გარემოს ეროვნული სააგენტოს ინფორმაციით, საქართველოს მთელს ტერიტორიაზე ატმოსფერულ ჰაერში 2020 წლის 5 მარტიდან ფიქსირდება მყარი ნაწილაკების კონცენტრაციების მატება.
9 მარტს PM10-ის კონცენტრაციების ნორმაზე გადაჭარბება დაფიქსირდა ბათუმში – 2.5-ჯერ, თბილისში – წერეთლის გამზირზე – 1.5-ჯერ, ყაზბეგის გამზირზე – 1.4-ჯერ, ვარკეთილში – 1.9-ჯერ, ვაშლიჯვარში – 1.7-ჯერ, „ილიას ბაღში“ – 2.3-ჯერ, რუსთავში – 3-ჯერ.
„ატმოსფერულ ჰაერში მყარი ნაწილაკების [PM10, PM2.5] კონცენტრაციების მატება, ძირითადად, ტრანსსასაზღვრო დაბინძურებას უკავშირდება და იგი საჰარის უდაბნოს მტვრის მასების შემოჭრით არის განპირობებული“, – აცხადებს გარემოს ეროვნული სააგენტო.
გარემოს ეროვნული სააგენტოს ინფორმაციით, ამ კუთხით ჰაერის დაბინძურების სხვადასხვა წყარო არსებობს, მათ შორის: სამშენებლო პროცესები, ღია გრუნტი, შეშის ღუმელები, დიზელის ძრავები, ქვანახშირზე მომუშავე თბოელექტროსადგურები, მრეწველობის სექტორი, ქარის მიერ მიმოფანტული მტვერი. ასევე, ე.წ. მეორადი მყარი ნაწილაკები წარმოიქმნება სხვადასხვა დამბინძურებლის ფოტოქიმიური რეაქციის შედეგად.
ჯანმრთელობაზე ზეგავლენა: თვალის გაღიზიანება, ასთმა, ბრონქიტი, ფილტვის დაზიანება, სიმსივნე, მძიმე ლითონებით მოწამვლა, უარყოფითი ზემოქმედება გულსისხლძარღვთა სისტემაზე.
6 მარტს ბათუმში მტვრის ნაწილაკებით [PM10 მკგ/მ3] ჰაერის დაბინძურების მაჩვენებელი იყო 116.76, რაც ძალიან ცუდია. დღეს, 10 მარტს, 13:00 საათის მონაცემებით კი, აღნიშნული მაჩვენებელი კვლავ ძალიან ცუდია – 111,92.
ამ თემაზე:
https://batumelebi.netgazeti.ge/news/258285/
