Batumelebi

„ამ კანონს ისევ გაიწვევენ, სხვა გამოსავალი ხელისუფლებას არ ექნება… ვითომ რომ წერენ: ამას არ ეხება, იმას ეხება, ეს ყველაფერი ტყუილია: რუსული კანონი შეეხება ყველას,“ – პარლამენტში რუსული კანონის დაბრუნებაზე ეს რეაქცია აქვს ბიზნესმენ არკადი კახაძეს, ის ყველის საწარმო „ცეზარის“ მფლობელია და ხულოში დამზადებული ყველი აშშ-ში გააქვს.

2023 წლის მარტშიც აპროტესტებდა ეს ბიზნესმენი „ქართული ოცნების“ მიერ პარლამენტში რუსული კანონის მიღებას. „სამარცხვინოა კანონის მიღება უცხო ქვეყნის აგენტების შესახებ. თავს იჭრის ამით ხელისუფლება,“ – ამბობდა ერთი წლის წინ არკადი კახაძე.

მას შემდეგ კანონი „ქართულმა ოცნებამ“ გაიწვია და თქვა, რომ მას აღარ დააბრუნებდა, თუმცა მმართველმა პარტიამ საზოგადოება მოატყუა. როგორია ხელისუფლების ტყუილზე ბიზნესმენის პასუხი, რომელიც დასავლეთში სხვადასხვა დონორ ორგანიზაციასთან დღესაც თანამშრომლობს, ხოლო ყველის საწარმო „მერსი ქორფსის“ დაფინანსებით მოაწყო?

„ეს ნიშნავს, რომ უთავმოყვარეო ხარ და არ უნდა იყო იქ, სათავეში“, – მიიჩნევს ბიზნესმენი და დასძენს: „საბავშვო ბაღში არ იქცევა ჩემი ბავშვი ასე, ეს ქვეყანაა მართლა და არა შპს, როგორც გინდა, ისე შეცვალო, როცა გინდა.

არკადი კახაძის აზრით, ხელისუფლება გაორმაგებულ პროტესტს მიიღებს, თუ კანონს ისევ არ გაიწვევს.

„პროტესტი ახლა უფრო მეტი უნდა იყოს, რადგან ძალიან უთავმოყვარეოდ იქცევიან. მე დარწმუნებული ვარ, თვითონაც არ უნდოდათ ამ კანონის შემოტანა. გარე რაღაც ვალდებულება ექნებათ დიდი, რასაც ვერ გადადიან, თორემ იციან ხომ ხალხის რეაქცია, როგორიც იქნება… ჩემამდე არ დადის, ეტყობა, მითითებებს ასრულებენ. რუსული კანონი – ხალხმა დაარქვა ასე.

ეს ძალიან არასერიოზულია, პოლიტიკოსი ხარ, ქვეყნის მმართველი: გაიწვიე და ისევ შემოგაქვს უკან? მარტო პრინციპის გამო აღარ გავაკეთებდი ამას.

გამჭვირვალობას რომ ახსენებენ, რა გამჭვირვალობაზეა ლაპარაკი? ყველა ტრანზაქცია არის ხელმისაწვდომი ხელისუფლებისთვის. რას ითხოვენ, სრულიად გაუგებარია,“ – მიიჩნევს საწარმოს მფლობელი.

ბიზნესმენს ვკითხეთ, ამ ეტაპზე რა სახის დახმარებას იღებს დონორებისგან და როგორ აისახება რუსული კანონი ქართული ბიზნესის საერთაშორისო ორგანიზაციებთან თანამშრომლობაზე?

„საქართველოში რაც კეთდება, ევროპელი და ამერიკელი დონორების მხარდაჭერით კეთდება ყველაფერი. ჩვენ ამ ეტაპზე ტრენინგები გვაქვს, სწავლება და კონსულტაცია. ცოდნა ყველაზე ღირებულია, რასაც გვაძლევენ. ხელისუფლებიდან, აბა, ხელის შეშლის მეტი ჯერ მე არაფერი მახსოვს.

გთხოვთ, იქნებ დაუსვათ შეკითხვა თორნიკე რიჟვაძეს, ან აჭარის სოფლის მეურნეობის მინისტრს, ხულოს მერს, პარლამენტარს: ხულოში რომ საწარმოა, თუ ხართ ერთხელ მაინც ნამყოფი, რა სჭირდებათ თუ მოიკითხეთო.

იცით, როგორ არის: სიმართლეს თუ ამბობ, „ნაციონალი ხარ“, არადა გზა არ გაქვს, წყალი არ გაქვს… სოციალურ დახმარებებზე და სოცდაუცველების დასაქმებებზე დასვეს მთელი რაიონი. 300 ლარს აძლევ ადამიანს და ღუპავ მის ცხოვრებას, მომავალს უკარგავ.

ხელისუფლება უნდა დაფიქრდეს, ხვალ აღარ იქნები და ამით რამხელა საქმე შავდება… ჩვენ ყველას გვინდა ევროპაში,“ – გვითხრა არკადი კახაძემ.

—————–

„ქართული ოცნება“ კვლავ აპირებს რუსული კანონის მიღებას. ეს კანონპროექტი 2023 წლის მარტში მასობრივი პროტესტის შემდეგ „ოცნებამ“ უკან გაიწვია და პირობა დადო, რომ მას აღარასოდეს დაუბრუნდებოდა. ანალოგიურმა კანონმა რუსეთში მოსპო სიტყვის თავისუფლება, გააქრო ყველა დემოკრატიული ინსტიტუტი და გაამყარა პუტინის რეჟიმი.

ე.წ. რუსული კანონი, რომელიც გრანტის მიმღებ ორგანიზაციებს „უცხოური ძალის ინტერესების გამტარებლის“, ხოლო მათ შორის აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის“ სტატუსებს მიანიჭებს.

ჩვენ ხელოვნურ ინტელექტს ვკითხეთ, რა შედეგები მოჰყვება, თუ საქართველოს მთავრობა მიიღებს კანონს „უცხოური გავლენის აგენტების შესახებ“, რომელსაც ახლა ეწოდება „უცხოური ინტერესების გამტარებელი ორგანიზაციების“ კანონი, მაგრამ რომელიც ვრცელდება მხოლოდ მედიასა და არასამთავრობო ორგანიზაციებზე?

გთავაზობთ ChatGPT-ს რამდენიმე პასუხს, იმ პოტენციურ რისკებზე, რაც ასეთი კანონის მიღებას შეიძლება მოჰყვეს; კერძოდ კანონის მიღებას, რომელიც დამოუკიდებელ მედიასა და არასამთავრობო ორგანიზაციებს, მონიშნავს „უცხოური ინტერესების გამტარებელ ორგანიზაციებად“ საქართველოში. კითხვის ფორმულირებისას ხელოვნურ ინტელექტთან დავასახელეთ კანონის ის შეცდომაში შემყვანი სახელიც, რომელიც მას მთავრობამ ახლახან შეურჩია – „უცხოური გავლენის გამჭვირვალობის შესახებ კანონი“.

ხელოვნური ინტელექტი შედეგების შეჯამებისას წერს, რომ „მთლიანობაში, კანონის იმპლემენტაციას, რომელიც ამ ფორმით მიემართება მედიისა და არასამთავრობო ორგანიზაციების, შეიძლება ჰქონდეს შორსმიმავალი შედეგები საქართველოს დემოკრატიაზე, სამოქალაქო საზოგადოებასა და საერთაშორისო პოზიციებზე. ამან შეიძლება გამოიწვიოს ხელისუფლების კონტროლის გაზრდა, სამოქალაქო მონაწილეობის შემცირება და ქვეყანაში განსხვავებული ხმებისთვის სივრცის შემცირება“.

ChatGPT წერს, რომ ასეთი კანონის მიღებას შეიძლება ჰქონდეს რამდენიმე პოტენციური გავლენა, მათ შორის:

• გამოხატვის თავისუფლების ჩახშობა: ასეთმა კანონმა შეიძლება გამოიწვიოს ხელისუფლების კონტროლი და ცენზურა მედიასაშუალებებსა და არასამთავრობო ორგანიზაციებზე. ეს, სავარაუდოდ, გამოიწვევს გამოხატვის თავისუფლების ჩახშობას, რადგან ამ ორგანიზაციებს შეიძლება ეშინოდეთ საპასუხო ანგარიშსწორების გამო სენსიტიური საკითხების გაშუქების ან მთავრობის პოლიტიკის კრიტიკისთვის.
• ძირის გამოთხრა სამოქალაქო საზოგადოებისთვის: არასამთავრობო ორგანიზაციები გადამწყვეტ როლს ასრულებენ ადამიანის უფლებების, სოციალური სამართლიანობისა და კარგი მმართველობის ადვოკატირებაში. საგარეო გავლენის აგენტებად მონიშვნამ, შეიძლება შეარყიოს მათი ლეგიტიმაცია და ეფექტურობა, რაც შეასუსტებს სამოქალაქო საზოგადოებას და მის უნარს, დააკისროს მთავრობა პასუხისმგებლობა.
• დემოკრატიული პრინციპების გაუარესება: დამოუკიდებელი მედიისა და არასამთავრობო ორგანიზაციების ასეთი კანონით მიზანში ამოღებამ, შეიძლება დაარღვიოს დემოკრატიული ღირებულებები, როგორიცაა გამჭვირვალობა, ანგარიშვალდებულება და კანონის უზენაესობა. ეს შეიძლება მიანიშნებდეს საქართველოს დემოკრატიულ განვითარებაში რეგრესზე და გამოიწვიოს ავტორიტარიზმის გაზრდა.
• შემაკავებელი ეფექტი საერთაშორისო ურთიერთობებზე: ასეთი კანონის მიღებამ შეიძლება დაძაბოს საქართველოს ურთიერთობა უცხოურ მთავრობებთან და საერთაშორისო ორგანიზაციებთან, რომლებიც მხარს უჭერენ მედიის თავისუფლებას და სამოქალაქო საზოგადოების განვითარებას. ამან შეიძლება გამოიწვიოს დიპლომატიური დაძაბულობა და შეამციროს საერთაშორისო მხარდაჭერა საქართველოს დემოკრატიული ინსტიტუტებისთვის.

• ეკონომიკური გავლენა: არასამთავრობო ორგანიზაციებს და მედიასაშუალებებს, რომლებიც დამოკიდებული არიან უცხოურ დაფინანსებაზე, შესაძლოა შეექმნათ ფინანსური პრობლემები ან დაიხურონ მთავრობის გაძლიერებული კონტროლისა და შეზღუდვების გამო. ამან შეიძლება გამოიწვიოს სამუშაო ადგილების დაკარგვა და მედიის პლურალიზმის შემცირება, რაც გავლენას მოახდენს როგორც ეკონომიკაზე, ასევე საჯარო დისკურსის ხარისხზე.

„ქართული ოცნების“ გადაწყვეტილებას ე.წ. რუსული კანონის დაბრუნების შესახებ ევროკავშირმა უკვე შეაფასა, როგორც შემაშფოთებელი და დემოკრატიული პროცესებისთვის საფრთხისშემცველი ფაქტი.

ევროკავშირის საგარეო ქმედებათა სამსახურის პრესსპიკერმა პიტერ სტანომ, გუშინ 4 აპრილს განაცხადა, რომ საქართველოს მმართველი პარტიის განცხადება „უცხოური გავლენის გამჭვირვალობის შესახებ“ კანონპროექტის ხელახლა შემოტანასთან დაკავშირებით სერიოზულ შეშფოთებას იწვევს. პიტერ სტანოს თქმით, გამჭვირვალობა არ უნდა იქნას გამოყენებული სამოქალაქო საზოგადოების თავისუფალი მოქმედების შესაძლებლობის შეზღუდვის ინსტრუმენტად.

ამავე თემაზე: „ოცნება“ კიდევ ერთხელ ამტკიცებს, რომ მზადა ევროპული რეფორმების გზის საბოტაჟისთვის — ლექსმანი

დამოუკიდებელი მედია და არასამთავრობო ორგანიზაციები თანმიმდევრულად ამხელენ ხელისუფლებას კორუფციაში, ნეპოტიზმში, საუბრობენ ყველა იმ პრობლემაზე, რაც საზოგადოებას აწუხებს. სწორედ ამიტომ ეხება რუსული კანონი მედიას და არასამთავრობო ორგანიზაციებს –  გვიხსნის ჟურნალისტური ეთიკის ქარტიის დირექტორი, ლიკა ჩახუნაშვილი რუსული კანონის დასამტკიცებლად „ოცნების“ ინიციატივას.

„ქართული ოცნება“ რუსული კანონის უცხოური გავლენის აგენტების შესახებ ამჯერად შეცვლილი სახელით დამტკიცებას გეგმავს.

რუსული კანონის მომხრეები აქტიურად აზიარებენ „ქარდს“, სადაც წერია – „ვის არ ეხება ეს კანონი“. ასე ცდილობენ ადამიანების შეცდომაში შეყვანას, რომ ის, რაც ეხება მედიას მათ არ ეხება, რაც ეხება არასამთავრობო ორგანიზაციებს, ის თქვენ არ გეხებათ.

„ერთი წლის წინ მათ ნახეს კონსოლიდირებული საზოგადოება და ამის, ჩემი აზრით, ძალიან შეეშინდათ. ამის შემდეგ ფიქრობდნენ რა სტრატეგია გამოეყენებინათ, რომ საზოგადოება დაენაწევრებინათ, შემდეგ თითოეულ სეგმენტს ცალკე რომ გამკლავებოდნენ.

რატომ არასამთავრობო სექტორი და მედია? – იმიტომ, რომ კრიტიკული და დამოუკიდებელი მედია და არასამთავრობო ორგანიზაციები თანმიმდევრულად ამხელენ ხელისუფლებას კორუფციაში, ნეპოტიზმში და საუბრობენ ყველა იმ პრობლემაზე, რაც საზოგადოებას აწუხებს. ეს არის სიღარიბე, ეკონომიკური პრობლემები, რაც ადამიანებს აიძულებს ემიგრაციაში წავიდნენ. ეს არის პრობლემები განათლების, სოფლის მეურნეობის სექტორში.

უამრავი პრობლემაა საქართველოში და თუ ჩვენ გვაქვს ინფორმაცია ამ პრობლემებზე  და ამის შესახებ ვმსჯელობთ, ეს არის მთლიანად დამოუკიდებელი და კრიტიკული მედიის დამსახურება.

არასამთავრობო ორგანიზაციები გარდა იმისა, რომ მათ ძალიან მნიშვნელოვანი წვლილი შეაქვთ, დემოკრატიული რეფორმების განხორციელებაში, ისინი ასევე აწვდიან საზოგადოებას მათთვის აუცილებელ სასიცოცხლო სერვისებს, რომელთა გარეშეც საზოგადოების რიგი ჯგუფები ვერ იარსებებდნენ, ძალიან გაუჭირდებოდათ. მაგალითად, გასულ წელს საზოგადოება მიხვდა, რომ ეს კანონი არ იყო მიმართული მხოლოდ არასამთავრობოების და მედიის წინააღმდეგ, რეალურად ის დააზარალებდა აბსოლუტურად ყველა მოქალაქეს.

დააზარალებდა ყველა სექტორს, რადგან ჩვენ ვიცით, როგორი დამოკიდებულია საქართველო უცხოურ დახმარებაზე, რომელიც შემოდის პრაქტიკულად ყველა სექტორში. ძნელია გაიხსენო რაიმე სფერო, სადაც მნიშვნელოვანი რეფორმები, ჩვენი პარტნიორი ქვეყნების მხარდაჭერის გარეშე განხორციელდა, დაწყებული სამედიცინო, ჯანდაცვის სისტემით დამთავრებული სოფლის მეურნეობით, რომ არაფერი ვთქვათ ისეთ მოწყვლად ჯგუფებზე, როგორებიც არიან შშმ პირები, ქალები, ბავშვები, მოხუცები. ეს დახმარება სწვდება საქართველოს ყველა მოქალაქეს, მათაც კი, ვინც შეიძლება არც იცოდეს, რომ არიან ამ დახმარების მიმღებნი და ბენეფიციარები.

ხელისუფლებამ გადაწყვიტა დააპირისპიროს საზოგადოების სხვადასხვა ნაწილი ერთმანეთთან გათიშე და იბატონეს პრინციპით. დაარწმუნოს ადამიანები, რომ ეს კანონი მათზე არ მოახდენს უარყოფით გავლენას. ეს აბსოლუტური დემაგოგია და სიცრუეა.

დაშვებაც არ მინდა, რომ ამ კანონს მიიღებენ, იმიტომ, რომ ჩვენ ყველაფერს გავაკეთებთ, მე როგორც ერთი მოქალაქე და მთელი სამოქალაქო სექტორი, იმისთვის, რომ ეს კანონი არ მივიღოთ. ეს დააზარალებს თითოეულ მოქალაქეს და დაგვხევს უკან, დააზარალებს ჩვენ ევროპულ პერსპექტივას, ჩვენ მომავალს, ადგილს დაგვაკარგვინებს ცივილიზებულ სამყაროში.

უამრავი პროგრამაა განხორციელებული უცხოური დახმარებით, პარტნიორი ორგანიზაციების მიერ მოწოდებული სახსრებით, იქნება ეს საზღვრისპირა რეგიონებში ფერმერების ხელშეწყობა, დახმარება სამაცივრე მეურნეობების მოწყობაში, ფაროსანასთან ბრძოლაშიც კი ძალიან დიდი იყო ჩვენი საერთაშორისო პარტნიორების წვლილი.

საითაც არ გაიხედოთ – სასკოლო განათლებით დაწყებული, ყველგან არის მათი კეთილი კვალი და მნიშვნელოვანი წვლილი, რომელიც ამა თუ იმ რეფორმის განხორციელებაში შეიტანეს ჩვენმა დასავლელმა პარტნიორებმა, თვითონ მოიკლეს და ჩვენ გვიწილადეს იმისთვის, რომ ჩვენი ქვეყანა გახდეს უფრო დემოკრატიული, სადაც დაცულია ადამიანის უფლებები, სიტყვის თავისუფლება, გამოხატვის თავისუფლება, როგორიც შეიძლება გახდეს ისეთი მეზობელი, რომელთანაც მეზობლობა გინდა, გიხარია და არა გაუთავებელი პრობლემების ხიფათის წყარო.

ის, რომ არ ეხება მეწარმეებს, ძალიან დიდი სიცრუეა, ეს ეხება ყველა მეწარმეს, რომელთა დასახმარებლადაც უამრავი პროგრამა განხორციელდა, ჩვენი დასავლელი პარტნიორების მხარდაჭერით ისწავლეს მეურნეობის მართვა, ეხმარებიან მეწარმე ქალებს, კონფლიქტის ზონასთან მცხოვრებ ფერმერებს.

ჩვენი უახლესი ისტორიის გადაწერა უნდა ხელისუფლებას. უნდათ, რომ დაავიწყონ ადამიანებს ის სიკეთე, რაც ჩვენ დამოუკიდებლობის გამოცხადების დღიდან მივიღეთ დასავლელი პარტნიორებისგან. ამას ისინი ვერ მოახერხებენ.

უბრალოდ, რომ გავიხსენოთ რამდენმა ახალგაზრდამ შეძლო განათლების მიღება საქართველოს ფარგლებს გარეთ, დასავლელი პარტნიორების სასწავლო პროგრამების მეშვებით, ძალიან ბევრ ახალგაზრდას,  ამერიკული უნივერსიტეტის დიპლომი რომ აქვს, რომლითაც ჩვენ ასე ვამაყობთ. ამ ახალგაზრდებს ძალიან დიდი წვლილი შეაქვთ საქართველოს განვითარებაში, საიდან ეს ყველაფერი? – ეს არის დასავლელი პარტნიორების ხელშეწყობის შედეგი.

მგონია, რომ არ იმუშავებს ეს დაყოფა, რომ შენ არ გეხება, მედიას ეხება, თუმცა ხელისუფლება შეეცდება. მიზანმიმართულად ხდება მედიის, არასამთავრობო ორგანიზაციების დემონიზაცია. ხელისუფლებამ ძალიან კარგად იცის, რომ გამჭვირვალეა ჩვენი ფინანსები, რომ ჩვენ ბევრნაირ კონტროლს ვართ დაქვემდებარებული. უნდათ მედიის და არასამთავრობოების დისკრედიტაცია, ამიტომ იყენებენ სიძულვილის ენას მათ მიმართ, დეზინფორმაციას, ყველა ღონეს ხმარობენ, რომ მოახდინონ აქტივიზმის და ჟურნალისტების დისკრედიტაცია.

ჩვენი მოვალეობაა საზოგადოებას ველაპარაკოთ და კარგად ავუხსნათ, რატომ არის ეს რუსული კანონი სახიფათო, რატომ დაიჩოქებს აქლემი ყველა სახლის კართან, თუ ყველანი არ ვიბრძოლებთ ახლა ამ კანონის წინააღმდეგ.

„მეხუთედ მოგვივარდნენ, მუსლიმებს გზა გადაუკეტეს და სალოცავად მოსვლის საშუალებას არ აძლევენ… ჩვენ ვითხოვთ მხოლოდ სიმშვიდეს და კანონით ჩვენთვის მონიჭებული უფლებების დაცვას,“ – ამბობს მერაბ მიქელაძე, ადიგენში მცხოვრები მუსლიმი. მის სახლში მუსლიმები დღეს, 5 აპრილს პარასკევის ლოცვაზე შეიკრიბნენ.

ადგილობრივი მოსახლეობის ნაწილი და მართლმადიდებელი სასულიერო პირები საპროტესტო აქციას მერაბ მიქელაძის სახლთან მართავენ. აქციის მონაწილეები აპროტესტებენ მუსლიმების შეკრებას, სადაც ისინი ლოცულობენ. აქციაზე ისმის მუსლიმების შეურაცხყოფა. ადგილზე მობილიზებულია პოლიციაც, რომელსაც იგივე სახლში მუსლიმ თემზე წინა მივარდნის და საჯარო მუქარის შემთხვევები არ გამოუძიებია.

შსს-ს პრესცენტრში დღეს ვერ გვიპასუხეს, დაფიქსირდა თუ არა მუსლიმებისთვის გადაადგილების თავისუფლების შეზღუდვის ფაქტი? მუშაობს პოლიცია მუსლიმების დასაცავად?

„დილის 10 საათიდან იკრიბება იგივე ხალხი, ჩვენ ვემზადებით პარასკევის ლოცვისთვის, იმდენი ვართ შენობის შიგნით, რომ ლოცვას მაინც ჩავატარებთ, მაგრამ ხელისუფლებას თუ ასე ესმის პრობლემის დალაგება, არ ვიცი – ჭიშკართან ამართვინებენ აქციას და ვინც სალოცავად მოდიოდა, მათ გადაუკეტეს გზა,“ – გვიყვება მერაბ მიქელაძე. მისი თქმით, მოლაპარაკებები ადიგენის მუნიციპალიტეტის მერიასთან უშედეგოდ დასრულდა.

„ჩვენ 18 დღე ველოდით შედეგს. 2 დღის წინ შეგვხდნენ და გვითხრეს, რომ თუ სალოცავს გამოყოფდა ადგილობრივი ხელისუფლება იჯარეთში, მაშინ ჩემი საკუთრება უნდა გადავცე მუნიციპალიტეტს. ჩვენ არ ვართ ამაზე თანახმა და არც ვიყავით.

ჩვენ აქ არაფერს ვაშავებთ, კანონი გვაძლევს ნებას ვილოცოთ და ღვთისმსახურებას ვეწევით. იმის გამო, რომ კონფლიქტი არ გვინდა, თანახმა ვიყავით, ადგილობრივი ხელისუფლების მიერ გამოყოფილ შენობაში გველოცა, მაგრამ არა საკუთრების დათმობის ხარჯზე. ეს არ იყო ჩვენი პირობა.

ჩვენი მოთხოვნაა მხოლოდ მშვიდობის შენარჩუნება და იმ უფლებების დაცვა, რაც კანონში წერია. ძალიან ბევრი ნაბიჯი გადავდგით და ვითხოვთ ხელისუფლებისგან, ერთი ნაბიჯი ჩვენკენაც გადმოდგან“, – უთხრა მერაბ მიქელაძემ „ბათუმელებს“.

მერაბ მიქელაძის თქმით, მას დღეს, ან წინა დღეებში მუქარის გამო საგამოძიებო ორგანოებიდან არავინ დაჰკავშირებია.

„ბათუმელები“ ამ დრომდე ვერ უკავშირდება ადიგენის მერს.

კადრებში, რომელიც გზის გადაკეტვის შემდეგაა გადაღებული, ჩანს ადიგენში მცხოვრები მუსლიმებისა და პოლიციას შორის დიალოგი. მუსლიმები ეკითხებიან პოლიციას, თუ რატომ არ ეძლევათ ლოცვის და გზაზე თავისუფლად გადაადგილების უფლება. პოლიციის წარმომადგენლები შეზღუდვებს უსაფრთხოების მოტივით ხსნიან.

___

ამავე თემაზე:

საგამოძიებო სამსახურის ინფორმაციით, აჭარაში გამოვლინდა კანონდარღვევით მოქმედი აფთიაქი, სადაც უკანონოდ ყიდდნენ ფსიქოტროპულ და სპეციალურ კონტროლს დაქვემდებარებულ მედიკამენტებს.

„გამოძიებით დადგინდა, რომ აფთიაქის კანონდარღვევით საქმიანობის დაფარვის მიზნით, ობიექტი ფუნქციონირებდა სამი სხვადასხვა იურიდიული პირის სახელით, რომელთაც ფაქტობრივად ერთი და იგივე პირები მართავდნენ.

რეცეპტის გარეშე, ხდებოდა სხვადასხვა დასახელების ფსიქოტროპული და სპეციალურ კონტროლს დაქვემდებარებული მედიკამენტების რეალიზაცია.

გამოძიების პროცესში, უკანონო სამეწარმეო საქმიანობის ფაქტზე, ბრალდებულის სახით პასუხისგებაში მიეცა სამი იურიდიული პირი, ხოლო, უკანონო სამეწარმეო საქმიანობისა და უკანონო შემოსავლის ლეგალიზაციის ფაქტზე, სისხლისსამართლებრივი დევნა დაიწყო ექვსი ფიზიკური პირის მიმართ, რომელთაგან დაკავებულ იქნა ხუთი პირი.

დადგინდა, რომ აფთიაქის ხელმძღვანელებმა, უკანონო სამეწარმეო საქმიანობის შედეგად, ჯამში მიიღეს დაახლოებით 1 მილიონი ლარის ოდენობის უკანონო შემოსავალი, რომელსაც შემდგომ, სხვადასხვა პირის საბანკო ანგარიშებზე გადარიცხვის გზით, მისცეს კანონიერი სახე და მოახდინეს მისი ლეგალიზაცია“, – წერს საგამოძიებო.

მათივე ინფორმაციით, ამოღებულია დიდი ოდენობით ფსიქოტროპული მედიკამენტი, ასევე, ბრალდებულების მფლობელობაში არსებული ორი ძვირადღირებული ავტომანქანა.

გამოძიება გრძელდება საქართველოს სისხლის სამართლის კოდექსის 192-ე და 194-ე მუხლებით, რაც სასჯელის სახით ითვალისწინებს თავისუფლების აღკვეთას 9-დან 12 წლამდე ვადით.

„კანონპროექტის ეს ფორმა არის განსხვავებული აზრის მქონე სეგმენტების ეტაპობრივი მოგუდვის ეშმაკობა. ცხადია, „რუსული კანონის“ მიზანი რუსული დავალებაა, რომელიც აფხაზეთშიც ისეთივე წარმატებით იტესტებოდა, როგორც თბილისში.

არ უნდა გამოგვრჩეს, რომ პროცესები პარალელური იყო“, – ამბობს უფლებადამცველი ნათია კაპანაძე.

ნათია „ბათუმელებთან“ განმარტავს, რა საფრთხეებს შეიცავს პარლამენტში რუსული კანონის კიდევ ერთხელ „შემობრუნება“ და როგორ ეხება ის მედიას.

ნათია  კაპანაძის განმარტებით, პოლიტიკურ ეშმაკობებში, რომელსაც ბიძინა ივანიშვილი იყენებს ძალაუფლების შესანარჩუნებლად, ეს ყველაზე ლოგიკური გაგრძელებაა:

„იდეის დატესტვა ყველაზე კრიტიკულ მომენტამდე, შედეგის შეფასება და მოლოდინი, ჩასაფრება, სამიზნეების დაყოფა და წამოწყებები სამიზნეების ცალ–ცალკე ჩამოსაშორებლად – ივანიშვილის მმართველობაში ეს შესამჩნევი, მთავარი ტექნოლოგიაა მოწინააღმდეგეების მოგუდვისას.

დღეს მას აქვს მიტაცებული ყველა რესურსი და საკუთარი ხელწერის წყალობით ახერხებს გამდიდრდეს ქართველი ხალხის გაღარიბების ხარჯზე. ამ პროცესში კი მთავარი დისკომფორტი ექმნება სიტყვის თავისუფლებისგან. Მედია და არასამთავრობო სექტორი მისთვის მოწინააღმდეგეთა სათავეშია.

ამიტომ კანონპროექტი გამიზნულია ძირითად მოწინააღმდეგეებზე, შემდეგი ნაბიჯებით კი ეტაპობრივად მოაქცევს ფერმერებს, ლექტორებს, მხატვრებს, მწერლებს, სტუდენტებს, ფეხბურთელებს, კალათბურთელებს, მოჭიდავეებს – ყველას, ვისაც ექნება დამოუკიდებლობის პრეტენზია. ვინც ისაუბრებს ხალხის საჭიროებებზე, კორუფციაზე ან ხელოვნურად გაძვირებული პროდუქტების შესახებ.

უფლებადამცველი ამბობს, რომ „კანონპროექტის ეს ფორმა არის განსხვავებული აზრის მქონე სეგმენტების ეტაპობრივი მოგუდვის ეშმაკობა“.

„ცხადია, „რუსული კანონის“ მიზანი რუსული დავალებაა, რომელიც აფხაზეთშიც ისეთივე წარმატებით იტესტებოდა, როგორც თბილისში. არ უნდა გამოგვრჩეს, რომ პროცესები პარალელური იყო. საინტერესოა, რომ რუს მომღერალს, ალა პუგაჩოვას ზუსტად ამ მომენტში აცხადებენ უცხოეთის აგენტებად.

ვფიქრობ, დავალება იმდენად დიდია, რომ ბიძინა ივანიშვილის გუნდი წავიდა რისკზე – თუ გასულ წელს ეს იდეა ხუნდაძე–სუბარის ინიციატივა იყო, წელს კანონპროექტს ხელს აწერს არა „ძველი ავტორი“, არამედ თავად მმართველი გუნდი – საპარლამენტო ფრაქცია „ქართული ოცნება“.

ეს საშიში სვლა უნდა იყოს მისთვის, რადგან ამ საავტორო გადათამაშებაშიც კარგად ჩანს, როგორ იტყუებოდა მმართველი პარტია „ხალხის ძალის“ ნიღბიდან. ჩემთვის, ეს არ არის უმნიშვნელო დაბრუნება, გაბრაზებულია და თაიმლაინზე გაწერილი აქტივობებით დაბრუნებაა~.

ნათიას თქმით, ნიშანდობლივია, რომ იყენებენ ადამიანებსაც სარისკო შედეგების აღმოსაფხვრელად:

„იმ დროს, როცა ვსაუბრობთ მედიის რისკებზე, უკვე ნავში მჯდომი – ჟურნალი „ლიბერალის“ ყოფილი მთავარი რედაქტორი წერს, რომ ეს მედიას პრობლემას არ შეუქმნის, რომ არგუმენტირებულად ვესაუბროთ პარლამენტარებს, რომლებიც ქალებს ტრიბუნიდან გადადგამენ, შეურაცხყოფენ ან ფიზიკურ საფრთხეებს უქმნიან.

პარლამენტზე, საიდანაც გასულ წელს ჟურნალისტები და ოპერატორები გადმოყარეს და ამ დრომდე გამოძიება არ ჩატარებულა, ასევე არ არსებობს შედეგები 2023 წლის მარტის მოვლენებისას დაშავებული ჟურნალისტების და ოპერატორების დარღვეული უფლებების აღდგენის ნაწილში.

არჩევნების მოახლოების ფონზე „რუსული კანონის“ შემობრუნება არის ამომრჩევლის დაშანტაჟების კიდევ ერთი ეპიზოდი. ამ კანონპროექტზე დამოკიდებულებით ჩვენ მოგვიწევს გავავლოთ ახალი წითელი ხაზი ჩვენსა და რუსეთს შორის“.

მეგი დიასამიძე 22 წლის ახალგაზრდაა შუახევიდან, რომელიც შარშან, 2023 წელს, აქტიურად აპროტესტებდა “რუსული კანონის” მიღების პირველ მცდელობას საქართველოში. მეგი მონაწილეობდა მარტის აქციებშიც სხვა ბევრ ახალგაზრდასთან ერთად.

„ქართულმა ოცნებამ“ ე.წ. რუსული კანონი წელს ხელახლა შეიტანა პარლამენტში განსახილველად. მეგის ვკითხეთ, კიდევ თუ აპირებენ ის და მისი მეგობრები გაპროტესტებას.

• მეგი, რა უნდა გააკეთოს ხალხმა, ვინც ერთი წლის წინ ამ კანონის გამო ძალიან იყო გაბრაზებული. თქვენ როგორ ხედავთ ამ პროცესში საკუთარ თავს?

პირველ რიგში, დღეს რაც ხდება, თუნდაც ამ რუსული კანონის ხელახლა შემოტრიალებამ, კიდევ ერთხელ დამარწმუნა და მივხვდი, რომ „ქართული ოცნება“ არის ყველაზე არასანდო ხელისუფლება ჩვენთვის და ყველანაირად ცდილობს, ებრძოლოს საკუთარ საზოგადოებას.

„რუსულ კანონს“ უწოდებენ „გამჭვირვალობის“ კანონს, ეს არის ტყუილი. ამიტომ, როგორც გასულ წელს, მარტის აქციებისას [რომელიც ფაქტობრივად სიმბოლურია საზოგადოებისთვის, ქართველ ხალხს მიგვაჩნდა, რომ გავიმარჯვეთ, რადგან რუსული კანონი უკან გავაწვევინეთ] დღესაც ანალოგიურად უნდა დავიწყოთ ბრძოლა.

სიმართლე გითხრათ, მე რასაც ვაკვირდებოდი, აღარ მეგონა, რომ „რუსულ კანონს“ შემოატრიალებდა „ქართული ოცნება“, რადგან საქართველოს მოსახლეობისგან პასუხი მიიღო. ჩვენ ვთქვით, რომ არ გვინდა რუსეთი, გვინდა ევროპა.

დღეს მე, როგორც მოქალაქე, ყველანაირად ვგრძნობ პასუხისმგებლობას, რომ ვიდგე იქ, სადაც საჭიროა და გავაკეთო ის, რაც საჭიროა.

ახლა საჭიროა პროტესტი და მოქმედება „რუსული კანონის“ წინააღმდეგ.

მუხტი, რომელიც გადაედება სხვა მოქალაქეებსაც და საზოგადოებრივი პასუხისმგებლობა, რაც მოდის ინდივიდუალური პასუხისმგებლობისგან, ისევ გასცემს პასუხს საქართველოს ხელისუფლებას, ღიად პრორუსულ „ქართულ ოცნებას“.

• როგორ ფიქრობთ, თქვენ, როგორც ახალგაზრდას, რა საფრთხეებს შეგიქმნით ამ კანონის მიღება?

ჩემთან მიმართებაში ბევრ საფრთხეს ვხედავ.

მაგალითად, მე მინდა საზღვარგარეთ სწავლა, პროფესიის მიღება. შესაძლოა ახლო მომავალში დავსაქმდე არასამთავრობო ორგანიზაციაში. ეს კანონი, რომელიც უცხოური გავლენის აგენტებად აცხადებს არასამთავრობო ორგანიზაციებს თუ მათ წარმომადგენლებს, საფრთხეს შეუქმნის ჩემი გამოხატვის თავისუფლებას.

არასამთავრობო ორგანიზაციებს რომ თავი დავანებოთ, მოქალაქე რომ ვიტყვი, მინდა ევროპა და არ მინდა რუსეთი და გავაკრიტიკებ ხელისუფლებას პრორუსულობის გამო, ამისთვისაც კი შეუძლიათ მათ რაღაც მომენტში მიწოდონ უცხოური გავლენის აგენტი, აქტიურ მოქალაქეს, რომელსაც უნდა ევროკავშირში ყოფნა.

ეს კანონი, რომლის მიღებასაც ცდილობს „ქართული ოცნება“, გამოხატვის უფლებას შეუშლის ხელს და ეს პირდაპირ მეხება მე, როგორც მოქალაქეს.

ესენი, სანამ ჩვენი ბრძოლის მაქსიმუმს არ ვაჩვენებთ, არსად წასვლას არ აპირებენ.

• თქვენი აზრით, როგორ და რამდენად უქმნის საფრთხეს „რუსული კანონი“ საქართველოს ევროინტეგრაციის პროცესს?

პირველ რიგში ეროვნული ინტეგრაციის პროცესს უქმნის საფრთხეს და ეს ძალიან საშიშია, იმიტომ, რომ ევროპული ინტეგრაცია მოითხოვს დემოკრატიის მაღალ ინდექსს, გამოხატვის თავისუფლებას, ქვიარ ადამიანების თავისუფლებას. „რუსული კანონი“ ყველა ჭრილში სწორედ ევროპული ინტეგრაციის პროცესს უშლის ხელს, იმიტომ, რომ ევროკავშირი მოითხოვს თავისუფალ საზოგადოებას, მოითხოვს საუბარს პრობლემებზე, რასაც „რუსული კანონი“ [თავისი შინაარსით] ეწინააღმდეგება.

საზოგადოებას, რომელიც ამბობს, რომ „ქართული ოცნება“ პრორუსულია და ჩვენ არ გვინდა რუსეთი, „რუსული კანონის“ მიღების შემთხვევაში ამაზე საუბარიც კი საფრთხეს შეუქმნის, იმიტომ, რომ პირდაპირი დაშინება წავა ადამიანების ამ კანონის მიღების შემდეგ.

ეს კანონი არ უნდა მივიღოთ, უკან გადადგმული ნაბიჯი იქნება ევროპული ინტეგრაციის გზაზე.

• ვიცით, რომ მსგავსმა კანონმა რუსეთში გააქრო სიტყვის თავისუფლება, დემოკრატიული ინსტიტუტები თუ სხვა. ამ კანონის მიღება გააქრობს თუ არა კრიტიკულ მედიას და არასამთავრობოებს ჩვენთან და როგორ ქვეყანა დაგვრჩება კრიტიკული მედიის გარეშე?

დღეს საქართველოში იმდენად მძიმეა სიტუაციაა, რომ ყველაზე კარგი საშუალება სწორი ინფორმაციის მიღების და რეალობის აღქმის შენარჩუნების არის კრიტიკული მედია. კრიტიკულმა მედიამ ძალიან დიდი როლი ითამაშა იმაში, რომ საზოგადოებას და მე, როგორც ახალგაზრდა ქართველ მოქალაქეს, შემინარჩუნდეს ხედვა, რომ როცა რაღაც პრობლემაა ქვეყანაში, ეს პრობლემა დავინახო.

კრიტიკული მედიის ჩახშობით ყველაზე მნიშვნელოვანი და ნაწილობრივ გადამწყვეტი რგოლიც კი გაწყდება საქართველოს ევროპული ინტეგრაციის გზაზე.

„რუსული კანონის“ მიღებით კრიტიკული მედიის და არასამთავრობო ორგანიზაციების დაშინება და შებოჭვა მოხდება.

ამ ყველაფრის ხარჯზე, როცა აღარანაირი ალტერნატივა აღარ გვექნება კრიტიკული ინფორმაციის მიღების, ფაქტობრივად ინფორმაციულ ვაკუუმში მოვექცევით და შესაბამისად, უფრო მარტივი იქნება იმ მიზნის მიღწევა, რაც „ქართულ ოცნებას“ უნდა.

„ქართული ოცნების“ მიზანია საქართველოს გარუსება.

• ფიქრობთ, რომ ამ კანონის მიღების მეორე მცდელობით ხელისუფლება ევროინტეგრაციის გამიზნულად აფერხებს?

როგორც აღვნიშნე, არ ველოდებოდი ამ კანონის შემობრუნებას და ახლა, როცა ევროკავშირის კანდიდატის სტატუსი მივიღეთ, ალბათ „ქართულ ოცნებას“ მოეჩვენა, რომ ზედმეტი გააკეთა უკვე საქართველომ ევროპაში შესვლისთვის და ეს პუტინს, რუსეთს არ მოეწონება, ამიტომ აბსოლუტურად გამიზნული და ნაფიქრია მათი ეს ქმედება.

მე პირადად დარწმუნებული ვარ, რომ რადგან ახლა შემოატრიალეს, როცა პირველად ჩაუვარდათ კანონი და გაიწვიეს უკან, იმ დღიდანვე ფიქრობდნენ, აორგანიზებდნენ და გეგმავდნენ, თუ რომელ თვეს, რა დროს შემოეტრიალებინათ ისევ „რუსული კანონი“.

იმასაც ვფიქრობ, „ქართულმა ოცნებამ“ ვერც ის აიტანა, თუ როგორ გაგვაერთიანა ფეხბურთში ევროპის ჩემპიონატზე გასვლამ და საზოგადოების გახლეჩა უნდათ.

ეს ყველაფერი გამიზნულია და ვფიქრობ, ახლა უფრო მომზადებულია „ქართული ოცნება“ როგორ მოგვიგოს ქართულ საზოგადოებას, მაგრამ აქეთ მხარეს ძალიან დიდი გამოცდილების მქონე საზოგადოებაა, ამიტომ აუცილებლად გავიმარჯვებთ.

• როგორ ფიქრობთ, რატომ შემოაბრუნა მმართველმა გუნდმა „რუსული კანონი“?

მე რაც პირველი ამომიტივტივდა, ისაა, რომ „ქართული ოცნება“ არსად წასვლას არ აპირებს და თუ ეს კანონი გაუვათ, მათთვის კიდევ უფრო მარტივი იქნება არჩევნების მოგება.

რუსული კანონი, რომლის მიღებასაც „ქართული ოცნება“ ისევ აპირებს, საქართველოს ევროკავშირში გაწევრიანების პროცესს უშლის ხელს.

„სამოქალაქო საზოგადოების ორგანიზაციებისთვის ხელსაყრელი გარემოს შექმნა, შენარჩუნება და მედიის თავისუფლების უზრუნველყოფა დემოკრატიის საფუძველს წარმოადგენს. მას ასევე გადამწყვეტი მნიშვნელობა აქვს ევროკავშირში გაწევრიანების პროცესისთვის. ევროპულმა საბჭომ საქართველოს კანდიდატის სტატუსი მიანიჭა იმის გათვალისწინებით, რომ გადაიდგმებოდა ევროკომისიის 2023 წლის 8 ნოემბრის რეკომენდაციის შესაბამისი ნაბიჯები,“ – თქვა ევროკავშირის საგარეო ქმედებათა სამსახურის პრესსპიკერმა, დღეს, 4 აპრილს გავრცელებულ განცხადებაში.

საფრთხე, რომ „ქართული ოცნების“ მიერ პარლამენტში დაბრუნებული რუსული კანონი საქართველოს ევროპულ მომავალს დააზიანებს, რეალურია.

როგორ უშლის ხელს რუსული კანონის დაბრუნება ევროპისკენ სვლას, კერძოდ, მეორე ეტაპზე გადასვლას, რაც გულისხმობს მოლაპარაკების დაწყებას? – ვკითხეთ სამოქალაქო საზოგადოების ფონდის ევროინტეგრაციის პროგრამის ხელმძღვანელს ვანო ჩხიკვაძეს:

„ევროკავშირში გაწევრიანებაზე მოლაპარაკებების დაწყების წინა პირობა არის 9 ნაბიჯის შესრულება. დღეს გამოქვეყნდა ევროკავშირის საგარეო ქმედებათა სამსახურის პრეს-სპიკერ პიტერ სტანოს განცხადება. ის ამბობს, რომ რუსული კანონი მინიმუმ ორ ნაბიჯს ეწინააღმდეგება.

პირველს, რომელიც შეეხება დეზინფორმაციის წინააღმდეგ ბრძოლას და მეცხრეს, რომელიც მოითხოვს სამოქალაქო საზოგადოების ჩართულობას და ისეთი გარემოს შექმნას, სადაც სამოქალაქო საზოგადოება თავისუფლად იმუშავებს.

ამ ორი ნაბიჯის წინააღმდეგ მიმართული ეს კანონი, საბოლოოდ ხელს უშლის იმას, რომ გავიდეთ ევროკავშირში ინტეგრაციის გზაზე. შესაბამისად, ეს კანონი ეწინააღმდეგება 9 ნაბიჯიდან მინიმუმ ორს. ამ ნაბიჯების შესრულება კი არის იმის წინაპირობა, რომ ქვეყანა წავიდეს ევროკავშირისკენ და დაიწყოს მოლაპარაკებები გაწევრიანებასთან დაკავშირებით,“ – ამბობს ვანო ჩხიკვაძე.

მისი თქმით, „ქართული ოცნება“ ცდილობს ძალაუფლების შენარჩუნებას და განმტკიცებას. მმართველი პარტიის ამოცანაა, ნებისმიერი რამ, რაც ხელს უშლის ამ ამოცანის განხორციელებას, გზიდან ჩამოიშოროს. ძალაუფლების განმტკიცებაში ხელისუფლებას კი ხელს უშლის სამოქალაქო საზოგადოება და მედია.

მედია და სამოქალაქო საზოგადოება მონიტორინგს უწევს ბევრ ისეთ თემას, რომელიც ხელისუფლებას აღიზიანებს. მაგალითად, ამონიტორინგებენ როგორ მიმდინარეობს ბრძოლა კორუფციის წინააღმდეგ, როგორ ტარდება ან არ ტარდება მართლმსაჯულების რეფორმა და ამასთან დაკავშირებით ინფორმაციას აწვდიან საზოგადოებას.

„ბოლო პერიოდში დავინახეთ, რომ მედია და სამოქალაქო საზოგადოება იყვნენ ის აქტორები, რომლებიც ითხოვდნენ მოსამართლეების კეთილსინდისიერების შემოწმებას, რომელთაც გამოავლინეს მაღალი თანამდებობის პირების მიერ შესაძლო კორუფციის სქემები.

ეს, ბუნებრივია, ხელს უშლის ხელისუფლებას, იყოს კომფორტის ზონაში და უზრუნველყოს არჩევნებში გამარჯვება. ამიტომ არის მედია და NGO სექტორი ამოღებული სამიზნედ. თუ მათ გააჩუმებენ, ბევრად უფრო ადვილი იქნება არჩევნებში გამარჯვების მიღწევა,“ – ხსნის თავისუფალი მედიის და სამოქალაქო სექტორში მიზანში ამოღების მიზეზს ვანო ჩხიკვაძე.

„ქართული ოცნება“ ცდილობს გასული წლის მარტის პროტესტის მსგავსი ტალღა აირიდოს თავიდან, ამიტომ მანიპულაციურად დაიყვანა კანონპროექტი ორ ჯგუფზე და ამტკიცებს, რომ რუსული კანონი მხოლოდ მედიას და სამოქალაქო სექტორს შეეხება.

„კანონის გავლენის დავიწროებას ხელისუფლება ცდილობს იმ მარტივი ლოგიკით, რომ ამ კანონპროექტის წინააღმდეგ რაც შეიძლება ცოტა ხალხი გამოვიდეს და არ შეექმნას პრობლემა მის მიღებას. შესაბამისად, რაც უფრო ნაკლებ ადამიანს გაუჩნდება პროტესტი და რაც უფრო ნაკლები ხალხი წავა მის წინააღმდეგ, ეს ხელისუფლებას უფრო უკეთეს მდგომარეობაში ჩააყენებთ, რომ მიიღოს კანონი.

რაც შეეხება დაფარვას, ეს კანონპროექტი ბევრ ადამიანს ეხება. არიან არასამთავრობო ორგანიზაციები, რომლებიც გარკვეულ სერვისებს აწვდიან ბენეფიციარებს. ეს იქნება ჯანდაცვის სფერო, განათლება თუ ასე შემდეგ.

თუ მიიღებს ხელისუფლება ამ კანონს, ის შეეხება აბსოლუტურად ყველას. აქ არ გაჩერდება ხელისუფლება, რაღაც პერიოდის მერე, კანონს კიდევ უფრო გააუარესებენ და გაამკაცრებენ,“ – ამბობს ვანო ჩხიკვაძე.

• საქართველო ევროკავშირის წევრობის გზაზე –  სად ვართ ახლა

2023 წლის 14 დეკემბერს, ევროკავშირის წევრი ქვეყნების ლიდერების გადაწყვეტილებით,  საქართველოს მიანიჭეს კანდიდატი ქვეყნის სტატუსი.

დათქმა იყო, რომ საქართველომ უნდა შეასრულოს 9 პუნქტიანი რეკომენდაცია.

იმისათვის, რომ ქვეყანა ევროკავშირის წევრი გახდეს, საჭიროა სამი ეტაპის გავლა. პირველი ეტაპია ქვეყნის სურვილი და მზაობა გახდეს ევროკავშირის წევრი. ეს ეტაპი საქართველომ უკვე გაიარა და მიიღო კანდიდატი ქვეყნის სტატუსი. დარჩენილია კიდევ ორი ეტაპი – მოლაპარაკებების დაწყება და ქვეყნის ევროკავშირში გაწევრიანება.

მოლაპარაკების გახსნის ეტაპი ისეთივე მნიშვნელოვანია, როგორიც იყო კანდიდატის სტატუსის მიღება.

მოლაპარაკებების დაწყებაზე გადაწყვეტილებას საქართველო 2024 წლის შემოდგომაზე ელის.

სწორედ 2024 წლის შემოდგომაზე უნდა გამოქვეყნდეს გაფართოების პაკეტი, რომელსაც ევროკომისია ყოველწლიურად იღებს. ესაა სტრატეგიულ დოკუმენტი ევროკავშირის გაფართოების პოლიტიკაზე და ანგარიშები, რომლებშიც შეფასებულია კანდიდატი ქვეყნებისა და პოტენციური კანდიდატების პროგრესი.

• ვის ეხება რუსული კანონი

რუსული კანონის პარლამენტში დაბრუნებით საფრთხე ექმნება მედიის თავისუფლებას და სამოქალაქო სექტორს.

თუ საქართველოში არ იქნება თავისუფალი მედია და შეზღუდავენ არასამთავრობო ორგანიზაციებს ეს კანონი შეეხება ყველას – სტუდენტს, სოფლად თუ ქალაქად მცხოვრებ ადამიანს, ექიმს, მასწავლებელს, იურისტს, ჟურნალისტს, ინჟინერს და საერთოდ ნებისმიერი პროფესიის ადამიანს.

რუსული კანონი საფრთხეს უქმნის ქვეყნის მასშტაბით მომუშავე ყველა იმ ორგანიზაციას, რომელიც სერვისებს აწვდის საზოგადოების ყველაზე მოწყვლად ჯგუფებს, მათ შორის მარტოხელა დედებს, შშმ პირებს, ხანდაზმულებს, ძალადობის მსხვერპლებს.

რუსული კანონი გავლენას იქონიებს იმ ახალგაზრდულ ორგანიზაციებზე, რომლებიც გაცვლით პროგრამებს აორგანიზებენ სასწავლო ან/და მოხალისეობრივ სამუშაოებზე წამსვლელთათვის.

რუსული კანონი გავლენას მოახდენს საზოგადოების ყველა ფენაზე და შეეხება საქართველოში მცხოვრებ ყველა ადამიანს.

დღეს, 3 აპრილს, ბათუმის აეროპორტში სტამბოლი-ბათუმის თვითმფრინავი ვერ დაჯდა.

თვითმფრინავი ბათუმის აეროპორტში დაფრენას ამ წუთებშიც [21:30 სთ.] ცდილობს.

„ბათუმელების“ ინფორმაციით მიზეზი მეტეოროლოგიური პირობებია, კერძოდ ქარი.

განახლება: თვითმფრინავი რიზეს აეროპორტში დაჯდა, თბილისის დროით დაახლოებით 21:55 სთ-ზე.

მთავარი ფოტო „ბათუმელების“ არქივიდან

ბათუმის მერია მორიგი „იაფი სახლის“ აშენებას გოროდოკის დასახლებაში, ვოლსკის ქუჩის 13 ნომერში გეგმავს.

მერიის საქალაქო ინფრასტრუქტურისა და კეთილმოწყობის სამმართველოს ბაზრის კვლევის დოკუმენტების მიხედვით, მრავალბინიანი სახლი 200 ოჯახზე იქნება გათვლილი.

სამმართველო ბაზრის კვლევას იმ ფასის დასადგენად ატარებს, რაც „იაფი სახლის“ მშენებლობისთვის განაშენიანების დეტალური გეგმის, სახლის პროექტის შედგენისა და მშენებლობისთვის იქნება საჭირო. თანხის ოდენობის დადგენის შემდეგ კი სამმართველო ტენდერს გამოაცხადებს.

ტენდერს Design-Build მეთოდით გამოაცხადებენ, ანუ გამარჯვებული ვალდებული იქნება მოამზადოს „იაფი სახლის“ პროგრამის ფარგლებში მრავალბინიანი საცხოვრებელი სახლის მშენებლობისთვის საჭირო განაშენიანების დეტალური გეგმა, ასევე არქიტექტურულ-სამშენებლო პროექტი და ამ პროექტის საფუძველზე ააშენოს კორპუსი.

ტერიტორია, რომელიც მერიამ შეარჩია გოროდოკის დასახლებაში, ქალაქის N19 საბავშვო ბაღის მიმდებარედაა. მიწის ნაკვეთი, რომლის ფართობი 6 246 კვ/მ-ია ბათუმის მუნიციპალიტეტის საკუთრებაა. საპროექტო ტერიტორიაზეა ასევე სტადიონი.

დაანგრევენ თუ არა სტადიონს სახლის მშენებლობისთვის [როგორც ეს ხელვაჩაურში მოხდა, სადაც სოციალური სახლის მშენებლობის მიზნით დაანგრიეს სტადიონი, რომლის მოსაწყობად ბიუჯეტიდან 50 ათასი ლარი დაიხარჯა]? – ამ კითხვის პასუხად ბათუმის მერიის სამმართველოში „ბათუმელებს“ უთხრეს, რომ „სტადიონის საკითხი ბაზრის კვლევის პროცედურების დასრულების შემდეგ გაირკვევა“.

ინფორმაცია, რა თანხა დაიხარჯა ამ სტადიონის მოსაწყობად, სამმართველოდან ამ დრომდე ვერ მივიღეთ.

ბაზრის კვლევის დოკუმენტების მიხედვით, სამომავლოდ ტენდერში გამარჯვებულმა სამუშაოები ხელშეკრულების გაფორმებიდან 2 წელში უნდა დაასრულოს.

ამავე დოკუმენტების მიხედვით, „მრავალბინიანი საცხოვრებელი შენობა  უნდა მოიცავდეს შემდეგ ფუნქციურ ზონებს [მაგრამ არ შემოიფარგლება]:

• საცხოვრებელი ფართობები – ბინები, [საზაფხულო [აივანი] და დამხმარე/სათავსო სივრცეების ჩათვლით]; თითოეული ბინა უნდა მოიცავდეს 1 სველ წერტილს, სამზარეულო/სასადილო და საძინებელ სივრცეებს, საზაფხულო და დამხმარე/ტექნიკურ სივრცეებს, გეგმარება უნდა იყოს მაქსიმალურად ოპტიმალური და ბუნებრივი განათებით უზრუნველყოფილი;
• საერთო სარგებლობის კიბის უჯრედები, სადარბაზოები და დერეფნები;
• სამგზავრო და სატვირთო ლიფტები [საჭიროების შემთხვევაში];
• ტექნიკური ოთახები.“

ამასთან, 80 ბინა უნდა იყოს ერთოთახიანი [საორიენტაციო საერთო ფართობი 30-40 კვ.მ]; 80 ბინა უნდა იყოს ოროთახიანი [50-60 კვ.მ]; 40 ბინა – სამოთახიანი [70-80 კვ.მ]. სულ 200 ბინის სრული საცხოვრებელი ფართობი ჯამში უნდა იყოს მაქსიმუმ 12 000 კვადრატული მეტრი.

ტენდერში, რომელიც სამმართველომ უნდა გამოაცხადოს, იქნება პირობა, რომ „საცხოვრებელი ფართობები, შენობების შიდა და გარე მოპირკეთებისა და კოსმეტიკური სარემონტო სამუშაოების ჩათვლით – ჩაბარებული უნდა იქნეს დასრულებულ მდგომარეობაში.“

ე.წ. „იაფი სახლი“ ბათუმის მუნიციპალიტეტის პროგრამაა, რომლის ფარგლებში ქალაქის ბიუჯეტით აშენებული სახლები გარკვეულ ოჯახებს გარკვეული პირობებით გადაეცემათ გამოსყიდვის უფლებით.

„იაფი სახლის“ ფარგლებში ბათუმის მერიამ ბინები დღემდე ორ ეტაპად გასცა, თუმცა გასულ წელს დარჩა 11 ოჯახი, რომლებიც აკმაყოფილებდნენ კრიტერიუმებს, თუმცა მათ ბინები არ შეხვდათ.

მაშინ მერიაში თქვეს, რომ ეს ოჯახები ბინებს მესამე ეტაპზე მიიღებდნენ, თუმცა არ დააკონკრეტეს როდის დაიწყებოდა ეს ეტაპი – ახალი ბინების მშენებლობა, განაცხადების მიღება-შერჩევა და სხვა.

ვრცლად: მერიაში არ ამბობენ, როდის განახლდება იაფი სახლის პროგრამა ბათუმში

„როდის დაიწყება მესამე ეტაპი და ბინის მსურველთა განაცხადების მიღება, ეს უფრო ტენდერის შედეგების შემდეგ დაკონკრეტდება და გასაჯაროვდება. იმ 11 ოჯახს კი, რომლებიც წინა ეტაპზე შეირჩნენ, ახალ სახლში ბინებს ავტომატურად გადასცემენ“ – გვითხრეს დღეს, 3 აპრილს, ქალაქის მერიაში.

უსახლკარობის პრობლემა ბათუმში ათასობით ოჯახს აწუხებს. მოქალაქეები, რომლებიც ხშირად აქციებს მართავენ, ამბობენ, რომ სახლს კი არა თავშესაფარს ითხოვენ. ეს ის კატეგორიაა, რომელსაც „იაფის სახლის“ პროგრამით სარგებლობა იმის გამო არ შეუძლია, რომ გადახდის უნარიანი არ არის.

ამის პარალელურად, როგორც აჭარის მთავრობის ბალანსზე, ასევე ბათუმის მერიის საბინაო ფონდში ასობით ბინაა, რომლებიც უკვე თვეებია, ზოგჯერ კი წლებია მერიას დაკეტილი აქვს.

ამ თემაზე ვრცლად: 3000 უსახლკარო ოჯახი და ბათუმის მერიის დაკეტილი ბინები