ორგანიზაცია „მშობლები განათლებისთვის“ დამფუძნებელი მეგი კავთუაშვილი რუსული კანონის წინააღმდეგია. მისი თქმით, რუსული კანონი შეეხება ყველას. თუკი ხელისუფლება მიიღებს ამ კანონს, ხელისუფლება ჯერ კრიტიკულ მედიას შეუტევს, შემდეგ კი დაიწყება სხვა ადამიანების დევნა, დაჯარიმება და დაპატიმრება.
„6 წლის წინ დავაფუძნეთ მშობელთა ასოციაცია – ერთადერთი მიზნით, რომ მშობლებს დავხმარებოდით და სკოლებში მშობელთა ჩართულობის გაზრდისთვის შეგვეწყო ხელი.
ჩვენ რომ ვიწყებდით, ამ თემას არავინ იცნობდა, სრულიად გაუკვალავში ვიარეთ. შევქმენით ასობით საჭირო რესურსი (წიგნი, სტატია, ვიდელექცია, ვებინარი), გადავამზადეთ 10 000-ზე მეტი მშობელი, მასწავლებელი. პერსონალური კონსულტაცია გავუწიეთ ათასობით მშობელს. არასდროს არც ერთი მასწავლებლისა და დირექტორისთვის არ გვითქვამს უარი კონსულტაციაზე.
დღეისათვის სკოლების უმრავლესობის დირექტორმა თუ მასწავლებელმა იცის, მშობლების მონაწილეობა რომ საჭირო და აუცილებელია.
მომზადებულ და მოტივირებულ მშობელსაც ყველგან ნახავთ. ნახავთ სკოლებს, სადაც გამართულია მშობელთა ჩართულობის სისტემა. მშობლებიდან დღითიდღე უფრო მეტი ადამიანი იღებს ხმას და ამბობს როგორი განათლების სისტემა უნდა მისი შვილისთვის. დღითიდღე უფრო მეტად ადგება მშობლების რესურსი სკოლებს.
უკეთეს შედეგებს რომ მივაღწიოთ, დღე და ღამე ვპასუხობთ ყველა ზარს, მესიჯს, ნაცნობს, უცნობს. ბიზნესი რომ დიდ ფულს ხარჯავს, ჩვენ იმ საქმეს თითქმის უფასოდ ან სრულიად უფასოდ ვაკეთებთ, მარტო იმიტომ, რომ:
- მოგვწონს, რასაც ვაკეთებთ
- გვჯერა, რომ საჭირო საქმეს ვაკეთებთ
- სხვანაირად არ შეგვიძლია
პირნათლად ვიხდით ყველა გადასახადს. ვავსებთ დეკლარაციებს. კანონით დადგენილ ყველა ფინანსურ ანგარიშს ვაბარებთ შემოსავლების სამსახურს.
ვინ გვაფინანსებს? რა თქმა უნდა, ამერიკა და ევროპა, აბა, რუსეთი ხომ არ დაგვაფინანსებს ზოგიერთებივით!!!
ხელისუფლებისგან არც ერთხელ არც ერთი ლარი არ აგვიღია.
რატომ? იმიტომ რომ არ გვინდა გავხდეთ ბიუჯეტზე დამოკიდებული და საშუალება არ მივცეთ ხელისუფლებას, გვმართოს.
ამით ვცდილობთ შევინარჩუნოთ დამოუკიდებლობა და თავისუფლება, რაც არასამთავრობო სექტორის მთავარი აზრია“, – ამბობს მეგი კავთუაშვილი.
ახლა რატომ ვწერ ამ ყველაფერს – ამბობს მეგი.
„იმიტომ, რომ რუსული კანონი, პირდაპირ მებრძვის მე.
ებრძვის გულანთებულ ადამიანებს, ვისაც არ შეუძლია ჩუმად იჯდეს მაშინ, როცა ყვირილია საჭირო. ვინც სხვისი გულისთვისაც იტკივებს აუტკივარ თავს და ლომის ხახაში ყოფს თავს იმისთვის, რომ ბავშვებმა ცოტა უკეთეს გარემოში ისწავლონ, რომ ადამიანის უფლება ყველა ასაკში იყოს დაცული, რომ მხოლოდ ჩინოვნიკების კეთილსინდისიერებაზე აღარ იყოს დამოკიდებული როგორ ვიცხოვრებთ.
თქვენ უკეთ იცით, დაგვიცავთ თუ არა კიდევ ერთხელ და იმდენჯერ, რამდეჯერაც რუსეთის დირექტივით ჩვენი მთავრობა შემოგვიტევს არასამთავრობო სექტორს და კრიტიკულ მედიას, მაგრამ მე გეტყვით, რომ თუ ეს კანონი მიიღეს, კანონიერი გახდება ჩემი და ჩემნაირი ადამიანების უმიზეზოდ დაპატიმრება, დევნა, დაჯარიმება. თქვენ კი როცა ჩემი, მშობელთა ასოციაციის, უფლებადამცველების ან სხვა არასამთავრობო ორგანიზაციების დახმარება დაგჭირდებათ, უბრალოდ აღარ დაგხვდებით იქ, სადაც ადრე გეგულებოდით და გეიმედებოდით.
დანარჩენი თქვენ იცით.
მე იქ ვიქნები, სადაც უნდა ვიყო“, – წერს მეგი წერილში, რომელიც დღეს 5 აპრილს, ფეისბუქში გამოაქვეყნა.
