დიდი ბრიტანეთის დაზვერვის ინფორმაციით, გასულ შაბათ-კვირას გრძელდებოდა მძვინვარე ბრძოლა სევეროდონეცკისთვის. უწყება ვარაუდობს, რომ მომავალი თვეების განმავლობაში, სწორედ მდინარე სევერსკი დონეცის გადალახვის მცდელობები იქნება იმ მნიშვნელოვან ფაქტორებს შორის, რომლებიც ამ ომის კურსს განსაზღვრავს.
„დონბასში რუსეთის ფრონტის ხაზზე, მთავარი, 90-კილომეტრიანი ზოლი სწორედ მდინარის დასავლეთით გადის.
დონბასზე შეტევაში წარმატების მისაღწევად, რუსეთს მოუწევს ან ამბიციური დარტყმები ფლანგიდან ან მდინარეზე შტურმით გადასვლა,“ – აღნიშნავს დიდი ბრიტანეთის დაზვერვა 13 ივნისს ტვიტერზე გამოქვეყნებულ რელიზში.
უწყების ცნობით, უკრაინის ძალებმა, უკან დახევისას, არაერთხელ მოახერხეს ხიდების განადგურება, „მაშინ, როდესაც რუსეთის არმია უშედეგოდ ცდილობდა, აღედგინა კოორდინაცია, რომელიც აუცილებელი იყო თავდასხმების ფონზე მდინარის გადასალახად.
გაერთიანებული სამეფოს თავდაცვა უკრაინაში მიმდინარე საბრძოლო მოქმედებებზე სადაზვერვო ცნობარს ყოველდღიურად აქვეყნებს. 12 ივნისის რელიზში, უწყება მიუთითებდა, რომ რუსეთი ცდილობს თავისი არტილერიისა და რიცხოვნობის გამოყენებას სევეროდონეცკისა და მისი მიმდებარე ტერიტორიის დასაპყრობად.
მთავარი ფოტო: მდინარე სევერსკი დონეცის გადალახვის წარუმატებელი მცდელობა 2022 წლის მაისში/ფოტო: InformNapalm
