Batumelebi

ბათუმში ნაპირდაცვის პროექტის განხორციელება უკვე დაიწყო, თუმცა პროექტის პირველი ნაწილი მოსამზადებელ სამუშაოებს გულისხმობს,  თუ როდის დაიწყება უშუალოდ ნაპირსამაგრი ნაგებობის მშნებლობა, ჯერ ვერ ასახელებენ.

„სამუშაოები დაწყებულია, შეიძლება ეს ჯერ არ ჩანს, რადგან სანამ ნაპირსამაგრი ნაგებობის მშენებლობა დაიწყება, იქამდე მას სჭირდება მთელი რიგი მოსამზადებელი სამუშაოები. ველოდებით მშენებლობის ნებართვას ეკონომიკის სამინისტროსგან. პირველ რიგში დაიწყება პროექტის კვლევითი კომპონენტი – მონიტორინგი როგორც მდინარე ჭოროხის აუზის, ასევე ზღვის სანაპირო ზოლის, რისთვისაც ხდება აპარატურის ჩამოტანა, დაწყობა, დალაგება და ა.შ.“ – განმარტავს რევაზ გიგილაშვილი, აზიის განვითარების ბანკის მიერ დაფინანსებული პროექტების მენეჯერი.

ნაპირდაცვის პროექტი სამუშაოების დაწყებიდან, წელიწადნახევარში უნდა დასრულდეს. რეზო გიგილაშვილმა განმარტა, რომ სამუშაოები 18 თვის განმავლობაში გადაბმულად არ ჩატარდება: „კონტრაქტს ხელი მოვაწერეთ ნოემბრის ბოლოს, მაგრამ აი ამ წელიწადნახევრის ათვლა დაიწყება სამუშაოების დაწყების შესახებ შეტყობინების გაცემის შემდეგ, რომელიც ჯერ გაცემული არ არის. მოგეხსენებათ, როგორ სენსიტიურ მონაკვეთზე ვმუშაობთ, ეს არის სანაპირო ზოლი და ზაფხულის 3 თვე უშუალოდ სამუშაოები არ გვექნება, წყვეტა გვექნება“.

ამავე თემაზე: 

ნაპირდაცვა თუ ბათუმის სანაპიროს ეკოლოგიური დასახიჩრება – რა შემთხვევაში ემუქრება წარეცხვა ძველ ბულვარს

„ერთიანი ნაციონალური მოძრაობის“ ყრილობას ხვალ ბათუმიდან 733 დელეგატი დაესწრება. „პარტიიდან რამდენიმე ლიდერის წასვლა არ ასახულა აჭარის ორგანიზაციაზე. აქ მხოლოდ ხულოს საკრებულოს ოთხი წევრი და რაულ თავართქილაძე გამოგვაკლდა,“ – ამბობს „ბათუმელებთან“ ელგუჯა ბაგრატიონი, აჭარის უმაღლესი საბჭოს ფრაქცია „ერთიანი ნაციონალური მოძრაობის“ ხელმძღვანელი.

ამ დრომდე „ბათუმელები“ ვერ დაუკავშირდა პეტრე ზამბახიძეს, უმაღლესი საბჭოს წევრს „ნაციონალური მოძრაობიდან“. მის პარტიიდან წასვლის შესახებ „ევროპულ საქართველოში“ გადასული რაულ თავართქილაძე საუბრობდა. ელგუჯა ბაგრატიონის ინფორმაციით, პეტრე პარტიაში რჩება და ის, როგორც დელეგატი, პარტიულ ყრილობასაც დაესწრება.

დაესწრება თუ არა ყრილობას ლევან ვარშალომიძე – პარტიის აჭარის ორგანიზაციაში ამის შესახებ ზუსტი ინფორმაცია არ აქვთ. „ჩვენი ინფორმაცით, ის არ იმყოფება საქართველოში და ალბათ პირდაპირ ყრილობისთვის თბილისში ჩამოფრინდება,“ – ამბობს ელგუჯა ბაგრატიონი.

მისივე თქმით, ბოლო დღეებში პარტიას დაახლოებით 100 ახალი აქტიური მხარდამჭერი შეუერთდა და ისინი დელეგატებადაც შეარჩიეს პარტიის პირველადმა ორგანიზაციებმა. ამ დროისთვის „ნაციონალურ მოძრაობას“აჭარაში ყველაზე მეტი დელეგატი – 278 ბათუმში ჰყავს, ყველაზე ნაკლები  – 42  კი, ქედაში.

ყრილობა, რომელმაც ენმ-ის ახალი მენეჯმენტი უნდა აირჩიოს, მინიმუმ 7000 დელეგატის მონაწილეობით ჩატარდება.

733 დელეგატი პარტიულ ყრილობაზე დასასწრებად ხვალ ბათუმიდან მიკროავტობუსებით გაემგზავრება.

დღეს, 18 იანვარს, რამდენიმე წუთის წინ, ბათუმის მერიის ადმინისტრაციულ შენობასთან ახლოს, სამარშრუტო ტაქსს შეეჯახა ნისანის ტიპის ავტომანქანა. შეჯახების შედეგად მიკროავტობუსი ამოყირავდა. სამარშრუტო ტაქსის მძღოლი აცხადებს, რომ ავტომანქანაში მგზავრები არ ჰყავდა.

შემთხვევის ადგილზე ამბობენ, რომ მძიმედ არავინ დაშავებულა. ადგილზე იმყოფება სასწრაფო სამედიცინო ჯგუფი და საპატრულო პოლიცია.

როგორ გაიგეს სკოლის დირექტორებმა განათლების მინისტრის განცხადება საჯარო სკოლებისთვის „წამყვანის“ სტატუსის მინიჭებაზე და სჭირდებათ თუ არა სკოლებს „უფრო მეტი თავისუფლება“, რომელსაც მინისტრი „კარგად მუშაობის“ შემთხვევაში ჰპირდება?  გამოიწვევს თუ არა მინისტრის ინიციატივა სკოლების სტიგმატიზირებას და ხომ არ მოუწევთ სკოლებს პრესტიჟისთვის ბრძოლა, არაკონკურენტულ გარემოში?  მინისტრის განცხადებით  სკოლების კატეგორიებად დაყოფა „პოზიტიური დისკრიმინაცია“ იქნება. სკოლის დირექტორები ალექსანდრე ჯეჯელავას ინიციატივას „ბათუმელებთან“ აფასებენ.

ბათუმის მე-16 საჯარო სკოლის დირექტორი, თამთა კვარაცხელია ამბობს, რომ სკოლების კატეგორიებად დაყოფა  ძალიან ზოგადი განაცხადია და მისთვის უცნობია რა იგულისხმება ამაში.

„კატეგორიზაციის საკითხი  იყო დეკლარირებული, თუმცა დაწვრილებით, – როგორ და რანაირად, ეს არ არის ჩემთვის ცნობილი. როცა ყველაფერი დაიდება, შემდეგ ავწონ-დავწონით. ცოტათი რთულია წარმოვიდგინო თანაბარ პირობებში როგორ ჩავაყენებთ თბილისის პირველ საჯარო და ჩხოროწყუს რომელიმე საჯარო სკოლას. ამიტომ, დოკუმენტს რომ გავეცნობი  შემდეგ ალბათ უფრო ნათელი იქნება“ – გვეუბნება დირექტორი.

თამთა კვარაცხელიას თქმით, ასევე გაუგებარია რას ნიშნავს მინისტრის განცხადება, – „ვინც უკეთ აგვარებს პრობლემას“.

„შესაძლოა სკოლას ბევრი ფული ჰქონდეს და მაინც ვერ მოაგვაროს თავისი პრობლემები; ან ცოტა ჰქონდეს და ამის გამო ვერ მოაგვაროს და პირიქით, ცოტა ფული ჰქონდეს და მაინც კარგად მოაგვაროს. ასე, რომ ცოტა ბუნდოვანი საკითხია.“

თამთა კვარაცხელიას აზრით, თუ სკოლაში სველი წერტილები წესრიგში არ არის  და არც კვების უსაფრთხოებაა დაცული, ამაზე პასუხისმგებლობა დირექტორმა უნდა აიღოს.

„თუ ბავშვების სიცოცხლესა და ჯანმრთელობას საფრთხე ემუქრება,  ცხადია ამაზე დირექტორია პასუხისმგებელი.  „თუმცა, რას ნიშნავს „წესრიგი“  ესეც შეიძლება იყოს სხვადასხვა დონეზე განმარტებული.  გააჩნია, როგორია სკოლის წყალმომარაგება, რომელ რეგიონშია  სკოლა, მაგრამ თუ სკოლას ყველა პირობა აქვს შექმნილი მუნიციპალიტეტებისგან  და უბრალოდ ინფექციის ბუდეა, ცხადია დასასჯელია ადმინისტრაცია“-გვეუბნება ის.

თამთა კვარაცხელიას აზრით, ყველაზე მეტი თავისუფლება რაც დღეს სკოლას სჭირდება, საათობრივია ბადეა: „ვერ ვიტყვი რომ თავისუფლების ნაკლებობას განვიცდი, მაგრამ არის გარკვეული საკითხები რაშიც ვისურვებდი მეტ თავისუფლებას. მაგალითად, საათობრივი ბადის გამო, შეიძლება სკოლა ვერ სთავაზობდეს მოსწავლეს დამატებით სააღმზრდელო მომსახურებას, ზოგიერთ სკოლას აქვს იმის შესაძლებლობა რომ აწარმოოს ეკონომიკური საქმიანობა, მაგრამ ვერ ახერხებს სხვადასხვა შემზღუდავი საკანონმდებლო აქტების გამო და ა.შ. თუმცა, საბოლოო შეფასება დამოკიდებული იქნება იმაზე, თუ რა წერია დოკუმენტში“.

მე-10 საჯარო სკოლის დირექტორის, დათო ეცადეიშვილის თქმით, „ყველაფერს აქვს თავისი დადებითი და უარყოფითი მხარე. დადებითი ის, რომ  ე.წ „კატეგორიზაცია“ სკოლებს შორის კონკურენციას გაზრდის, ხარისხს აამაღლებს ალბათ, მაგრამ  ეს ქალაქის სკოლებისთვის შედარებით ადვილი იქნება, რეგიონის სკოლებისთვის კი რთული. ადგილმდებარეობა, მოსწავლეთა კონტინგენტი, კვალიფიციური მასწავლებლები, ინფრასტრუქტურა – ეს ყველაფერი განსაზღვრავს სკოლის ხარისხს“.

დათო ეცადეიშვილის აზრით, სკოლის თავისუფლება მხოლოდ დირექტორზე არ არის დამოკიდებული.

„თუ ინფრასტრუქტურული პრობლემაა, ამის მოგვარებას სჭირდება შესაბამისი თანხა, რომელიც სკოლას შეიძლება არ ჰქონდეს. მაგრამ, თუ აქვს და ვერ აგვარებს, მაშინ სკოლის უუნარობაა, მაგრამ თუ არ აქვს, როგორ მოაგვაროს? ისევ სამინისტროს უნდა მოსთხოვოს.  საკადრო პრობლემაც ნაწილობრივ არის დირექტორზე დამოკიდებული, რადგან თუ გამოაცხადა კონკურსი და კადრი მაინც არ მივიდა სკოლაში, როგორ მიიყვანოს, რა ბერკეტი აქვს დირექტორს? ქალაქი, მთა და ბარი ერთნაირ პირობებში არ არის, ამიტომ ე.წ „კატეგორიზაციის“ უარყოფითი მხარე არის ეს. კონკურენცია თანაბარ პირობებში უნდა იყოს“ – გვეუბნება ის.

სკოლის თავისუფლებას რაც შეეხება, დათო ეცადეიშვილის აზრითაც სკოლა თავისუფალია – „იქნება ეს საკადრო, ფინანსური, აღმზრდელობითი და სხვა არ ვიცი რა თავისუფლებაზეა საუბარი, თუმცა სკოლების კატეგორიებად დაყოფა სკოლების სტიგმატიზაციას გამოიწვევს და მოსწავლეების პრესტიჟულ სკოლებში გადინებას გამოიწვევს“.

ბათუმის მე-2 საჯაროს სკოლის დირექტორი მარიზა აბაშიძე მიიჩნევს, რომ სკოლების კატეგორიებად დაყოფა, გარკვეული შედეგების  და კვალიფიციური კადრების საფუძველზე უნდა მოხდეს.

„არ შეიძლება ყველა დაწესებულება განვიხილოთ ერთ ჭრილში, ზოგს აქვს წარმატებები, ზოგს არა. ვფიქრობ ეს სკოლისთვის ან მოსწავლისთვის დამთრგუნველი არ იქნება. ქალაქის ცენტრალურ სკოლებში მოსწავლის მიღება ისედაც პრობლემაა, ამიტომ არა მგონია კატეგორიებად დაყოფის შემდეგ, ამან სურათი შეცვალოს. ვფიქრობ, სკოლების კატეგორიებად დაყოფა მოსწავლის მოტივაციას აამაღლებს და კონკურენციასაც გაზრდის სკოლებს შორის“.

მარიზა აბაშიძის აზრით, სკოლას მაღალ კატეგორიაში მოსახვედრად ახალი ნოვაციები სჭირდება: „სკოლების კატეგორიზაციის საკითხი, ჩემი აზრით რამდენიმე მიმართულებით უნდა განიხილებოდეს. უნდა იყოს საგანმანათლებლო შედეგი, მიღწევები, რაღაცაში წარმატებას უნდა მიაღწიოს, რაღაც სიახლე უნდა დანერგოს, ოლიმპიადებში, კონკურსებში უნდა ჰქონდეს წარმატებები. არის ნოვაციის გამტარებელი სკოლები და ისეთიც, რომელიც 50 წლის წინანდელი სტრუქტურით რომ მუშაობს.  სიახლის მიმღებლობა უნდა ჰქონდეთ ამ სკოლებს, რადგან 21-ე საუკუნის  მოსწავლის დაინტერესება რთული პროცესი გახდა და სკოლამ მრავალმხრივად უნდა შეუწყოს ხელი  მოსწავლეებს რომ მოხდეს მათი მოტივაციის ამაღლება. გარდა ამისა, კვალიფიციური კადრების ფაქტორი, ინფრასტრუქტურა მოქმედებს მოსწავლის მოტივაციაზე.  სკოლაში მოსწავლე უნდა მოდიოდეს სიამოვნებით, სიხარულით და ყველაფერი უნდა უწყობდეს ამაში ხელს. სკოლების კატეგორიზაციებად დაყოფა კი მისცემს ჩვენს მოსწავლეებს ამის საშუალებას.

მეტ თავისუფლებას რაც შეეხება,  ამაში ალბათ იგულისხმება „თავისუფალი გაკვეთილები“ და თავისუფალი მიდგომები. იმიტომ, რომ აქცენტი ამათზეა გაკეთებული, რადგან გადაწყვეტილებების მიღებაში სკოლა ისედაც თავისუფალია. ჩვენ ვხელმძღვანელობთ ეროვნული სასწავლო გეგმით და იქ „თავისუფალი გაკვეთილი“ არ არის. ზუსტად ამ მიმართულებით გულისხმობს მინისტრი თავისუფლებას“.

მარიზა აბაშიძის თქმით, პრობლემას რომელსაც დღეს ქალაქის სკოლაში დირექტორი დამოუკიდებლად ვერ წყვეტს, ფაქტობრივად არ არსებობს: „გარკვეული პრობლემები შეიძლება ჰქონდეთ მცირეკონტინგენტიან სკოლებს, რადგან ასეთი სკოლა რემონტს დამოუკიდებლად ვერ გააკეთებს. მიმდინარე რემონტსაც კი და ალბათ ამ კუთხით სჭირდება სამინისტროს ჩარევა. ჩვენი ბიუჯეტის პირობებში კი სამინისტროს ჩარევის აუცილებლობა არ არსებობს, ტენდერი იქნება თუ მიმდინარე სხვა სამუშაო, სკოლა აკეთებს ამას დამოუკიდებლად“.

მარიზა აბაშიძის თქმით, დირექტორი ვალდებულია სკოლაში მოსწავლისთვის უსაფრთხო გარემო შექმნას, თუმცა დაბალბიუჯეტიან სკოლებს სამინისტროს თანადგომა სჭირდება.

„გონიოს ხიდის“ აღდგენა 2014 წლიდან დღემდე გრძელდება და ვერ სრულდება. თავდაპირველი ხელშეკრულების მიხედვით, რომელიც კომპანია „ზიმოსა“ და საავტომობილო გზების დეპარტამენტს შორის 2015 წლის 28 იანვარს გაფორმდა, სამუშაოები გასული წლის ივნისში უნდა დასრულებულიყო. მას შემდეგ ხელშეკრულებაში 11-ჯერ შევიდა ცვლილება.

დღეს მდინარე ჭოროხზე არსებულ „გონიოს ხიდთან“ ბრიფინგი ნოდარ დუმბაძემ გამართა, ბათუმის საკრებულოს წევრმა „ნაციონალური მოძრაობიდან“ და თქვა, რომ ამ კომპანიას ხიდისთვის არ სცალია.

„მართლა არ სცალია. კომპანია „ზიმომ“ გადაიტანა ასწლოვანი ტიტა ბიძინა ივანიშვილის ბაღში. ამ კომპანიას გადააქვს ახლაც ხეები ციხისძირიდან, კიდევ 50 ხე უნდა გადაიტანოს. მთელი ტექნიკა იქ ჰყავს და ამიტომაც ვერ ახერხებს ხიდის რეაბილიტაციას. ჩვენ ვთხოვთ გზების დეპარტამენტს, შეუწყვიტოს ამ კომპანიას ხელშეკრულება და გაფორმდეს იმასთან, ვინც შეასრულებს სამუშაოს. ვამბობთ, რომ ტურიზმია მნიშვნელოვანი. ამ დროს კი, სარფიდან ბათუმისკენ როცა მოდიხარ, პირველი ეს დანგრეული ხიდი გხვდება“, – აცხადებს ნოდარ დუმბაძე.

ხიდის რეაბილიტაციის დაუსრულებლობის კავშირს ხეების გადატანასთან გამორიცხავენ კომპანია „ზიმოსა“ და გზების დეპარტამენტში. კომპანიაში გვითხრეს, რომ სამუშაოების რამდენჯერმე გადავადების მიზეზი ის იყო, რომ ხიდი რთული საინჟინრო ნაგებობაა და ხელშეკრულებით გათვალისწინებულ პროექტში ცვლილებების შეტანა დარჩა საჭირო.

„ჩვენ უკვე დავამაგრეთ ბურჯები, რადგან ჭოროხის დონე იყო დაწეული, რამაც გამოიწვია ბურჯების ძირის გამოთხრა. შემდეგი იყო ხიდის შუა ნაწილის, მეტალის კონსტრუქციის გამაგრება. ახლა ვართ დასრულების ეტაპზე  – ეს არის სავალი ნაწილის გამაგრება, რაც ზაფხულამდე, სეზონის დაწყებამდე დასრულდება. ჩვენ ხელშეკრულებით გათვალისწინებულ ვადაში ჩავეტევით“, – ამბობს „ბათუმელებთან“ კომპანია „ზიმოს“ თანამშრომელი, ირაკლი შანავა.

სახელმწიფო შესყიდვების სააგენტოს ინტერნეტგვერდის მონაცემებით, გასული წლის დეკემბრის მდგომარეობით, კომპანია „ზიმოს“ მხოლოდ 944 075 ლარის სამუშაოები აქვს შესრულებული, რაც პროექტის საერთო ღირებულების ნახევარიც კი არაა. „გონიოს ხიდის“ აღდგენისთვის ბიუჯეტიდან ჯამში 2 მილიონ 399 ათას 573 ლარი დაიხარჯება.

ამავე სააგენტოს ინტერნეტგვერდის მონაცემებით, ხელშეკრულებაში გაფორმებიდან დღემდე 11-ჯერ შევიდა ცვლილება. ბოლო ცვლილება ხარჯების დაზუსტებაზე მიმდინარე წლის 6 იანვრით თარიღდება. მანამდე შესული ცვლილებებით კომპანიას რამდენჯერმე გადაუვადეს სამუშაოების დასრულების დრო. ბოლოს მას გასული წლის დეკემბრამდე უნდა შეესრულებინა ვალდებულებები, მაგრამ იგი მიმდინარე წლის ივლისამდე გადავადდა.

პროექტის დასრულების ვადის კიდევ ერთხელ გადავადებას გამორიცხავენ გზების დეპარტამენტში. მიიჩნევენ, რომ კომპანია ამჯერად პირობას არ დაარღვევს და ხელშეკრულების შეწყვეტის საფუძველი არ არსებობს. აქ კომპანიისთვის ხელშემშლელ გარემოებად არც ასწლოვანი ხეების ზღვით გადატანას განიხილავენ.

„სად იყო ხეების თემა, როცა ჩვენ ვაჯარიმებდით კომპანია „ზიმოს“ ვადების დარღვევის გამო? სხვა მიზეზი იყო ალბათ, არ ვიცი, ფირმის შიდა საქმეებში ჩვენ ვერ ჩავერევით. ბოლოს 26 ათასით დაჯარიმდა ეს კომპანია, ჯამში 181 ათასით დავაჯარიმეთ, მეტი რა შეგვიძლია, რა უნდა გვექნა?“, – გვითხრა ზურაბ სიხარულიძემ, საავტომობილო გზების დეპარტამენტის აჭარის დირექციის ხელმძღვანელმა.

რა გამორიცხავს იმას, რომ კომპანიას ხეების გადატანის სამუშაოების გამო არ ჰყოფნის ტექნიკური რესურსი ხიდის რეაბილიტაციისთვის? – „ზიმოს“ წარმომადგენელი ამბობს, რომ ისინი დღესაც იქ მუშაობენ. იმავეს ამბობს ზურაბ სიხარულიძე, საავტომობილო გზების დეპარტამენტის წარმომადგენელი: „განათების პრობლემაც მოგვარდა და რეაბილიტაციის პროცესი გვიანობამდე გაგრძელდება, რომ ზაფხულამდე მოესწროს“.

ხულოში, სოფელ ქვედა თხილვანას მოსახლეობა უსაფრთხო საცხოვრებელ ადგილებზე გადაყვანას ითხოვს. გეოლოგიური დასკვნის მიხედვით, აქ მცხოვრები 62 ოჯახის განსახლება აუცილებელია, რადგან მათ მეწყრისგან საფრთხე ემუქრება. მეწყრული პროცესები თხილვანაში 10 იანვარს გააქტიურდა. გუშინ, 17 იანვარს სოფელში მისულმა ხელისუფლებამ მოსახლეობასთან შეთანხმებას ვერ მიაღწია. „ბათუმელები“ ხულოს მუნიციპალიტეტის გამგებელს, ბესიკ ბაუჩაძეს ესაუბრა.

გუშინ აღნიშნეთ, რომ შეიქმნებოდა კომისია, თუმცა ცნობილია, რომ საფრთხე ყოველდღიურად ელოდება მოსახლეობას.

გეთანხმებით. მოსახლეობის უსაფრთხო ადგილებზე გადაყვანა არის ჩვენი პირველი რიგის ამოცანა. ამ კუთხით ვერ მივაღწიეთ მოსახლეობასთან შეთანხმებას. ჩვენ მათ ვთავაზობთ სამი თვით საცხოვრებელი ბინების დაქირავებას. ამ სამ თვეში გადაწყდება, კონკრეტულად რომელ ოჯახს რა საცხოვრებელს შევთავაზებთ. რაც შეეხება კომისიას, მე ვიგულისხმე კომისიის შექმნა ადგილზე, სადაც მოსახლეობა იმუშავებს და გაარკვევს ყველა დეტალს. ჩვენ ჯგუფურად ყველას ვერ დაველაპარაკებით. ისინი პირდაპირ მოითხოვენ, რომ მივცეთ გრძელვადიანი საცხოვრებელი ფართები, მაგრამ ამ ეტაპზე ეს ვერ ხერხდება.

რატომ გითხრათ მოსახლეობამ უარი დროებით საცხოვრებელზე?

იმიტომ, რომ ჩვენ მათ ვთავაზობდით სოციალურ სახლებს, ბინებს ქალაქის ტერიტორიაზე, მათ კი ჰყავთ საქონელი, მათი საკვებიც აქ აქვთ, ისეთი თემაა, ასე უცებ ვერაფერს მოახერხებდნენ. მათი მოთხოვნაა დროებითი საცხოვრებელი ადგილიც მოიძებნოს მიმდებარე სოფლებში.

აპირებთ ამ მოთხოვნის შესრულებას, თუ სხვა შეთავაზება გაქვთ?

კი, ჩვენი სამთავრობო კომისია და ის კომისიაც, რომელსაც დღეს მოსახლეობა ჩამოყალიბებს ვეძებთ უსაფრთხო საცხოვრებლებს მეზობელ სოფლებში. მაქსიმუმ ორ დღეში გადაწყვეტილება უნდა მივიღოთ. მოსახლეობას ყავს საქონელი, უნდა მიხედონ პირუტყვს და ამიტომაც გაგვიჭირდა აქამდე გადაწყვეტილების მიღება.

რა ტიპის მუდმივი საცხოვრებლის შეთავაზებას აპირებთ მათთვის და რა ფინანსური რესურსი დასჭირდება ამას?

ფინანსები ჯერ დათვლილი არ არის, არც მუდმივ საცხოვრებელზე მიგვიღია გადაწყვეტილება, რადგან როგორც გითხარით, პირველი რიგის ამოცანა არის ამ მოსახლეობის უსაფრთხოების უზრუნველყოფა. ამ ოჯახების უსაფრთხო ადგილებზე გადაყვანის შემდეგ სამთავრობო კომისია თითოეული ოჯახის შემთხვევას ცალ-ცალკე განიხილავს, სულადობას, რა პროგრამებით სარგებლობენ და ასე შემდეგ. ამისთვის თანხები ბიუჯეტში გათვალისწინებული არ არის, მაგრამ რესურსი მოიძებნება. არსებობს იგივე სარეზერვო ფონდები, საიდანაც შეიძლება ამისთვის თანხა დაიხარჯოს.

15 წლის მოზარდი, ბათუმის ერთ-ერთი საჯარო სკოლის მოსწავლე, 17 იანვარს დაჭრეს. ბიჭი დანით მიყენებული ჭრილობებით რესპუბლიკურ საავადმყოფოშია მოთავსებული. მოზარდს ოპერაცია უკვე ჩაუტარეს და ჯერჯერობით ისევ რეანიმაციულ განყოფილებაშია.

შს სამინისტროს ინფორმაციით, დამნაშავის ვინაობა ცხელ კვალზე დადგინდა, თუმცა ბრალდებული ჯერ დაკავებული არ არის. როგორც სამინისტროს პრესცენტრში განმარტეს, გამოძიება მიმდინარეობს სისხლის სამართლის კოდექსის 117-ე მუხლის პირველი ნაწილით, რაც გულისხმობს ჯანმრთელობის განზრახ მძიმე დაზიანებას.

უმაღლესი საბჭოს წევრი, ილია ვერძაძე, პროფესიული კავშირების აჭარის გაერთიანების ხელმძღვანელის პოსტსაც ინარჩუნებს. უმრავლესობის წარმომადგენელი ამაში პრობლემას ვერ ხედავს. „ეს არის ჩემი ტვირთი. გამომეკიდონ ერთი დილის ცხრიდან საღამოს ცხრამდე რამდენ საქმეს ვაკეთებ…“ – უთხრა ილია ვერძაძემ „ბათუმელებს“ სატელეფონო საუბრის დროს.

ილია ვერძაძე კანონის იმ ნორმაზე აქცენტირებს, რომელიც უმაღლესი საბჭოს დეპუტატს საზოგადოებრივი ორგანიზაციის ხელმძღვანელ პოზიციაზე მუშაობას არ უზღუდავს.

„ხელისუფლებას აქვს იგივე ინტერესი, რომ დაიცვას დასაქმებულის ინტერესები. მე რომ ვიყო მთავრობაში, სხვა ამბავია, მაგრამ კანონმდებელი ვარ, შემიძლია კონკრეტული ცვლილება შევიტანო კანონში, ან ამისთვის ვიბრძოლო… ევროპაშიც ასე ხდება. ამის ბევრი მაგალითია, როცა პროფესიული კავშირის ხელმძღვანელი პირები სხვადასხვა პარტიიდან პარლამენტში ხვდებიან და პროფკავშირშიც რჩებიან“, – ამბობს ილია ვერძაძე.

ინტერესთა შეუთავსებლობა – ამ პრობლემას ხედავს „ახალგაზრდა იურისტთა ასოციაციის“ აჭარის ფილიალის თავმჯდომარე, გიორგი ხიმშიაშვილი, როცა დეპუტატი იმავდროულად პროფესიული კავშირის ხელმძღვანელიცაა. მისი შეფასებით, აჭარის უმაღლესი საბჭოს რეგლამენტი ძალიან ცუდი იურიდიული დოკუმენტია და მის შეცვლაზე უნდა იმუშაონ დეპუტატებმა, თუმცა არსებული რეგლამენტიც უწესებს შეზღუდვას დეპუტატებს.

„აჭარის რეგლამენტი უშვებს იმის შესაძლებლობას, რომ დეპუტატის ინტერესთა შეუთავსებლობაზე გავრცელდეს საქართველოს კანონის მოქმედება, ხოლო ასეთ კანონს წარმოადგენს „საჯარო სამსახურში ინტერესთა შეუთავსებლობისა და კორუფციის შესახებ“ საქართველოს კანონი, სადაც განმარტებულია, რომ აჭარის არ უმაღლესი საბჭოს წარმომადგენელს (დეპუტატს) უფლება არა აქვს ასრულებდეს რაიმე ანაზღაურებად სამუშაოს, გარდა სამეცნიერო, პედაგოგიური ან შემოქმედებითი საქმიანობისა.  პირველ რიგში, რაც უნდა მოხდეს, არის ის, რომ  უმაღლესი საბჭოს საკონსტიტუციო, იურიდიულ და საპროცედურო საკითხთა კომისიამ უნდა შეისწავლოს საკითხი და შემდგომ შესაბამისი დასკვნით მიმართოს უმაღლეს საბჭოს საბოლოო გადაწყვეტილების მისაღებად,“ – გვითხრა გიორგი ხიმშიაშვილმა.

„ვიდრე იურიდიული კომისია დასკვნას არ დადებს, პოზიციას ვერ გეტყვით“, – ამბობს დავით გაბაიძე, აჭარის უმაღლესი საბჭოს თავმჯდომარე. მისი თქმით, კომისია ილია ვერძაძის შემთხვევას უკვე განიხილავს.

ილია ვერძაძე უმაღლეს საბჭოში ფრაქცია „ქართული ოცნება-მაჟორიტარების“ თავმჯდომარეცაა და მას დეკემბრის თვეში უმაღლეს საბჭოში ხელფასის სახით ჯამში 5170 ლარი აქვს აღებული. რაც შეეხება ილია ვერძაძის, როგორც პროფესიული კავშირების აჭარის გაერთიანების ხელმძღვანელის ხელფასს, ამასთან დაკავშირებით ის ამბობს: „ახლა ვერ გეტყვით, დეკლარაციას როცა შევავსებ, მაშინ ნახავთ“.

ბათუმში ევროპის მოედანზე, საახალწლო ნაძვის ხის დემონტაჟი მიმდინარეობს. 2017 წლის ნაძვის ხის შესაძენად მერიამ 256 730 ლარი გადაიხადა.

წელს ნაძვის ხის გასაფორმებლად 840 ცალი წითელი, მწვანე და ოქროსფერი სათამაშოები იყო შეკვეთილი, რასაც 180 ცალი წითელი ბაფთა დაემატება. ნაძვის ხის დემონტაჟის შემდეგ, ევროპის მოედნიდან საახალწლო ჯიხურებსაც აიღებენ.

წელს ბათუმში, ევროპის მოედანზე საახალწლო ნაძვის ხე, წინა წელთან შედარებით დაგვიანებით, 25 დეკემბერს დადგეს.