„მასწავლებლებისთვის სავალდებულო ტრენინგები მათ საშვებულებო პერიოდს ემთხვევა, თუმცა ტრენინგებზე მოთხოვნა პედაგოგების მხრიდან ძალიან მაღალია“, – უთხრეს „ბათუმელებს“ მასწავლებელთა პროფესიული განვითარების ეროვნულ ცენტრში.
პედაგოგების ნაწილი ამის გამო სოციალურ ქსელში უკმაყოფილებას გამოხატავს და ამბობს, რომ მათ უფლება აქვთ კუთვნილი შვებულება ისე გაატარონ, როგორც სურთ.
„სავალდებულო ტრენინგები შვებულებას ემთხვევა ნამდვილად, რადგან ყოველდღიურად შემოდის მინიმუმ 69 წერილი და 5 ათასი წერილია დაგროვილი ამ დროისთვის, სადაც ითხოვენ, რომ აუცილებლად გაგვატარეთ ტრენინგებიო.
იანვარში ჩატარდა კვლევა ჩვენი ცენტრის მეშვეობით, გამოვკითხეთ მასწავლებლები რა მოდულებში და საგნებში სურდათ კომპეტენციის ამაღლება, შემდეგ შემუშავდა 50-მდე ტრენინგ-მოდული და მაისში დაიწყო ტრენინგები. ასეთი პრაქტიკა ადრეც გვქონია, რომ შვებულების პერიოდში ტარდებოდა სავალდებულო ტრენინგები.
რა თქმა უნდა, არიან უკმაყოფილოებიც, მაგრამ ამ ეტაპისთვის ძალიან ბევრია ტრენინგების გავლის მსურველი“, – გვითხრეს მასწავლებლის სახლში.
ცენტრის ინფორმაციით, მასწავლებელთა პროფესიული განვითარებისთვის განკუთვნილი სავალდებულო ტრენინგები 10-15 აგვისტოს დასრულდება.
„ამ წლისთვის რა სავალდებულო ტრენინგიც იყო დაგეგმილი, ყველა ამ პერიოდში ჩატარდება. ჯგუფში არის 40-50 პედაგოგი, ზოგი გვთხოვს კოვიდის გამო გადავადებას, მაგრამ ამ პერიოდში ვფიქრობთ ყველა ტრენინგი მოესწრება“, – გვეუბნებიან ცენტრში.
ცენტრის განცხადებით, სავალდებულო ტრენინგები ონლაინში მიმდინარეობს, ამიტომ პედაგოგებს პროცესში ჩართვა გეოგრაფიული მდებარეობის მიუხედავად შეეძლებათ.
