Batumelebi

დაავადებათა კონტროლის ეროვნული ცენტრის ხელმძღვანელის განცხადებით, კორონავირუსის საწინააღმდეგო ვაქცინის – „ფაიზერის“ დოზების შემოტანა იმაზე იქნება დამოკიდებული, თუ რამდენად იქნება მოთხოვნა ვაქცინაზე.

„მილიონი დოზის შემოტანაზე ხელი მოწერილი გვაქვს, პირველი ეტაპი დაიწყება ივლისის მეორე ნახევარში, თუმცა „ფაიზერი“ დაგვაკვირდება, თუ რამდენად აქტიური იქნება ვაქცინაციის პროცესი და ამის შემდეგ გადაწყდება დანარჩენი დოზების მოწოდების კონკრეტული თარიღებიც“, – ამბობს ამირან გამყრელიძე.

ამ ეტაპზე, როგორც გამყრელიძე ამბობს, უნდა გაძლიერდეს საინფორმაციო კამპანია ვაქცინაციის აუცილებლობაზე, რადგან დღევანდელი მონაცემებით, გაზრდილია კოვიდით ინფიცირების შემთხვევები, მათ შორის, ბავშვებში.

ჟურნალისტებმა ამირან გამყრელიძეს ჰკითხეს კოვიდპასპორტის შტრიხკოდების თაობაზეც, რომელიც ზოგიერთ ქვეყანაში სისტემამ ვერ წაიკითხა.

გამყრელიძე ამბობს, რომ მსგავსი შემთხვევების შესახებ აქამდე არ სმენია. „შტრიხკოდი რომ ვერ წაიკითხონ, ფურცელზე მითითებულია მოქალაქის მონაცემები, ვაქცინის სახელწოდება და ის, რომ ორჯერ არის აცრილი, ამიტომ ეს პრობლემა არ უნდა იყოს“, – ამბობს გამყრელიძე.

ამ პერიოდში ვაქცინაცია შესაძლებელია როგორც დაჯავშნით, ასევე ჯავშნის გარეშე კლინიკებში.

ყველა ვიდეოში მღერის, ცეკვავს ან ხუმრობს. ყველა ფოტოზე იცინის. აგერ ჯერ კიდევ გაზაფხულზე გადაღებული ვიდეოც, მეგობრებთან ერთადაა, ზღვისპირა, მყუდრო კაფეში ყველა ერთად ცეკვავს და ყველა ბედნიერია. მანოც აქვეა, მისი შეყვარებული. სულ, სულ ერთად ცეკვავენ ვიდეოში და ათას რამეზე იცინიან.

დათო ჭიპაშვილის, იგივე ჭიპასთვის, რას არ აკეთებენ მეგობრები. შექმნეს სპეციაური გვერდი ფეისბუქზე: ჭიპასთვის ყიდიან საკუთარ ნახატებს, ხელნაკეთ ნივთებს, სტარტაპერები თავიანთი პროდუქტების გაყიდვების ნაწილს ურიცხავენ ჭიპას, ნათესავები, მეზობლები, მეგობრები – ყოველდღე, ვისაც რა და რამდენი აქვს იმდენს აგროვებს ჭიპასთვის, 26 ბიჭისთვის, რომელიც მაშინაც ხუმრობს და იცინის, როცა მთელი სხეულის გადასაღებად მაგნიტორეზონანსული ტომოგრაფიის აპარატში წვება და ნელი სვლით შეჰყავთ გვირაბში – შემდეგი გამოკვლევისთვის.

4 თვის წინ ჭიპას და მანოს ცხოვრება სულ სხვანაირი იყო. ერთად ცხოვრებას გეგმავდნენ, ჭიპას სტარტაპის იდეა ჰქონდა და ერთად უნდა დაეწყოთ საქმე, მაგრამ მხარზე უეცრად გაჩენილმა წანაზარდმა ყველაფერი თავდაყირა დააყენა.

26 წლის დათო ჭიპაშვილს 4 თვის წინ ბიფაზურ-სინოვიალური სარკომა დაუდგინდა, მე-3 სტადია. ოპერაცია ბათუმში გაუკეთეს, მაგრამ მალევე რეციდივი გამოვლინდა და ზუსტად იმავე ადგილას წანაზარდი ისევ გაჩნდა.

ჭიპა ახლა სტამბოლში, კლინიკა აჯიბადემშია მანოსთან და დედასთან ერთად. ჩაუტარდა საჭირო კვლევები და ექიმებმა დაადგინეს, რომ მალე კიდევ ერთი ოპერაცია სჭირდება. ოპერაცია 85 ათასი დოლარი ღირს და 20 დღეში უნდა გაკეთდეს.

„თავიდან გვეგონა, რომ მაქსიმუმ 25 ათასი დოლარი იქნებოდა საჭირო. გვეგონა, ამას ახლობლებიც შევაგროვებდით. გავაკეთეთ დახურული ჯგუფი, სადაც მეგობრები, ნათესავები, ოჯახის ახლობლები ვიყავით მხოლოდ და ასე ვაგროვებდით თანხას.

თუმცა ექიმებმა გვითხრეს, რომ ეს საკმარისი არაა და 85 ათასი დოლარია საჭირო. დამოუკიდებლად ვეღარ შევძლებდით ამ რესურსის მოგროვებას და საჯარო, ღია ჯგუფი გავაკეთეთ ფეისბუქზე, რომელსაც ჰქვია „ჭიპასთვის“.  რამდენიმე დღეა დავიწყეთ ეს კამპანია, ვისაც როგორ შეუძლია ყველა ეხმარება დათოს. სხვადასხვა ქალაქში ყუთებით დადიან, აწყობენ გარე ვაჭრობას და ბევრი ვინმე ცდილობს გააკეთოს თუნდაც მცირედი, რომ ეს თანხა შეგროვდეს. დრო გვაქვს ძალიან, ძალიან ცოტა“, – ამბობს მანო როხვაძე.

უკვე ერთი კვირაა, რაც ფეისბუქზე დათო ჭიპაშვილის სიცოცხლის გადასარჩენად მისმა მეგობრებმა შექმნეს გვერდი „ჭიპასთვის“. გვერდზე ყოველდღიურად უამრავი პოსტი იდება, უამრავი ადამიანი გულშემატკივროს 26 წლის დათოს, რომ იცოცხლოს, ისევ იცინოს, თურქეთიდან ჯანმრთელი დაბრუნდეს და დაიბრუნოს 4 თვის წინანდელი, უდარდელი და სიცოცხლის ხალისით სავსე ყოფა – 85 ათას დოლარად.

___

თიბისი ბანკი:

GE02TB7285736515100024

საქართველოს ბანკი:

GE11BG0000000162629357

ლიბერთი ბანკი:

GE14LB0711171882575000

ასევე შეგიძლიათ გადარიცხოთ საქართველოს ბანკის Plus ქულები პირადი ნომრით: 01019075333

ასევე თანხის გადარიცხვა შეგიძლიათ „თიბისიდან“ ან „საქართველოს ბანკიდან“ პირადი ნომრითაც ნებისმიერ ანგარიშზე: 01019075333

დაგვემატა Paypal საერთაშორისო გზავნილებისთვის – თანხა შეგიძლიათ გადმორიცხოთ paypal-ის ექაუნთებიდან: https://www.paypal.me/tchipastvis

9 ივლისის მონაცემებით, აჭარაში კორონავირუსის 74 ახალი შემთხვევა დადასტურდა.

მთავრობის ოფიციალური მონაცემებით, აჭარის კოვიდკლინიკებში 152 ადამიანი მკურნალობს, მათგან 4 ხელოვნური სუნთქვის აპარატზე იმყოფება.

რეგიონის კოვიდსასტუმროებში 204 ადამიანია მოთავსებული. თვითიზოლაციაშია 676 ინფიცირებული.

9 ივლისის მონაცემებით, საქართველოში კორონავირუსის 1108 ახალი შემთხვევა დადასტურდა. ბოლო 24 საათში ქვეყნის მასშტაბით ჩატარდა 23 895 კვლევა ტესტით.

გასულ დღე-ღამეში საქართველოში 7 ადამიანი გარდაიცვალა კოვიდით.

გომისმთაზე მასპინძლები უკვე დაბრუნდნენ, კოტეჯების ფანჯრები შეაღეს, დასასუფთავებელი დაასუფთავეს და შესაკეთებელი შეაკეთეს, ხელი შეავლეს ყველაფერს, რომ დამსვენებელს მომზადებულები დახვდნენ.

მასპინძლების თქმით, ტურისტები გამოჩნდნენ, თუმცა ჯერ კიდევ ბევრი კოტეჯია თავისუფალი. სეზონი გომისმთაზე  აქტიურად ახლა იწყება.

კოტეჯები 2-3 საძინებელს, მისაღებ ოთახს, სამზარეულოს და სველ წერტილებს მოიცავს, არის სამსაძინებლიანი სახლებიც, თუმცა ფართობი არ გულისხმობს, რომ სახლის დაქირავების შემთხვევაში დამსვენებელთა რაოდენობა ლიმიტირებული არ იქნება.

გომის მთაზე ოთახის დღიურად დაქირავების ფასი ერთ ადამიანზე 20-30 ლარია. იმ შემთხვევაში, თუ კოტეჯს ოჯახი ხანგრძლივად ქირაობს, ოთხ ადამიანზე დღიური ფასი 150 ლარიდან 300 ლარამდე მერყეობს. ზოგჯერ ღირებულება იმაზეცაა დამოკიდებული, რამდენად დიდ და კომფორტულ გარემოს ახვედრებს მასპინძელი დამსვენებელს.

ფიქრია ხოროზანიშვილი გომის მთაზე ორსართულიან სახლს აქირავებს:

„კოტეჯი არ არის, სახლია. შესაბამისად, საძინებლებიც დიდია – 20 კვ.მ-ია ერთი საძინებელი. არის ცხელი წყალი, გაზი, ჭურჭელი და თეთრეული“. ამ კოტეჯის ფასი 4 დამსვენებლის შემთხვევაში დღიურად 150 ლარია, ხოლო 4-ზე მეტის შემთხვევაში – 200 ლარი ან მეტი [დამსვენებლების რაოდენობის მიხედვით].

თითქმის იდენტური პირობებით აქირავებს ორსართულიან სახლს ნონა გოგმაჩაძე. განსხვავება მხოლოდ ის არის, რომ საძინებლები იზოლირებული არ არის და მეორე საძინებელში გასასვლელად საძინებლის გავლა გიწევს. „ასევე მაქვს ძალიან დიდი ეზო, ლამაზი ხედებით.“

ნონას თქმით ერთი დღით ჯგუფის მიერ კოტეჯის დაქირავების შემთხვევაში ფასი ერთ ადამიანზე 20 ლარია, ხოლო ოჯახი თუ იქირავებს,  ათი დღით ფასი 300 ლარია ივლისში, აგვისტოში კი – 500 ლარი.  ეს ფასი მოქმედებს 4-5-წევრიანი ოჯახის შემთხვევაში.

„ათი თუ შევა, 300 ლარად ვერ მივცემ, რადგან იზრდება წყლის, ელექტროენერგიის მოხმარება, რასაც ჩვენ ვიხდით“, – ამბობს ნონა.

ფასები თითქმის იდენტურია ბახმაროში. 1 ღამით კოტეჯის დაქირავება, სადაც ორი საძინებელი, ცხელი წყალი, სამზარეულო, მისაღები ოთახი და სველი წერტილი და ასევე, სარეცხი მანქანა დაგხვდებათ, 1-3 ადამიანზე 150 ლარია. ბახმაროში იმავე პირობების დაქირავება ორჯერადი კვებით ერთ ადამიანზე 40 დოლარი დაგიჯდებათ.

მზია აფრასიძის თქმით, წელს ბახმაროს კოტეჯებზე მოთხოვნა მაღალია: „უკვე ორჯერ მქონდა გაქირავებული. ბოლოს 2 ღამით 400 ლარად მქონდა გაქირავებული 4 ადამიანზე. 21-22 დღით 2000 ლარად ვაქირავებ“.

გომისმთისგან განსხვავებით ბახმაროში ავტოტრანსპორტი ყოველდღე მოძრაობს, არის ბაზარი და მაღაზიებიც. ბათუმიდან ბახმაროში სამარშრუტო ტაქსის ფასი 20 ლარია, თბილისიდან კი – 35 ლარი.

• ინფრასტრუქტურა – გზა, გადაადგილება ფასები

გომისმთაზე მასპინძლები ჩივიან, რომ „წელს დამსვენებელი ჭირს“, ამის ერთ-ერთ მიზეზად კი გადაადგილების პრობლემას ასახელებენ. გომისმთაზე ასვლა ორი გზით შეიძლება – ოზურგეთის მუნიციპალიტეტიდან და შუახევიდან.

ოზურგეთიდან მიმავალ გზაზე ახლა სარეაბილიტაციო სამუშაოები მიმდინარეობს და ამ გზაზე გადაადგილება დამსვენებლისთვის მხოლოდ შაბათ-კვირას არის შესაძლებელი.

„წლის განმავლობაში ერთი თვეა, როცა ჩვენთან დამსვენებელი ამოდის, არ შეიძლებოდა მთავრობას ეს არ  გაეთვალისწინებინა, რომ რაღაც შემოსავალი ჩვენც მიგვეღო?! 25 დღე მაინც გაჩერებულიყვნენ“, – ამბობს ფიქრია.

დედაქალაქიდან გომისმთამდე მანძილი 340 კმ-ია, ოზურგეთის ცენტრიდან კი – 33 კმ.  ოზურგეთიდან გომის მთის მიმართულებით კერძო ტრანსპორტი მხოლოდ შაბათ-კვირას მოძრაობს და ღირებულება 250 ლარია, ამ ფასად მძღოლს გომისმთაზე მიჰყავს ოჯახი და მიაქვს ტვირთიც, რომელიც დამსვენებელს სჭირდება.

შუახევიდან კი ფასი 300 ლარია. ეს გზა არ არის მოასფალტებული, თუმცა როგორც მძღოლები ამბობენ „ნორმალური გზაა“.

• სამედიცინო პუნქტი

გომისმთაზე ამბობენ, რომ მთავრობამ ვერ მოახერხა სამედიცინო პუნქტის ამოქმედება იმ ერთ თვეს მაინც , როცა კურორტზე დამსვენებელია. ამბობენ, რომ ბოლო 15 წლის განმავლობაში აქ ექიმი მხოლოდ ერთ სეზონზე მუშაობდა: „ ვერ მისცეს ალბათ ექიმს ისეთი ხელფასი, რომ 1 თვე მაინც აქ სპეციალისტმა იმუშაოს. ეს ჩვენთვის ძალიან მნიშვნელოვანია, რადგან ჩვენც მშვიდად ვართ და დამსვენებლისთვისაც იმედია.“

ბახმაროში კი სამედიცინო პუნქტი მოქმედია.

• მაღაზიები

გომისმთაზე ორი მაღაზია მოქმედებს, აქ მხოლოდ ძირითადი პროდუქტი იყიდება, არის ტკბილეული, სასმელები და ნაყინიც, თუმცა ეს ყველაფერი საკმაოდ ძვირია. დასასვენებლად ჩამოსული ოჯახები აქ თავიანთი პროდუქტით ადიან.

• პრობლემები დამსვენებელთან 

„დამსვენებლის დატოვებული სახლის დასუფთავებას 3 დღე სჭირდება“ – გვიყვება ფიქრია ხოროზანიშვილი. ის ამბობს, რომ ბედნიერია თუ დამსვენებელი უცხოელია, რადგან არც სახლში და არც ეზოში უცხოელები არც ნაგავს ახვედრებენ და არც დამტვრეულ ნივთებს. ფიქრია ძალიან სწუხს, რომ დამსვენებელი არ უფრთხილდება გარემოს, რომელსაც ქირაობს:

„რადგან ქირაობენ, ჰგონიათ, რომ თავზე უნდა დაიმხონ ყველაფერი. მხოლოდ ეზოს ნახევარ დღეს ვანდომებ, საზამთროს კანის ჩათვლით ყველაფერს ეზოში ტოვებენ.

ვერ წარმოიდგენთ რა მდგომარეობაში ტოვებენ სახლებს. ხანძარიც კი გააჩინეს ერთხელ კოტეჯში უყურადღებობის გამო. ამიტომ ვცდილობ ყოველთვის ახლოს კოტეჯში დავრჩე მე და მეთვალყურეობა გავუწიო. გვქონდა შემთხვევა, როცა დამსვენებლები მარშრუტკით ჩამოვიდნენ, აქვე ახლო კოტეჯში გაჩერდნენ ერთი ღამით, მეორე დღეს დილით წასულან ისე, რომ მესაკუთრეს არაფერი უთხრეს, ადგილზე რაც მოეწონათ, ყველაფერი წაიღეს“.

„სოკარ ჯორჯია გაზის“ ინფორმაციით, ბუნებრივი აირის მიწოდება ბათუმს უკვე შეუწყდა, თუმცა, ცალკეულ უბნებში ბუნებრივი აირის მიწოდება ისევ ფიქსირდება. „სოკარში“ აცხადებენ, რომ „ეს მილებში ჩარჩენილი გაზია“.

„ბათუმი-ხელვაჩაურის მკვებავი ცენტრალური მილის ურდული გადაკეტილია. სადღაც შეიძლება იყოს, მაგრამ ეს მილებში ჩარჩენილი გაზია“- ამბობს „სოკარ ჯორჯია გაზის“ აჭარის რეგიონული ოფისის დირექტორი ვახტანგ ბერიშვილი „ბათუმელებთან“.

მისი თქმით, ავტობანის მშენებლობის გამო, ახალი ცენტრალური მაგისტრალის დაერთების პროცესი ხვალ, 9 ივლისიდან დაიწყება.

„იმედია, ხვალ დასრულდება დაერთების პროცესი და შემდეგ დავიწყებთ ეტაპობრივ ჩართვას. 85 ათასი აბონენტია გათიშული, ეს არ არის ცოტა. ვნახოთ რა დრო დაგვჭირდება“, – ამბობს ვახტანგ ბერიშვილი.

„სოკარ ჯორჯია გაზი” აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

აჭარაში ევროპაში ყველაზე გრძელი, ორზოლიანი ზიპლაინი მოეწყობა – იუწყება აჭარის ტურიზმისა და კურორტების დეპარტამენტი.

1750 მეტრი სიგრძის ზიპლაინი ჩირუხის მთაზე, ზღვის დონიდან 2000 მეტრზე გაკეთდება.

აჭარის ტურიზმის დეპარტამენტის ტურისტული პროდუქტების განვითარების სააგენტოს მიერ მომზადებული პროექტის მიხედვით, ზიპლაინის ზედა სადგური ჩირუხის იალებში 2400 მეტრზე, ხოლო ქვედა სადგური 2060 მეტრზე განთავსდება.

„არწივის ფორმის, 10-მეტრიანი ზედა სადგურიდან ზიპლაინით დაშვების გარდა ვიზიტორებს ჩირუხის ულამაზესი პანორამული ხედების ნახვის საშუალება ექნებათ.

ტურისტული ინფრასტრუქტურა მოეწყობა ზიპლაინის ქვედა სადგურთან, სადაც მოსასვენებელი სივრცეებისა და კვების ობიექტის განთავსება იგეგმება.

ჩირუხის მთაში ზიპლაინისა და ტურისტული ინფრასტრუქტურის მოწყობისთვის აჭარის ფინანსთა და ეკონომიკის სამინისტრო 10 მილიონ ლარს დახარჯავს,“ – აღნიშნულია ინფორმაციაში.

8 ივლისის მონაცემებით, აჭარაში კორონავირუსის 59 ახალი შემთხვევა დადასტურდა.

მთავრობის ოფიციალური მონაცემებით, აჭარის კოვიდკლინიკებში 151 ადამიანი მკურნალობს, მათგან 5 პაციენტი ხელოვნური სუნთქვის აპარატზე იმყოფება.

რეგიონის კოვიდსასტუმროებში 204 ადამიანია მოთავსებული. თვითიზოლაციაშია 685 ინფიცირებული.

8 ივლისის მონაცემებით, საქართველოში კორონავირუსის 1043 ახალი შემთხვევა დადასტურდა. ბოლო 24 საათში ქვეყნის მასშტაბით ჩატარდა 31 229 კვლევა ტესტით.

გასულ დღე-ღამეში საქართველოში 20 ადამიანი გარდაიცვალა კოვიდით.

2021 წლის ტურისტულ სეზონზე ბათუმის ცენტრიდან მიუსაფარი ძაღლები ბათუმის ნაგავსაყარზე წაიყვანეს, ტურისტების თვალს მოარიდეს.

ამ ძაღლებს მართალია პატრონი არ ჰყავთ, მაგრამ ბევრ მათგანზე ბათუმელი ცხოველისმოყვარულები ზრუნავდნენ, მოქალაქეები, რომელთაც ეცოდებათ მიუსაფარი ცხოველები, ცდილობენ საკვები მიაწოდონ და საჭიროების შემთხვევაში უმკურნალონ კიდეც, საკუთარი სახსრებითა და სხვა ცხოველისმოყვარულების დახმარებით.

ქალაქის ცენტრიდან რომ მიუსაფარი ძაღლები მერიამ ნაგავსაყრელზე გადაიყვანა, ეს ბათუმელმა აქტივისტებმა დაახლოებით 10 დღის წინ შენიშნეს და ფეისბუქზე, ბათუმის მიუსაფარ ცხოველთა დახმარების ჯგუფში დაიგეგმა აქცია, რომლის მონაწილეებმაც გადაწყვიტეს ბათუმის ნაგავსაყარზე გასულიყვნენ, ენახათ მიუსაფარი ძაღლები, გამოეკვებათ და შეემუშავებინათ გეგმა მათ გადასარჩენად.

კვირას, 4 ივლისს, აქტივისტებს ბათუმის კოკისპირულმა წვიმამაც ვერ გადააფიქრებინა ნაგავსაყარზე წასვლა. ფოტომასალა, რომელიც მათ ნაგავსაყარზე გადაიღეს, შემზარავია. ასობით ჩონჩხადქცეული, დაავადებული ძაღლი ღია ცის ქვეშ ცხოვრობს ნაგავსაყარზე.

რა იქნება ახლა, მას შემდეგ, რაც ცნობილი გახდა ბათუმის ნაგავსაყარზე მყოფი ცხოველების შესახებ?

5 ივლისს, ბათუმის მერიის წინ, მოქალაქეები შეიკრიბნენ აქციაზე. ისინი მერიას ცხოველთა უფლებების დაცვას და კანონმდებლობის გამკაცრებას სთხოვენ.

აქციის მონაწილეებს მერის მოვალეობის შემსრულებელი, არჩილ ჩიქოვანი შეხვდა. აქტივისტების თქმით, მათ დაჰპირდნენ, რომ ნაგავსაყრელზე მონიტორინგის ჯგუფი შეისწავლის მდგომარეობას, პირველ რიგში კი შეიძლება გადაიხუროს ტერიტორია, რომ ცხოველების ყოფა მცირედით შემსუბუქდეს.

სანამ მერია კონკრეტულ ზომებს მიიღებს, ბათუმელი ცხოველისმოყვარულები ლოდინს არ აპირებენ. აქტივისტები უკვე მეორედ გავიდნენ ნაგავსაყრელზე ცხოველების გამოსაკვებად და შეიქმნა ჯგუფი ფეისბუქზე, რომელიც კონკრეტულად ბათუმის ნაგავსაყრელზე მყოფი ცხოველების დასახმარებლად შეიქმნა.

2021 წლის ივნისის დასაწყისში ცნობილი გახდა, რომ სამოქალაქო მოძრაობა „თბილისი პრაიდი“, რომელიც ჰომო და ტრანსფობიას უპირისპირდება, 1-5 ივლისს თბილისში „პრაიდის კვირეულის“ ორგანიზებას გეგმავდა. კვირეულის ფარგლებში იგეგმებოდა რუსთაველის გამზირზე „ღირსების მარშის“ გამართვა. „ჩვენ გვინდა სახელმწიფოს ჩვენი ხმა გავაგონოთ“, – აცხადებდნენ „თბილისი პრაიდის“ წევრები.

„თბილისი პრაიდის“ განცხადებიდან მალევე, 15 ივნისს, ახალდაფუძნებული პარტიის – „ერთობა, რაობა, იმედის“ ლიდერმა, მილიონერმა ლევან ვასაძემ განაცხადა, სახელმწიფოს 10 დღეს ვაძლევ იმისთვის, რომ დაანონსებული პრაიდი გააუქმოსო.

ვასაძის „ათდღიანი ვადა“ 25 ივნისს სრულდებოდა.

24 ივნისს „ერთობა, რაობა, იმედის“ თანაგუნდელებმა განაცხადეს, რომ პარტიის ლიდერი, ლევან ვასაძე თურქეთში იმყოფებოდა ჯანმრთელობის მდგომარეობის გამო, რადგან ვასაძე სუსტად გრძნობდა თავს და ამის მიზეზს საქართველოში ექიმები ვერ მიხვდნენ. 30 ივნისს ლევან ვასაძემ მიმართვა გაავრცელა, რომ 1-5 ივლისს, „პრაიდის კვირეულის“ დროს, ვერ იქნებოდა საქართველოში.

დაგეგმილ „პრაიდზე“ 29 ივნისს პირველი განცხადება გაავრცელა საქართველოს საპატრიარქომ და მიმართა ევროპარლამენტის ლგბტქ+  საკითხებზე მომუშავე ჯგუფს და საქართველოში აკრედიტებულ საელჩოებს, არ დაეჭირათ მხარი „თბილისი პრაიდისთვის“. ამავე განცხადებაში საპატრიარქომ მიმართა საქართველოს ხელისუფლებასაც და მოუწოდა, „ადეკვატურად“ შეეფასებინა ვითარება და აერიდებინათ „გარდაუვალი შფოთი“.

თუმცა ამ განცხადებამ ვერ იმუშავა ისე, როგორც ეს საპატრიარქოს სურდა.

მეტიც:

• 1-ელ ივლისს საქართველოს პრეზიდენტმა სალომე ზურაბიშვილმა განაცხადა, რომ პრაიდის მონაწილეებს აქვთ თავიანთი აზრის გამოხატვის უფლება
• გაეროს, ევროკავშირის, აშშ-სა და სხვა არაერთი დასავლური სახელმწიფოს საელჩოებმა საქართველოში, „პრაიდის კვირეულთან“ დაკავშირებით ერთობლივი განცხადება გაავრცელეს და ხელისუფლებას მოუწოდეს,  დაეცვა შეკრების თავისუფლება
• პარლამენტის თავმჯდომარემ კახა კუჭავამ განაცხადა, რომ სახელმწიფო ვალდებულია დაიცვას თითოეული მოქალაქის უსაფრთხოება
• 1-ელ ივლისს ჩატარდა „თბილისი პრაიდის“ ფარგლებში დაგეგმილი პირველი ღონისძიება, კინოჩვენება, სადაც მივიდნენ ჰომოფობიური აქციის მონაწილეები და ღონისძიების ჩაშლა ამაოდ სცადეს. ღონისძიება შედგა და პოლიციამ ძალადობრივი აქციის რამდენიმე მონაწილე დააკავა.

3 ივლისს საპატრიარქომ მორიგი განცხადება გაავრცელა.

ამჯერად საპატრიარქო ღიად გამოვიდა „ღირსების მარშის“ კონტრაქციის ორგანიზატორის როლში.

„5 ივლისს, 17 სთ.ზე, შევიკრიბოთ ქაშუეთის წმ.გიორგის ტაძართან, აღვავლინოთ ყოვლადწმინდა ღვთისმშობლის პარაკლისი და მსოფლიოს ვაჩვენოთ, რომ ჩვენ ჩვენს ღირსებას ვიცავთ და გადაგვარების თავსმოხვეული მცდელობა ჩვენთვის მიუღებელია“, – განაცხადა საპატრიარქომ.

4 ივლისს საქართველოს საპატრიარქოს საზოგადოებასთან ურთიერთობის სამსახურმა გაავრცელა განცხადება, რომ 5 ივლისს რუსთაველზე ბავშვებიც გამოვიდოდნენ.

5 ივლისს, დილიდანვე, თბილისში, რუსთაველის გამზირზე, გამოჩნდნენ ძალადობრივი ჯგუფები, ძირითადად აგრესიულად განწყობილი კაცები, რომლებიც უშვერად იგინებოდნენ. მათ შორის იყვნენ სასულიერო პირებიც.

ძალადობრივმა ჯგუფებმა დაარბიეს პარლამენტის წინ პროტესტის ნიშნად გაშლილი კარვები, რომლებსაც არაფერი აკავშირებდათ „თბილისი პრაიდის“ აქციასთან და პირდაპირ დაიწყეს აქციის გასაშუქებლად მისული ჟურნალისტების დევნა, ცემა, ქუჩაში თრევა და გინება.

დეკანოზმა სპირიდონ ცქიფურიშვილმა რუსთაველის გამზირზე შეკრებილ მოძალადეებს ღიად მოუწოდა ძალადობისკენ.

„ვალდებულები ხართ, იძალადოთ სამშობლოსთვის, იძალადოთ ღმერთისთვის, იძალადოთ სიწმინდისთვის“, — მიმართა მან რუსთაველის გამზირზე შეკრებილებს.

რუსთაველის გამზირზე, სადაც საპატრიარქოს მიერ მობილიზებული მოძალადე ჯგუფები ჟურნალისტებს სცემდნენ, პოლიციელების არასაკმარისი რაოდენობა იყო და პოლიცია არა მოძალადეების დაკავებას, არამედ ჟურნალისტების გარიდებას ცდილობდა.

მოძალადეებმა

• სცემეს ათობით ჟურნალისტს
• შეიჭრნენ „თბილისი პრაიდის“ ოფისში დასარბევად
• შეცდომით შეიჭრნენ მოქალაქის ბინაში
• ქუჩაში თავს დაესხნენ მოზარდებს
• ასაფეთქებელი შეაგდეს შენობაში, სადაც 50-მდე ადამიანი იმყოფებოდა
• დაარბიეს „სირცხვილიას“ ოფისი
• „პრაიდის“ ჩანთის გამო თავს დაესხნენ მოქალაქეს
• პარლამენტთან ჩამოხსნეს ევროკავშირის დროშა

ასევე, აქციის მიმდინარეობისას ქუჩაში ცივი იარაღით დაჭრეს პოლონელი ტურისტი. სხვადასხვა მედიაგამოცემის ცნობით, დაჭრის შესაძლო მიზეზი ის გახდა, რომ ტურისტს საყურე ეკეთა, თუმცა შსს აცხადებს, რომ ამ ფაქტს არ აქვს კავშირი საპატრიარქოს მიერ ორგანიზებულ ძალადობრივ აქციასთან.

ძალადობის, დარბევის, ფიზიკური და სიტყვიერი შეურაცხყოფების შემდეგ, 5 ივლისს, შუადღისას, საქართველოს საპატრიარქომ ისევ გაავრცელა განცხადება, რომლითაც კიდევ ერთხელ დაადასტურა, რომ თავადაა ამ აქციის ორგანიზატორი.

„ჩვენი დღევანდელი მსვლელობა და შეკრება უნდა იყოს მხოლოდ და მხოლოდ მშვიდობიანი და ლოცვისკენ მიმართული“, – წერია განცხადებაში. ამ დროსთვის უკვე ნაცემია ათობით ჟურნალისტი  საპატრიარქოს ორგანიზებული აქციის მონაწილეების მიერ. მათგან ზოგს ქირურგიული ოპერაციის ჩატარებაც კი დასჭირდა.

5 ივლისს დაგეგმილი „ღირსების მარში“ არ შედგა. „თბილისი პრაიდმა“ განაცხადა, რომ ვერ დააყენებენ ადამიანების სიცოცხლეს საფრთხის ქვეშ.

5 ივლისს, საღამოს, საპატრიარქომ კიდევ ერთი განცხადება გაავრცელა, სადაც ვკითხულობთ, რომ საპატრიარქო „დიდად წუხს, რომ დაშავდნენ ადამიანები, ყველაზე მეტად კი –  ჟურნალისტები“.

ამავე განცხადებაში აღნიშნულია, რომ საპატრიარქოს იმედი აქვს, რომ საერთაშორისო საზოგადოება გაგებით მოეკიდება მათ პოზიციას.

ამ განცხადებას თან ახლავს ფოტომასალაც, სადაც რუსთაველზე შეკრებილი ძალადობრივი აქციის მონაწილეები და მღვდელმთავრები ჩანან.

შინაგან საქმეთა სამინისტროს ოფიციალური ცნობით, 5 ივლისს საპატრიარქოს მიერ ორგანიზებულ ძალადობრივ აქციაზე 55 ადამიანზე იძალადეს, მათ შორის, 53 არის სხვადასხვა მედიასაშუალების წარმომადგენელი.

მიუხედავად სამართალდარღვევის ფაქტებისა და მრავალი ფოტო/ვიდეომასალის არსებობისა, საიდანაც მოძალადეების ამოცნობა იოლი იყო, 5 ივლისს შსს-მ ადმინისტრაციული წესით მხოლოდ 8 პირი დააკავა.

დღის ბოლოს, ჟურნალისტებისა და მოქალაქეების ცემისა და ოფისების დარბევის შემდეგ, რუსთაველის გამზირზე საპატრიარქოს ორგანიზებული ძალადობრივი აქციის წევრებმა იცეკვეს.

______________________________

წაიკითხეთ ამავე თემაზე: 

7 ივლისის მონაცემებით, აჭარაში კორონავირუსის 61 ახალი შემთხვევა დადასტურდა.

აჭარის ჯანდაცვის სამინისტროს მონაცემებით, აჭარის კოვიდკლინიკებში 126 ადამიანი მკურნალობს, მათგან 6 ხელოვნური სუნთქვის აპარატზე იმყოფება.

რეგიონის კოვიდსასტუმროებში 201 ადამიანია მოთავსებული. თვითიზოლაციაშია 631 ინფიცირებული.

7 ივლისის მონაცემებით, საქართველოში კორონავირუსის 1392 ახალი შემთხვევა დადასტურდა. ბოლო 24 საათში ქვეყნის მასშტაბით ჩატარდა 38 136 კვლევა ტესტით.

გასულ დღე-ღამეში საქართველოში 11 ადამიანი გარდაიცვალა კოვიდით.

„ბეშუმში პანდემია არ ვიცით,“ – ამბობენ ადამიანები, რომლებსაც ბეშუმში სახლები აქვთ. მათი თქმით, ფასები იგივეა, რადგან პანდემია გასულ წელსაც არ იგრძნობოდა. ზოგიერთის თქმით კი, ბეშუმში დასვენება გაძვირდა, რადგან „ყველაფერი ძვირდება“.

„ახლა ამოვედი ბეშუმში და სახლს ვალაგებ. უკვე გავაქირავე სახლი და ველოდები სტუმრებს. 20 დღით ვაქირავებ 700 ლარად,“ – გვითხრა ლელა თურმანიძემ. მას 4 ადამიანის ერთდროულად განთავსება შეუძლია ძველ სახლში, რომელიც წლების წინ გაარემონტა. ლელა ამბობს, რომ სახლში სველი წერტილებიც აქვს.

„შუქი არის, წყალი, ცხელი წყალიც მაქვს, კომფორტული ბინები უფრო ძვირი ღირს, ბევრად უფრო ძვირი, ჩემზე იაფადაც არის სახლები, მაგრამ იშვიათად, ახლა გავიგე, ჩემს ახლობელს გაუქირავებია სახლი 500 ლარად, მაგრამ იმას ცხელი წყალი არ აქვს, მაგალითად,“ – გვიყვება ლელა თურმანიძე.

ლელას თქმით, ბეშუმში სახლების ნაწილი უკვე გაქირავებულია, თუმცა აქ ძირითადად დამსვენებლებს 15 – 20 ივლისიდან ელიან.

„გასულ წელსაც ეს ფასები იყო, რა ვიცი, ბეშუმში პანდემია არ არის,“ – ამბობს ლელა თურმანიძე, თუმცა კითხვაზე, რამდენ ლარად გააქირავა გასულ წელს სახლი, გვპასუხობს, 500 ლარადო.

„ახლობელი იყო და მაგიტომ დავუკელი ფასი, პანდემია არაფერ შუაშია,“ – დასძინა მან.

კოტეჯი აქვს და სასტუმროც ბეშუმში თამაზ შანთაძეს. მასთანაც ყველა ოთახი 10 აგვისტოს ჩათვლით უკვე დაჯავშნილია.

„10 ლარით გავზარდეთ ფასი შარშანდელთან შედარებით, ყველაფრის ფასმა მოიმატა,“ – ამბობს თამაზ შანთაძე. კოტეჯს, სადაც 6 ადამიანის მოთავსებაა შესაძლებელი, ის ღამეში 100 ლარად აქირავებს, აგვისტოში – 150 ლარად. სასტუმროში კი ერთი ღამის ფასი 60 ლარია.

„ადრე კვებაც მქონდა, მაგრამ გასულ წელს გაგვაფრთხილეს, დიდი დარბაზი გახდა საჭირო და მასეთი არ მაქვს. ამიტომ კვება აღარ არის,“ – დასძინა თამაზ შანთაძემ.

გამქირავებლების თქმით, ბეშუმში უკვე ამუშავდა სუპერმარკეტები და სამედიცინო პუნქტი. მოძრაობს მუნიციპალური ტრანსპორტიც – ბათუმი ბეშუმი.

შსს-ს ინფორმაციით, ჟურნალისტის პროფესიულ საქმიანობაში ძალადობის მუქარით უკანონოდ ხელის შეშლის, ძალადობითა და ძალადობის მუქარით დევნის, ჯგუფური ძალადობის ფაქტებზე 4 პირი დააკავეს.

„დაკავებული არიან 1983 წელს დაბადებული ა.ნ., 1999 წელს დაბადებული თ.დ., 1986 წელს დაბადებული ი. ქ. და 1996 წელს დაბადებული თ. ხ.

გამოძიებით დადგინდა, რომ მიმდინარე წლის 5 ივლისს თბილისში, რუსთაველის გამზირზე, „თბილისი პრაიდის“ საწინააღმდეგოდ გამართული აქციის მიმდინარეობის დროს, დაკავებულმა ა.ნ.-მ და თ.დ.-მ ინგოროყვას ქუჩაზე მდებარე ორგანიზაცია „სირცხვილიას“ ოფისში, ტელეკომპანია „ტვ 1“-ის ჟურნალისტსა და ოპერატორს, სამსახურებრივი მოვალეობის შესრულებისას ფიზიკური და სიტყვიერი შეურაცხყოფა მიაყენა.

დაკავებულებმა ი.ქ.-მ და თ.ხ.-მ რუსთაველის გამზირზე, პარლამენტის მიმდებარედ, ტელეკომპანია „მთავარი არხის“ ოპერატორს სამსახურებრივი საქმიანობისას სიტყვიერი და ფიზიკური შეურაცხყოფა მიაყენეს,“ – აცხადებს შსს.

გამოძიება სისხლის სამართლის კოდექსის 154-ე მუხლის მე -2, 156-ის მე -2 ნაწილის “ა” და 225-ე მუხლის მე-2 ნაწილით მიმდინარეობს.

ოფიციალური ინფორმაციით,  სამართალდამცველების მიერ სულ 7 პირია დაკავებული.