პირველადი ჯანდაცვის მომსახურებას ქედაში, წელს პირველად ჯანდაცვის სამინისტროს ნაცვლად ადგილობრივი გამგეობა, სოციალური პროგრამის – „სოფლის მოსახლეობის ექიმამდელი სამედიცინო დახმარება“ ფარგლებში განახორციელებს.
პროგრამის დასაფინანსებლად ქედის გამგეობამ ადგილობრივი ბიუჯეტიდან 140 100 ლარი გამოყო. მედდების შრომის ანაზღაურებასთან ერთად ამ თანხით ქედის გამგეობა მედპუნქტებს საჭირო სამედიცინო ინვენტარსა და მედიკამენტებს შეუძენს – მთლიანობაში 24 დასახელების მედიკამენტსა და ორი სახის სპეციალურ სამედიცინო ინვენტარს.
სამედიცინო პუნქტებისთვის მედიკამენტების შესაძენად ქედის გამგეობას გამარტივებული ელექტრონული ტენდერის გამოცხადება მეორედ 17 იანვარს მოუხდა, რადგანაც ფარმაცევტული პროდუქტების შესაძენად 12 იანვარს გამოცხადებულ ელექტრონულ ტენდერში ქედის გამგეობას სატენდერო დოკუმენტაციაში უზუსტობა გაეპარა.
„გლუკომეტრის და ტესტ-ჩხირების შესყიდვის მახასიათებლების დასახელებაში გაპარულია ტექნიკური შეცდომა, რის გამოც მიზანშეწონილია ფარმაცევტული პროდუქტების შესყიდვის მიზნით გამოცხადებული გამარტივებული ელექტრონული ტენდერი შეწყდეს“ – წერია შესყიდვების ეროვნული სააგენტოს ვებგვერდზე ატვირთულ ოქმში.
ფარმაცევტული მედიკამენტების შესაძენად გამოცხადებული ტენდერი [ღირებულება – 19 904 ლარი] 24 იანვარს დასრულდება, ტენდერში გამარჯვებულმა კომპანიამ მედიკამენტები გამგეობას ხელშეკრულების გაფორმებიდან 2017 წლის განმავლობაში ყველა კვარტალში უნდა მიაწოდოს.
მედპუნქტი ქედის მუნიციპალიტეტში 39 სოფელში ფუნქციონირებს. „სოფლის მოსახლეობის ექიმამდელი სამედიცინო დახმარების“ პროგრამის გარდა ქედის გამგეობა 2017 წელს ცხრა მიზნობრივ პროგრამას განახორციელებს.
ქედის მუნიციპალიტეტის სოფელ ჭინკაძეების დაწყებითი სკოლის შენობა, სადაც სოფლის სამედიცინო პუნქტია განთავსებული. ეკა ბარამიძის ფოტო.
