აჭარის ჯანდაცვის სამინისტრო 300 ცალ გვამის ჩანთას ყიდულობს. უწყება აცხადებს, რომ ეს კოვიდ 19-ით გარდაცვლილთა გვამებისთვის სჭირდება და გადაუდებელი აუცილებლობის გამო ტენდერის გარეშე შეისყიდის. შესყიდვის სავარაუდო ღირებულება 9 000 ლარია.
სამინისტროს ინფორმაციით, ტენდერით შესყიდული გვამის ჩანთების რაოდენობა არასაკმარისი აღმოჩნდა. ამ ტენდერით კი, სამინისტრომ, 2020 წლის 9 სექტემბერს, გვამის 150 ჩანთა შეისყიდა.
„ჯანდაცვის სამინისტროს და დაავადებათა კონტროლის ეროვნული ცენტრის მიერ შემუშავებული რეკომენდაციებისა და კოვიდ 19-ით გარდაცვლილთა დაკრძალვის წესის თანახმად, ვირუსის გავრცელების თავიდან ასაცილებლად, გარდაცვლილი თავსდება გვამის ჩანთაში. COVID19 ინფექციით გამოწვეული ეპიდემიოლოგიური მდგომარეობის გაუარესების გამო აჭარის ავტონომიურ რესპუბლიკაში კორონავირუსით გარდაცვლილთა რაოდენობის მაჩვენებელი გაიზარდა, რისთვისაც არასაკმარისი აღმოჩნდა ელექტრონული ტენდერით შესყიდული რაოდენობა და დადგა საჭიროება შესყიდვისა“, – აღნიშნულია განაცხადში, რომლითაც სამინისტრომ შესყიდვების სააგენტოს მიმართა.
პოტენციურ მიმწოდებლებთან გამართული მოლაპარაკებების შედეგად დადგენილია, რომ შესასყიდი საქონლის მოსაწოდებლად საჭიროა ხელშეკრულების დადებიდან 5 დღე – აცხადებენ სამინისტროში.
აჭარაში, 9 ნოემბრის მდგომარეობით, ბოლო 24 საათში კორონავირუსის 411 ახალი შემთხვევა დაფიქსირდა. ამ ვირუსით კი 5 ადამიანი გარდაიცვალა.
აჭარის ჯანდაცვის სამინისტროს ინფორმაციით, პანდემიის გავრცელებიდან დღემდე აჭარაში კორონავირუსით სულ 193 ადამიანი გარდაიცვალა.
