ბათუმში, 26 მაისის N13-ში, ახალი საცხოვრებელი სახლის მშენებლობის საპროექტო-სახარჯთაღრიცხვო დოკუმენტაციის შედგენისთვის ქალაქის ბიუჯეტიდან 475 ათასი ლარია გამოყოფილი.
პროექტის შედგენაზე კონკურსი საქალაქო ინფრასტრუქტურისა და კეთილმოწყობის სამმართველომ, ბათუმში, ავარიული სახლების დემონტაჟი-მშენებლობა, გამაგრება-რეაბილიტაციის პროგრამის ფარგლებში გამოაცხადა.
26 მაისის ქუჩის N13-ში საცხოვრებელი კორპუსი 2021 წლის 8 ოქტომბერს ჩამოინგრა. გამოძიების ვერსიით, სახლის ჩამონგრევა საყრდენი კედლის მოშლამ გამოიწვია. შემთხვევას 9 ადამიანის, მათ შორის სამი ბავშვის სიცოცხლე ემსხვერპლა.
კონკურსში წინადადებების მიღება 2022 წლის 15 ივნისს დაიწყება და 20 ივნისს დასრულდება. პროექტი და ხარჯთაღრიცხვა, რომლის საფუძველზეც შემდეგ ახალ საცხოვრებელ კორპუსს ააშენებენ, კონკურსში გამარჯვებულთან ხელშეკრულების გაფორმებიდან 3 თვეში უნდა მომზადდეს.
მიწის ნაკვეთის საერთო ფართობი, სადაც ახალი კორპუსი უნდა დაპროექტდეს, 1615 კვ.მ-ია.
ის ოჯახები, რომლებიც 26 მაისის N13 კორპუსში ცხოვრობდნენ, ქალაქის მერიას ქირით ჰყავს გაყვანილი.
ამავე თემაზე:
წერილი ბათუმის მერიას კორპუსის ჩამონგრევამდე 50 დღით ადრე და მერიის განმარტება
