„თქვენ ფაქტობრივად მოატყუეთ ქვეყნის ამომრჩევლები, თქვენ მოატყუეთ ქალები. ღირსი ხართ, რომ არცერთმა ქალმა არ დაგიჭიროთ მხარი. ქალების მიერ უნდა დაისაჯოთ არჩევნებში“, – მიმართა პარლამენტარმა რომან გოცირიძემ სხდომაზე „ოცნებას“. პარლამენტი დღევანდელ სხდომაზე საარჩევნო კოდექსში ცვლილებას განიხილავს, რაც გენდერული კვოტირების გაუქმებას გულისხმობს.
კანონპროექტის თანახმად, პოლიტიკური პარტიები არ იქნებიან ვალდებული თავიანთი საარჩევნო სია დააკომპლექტონ გენდერული კვოტირების მოთხოვნების შესაბამისად. გარდა ამისა, პროექტით პარტიულ სიაში საქართველოს პარლამენტის წევრობის კანდიდატთა რაოდენობის მინიმალური ოდენობა განისაზღვრება 30-ით, ნაცვლად 60-სა.
„ამ კანონის მიღებას აქვს ორი მიზანი, პირველი, კიდევ ერთი დამატებითი, წინააღმდეგობა შემოიტანონ ევროკავშირთან დასაპირისპირებლად. ეს იყო საარჩევნო კანონმდებლობაში ცვლილების შეტანა, ეს არის სხვა კანონები, რომლებიც სხვა რეკომენდაციით არის მოთხოვნილი. ეს არის რუსული აგენტების კანონის უკან შემობრუნება და ეს არის ევროკავშირში გაწევრიანების მოთხოვნის ერთ-ერთი მნიშვნელოვანი პუნქტის, გენდერული თანასწორობისა და ასევე საარჩევნო კანონმდებლობის გაუარესება, ვინაიდან ეს არის საარჩევნო საკითხი, სადაც უარესდება დღეს არსებული მდგომარეობა. თქვენ ფაქტობრივად მოატყუეთ ქვეყნის ამომრჩევლები, თქვენ მოატყუეთ ქალები, ღირსი ხართ, რომ არცერთმა ქალმა არ დაგიჭიროთ მხარი. ქალების მიერ უნდა დაისაჯოთ არჩევნებში.
სამი წლის წინ აცხადებდით, რომ ეს კანონი 2028 წლის შემდეგ კიდევ უფრო გაუმჯობესდება, 2032 წლის შემდეგაც იმუშავებს ეს კანონი, ფაქტობრივად ქალთა თავისუფლებას, ემანსიპაციას, მათ ეკონომიკურ გაძლიერებას უშლის ხელს.
რეგიონებში ქალთა უფლებების დათრგუნვას უწყობთ ხელს, რამდენი ქალია იცით დღეს მარნეულში საკრებულოში, განსაკუთრებით მწვავეა ეს ეთნიკური უმცირესობებით დასახლებულ რეგიონებში, ეს არის ცხრა ქალი, ერთი მესამედი საკრებულოს წევრებისა, რამდენი იყო 2017-ში? – 2017- ში მარნეულის საკრებულოში იყო ნული ქალი.
დღეს ხუთასამდე დეპუტატია ადგილობრივი თვითმმართველობის ორგანოებში, სწორედ იმ კანონის წყალობით, რომელსაც პროევროპულად ასაღებდით, აბა ნახეთ თქვენი გამოსვლები და არგუმენტები, თქვენ ამბობდით, რომ ევროპაში არ არის არცერთი სახელმწიფო, სადაც არ მუშაობს ეს სისტემა, ან საკანონმდებლო დონეზე, ან პარტიული შეთანხმების დონეზე, სკანდინავიის ქვეყნებს ნახევარი საუკუნეა არავითარი კანონი არ სჭირდებათ, მათი პარტიების წესდებით რეგულირდება ეს საკითხი, ხოლო საფრანგეთში კონსტიტუციით არის ეს უზრუნველყოფილი.
თქვენ როდესაც ევროპულობით ასაბუთებდით ამ კანონის მიღებას, დღეს უკვე ავლენთ თქვენს ანტიევროპულ ქმედებებს კიდევ ერთ ამ გამოვლინებაში. უნდა დაისაჯოთ და ამ დასჯის ყველაზე მარტივი და კანონიერი ფორმა ეს არის არჩევნებში ამ პარტიის გასტუმრება პოლიტიკურ მოუსავლეთში“, – განაცხადა რომან გოცირიძემ სხდომაზე.
ცვლილება შედის, ასევე, „მოქალაქეთა პოლიტიკური გაერთიანებების შესახებ“ ორგანულ კანონში, რომლის თანახმად, უქმდება ის ფინანსური წახალისების ინსტრუმენტი, რომელიც პარტიებს დამატებით ფინანსურ წახალისებას სთავაზობს სიებში ქალი კანდიდატების შესაბამისი პროპორციით ჩაწერის გამო.
კანონპროექტების ინიციატორები არიან საპარლამენტო პოლიტიკური ჯგუფი „გირჩის“ წევრები: იაგო ხვიჩია, ალექსანდრე რაქვიაშვილი, ვახტანგ მეგრელიშვილი და ჰერმან საბო.
„ქართული ოცნება“ აცხადებს, რომ აპირებს ამ კანონპროექტს მხარი დაუჭიროს.
