Batumelebi | რას სთავაზობს ხელისუფლება თხილვანას მოსახლეობას რას სთავაზობს ხელისუფლება თხილვანას მოსახლეობას – Batumelebi
RU | GE  

რას სთავაზობს ხელისუფლება თხილვანას მოსახლეობას

ხულოში, სოფელ ქვედა თხილვანას მოსახლეობა უსაფრთხო საცხოვრებელ ადგილებზე გადაყვანას ითხოვს. გეოლოგიური დასკვნის მიხედვით, აქ მცხოვრები 62 ოჯახის განსახლება აუცილებელია, რადგან მათ მეწყრისგან საფრთხე ემუქრება. მეწყრული პროცესები თხილვანაში 10 იანვარს გააქტიურდა. გუშინ, 17 იანვარს სოფელში მისულმა ხელისუფლებამ მოსახლეობასთან შეთანხმებას ვერ მიაღწია. „ბათუმელები“ ხულოს მუნიციპალიტეტის გამგებელს, ბესიკ ბაუჩაძეს ესაუბრა.

გუშინ აღნიშნეთ, რომ შეიქმნებოდა კომისია, თუმცა ცნობილია, რომ საფრთხე ყოველდღიურად ელოდება მოსახლეობას.

გეთანხმებით. მოსახლეობის უსაფრთხო ადგილებზე გადაყვანა არის ჩვენი პირველი რიგის ამოცანა. ამ კუთხით ვერ მივაღწიეთ მოსახლეობასთან შეთანხმებას. ჩვენ მათ ვთავაზობთ სამი თვით საცხოვრებელი ბინების დაქირავებას. ამ სამ თვეში გადაწყდება, კონკრეტულად რომელ ოჯახს რა საცხოვრებელს შევთავაზებთ. რაც შეეხება კომისიას, მე ვიგულისხმე კომისიის შექმნა ადგილზე, სადაც მოსახლეობა იმუშავებს და გაარკვევს ყველა დეტალს. ჩვენ ჯგუფურად ყველას ვერ დაველაპარაკებით. ისინი პირდაპირ მოითხოვენ, რომ მივცეთ გრძელვადიანი საცხოვრებელი ფართები, მაგრამ ამ ეტაპზე ეს ვერ ხერხდება.

რატომ გითხრათ მოსახლეობამ უარი დროებით საცხოვრებელზე?

იმიტომ, რომ ჩვენ მათ ვთავაზობდით სოციალურ სახლებს, ბინებს ქალაქის ტერიტორიაზე, მათ კი ჰყავთ საქონელი, მათი საკვებიც აქ აქვთ, ისეთი თემაა, ასე უცებ ვერაფერს მოახერხებდნენ. მათი მოთხოვნაა დროებითი საცხოვრებელი ადგილიც მოიძებნოს მიმდებარე სოფლებში.

აპირებთ ამ მოთხოვნის შესრულებას, თუ სხვა შეთავაზება გაქვთ?

კი, ჩვენი სამთავრობო კომისია და ის კომისიაც, რომელსაც დღეს მოსახლეობა ჩამოყალიბებს ვეძებთ უსაფრთხო საცხოვრებლებს მეზობელ სოფლებში. მაქსიმუმ ორ დღეში გადაწყვეტილება უნდა მივიღოთ. მოსახლეობას ყავს საქონელი, უნდა მიხედონ პირუტყვს და ამიტომაც გაგვიჭირდა აქამდე გადაწყვეტილების მიღება.

რა ტიპის მუდმივი საცხოვრებლის შეთავაზებას აპირებთ მათთვის და რა ფინანსური რესურსი დასჭირდება ამას?

ფინანსები ჯერ დათვლილი არ არის, არც მუდმივ საცხოვრებელზე მიგვიღია გადაწყვეტილება, რადგან როგორც გითხარით, პირველი რიგის ამოცანა არის ამ მოსახლეობის უსაფრთხოების უზრუნველყოფა. ამ ოჯახების უსაფრთხო ადგილებზე გადაყვანის შემდეგ სამთავრობო კომისია თითოეული ოჯახის შემთხვევას ცალ-ცალკე განიხილავს, სულადობას, რა პროგრამებით სარგებლობენ და ასე შემდეგ. ამისთვის თანხები ბიუჯეტში გათვალისწინებული არ არის, მაგრამ რესურსი მოიძებნება. არსებობს იგივე სარეზერვო ფონდები, საიდანაც შეიძლება ამისთვის თანხა დაიხარჯოს.

ნეტგაზეთის მასალების სხვა გამოცემებში გადაბეჭდვის წესი
ავტორი