Batumelebi

უკრაინის ეროვნული უსაფრთხოებისა და თავდაცვის საბჭოს მდივანი, ოლექსი დანილოვი მიიჩნევს, რომ საომარი მოქმედებების დროს, უკრაინის ძალებისგან დროებით უკან დახევა და  ტერიტორიების დროებით დაკარგვა ტრაგედია არ არის, მთავარი – ქვეყნის შენარჩუნებაა.

ამის შესახებ დანილოვმა ექსკლუზიურად 24-ე არხთან ისაუბრა. მან ასევე ილაპარაკა იმაზე, რა ხდება ახლა ლუგანსკის ოლქში, რა პირობებში არიან „აზოვსტალის“ ტყვეები და რა იციან უკრაინაში პუტინის აგენტებზე.

ვითარება ლუგანსკის ოლქში

„ლუგანსკის ოლქი – ახლა ყველაზე ცხელი წერტილია უკრაინის ფრონტზე. სასტიკი ბრძოლები მიდის სევეროდონეცკში. იქ ვითარება რთულია და ძალიან სწრაფად იცვლება. მტერს დიდი რაოდენობით არტილერია, ავიაცია და ძლიერი სამხედრო არსენალი აქვს და ამ ყველაფერს ერთდროულად იყენებს ჩვენი პოზიციების წინააღმდეგ.“

ოლექსი დანილოვმა ასევე აღნიშნა, რომ ამ ფრონტზე უკრაინა ყოველდღიურად განიცდის დანაკარგებს.

„კიდევ ერთხელ მინდა ხაზი გავუსვა, რომ ახლა მთავარია, არ დავკარგოთ ქვეყანა. თუ ჩვენ დავკარგავთ რომელიმე ტერიტორიის ნაწილს, მას აუცილებლად დავიბრუნებთ. ამაზე ლაპარაკობენ ჩვენი პრეზიდენტიც და ჩვენი სამხედროებიც. მთავარია, სტრატეგიულად არ დავმარცხდეთ“.

„აზოვის“ მებრძოლების ტყვეობაზე

„მარიუპოლის უკრაინელ დამცველებს, რომლებიც გმირულად იცავდნენ პოზიციებს „აზოვსტალში“ და ახლა ოკუპანტების ტყვეობაში არიან, რუს სამხედრო ტყვეებში გაცვლიან.

დღეს ისინი კომფორტულ პირობებში არ იმყოფებიან, ეს უნდა ვაღიაროთ, მაგრამ არიან ცოცხლები და ჯანმრთელები, აქვთ წყალი და საკვები.

უნდა გვესმოდეს, რომ ჩვენი მებრძოლები მტრის ხელში არიან. ჩვენ იმედი გვაქვს, რომ ადრე თუ გვიან ისინი ჩვენს ქვეყანაში დაბრუნდებიან. უკრაინა ყველაფერს გააკეთებს, რაც მასზეა დამოკიდებული. ბევრი ინფორმაცია ახლა გასაიდუმლოებულია, რათა ეს პროცესი არ ჩავარდეს“.

24-ე არხის ინფორმაციით, ამჟამად რუსეთის ტყვეობაში მარიუპოლის 2 439 დამცველი იმყოფება.

იქნება თუ არა მოლაპარაკებები რუსეთთან

„ვოლოდიმირ ზელენსკიმ განაცხადა, რომ დასავლელი პარტნიორები, საკუთარი ინტერესების გათვალისწინებით, უბიძგებენ უკრაინას რუსეთთან მოლაპარაკებისკენ, თუმცა მოლაპარაკებები – ეს რთული პროცესია. აზრი ჯერ საზოგადოებას უნდა ვკითხოთ.“

პუტინის მუქარაზე

უკრაინისთვის შორსმოქმედი საარტილერიო და სარაკეტო სისტემების მიწოდების გამო, ვლადიმერ პუტინი იმუქრება სარაკეტო თავდასხმით – „იქ, სადაც მანამდე არ დაურტყამს“.

უსაფრთხოებისა და თავდაცვის საბჭოს მდივნის აზრით, კრემლის მეთაური უკრაინას „სთავაზობს“ არ მიიღოს იარაღი, ესე იგი, დანებდეს და ხელი მოაწეროს კაპიტულაციას.

„მე ამის კატეგორიული წინააღმდეგი ვარ და მიმაჩნია, რომ კაპიტულაციას სულ სხვა ქვეყანამ უნდა მოაწეროს ხელი. ეს ჩემი საჯარო პოზიციაა. ხოლო ის, რომ პუტინს შეუძლია თავისი რაკეტებით ჩვენი ნებისმიერი ქალაქი დაანგრიოს და დააზიანოს, სამწუხაროდ, ეს ფაქტია“.

დანილოვის თქმით, უკრაინას რომ იმდენი თავდაცვის საშუალება ჰქონდეს, რამდენიც საჭიროა, საკუთარი ტერიტორიებიდან მტრის განდევნას უკეთ მოახერხებდა.

ბელარუსიდან შეტევის საფრთხეზე

„რუსეთს უკვე დიდი ხანია ოკუპირებული აქვს ბელარუსის ტერიტორია. შესაბამისად, აგრესორ ქვეყანას ნებისმიერ დროს შეუძლია მიიღოს გადაწყვეტილება უკრაინასთან დაკავშირებით. თუმცა უკრაინის სამხედრო ხელმძღვანელობა მოვლენების განვითარების ნებისმიერი სცენარისთვის მზადაა“.

პუტინის აგენტებზე უკრაინაში

რუსეთი წლების განმავლობაში ქმნიდა და აფინანსებდა პრორუსული ძალების არაერთ ქსელს უკრაინაში.

„ვფიქრობ, უახლოეს მომავალში შეგვეძლება ბევრი საინტერესო დეტალი გავიგოთ, როგორ იქმნებოდა ეს ჯგუფები“, – ამბობს დანილოვი და დასძენს, რომ თუკი ვინმე ფიქრობს, კვლავაც გააგრძელოს უკრაინაში პუტინის დავალებების შესრულება, მათ უსაფრთხოების სამსახური და დაზვერვა „მიხედავს“.

„კარგ რუსებზე“

„ყველა უნდა ჩამოყალიბებულიყო თავის პოზიციაზე ჯერ კიდევ ფართომასშტაბიანი ომის დაწყების პირველ დღეებში. ის ადამიანები, ვინც ეს მოახერხა და 24-27 თებერვლის პერიოდში გამოხატა თავისი პროტესტი – ისინი პატივისცემას იმსახურებენ. თუმცა ზოგმა დაინახა, რომ „არ გამოუვიდათ“ და მერე დაიწყო გადასხვაფერება – აი, ეს არ მუშაობს“.

მთავარი ფოტო: ოლექსი დანილოვი/Kyiv Post

შაბათ-კვირას უკრაინის შეიარაღებულმა ძალებმა სევეროდონეცკის ნაწილი დაიბრუნეს, თუმცა რუსეთის არმია აღმოსავლეთის რაიონების დაკავებას განაგრძობს – წერს ტვიტერზე დიდი ბრიტანეთის დაზვერვა, რომელიც 7 ივნისის განახლებას მთლიანად დონეცკში მიმდინარე ბრძოლებს უძღვნის.

უწყების ინფორმაციით, რუსეთის ფართო გეგმად, სავარაუდოდ, კვლავაც რჩება ქალაქ სევეროდონეცკის იზოლირება, როგორც ჩრდილოეთიდან, ისე სამხრეთიდან.

„მაისში, რუსეთმა წარმატებებს მიაღწია სამხრეთით, პოპასნაიას მიმართულებაზე, თუმცა წინა კვირაში, ამ ტერიტორიაზე, რუსეთის არმიის წინსვლა შეჩერდა“, – აღნიშნავს ბრიტანეთის დაზვერვა და ვარაუდობს, რომ ინფორმაცია იზიუმთან ინტენსიური საარტილერიო თავდასხმების შესახებ, მიანიშნებს რუსეთის განზრახვაზე, განაახლოს შეტევა ჩრდილოეთის მიმართულებით.

„რუსეთს, დიდი ალბათობით, სურს, მოახერხოს სერიოზული გარღვევა ამ მიმართულებიდან რომელიმეზე მაინც, რათა თავისი ტაქტიკური მიღწევები ოპერაციულ წარმატებად აქციოს და მიაღწიოს თავის პოლიტიკურ მიზანს – სრულად გააკონტროლოს დონეცკის ოლქი“.

გაერთიანებული სამეფოს თავდაცვა უკრაინაში მიმდინარე მოვლენებზე სადაზვერვო ცნობარს ყოველდღიურად აქვეყნებს. 6 ივნისის განახლებაში უწყება უკრაინის ფრონტზე არსებულ საერთო სიტუაციას მიმოიხილავდა და აღნიშნავდა, რომ  5 ივნისის დილას კიევის სარკინიგზო ინფრასტრუქტურაზე სარაკეტო თავდასხმით რუსეთს სურდა, დასავლეთის მიერ გადაცემული სამხედრო ტექნიკის უკრაინული დანაყოფებისთვის მიწოდება შეეფერხებინა.

მთავარი ფოტო: უკრაინის საბრძოლო მოქმედებების რუკა 6 ივნისის მდგომარეობით/დიდი ბრიტანეთის დაზვერვა

რუსეთი საგარეო უწყების ხელმძღვანელმა, სერგეი ლავროვმა „ფანტაზია“ უწოდა უკრაინის სურვილს, ქვეყნის ტერიტორიაზე დააბრუნოს ის მდგომარეობა, რომელიც 24 თებერვლამდე იყო.

„სხვა ურთიერთგამომრიცხავი ფანტაზიებიც გვესმის ყოველდღიურად, თუმცა უკრაინამ უარი თქვა მოლაპარაკებების პროცესზე. ჩვენ გვაქვს ყველანაირი საფუძველი ვიფიქროთ, რომ ამით ის დასავლეთის ანგლო-საქსონი ლიდერების ნებას ასრულებს. ჩვენ მზად ვიყავით, პატიოსნად გვემუშავა იმ წინადადებებზე, რომლებიც უკრაინელმა კოლეგებმა წარმოადგინეს, თუმცა ამ წინადადებების მიხედვით დაწერილი შეთანხმების პროექტი, უკვე თვე-ნახევარია უკრაინის მხარეს უდევს,“ – განაცხადა ლავროვმა.

ორშაბათს გამართულ პრესკონფერენციაზე, ლავროვმა უკრაინისთვის შორსმოქმედი სარაკეტო სისტემების მიწოდებაზეც ისაუბრა.

„რაც უფრო მეტ შორსმოქმედ სისტემას მიაწოდებენ კიევის რეჟიმს, მით უფრო შორს გავდევნით ნაცისტებს იმ ხაზიდან, საიდანაც მომდინარეობს საფრთხე რუსეთისთვის და უკრაინის რუსული მოსახლეობისთვის“, – თქვა სერგეი ლავროვმა.

მისი თქმით, პრეზიდენტ ზელენსკის დაპირება, რომ ამერიკულ რაკეტებს უკრაინა რუსეთის ტერიტორიაზე თავდასხმისთვის არ გამოიყენებს, უბრალოდ ბოდვაა, რომლის სერიოზულად მიღებაც შეუძლებელია.

„თვით უკრაინაშიც კი დასცინიან პოლიტიკოსები და დეპუტატები ამერიკელებს, რომლებიც ამბობენ, რომ ზელენსკის ნათქვამის სჯერათ,“ – დასძინა ლავროვმა.

5 ივნისს პუტინმა განაცხადა, რომ თუ უკრაინა შორსმოქმედ სარაკეტო სისტემებს მიიღებს, რუსეთი აქედან შესაბამის დასკვნებს გამოიტანს და ისეთ ობიექტებზე თავდასხმას დაიწყებს, რომლებისთვის აქამდე არ დაურტყამს.

რუსეთის მუქარის მიუხედავად, უკრაინას შორსმოქმედ სარაკეტო და საარტილერიო სისტემებს აშშ და დიდი ბრიტანეთი გადასცემენ.

ვაშინგტონი უკრაინას მიაწვდის მაღალი მობილურობის საარტილერიო-სარაკეტო სისტემა М142 Himars-ს, რომელიც დაახლოებით 80 კილომეტრის მანძილზე მოქმედებს. ამავე მანძილზე მოქმედ საარტილერიო სისტემებს გადასცემს უკრაინას დიდი ბრიტანეთიც.

ლატვიაში ყველა რუსული არხის, – მათ შორის გასართობის, – მაუწყებლობა აიკრძალა. როგორც ადგილობრივი გამოცემა „დელფი“ იუწყება, შესაბამისი გადაწყვეტილება ელექტრონული მედიასაშუალებების ეროვნულმა საბჭომ (NEPLP) მიიღო.

საბჭოს თავმჯდომარის, ივარ აბოლინიშის თქმით, გადაწყვეტილება ახალი საკანონმდებლო ნორმის საფუძველზეა მიღებული.

26 მაისს მიღებულები ცვლილებების თანახმად, ლატვიაში არ შეიძლება არხების მაუწყებლობა, რომლებიც დარეგისტრირებული არიან ქვეყანაში, რომელიც სხვა სახელმწიფოს დამოუკიდებლობასა და ტერიტორიულ მთლიანობას ემუქრება.

საბჭოს გადაწყვეტილება ძალაში 9 ივნისიდან შევა და იქამდე იმოქმედებს, სანამ „რუსეთი არ შეაჩერებს ომს და არ დააბრუნებს ყირიმს“.

აკრძალვა 80 ტელეარხს შეეხო. აქამდე, ლატვიაში მხოლოდ რუსული პროპაგანდისტული არხები („რასია 24“ და სხვები) იყო აკრძალული.

---

მთავარი ფოტო: EPA/Anatoly Maltsev 

წყარო: Ukraynska Pravda (შემოკლებული ვერსია)

პოლკ „აზოვის“ მეთაურის, დენის პროკოპენკოს ცოლი, ეკატერინა, მშვიდობიან ცხოვრებაში ნიჭიერი ილუსტრატორია, თუმცა 24 თებერვლის შემდეგ, როგორც ყველა უკრაინელის, ისე მისი ცხოვრებაც სრულიად შეიცვალა.

„უკრაინსკა პრავდასთან“ ინტერვიუში ეკატერინა პროკოპენკო ჰყვება, როდის ელაპარაკა ბოლოს ქმარს და ვინ არის მისთვის დენის პროკოპენკო, მეთაური „რედისი“, რომელსაც მთელი უკრაინა და მსოფლიო „აზოვსტალის“ გმირად იცნობს.

• დავიწყებ იმით, რაც, ალბათ, დღეს ყველას გვაწუხებს – სად და როგორ არიან „აზოვსტალის“ მებრძოლები, ბოლოს როდის ელაპარაკეთ დენისს?

ერთი კვირის წინ დამირეკა. კვირა საღამოს. უცხო ნომერი იყო. თავიდან მეგონა, რომ ისევ ვიღაც რუსი „ჰეითერი“ იქნებოდა. ვპასუხობ და მესმის დენისის ხმა. „კატია, სულ 30 წამი მაქვს, მითხარი, როგორ ხართ მანდ?“ ვუპასუხე – „ყველაფერი კარგადაა, შენ როგორ ხარ?“. ამის მერე კავშირი გაფუჭდა. ვეკითხებოდი – მას არ ესმოდა, რაღაცას მეუბნებოდა – მე არ მესმოდა. პრინციპში, მხოლოდ ხმა გავიგონე მისი, მეტი ვერც ვერაფერი.

მერე უკვე ჩემით ვცადე სხვადასხვა წყაროდან ინფორმაციის მოძიება იმ ადამიანებისგან, ვინც მის გვერდით იმყოფება. როგორღაც დაკავშირება მოხერხდა. მათ გვითხრეს, რომ პირობები დამაკმაყოფილებელია და ყველანი გაცვლას ელოდებიან.

ახლა, „აზოვსტალის“ ოჯახების წევრთა ასოციაციასთან ერთად, ვცდილობთ წითელ ჯვართან და სხვა საერთაშორისო ორგანიზაციებთან დაკავშირებას, რომ პირობების გაუმჯობესება მოხერხდეს. ვიცით, რომ იზოლატორი გადავსებულია და ბუნებრივია, რესურსების ნაკლებობაა – საკვები, წყალი. გვინდა, რომ ეს საკითხი რაც შეიძლება მალე გადავჭრათ.

• როგორ რეაგირებს წითელი ჯვარი და ხელისუფლების მხრიდან ვინ მონაწილეობს მარიუპოლის გარნიზონის გათავისუფლების პროცესში?

ხელისუფლებისგან უკვე იყო ინფორმაცია, რომ გაცვლაზე დაზვერვის მთავარი სამმართველო მუშაობს. კონკრეტულად ვინ – მე ეს ინფორმაცია არ მაქვს, რადგან გასაიდუმლოებულია. ვიცი, რომ მესამე მხარე – ადამიანის უფლებებზე, სამხედრო ტყვეთა უფლებებზე მომუშავე საერთაშორისო ორგანიზაციები, ცდილობენ, თვალი მიადევნონ ჟენევის კონვენციის შესრულებას.

ახლა გვინდა, რომ მესამე მხარემ მეტი ძალისხმევა გამოიჩინოს, რადგან ვხედავთ, რომ ეს ძალისხმევა საკმარისი არაა.

• არიან ოლენოვკაში წითელი ჯვრის წარმომადგენლები?

როგორც ვიცით, მესამე მხარე იქ მხოლოდ ევაკუაციის დასაწყისში იყო. ჯერ კიდევ ვცდილობთ ამის გარკვევას, პასუხი არ მაქვს. მე თავადაც არ ვიცი, არიან თუ არა იქ მათი წარმომადგენლები. მათგან რაიმე ინფორმაცია არ მიგვიღია, ფოტო ან ვიდეომტკიცებულებები იმის დასანახად, თუ რეალურად რა პირობებში არიან იქ ჩვენები. მხოლოდ რუსული მხარის გადაღებული ფოტო და ვიდეო გვაქვს. ამ მასალებიდან ვხვდებით, რომ იქ მხოლოდ რუსული მხარეა. ჩვენ კი დამოუკიდებელი მხარე გვჭირდება, რომელიც რეალობას გვიჩვენებს.

• მთელი ამ ხნის განმავლობაში, თქვენ მიმართავდით საერთაშორისო საზოგადოებას, ერდოღანს, ჩინეთის ლიდერს, ვატიკანშიც კი ჩახვედით. როგორ ფიქრობთ, საკმარისი გააკეთა მსოფლიომ ამ ადამიანების გადასარჩენად, რომ დღეს ისინი ტყვეობაში არ აღმოჩენილიყვნენ?

ჩვენ მართლა ვაკეთებდით, რაც შეგვეძლო, თუმცა ვითარება მარიუპოლში ყოველდღიურად რთულდება. ჩვენც გვქონდა იმედი და მებრძოლებსაც, რომ ექსტრაქციის პროცედურა შესაძლებელი იქნებოდა, რომ ამ სამყაროში შეუძლებელი არაფერია, სასწაულები ხდება, რომ რომელიმე მესამე მხარე შეძლებდა მათ უსაფრთხო ზონაში გადაყვანას, მესამე ქვეყანაში. მაგრამ ისიც გვესმის, როგორ მტერთან გვაქვს საქმე. ეს ვერ იქნებოდა მხოლოდ მესამე მხარის ინიციატივა. ვიცით, რომ ერდოღანმა შესთავაზა პუტინს ეს პროცედურა, სხვა სახელმწიფოების წარმომადგენლებმაც, რომის პაპმაც, მაგრამ მან უარი თქვა.

ვიცი, რომ რუსული მხარე ყველა პროცესს წყვეტდა. ერთადერთი, რაზეც ისინი დათანხმდნენ, იყო ის, რომ ჩვენები თავის ტერიტორიაზე გაეყვანათ, იქ, სადაც მათგან, ასე ვთქვათ, „ინფორმაციის ამოღება“ შეეძლებოდათ. ჩვენ ყველას გვესმის, რომ ტყვეობაში ყოფნა ნიშნავს დაკითხვებს და რუსეთს ეს აწყობს.

• როგორ მიიღო დენისმა სიახლე, როდესაც მარიუპოლის დამცველებს იარაღის დაყრა შესთავაზეს? ალბათ, გქონდათ საუბარი ამაზე. სულ ცოტათი მაინც ვიცნობ დენისს და მგონია, რომ ეს მისთვის ძალიან რთული არჩევანი იქნებოდა.

დარწმუნებული ვარ, მებრძოლებსაც და ჩემს ქმარსაც კარგად ჰქონდათ გააზრებული, რომ ბოლომდე იდგებოდნენ, ბოლომდე დაიცავდნენ იმ ადგილს, სადაც იმყოფებოდნენ.

მაგრამ, ცხადია, როდესაც არის ბრძანება, ბრძანება გენშტაბიდან, უმაღლესი ხელმძღვანელობიდან, მას, როგორც სამხედროს, ამ ბრძანების საბოტაჟი არ შეუძლია.

დარწმუნებული ვარ, ხელმძღვანელობა დაჰპირდა ჩემს ქმარს, რომ მებრძოლების სიცოცხლის შენარჩუნება შესაძლებელი იქნებოდა და ყველაფერს გააკეთებდნენ, რომ ტყვეობაში ყოფნის განმავლობაში ჟენევის კონვენციის შესრულებაც გაეკონტროლებინათ.

რა თქმა უნდა, მორალურად ძალიან რთულია, მაგრამ გვესმის, რომ ეს ერთადერთი გამოსავალი იყო. ექსტრაქციისთვის მათ შესაძლოა კიდევ ძალიან დიდხანს ეცადათ და კიდევ ბევრი თანამებრძოლი დაეკარგათ. დენისთვის კი ძალიან მნიშვნელოვანია პირადი შემადგენლობის, მათი სიცოცხლის შენარჩუნება. ვფიქრობ, რომ სწორადაც მოიქცა, როდესაც ევაკუაციას დათანხმდა.

• გიყვებოდათ დენისი „აზოვსტალის“ უკანასკნელ კვირებზე?

ვხდებოდი, რომ იყო გარკვეული ცვლილებები რიტორიკაში, მიმოწერაში, ურთიერთობაში. რასაკვირველია, ის მე საიდუმლოს არაფერს მიყვებოდა, რადგან ის მეთაურია. ყოველთვის მშრალად მპასუხობდა „აზოვსტალის“ თემებზე. სხვა წყაროებიდან უფრო ვიგებდი იქაურ სიტუაციაზე და უკვე ვიცოდი, რომ ყოველდღიურად იზრდებოდა მსხვერპლი. რუსებს უკვე ყველა კარტი ხელში ჰქონდათ, იცოდნენ, ვინ სად იყო და მათ განადგურებაზე მუშაობდნენ.

• ომი უკვე 100 დღეა გრძელდება, მარიუპოლი თავიდანვე ერთ-ერთი ყველაზე ცხელი წერტილი იყო. თქვენ, პირადად, როგორ უძლებთ ამ ყველაფერს, რა გეხმარებათ?

ძალიან ვამაყობ ჩემი ქმრით. ვხედავდი, რა პირობებში იმყოფებოდა ეს სამი თვე, როგორ ეჭირა თავი. ვცდილობ, მის მაგალითს მივყვე. ტირილს და ცუდზე ფიქრს ვუკრძალავ საკუთარ თავს.

• როდესაც უკრაინის გმირის წოდება მიიღო, როგორ შეხვდა ამ ამბავს?

ის ჩემთვის ყოველთვის გმირი იყო. ეს სიახლე არ ყოფილა.

მისთვის კი… ვფიქრობ, მან იცოდა, რომ მთელი მისი პირადი შემადგენლობა, მის გვერდით მყოფი მებრძოლები, ყველანი გმირები არიან, მთელი „აზოვი“. თითოეული, ვინც იქ დარჩა, ფიცი არ გატეხა, არ გაიქცა, ბოლომდე იდგა, იბრძოდა, თავი გადადო – გმირები არიან, მარიუპოლის ყველა დამცველი.

• როგორც ვიცი, დენისი რომ გაიცანით, ის უკვე „აზოვში“ იყო.

დიახ, 2015 წელს, სოციალური ქსელით გავიცანით ერთმანეთი. როგორც კი დავინახე, მაშინვე მივხვდი, რომ ის „ის“ იყო და მანაც მითხრა, რომ თავადაც იგივე იგრძნო ჩემ მიმართ.

• ხშირად იყავით მარიუპოლში? რამდენადაც ვხვდები, დენისი თითქმის სულ იქ იყო.

დიახ, სულ იქ იყო. ერთად ცხოვრების ნორმალური შესაძლებლობა არ გვქონია. მე მესმოდა, რომ ის იქ მუშაობს, სერიოზული მოვალეობები, სერიოზული საქმე აქვს და არასდროს მითხოვია, მიეტოვებინა ეს ყველაფერი, კარიერაზე უარი ეთქვა და კიევში წამოსულიყო.

მესმოდა, რომ ეს მისი საქმეა და ძალიან ვამაყობდი იმით, რომ მან სწორედ სამხედრო კარიერა აირჩია.

მე კიევში ვმუშაობდი. თვეში ერთხელ ან ორჯერ აუცილებლად ჩავდიოდი მასთან, მარიუპოლში. ვხდებოდით, ვატარებდით დროს ერთად, დავდიოდით მთაში. ეს ჩვენი საერთო ჰობია – ალპინიზმი და ჰაიკინგი.

• ბოლოს როდის ნახეთ? ალბათ, ომამდე.

დიახ, ომის დაწყებამდე ზუსტად 10 დღით ადრე, 14 თებერვალს. მარიუპოლში ვისხედით პიცერიაში. მოსალოდნელ ომზე ვლაპარაკობდით. მახსოვს, რომ მან ტელეფონში რუკა გახსნა და მიყვებოდა, სად იყვნენ კონცენტრირებული რუსეთის ძალები. მიყვებოდა თავდასხმის შესაძლო გეგმაზე. მიყვებოდა მარიუპოლის დაცვის შესაძლო სცენარებზეც, სწორედ ამ გეგმებზე მუშაობდა.

• ესე იგი, უკვე ელოდა ომის დაწყებას, სწორად გავიგე?

დიახ, ვფიქრობ, ასეა. იმ დღეებში, უკვე ბევრი ადამიანი ცხოვრობდა ამ მოლოდინით.

• ომს კიევში შეხვდით?

დიახ და პირველი აზრი, რომელმაც თავში გამიელვა, იყო ის, რომ ტერიტორიული თავდაცვის ძალებში ჩავწერილიყავი.

24 თებერვალს საერთოდ ვერ დავიძინე, მოუსვენრად ვიყავი. ახალ ამბებს ვათვალიერებდი და პუტინის გამოსვლა შემხვდა. დასრულდა და ეგრევე ორი აფეთქება კიევში.

დენისს დავურეკე – „ომი დაიწყო“ – გავაღვიძე. ფონზე ტელეფონის ზარის ხმა მესმოდა, ურეკავდნენ.

დენისმა მთხოვა კიევში დავრჩენილიყავი, მშვიდად ვყოფილიყავი, არანაირი თავდაცვის ძალები. ცხადია, ძალიან ძნელი იყო ასე ჯდომა, მოხალისეობა დავიწყე, ვაგროვებდით ფულსა და ნივთებს სამხედროებისთვის.

• არ შემიძლია არ გკითხოთ. ჩვენ ვიცნობთ დენის პროკოპენკოს მისი მიმართვებიდან და ყველა აღფრთოვანებული ვართ მისი სიმამაცით, გამბედაობით და ზოგჯერ სისასტიკითაც კი. მასთან 15-წუთიანი ინტერვიუს გამოცდილებითაც ვიცი, რომ ის უფრო საქმის ადამიანია და არა ემოციების. თქვენ როგორ დენისს იცნობთ?

ის, მშვიდობიან, ჩვეულებრივ ცხოვრებაშიც ეგეთია. თუ ამბობს – გეგმავს, აკეთებს, ასრულებს. მოვალეობის კაცია, არავის დააღალატებს. ყოველთვის ასეა – თქვა-გააკეთა.

ძალიან მგრძნობიარეა ხანდაზმული ადამიანების მიმართ. ყოველთვის დაეხმარება, მოუსმენს. ბებიებსა და ბაბუებს ძალიან უყვართ.

ყველა ამბობს, რომ ის თითქოს უხეშია, რადგან ყოველთვის სერიოზულად, მტკიცედ, ვაჟკაცურად ლაპარაკობს და რჩება შთაბეჭდილება, რომ ძალიან მკაცრი და უხეშია. ასე არაა. ცხოვრებაში ძალიან რბილია.

როდესაც კიევში ჩამოდიოდა, პირველ დღეს ნივთებს ვაგროვებდით და მეორე დღეს უკვე სადმე მთაში ვიყავით. არ უყვარს ერთ ადგილას ჯდომა, არ შეუძლია რომ არაფერი აკეთოს.

• ამას ყველას ვეკითხები, ვისთანაც ინტერვიუს ვწერ. გამარჯვების შემდეგ, პირველივე დღეს, რას გააკეთებთ?

კარგად ვაჭმევ, პირველ რიგში. ძალიან კარგად ვაჭმევ.

მერე, რა თქმა უნდა – რეაბილიტაცია. ბუნებაში ყოფნა და ცხოველები – ჩვენ ძალიან გვიყვარს თიკნები, ხბოები, შინაური და მთის ცხოველები.

ვიცით, რომ ეს სამი თვე ჯოჯოხეთში იყვნენ, მაგრამ მაინც იბრძოდნენ. ხომ ნახეთ, როგორი შედეგიც ჰქონდათ პირობების მიუხედავად.

და ჩვენც ყველაფერი უნდა გავაკეთოთ, რომ რაც შეიძლება მალე დაბრუნდნენ, რადგან ეს მნიშვნელოვანია, ისინი საკუთარი ქვეყნის განვითარებას უნდა ემსახურონ. მათ დაიმსახურეს, რომ იყვნენ თავიანთ ცოლებთან, შვილებთან, ოჯახებთან.

თუ რამე ისე არ წავა (იმედი მაქვს, რომ ეს არ მოხდება), ეს იქნება ჩვენი ქვეყნის ისტორიაში ძალიან საშინელი ფურცელი.

მაგრამ იმედი მაქვს, რომ ყველაფერი კარგად იქნება, ყველა შეასრულებს შეთანხმებას და ხელისუფლებაც ყველაფერს გააკეთებს, რომ არ მიატოვოს ისინი და მალე დააბრუნოს სახლებში.

მათ ყველაფერი გააკეთეს – შეასრულეს ბრძანება, უკრაინას ბოლომდე იცავდნენ. ახლა ხელისუფლებამ უნდა შეასრულოს თავისი დაპირება და მათი სიცოცხლე გადაარჩინოს.

___

ავტორი: სევგილ მუსაიევა

თარგმნა: თამარ რუხაძემ

მთავარი ფოტო: დენის პროკოპენკო/ფოტო pravda.com.ua

დიდი ბრიტანეთის დაზვერვა 6 ივნისს ტვიტერზე გავრცელებულ რელიზში 5 ივნისის მოვლენებსა და უკრაინის ფრონტზე არსებულ საერთო სიტუაციას მიმოიხილავს.

უწყების ინფორმაციით, 5 ივნისის დილას კიევის სარკინიგზო ინფრასტრუქტურაზე სარაკეტო თავდასხმით რუსეთს სურდა, დასავლეთის მიერ გადაცემული სამხედრო ტექნიკის უკრაინული დანაყოფებისთვის მიწოდება შეეფერხებინა.

„დონბასში, სევეროდენცკში ბრძოლა გრძელდება, რუსეთის ჯარები ცდილობენ შეტევას სლოვიანსკისკენ, რაც უკრაინის ძალების ალყაში მოსაქცევად მათი გეგმის ნაწილია“, – წერს ბრიტანეთის დაზვერვა.

სადაზვერვო ცნობარის თანახმად, კრეისერ „მოსკვას“ ჩაძირვის შემდეგ რუსეთი შავ ზღვაში თავისი ფლოტის დაცვას ცდილობს.

„კრეისერ „მოსკვას“ დაკარგვის შემდეგ რუსეთმა შავი ზღვის დასავლეთ ნაწილში, ზმეინის კუნძულზე, გადაისროლა საჰაერო თავდაცვის სისტემები, მათ შორის, SA-15 და SA-22. სავარაუდოდ, ეს იარაღი განკუთვნილია ზმეინის კუნძულზე მყოფი რუსეთის სამხედრო გემების დასაცავად“.

დაზვერვა მიუთითებს, რომ რუსეთის აქტიურობა ზმეინის კუნძულზე ახანგრძლივეს უკრაინის სანაპიროს ბლოკადას და ხელს უშლის საზღვაო ვაჭრობის აღდგენას, მათ შორის, უკრაინული ხორბლის ექსპორტს.

გაერთიანებული სამეფოს თავდაცვა უკრაინაში მიმდინარე მოვლენების განახლებას ყოველდღიურად აქვეყნებს. 5 ივნისს ბრიტანეთის დაზვერვა სევეროდენცკში უკრაინელთა კონტრშეტევაზე იუწყებოდა.

___

მთავარი ფოტო: რუსეთის სამხედრო ხომალდები აღლუმზე სანკტ-პეტერბურგში/EPA

ესპანეთი უკრაინას სარაკეტო კომპლექსებს – Shorad Aspide-ებსა და გერმანელ მეორად ტანკებს, Leopard A4-ებს მიწოდებს – ამის შესახებ ესპანური გამოცემა, El Pais-ი წერს, სამთავრობო წყაროებზე დაყრდნობით.

გამოცემის ცნობით, უკრაინას ესპანეთი, სავარაუდოდ, 40 გერმანულ, შეკეთებულ ტანკს გადასცემს და უკრაინელ სამხედროებს ამ ტექნიკის გამოყენებასაც ასწავლის. ტრენინგის პირველი ეტაპი ლატვიაში იგეგმება.

ესპანეთმა უკრაინას უკვე გადასცა  200 ტონა იარაღი და სამხედრო აღჭურვილობა აპრილის ბოლოს.

21 აპრილს უკრაინაში იმყოფებოდა ესპანეთის პრემიერ-მინისტრი პედრო სანჩესი.  „ჩვენ უკრაინელ ხალხს მარტო არ დავტოვებთ”, – განაცხადა მაშინ ესპანეთის პრემიერ-მინისტრმა ტვიტერზე.

______________

ფოტოზე: ესპანეთის პრემიერ მინისტრი, პედრო სანჩესი და დანიის პრემიერი მეტე ფრედერიკსენი ესაუბრებიან უკრაინის ვიცე-პრემიერს ევროპულ საკითხებში ოლგა სტეფანიშინას. ბოროდიანკა, უკრაინა. 21 აპრილი. ფოტო: EPA/MIGUEL GUTIERREZ

უკრაინის საგარეო საქმეთა მინისტრი, დმიტრო კულება, საფრანგეთის პრეზიდენტის, ემანუელ მაკრონის განცხადებას გამოეხმაურა.

როგორც „როიტერსი“ წერს, მაკრონმა რეგიონულ გაზეთში 4 ივნისს გამოქვეყნებულ ინტერვიუში კიდევე ერთხელ გაუსვა ხაზი რუსეთისთვის დამცირების არიდების აუცილებლობას.

საფრანგეთის პრეზიდენტი მიიჩნევს, რომ პუტინის „ისტორიული შეცდომის“ მიუხედავად, აუცილებელია, რომ არ უნდა დავამციროთ რუსეთი, რათა ომის დასრულების შემდეგ დიპლომატიური საუბრებისთვის დარჩეს ადგილი.

ჩვენ არ უნდა დავამციროთ რუსეთი, რათა იმ დღეს, როდესაც ბრძოლები შეწყდება, შევძლოთ გამოსავლის პოვნა დიპლომატიური გზებით,“ – ციტირებს „როიტერსი“ ემანუელ მაკრონს, რომელმაც იქვე აღნიშნა, რომ სჯერა, საფრანგეთს როლია იყოს შუამავალი.

დმიტრო კულებამ რუსეთის დამცირების თავიდან აცილების მოწოდებას სამარცხვინო უწოდა მათთვის, ვინც მას აკეთებს. მისი თქმით, რუსეთი თავად ირცხვენს თავს და აჯობებს თუ ყველა „რუსეთისთვის თავისი ადგილის მიჩენაზე“ ფოკუსირდება, რადგან ეს გადაარჩენს სიცოცხლეებს და დაამყარებს მშვიდობას.

„რუსეთის დამცირების თავიდან აცილებაზე მოწოდებებს მხოლოდ შეუძლია დაამციროს საფრანგეთი და ყველა სხვა ქვეყანა, რომელიც მსგავს მოწოდებას გააკეთებს. რადგან რუსეთი თავად ირცხვენს თავს. აჯობებს ყველა ჩვენგანი იმაზე ვფოკუსირდეთ, თუ როგორ მივუჩინოთ რუსეთს თავისი ადგილი. ეს მოიტანს მშვიდობას და გადაარჩენს სიცოცხლეებს,“ – წერს უკრაინის საგარეო საქმეთა მინისტრი.

See more

Calls to avoid humiliation of Russia can only humiliate France and every other country that would call for it. Because it is Russia that humiliates itself. We all better focus on how to put Russia in its place. This will bring peace and save lives.

— Dmytro Kuleba (@DmytroKuleba) June 4, 2022

დონბასში რუსეთის ავიაციის მიერ უმართავი რაკეტების ფართოდ გამოყენებამ გამანადგურებელი ზიანი და სერიოზული მსხვერპლი გამოიწვია – მიიჩნევს დიდი ბრიტანეთის დაზვერვა, რომელიც ტვიტერზე გამოქვეყნებულ პოსტში რუსული ავიაციის მოქმედებას მიმოიხილავს.

უწყების ცნობით, ომის დასაწყისში, რუსეთმა ვერ შეძლო, მნიშვნელოვანი ზიანი მიეყენებინა ან სრულად გაენადგურებინა უკრაინის საჰაერო თავდაცვის სისტემები, რამაც მკვეთრად შეზღუდა მისი შესაძლებლობა თავის სახმელეთო ოპერაციებს ჰაერიდან დახმარებოდა და წარმატებული შეტევა განეხორციელებინა კიევზე. ამიტომაც, რუსეთის ავიაცია უმეტესწილად ცდილობდა, ფრთოსანი რაკეტების გამოყენებინით შეეფერხებინა უკრაინის შეიარაღებული ძალების გადაადგილება და საბრძოლო მასალების გადატანა.

დაზვერვა აღნიშნავს, რომ ამ დარტყმებს ომის მიმდინარეობაზე სერიოზული გავლენა არ მოუხდენია.

„დონბასზე კონცენტრირებით, რუსეთმა შეძლო, გაეზარდა ტაქტიკური ავიაციის გამოყენება თავისი სახმელეთო შეტევის დასახმარებლად და ერთდროულად ეწარმოებინა საჰაერო და საარტილერიო შეტევები. სწორედ ავიაციისა და არტილერიის კომბინირებული გამოყენება იქცა რეგიონში რუსეთის წარმატების გადამწყვეტ ფაქტორად“ – მიუთითებს დიდი ბრიტანეთის დაზვერვა.

უწყება წერს, რომ რუსეთის ავიაცია რეგიონში კვლავაც აქტიურად განაგრძობს შეტევებს, სამხედრო თვითმფრინავები იყენებენ როგორც მართვად, ისე უმართავ საბრძოლო საშუალებებს.

„უმართავი საბრძოლო საშუალებების ფართოდ გამოყენებამ გამოიწვია დასახლებული პუნქტების ფართომასშტაბიანი ნგრევა და დიდი ალბათობით, გაზარდა მსხვერპლი მშვიდობიან მოსახლეობაში.“

გაერთიანებული სამეფოს თავდაცვა უკრაინაში მიმდინარე მოვლენებზე სადაზვერვო ცნობებს ყოველდღიურად აქვეყნებს. გუშინდელ განახლებაში უწყება ომის 100 დღეს აფასებდა და აღნიშნავდა, რომ რუსეთმა, ამ ხნის განმავლობაში, ვერცერთ სტრატეგიულ მიზანს ვერ მიაღწია.