია ლენინი და ასე შემდეგ. ეს ნაცნობი და გამოცდილი სქემაა და ახლა ამიტომ ვამბობ, რომ რასაც „ქართული ოცნება“ აკეთებს, ეს არის ძალიან კარიკატურული ანარეკლი ამ რეჟიმების, როცა ცდილობენ ერთი კონკრეტული ჩრდილოვანი, არაოფიციალური მმართველი წარმოგვიჩინონ, როგორც რაღაც უდიდესი ღირებულება და მთელი ეროვნული ინტერესების განსხეულება.

ერთ-ერთი მათი პროპაგანდისტი ლაშა ნაცვლიშვილი როგორც ამბობს, ბიძინა არის ყველგან, ყველაფერში, რაც ნებისმიერ საღად მოაზროვნე მოქალაქეს, უბრალოდ, ღიმილს ჰგვრის.

„ქართულ ოცნებას“ ჰგონია, რომ ამ პროპაგანდას ისევ გადაყლაპავს მისი ელექტორატი, ანუ ისინი, ვისზეც დააფუძნეს მათი სტაბილურობა და ძალაუფლება – ასეთ რეჟიმებს ახასიათებს ხოლმე ილუზიები საზოგადოების ასეთი ნაწილის საიმედოობაზე. საბოლოო ჯამში კი, დამღუპველი ხდება ამ რეჟიმებისთვის ეს წარმოდგენები.

ენერგო-პრო ჯორჯიას ინფორმაციით, ქსელის გეგმური სარეაბილიტაციო სამუშაოების გამო, ხვალ, 14 ივნისს ელექტროენერგიის მიწოდება შეეზღუდება ბათუმის რამდენიმე ქუჩას, ასევე ხელვაჩაურისა და ქობულეთის რამდენიმე სოფელს:

ბათუმში 11:00-დან 17:00 საათამდე დენი გაეთიშება აბონენტებს ნინოშვილის, ჟღენტის, დუმბაძის, კ.გამსახურდიას ქუჩებსა და მიმდებარე ტერიტორიებზე, ასევე ზღისპირა პარკსა და ურეხში.

13:00-დან 18:00 საათამდე – წერეთლის, ჭავჭავაძის, კალიევის, ჯორჯიაშვილის, ბერიძის, პუშკინის და მიმდებარე ქუჩებს.

ხელვაჩაურში 11:00-დან 18:00 საათამდე დენის მიწოდება შეუწყდება აბონენტებს სოფლებში – აჭარის აღმართი, ზედა ჩხუტუნეთი, ჩიქუნეთი, ქოქოლეთი, მაჭახლისპირი, ქედქედი და მიმდებარე სოფლები.

11:00-დან 18:30 საათამდე სოფლებს: ახალსოფელი, ავგია, ჭარნალის, გონიო და მიმდებარე სოფლები. დროის ამ მონაკვეთში დენის მიწოდება შეწყდება აფსაროსის გზატკეცილზე, მირიან მეფისა და მიმდებარე ქუჩებზე. ასევე აეროპორტის დასახლებაში.

11:00-დან 18:30 საათამდე – ავგიას, გონიოს, ახლსოფლის დასახლებას, აფსაროსის გზატკეცილს, მირიან მეფის და მიმდებარე ქუჩებს.

ქობულეთში 12:00- დან 17:00 საათამდე დენი გაეთიშებათ აბონენტებს შემდეგ სოფლებში: ხუცუბანი, სამება, მუხაესტატე, წყავროკა, ოჩხამური და მიმდებარე სოფლები.

არმენ ოგანესიანი 35 წლის მეთოჯინე და მეზღაპრეა მარნეულის მუნიციპალიტეტის დაბა შაუმიანიდან. საკუთარი კერძო სახლის ერთ ოთახში მარიონეტების თეატრი გამართა, სპექტაკლებსაც თავად დგამს და სხვადასხვა სოფელში დადის საკუთარი თეატრით.

„სპექტაკლზე ხანდაზმულებიც მოდიან ხოლმე, მოჰყავთ ძალიან მოხუცებიც, პირველად ვართ თეატრში და შენ რომ არ ჩამოსულიყავი, ისე ჩაივლიდა ჩვენი ცხოვრება, მარიონეტების თეატრს თვალითაც ვერასდროს ვნახავდითო. ბავშვების თეატრად ჩავიფიქრე, მაგრამ ყველას თეატრი გამოვიდა“ – გვიყვება არმენი.

მარიონეტების თეატრი არც არმენს ჰქონდა ნანახი, როცა ბავშვობაში თოჯინების კეთება დაიწყო.

უშუქობაში ჩრდილებთან თითებით თამაში მისთვის შთაგონების წყაროდ იქცა:

„დედა სულ გვიკითხავდა მე და ჩემს ძმას ზღაპრებს, თუმცა ჩრდილებით თამაში და ჩემივე ზღაპრებისთვის თოჯინების დამზადება მერჩია. კითხვა ცოტა მოგვიანებით შემიყვარდა.

უშუქო და ბნელი, ჩრდილებით სავსე დიდი სახლი, ფერადი ფარდაგებით, ხალიჩებით მოფენილი მისტიკურ გარემოდ მეჩვენებოდა.

ბავშვობიდანვე მქონდა ჩემივე გაკეთებული პატარა თეატრი და მშიერივით ვიყავი, რაღაც სასტიკად მაკლდა და არარსებულ, სასურველ სამყაროს თავად ვქმნიდი.

შაუმიანი გამორჩეული დაბაა, ფარაჯანოვის ფილმების ფერებით და განწყობით. აქ ხალხი იტალიურ ეზოებში ცხოვრობს, მრავალფეროვანი, სხვადასხვანაირი ხალხია ერთ დაბაში, სომხები, აზერბაიჯანელები და ცოტაც ქართველები. აივანზე საღამოობით ქალები სხდებიან, დაბა ერთ დღეს მშვიდად ცხოვრობს, მეორე დღეს ჩხუბი და აურზაურია.

ჩემს თოჯინებს ეს ხალხი შთამაგონებდა, მათ არ ჰქონდათ კავშირი ხელოვნებასთან და თეატრთან, მაგრამ ჩემთვის ნამდვილი მსახიობები იყვნენ, თეატრს ქმნიდნენ ყოველდღიურობით, ყოველდღე სპექტაკლი თამაშდებოდა“ – იხსენებს 35 წლის მეთოჯინე და მხატვარი.

„თუ გინდათ მე-19 საუკუნის თბილისის მსგავსი ცხოვრება საკუთარი თვალით ნახოთ, შაუმიანში უნდა ჩამოხვიდეთ“ – გვეუბნება არმენი. მისი თქმით შაუმიანში ახლაც არის მაღაზიები და ადგილები, სადაც ან მხოლოდ კაცები დადიან, ან მხოლოდ ქალები.

არმენი გვიყვება, რომ შაუმიანში ერთი დიდი, სასახლესავით შენობა დგას, სადაც ახლა ბიბლიოთეკაა. მთელმა დაბამ იცის, რომ აქ ნიკო ფიროსმანი მამასთან ერთად ცხოვრობდა ბავშვობაში, მირზაანში დაიბადა, მაგრამ მამამისი შაუმიანში მუშაობდა და ბიჭი თან ჰყავდა ხოლმე.

„ნიკალას ნახატები შაუმიანის გარემოს და ფერებს მახსენებს, დღემდე ასეთი დაბაა შაუმიანი, რომ ჩამოხვიდეთ, ნახავთ. სულ მივდივარ იმ დიდ შენობასთან, სადაც ამბობენ, რომ ნიკალა ცხოვრობდა მამასთან ერთად ბავშვობაში, ვჩერდები და ვუყურებ“ – ამბობს არმენი.

დაბა შაუმიანში სკოლის დამთავრების შემდეგ არმენი ერევანში წავიდა სასწავლებლად, მხატვარ-დიზაინერის ფაკულტეტზე ჩააბარა. ქართულად ვერ საუბრობდა, ვერ წერდა, არც სასწავლო პროგრამები არსებობდა ეთნიკური უმცირესობებისთვის.

სწავლის დასრულების შემდეგ საქართველოში დაბრუნდა, თბილისში იპოვა სამსახური, ქართულად წიგნების კითხვა დაიწყო, ბევრი მეგობარი გაუჩნდა და სასაუბრო ენაც ისწავლა.

თავიდან ძალიან უჭირდა საუბარში ჩართვა, ფიქრობდა, რომ შეცდომების შემთხვევაში დასცინებდნენ მაგრამ მეგობრები ეხმარებოდნენ სწორად გამოეთქვა ფრაზები.

„ვსაუბრობ ქართულად, მაგრამ ინტეგრირებული ვარ მთლიანად-მეთქი, მაინც ვერ ვიტყვი.

ქართულად ისევე თავისუფლად ვერ ვწერ, როგორც ვლაპარაკობ და ამიტომ არ შემიძლია ჩემი თეატრისთვის პროექტები ვწერო. ძალიან მიჭირს, კარგი იქნებოდა ქართული ენის შემსწავლელი ცენტრები ან ქართულის მასწავლებლები იყვნენ ეთნიკური უმცირესობებით დასახლებულ სოფლებში.

როგორც კი ჩამოვედი საქართველოში, გადავწყვიტე თეატრი გამეკეთებინა. ვფიქრობდი, ვინ იცის, სოფლებში რამდენი ბავშვია, ვინც ჩემსავით ელოდება მარიონეტების თეატრის გამოჩენას-მეთქი. ჩემი თეატრი უკვე 4 წლისაა.

პირველი სპექტაკლი თბილისში, თუმანიანის სახლში გავმართე, სოლოლაკში. რაღაც პერიოდი იქ ვმუშაობდი.

სოფლებში მცხოვრებ ბავშვებს არ აქვთ თეატრი და კინო. ამიტომ გადავწყვიტე გამეკეთებინა თეატრი, რომელიც თავად მივიდოდა ბავშვებთან“ – ამბობს არმენი.

არმენი შინ მაყურებლებს ვერ იღებს, არ აქვს დიდი სივრცე ბევრი ბავშვისთვის, ამიტომაც სოფლებში მოგზაურობს სპექტაკლებით.

___________

მთავარ ფოტოზე: არმენ ოგანესიანი. იური მეჩითოვის ფოტო/facebook

„მარკეტში მისი მორიგეობა იწყებოდა 5 საათზე და იქ მიდიოდა ფეხით, როცა ეს ამბავი მოხდა,“ – ამბობს ბათუმში, კობალაძის ქუჩაზე დაშავებული 20 წლის გიორგის და [რადგან ოჯახის სხვა წევრებმა გიორგის შემთხვევის შესახებ არ იციან, დაშავებულის ოჯახის წევრის ვინაობას არ ვასახელებთ – რედ]. გიორგის კეფაში მოხვდა მშენებარე კორპუსიდან ჩამოვარდნილი ხის ძელი და გონება ადგილზე დაკარგა.

გიორგი ამ დრომდე უგონოდაა BAU-ს კლინიკაში, ის ხელოვნური სუნთქვის აპარატზეა.

გიორგი გ. სტუდენტია და სწავლის პარალელურად ერთ-ერთ მარკეტში კონსულტანტად მუშაობს, ზოგჯერ საღამოს ცვლაშიც მორიგეობს, ღამის თორმეტის შემდეგ კი, მეცადინეობა უნდა მოასწროს. გუშინაც საღამოს მორიგეობა უწევდა გიორგის, თუმცა სამსახურში მისვლამდე სულ რამდენიმე წუთით ფეხით მიმავალს თავში მოხვდა მშენებლობიდან ჩამოვარდნილი ნივთი. ასე მოხდა იმიტომ, რომ არც ერთ სახელმწიფო უწყებას და არც ბიზნესს არ ეყო პასუხისმგებლობა, უსაფრთხოების პირობა შეექმნა.

20 წლის გიორგი აჭარის ერთ-ერთი მუნიციპალიტეტიდანაა, ის ბათუმში ნათესავთან ცხოვრობს.

გიორგის ნეიროქირურგიული ოპერაცია უკვე ჩაუტარდა. ის ისევ კომაშია, რეანიმაციულ განყოფილებაში, ექიმები კი, მის მდგომარეობას აფასებენ, როგორც მძიმეს.

„დავიწყეთ მოკვლევა“, – აცხადებენ შრომის ინსპექცია და მუნიციპალური ინსპექცია, რომლებსაც აქამდეც ევალებოდათ იმის გარკვევა, რამდენად დაცულია მშენებლობაზე უსაფრთხოება ისე, რომ იქვე, ქუჩაში გამვლელი ადამიანი არ დაშავდეს. გიორგის ამბავზე გუშინ დაიწყო გამოძიებაც, თუმცა ამ ეტაპზე ვერც კომპანია და ვერც საჯარო უწყებები ვერ პასუხობენ კითხვას: რატომ დაშავდა ქუჩაში ფეხით მოსიარულე კაცი მშენებლობიდან ჩამოვარდნილი ნივთით, თუ სამშენებლო ობიექტზე უსაფრთხოების ყველა ნორმა დაცული იყო?

მშენებარე კორპუსი, საიდანაც ჩამოვარდნილი ძელისგან გიორგი დაშავდა, კომპანია „DS ჯგუფს“ ეკუთვნის. ბათუმის მუნიციპალურმა ინსპექციამ კობალაძის 18-ში მშენებარე კორპუსზე უსაფრთხოების ნორმების დარღვევა ვერ დააფიქსირა 2021 წლის ნოემბრიდან დღემდე იმის მიუხედავად, რომ „პერიოდულად მოწმდებოდა ობიექტის უსაფრთხოების წესებთან შესაბამისობა“.

ბათუმის მუნიციპალური ინსპექციის პრესცენტრში თქვეს, რომ 2019 წელს დააფიქსირეს ამ მისამართზე უსაფრთხოების წესების დარღვევა, კომპანია დაჯარიმდა კიდეც, თუმცა 2021 წლის 19 ნოემბერს საქმისწარმოება შეწყდა, რადგან „სამართალდარღვევა აღმოიფხვრა“.

როგორ იყო დაცული და კანონთან შესაბამისი უსაფრთხოების ნორმები მშენებარე კორპუსზე, როცა ქუჩაში ფეხით ადამიანს მშენებლობიდან ჩამოვარდნილი ნივთი თავში მოხვდა და მძიმედ დაშავდა? – კითხვა ბათუმის მუნიციპალურ ინსპექციაში უპასუხოდ დატოვეს.

„ამ დროისთვის მიმდინარეობს ობიექტის შესწავლა უსაფრთხოების სპეციალისტების მიერ,“- გვითხრეს ბათუმის მუნიციპალური ინსპექციის პრესცენტრში.

საქართველოს შრომის ინსპექციაში კი გვითხრეს, რომ მშენებლობა შეაჩერეს, ვიდრე მოკვლევა არ დასრულდება და არ დადგინდება, დარღვეულია თუ არა უსაფრთხოების კანონით განსაზღვრული ნორმები. შრომის ინსპექციაში ამ ეტაპზე ვერ მოგვაწოდეს ინფორმაცია, ამ დრომდე შემოწმდა თუ არა ეს სამშენებლო ობიექტი.

„კომპანიამ გვითხრა, რომ ყველაფერში დაგვეხმარებიან, ისინი იღებენ პასუხისმგებლობას,“ – ამბობს „ბათუმელებთან“ მძიმე დაშავებული გიორგის და.

კომპანია DS გრუპში, რომლის მშენებარე კორპუსიც არის კობალაძის 18-ში, გუშინ, 12 ივნისს, გვითხრეს ის, რაც მუნიციპალურმა ინსპექციამ თქვა: „უსაფრთხოების ნორმები დაცულია“. კომპანიის დირექტორთან გასაუბრება აჩვენებს, რომ იგი პასუხისმგებლობას უფრო ქარს უკავშირებს – „ურაგანო ამოვარდაო,“ ჩვენთან საუბარიც ასე დაიწყო ოთარ ბერიძემ, DS გრუპ-ის ერთ-ერთმა ხელმძღვანელმა.

„არ ვიცით, რა მოხდა, ჩვენც ვცდილობთ გავიგოთ და ახლა ვიკვლევთ… უცებ მოვარდა ურაგანი. ეს ნივთი, რაც იმ ბიჭს  მოხვდა თავში, ნამდვილად მშენებლობაზე გამოიყენება, მაგრამ არ ვიცი, ჩვენგან თუ ჩამოვარდა ნამდვილად… ჩვენ გვაქვს უსაფრთხოების ნორმები დაცული, ბადეც გვაქვს და არასდროს დავუჯარიმებივართ,“ – გვითხრა ოთარ ბერიძემ, DS გრუპის ერთ-ერთმა ხელმძღვანელმა 12 ივნისს.

22-სართულიან მშენებარე კორპუსზე, საიდანაც ხის ძელი ჩამოვარდა, სამშენებლო ბადე მხოლოდ ორ სართულზეა მოწყობილი – ერთი კორპუსის მე-14 სართულზე, ხოლო მეორე იქ, სადაც ახლა მშენებლობა გრძელდება. კომპანიის ხელმძღვანელი, ოთარ ბერიძე ამბობს, რომ მას კანონის მოთხოვნის შესაბამისად აქვს სამშენებლო ბადეები მოწყობილი და არ იყო ვალდებული კორპუსი მთლიანად შეეფუთა სამშენებლო უსაფრთხოების ბადით.

„დიდი ალბათობით იქ, შესაძლოა, ყოფილიყო დარჩენილი სამშენებლო ნარჩენი, რაც ძალიან ხშირი შემთხვევაა ჩვენს სამშენებლო ინდუსტრიაში და შესაძლოა ეს გადმოვარდა. ხშირად ასეთ ნივთებს ტოვებენ იქ, სადაც მუშაობა დაასრულეს,“ – ეს დავით თხელიძის ვერსიაა, რომელიც შრომის უსაფრთხოების კომპანიის „საფკოს“ თანადამფუძნებელია და ვესაუბრეთ პრაქტიკაზე, როცა მხოლოდ მშენებლობაზე კი არა, მშენებლობასთან ახლოს ქუჩაში გავლაც საფრთხის შემცველი ხდება.

შრომის უსაფრთხოების სპეციალისტი რამდენიმე პრობლემას ასახელებს, რაც მისი დაკვირვებით სამშენებლო ინდუსტრიას ახასიათებს, მათ შორის, შრომის კულტურა, რაც ხშირად დამსაქმებელს არ აქვს, ანუ ადამიანს, ვისთვისაც სამშენებლო ბიზნესი გამდიდრების წყაროა.

„რაც მოხდა ბათუმში, ამ საკითხს სჭირდება მოკვლევა და შესაბამისად, მოკვლევით უნდა დადგინდეს, რა მოხდა,“ – გვიყვება დავით თხელიძე. – „ნებისმიერ სამშენებლო ობიექტზე პროექტის დაგეგმვის ეტაპზე მუშავდება რისკების შეფასების დოკუმენტი, გეგმა, რომლის საფუძველზეც იქმნება შემდეგ დაცვის სისტემები. ამ სისტემებმა უნდა უზრუნველყოს რისკების მინიმუმამდე დაყვანა. სისტემა უნდა ითვალისწინებდეს, როგორც მშენებლობაზე დასაქმებული ადამიანების, ასევე ნებისმიერი პირის უსაფრთხოებას, რომელიც შესაძლოა მშენებლობის არეალში აღმოჩნდეს.

გარე სივრცეები რომ დავიცვათ, ამისთვის საუკეთესო საშუალებაა კოლექტიური დაცვის საშუალებები, მაგალითად, ბადეები, ბარიერები, მოაჯირები… თუმცა მთლიანი ბადის მოწყობას ცალსახად არ ითხოვს 477-ე ტექნიკური რეგლამენტი. კანონი ამბობს, რომ რისკის შეფასების შესაბამისად უნდა დადგინდეს კონკრეტული ღონისძიების საჭიროება. პროცესის მონაწილეებმა უნდა განსაზღვროს, რა ტიპის ბადე სჭირდება სამშენებლო ობიექტს, რა იქნება რაციონალური კონკრეტული ობიექტისთვის…

მე ვფიქრობ, კანონს გამკაცრება ამ კუთხით არ სჭირდება და საერთაშორისო პრაქტიკაც ასეთია – რისკების შეფასების ეტაპზე უნდა განისაზღვროს, რა არის საჭირო. კანონის წინაშე დამსაქმებელი ვალდებულია, რომ ყველა რეალური რისკი ჰქონდეს შეფასებული“, – აღნიშნა „ბათუმელებთან“ დავით თხელიძემ.

რატომ არ შეიძლება ბადით მთლიანად დაიფაროს სამშენებლო ობიექტი? – შრომის უსაფრთხოების სპეციალისტი განმარტავს, რომ ეს პრაქტიკა არსებობს ძირითადად მოპირკეთების ეტაპზე, როცა ადამიანის, ან სამშენებლო ნივთების ვარდის ალბათობა დიდია.

„ხოლო როცა მონოლითური სამუშაო მიმდინარეობს, ამ ტიპის ბადეების გამოყენებამ შესაძლოა უკუსაფრთხე მოგვიტანოს, მაგალითად, შექმნას ხილვადობის პრობლემა,“ – დასძინა დავით თხელიძემ.

რაც შეეხება ქარს, რა დროსაც ქუჩაში მიმავალ გიორგის თავში მშენებლობიდან ჩამოვარდნილი ძელი მოხვდა – უსაფრთხოების სპეციალისტი ამბობს, რომ ქარის და სხვა ბუნებრივი მოვლენის რისკის შეფასება დოკუმენტში უნდა იყოს გაწერილი.

„ქარი და წვიმაც არის სავარაუდო რისკი, თუმცა არსებობს არარეალურად სავარაუდოდ რისკებიც, რაც შესაძლოა დინამიკაში გამოჩნდეს და თავიდან ვერ დავინახოთ, მაგალითად, როცა არანორმალურ ქარზე ვსაუბრობთ, ქარიშხალზე, რომელიც მოგლეჯს ბადეებს და მოაჯირს,“ – განმარტა დავით თხელიძემ, შრომის უსაფრთხოების კომპანიის „საფკოს“ თანადამფუძნებელმა.

დავით თხელიძე, რომელსაც ყოველდღიურ რეჟიმში უწევს კომუნიკაცია დამსაქმებელსა და მშენებლებთან, გვიზიარებს კიდევ ერთ დაკვირვებას:

„ხშირად იურისტებს უფრო ენდობიან დამსაქმებლები, ვიდრე შრომის უსაფრთხოების მენეჯერებს. ფიქრობენ, რომ რადგან ეს გაწერილია საკანონმდებლო ნორმებში, იურისტები უკეთ გაერკვევიან ამაში, მაგრამ ამ რისკების დანახვას და შეფასებას სხვა კვალიფიკაცია სჭირდება… არსებობენ ისეთი დამსაქმებლებიც, რომლებსაც ხარჯის გაღება არ უნდათ, რაც საერთოდ ამორალურობაა“.

ბათუმის მერიამ საკრებულოს დასამტკიცებლად ავარიული სახლების ჩანაცვლების წესი გაუგზავნა, სადაც დეტალურად გაწერა პროგრამაში მონაწილეობის კრიტერიუმები. მერიის ინფორმაციით, ბათუმში უკვე გამოვლენილია სიცოცხლისთვის საფრთხის შემცველი 118 სახლი, სადაც 3000-მდე ოჯახი ცხოვრებს.

ამ სახლების მდგრადობა მერიის დაკვეთით სამხარეულის ექსპეტიზის ბიურომ შეისწავლა. მონაცემები არ არის საბოლოო და მათი რაოდენობა შესაძლებელია გაიზარდოს ახალ მისამართებზე მომავალში ჩატარებული ექსპერტიზების დასკვნების საფუძველზე.

მერიის მიერ გაწერილი წესის შესაბამისად, პროგრამაში მონაწილეობის მისაღებად დაინტერესებულმა პირმა, ან პირებმა მერიას  განცხადებით უნდა მიმართონ. განცხადებას თან უნდა დაერთოს წერილობითი თანხმობა ავარიული სახლის ჩანაცვლების თაობაზე.

განმცხადებლებმა მერიას უნდა მიაწოდონ ასევე ინფორმაცია შესაბამისი მიწის ნაკვეთის საკადასტრო კოდის, ფართობისა და მდებარეობის შესახებ, შენობის ამსახველი ფოტოები და  წერილობითი თანხმობა იმის შესახებ, რომ  აძლევენ უფლებას მერიას მიმართოს კომუნალური სერვისების მიმწოდებელ კომპანიებს გამორთონ წყლი, გაზი და დენი.

პროექტის განმახორციელებელი, ანუ მერია უზრუნველყოფს ავარიული სახლის ნაცვლად ახალი შენობა-ნაგებობის  პროექტისა და დეტალური საპროექტო-საინჟინრო მომსახურების შესყიდვას კანონით დადგენილი წესით.

მომზადებული პროექტი უნდა შეთანხმდეს დაინტერესებულ პირებთან, ანუ ავარიული სახლის მესაკუთრეებთან.

ამასთან, აუცილებელია დაინტერესებული პირების თანხმობა, რომ ავარიული სახლის ჩანაცვლების შედეგად, შენობის საერთო ფართობის გაზრდის შემთხვევაში, მათ არ ექნებათ პრეტენზია [მათ შორის, გაზრდილი ფართობის მუნიციპალიტეტის საკუთრებად დარეგისტრირებაზე].

მერია უფლებამოსილია, დაინტერესებულ პირებს საჭიროების შემთხვევაში მოსთხოვოს დამატებითი დოკუმენტაციის წარდგენა ან შესაბამისი პირობების შესრულება. ამასთან, ავარიული სახლების ჩანაცვლების მიზნით წარდგენილი დოკუმენტების სისწორისთვის პასუხისმგებლობა ეკისრება განაცხადის წარმდგენ პირებს, ანუ ავარიული სახლის მესაკუთრეებს.

ავარიული სახლების ჩანაცვლებისთვის საჭირო ღონისძიებები მუნიციპალური ბიუჯეტით დაფინანსდება.

ავარიული სახლების ჩანაცვლებისას, მერია უფლებამოსილია ასევე დაინტერესებული პირებს შესთავაზოს მერიის საბინაო ფონდში არსებული ბინა, კანონმდებლობით დადგენილი წესის შესაბამისად.

ავარიული სახლის ჩანაცვლებისას, დაინტერესებული პირების საკუთრებაში არ იანგარიშება:

ბინათმესაკუთრეთა ამხანაგობის წევრთა საერთო ქონება, ავტოფარეხი, სარდაფი, სხვენის ფართობი, რომელიც არ გამოიყენება საცხოვრებლად. სხვენის [შენობის ბოლო სართულის გადახურვის ზემოთ, გარე კედლებსა და ქანობიანი ან ბრტყელი სახურავის ფერდების შიდა ზედაპირებს შორის განლაგებული სივრცე] ფართობი იმ შემთხვევაშიც, თუ მისი საშუალო სიმაღლე იატაკიდან ჭერამდე 1.6 მეტრზე ნაკლებია.

ეს ფართობები მხოლოდ მერიის გადაწყვეტილებით შესაძლებელია  ჩაითვალოს, თუ იგი კეთილმოწყობილია და ფაქტობრივად გამოიყენება საცხოვრებლად.

ავარიული სახლების ჩანაცვლების შესახებ დადებითი გადაწყვეტილების მიღების შემთხვევაში, დაინტერესებულ პირები, დადგენილი წესის შესაბამისად, მიიღებენ ბინის ქირის კომპენსაციას.

დღეს, 13 ივნისს, ამერიკის შეერთებული შტატების ელჩი საქართველოში კელი დეგნანი, არასამთავრობო და სამოქალაქო სექტორის წარმომადგენლებს შეხვდა. შეხვედრა, რომელიც საქართველოსა და აშშ-ს 30-წლიან თანამშრომლობას ეძღვნებოდა, ბათუმის სახელმწიფო უნივერსიტეტში გაიმართა.

საზოგადოების ნაწილი მიიჩნევს, რომ „ქართული ოცნების“ რიტორიკა გახდა ანტიდასავლური, ფიქრობთ თუ არა, რომ საქართველოს ხელისუფლება პოლიტიკურ კურსს ცვლის? – ვკითხეთ შეხვედრაზე კელი დეგნანს.

ელჩის განცხადებით, 30 წელია აშშ-ი მუშაობს და თანამშრომლობს საქართველოსთან, საქართველოს ევროკავშირში და ევროატლანტიკურ სივრცეში სრული ინტეგრაციისთვის.

„ყველაფერი, ყველა ჩვენი პროექტი თუ პროგრამა რასაც ვაკეთებთ, მიმართულია იმისკენ, რომ აღსრულდეს ქართველი ხალხის სურვილი, რაც გახლავთ ევროკავშირში და ნატოში ინტეგრაცია. ეს უნდა ქართველ ხალხს და სწორედ ამას ვუჭერთ ჩვენ მხარს, რომ ქართველმა ხალხმა და ქვეყანამ მიაღწიოს წარმატებას მის ევროპულ მისწრაფებებში.

ის განცხადებები, რაც ისმის, რომ თითქოს აშშ-ს სურს საქართველოს ჩათრევა ომში ან მეორე ფრონტის ხაზის გახსნა, ეს არის 100%-ით რუსული დეზინფორმაცია და ეს აბსოლუტურად არ არის სიმართლე.

იმიტომ, რომ აშშ-ს ყველაზე მეტად უნდა რომ შეჩერდეს ეს ომი და ყველაფერს აკეთებდა იმისთვის, რომ საომარი მოქმედებები ყოფილიყო თავიდან აცილებული, ჩვენ ამისთვის ძალიან დიდი მუშაობა გავწიეთ. რა თქმა უნდა, არ გვინდა, რომ რომელიმე ქვეყანაში იყოს ომი.

და ზოგადად, ევროკავშირი და ნატო არის ორგანიზაციები, რომლებიც უზრუნველყოფენ სტაბილურობას, უსაფრთხოებას, წარმატებას და მშვიდობას.

სწორედ ევროატლანტიკური სივრცის წევრობა ნიშნავს და არის გარანტი მშვიდობის და ზუსტად ეს გვინდა ჩვენ, ეს უნდა ქართველ ხალხს და სწორედ ამიტომ ჩვენ ვართ სრულიად ერთგულნი საქართველოს ამ მისწრაფებების და ქვეყნის ტერიტორიული მთლიანობის და სუვერენიტეტის“ – განაცხადა კელი დეგნანმა.

ბათუმის მერია, ცენტრალურ პარკში კომერციული ფართობების ფასი განსაზღვრა. იმ შემთხვევაში, თუ საკრებულო შესაბამის განკარგულებას დაამტკიცებს, 1 კვ. მეტრის საიჯარო ფასი 200 ლარი იქნება. შესაძლოა ეს ფასი ელექტრონულ აუქციონზე კონკურენციის პირობებში გაიზარდოს კიდეც.

ამ დრომდე ფასი 150 ლარი იყო.

განმარტებითი ბარათის მიხედვით, საიჯარო ფასი სამხარაულის ექსპერტიზის ბიუროს მიერ დადგენილი საპრივატიზებო ფასის მიხედვით გამოიანგარიშეს.

მერიის ინფორმაციით, პარკის ტერიტორიაზე რამდენიმე მოიჯარეს ხელშეკრულების ვადა გაუვიდა, იგივე ნაკვეთების სარგებლობაში გადაცემის მოთხოვნით მერიაში განაცხადებია შესული.

ბათუმის საკრებულოს სხდომა 17 ივნისს გაიმართება, ამის შემდეგ კი მერია გასასხვისებელ ფართობებს აუქციონზე გაიტანს.