ამერიკის შეერთებული შტატების საელჩო საქართველოში რუსულ დეზინფორმაციას კიდევ ერთხელ გამოეხმაურა. საელჩოს მიერ ფეისბუქის პირად გვერდზე გამოქვეყნებული განცხადების მიხედვით, „რუსული დეზინფორმაციის მანქანას სჯერა, რომ აბსურდული ტყუილების მრავალჯერ გამეორებით რეალობა შეიცვლება და ისტორიას გადაწერენ.
ფაქტები კი ასეთია:
1991 წელს რუსეთი შეიჭრა საქართველოში
2008 წელს რუსეთი შეიჭრა საქართველოში
2014 წელს რუსეთი შეიჭრა უკრაინაში
2022 წელს რუსეთი შეიჭრა უკრაინაში
ამ და სხვა საომარი მოქმედებების დაწყებას რუსეთი აბრალებს ყველას, საკუთარი თავის გარდა. მათ თუ დავუჯერებთ, უკრაინაში ომი დაიწყო თავად უკრაინამ, ნატომ, ამერიკის შეერთებულმა შტატებმა და რაოდენ გასაკვირიც არ უნდა იყოს – ებრაელმა ნაცისტებმა.
დასავლეთის ერთობლივი მხარდაჭერით საქართველო და უკრაინა ფეხზე დგას, ინარჩუნებს სუვერენიტეტსა და დამოუკიდებლობას. რაც არ უნდა აღიზიანებდეს რუსეთს ამ ქვეყნების დამოუკიდებლობა, შეერთებული შტატები თავის პარტნიორებს ზურგს არ შეაქცევს. დასავლეთი ასეთი ერთიანი არასდროს ყოფილა“, – წერს აშშ-ის საელჩო საქართველოში ფეისბუქის თავის გვერდზე.
ამერიკის ელჩმა, კელი დეგნანმა, გუშინ, 13 ივნისს, ბათუმში ყოფნისას ასევე თქვა: „განცხადებები, რაც ისმის, რომ თითქოს აშშ-ს სურს საქართველოს ჩათრევა ომში ან მეორე ფრონტის ხაზის გახსნა, ეს არის 100%-ით რუსული დეზინფორმაცია და ეს აბსოლუტურად არ არის სიმართლე“.
___
მთავარი ფოტო: აშშ-ის საელჩოს მიერ გამოქვეყნებულ ტექსტს თან ერთვის 2008 წლის რუსეთ-საქართველოს ომის დროს გადაღებული რუსული ტანკის ფოტო, რომელზეც მოპარული უნიტაზი დევს.
___
რუსული დეზინფორმაციაა, თითქოს აშშ-ს მეორე ფრონტის გახსნა სურდეს – კელი დეგნანი