დაახლოებით ერთთვიანი სასტიკი ბრძოლების შემდეგ რუსეთის არმია სევეროდენცკის უდიდეს ნაწილს აკონტროლებს, ინდუსტრიული ზონის გარდა, უკრაინის შეიარაღებული ძალების ნაწილები და ასობით მშვიდობიანი მოქალაქე კი, ქიმიური ქარხანა „აზოტის“ მიწისქვეშა ბუნკერებს აფარებენ თავს.
ასეთ ინფორმაციას ავრცელებს დიდი ბრიტანეთის დაზვერვა ტვიტერზე 15 ივნისს გამოქვეყნებულ რელიზში.
უწყება ვარაუდობს, რომ რუსეთის ძალები „აზოტის“ გარშემო გამაგრდებიან, რაც დროებით ხელს შეუშლის არმიის ხელმძღვანელობას, ეს დანაყოფები სხვა ადგილებში, სხვა მისიებისთვის გამოიყენოს.
„ქალაქებში ბრძოლის რუსულმა საომარმა ტაქტიკამ, რომელიც არტილერიის ინტენსიურ გამოყენებას ეფუძნება, უმნიშვნელოვანესი ზიანი და მსხვერპლი გამოიწვია“, – აღნიშნავს დიდი ბრიტანეთის დაზვერვა და დასძენს, რომ დიდი ალბათობით, არც აგრესიის დაგეგმვისას და არც მისი დაწყებისას, რუსეთი ასეთ ძლიერ წინააღმდეგობას და კონფლიქტის ასეთ ნელ განვითარებას არ ელოდა“.
გაერთიანებული სამეფოს თავდაცვა უკრაინაში მიმდინარე მოვლენებზე დაზვერვის ცნობებს ყოველდღიურად აახლებს. ტვიტერზე გამოქვეყნებულ გუშინდელ რელიზში უწყება აღნიშნავდა, რომ რუსეთი თავდაცვის ბიუჯეტს ზრდის, თუმცა დასავლეთის სანქციებისა და გამოუცდელობის გამო მას ახალი სამხედრო ტექნიკის წარმოება და უკრაინაში დაკარგული შეიარაღების ჩანაცვლება გაუჭირდება.
მთავარი ფოტო: “აზოტის” ქიმიური ქარხანა სევეროდენცკში
