უკრაინის პრეზიდენტის ადმინისტრაციის ხელმძღვანელი, მიხაილო პოდოლიაკი, გამოეხმაურა სერგეი ლავროვის სერბეთში ვიზიტის გაუქმებას.
ლავროვის ვიზიტის გაუქმების მიზეზი სერბეთის მეზობელი ქვეყნების მიერ მისი თვითმფრინავისთვის საჰაერო სივრცის დახურვა გახდა.
„რუსეთი კიდევ ერთხელ იმუქრება ბირთვული იარაღის გამოყენებით – ემუქრება მონტენეგროს ლავროვის თვითმფრინავის [საჰაერო სივრცეში] არშეშვების გამო და ბრალს სდებს „საერთო ისტორიის“ ღალატში. გულისხმობენ ჩინოვნიკების ვილებსა და იახტებს ადრიატიკის სანაპიროზე? ქვეყნები, რომლებიც ინარჩუნებენ რუსულ აქტივებს, უნდა დაფიქრდნენ“, – წერს პოდოლიაკი.
„როიტერსის“ ცნობით, „რუსეთი მონტენეგროს, – ნატოს წევრისა და ევროკავშირის წევრობის კანდიდატ ქვეყანაში, – ეკონომიკის დიდი ინვესტორია“ და „ბევრ რუს ოლიგარქს აქვს უძრავი ქონება და იახტები მონტენეგროში“. გამოცემის ინფორმაციით, „მონტენეგროს შემოსავლის მნიშვნელოვანი წყაროა ტურიზმი რუსეთიდან და უკრაინიდან“.
როგორც „ნეტგაზეთი“ წერს, სერგეი ლავროვის ვიზიტი გაუქმდა, რადგან სერბეთის სამმა მეზობელმა სახელმწიფომ ლავროვის თვითმფრინავი თავიანთ საჰაერო სივრცეში არ შეუშვა.
ბულგარეთმა (რომელიც ევროკავშირის წევრია) ჩრდილოეთ მაკედონიასთან და მონტენეგროსთან ერთად (რომლებიც ევროკავშირის წევრობის მსურველი სახელმწიფოები არიან) დააწესა აკრძალვა ფრენაზე.
ლავროვი 6-7 ივნისს უნდა შეხვედროდა სერბეთის პრეზიდენტ ალექსანდარ ვუჩიჩს.
სერბეთი, სხვა არაერთი ევროპული ქვეყნის მსგავსად, დიდწილად არის დამოკიდებული რუსულ გაზზე. ამასთან, მათ შორის ძლიერი კულტურული კავშირები არსებობს. უკრაინაში რუსეთის შეჭრის ფონზე, სერბეთი ჯერ არ შეერთებია ევროკავშირის, შეერთებული შტატებისა და სხვების დაწესებულ სანქციებს რუსეთის წინააღმდეგ.
