Batumelebi

დღეს, 8 სექტემბერს, „სამართლიანი არჩევნებისა და დემოკრატიის საერთაშორისო საზოგადოებამ“ (ISFED) საქართველოს პარლამენტის 2020 წლის არჩევნების წინასაარჩევნო მონიტორინგის მესამე შუალედური ანგარიში წარმოადგინა.

ანგარიშში  განხილულია 2020 წლის 4 აგვისტოდან 5 სექტემბრის ჩათვლით პერიოდი, აგრეთვე მოვლენები, რომელთა განვითარება 4 აგვისტომდე დაიწყო.

ISFED-ის დაკვირვებით, საანგარიშო პერიოდში გამოვლინდა:

• ამომრჩეველთა სავარაუდო მოსყიდვის 17 ფაქტი;
• წინასაარჩევნოდ, ამომრჩევლის ფართო მასების გულის მოსაგებად ხელისუფლების მიერ ინიცირებული 2 პროექტი;
• სავარაუდოდ, პოლიტიკური ნიშნით სამსახურიდან გათავისუფლების 3 შემთხვევა;
• სავარაუდოდ, პოლიტიკური ნიშნით განხორციელებული ზეწოლა/მუქარის 4 შემთხვევა;
• სავარაუდოდ, პოლიტიკური ნიშნით ფიზიკური ძალადობის 1 შემთხვევა;
• ადმინისტრაციული რესურსის სავარაუდო გამოყენების 18 შემთხვევა;
• ეკლესიის წინასაარჩევნო კამპანიაში ჩარევის 6 შემთხვევა;
• მედიის საქმიანობისთვის სავარაუდო ხელის შეშლის 2 შემთხვევა;
• ასევე, პოლიტიკური შინაარსის პლაკატების დაზიანების შემთხვევები 13 მუნიციპალიტეტში.

პოლიტიკური ნიშნით სამსახურიდან გათავისუფლება

სამსახურიდან, სავარაუდოდ პოლიტიკური ნიშნით გათავისუფლებასთან დაკავშირებით ანგარიშში მოხვდა  პოლიტიკური პარტია „ლელოს“  შუახევის შტაბის ხელმძღვანელის ზვიად დაიასამიძის ამბავიც.  ის „ხულოში წმინდა აბუსერიძე ტბელის სახელობის სკოლაში“ მუშაობდა ისტორიისა და სამოქალაქო განათლების მასწავლებლად და ამავე სკოლაში – დირექტორის მოადგილედ  სასწავლო აღმზრდელობით დარგში.

„ბათუმელებთან“ საუბარში ზვიად  დიასამიძე ამბობს, რომ  სკოლიდან წამოსვლის გადაწყვეტილება თვითონ მიიღო.  „არჩევანის წინაშე დამაყენეს. მითხრეს, რომ ან სკოლაში უნდა ვყოფილიყავი ან პოლიტიკაში. გადაწყვეტილება მივიღე და სკოლიდან წამოვედი“ – ამბობს ის.

კითხვაზე, სკოლის დირექტორისთვის მიუღებელი იყო ზოგადად მისი, როგორც პედაგოგის პოლიტიკური აქტიურობა თუ ოპოზიციურ პარტიაში ყოფნა, ზვიად დაიასამიძე ამბობს, რომ „უფრო პოლიტიკური შეხედულებები“.

მან სკოლა 1 სექტემბერს საკუთარი განცხადების საფუძველზე დატოვა.

როგორც ზვიად დიასამიძე ამბობს, ის სკოლაში მუშაობის დაწყებამდე შუახევის გამგეობაშიც მუშაობდა გამგებლის მოადგილედ  და „ქართული ოცნების “ შტაბშიც, წინა საპარლამენტო არჩევნების დროს.  „თუმცა შემდეგ განცხადება დავწერე და იქედანაც წამოვედი“ – ამბობს დიასამიძე.

მედიაზე ზეწოლა

აჭარასთან დაკავშირებით ISFED-ის ანგარიშში კიდევ ერთი ფაქტი მოხვდა. შემთხვევა უკავშირდება ჟურნალისტებისთვის ხელისშეშლის ფაქტს ქობულეთში, 5 აგვისტოს.

„ქობულეთში, ამომრჩეველთა სავარაუდო მოსყიდვის შესახებ გადასაღებად მისულ ტვ პირველის ჟურნალისტებს და გადამღებ ჯგუფს „ქართული ოცნების“ მხარდამჭერები აგრესიულად დახვდნენ, მიაყენეს სიტყვიერი და ფიზიკური შეურაცხყოფა. „სამართლიანი არჩევნების“ დამკვირვებელთან საუბრისას, ჟურნალისტმა ერეკლე ნოღაიდელმა განაცხადა, რომ მას ნამდვილად დაემუქრა მამუკა შათირიშვილი (რომელიც ბოსტნეულის დარიგებისას ინიშნავდა მისული პირების სახელ-გვარსა და პირად ნომერს) შემდეგი სიტყვებით „ქუჩაში გავლა არ გინდა?!” ასევე, ადგილობრივებმა, რომლებიც მონაწილეობდნენ ბოსტნეულის დარიგებაში, ჟურნალისტებს მოუწოდეს, რომ ინფორმაცია არ გაეშუქებინათ ტელევიზიით“ – ნათქვამია ანგარიშში.

ადმინისტრაციული რესურსის გამოყენება

აღნიშნულ ფაქტთან დაკავშირებით „ბათუმელებიც“ წერდა 31 აგვისტოს. საუბარია შემთხვევაზე, როცა პრემიერ-მინისტრმა გიორგი გახარიამ და თბილისის მერმა კახი კალაძემ ხელვაჩაურში „ქართული ოცნების” კანდიდატები წარადგინეს. წინასაარჩევნო შეხვედრა სამუშაო საათებში ჩატარდა და მას ხელვაჩაურის მუნიციპალიტეტის საჯარო მოხელეებიც ესწრებოდნენ.

„სამართლიანი არჩევნების“ წარმომადგენელმა რამდენიმე მათგანის ინდენტიფიცირება შეძლო, მათ შორის: მერიის საფინანსო – საბიუჯეტო სამსახურის უფროსი ტარიელ ნაკაშიძე, ადმინისტრაციული სამსახურის ხელმძღვანელი – მირზა ბახტაძე, განათლების და კულტურის სამსახურის ხელმძღვანელი – ქეთევან დევაძე“ – წერია ანგარიშში.

ამომრჩევლის მოსყიდვა

19 აგვისტოს პოლიტიკური გაერთიანება „ქართული იდეის“ თავმჯდომარე, ლევან ჩაჩუა საქართველოში რუსეთის საგარეო საქმეთა სამინისტროს მიერ დაფუძნებული „პრიმაკოვის სახელობის ქართულ-რუსული საზოგადოებრივი ცენტრის“ დირექტორთან, დიმიტრი ლორთქიფანიძესთან ერთად სტუმრობდა ხელვაჩაურში მცხოვრებ ფუტკარაძეების ოჯახს.

„ლევან ჩაჩუამ და დიმიტრი ლორთქიფანიძემ სხვა პირებთან ერთად ფუტკარაძეების ოჯახს საჩუქრად სამზარეულოს ინვენტარი, ავტომობილი, შინაური ცხოველები და სხვა მატერიალური ქონება გადასცეს. საჯაროდ გავრცელებული ინფორმაციით, ოჯახის დასახმარებლად, 45 000 ლარი რუსეთის მოქალაქემ გაიღო. ფაქტის ამსახველი ვიდეო მტკიცებულებები მოიპოვება როგორც „პრიმაკოვის ფონდის“ დირექტორის დიმიტრი ლორთქიფანიძის, ასევე, „ქართული იდეას“ თავმჯდომარის „ფეისბუქის“ პირად გვერდებზე“ – წერია ანგარიშში.

სავარაუდო მოსყიდვის კიდევ ერთ შემთხვევაზე ვკითხულობთ ანგარიშში:

„22 აგვისტოს, „სამართლიანი არჩევნების“ დამკვირვებელს ეწვია ც.დ., მეზობელი უბნიდან, რომელმაც განუცხადა, რომ პარტია „ქართული ოცნების“ დავალებით მოსახლეობის გამოკითხვას აწარმოებდა.

კითხვარში აღნიშნული იყო მოქალაქის სახელი, გვარი, მისამართი და ასევე გრაფა „პარტიული“, რაც პარტიის კოორდინატორის განმარტებით ნიშნავდა იმის აღნიშვნას, თუ ვისთვის აპირებს ამომრჩეველი ხმის მიცემას. როგორც ,,სამართლიანი არჩევნების” დამკვირვებელთან საუბრისას ც.დ.- მ განაცხადა, მას დავალებული ჰქონდა კარდაკარ გამოკითხვისას ჩაენიშნა შეჭირვებული ოჯახების სია, რომელსაც, მათი თანხმობის შემთხვევაში, მიაწვდის „ქართულ ოცნებას” და, ამის შემდეგ, პარტია ამ ოჯახებს მედიკამენტებს და სხვა ფასიან საჩუქრებს გადასცემს“.

კიდევ ერთ შემთხვევაზეა საუბარი ანგარიშში.  კერძოდ, 5 აგვისტოს ქობულეთში   „ქართული ოცნების“ მიერ ბოსტნეულის უსასყიდლოდ დარიგების შესახებ.

„სამართლიანი არჩევნების“ დამკვირვებელთან საუბრისას, ქობულეთის მუნიციპალიტეტის მერიის აპარატის უფროსმა განაცხადა, რომ ბოსტნეულის, კერძოდ, ქობულეთის სასათბურე მეურნეობაში მოყვანილი პროდუქციის, დარიგება აჭარის სოფლის მეურნეობის პროგრამით განხორციელდა. მისივე თქმით, ქობულეთში მერის წარმომადგენელმა დავით ზოიძემ, რომელსაც დაევალა დახმარების გადანაწილება ადგილობრივ მოსახლეობაზე, აღნიშნული პროდუქცია მამის კუთვნილ ფართში დაასაწყობა და იქედან გასცემდა. რადგანაც დავით ზოიძის მიერ არ იქნა ახსნილი მოსახლეობისათვის დახმარების წყარო და მიზანი, ადგილობრივებმა ეს „ქართულ ოცნებას“ დაუკავშირეს“ – ნათქვამია აღნიშნულ ანგარიშში.

იმისათვის, რომ საარჩევნო პერიოდში არ მოხდეს ამომრჩევლის მოსყიდვა და კანონდარღვევა, აღნიშნული ორგანიზაციები ხელისუფლებას და პოლიტიკურ პარტიებს გარკვეულ რეკომენდაციებს აძლევენ.

ორგანიზაციის რეკომენდაციები მიმართულია სასულიერო პირების მიმართაც, სადაც ნათქვამია, რომ სასულიერო პირებმა თავი უნდა შეიკავონ პოლიტიკური პარტიებისა და კანდიდატების წინასაარჩევნო ღონისძიებებსა და აგიტაციაში მონაწილეობისაგან.

___________

კადრი 31 აგვისტოს ხელვაჩაურში გამართული შეხვედრის ამსახველი ვიდეომასალიდან.

საქართველოს ფინანსთა სამინისტროს საგამოძიებო სამსახურის ინფორმაციით, სამეგრელო-ზემო სვანეთის სამმართველოს თანამშრომლებმა, სამეგრელოს რეგიონში, მარკირებას დაქვემდებარებული განსაკუთრებით დიდი ოდენობით აქციზური საქონლის, აქციზური მარკის გარეშე შენახვის ფაქტზე, ერთი პირი დააკავეს.

„გამოძიებით დადგენილია, რომ ბრალდებული, თავის საცხოვრებელ სახლში, შემდგომი რეალიზაციის მიზნით, ინახავდა განსაკუთრებით დიდი ოდენობით უაქციზო საქონელს. ჩხრეკის შედეგად ამოღებულია 7 160 კოლოფი უაქციზო სიგარეტი, რომლის  ღირებულება 29 000 ლარს აღემატება“ , – აცხადებს საგამოძიებო სამსახური.

გამოძიება მიმდინარეობს საქართველოს სისხლის სამართლის კოდექსის მე-200 მუხლის   მე-3 ნაწილით, რაც სასჯელის სახით ითვალისწინებს თავისუფლების აღკვეთას 6-დან 8 წლამდე ვადით.

„მოძრაობა ხალხისთვის” დამფუძნებელი ანა დოლიძე ფეისბუქის ოფიციალურ გვერდზე ბათუმელი ძაღლის, „კუპატას“ ფოტოს აქვეყნებს და წერს, რომ მათი პარტიის პრემიერობის კანდიდატი „კუპატა“ იქნება.

„მეგობრებო, კამპანია დაწყებული არ იყო ერთი გამოხტა პრემიერობა მინდაო. რა დროს პრემიერობაა, ჯერ არჩევნებია მოსაგები. ბოლოს ჩვენ ვითათბირეთ და წარვადგენთ ნამდვილად ღირსეულ კანდიდატს. მხარი დაუჭირეთ, უალტერნატივოა“ – ვკითხულობთ ანა დოლიძის გვერდზე.

See more

2020 წლის არჩევნებზე ანა დოლიძე თბილისში, დიდუბე-ჩუღურეთის რაიონში მაჟორიტარობის კანდიდატია.

არასამთავრობო ორგანიზაცია „ფემინა“ ძალადობის მსხვერპლი და უკიდურესად ღარიბი ქალების დასახმარებლად 1 წლის წინ შეიქმნა. ფონდი ფემინა კი სულ 2 თვეა რაც არსებობს. მოხალისეები ყოველთვიურად რიცხავენ სიმბოლურ 1 ლარს, რითაც ,,ფემინა“ შეჭირვებულ და ძალადობის მსხვერპლ ქალებს ეხმარება.

„ორგანიზაცია მოხალისეობრივ პრინციპზეა დაფუძნებული. ჩვენი ფსიქოლოგები და იურისტები სრულიად უსასყიდლოდ უწევენ კონსულტაციას ქალებს. მათ უნდათ რაღაც გააკეთონ ქალებისთვის და ჩვენ მათ ვაძლევთ ამის საშუალებას.

თავდაპირველად ვუწევდით იურიდიულ და ფსიქოლოგიურ დახმარებას, ვისაც ეს სჭირდებოდა, თუმცა ქალები ხშირად გვეკითხებოდნენ, გვქონდა თუ არა სოციალური სერვისებიც. ჩვენივე სახსრებით და სოცქსელებში დაანონსებული აქციებით ვაგროვებდით სხვადასხვა საჭიროების მქონე ქალებისთვის ბინის ქირის, მედიკამენტების, საკვების თანხას. მერე ფონდის იდეა მოგვივიდა და ორ თვეში უკვე 8 ქალს დავეხმარეთ. თანხის ყველაზე დიდი ნაწილი გაიცა ჯანმრთელობის, მათ შორის რეპროდუქციული და სექსუალური ჯანმრთელობის ხელშესაწყობად, მედიკამენტებისთვის, ბინის ქირის თანხაც შეგროვდა 2 ქალისთვის. სამომავლოდ ვაპირებთ ქალთა განათლების ხელშეწყობისკენაც მივმართოთ ფინანსური სახსრები და იმ სტუდენტ გოგოებს, რომელთა ოჯახებსაც არ აქვთ ამის შესაძლებლობა, სწავლის საფასურის 30, 40%-იანი თანადაფინანსებით მაინც დავეხმაროთ“, – ამბობს არასამთავრობო ორგანიზაცია „ფემინას“ დამფუძნებელი ნინო ბაისონაშვილი.

დახმარებისთვის ქალები „ფემინას“ სპეციალური აპლიკაციის საშუალებით მიმართავენ, შემდეგ კი მათ საჭიროების მიხედვით აკავშირებენ ფსიქოლოგებსა და იურისტებთან.

„თუ ქალებს ერთმანეთის მიმართ ემპათია არ გვექნება, ძალიან გაგვიჭირდება აღმოვფხვრათ სხვადასხვა ფორმით ღია თუ დაფარული ძალადობა ქალების მიმართ. ჩვენ არ ვაგროვებთ მხოლოდ ფულს. ჩვენ ვაგროვებთ და გავცემთ ფულის საშუალებით თანადგომას, ემპათიას, სოლიდარობას და ვაძლიერებთ, ვაფართოებთ ქალ დონორთა წრეს. ეს ნიშნავს, რომ დღეს შენ გეხმარებიან, ხვალ კი შენ უნდა დაეხმარო. ეს ერთგვარი სოციალური პასუხისმგებლობაა იმ საზოგადოებაში, სადაც ქალების მიმართ ემპათია ძალიან დაბალია“, – ამბობს ნინო ბაისონაშვილი.

„ფონდი „ფემინა“ ფულს არ გასცემს ხელზე, ის თავად აფინანსებს ბენეფიციართა საჭიროებებს აპლიკანტების მიერ მოწოდებული ინფორმაციის საგულდაგულოდ გადამოწმების შემდეგ.

ფონდის საქმიანობა ღია და საჯაროა, პროცესი კი – სრულიად გამჭვირვალე“, – წერია ფონდის საქმიანობის აღწერაში.

ძალადობის მსხვერპლი და უკიდურესად ღარიბი ქალების დახმარების მსურველები ფონდ ფემინას ანგარიშზე:  GE32TB7664836020100005  ყოველთვიურად ავტომატურად რიცხავენ 1 ლარს, ან სურვილისამებრ ნებისმიერი ოდენობის თანხას.

„დაისეტყვა თუ არა ჩვენი ბაღები, მაშინვე მოვიდნენ მერიიდან, ფოტოები გადაუღეს ყველაფერს და წავიდნენ… მერე სოფლის რწმუნებულმა მითხრა, იქნება დახმარებაო. არ ვიცი, მივიღებთ თუ არა რამეს, არავინ მოსულა, არ გამიგია, ვინმეს მიეღოს,“ – ამბობს ხულოში, სოფელ მთისუბანში მცხოვრები ნანა შაინიძე. ასობით ოჯახი ხულოში, შუახევსა და ქედაში სეტყვის შედეგად დაზარალებული მოსავლის კომპენსაციას ელის. ძლიერი სეტყვა ხულოს, შუახევისა და ქედის რამდენიმე სოფელში 14 და 15 ივნისს მოვიდა.

„…ისეთი სეტყვა იყო, არაფერი ჩანდა,“ – გვიყვება ნანა შაინიძე მთისუბნიდან. -„როცა გავიხედე გარეთ, სულ განადგურებული იყო ყველაფერი, ვტიროდი… არც ლობიო მოვიდა, არც პომიდორი, კიტრი, კარტოფილიც დაზიანდა, ხილიც არაა, ვყიდულობთ ხილს, მაგრამ რამდენს იყიდი? ჩემი შვილები ერთი მეორეკლასელია, მეორე – 5 წლის, სოციალური დახმარებაც ახლა შეჩერებული გვაქვს.“

ხულოს მერიის პრესცენტრში განმარტავენ, რომ ზარალი უკვე დათვლილია და ოჯახები მალე მიიღებენ კომპენსაციას. აქ ვერ დაგვიკონკრეტეს, რატომ არ აღმოჩნდა საკმარისი თითქმის 3 თვე ზარალის დასათვლელად და კომპენსაციის გასაცემად.

ხულოს მერიის პრესცენტრის ინფორმაციით, ხულოს სოფლებში სეტყვის შედეგად 587 ოჯახი დაზარალდა, კიდევ სამი ოჯახი კი – ქარიშხლისგან. სეტყვისგან დაზარალებულები სარეზერვო ფონდიდან ჯამში 235 909 ლარს მიიღებენ, ქარიშხლისგან დაზარალებულები – 11 306 ლარს.

კომპენსაცია არ მიუღიათ ქედაშიც. აქ დანდალოში, ხარაულაში, ტაკიძეებსა და ჯალაბაშვილებში მცხოვრები ოჯახები დაზარალდნენ სეტყვისგან. ქედის მუნიციპალიტეტის მერი, ლევან გორგილაძე ვერ ამბობს, კონკრეტულად როდის მიიღებენ კომპენსაციას დაზარალებულები. მისი თქმით, ამ დრომდე ტექნიკური დეტალები ზუსტდება.

„ზარალის დათვლის პროცესი უკვე დასრულებულია. ჯამში სარეზერვო ფონდიდან უნდა გამოიყოს 260 ათას ლარამდე და ახლა ზუსტდება ტექნიკური დეტალები – ანგარიშის რომელ ნომერზე უნდა ჩაერიცხოს თანხა, შესაბამისად, უახლოეს მომავალში ეს ოჯახები დახმარებას მიიღებენ,“ – გვითხრა ქედის მერმა, ლევან გორგილაძემ.

სეტყვის შედეგად შუახევში ძირითადად ორ სოფელში დაზარალდნენ. შუახევის მერიის პრესცენტრის ინფორმაციით, 199 ოჯახს უკვე მისცეს კომპენსაცია – ჯამში 70 637 ლარი.

შინაგან საქმეთა სამინისტროს საგანგებო სიტუაციების მართვის სამსახურის განცხადებით, დღეს, 7 სექტემბერს, შავი ზღვის მთელს სანაპიროზე 3-4-ბალიანი შტორმი ფიქსირდება, რის გამოც ზღვაში ბანაობა აკრძალულია.

„ყველა სამაშველო კოშკურაზე აღმართულია წითელი ალამი, რაც ზღვაში შესვლის აკრძალვის დროებითი მანიშნებელია.

პარტია „მოქალაქეებმა“, რომლის ლიდერი ალეკო ელისაშვილია, აჭარაში მაჟორიტარი დეპუტატობის კანდიდატები წარადგინა.

საქართველოს პარლამენტში პარტიის მაჟორიტარი დეპუტატობის კანდიდატი ბათუმიდან იქნება გენრი დოლიძე, აჭარის უმაღლეს საბჭოში კი – გიორგი მასალკინი. რაც შეეხება მაღალმთიანი აჭარის მაჟორიტარობის დეპუტატობის კანდიდატს, ალეკო ელისაშვილმა ამ პოზიციაზე გიორგი გაბაიძე დაასახელა. პარტიას არ დაუსახელებია მაჟორიტარობის კანდიდატი ქობულეთში.

„ჩვენს პოლიტიკურ ორგანიზაციაში ერთადერთი დიდი პოლიტიკური გამოცდილების ადამიანი არის გიორგი მასალკინი, დანარჩენი ყველანი დამწყებები ვართ და ამიტომაც გვჯერა, რომ უკეთესად გამოგვივა, იმიტომ, რომ არ ვივლით იმ გატკეპნილ გზებზე, რომლითაც სხვა პარტიები დადიან. ძირითადად ვერიდებით ცნობად სახეებს, რადგან ეს ცნობადობა ხშირ შემთხვევაში ძალიან ცუდ რელსებზე დგას, ამიტომ გვინდა ახალი, წესიერი, კვალიფიციური, ამ ქვეყანაზე თავზეხელაღებულად შეყვარებული ხალხი“, – აღნიშნა ალეკო ელისაშვილმა აჭარის საზოგადოებრივ მაუწყებელთან.

ბათუმში ხმათა უმრავლესობის მოპოვებას და საქართველოს პარლამენტში მაჟორიტარი დეპუტატის მანდატის მოპოვებას შეეცდებიან შემდეგი კანდიდატები: რესან კონცელიძე [„ქართული ოცნება“], ლევან ვარშალომიძე [„ნაციონალური მოძრაობა“], იაგო ხვიჩია [„გირჩი“], გენრი დოლიძე [„მოქალაქეები] და ზაურ გაბაიძე [„პატრიოტთა ალიანსი“].

აჭარის უმაღლეს საბჭოში ბათუმის საარჩევნო ოლქში მაჟორიტარი დეპუტატობის კანდიდატები არიან: ტიტე აროშიძე [„ქართული ოცნება“], გიორგი კირთაძე [„ნაციონალური მოძრაობა“], გიორგი მასალკინი [„მოქალაქეები“] და ჯუმბერ ტაკიძე [„პატრიოტთა ალიანსი“].

მაჟორიტარი დეპუტატობის კანდიდატების ჩამონათვალი არასრულია, რადგან პარტიების ნაწილს ჯერ არ დაუსახელებია კანდიდატები, მათ ამისათვის ვადა სექტემბრის ბოლომდე აქვთ.

საქართველოს პარლამენტისა და უმაღლესი საბჭოს არჩევნები წელს 31 ოქტომბერს გაიმართება.