Batumelebi

საქართველოს ყოფილ პრემიერ-მინისტრს, ირაკლი ღარიბაშვილს პროკურატურამ დღეს, 24 ოქტომბერს, ბრალი წარუდგინა. ირაკლი ღარიბაშვილს გამოძიება განსაკუთრებით დიდი ოდენობით უკანონო შემოსავლების ლეგალიზებას – ფულის გათეთრებას ედავება.

პროკურატურის ინფორმაციით, ირაკლი ღარიბაშვილი სხვადასხვა უკანონო შემოსავლებს იღებდა, მისი სახლის ჩხრეკის შედეგად კი 6 მილიონ 500 ათასი ამერიკული დოლარი ამოიღეს.

ირაკლი ღარიბაშვილს არ დააპატიმრებენ. პროკურატურამ უკვე მიმართა სასამართლოს აღკვეთი ღონისძიების სახით გირაოს გამოყენებაზე. პროკურატურა ყოფილი პრემიერისთვის 1 მილიონი ლარი გირაოს შეფარდებას ითხოვს. ირაკლი ღარიბაშვილს ასევე აეკრძალება ქვეყნის დატოვება.

პროკურატურამ დღეს, 24 ოქტომბერს, გამართულ ბრიფინგზე ყურადღება გაამახვილა იმაზე, რომ ირაკლი ღარიბაშვილი წარდგენილ ბრალდებაში თავს სრულად დამნაშავედ მიიჩნევს.

ირაკლი ღარიბაშვილს ბრალი სსკ-ის 194-ს მუხლის მესამე ნაწილის შესაბამისად წარუდგინეს. ეს მუხლი ითვალისწინებს თავისუფლების აღკვეთას 9-დან 12 წლამდე.

პროკურატურის ცნობით, ირაკლი ღარიბაშვილის ბინიდან 6.5 მილიონი დოლარი ამოიღეს. „დაუსაბუთებელი თანხის ძირითადი ნაწილი მისი ნამდვილი ბუნებისა და წარმოშობის წყაროს შენიღბვის მიზნით, დააკონვერტირა უცხოურ ვალუტაში, რის შედეგადაც მიღებული 6 500 000 აშშ დოლარი აღმოჩენილი და ამოღებული იქნა 2025 წლის 17 ოქტომბერს ღარიბაშვილის ბინის ჩხრეკის შედეგად“, – აცხადებს პროკურატურა.

პროკურატურის ვერსიით, ღარიბაშვილი ქონებრივ დეკლარაციებში უთითებდა ყალბ მონაცემებს, რომ თითქოს ოჯახის წევრებისგან ყოველწლიურად იღებდა დიდი ოდენობით თანხას საჩუქრად.

„უკანონო შემოსავლების ლეგალიზაციის მიზნით, თანამდებობის პირის ქონებრივი მდგომარეობის შესახებ წარდგენილ დეკლარაციებში უთითებდა ყალბ მონაცემებს, რომ თითქოს ოჯახის წევრისგან ყოველწლიურად საჩუქრად იღებდა დიდი ოდენობით თანხებს. აღნიშნული გზით, წარმომავლობა ხელოვნურად შეექმნა მის მიერ კერძო ბიზნესში არალეგალურად მონაწილეობის შედეგად მიღებულ განსაკუთრებით დიდი ოდენობით თანხის ნაწილს – 830 000 ლარს, რაც მოექცა ლეგალურ ბრუნვაში.

„ქართული ოცნების“ მთავრობის განცხადებით გონიოში, ყოფილი სამხედრო პოლიგონის ტერიტორიაზე ახალი ინფრასტრუქტურა მოეწყობა, იმ კომპანიის წილის 33 პროცენტის მესაკუთრე კი, რომელიც გონიოში პროექტს განახორციელებს, საქართველო იქნება.

საუბარია თბილისსა და ბათუმში ჯამში 6,6 მილიარდი აშშ დოლარის ღირებულების პროექტზე.

საქართველოს ეკონომიკისა და მდგრადი განვითარების სამინისტროს ინფორმაციით „მინისტრმა მარიამ ქვრივიშვილმა და კომპანია „იგლ ჰილსის“ [Eagle Hills] დამფუძნებელმა მოჰამედ ალი ალაბარმა ხელი მოაწერეს საინვესტიციო შეთანხმებასა და საერთო კომპანიის ჩამოყალიბების შესახებ ხელშეკრულებას, რომელთა ფარგლებშიც „იგლ ჰილსი“ თბილისსა და გონიოში, ჯამურად, 6,6 მლრდ აშშ დოლარის ღირებულების დეველოპერულ პროექტებს განახორციელებს, ხელმოწერა თბილისის აბრეშუმის გზის ფორუმის ფარგლებში გაიმართა.“

„შეთანხმების თანახმად, საქართველო პროექტების პარტნიორად და კომპანიის 33%-იანი წილის თანამესაკუთრედ განისაზღვრა,“ – აცხადებს ეკონომიკის სამინისტრო.

დეტალური ინფორმაცია, რაზე შეთანხმდნენ სახელმწიფო და კერძო კომპანია, ჯერ-ჯერობით უცნობია.

ეკონომიკის მინისტრის მოადგილის, ირაკლი ნადარეიშვილის თქმით კი, 22 ოქტომბერს გაფორმებული შეთანხმებით, სახელმწიფო Eagle Hills-ის ქართული შვილობილის 33%-ის მფლობელი იქნება.

„დღეს ხელი მოეწერა საბოლოო დოკუმენტაციას, რომლითაც შეიქმნა ერთობლივი საწარმო, სადაც სახელმწიფო და ინვესტორი საპარტნიორო ურთიერთობებში შევიდნენ და პრინციპში დასრულდა მოლაპარაკებების უმნიშვნელოვანესი ფაზა, სადაც გაწერილია ყველა კომერციული პირობა, ვალდებულებები, როგორც სახელმწიფოს, ასევე ინვესტორის მხრიდან. პროექტი გადადის მომდევნო ფაზაზე, როდესაც ჩვენ მომდევნო წლის ზაფხულის პერიოდში უკვე ველოდებით დასრულებას იმ პროცესის, რასაც ჰქვია ნებართვების შეთანხმება, გენგეგმის დამტკიცება და გზშ. საკმაოდ გრძელი სიაა ნებართვების და დოკუმენტების.

მომავალი წლის ზაფხულში დაიწყება მშენებლობის ფაზა.

ჩვენი მონაწილეობა ამ პროექტში განისაზღვრება მიწის კონტრიბუციით, ინვესტორის მონაწილეობა ამ პროექტში განისაზღვრება დაფინანსებით და მართვით“ – თქვა ირაკლი ნადარეიშვილმა.

ირაკლი ნადარეიშვილის განცხადებით „სახელმწიფო პროექტში უძრავი ქონებით, გონიოში არსებული 260 ჰექტრით და თბილისის მიმდებარედ არსებული 590 ჰექტრით შედის, ინვესტორმა კი უნდა მოამზადოს არქიტექტურული პროექტი და მოიზიდოს მისი განხორციელებისთვის საჭირო კაპიტალი, რაც წინასწარი შეფასებით 6.6 მილიარდ დოლარს შეადგენს. არსებული პირობებით, სახელმწიფო კაპიტალის მოზიდვის კომპონენტში ჩართული არ იქნება და აღნიშნული რისკი ინვესტორის მხარეს იქნება“.

ინვესტორი უშუალოდ ჩადებს 6,6 მილიარდ აშშ დოლარს თუ მისი ვალდებულება მხოლოდ „კაპიტალის მოზიდვა“ იქნება, გაურკვეველია, თუმცა მარიამ ქვრივიშვილი აცხადებს, რომ ინვესტიციას Eagle Hills-ი ჩადებს.

„დღეს ჩვენ ვსაუბრობთ მხოლოდ ერთი კომპანიიდან მოზიდულ 6,5 მილიარდ ამერიკულ დოლარზე“ – განაცხადა „ქართული ოცნების“ მინისტრმა

გონიოსა და კრწანისის პროექტების რენდერები თავის გვერდზე უდევს შპს „იგლ ჰილს საქართველოს“, რომელმაც თბილისში ოფისიც გახსნა.

„იგლ ჰილს საქართველო“ თბილისში 2025 წლის 28 აპრილს დარეგისტრირდა. ამ კომპანიის დირექტორია ორმაგი [ეგვიპტე, არაბთა გაერთიანებული საამიროები] მოქალაქე ჰიშამ მოჰამედ იბრაჰიმ სოლიმანი. კომპანიის 100 პროცენტი წილის მფლობელი/დამფუძნებელი კი იყო შპს „ჯაონა ინვესთმენთ“ [არაბთა გაერთიანებული საამიროები].

„იგლ ჰილს საქართველოს“ მეწილე, კომპანიის დაფუძნებიდან ხუთ თვეში, 2025 წლის სექტემბერში შეიცვალა და ამჯერად 100 პროცენტი წილის მესაკუთრეა შპს „იგლ ჰილს დეველოპმენტ ჰოლდინგს ლიმიტედ“ [არაბთა გაერთიანებული საამიროები].

კომპანიას, სადაც საქართველოს სახელმწიფო 33 პროცენტი წილის მფლობელი იქნება, სავარაუდოდ, ცალკე დააფუძნებენ.

„ბათუმში, ყოფილი პოლიგონის ტერიტორიაზე, 250 ჰექტარზე, იქმნება შავი ზღვის სანაპიროს ახალი მარგალიტი – პრემიუმ კლასის კურორტი, რომელიც უმაღლესი კლასის ტურისტული ინფრასტრუქტურის განვითარებას გულისხმობს“ – განაცხადა „ოცნების“ პრემიერმა ირაკლი კობახიძემ.

2 264 823 კვადრატული მეტრი ფართობის მიწის ნაკვეთი [ყოფილი სამხედრო პოლიგონის ტერიტორია] გონიოში 2025 წლის 23 ოქტომბრის მდგომარეობით სახელმწიფოს საკუთრებაშია. სახელმწიფოს საკუთრებაშია ასევე მომიჯნავე 314 177 კვადრატული მეტრი მიწის ფართობი უშუალოდ პლაჟთან [ანუ ჯამში 257,9 ჰექტარი].

„გონიოს მიმდებარე ტერიტორიისა და კრწანისის პარკის განვითარების საინვესტიციო პროექტების ხელშესაწყობად“ საქართველოს მთავრობის 2025 წლის მარტის განკარგულებით მთელ რიგ სამინისტროებს დაევალათ უზრუნველყონ „ყველა საჭირო ღონისძიების განხორციელება და უწყებათშორისი კოორდინაცია“, მათ შორის – ზურმუხტის ქსელის [ჭოროხის დელტაში, ყოფილი პოლიგონის მიმდებარედ] საზღვრების კორექტირება.

ვრცლად: რას უპირებს „ოცნება“ ზურმუხტის ქსელს – გონიოს არაბული ინვესტიციისთვის ამზადებენ

„ოცნების“ ხელისუფლება ბოლო რამდენიმე წელია საუბრობს ყოფილი პოლიგონის ტერიტორიის განვითარებაზე, მოამზადეს კონცეფციებიც, თუმცა დღეს, როცა აცხადებენ, რომ ხელშეკრულება ფაქტობრივად გაფორმებულია, ეს ტერიტორია განაღმულიც კი არ არის.

მიუხედავად ამისა, „ოცნებას“ 2016 წელს სხვა არაბი ინვესტორები ადგილზეც ჰყავდათ მიყვანილი.

ვრცლად: ინვესტორი დანაღმულ ზღვისპირეთში – რა ელის გონიოს ყოფილ პოლიგონს

2017 წელს გონიოს ყოფილ პოლიგონზე მთავრობამ საინვესტიციო კონცეფციაც მოამზადა, თუმცა ეს კონცეფცია განსხვავდება არაბული კომპანიის, „იგლ ჰილს საქართველოს“ მიერ ამჯერად წარმოდგენილი რენდერისგან.

2019 წელს თავდაცვის სამინისტროში „ბათუმელებს“ უთხრეს, რომ „ტერიტორიის თითქმის ნახევარი უკვე განაღმულია,„კლიმატური პირობებიდან გამომდინარე რთულია სამუშაოები და, შესაბამისად, განაღმვის პროცესი გრძელდება“.

გონიოს ყოფილი სამხედრო პოლიგონი რუსეთის ჯარმა 2005 წელს ისე დატოვა, რომ ტერიტორია არ გაუნაღმია. 2010 წლის თებერვალში გონიოს პოლიგონზე ჯართად შეგროვებულ ტანკსაწინააღმდეგო ნაღმს ბილვანიძეების ოჯახის სამი წევრი ემსხვერპლა. თავდაცვის სამინისტროში მაშინ განაცხადეს, რომ ყოფილი პოლიგონის განაღმვა, სავარაუდოდ, 2010 წლის ბოლომდე დასრულდებოდა.

2021 წელს ადგილობრივი თვითმმართველობის არჩევნების წინ „ქართულმა ოცნებამ“ გონიოს ყოფილი პოლიგონის განვითარებაზე მორიგი გეგმა დააანონსა, თუმცა, არჩევნების შემდეგ ამ ადგილის „განვითარება“ არავის გახსენებია.

 ვრცლად: „გონიოს ახალი ქალაქი კაზინოებითა და ბანკებით“ – რა მოუვიდა დაპირებას, რაზეც დღეს მთავრობა დუმს

ახალი არაბული ინვესტიციის დაანონსების შემდეგ კი გონიოს ყოფილი პოლიგონის განაღმვის სამუშაოების გაგრძელება კვლავ დღის წესრიგში დადგა და საქმეში თავდაცვის სამინისტროსთან ერთად ცენტრი „დელტაც“ ჩართეს.

ამ თემაზე ვრცლად: 

ბობოყვათის რეზიდენცია საპატრიარქოს და დაცვის გარეშე დარჩენილი არქეოლოგიური ძეგლები

See more

შშმ პირთა უფლებადამცველი დეა ერემაშვილი „ბათუმელებთან“ ამბობს, რომ „ოცნება“ საპროტესტო აქციაზე დაკავებული შშმ პირებს იძულებით ფსიქიატრიულში გადაყვანით ემუქრება, რაც უფლებების უხეში დარღვევაა.

21 ოქტომბერს თბილისის პოლიციის დეპარტამენტის დირექტორმა ვაჟა სირაძემ განაცხადა, რომ რუსთაველის აქციის ერთ-ერთი მონაწილე, რომელიც დააკავეს, „გადაყვანილია ფსიქიკური ჯანმრთელობის და ნარკომანიის პრევენციის ცენტრში, სადაც იძულებით მკურნალობას გაივლის“.

დეა ერემაშვილი ამბობს, რომ ვაჟა სირაძე ამ შემთხვევაში საუბრობდა 4 ოქტომბრის საქმეზე დაკავებულ ერთ-ერთ პირზე, რომელიც ახლა ორთვიან წინასწარ პატიმრობაშია.

მისი თქმით, შს სამინისტრო მათ არ აწვდის ზუსტ ინფორმაციას, რამდენი შშმ პირი ჰყავს პოლიციას დაკავებული აქციებზე და როგორია მათი მდგომარეობა.

„მე პირადად 25 შშმ ადამიანზე მაქვს ინფორმაცია, რომ ფსიქიატრიულში გადაყვანით დაემუქრნენ.

ვფიქრობ, ეს ძალიან საშიშია, რადგან ცდილობენ შექმნან შთაბეჭდილება, თითქოს შშმ პირები ვერ ვაცნობიერებთ სად ვიბრძვით და რატომ ვიბრძვით“ – ამბობს დეა ერემაშვილი, რომელიც წლებია შშმ პირთა უფლებების დასაცავად მუშაობს აჭარაში. 

მისი თქმით, სულ რომ ფსიქოსოციალური საჭიროება ჰქონდეს ადამიანს, პოლიციას უფლება არ აქვს, ეს მდგომარეობა შშმ პირის დასაშინებლად გამოიყენოს.

„შშმ ადამიანები ამ საპროტესტო აქციების ისეთივე მონაწილეები ვართ, როგორც ამ ქვეყნის სხვა მოქალაქეები. ამიტომ, ყოვლად დაუშვებელია ამის გამო დაკავებულის სამკურნალოდ გადაყვანა იძულებით.

შშმ პირი იმიტომ კეტავს ქუჩას, რომ ებრძვის რეჟიმს.

ამდენი წელია იმიტომ ვიბრძვით თანასწორი უფლებებისთვის, რომ ჩვენც ამ ქვეყნის მოქალაქეები ვართ და ჩვენც გვაქვს ვალდებულება სახელმწიფოს წინაშე, რომ ეს ქვეყანა არ წავიდეს დიქტატურისკენ და გვინდა კარგი მომავალი.

თუ სხვა მოქალაქეს (არაფრის გამო, მაგრამ მაინც) პატიმრობას უსჯი, შშმ პირს კი მიშვებ ფსიქიატრიულში, ეს პირდაპირი დისკრიმინაციაა მეტი კი არაფერი“ – ამბობს დეა ერემაშვილი.

მისი თქმით, დღეს შშმ ადამიანებს არ აქვთ ნდობა იმ სახელმწიფო ინსტიტუტების მიმართ, რომლებიც რეჟიმს ემსახურებიან და არაფერს აკეთებენ მოქალაქის უფლებების დასაცავად.

„არანაირი ნდობა არ გვაქვს არცერთ სახელმწიფო სამსახურის, რადგან არ გვაქვს გარანტია იმისი, რომ რომელიმე მათი ექსპერტი დამოუკიდებლად მიიღებს გადაწყვეტილებას ამ საკითხზე და ჩვენ გვაქვს ამის ფაქტი ნინო დათაშვილის მაგალითზე, ხომ?! რომელიც საერთოდ არ არის შშმ პირი, მაგრამ მაინც ჩაუტარეს ფარულად ფსიქიატრიული შემოწმება.

ერთ-ერთი დაკავებულის საქმეს წელავენ და გადაიტანეს მისი პროცესი ზუსტად იმიტომ, რომ მოსამართლემ რატომღაც მოითხოვა ჯანმრთელობის ცნობა. როგორც ვიცი აღნიშნულ პირს ეპილეფსია აქვს და არა ფსიქიკური პრობლემები.

ორი წელია „ქართული ოცნების“ მთავრობა, შშმ პირთა სატელიტი ორგანიზაციების მეშვეობით ცდილობენ რეალური ხმის ჩახშობას და ცდილობენ საზოგადოებას დააჯერონ, რომ ეს ბრძოლა, რაც დღეს მიდის ქვეყანაში, ჩვენი ბრძოლა არ არის. ასე იყო რუსული კანონის საწინააღმდეგო საპროტესტო აქციებზე, ავრცელებდნენ დეზინფორმაციას, რომ თითქოს რუსული კანონი შშმ პირთა უფლებადამცველ ორგანიზაციებს არ შეეხებოდა, თუმცა ყველამ დავინახეთ, რომ ეს ასე არ აღმოჩნდა.

დისკრიმინაციული სიუჟეტის გამო „იმედს“ ქარტიაშიც ვუჩივლეთ ამის გამო, რადგან სწორედ ამ ნარატივის წარმოჩენას ცდილობდნენ, რომ რუსული კანონები ჩვენ არ შეგვეხებოდა“-ამბობს დეა.

დეა ამბობს, რომ დღეს ქვეყანაში 135 ათასი შშმ პირი ცხოვრობს და რეჟიმი ცდილობს ისინი აქტიურად არ იყვნენ ჩართული ქვეყნის ევროპული მომავლისთვის ბრძოლაში.

„ზოგადად, ტენდენცია, რომ თუ შშმ პირი აპროტესტებს, სამკურნალოდ უნდა გადაიყვანო იძულებით, არის ძალიან სარისკო. არ ვართ დაცული იმისგან, რომ თუ ხვალ გამოვა და მაგალითად მოვითხოვ სხვადასხვა სერვისებს ან ამ სერვისების გაუმჯობესებას, არ დამაკავებენ და არ გამიშვებენ ამის გამო იძულებით „მკურნალობაზე“ – ამბობს დეა ერემაშვილი.

მხოლოდ გუშინ, 22 ოქტომბერს, პოლიციამ თბილისში, რუსთაველის გამზირზე, საპროტესტო აქციაში მონაწილე 30-მდე პირი დააკავა. ეს დაკავებები უკავშირდება „ოცნების“ ხელისუფლების მიერ მიღებულ კიდევ ერთ რეპრესიულ კანონს, რომელიც 15 დღემდე ადმინისტრაციულ პატიმრობას ითვალისწინებს აქციის დროს გზის გადაკეტვის გამო, განმეორების შემთხვევაში კი – ერთ წლამდე პატიმრობას.

ბოლო 33 წლის განმავლობაში ევროკავშირმა საქართველოს 2 მილიარდ ევროზე მეტი გამოუყო სხვადასხვა პროექტებისათვის.

„1992 წლიდან ევროკავშირმა საქართველოსთვის 2 მილიარდ ევროზე მეტი ოდენობის გრანტები გამოყო, რითაც დაფინანსდა ახალი ინფრასტრუქტურა, სამუშაო ადგილების შექმნა, განათლება და გარემოს დაცვა,“ – ნათქვამია საქართველოში ევროკავშირის წარმომადგენლობის მიერ გავრცელებულ განცხადებაში.

ევროკავშირის წარმომადგენლობის განცხადებით, ყოველი ინვესტირებული ევრო მიზნად ისახავდა საქართველოს მოსახლეობის ყოველდღიური ცხოვრების გაუმჯობესებას – გზების, საავადმყოფოებისა და სკოლების მოდერნიზებით დაწყებული, ადგილობრივი თემების, მეწარმეებისა და ახალგაზრდა ნოვატორების გაძლიერებით დასრულებული.

უკვე 30 წელზე მეტია ევროკავშირი ისეთი პროგრამების მეშვეობით, როგორიცაა TRACECA, EU4Business, ENPARD თუ EU4Youth, ეხმარება საქართველოს მოქალაქეებს ისარგებლონ ახალი ეკონომიკური და სოციალური შესაძლებლობებით.

21 ოქტომბერს საერთაშორისო საინფორმაციო სააგენტო „როიტერსმა“ გამოაქვეყნა ინფორმაცია იმის შესახებ, რომ რუსულმა კომპანია „რუსნეფტმა“ საქართველოში რუსული ნავთობი შემოიტანა.

„როიტერსმა“ LSEG-ის გემების მონაცემებისა და ინდუსტრიულ წყაროებზე დაყრდნობით დაწერა, რომ ტანკერმა „კაისერმა“ 6 ოქტომბერს რუსეთის შავი ზღვის პორტ ნოვოროსიისკიდან ყულევის ნავთობტერმინალში 105 340 ტონა ციმბირის ნავთობი გადაიტანა.

საქართველოს შემოსავლების სამსახურის ინფორმაციით, პანამის დროშის ქვეშ მცურავი „კაისერი“ არ არის საერთაშორისო სანქციების ქვეშ და გემის მფლობელ კომპანიაზე, ასევე ტვირთის გამომგზავნ და მიმღებ კომპანიებზე არ ვრცელდება საერთაშორისო სანქციები.

„საბაჟო კონტროლის პროცედურების განხორციელების მიზნით ტვირთი ჩამოიცალა დროებითი შენახვის საბაჟო საწყობში“, – განმარტა შემოსავლების სამსახურმა.

თუ გემი და კომპანია არ არის სანქცირებული, მაშ რატომ არის რუსული ნავთობის დასაწყობება საქართველოს ტერიტორიაზე პრობლემური და რა საფრთხეს ქმნის ეს ქვეყნისთვის? – ვკითხეთ უსაფრთხოების საკითხთა ექსპერტს, მეათე მოწვევის პარლამენტის წევრს, თეონა აქუბარდიას.

„რუსული ნავთობის საქართველოში გადასამუშავებლად შემოტანა პოლიტიკურად კიდევ ერთხელ ავლენს ივანიშვილის რეჟიმის მიერ რუსეთის სასარგებლოდ უკრაინის წინააღმდეგ ომში რუსეთის მხარეს დგომას, რამდენადაც რუსეთის ნავთობი არის უკრაინის წინააღმდეგ რუსეთის აგრესიის გაგრძელების რესურსი და სწორედ ამიტომ არის სანქცირებული მსხვილი რუსული კომპანიები დასავლეთის მიერ.

ეს დიდ საფრთხეს ქმნის საქართველოს სუვერენიტეტის და ტერიტორიული მთლიანობის ინტერესისთვის, რამდენადაც უკრაინის სუვერენიტეტის წინააღმდეგ რუსეთის მხარეს პოლიტიკურად და ეკონომიკურად დგომა ნაწილობრივად ოკუპირებულ საქართველოს რუსეთის გავლენის სფეროში აბრუნებს ოკუპირებული აფხაზეთის და ცხინვალის რეგიონის გარეშე,“ – ამბობს თეონა აქუბარდია.

• რა თქვა და არ თქვა შემოსავლების სამსახურმა განმარტებით განცხადებაში

21 ოქტომბერს გავრცელებულ განცხადებაში შემოსავლების სამსახურმა აქცენტი იმაზე გააკეთა, რომ გემი არ იყო სანქცირებული. ამავე განცხადებაში უწყებამ დაადასტურა, რომ ყულევში რუსული ნავთობი დაასაწყობეს.

„2 ოქტომბერს, ყულევის საზღვაო ნავსადგურში რუსეთის ფედერაციის პორტიდან შემოვიდა პანამის დროშის ქვეშ მცურავი თბომავალი KAYSERI, რომელზეც დატვირთული იყო ერთ-ერთი რუსული კომპანიიდან (უწყება თავს იკავებს კომპანიების სახელწოდებების დასახელებისგან და საგადასახადო საიდუმლოების შემცველი ინფორმაციის გავრცელებისგან) გამოგზავნილი, იმპორტის საბაჟო პროცედურებში მოქცევისთვის განკუთვნილი 100 000 ტონამდე ნედლი ნავთობი“, – განმარტა შემოსავლების სამსახურმა.

თუმცა „როიტერსის“ მიერ გამოქვეყნებულ სტატიაში არსად არ წერია, რომ გემი ან გემთმფლობელი სანქცირებული იყო.

„ბათუმელები“ დაუკავშირდა შემოსავლების სამსახურს. ვკითხეთ, რა ბედი ეწევა რუსეთიდან შემოტანილ 100 ათას ტონამდე ნედლ ნავთობს.

„საგადასახადო საიდუმლოების ფარგლებში, იმაზე მეტ კომენტარს, რაც განცხადებაში წერია, ვერ გავაკეთებთ“, – გვითხრეს ამ სამსახურში.

შემოსავლების სამსახურში არ გვიპასუხეს, „დროებითი შენახვის საბაჟო საწყობი“, სადაც ნავთობი ჩაიტვირთა, არის ყულევის პორტში თუ ნედლი ნავთობი დასაწყობდა ყულევის ახალგახსნილი ნავთობგადამამუშავებელი ქარხნის ტერიტორიაზე.

თეონა აქუბარდია, უსაფრთხოების საკითხების ექსპერტი, თვლის, რომ საქართველოს ტერიტორიაზე რუსული ნავთობის შემოტანა, ქვეყანას სანქციების საფრთხის ქვეშ აყენებს.

„რუსული ნავთობის შემოტანა ასევე ქმნის სამომავლო სანქციების ფონს, მით უფრო მაშინ, როცა რუსეთის ენერგო სექტორზე უკრაინა ახორციელებს ლეგიტიმურ დარტყმებს და ამით ასუსტებს რუსეთის აგრესიას.

„როიტერსის“ სტატიაში შეფასებით აღწერაში კარგად ჩანს ზიანის პოლიტიკური განზომილება, მიუხედავად იმისა, რომ „რუსნეფტი“ არ არის სანქცირებული ამ დროისთვის. შემოსავლების  სამსახურის დროული გამოხმაურება სტატიის საპასუხოდ კვლავ აჩვენებს რეჟიმის ფულის კეთების ინტერესს ოკუპანტ რუსეთთან ერთად, ეკონომიკური რისკების ანალიზის გარეშე.

აქაც ჩანს, რომ მათთვის სუვერენიტეტის პრინციპს და ქვეყნის საშინაო და საგარეო ვექტორს ფასი არ გააჩნია.

შესაბამისად, შესაძლოა სანქციები საქართველოში ნავთობის მომწოდებელ კომპანიასაც დაუწესდეს და ამას მოწმობს მათ შორის რუსეთის ჩრდილოვანი ფლოტის სანქცირებაც, ისევე როგორც ყულევში ნავთობის შემომტან გემზე თვალყურის დევნებაც.

მთელი ეს პროცესი აჩვენებს ყველაზე მკაფიოდ ერთ რამეს: ამ ქმედებით ივანიშვილის რეჟიმი დგას რუსეთის გვერდით უკრაინის წინააღმდეგ ომში და წირავს საქართველოს არამხოლოდ ევროპულ მომავალს ამ გზით, არამედ რუსეთის მიერ მორღვეულ სუვერენიტეტს და უწყვეტ ბრძოლას დამოუკიდებლობისა და თავისუფლებისთვის,“ – ამბობს თეონა აქუბარდია.

• რა ვიცით ყულევის ნავთობგადამამუშავებელ ქარხანაზე

ყულევის ნავთობგადამამუშავებელი ქარხნის პროექტის პრეზენტაცია 2024 წლის 22 ოქტომბერს, საპარლამენტო არჩევნების წინ გამართა მაშინდელმა პრემიერ-მინისტრმა ირაკლი კობახიძემ.

კობახიძის თქმით, მშენებლობის პირველი ეტაპის ბიუჯეტი 110 მილიონ დოლარს, მთლიანი პროექტის საინვესტიციო მოცულობა კი 700 მილიონ აშშ დოლარს შეადგენდა.

„2028 წლის ბოლოსთვის, საწარმოში სრულად იქნება დანერგილი ნედლი ნავთობის და ნავთობპროდუქტების მაღალტექნოლოგიური გადამუშავება. ამის შემდეგ, „ბლექ სი პეტროლიუმი“ შეძლებს, ადგილობრივ ბაზარს მიაწოდოს სხვადასხვა სახის ნავთობპროდუქტები, ასევე პროდუქტი გავა ექსპორტზე ევროპაში და მსოფლიოს სხვა ბაზრებზე“ – თქვა ირაკლი კობახიძემ.

პროექტს „ბლექ სი პეტროლიუმი“ ახორციელებს.

„ბლექ სი პეტროლიუმის“ დამფუძნებელი და ძირითადი აქციონერი მაკა ასათიანია, ყოფილი მოდელი. „ბლექ სი პეტროლიუმში“ მაკა ასათიანის კომპანია „მკ კაპიტალი“ 70.7 % წილს ფლობს, ხოლო დარჩენილი 29.3 %-ს კომპანია „დუნამისის“ მფლობელობაშია.

საჯარო რეესტრის ბოლო მონაცემებით „ბლექ სი პეტროლიუმის“ ქონება იპოთეკითაა დატვირთული.

იპოთეკარები არიან – სააქციო საზოგადოება „ბაზისბანკი“, სააქციო საზოგადოება „ბანკი ქართუ“, სააქციო საზოგადოება „ხალიკ ბანკი საქართველო“ და სააქციო საზოგადოება „საქართველოს განვითარების ფონდი“.

რამდენიმე დღის წინ, 16 ოქტომბერს, მთავრობამ დიზელის საწვავის იმპორტთან დაკავშირებით არსებული ნორმა შეცვალა. დადგენილებაში ჩაწერეს, რა შემთხვევაში შესაძლებელი ქვეყანაში დაბალი ხარისხის დიზელის საწვავის იმპორტი.

კერძოდ, საქართველოს მთავრობის 16 ოქტომბრის დადგენილებით, დაბალი ხარისხის დიზელის იმპორტი, მხოლოდ იმ შემთხვევაშია დაშვებული, თუკი ის „წლიურად არანაკლებ 1 მილიონი ტონის გადამუშავების სიმძლავრის მქონე ნავთობგადამმუშავებელი ქარხნის მფლობელის მიერ იქნება იმპორტირებული“.

ასეთი ქარხანა კი საქართველოში ამ ეტაპზე მხოლოდ ერთია – ყულევის ნავთობგადამამუშავებელი ქარხანა.

22 ოქტომბერს ამერიკის შეერთებულმა შტატებმა დაასანქცირა ნავთობკომპანიები „როსნეფტი“ და „ლუკოილი“. ასევე მათი შვილობილი კომპანიები.

23 ოქტომბრის დღის ბოლოს კი ცნობილი გახდა, რომ ჩინეთის სახელმწიფო ნავთობკომპანიები რუსული ნავთობის შესყიდვებს აჩერებენ „როსნეფტისა“ და „ლუკოილის“ წინააღმდეგ სანქციების დაწესების შემდეგ.

უცნობია რა ბედი ელის საქართველოში [ყულევში] დასაწყობებულ 100 000 ტონა ნედლ ნავთობს.  

ამავე თემაზე:

რუსეთმა ყულევის ქართულ ქარხანას ნავთობის პირველი პარტია გაუგზავნა – Reuters

See more

პროკურატურის ცნობით, ქუთაისის საქალაქოს სასამართლომ არასრულწლოვანი შვილის გაუპატიურებაში ბრალდებული დამნაშავედ ცნო.

„სასამართლო პროცესებზე გამოკვლეული მტკიცებულებებით დადასტურდა, რომ ბრალდებული ძალადობით და დაზარალებულის ასაკობრივი უმწეობის გამოყენებით, სისტემატურად აუპატიურებდა არასრულწლოვან შვილს.

სამართალდამცველებმა ბრალდებული 2025 წლის 23 აგვისტოს დააკავეს. მას ბრალდება საქართველოს სისხლის სამართლის კოდექსის 11 პრიმა, 137-ე მუხლის მე-3 ნაწილის „ე“ და მე-4 ნაწილის „გ“ ქვეპუნქტებით (გაუპატიურება ჩადენილი არასრულწლოვანი ოჯახის წევრის მიმართ) წარედგინა და აღკვეთის ღონისძიების სახით პატიმრობა შეეფარდა“ – იუწყება პროკურატურა.

ქუთაისის საქალაქო სასამართლომ ბრალდებული სრულად ცნო დამნაშავედ წარდგენილ ბრალდებაში და სასჯელის სახედ და ზომად უვადო თავისუფლების აღკვეთა განუსაზღვრა.

საქართველოს საკონსტიტუციო სასამართლოში დაიწყო ჟურნალისტების სარჩელის განხილვა საქართველოს პარლამენტის თავმჯდომარის წინააღმდეგ.

ჟურნალისტები ასაჩივრებენ საქართველოს პარლამენტის თავმჯდომარის გადაწყვეტილებას, პარლამენტში ჟურნალისტების აკრედიტაციის წესის შესახებ.

„გიორგი კიკაბიძე, გენადი ქვაჩახია, ნათია ამირანაშვილი, რუსუდან დუმბაძე, თათია წოწონავა, ა(ა)იპ „სტუდია მონიტორი“ და სხვები საქართველოს პარლამენტის თავმჯდომარის წინააღმდეგ“ – ასე ჰქვია გაერთიანებულ კონსტიტუციურ სარჩელებს.

სადავო რეგულაციები პარლამენტში აკრედიტებულ ჟურნალისტს ავალდებულებს, საქართველოს პარლამენტის წევრის, აპარატის თანამშრომლის ან პარლამენტში სტუმრად მყოფი პირის მიერ ინტერვიუს ჩაწერაზე უარის თქმის შემთხვევაში, შეწყვიტოს ინტერვიუ, ხოლო თუკი ჟურნალისტი ამ წესს არ დაიცავს, მას შეიძლება შეუჩერდეს აკრედიტაცია პირველ ჯერზე ერთი თვის ვადით, განმეორების შემთხვევაში კი – 6 თვის ვადით.

საქართველოს პარლამენტში ჟურნალისტებისთვის აკრედიტაციის წესი 2023 წლის 6 თებერვალს დამტკიცდა. ამ რეგულაციით ჟურნალისტებს მთელი რიგი შეზღუდვები დაუწესდათ.

ჟურნალისტები ასევე ასაჩივრებენ საქართველოს პარლამენტის შენობაში ჟურნალისტთა დაშვების, გადაადგილების ან მათი ტექნიკის გარკვეულ ადგილებში განლაგების შეზღუდვას „გასამართი ღონისძიების სპეციფიკურობიდან ან უსაფრთხოების რეჟიმიდან გამომდინარე“.

მაგალითისათვის, ონლაინმედიას დღემდე არ უშვებენ პარლამენტის შენობაში.

პირველად ონლაინმედიას 2024 წლის 15 აპრილს შეუზღუდეს პარლამენტში შესვლა, მაშინ როცა რუსული კანონი განიხილებოდა. მაშინ პარლამენტმა ეს „პარლამენტის სასახლეში სამუშაო და უსაფრთხო გარემოს უზრუნველყოფით“ ახსნა.

2024 წლის 26 ნოემბერს კი ონლაინმედიას პარლამენტში შესვლა განუსაზღვრელი დროით შეეზღუდა.

გერმანიის საგარეო საქმეთა სამინისტრო X-ზე ეხმიანება ქართველი და ბელარუსი ჟურნალისტების, მზია ამაღლობელისა და ანდრეი პოჩობუტის დაჯილდოებას ევროკავშირის ადამიანის უფლებათა უმაღლესი პრიზით, სახაროვის პრემიით.

„ევროპარლამენტის მიერ გამოხატვის თავისუფლებისთვის დაწესებული სახაროვის სახელობის პრემიის მინიჭება მზია ამაღლობელისა და ანდრეი პოჩობუტისთვის წარმოადგენს ძლიერ სიგნალს ყველა ჟურნალისტისთვის, რომლებიც მსოფლიოს სხვადასხვა ქვეყანაში სიმართლის უშიშრად თქმისთვის არიან დაპატიმრებულები.

ჩვენ მოვითხოვთ მათ დაუყოვნებლივ გათავისუფლებას“ – წერს გერმანიის საგარეო საქმეთა სამინისტრო.

2025 წლის 22 ოქტომბერს ევროპარლამენტმა პატიმრობაში მყოფი ჟურნალისტები: მზია ამაღლობელი და ანდრეი პოჩობუტი ევროკავშირის ადამიანის უფლებათა უმაღლესი ჯილდოს, სახაროვის პრემიის გამარჯვებულებად გამოაცხადა.

„პატიმრობაში მყოფი ჟურნალისტები, რომლებიც იბრძვიან შენი და ჩვენი თავისუფლებისთვის“ – ასე ერქვა ნომინაციას, რომელშიც ქართველი და ბელარუსი ჟურნალისტები იყვნენ წარდგენილნი.

ჟურნალისტი და მედიამენეჯერი მზია ამაღლობელი 284 დღეა უკანონო პატიმარია. იგი გაასამართლეს სისხლის სამართლის წესით და 2-წლიანი პატიმრობა მიუსაჯეს. პროცესი მიმდინარეობდა მის წინააღმდეგ მიმართული „ოცნების“ დეზინფორმაციის ფონზე, ცრუ მოწმე პოლიციელების გამოყენებით. დაკავებისას მზია ამაღლობელს ღირსების შემლახავად და არაადამიანურად მოექცნენ, თუმცა პროკურატურას საქმის გამოძიება არ დაუწყია. დაკავების დღიდან, პროტესტის ნიშნად, მზია ამაღლობელი 38 დღის განმავლობაში შიმშილობდა. მას პატიმრობაში მკვეთრად დაუქვეითდა მხედველობა.

მზია ამაღლობელის ადმინისტრაციული დაკავების საქმის განხილვა უკვე დაიწყო სტრასბურგის ევროპულმა სასამართლომ.  

დღეს, 23 ოქტომბერს, „ოცნების“ პარლამენტის თავმჯდომარემ, შალვა პაპუაშვილმა მორიგი დეზინფორმაცია გაავრცელა მზია ამაღლობელის საქმის შესახებ. პაპუაშვილი ამჯერად გამოეხმაურა ევროპარლამენტის მიერ „ბათუმელებისა“ და „ნეტგაზეთის“ დამფუძნებლის, ჟურნალისტისა და მედიამენეჯერის, მზია ამაღლობელის დაჯილდოებას ევროკავშირის ადამიანის უფლებების უმაღლესი ჯილდოთი, სახაროვის პრემიით.

„წამქეზებლობად უნდა განვიხილოთ გუშინდელი ამბავი, როცა ევროპარლამენტმა ამაღლობელს სახაროვის პრიზი გადასცა“ და დასძინა, რომ „ამ პრიზით დაგვანახეს, რომ ჩვენს სუვერენიტეტს პატივს არ სცემენ“ და ბრიუსელს არ ესმის „ქართველი ხალხის ნამდვილი ხმა“.

მან მზია ამაღლობელს „დამარცხებული და შერცხვენილი პროტესტის მძევალი“ უწოდა.

ასევე, პაპუაშვილმა აქცენტი გააკეთა იმაზე, რომ ანდრეი სახაროვი რუსი იყო და იმაზეც, რომ ეს პრიზი წინა წლებში მიღებული აქვს რუს ოპოზიციონერ ნავალნის.

დღეს მზია ამაღლობელის სახაროვის პრემიით დაჯილდოებას გამოეხმაურა „ოცნების“ პრემიერი ირაკლი კობახიძეც. პროფესიით იურისტმა კობახიძემ, რომელმაც არაერთხელ დაარღვია მზია ამაღლობელის უდანაშაულობის პრეზუმფცია ჯერ კიდევ მისი სასამართლო პროცესის მიმდინარეობისას, კიდევ ერთხელ გაავრცელა მიზანმიმართული ტყუილი მზია ამაღლობელის შესახებ.

კერძოდ, კობახიძემ განაცხადა, რომ „მზია ამაღლობელმა უცხოური აგენტურის დავალება შეასრულა“.

მზია ამაღლობელი 2025 წლის 12 იანვარს დააკავეს სისხლის სამართლის წესით. მისი დაკავებიდან დღემდე, მეათე თვე, „ოცნების“ ლიდერები მიზანმიმართულ დეზინფორმაციას ავრცელებენ მზია ამაღლობელის შესახებ. მზია ამაღლობელმა კობახიძის, მდინარაძისა და სუბარის წინააღმდეგ სასამართლოსაც კი მიმართა. 

ჟურნალისტი და მედიამენეჯერი მზია ამაღლობელი 284 დღეა უკანონო პატიმარია. იგი გაასამართლეს სისხლის სამართლის წესით და 2-წლიანი პატიმრობა მიუსაჯეს. პროცესი მიმდინარეობდა მის წინააღმდეგ მიმართული „ოცნების“ დეზინფორმაციის ფონზე, ცრუ მოწმე პოლიციელების გამოყენებით. დაკავებისას მზია ამაღლობელს ღირსების შემლახავად და არაადამიანურად მოექცნენ, თუმცა პროკურატურას საქმის გამოძიება არ დაუწყია. დაკავების დღიდან, პროტესტის ნიშნად, მზია ამაღლობელი 38 დღის განმავლობაში შიმშილობდა. მას პატიმრობაში მკვეთრად დაუქვეითდა მხედველობა.

მზია ამაღლობელის ადმინისტრაციული დაკავების საქმის განხილვა უკვე დაიწყო სტრასბურგის ევროპუულმა სასამართლომ.  

„ადამიანურად ძალიან დასანანია, რა თქმა უნდა, ის, რაც ხდება. ადამიანურ ურთიერთობებს ძალიან დიდი მნიშვნელობა აქვს. ამიტომაც, ყველანაირი კომენტარის გაკეთებას მოვერიდები,“ – უთხრა „ოცნების“ არალეგიტიმური მთავრობის პრემიერმა, ირაკლი კობახიძემ ჟურნალისტებს, რომლებმაც დღეს, 23 ოქტომბერს მას შეკითხვა ირაკლი ღარიბაშვილის საქმეზე დაუსვეს.

სახელმწიფო უსაფრთხოების სამსახურის განცხადებით, ანტიკორუფციულ სააგენტოში გამოიკითხა ყოფილი პრემიერ-მინისტრი ირაკლი ღარიბაშვილი, რომელმაც სრულად ითანამშრომლა გამოძიებასთან და აღიარა წლების განმავლობაში უკანონო შემოსავლების მიღების ფაქტი.

ირაკლი კობახიძემ ჟურნალისტებთან საუბრის დროს რამდენჯერმე გაუსვა ხაზი 2024 წლის თებერვალს, როცა ის პრემიერ-მინისტრი გახდა. ირაკლი კობახიძის მტკიცებით, ამ პერიოდიდან კითხვები კორუფციაზე აღარ არსებობს. „ოცნების“ პრემიერმა თქვა, რომ კითხვებს ღარიბაშვილის საქმეზე გამოძიებამ უნდა უპასუხოს.

„შეგიძლიათ დააკვირდეთ საქართველოს მთავრობის ნებისმიერ საქმიანობას, ნებისმიერი გადაწყვეტილებას და თუ ამოიკითხავთ ამ საქმიანობაში კორუფციის რაიმე ნიშანს, ჩვენ მზად ვართ ყველა კითხვას გავცეთ პასუხი,“ – განაცხადა ირაკლი კობახიძემ. მას ჟურნალისტებმა ასევე ჰკითხეს, რატომ არ რეაგირებდა მმართველი პოლიტიკური გუნდი კორუფციაზე, მათ შორის, ბიძინა ივანიშვილი:

„მე შემიძლია დაგარწმუნოთ ერთ რამეში, რომ ბიძინა ივანიშვილს აქვს უკომპრომისო დამოკიდებულება კორუფციის მიმართ. ყოველთვის ასე იყო. მინდა შეგახსენოთ 2023 წლის დეკემბერში, როცა ის შემობრუნდა პოლიტიკაში, მან ერთ-ერთი მთავარი განაცხადი პარტიის ყრილობაზე გააკეთა სწორედ კორუფციასთან დაკავშირებით და გააკეთა განაცხადი პირდაპირ იმის შესახებ, რომ კორუფციასთან ბრძოლა იქნებოდა ერთ-ერთი უმთავრესი პრიორიტეტი.

ჩვენ დღეს ვართ დამოუკიდებელი, როგორც არასდროს და ვახერხებთ გამოწვევებზე პასუხის გაცემას…

შეგიძლიათ ამოიღოთ მთავრობის ნებისმიერი გადაწყვეტილება, აქტი, ნებისმიერი ტენდერი, პრივატიზაცია. თუ სადმე ნახავთ კორუფციის ნიშნებს, ყველაფერს ვუპასუხებთ, ვერ გვაძლევთ ვერცერთ ასეთ ფაქტს,“ – განაცხადა ირაკლი კობახიძემ.

ჟურნალისტებმა ირაკლი კობახიძეს შეახსენეს, რომ ბიძინა ივანიშვილი იყო „ქართული ოცნების“ ლიდერი მაშინაც, როცა ირაკლი ღარიბაშვილი იყო პრემიერი და გასაჯაროვდა, მაგალითად, ღარიბაშვილის ჩარტერული რეისის შესახებ.

„თქვენ არასდროს არ ხართ მართალი… იქ საუბარი იყო კონკრეტულ ფაქტზე, ეს არ უარუყვია არც ირაკლი ღარიბაშვილს,“ – აღნიშნა ირაკლი კობახიძემ და აქცენტი ისევ იმ პერიოდზე გააკეთა, როცა თავად გახდა პრემიერი.

დაავადებათა კონტროლის ეროვნული ცენტრის ყოფილი დირექტორი ამირან გამყრელიძე 22 ოქტომბრის ღამეს, თბილისში, რუსთაველის ქუჩაზე პოლიციის მიერ დაკავებული ექიმის, ვაჟა გაფრინდაშვილის დაკავებას გამოეხმაურა.

გამყრელიძე დღეს, 23 ოქტომბერს ფეისბუქზე წერს, რომ ვაჟა გაფრინდაშვილის დაკავება ერის სირცხვილი და სამედიცინო საზოგადოების შეურაცხყოფაა.

„ბატონი ვაჟა გაფრინდაშვილი ერთ-ერთი ყველაზე გამორჩეული და ღირსეული წევრია საქართველოს სამედიცინო საზოგადოების. გამორჩეული თავისი მაღალი პროფესიონალიზმით, ადამიანობით, პატიოსნებით, ჰუმანიზმით, პატრიოტიზმით და ყველა იმ თვისებით რაც ექიმებს ახასიათებთ.

აღნიშნული ვაჟამ მრავალჯერ დაუმტკიცა  თავის ხალხსა და ქვეყანას. ამ ადამიანთან ასეთი ტიპის მოპყრობა რაც გუშინ ტელევიზიით ვნახეთ დაუშვებელია, ერის სირცხვილია, სამედიცინო საზოგადოების შეურაცხყოფაა.

როდემდე უნდა გაგრძელდეს ასეთი ძალადობა თავის მოსახლეობაზე? დავიჯერო, ვინც ამას ავალებს და აკეთებს, თვითონ სჯერა, რომ ეს ხალხი ვინც თითქმის ერთი წელია რუსთაველზე დგას მართლა „ხალხის მტრები“ არიან? ცუდ სპირალში შედის ქვეყანა და კიდევ ერთხელ ვთხოვ გადაწყვეტილების მიმღებებს დასხდნენ მოლაპარაკების მაგიდასთან და იქ გადაწყდეს სიტუაციის განმუხტვის ნაბიჯები, გამოსავალი ყოველთვის არსებობს.

გავიმეორებ რაც მრავალჯერ დავწერე, რომ დათმობა ყოველთვის სიბრძნის ნიშანი და უფრო ძლიერის პასუხისმგებლობაა ქვეყნისა და მისი მომავლის წინაშე.

თავისუფლება ვაჟას, გამორჩეულ ექიმსა და პიროვნებას და მასთან ერთად მყოფ უკვე ათეულობით დაპატიმრებულ მოქალაქეს!“ – წერს ამირან გამყრელიძე.

ვაჟა გაფრინდაშვილი ექიმი-ტრავმატოლოგია, რომელიც 2019 წელს რუსეთის საოკუპაციო ძალების წარმომადგენლებმა ახალგორის რაიონში დააკავეს „საზღვრის კვეთის“ ბრალდებით.

გუშინ, 22 ოქტომბერს პოლიციამ რუსთაველის ქუჩაზე 30-მდე ადამიანი გზის გადაკეტვის მოტივით დააკავა. მათ შორის იყო ექიმი ვაჟა გაფრინდაშვილიც.

ყოფილი პრემიერ-მინისტრის, ირაკლი ღარიბაშვილის ცოლის ძმა, ალექსანდრე თამაზაშვილი, სუს-ის განცხადებას იმის თაობაზე, რომ ირაკლი ღარიბაშვილი დაიკითხა და მან აღიარა უკანონო შემოსავლების მიღების ფაქტი, ფეისბუქზე გამოეხმაურა.

ალექსანდრე თამაზაშვილი წერს:

„უკანონო შემოსავლები და კორუფცია სხვადასხვა ცნებებია. დაველოდოთ გამოძიების დასრულებას და დასკვნები შემდეგ გამოვიტანოთ. დრო ყველაფერს აჩვენებს.

ერთში კი სრულიად დარწმუნებული ვარ, ირაკლის არასოდეს გადაუდგია საქართველოს ინტერესების  საწინააღმდეგო  ნაბიჯი და არც მომავალში გადადგამს, თუნდაც ეს საკუთარი თავის დაზიანებად დაუჯდეს“, – წერს ალექსანდრე თამაზაშვილი.

მთავარი პროკურატურის ინფორმაციით, ყოფილი პრემიერის, ირაკლი ღარიბაშვილის, სუს-ის ყოფილი უფროსის, გიორგი ლილუაშვილის, ყოფილი მთავარი პროკურორის, ოთარ ფარცხალაძისა და მათთან დაკავშირებული 8 პირის სახლში ჩხრეკა 17 ოქტომბერს ჩატარდა.

18 ოქტომბერს, სახელმწიფო უსაფრთხოების სამსახურმა განაცხადა, რომ ჩხრეკის შედეგად „ქართული ოცნების“ ყოფილი მაღალჩინოსნების სახლებიდან დიდი ოდენობის ფული და ძვირფასეულობა ამოიღეს.

დღეს, 22 ოქტომბერს კი ასევე სუს-მა გააკეთა განცხადება იმასთან დაკავშირებით, რომ ანტიკორუფციულ სააგენტოში გამოიკითხა ყოფილი პრემიერ-მინისტრი ირაკლი ღარიბაშვილი, რომელმაც ითანამშრომლა გამოძიებასთან და აღიარა წლების განმავლობაში უკანონო შემოსავლების მიღების ფაქტი.

ამის მიუხედავად, ირაკლი ღარიბაშვილი არ დაუკავებიათ. სუსი ამბობს, რომ მომდევნო დღეებში გამოძიება არსებული და დამატებით მოპოვებული მტკიცებულებების საფუძველზე იმსჯელებს მისი ქმედების დაკვალიფიცირების და აღკვეთის ღონისძიების შერჩევის საკითხზე.

პროკურატურამ დღეს ასევე გაავრცელა ინფორმაცია, რომ სახელმწიფო უსაფრთხოების სამსახურის ყოფილ უფროსთან, გრიგოლ ლილუაშვილთან დაკავშირებული პირი, კობა ხუნდაძე დააკავეს.

ათივე განცხადებით, კობა ხუნდაძეს ბრალად ედება განსაკუთრებით დიდი ოდენობის დაუსაბუთებელი შემოსავლის ლეგალიზაცია.

პროკურატურის ცნობით, კობა ხუნდაძის სახლის ჩხრეკისას ამოღებულ იქნა 94 კონვერტად დახარისხებული სხვადასხვა რაოდენობის ფულადის თანხა, მთლიანობაში, 1 319 300 ამერიკული დოლარი.

დღეს, 22 ოქტომბერს, მზია ამაღლობელმა მიიღო სახაროვის პრემია აზრის თავისუფლებისთვის, ევროკავშირის ადამიანის უფლებათა უმაღლესი ჯილდო.

მაია მწარიაშვილი, მზია ამაღლობელის ადვოკატი „ბათუმელებთან“ ამბობს, რომ ევროკავშირის ადამიანის უფლებათა უმაღლესი ჯილდოს გადაცემის ამბავი მზია ამაღლობელმა რუსთავის ქალთა კოლონიაში, ტელევიზორიდან შეიტყო.

პრემიის მიღების შემდეგ, მზია ამაღლობელის გზავნილი „ბათუმელებს“ მისმა ადვოკატმა, მაია მწარიაშვილმა გაუზიარა.

„დღეს მოვინახულე მზია ციხეში. ტელევიზიით შეიტყო, რომ სახაროვის პრემია მიენიჭა.

გაუხარდა.

მზიამ მითხრა, რომ ეს პრიზი მხოლოდ მას არ ეკუთვნის. ის ეკუთვნის ყველა მის კოლეგას, რომლებიც შეუპოვრად იბრძვიან პროფესიული ღირებულებებისა და დემოკრატიისთვის. ეკუთვნის ყველა სინდისის და პოლიტიკურ პატიმარს. განსაკუთრებით კი მათ, ვინც რუსთაველზე დგანან და მათი წინააღმდეგობის ხმა ისმის ყოველ დღეს.

მზიამ თქვა:

„ეს პრიზი განსაკუთრებით მნიშვნელოვანი იქნება ჩემთვის, თუ ყველა, ვინც ამ ბრძოლაშია – ჩემი მამაცი კოლეგები, სინდისის პატიმრები, თითოეული მოქალაქე, ყველა, ვინც თავისუფლების ფასადაც კი  აპროტესტებს უსამართლობას, ამ პრიზს თავისად მიიჩნევს. 

ვფიქრობ, ახლა განწყობების დრო არ არის და ბრძოლა მთავრდება მხოლოდ მაშინ, როდესაც ვიმარჯვებთ.

ამ ბრძოლაში მტრები შიგნით არ უნდა ვეძებოთ, რადგან ერთადერთი მტერი რუსეთია და ისინი, ვინც მას ემსახურებიან.

მახსოვს, როგორ შევქმენი „ბათუმელები“ ეთერთან ერთად, მხოლოდ ენთუზიაზმითა და იდეალებით, მაშინ, როდესაც აჭარაში რუსული ტანკი იდგა და დედაქალაქში ჩამოსასვლელად მათი საზღვარი უნდა გამევლო.

ის დავძლიეთ და ეს მაიმედებს, რომ რუსული ხელისუფლება საქართველოში ვერ გაიმარჯვებს.

თუ ეს ჯილდო ადამიანებისთვის გახდება იმის ნიშანი, რომ ბოლოს მაინც ღირებულებები იმარჯვებს, ბოლოს მაინც ფასდება ის მსხვერპლი, რასაც თითოეული ადამიანი იღებს, მაშინ ამ ყველაფერს აქვს აზრი.

თუ ის პატარა გოგონები, მათ შორის ჩემი ახალგაზრდა კოლეგები, ყოველდღე რომ დაარბენინებს პოლიცია განყოფილებებში, შემდეგ სასამართლოში და შემდეგ ციხე-ციხე, ხან მცირეწლოვან ბავშვს რომ დაუტოვებენ ქუჩაში ან სახლში დაატოვებინებენ მარტოს, ვინაიდან უკვე 12 წლისაა, ჩათვლიან, რომ ეს პრიზი მათია, მაშინ ყველაფერს ჰქონია აზრი.

თუ ეს ჯილდო მათთვის იქნება იმედი იმისი, რომ მათი ეს ბრძოლა გამარჯვებით დამთავრდება, მაშინ, რასაკვირველია, ამ ყველაფერს აქვს აზრი.

ახლა ყველაზე მნიშვნელოვანია, რომ ამ ბრძოლის ხმა მივიტანოთ ყველგან.

სტუდენტებმა, ლექტორებმა, განსაკუთრებით მათ, ვინც უცხოეთში სწავლობს, ყველამ უნდა მიაწვდინოს ხმა თავის ლექტორებს, მეგობრებს, ნაცნობებს, კოლეგებს, თუ როგორ იბრძვიან აქ რუსთაველზე ყოველ დღეს.

ქვეყნის გარეთ ყველგან, ყველა უნივერსიტეტში, აუდიტორიაში, კონფერენციაზე უნდა ისმოდეს ჩვენი ხმა – ეს არის ჩვენი გადარჩენის მთავარი გარანტია.

და რაც მთავარია – ის, რომ დღეს ამ ბრძოლის ხმა ისმის, მხოლოდ ჩემი კოლეგების შეუპოვარი ბრძოლის დამსახურებაა და ამიტომაც ეკუთვნით მათ ეს პრიზი.

გთხოვთ, გაიტანეთ ამ ბრძოლის ხმა ქვეყნის გარეთ ისე, ვისაც როგორ შეგიძლიათ“.

მაია მწარიაშვილის თქმით, პირადად მისთვის, როგორც მზია ამაღლობელის ადვოკატისთვის, ევროკავშირის ადამიანის უფლებათა უმაღლესი ჯილდოს მიღება, პირველ რიგში, მზიას დამსახურებაა.

„მას ამ ღირებულებების სჯეროდა მაშინაც, როდესაც ამ ქვეყანაში ცოტას სჯეროდა. მე მისი სიმართლის პირველივე შეხვედრიდან მჯეროდა. ეჭვი არ მეპარებოდა, რომ ის სწორედ მისი ღირებულებების გამო არის იქ, სადაც არის. მჯეროდა, რომ ცივილიზებული სამყარო სწორად დაინახავდა და შეაფასებდა, რატომ ზის დღეს მზია ამაღლობელი სასჯელაღსრულების დაწესებულებაში.

ეს პრიზი არ ნიშნავს, რომ ამ ქვეყანაში პროგრესია. ეს არ ნიშნავს, რომ აქ ადამიანის უფლებებს იცავენ, ან დემოკრატია არსებობს. ეს ნიშნავს ყველაფერს პირიქით.

ამიტომ ამ ძალზე მაღალ და საპატიო ჯილდოს აქვს ორი მხარე: ერთი, რომელიც არ შეიძლება გიხაროდეს ადამიანს, რომელსაც გიყვარს სამშობლო და საკუთარი ქვეყნის წარმატებისა და პროგრესისთვის გიშრომია.  ასეთ პრიზზე არ ხდება დემოკრატიულ ქვეყანაში მოქალაქეების ნომინირება.

ამიტომ, ამ პრიზის მიღება არის საგანგაშო სიგნალიც.

ჩემთვის, როგორც მისი ადვოკატისთვის, ეს ნიშნავს იმას, რომ დემოკრატიული სამყაროსათვის მზია ამაღლობელი არის სინდისის პატიმარი, რომელიც უნდა გათავისუფლდეს პატიმრობიდან. მზიას ეს პრიზი გადაეცა საკუთარი ქვეყნის უანგარო სამსახურისათვის, ღირებულებების ერთგულებისა და პროფესიული გამბედაობისათვის. ვულოცავ
მას ამ აღიარებას,“ – თქვა მაია მწარიაშვილმა „ბათუმელებთან“.

მაია მწარიაშვილს ვკითხეთ, როგორია მზია ამაღლობელის ჯანმრთელობის მდგომარეობა და რაიმე სახის კვლევა ჩაუტარდა თუ არ მას საპატიმროში.

„ფიზიკურად ძალიან გამხდარია. დრამატული კლება აქვს წონაში. მხედველობის ბოლო კვლევით მისი ერთი თვალის მხედველობა მხოლოდ 10%-მდე იყო შენარჩუნებული. დღეს, არავინ იცის, კვლავ 10% -ია, თუ კიდევ დავარდა. სამწუხაროდ, მისი დაავადება შეუქცევადია და სათანადო სამედიცინო ჩარევის გარეშე მისი გაუარესება ვერ შეჩერდება.

სასჯელაღსრულების სისტემა სრულიად უმოქმედოა ამ თვალსაზრისით,” – ამბობს მაია მწარიაშვილი.

ამავე თემაზე:

მზია ამაღლობელმა მიიღო ევროკავშირის უმაღლესი ჯილდო, სახაროვის პრემია

See more

დღეს, 22 ოქტომბერს, პროევროპული პროტესტის 329-ე დღეს, პოლიციამ რუსთაველის გამზირზე მინიმუმ 20 ადამიანი დააკავა.

სამართალდამცავებს პარლამენტთან კორდონი აქვს გაკეთებული იმისათვის, რომ აქციის მონაწილეებმა გზა არ გადაკეტონ.

პოლიცია პერიოდულად აკავებს მოქალაქეებს, თუმცა საპროტესტო აქცია გრძელდება.

შსს აცხადებს, რომ 22 ოქტომბრის ღამეს, ამ დრომდე [21:23 სთ] ადმინისტრაციული წესით დაკავებულია აქციის 20-მდე მონაწილე, „ვინც უშუალოდ მონაწილეობდა გზის უკანონოდ გადაკეტვის მცდელობაში“.

„რაც შეეხება ახალგაზრდა ქალს, რომელიც არ დაემორჩილა სამართალდამცველთა კანონიერ მოწოდებას, საპატრულო პოლიციის ავტომანქანაზე ავიდა და შეურაცხყოფა მიაყენა სამართალდამცავი უწყების წარმომადგენლებს, მათ ღირსებასა და მუნდირს, ასევე საზოგადოებას – ის დაკავებულია საქართველოს სისხლის სამართლის კოდექსის 239-ე მუხლით, რაც ხულიგნობას გულისხმობს“ – წერს შსს.

სახელმწიფო უსაფრთხოების სამსახურის [სუს-ის] თანამშრომელს, რომელსაც საცხოვრებლად გადაცემული აქვს სახელმწიფო საკუთრებაში არსებული ბინა ან სახლი [დამხმარე ნაგებობებითა და მათზე მიმაგრებული მიწის ფართობით], სუს-ის შუამდგომლობით, შესაძლებელია ეს ქონება საკუთრებაში გადაეცეს.

ამ დრომდე სუს-ის თანამშრომელს ქონება საცხოვრებლად მხოლოდ სარგებლობაში გადაეცემოდა.

„საქართველოს სახელმწიფო უსაფრთხოების სამსახურის მოსამსახურეთა სოციალური დაცვისა და მატერიალური უზრუნველყოფის  წესში“ „ოცნების“ მთავრობამ ცვლილება 2025 წლის 21 ოქტომბერს შეიტანა.

შესაბამის დადგენილებას ხელს ირაკლი კობახიძე აწერს.

აღნიშნული წესის ახალი და ძველი მუხლები:

ახალი: „მუხლი 9. სამსახურის უფროსის სამართლებრივი აქტით, მოსამსახურეს შესაძლებელია, საცხოვრებლად გადაეცეს სამსახურის ბალანსზე რიცხული, სახელმწიფო საკუთრებაში არსებული ბინა, სახლი, დამხმარე ნაგებობებითა და მათზე მიმაგრებული მიწის ფართობით. სამსახურის გადაწყვეტილების არსებობის შემთხვევაში, საცხოვრებლად გადაცემული ქონება შესაძლებელია, გადაეცეს მოსამსახურეს საკუთრებაში, სამსახურის შუამდგომლობის საფუძველზე“.

ძველი: „მუხლი 9. სამსახურის უფროსის სამართლებრივი აქტით, მოსამსახურეს შესაძლებელია საცხოვრებლად სარგებლობაში გადაეცეს სამსახურის ბალანსზე რიცხული, სახელმწიფო საკუთრებაში არსებული ბინა, სახლი, დამხმარე ნაგებობები და მათზე მიმაგრებული მიწის ფართობი.“

„ოცნების“ მთავრობის 2025 წლის 10 ოქტომბრის დადგენილებით კი სუს-ში მთელ რიგ თანამდებობებზე პირველი ოქტომბრიდან ისევ გაიზარდა ხელფასები. გაიზარდა წოდებრივი სარგოების ყოველთვიური განაკვეთებიც.

ვრცლად ამ თემაზე:

სუსის უფროსის ანაზღაურება თვეში 12 345 ლარი გახდა, მას წელს ხელფასი 1125 ლარით გაეზარდა 

See more

 

 

„ბათუმელებისა“ და „ნეტგაზეთის“ დამფუძნებელი და დირექტორი, მზია ამაღლობელი სახაროვის პრემიის გამარჯვებული გახდა ბელორუს ჟურნალისტ, ანდჟეი პოჩობუტთან ერთად.

საბჭოთა დისიდენტის, ანდრეი სახაროვის სახელობის „სახაროვის პრემია“ 1988 წელს დაარსდა ევროპარლამენტის მიერ.

ეს პრემია ევროკავშირის უმაღლესი ჯილდოა ადამიანის უფლებების სფეროში.

ჯილდო ყოველწლიურად გაიცემა სხვადასხვა სფეროში გაწეული ძალისხმევისათვის, იქნება ეს ადამიანის უფლებების და ძირითადი თავისუფლების დაცვა, დემოკრატიის განვითარება, კანონის უზენაესობის დაცვა, უმცირესობის უფლებები და საერთაშორისო სამართლის პატივისცემა.

ვის აქვს დღემდე სახაროვის პრემია მიღებული: 

სახაროვის პრემია 1988 წელს, როცა ის დაარსდა, პირველად გადაეცა ნელსონ მანდელას, სამხრეთ აფრიკის პირველ პრეზიდენტს და აპარტეიდის წინააღმდეგ მებრძოლ აქტივისტს.

1992 წელს სახაროვის პრემია მიიღო არგენტინელ მშობელთა ასოციაციამ – „მაისის მოედნის მშობლები“, რომელთაც შვილები დაკარგეს ბინძური ომის [Guerra Sucia en la Argentina] დროს. 1976-1983 წლებში არგენტინის ისტორიაში იყო სახელმწიფოებრივი ტერორიზმის გამოვლინების პერიოდი, როცა მასობრივად იტაცებდნენ ხალხს, აწამებდნენ და სასამართლოს გარეშე ხვრეტდნენ.

1995 წელს სახაროვის პრემია გადაეცა ლეილა ზანას, ქურთული წარმოშობის პოლიტიკოს ქალს. ის ციხეში 10 წლით ჩასვეს იმის გამო, რომ თურქეთის პარლამენტში რამდენიმე სიტყვა წარმოთქვა ქურთულ ენაზე.

2003 წელს სახაროვის პრემია მიენიჭა კოფი ანანს, განელ დიპლომატს, გაეროს რიგით მეშვიდე გენერალურ მდივანს. კოფი ანანი ასევე არის ნობელის პრემიის 2001 წლის ლაურეატი.

2004 წელს სახაროვის პრემია გადაეცა ბელარუსის ჟურნალისტთა ასოციაციას, ხოლო 2005 წელს სახაროვი გადასცეს საფრანგეთში დაფუძნებულ არასამთავრობო ორგანიზაციას „რეპორტიორები საზღვრებს გარეშე“. ეს ორგანიზაცია მხარს უჭერს პრესის თავისუფლებას და იცავს ჟურნალისტების უფლებებს მთელს მსოფლიოში.

2008 წელს სახაროვი გადაეცა ჩინელ აქტივისტსა და დისიდენტს ჰუ ცზიას, „4 ივლისის ასოციაციის“ ხელმძღვანელს.

2009 წელს სახაროვის პრემია გადაეცა საზოგადოება „მემორიალს“, ადამიანის უფლებათა დამცველ გავლენიან ორგანიზაციას.

2011 წელს სახაროვის პრემია გადასცეს არაბული გაზაფხულის აქტივისტებს, ადამიანის უფლებების დამცველებს ეგვიპტიდან, ლიბიიდან, სირიიდან და ტუნისიდან.

2013 წელს სახაროვის პრემიის გამარჯვებული გახდა მალალა იუსუფზაი, პაკისტანელი ქალთა უფლებების დამცველი და განათლების საკითხების აქტივისტი.

2015 წელს სახაროვის პრემია გადასცეს რაიფ ბადავს, არაბ მწერალს და აქტივისტს, რომელიც დაპატიმრებული იყო საუდის არაბეთის რელიგიურ საქმეთა პოლიციის წინააღმდეგ გამოქვეყნებული კრიტიკული პუბლიკაციების გამო.

2020 წელს სახაროვის პრემია გადასცეს ბელარუსის დემოკრატიულ ოპოზიციას.

2021 წელს სახაროვის პრემიის მფლობელი გახდა ალექსეი ნავალნი, რუსი ოპოზიციონერი, „კორუფციასთან ბრძოლის ფონდის“ დამაარსებელი.

2022 წელს სახაროვის პრემიის მფლობელი გახდა უკრაინელი ხალხი. დაჯილდოების ცერემონიაზე წუთიერი დუმილით მიაგეს პატივი უკრაინის თავისუფლებისთვის დაღუპულ უკრაინელებს. უკრაინის პრეზიდენტი ვოლოდიმირ ზელენსკი დაჯილდოების ცერემონიალში ონლაინ მონაწილეობდა.

2023 წელს სახაროვის პრემიის მფლობელი გახდა მაჰსა ამინი და მოძრაობა „ქალი, სიცოცხლე, თავისუფლება“.

2024 წელს სახაროვის პრემია გადაეცა ვენესუელელ ოპოზიციონერ პოლიტიკოსებს – მარია კორინა მაჩადოს და ედმუნდო გონსალესს.

2025 წელს სახაროვის პრემია გადაეცა ქართველ ჟურნალისტ მზია ამაღლობელს და  ბელორუს ჟურნალისტ ანდჟეი პოჩობუტს.

ამავე თემაზე:

მზია ამაღლობელმა მიიღო ევროკავშირის უმაღლესი ჯილდო, სახაროვის პრემია

See more

 

 

დღეს, 22 ოქტომბერს, მზია ამაღლობელმა მიიღო სახაროვის პრემია აზრის თავისუფლებისთვის, ევროკავშირის ადამიანის უფლებათა უმაღლესი ჯილდო.

სახაროვის პრემიის გამარჯვებული დღეს ევროპარლამენტში დაასახელა პარლამენტის თავმჯდომარემ, რობერტა მეცოლამ.

სახაროვის პრემია 2025 წელს მიიღეს მზია ამაღლობელმა საქართველოდან და პატიმრობაში მყოფმა ბელარუსმა ჟურნალისტმა ანდჟეი პოჩობუტმა. „პატიმრობაში მყოფი ჟურნალისტები, რომლებიც იბრძვიან შენი და ჩვენი თავისუფლებისთვის“ – ასე ერქვა ნომინაციას, რომელშიც ქართველი და ბელარუსი ჟურნალისტები იყვნენ წარდგენილნი. 

მზია ამაღლობელი არის პირველი ქართველი, რომელმაც აღნიშნული ჯილდო მიიღო.

სახაროვის პრემია აზრის თავისუფლებისთვის ევროკავშირის მიერ ადამიანის უფლებების დაცვის სფეროში გაწეული საქმიანობისთვის გადაცემული უმაღლესი ჯილდოა. ამ პრემიას გადასცემენ ადამიანებს, ჯგუფებსა და ორგანიზაციებს, რომლებმაც განსაკუთრებული წვლილი შეიტანეს აზრის თავისუფლების დაცვაში.

რუსი მეცნიერისა და დისიდენტის, ანდრეი სახაროვის პრემია ყოველწლიურად გადაეცემა იმ პირს ან ჯგუფს, ვინც საკუთარი საქმიანობა მიუძღვნა ადამიანის უფლებებისა და აზრის თავისუფლების დაცვას.

პრემია ევროპარლამენტის მიერ ყოველწლიურად გაიცემა 1988 წლიდან. ეს არის უმაღლესი ევროპული ჯილდო ადამიანის უფლებებისადმი ერთგულებისა და მუშაობისთვის.

სახაროვის პრემიის გამარჯვებულები სხვადასხვა წელს იყვნენ: ნელსონ მანდელა [1993], მალალა იუსაფზაი [2014], ორგანიზაცია „მემორიალი“ [2008], არაბული გაზაფხულის აქტივისტები [2011], ალექსეი ნავალნი [2021], ირანული მოძრაობა „ქალი, სიცოცხლე თავისუფლება“ და ჰამსა ამინი [2023] და ა.შ.

სახაროვის პრემიის დაჯილდოების ცერემონია 16 დეკემბერს, სტრასბურგში გაიმართება. სახაროვის პრემიის ჯილდო 50 000 ევროა.

პროკურატურის ინფორმაციით, სამსახურებრივი მდგომარეობის გამოყენებით, დიდი ოდენობით თანხის მართლსაწინააღმდეგოდ მითვისების ფაქტზე საქართველოს ხელბურთის ეროვნული ფედერაციის ყოფილი პრეზიდენტი დააკავეს.

„აღნიშნულ ფაქტზე გამოძიება სახელმწიფო აუდიტის სამსახურის ანგარიშის საფუძველზე დაიწყო. ჩატარებული გამოძიებით კი დადგინდა, რომ დაკავებულმა ისარგებლა თავისი სამსახურებრივი მდგომარეობით და 2019-2021 წლებში, მის მფლობელობაში არსებული, ფედერაციის კუთვნილი ბიზნეს ბარათის გამოყენებით, საბანკო ანგარიშებიდან, სხვადასხვა ბანკომატის მეშვეობით, გამოიტანა და მართლსაწინააღმდეგოდ მიისაკუთრა სახელმწიფოს კუთვნილი 464 496 ლარი, რამაც დიდი ოდენობით მატერიალური ზიანი გამოიწვია.

დაკავებულს ბრალი სამსახურებრივი მდგომარეობის გამოყენებით, დიდი ოდენობის თანხის მართლსაწინააღმდეგოდ მითვისების ფაქტზე წაეყენა, რაც სასჯელის სახედ და ზომად ითვალისწინებს 7-დან 11 წლამდე თავისუფლების აღკვეთას.

პროკურატურა ბრალდებულისათვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს“ – აცხადებს პროკურატურა.

საქართველოს ხელბურთის ეროვნული ფედერაციის საქმიანობის აუდიტის ანგარიში, რაზედაც დღეს პროკურატურა საუბრობს, სახელმწიფო აუდიტის სამსახურმა ორი წლის წინ, 2023 წლის 2 ივნისს გამოაქვეყნა.

„… 2019-2020 წლებში ფედერაციაში მივლინების სახით გაცემულ 13 380 ლარზე არ არსებობს ფაქტობრივად გაწეული ხარჯის დამადასტურებელი დოკუმენტები;

2019-2021 წლებში ფედერაციის პრეზიდენტის სახელზე გახსნილი ბიზნესბარათის გამოყენებით, ფედერაციის საბანკო ანგარიშებიდან ქ. თბილისში არსებული სხვადასხვა ბანკომატის მეშვეობით გამოტანილია სულ − 451 256 ლარი. აღნიშნული თანხის ხარჯვის დამადასტურებელი დოკუმენტები ფედერაციაში არ არსებობს. სალაროს ოპერაციები ნაღდი ანგარიშსწორებით ანგარიშვალდებული პირის მიერ გატანილ თანხებზე ნაწარმოები არ არის.

აღნიშნული თანხებიდან 2021 წელს ფედერაციის ყოფილი პრეზიდენტის მიერ საბანკო ანგარიშზე დაბრუნებულია 40 000ლარი.“ – წერია აუდიტის ანგარიშში.

რეჟისორი გიორგი თავართქილაძე 20 ოქტომბერს, ღამით, პოლიციაში თავისი ფეხით მივიდა, როცა თბილისში, რუსთაველის გამზირის „ხელოვნური გადაკეტვის“ საბაბით ადამიანები დააკავეს. მან პოლიციას უთხრა, რომ თვითონაც გადაკეტა რუსთაველი. ის პოლიციელებმა არ დააკავეს, თუმცა მისი სასამართლო პროცესი ხვალ, 22 ოქტომბერს, 12 საათზეა ჩანიშნული.

„თუ არ გამოვალთ გამარჯვებულები ამ ბრძოლიდან, როგორც სოლიდარული საზოგადოება, ჩემი აზრით, არაფერს აზრი აღარ ექნება. რაც უფრო მეტი ადამიანი იქნება სოლიდარული, დარტყმა შემსუბუქდება. თუ 10 ადამიანი გაიზიარებს ამ ხვედრს სოლიდარულად, თუ 100 და 1 000 გაიზიარებს, საბოლოოდ ანულირდება კიდეც ეს დარტყმა,“ – მიიჩნევს გიორგი თავართქილაძე.

როგორ შეიძლება დაამარცხოს რეჟიმი წინააღმდეგობამ? – „ბათუმელებმა“ რეჟისორთან და სამოქალაქო აქტივისტთან, გიორგი თავართქილაძესთან ინტერვიუ ჩაწერა.

• გიორგი, ხვალ, 12 საათზე გაიმართება თქვენი სასამართლო პროცესი. დღესაც აპირებთ რუსთაველის გადაკეტვას?

დიახ, ბოლომდე ვიბრძოლებ, ვიდრე მაქვს ამის შესაძლებლობა. აუცილებლად გავდივარ და მაქვს იმედი, რომ მეტი ადამიანი გამოვა.

• რატომ არის პრინციპულად მნიშვნელოვანი ისევ რუსთაველის ქუჩის გადაკეტვა? წინააღმდეგობაში ჩართული ზოგიერთი მოქალაქე ფიქრობს, რომ სჯობს პროტესტი ტროტუარზე გაგრძელდეს, რადგან ყველას თუ დააპატიმრებენ, ამ გზით პროტესტს ჩაახშობენ. 

როდესაც რამეს გვიზღუდავენ, თუ ჩვენ ამ შეზღუდვას ვთანხმდებით და ვემორჩილებით, მაშინ ის იქცევა კანონად. თუ ჩვენ რეჟიმს უფლება მივეცით და საშუალება, რომ კანონები გადაგვიჭიროს, მაშინ ის გახდება ლეგიტიმური ხელისუფლება. „ოცნება“ კი, დღეს ლეგიტიმური ხელისუფლება არ არის.

თუ ჩვენ ვიქნებით ბევრნი, ის ვეღარ მოახერხებს ჩვენს დასჯას, თუ ჩვენ ვიქნებით ცოტანი – ის ყოველ ჯერზე თითო-თითოს დაგვსჯის. თუ ჩვენ დავემორჩილებით რეჟიმს, ის მაინც დაგვსჯის. ამის ფაქტი სახეზეა: ადამიანები ტროტუარზე დგანან თვეების განმავლობაში და 5-5 ჯარიმა გამოუწერეს გზის გადაკეტვისთვის, ანუ ის ისედაც გზღუდავს.

ჩემი მიდგომაა ასეთია: მოდი, ორგანიზებული გაერთიანებით დავუპირისპირდეთ რეჟიმს. შეიძლება ზუსტად იგივე სიმძიმის დარტყმა მივიღოთ ჩვენ, მაგრამ ამას უკვე ექნება სხვა ფუნქცია და მნიშვნელობა – ის უკვე ვეღარ აღასრულებს კანონს, არა კი არა – ვეღარ! როდესაც, პირობითად, 10 000 ადამიანი გააკეთებს ერთი და იმავეს, ვთქვათ, 10 000 ადამიანი გააფერადებს კედლებს, 10 000 ადამიანი გადავა გზაზე და ასე შემდეგ, ის ვეღარ მოახერხებს ჩვენს დასჯას ან დაიწყებს შერჩევითად დასჯას.

როდესაც რაოდენობრივად ჩვენ გვეცოდინება, რომ ეს 10 000-მა გააკეთა და მან 10 000 კაცი ვერ დაიჭირა, აი, მაშინ დაიწყება რეჟიმის რღვევა: ერთადერთი, რაზეც დღეს რეჟიმი დგას, ეს არის ზუსტად აღმასრულებელი ფუნქცია და როლი. თუ ჩვენ მას გამოვაცლით ამ აღმასრულებლის ფუნქციას და როლს, ამ გზით და მხოლოდ მას შემდეგ შეწყდება რეჟიმი.

• მიგაჩნიათ, რომ სოლიდარობაა წინააღმდეგობის წარმატების მთავარი ფაქტორი? რაც შეიძლება მეტი ადამიანი უნდა გამოვიდეს ყოველდღიურად რუსთაველზე?

დიახ, სოლიდარობა გულისხმობს იმას, რომ ის დარტყმა, რასაც, ვთქვათ იღებს კონკრეტული ადამიანი, უნდა მივიღოთ ჩვენც. რაც უფრო მეტი ადამიანი იქნება სოლიდარული, ეს დარტყმა შემსუბუქდება. თუ 10 ადამიანი გაიზიარებს ამ ხვედრს სოლიდარულად, თუ 100 და 1 000 გაიზიარებს, საბოლოოდ ანულირდება კიდეც ეს დარტყმა.

ჩვენ ახლა ეპოქალურ ბრძოლაში ვართ. ჩვენ თუ არ გამოვალთ გამარჯვებულები ამ ბრძოლიდან, როგორც სოლიდარული საზოგადოება, ჩემი აზრით, არაფერს აზრი აღარ ექნება.

თუ არის საზოგადოება სოლიდარული, ის არის მაშინ ისეთი, როგორსაც ჩვენ ევროპულს ვუწოდებთ – კეთილშობილური, კეთილსინდისიერი და შესაბამისად, სახელმწიფო არის გამართული და კარგი. თუ ვინმეს გონია, რომ ვიღაცას უნდა ვძლიოთ იმიტომ, რომ ძალით ვაჯობოთ, ეს არ მოგვიტანს ჩვენ იმ შედეგს, რაც გვინდა, რადგან ჩვენ გვინდა სამართლებრივი სახელმწიფო, დემოკრატიული სახელმწიფო. დემოკრატიული სახელმწიფო მხოლოდ დემოკრატიული გზებით მიიღწევა და დემოკრატიული სახელმწიფოს მიღწევის გზა არის სოლიდარობა.

• თქვენ, როგორც წინააღმდეგობის ერთი წევრი, როგორ ფიქრობთ, რატომ ვერ ვახერხებთ სოლიდარობას იმ ფორმით, რომელიც უკან დაახევინებდა „ოცნებას“? არაერთხელ გაიმართა ხალხმრავალი საპროტესტო აქცია რუსთაველზე, თქვენ ამბობდით ერთ-ერთ ინტერვიუში, რომ რეჟიმი არ არის ბოლომდე კონსოლიდირებული და უნდა მოვასწროთ მოქმედება. თქვენი დაკვირვებით, ახლა რა რესურსი არსებობს იმისთვის, რომ სოლიდარობას ჰქონდეს შედეგი?

მგონია, რომ ეს პროცესი მხოლოდ საზოგადოებაზე და მოქალაქეებზეა დამოკიდებული.

იმ ქვეყნებში, სადაც სოლიდარობით მიაღწიეს შედეგს – ვთქვათ, პოლონეთი და ჩეხოსლოვაკია – იყო ძლიერი ინსტიტუცია პროფესიული კავშირების სახით. ჩვენთან რაცაა, ძალიან სუსტია, ან კორუფციის ბუდედაა ქცეული. იქ, სადაც სოლიდარობამ გაიმარჯვა, ყველგან იყო პროფკავშირები ძლიერი. ეს ართულებს საქმეს, მაგრამ ჩვენ ჯერ კიდევ გვაქვს ერთმანეთთან კომუნიკაციის საშუალება. ჯერ კიდევ ვართ ერთმანეთთან დაკავშირებული ემოციურად, ერთ ემოციურ ველში ვართ. შეგვიძლია ერთობის ჩვენება ქუჩაში და ამ რთულ პირობებში მაინც არის შესაძლებელი იმ შედეგის მიღწევა, რაც ინსტიტუციურ დონეზე იყო შესაძლებელი თუნდაც პოლონეთსა და ჩეხოსლოვაკიაში.

ეს არის ძალიან რთული, რადგან მთელი დატვირთვა გადადის მოქალაქეებზე, რომლებსაც შესწევთ უნარი იდეის გარშემო გააერთიანონ ადამიანები.

არ არსებობს ერთმნიშვნელოვანი პასუხი: ასე იქნება თუ ისე იქნება. ფაქტია, რომ თვეების განმავლობაში ვახერხებთ ძალიან სპონტანურად, მოკლე დროში, ძალიან დიდი რაოდენობით კონსოლიდირებას, ერთი იდეის, ერთი სათქმელის, ერთი მომენტის გარშემო.

რადგან ეს შეგვიძლია, ეს მაძლევს საფუძველს, რომ ჩვენ შეგვიძლია გამარჯვება.

• ფიქრობთ, რომ შესაძლებელია ცვლილებები პოლიტიკური ორგანიზების და პოლიტიკოსების აქტიური ჩართულობის გარეშე? მოქალაქეებმა არაერთხელ აჩვენეს პროტესტი მასშტაბურად, მაგრამ ეს არ აღმოჩნდა საკმარისი პოლიტიკური სიტუაციის შესაცვლელად.

მე მიმაჩნია, რომ მხოლოდ პოლიტიკოსების გარეშე გამოვა ეს ამბავი. სამწუხაროდ, ივანიშვილმა მოახერხა არა 100%-ით, მაგრამ ძალიან მნიშვნელოვანი ნაწილი პოლიტიკოსებისა გამოეთიშა პროცესიდან. ზოგიერთი მათგანი ალბათ მოსყიდულიც არის, ივანიშვილმა ერთმანეთს დააპირისპირა პოლიტიკოსები, რის შედეგადაც ისინი გახდნენ უმოქმედონი. მათ არ შეუძლიათ დღეს რაიმე პრაგმატული, ელემენტარული გადაწყვეტილების მიღება. შესაბამისად, მათი ჩართულობა პირიქით, იქნება კონტრპროდუქტიული.

ჩვენ უნდა შევქმნათ მომენტუმი, რომელიც იქნება აბსოლუტურად ამოვარდნილი ბიძინა ივანიშვილის დღის წესრიგიდან. ეს უნდა იყოს სრულიად ახალი სცენარი, ეს უნდა იყოს იმპროვიზაცია და ამას ბიძინას რეჟიმი ნამდვილად ვერ გააკონტროლებს.

პირადად ჩემთვის კიდევ ერთხელ გამოჩნდა გუშინ, როდესაც მე მივედი პოლიციაში და ისინი ძალიან დიდი ხნის განმავლობაში ვერ არკვევდნენ, რა უნდა მოეხერხებინათ ჩემთვის. ვეუბნებოდი პოლიციელებს, რომ მე ზუსტად იგივე გავაკეთე, რაც გააკეთეს სხვებმა, რომლებიც დღეს დააკავეს. დამაკავეთ მეც! მაგრამ სისტემა არის ტლანქი, მოუქნელი, მათ არ შეუძლიათ რადიკალური გადაწყვეტილებების მიღება. ჩვენ ახლა გვაქვს ამის შანსი, სანამ ჯერ კიდევ შეგვწევს უნარი, რომ ვიდგეთ გარეთ და ვახერხებდეთ გაერთიანებას ფიზიკურად.

• „ოცნების“ პოლიციამ დღესაც დააკავა ხუთი ადამიანი რუსთაველის „ხელოვნურად გადაკეტვის“ საბაბით. რის დემონსტრირებას ახდენს „ოცნება“?

მიზანია ის, რომ ტერორის ძალით დაგვაშინონ, თავი ვიგრძნოთ ტერორში. ტერორი იწვევს დემორალიზებას, დემორალიზებულ ადამიანს აღარ შეუძლია მოქმედება. სინდისის პატიმრებიდან ვიღაც რვა წელს ელოდა და მიუსაჯეს, მაგალითად, ორ-ნახევარი წელი. აი, ქათამს რომ წაუჭირო კისერში ხელი, მერე გაუშვა და ისევ მოუჭირო… ორგანიზმი მოქმედებს ინსტინქტის მიხედვით: როდესაც სიკვდილს უახლოვდება, ფართხალებს, როდესაც სიკვდილს აიცილებს, უბრალოდ ჩერდება. ესაა ბიძინა ივანიშვილის მეთოდი.

მე ყოველ ჯერზე, როცა მაქვს საშუალება, ველაპარაკები ხოლმე პოლიციელებს. ჩემი მიზანი არ არის მათი შეურაცხყოფა ან შეჩვენება, მაგრამ მხოლოდ მათზე დგას დღეს ივანიშვილის რეჟიმი. მათი ძალიან დიდი ნაწილია დემორალიზებული და დარწმუნებული ვარ, გვგულშემატკივრობენ, უნდათ, რომ ჩვენ გავათავისუფლოთ ამ ყველაფრისგან.

საბოლოოდ, ასე მოხდება კიდეც. ჩვენ მოგვიწევს მათი გათავისუფლებაც. აბსოლუტურად სრული უფლება გვაქვს, რომ ჩვენ ისინი არ გვიყვარდეს და მათ არ ველაპარაკებოდეთ კარგად, ან არ მოვიხსენიებდეთ. მაგრამ ეს, ჩემი აზრით, არ მიგვიყვანს შედეგამდე. ჩვენ რეალობა უნდა განვიხილოთ. რეალობა არის ის, რომ უმეტესობა პოლიციაში არის ღირსებააყრილი, პატივაყრილი და იქიდან გამოსვლა აღარ შეუძლია.

• თუ ბევრი მოქალაქე გამოვა რუსთაველზე, ყველას რეჟიმი ვერ დააპატიმრებს, მაგრამ რა იქნება შემდეგ? თქვენ როგორ ხედავთ წინააღმდეგობის განვითარებას იმ შემთხვევაში, თუ ისევ ბევრი ადამიანი გამოვა ქუჩაში?

სოლიდარობის გამოხატვა იქნება დიდი მოძრაობის დასაწყისი, როცა საჯარო სამსახურებიდანაც გამოვა ხალხი, როგორც ეს მოხდა 2024 წლის 29 ნოემბრის გამთენიისას. დღეს ადამიანებმა უბრალოდ არ იციან, რა ფორმით არის შესაძლებელი უპირატესობის მოპოვება.

იყო მომენტი, როცა ძალმომრეობაზე დადო საპროტესტო აქციის მონაწილეების ნაწილმა ფსონი, რაც წინასწარვე იყო განწირული.

როდესაც ადამიანები იტყვიან, რომ მე ამ სამსახურში აღარ ვიმუშავებ, რადგან მე უნდა ვემსახურებოდე სახელმწიფოს განვითარებას, მოქალაქეებისთვის კეთილდღეობის შექმნას და არა მის ანტიპოდს.

• გულისხმობთ გაფიცვებს?

სიტყვა „გაფიცვას“ ვერიდები ხოლმე, რადგან იურიდიული ტერმინია, რომელსაც სჭირდება პროფკავშირი და ეს უკვე კანონით რეგულირდება. მე ვგულისხმობ ბოიკოტს, ართანამშრომლობას, რასაც სხვადასხვა ფორმა შეიძლება ჰქონდეს.

მაგალითად, საჯარო სამსახურებიდან გამოდის ხალხი და ამბობს – მე აღარ მოვემსახურები რეჟიმს, რომელიც მკლავს. ვიღაც კონკრეტული პროდუქტის ყიდვაზე ამბობს უარს და ასე შემდეგ.

ამის მიზანი უნდა იყოს ის, რომ ჩვენ სისტემა, როგორც გაფუჭებული აპარატი, რომელიც დენის წყაროზეა შეერთებული, უნდა გამოვაძროთ დენის წყაროდან. შეიძლება ამ დროს დენმა დაგვარტყას, დაგვაზიანოს ან მოგვკლას საერთოდ, მაგრამ გასათიშია ეს სისტემა, ოღონდ არა გასანადგურებელი. ჩვენ გამოვიარეთ მძიმე გაკვეთილი 1991-92 წლებში.

ის, ვინც ამ რეჟიმით სუნთქავდა, მას მოუწევს უბრალოდ გაქცევა ან ვერ მოასწრებს გაქცევას და საბოლოოდ, ნამდვილი მართლმსაჯულება მიაკითხავს. ეს არის ფორმა, რომელიც გაგვათავისუფლებს ამ უბედურებისგან, რასაც რუსობა ჰქვია და მეორე – ჩამოაყალიბებს იმ ახალი სახელმწიფოს ფორმას, რომელზეც, მე მგონია, მთელი საპროტესტო მოძრაობა ვთანხმდებით.

• არსებული სასამართლოს პირობებში, ლოგიკურია მოლოდინი, რომ რომ ხვალ თქვენ დაგაპატიმრებენ. რა იქნებოდა თქვენი გზავნილი?

ჩემი გზავნილი იქნებოდა ის, რომ ნუ ვიფიქრებთ ამგვარად – „მე თუ ვიქნები სოლიდარული მოქმედებაში, აი, სხვაც იქნება თუ არა შემდეგ?“ – ეს მომენტი არასდროს არ დადგება თუ ინერტულ პოზიციად დარჩება სოლიდარობა, თუ მოქმედებაში არ იქნება გამოხატული სოლიდარობა.

ერთი ადამიანის სოლიდარობა გამოიწვევს მეორე ადამიანის სოლიდარობას, აუცილებლად. ორი ადამიანის სოლიდარობა კი გამოიწვევს ოთხი ადამიანის სოლიდარობას და ეს გაიზრდება გეომეტრიული პროგრესიით. უბრალოდ ჩვენ უნდა დავიწყოთ და ეს ყველაფერი იწყება ნებისმიერ ჩვენგანში: ჩემში, თქვენში, ნებისმიერში, ვინც ამ ინტერვიუს კითხულობს…

ნებისმიერმა უნდა გააკეთოს ეს და უნდა დაანახოს გვერდით მდგომს, რომ მე მოქმედებაში ვარ სოლიდარული. და აუცილებლად დადგება შედეგი.

ჩემი აზრით, ძალიან ბუნებრივად და ადეკვატურად ლაგდება ეს დრამატურგია, რომ პირველი სოლიდარობის აქტი უნდა შედგეს რუსთაველის გამზირზე – სწორედ იქ არის საჭირო სოლიდარობით დავუპირისპირდეთ შეზღუდვას, რომელიც ცდილობს გადაიქცეს კანონად, რომელიც საბოლოოდ შეგვიზღუდავს ჩვენს ფუნდამენტურ უფლებებს და საბოლოოდ სულს ამოგვხდის.

თუ დღეს მოვა იქ 10 ადამიანზე მეტი და მზად იქნება იმისთვის, რომ წავიდეს, 5, 10, 15-დღიან პატიმრობაზე. ეს იქნება აუცილებლად მზარდი.

ჩვენი საქმეა სოლიდარობა და სოლიდარობა შესაძლებელია.

რთულია, მაგრამ მართლა შეგვიძლია ვაჩვენოთ ევროპას, ბევრად რთულ ვითარებაში როგორ შეიძლება სოლიდარობა. ჩვენ ყოველთვის ის ხალხი ვიყავით, რომლებიც რაღაც ინოვაციებს ვიგონებდით. დიდგორიც ინოვაციური გამარჯვება იყო – გავიმარჯვეთ მცირერიცხოვანმა მრავალრიცხოვანზე და გავიმარჯვეთ ყველაზე რთული, ევროპული საბრძოლო ილეთით, რომელსაც ერქვა შოკური დარტყმა, შოკური შეტევა. ამას ვერ ახორციელებდნენ შუაგული ევროპული ქვეყნების გაცილებით ძლიერი და დიდი არმიის წარმომადგენლები და ჩვენ ეს შევძელით. ეს შეძლო აღმაშენებლის ჯარმა.

ამიტომაც, მჯერა, რომ ჩვენ ეს შეგვიძლია!