Batumelebi | 4 დღით გაზის მიწოდება შეუწყდება ბათუმს, ხელვაჩაურს და ქობულეთის ნაწილს 4 დღით გაზის მიწოდება შეუწყდება ბათუმს, ხელვაჩაურს და ქობულეთის ნაწილს – Batumelebi
RU | GE  

4 დღით გაზის მიწოდება შეუწყდება ბათუმს, ხელვაჩაურს და ქობულეთის ნაწილს

8 ივლისიდან ბათუმის, ხელვაჩაურისა და ქობულეთის ნაწილის მოსახლეობას ოთხი დღის განმავლობაში ბუნებრივი აირის მიწოდება შეეზღუდება.

როგორც „სოკარ ჯორჯია გაზის“ აჭარის რეგიონული ოფისის დირექტორი ვახტანგ ბერიშვილი „ბათუმელებთან“ ამბობს, ბუნებრივი აირის შეზღუდვის მიზეზი ახალი მაგისტრალის დაერთებაა.

„ავტობანის მშენებლობიდან გამომდინარე, ახალი ცენტრალური მაგისტრალი აშენდა, ამიტომ უნდა მოხდეს მისი დაერთება. ტექნიკურ სამუშაოებს სჭირდება ორი დღე, გარკვეული დრო კი, ალბათ კიდევ ორი დღე,  აღდგენას დასჭირდება.

ბუნებრივი აირი მთლიანად შეეზღუდება ბათუმს, ხელვაჩაურს და ასევე ქობულეთის ნაწილს. ამასთან დაკავშირებით დამატებით გავაკეთებთ განცხადებებს“, – ამბობს ვახტანგ ბერიშვილი.

„სოკარის“ ცხელ ხაზზე „ბათუმელებს“ უთხრეს, რომ ამ ეტაპზე ბათუმში, ხელვაჩაურსა და ქობულეთში გაზის გათიშვის შესახებ ინფორმაციას არ ფლობენ. „რაც ვიცით ისაა, რომ ხვალ გაზი ითიშება ბათუმში, ბაგრატიონის ქუჩაზე. სხვა ინფორმაცია არ გვაქვს“, – უთხრეს კომპანიაში „ბათუმელებს“.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com