ბათუმში მუნიციპალური ტრანსპორტი 21 საათამდე იმუშავებს – მერია

დღეს, 9 ნოემბერს, ბათუმში, ისევე, როგორც საქართველოს სხვა დიდ ქალაქებში, 22:00 საათიდან 05:00 საათამდე იზღუდება როგორც ქვეითად, ისე სატრანსპორტო საშუალებებით გადაადგილება.

ბათუმის მერიის ცნობით, შეზღუდვების გათვალისწინებით, ბათუმში მუნიციპალური ავტობუსები და სამარშრუტო ტაქსები მუშაობას 21:00 საათზე დაასრულებენ.

ასევე, მერიის განცხადებით, ბათუმში დასუფთავების სამსახური შესაბამის სამუშაოებს 21:00 საათამდე შეასრულებს. რაც შეეხება „ბათუმის წყლის“ ტექნიკურ სამსახურებს, მათი მუშაობის გრაფიკი არ იზღუდება. გადაუდებელი გამოძახების შემთხვევაში რეაგირება ხორციელდება სემეკთან არსებული შეთანხმების შესაბამისად.

შეზღუდვის დროს მუდმივი გადაადგილების საშვის მისაღებად კომპანიებმა უნდა მიმართონ დარგობრივ უწყებებს, ხოლო მუნიციპალიტეტთან დაკავშირებული საკითხების თაობაზე – მუნიციპალურ ინსპექციას ნომერზე – 577539485. ერთჯერადი გადაუდებელი საშვის ასაღებად მოქმედებს ცხელი ხაზი 144-1.