Batumelebi

ბათუმში, ლუკა ასათიანისა და მარჯანიშვილის ქუჩების კვეთაში მდებარე ძეგლის ფასადის ნანგრევები სადარბაზოს შესასვლელებშია დალაგებული. აქ მცხოვრებლებმა იციან, რომ სახლი კულტურული მემკვიდრეობის ძეგლია და მისი ფასადის ჩამონგრეული ნაწილებიც კი მნიშვნელოვანია, ამიტომაც შენობის ფასადის ჩამოვარდნილ ნაწილებს საგულდაგულოდ ინახავენ.

სამსართულიანი სახლი ბათუმში ერთ-ერთი ყველაზე გამორჩეული შენობაა თავისი არქიტექტურით, მისი ფასადი შემკულია ძველი მასკარონებითა და ჩუქურთმებით. გარდა ამისა, ამ სახლს აქვს შენარჩუნებული ძველი, ნაძერწი ჩუქურთმებით შემკული სადარბაზო.

სპეციალისტების დახასიათებით:

„ლუკა ასათიანისა და მარჯანიშვილის ქუჩების კვეთაზე მდგარი ორსართულიანი სახლის არქიტექტურა კლასიცისტურ-ბაროკოული სტილითაა გამორჩეული. სახლის გარე ფასადიცა და სადარბაზოც ნაძერწი დეტალებით უხვადაა დატვირთული. შენობა XX საუკუნის დასაწყისის ეკლექტური არქიტექტურის საინტერესო ნიმუშს წარმოადგენს.“

აქ მცხოვრებლების ინფორმაციით, პირველი შემთხვევა არ არის, როცა ძეგლის ფასადიდან ბეტონის ნაწილები ჩამოცვივდა. გარდა ამისა, სახურავიდან წყალი ჟონავს, განსაკუთრებით ცუდ მდგომარეობაშია სახლის მესამე სართული:

„ამ დრომდე ვფიქრობდით, რომ ძეგლია და აქ თუ რამე გავაკეთეთ, ყველაფერი სააგენტოსთან შეთანხმებით, კედლების ფერიც კი შევათანხმეთ. ახლა უსაფრთხოებაზეც ვფიქრობთ, ვინმე გამვლელს ან ეზოში ბავშვს რომ დაეცეს ეს ნაწილები, სერიოზულად შეიძლება დაშავდეს, ზოგი მათგანი მძიმეა. გარდა ამისა, სახურავიდან წყალი ჟონავს და კედლები სველდება. თანახმა ვართ ყველაფერი კანონის შესაბამისად გავაკეთოთ, როგორც სააგენტო განგვისაზღვრავს, მაგრამ სახურავის და ფასადის ხარჯებს ვერ გავწვდებით. დაგვპირდნენ, რომ სახურავს და ფასადს ბიუჯეტის ხარჯებით მოაწესრიგებდნენ, თუმცა, როგორც ვიცით, წელს არ ჩაგვსვეს ბიუჯეტში.“

აქ მცხოვრებლებმა სააგენტოს გასულ წელსაც მიმართეს. ოფიციალური პასუხის მიხედვით, ძეგლის ფასადის და სახურავის რესტავრაციის პროექტის შესყიდვა და შესაბამისი სამუშაოები 2022 წლის ბიუჯეტით უნდა ყოფილიყო დაფინანსებული. თუმცა გუშინ, 15 ივნისს, სააგენტოში გვითხრეს, რომ ეს ყველაფერი მომავალ წელს დაფინანსდება.

გარემოსდაცვითი ზედამხედველობის დეპარტამენტის ინფორმაციით, 65-65 ათასი ლარით დააჯარიმეს გემები, რომლებმაც ბათუმსა და ფოთში შავი ზღვა დააბინძურეს.

„გამოვლინდა შავი ზღვის დაბინძურების 3 ფაქტი. პანამის, ლიბერიისა და ტანზანიის დროშების ქვეშ მცურავმა გემებმა შავი ზღვა სამეურნეო წყლებით დააბინძურეს.

ფოთისა და ბათუმის სასამართლოებმა სამივე გემი სამართალდამრღვევად ცნო და თითოეულს 65-ათასლარიანი ჯარიმა დააკისრა. გარემოსთვის მიყენებული ზიანის ჯამურმა თანხამ კი, 64 ათასამდე ლარი შეადგინა“, – ამბობს გარემოსდაცვითი ზედამხედველობის დეპარტამენტი.

მათივე ინფორმაციით, პანამის, ლიბერიისა და ტანზანიის დროშების ქვეშ მცურავ გემებს საქართველოს ტერიტორიული წყლების დატოვებისა და თავისუფალი ნაოსნობის უფლება დაკისრებული საჯარიმო სანქციისა და გარემოსთვის მიყენებული ზიანის თანხის გადახდის შემდეგ მიეცა.

დიდი ბრიტანეთის დაზვერვა 16 ივნისის განახლებას მთლიანად სევეროდენცკში არსებულ ვითარებს უძღვნის. უწყების ინფორმაციით, სავარაუდოდ, განადგურებულია მდინარე სევერსკი დონეცის ყველა მთავარი ხიდი, რომელიც „სადავო“ ქალაქ სევეროდენცკს უკრაინის კონტროლირებად ტერიტორიებთან აკავშირებს.

დაზვერვა მიუთითებს, რომ უკრაინის საბრძოლო ძალების დიდმა ნაწილმა უკან დახევა მოასწრო, თუმცა ვითარება ძალიან რთულია იმ უკრაინელი სამხედროებისა და მოქალაქეებისთვის, რომლებიც მდინარის აღმოსავლეთით რჩებიან.

„დანგრეული ხიდების ფონზე, რუსეთს მოუწევს ან გადალახოს მდინარე, ან განაახლოს შეტევა ფლანგებზე, რომლებზეც ახლა გაჭედილია, რათა თავისი ტაქტიკური წარმატება ოპერაციულ უპირატესობად აქციოს“, – წერს ბრიტანეთის დაზვერვა.

უწყების ცნობით, რუსეთის სამხედრო ძალები დონბასში ძალიან ცუდად დაკომპლექტებული დანაყოფებისგან შედგება:

„უკრაინის ხელისუფლების მტკიცებით, რუსული ბატალიონისგან შემდგარ ტაქტიკურ ჯგუფებებში, რომლებშიც, როგორც წესი, 600-800 ადამიანი უნდა იყოს, მხოლოდ 30 სამხედროა.“

დაზვერვა აღნიშნავს, რომ ქალაქში, ფრონტის ხაზზე, ბრძოლებში ძირითადად ქვეითები არიან ჩართული, ასეთ გარემოში კი, ნაკლებად აქტუალურია რუსეთის უპირატესობა ტანკებში, რაც სავარაუდოდ, რუსეთის სწრაფ წინსვლას უშლის ხელს.

გუშინდელ სადაზვერვო ცნობარში, გაერთიანებული სამეფოს თავდაცვა აღნიშნავდა, რომ რუსეთის არმია სევეროდენცკის უდიდეს ნაწილს აკონტროლებს, ინდუსტრიული ზონის გარდა. უკრაინის შეიარაღებული ძალების ნაწილები და ასობით მშვიდობიანი მოქალაქე კი, ქიმიური ქარხანა „აზოტის“ მიწისქვეშა ბუნკერებს აფარებენ თავს.

მთავარი ფოტო: კვამლი სევეროდენცკის თავზე/სქრინი ვიდეოდან

საქართველოს საგარეო საქმეთა სამინისტროს ცნობით, დღეიდან ძალაში შევიდა საქართველოსა და არაბთა გაერთიანებულ საემიროებს შორის უვიზო მიმოსვლის რეჟიმი.

შეთანხმების თანახმად, ორი ქვეყნის ორდინალური პასპორტის მფლობელები შეძლებენ უვიზოდ შევიდნენ, ტრანზიტით გადაადგილდნენ და იმყოფებოდნენ მეორე მხარის სახელმწიფოს ტერიტორიაზე არაუმეტეს ოთხმოცდაათი (90) დღისა შესვლის თარიღიდან.

„განხორციელებული ცვლილებებით, გაფართოვდა „2017 წელს საქართველოს მთავრობასა და არაბთა გაერთიანებული საემიროების მთავრობას შორის დიპლომატიური და სპეციალური/სამსახურებრივი პასპორტების მფლობელთათვის უვიზო მიმოსვლის შესახებ“ ურთიერთგაგების მემორანდუმი, რომელიც ემსახურება საქართველოსა და არაბთა გაერთიანებული საემიროების მოქალაქეთა მიმოსვლის გამარტივებას,“ – წერს სამინისტრო.

_________

ფოტოზე: დუბაი. ფოტო: ვიკიპედია

ბათუმელი მოჭადრაკე ნინო ბაციაშვილი მეოთხედ გახდა საქართველოს ჩემპიონი ჭადრაკში, ქალთა შორის.

„ბათუმელმა დიდოსტატმა სასტარტო მარცხის შემდეგ ზედიზედ 8 პარტია მოიგო და მეოთხედ მოიპოვა ქვეყნის ჩემპიონის ტიტული. აღსანიშნავია, რომ ნინო 2015, 2018 და 2020 წლებში უკვე ფლობდა ქვეყნის პირველი მოჭადრაკის წოდებას,“ – იუწყება საქართველოს ჭადრაკის ფედერაცია.

ფედერაციის ცნობით, გამარჯვებულს მხოლოდ ნახევარი ქულით ჩამორჩა კიდევ ერთი ბათუმელი მოჭადრაკე, სალომე მელია.

„სალომე ერთადერთი მონაწილეა, რომელმაც მარცხის გარეშე განვლო ტურნირი და ჩემპიონს ერთადერთი ქულა დააკარგვინა,“ – წერს საქართველოს ჭადრაკის ფედერაცია.

მესამე ადგილზე საკმაოდ მაღალი შედეგით – 9-დან 7 ქულა, საქართველოს ოთხგზის ჩემპიონი, ლელა ჯავახიშვილი გავიდა.

ნინო ბაციაშვილი 2018 წლიდან საერთაშორისო დიდოსტატია მამაკაცთა შორის. იგი მეხუთე ქალია საქართველოში, რომელმაც ეს წოდება მიიღო და 36-ე ქალი მსოფლიოში, რომელსაც გროსმაისტერის წოდება აქვს. საქართველოში გროსმაისტერის წოდება აქვს ნონა გაფრინდაშვილს, მაია ჩიბურდანიძეს, ნანა ძაგნიძესა და ბელა ხოტენაშვილს.

სოციოლოგი იაგო კაჭკაჭიშვილი მიიჩნევს, რომ ამ დღეებში მკაფიოდ გამოჩნდება, რამდენად არის საქართველოში საზოგადოების გააზრებული არჩევანი ის, რაც აქამდე გამოკითხვებში არაერთხელ გამოჩნდა – მოსახლეობის 80 პროცენტი ირჩევს ევროინტეგრაციას. იაგო კაჭკაჭიშვილს ვკითხეთ – რა ეფექტი აქვს ფარდის ახდას ხელისუფლებაზე, რომელიც უკვე აღარ მალავს ანტიდასავლურ განწყობას?

„ვიმუქრებით ფარდით ახდით, მაგრამ ფარდა უკვე ჩვენზეა ახდილი“ – ღარიბაშვილისგან დაანონსებულ ფარდის ახდას გუშინ, 14 ივნისს, ამ ფრაზით გამოეხმაურა საქართველოს პრეზიდენტი სალომე ზურაბიშვილი.

• ბატონო იაგო, თქვენი დაკვირვებით, რა ეფექტი აქვს ფარდის ახდას ხელისუფლებაზე, რომელიც აღარ მალავს ანტიდასავლურ დამოკიდებულებას მოსახლეობის წინაშე, რომლის 80-მდე პროცენტი [სხვადასხვა კვლევით] ირჩევს დასავლეთს?  

გამოიკვეთა უპირველესად ის, რომ ანტიდასავლური რიტორიკა ხელისუფლების მხრიდან უკვე ცალკეულ ევროპარლამენტარებს კი არა, მიემართება მთლიანად ევროკავშირის ინსტიტუციებს.

ეს არის ძალიან მნიშვნელოვანი ცვლილება, როცა მთლიანად ევროკავშირის ინსტიტუციები გამოდის მარგინალიზებული, რომლებიც, საქართველოს ხელისუფლების აზრით, საქართველოს მტრები არიან.

ეს აღარ არის მხოლოდ ანტიდასავლური რიტორიკა, რომელიც გადაიზრდება ანტიდასავლურ პოლიტიკაში და მოიტანს იზოლაციას დასავლურ სტრუქტურებთან. მათი ეს რიტორიკა შეიძლება გავრცელდეს ამერიკის სახელმწიფო დეპარტამენტზე, კონგრესზე და ასე შემდეგ.

ჯერ ასეთი მჭახე არ ყოფილა „ოცნება“ ამერიკის მიმართ, თუმცა შეგვიძლია ვთქვათ, რომ იმავეს იტყოდნენ, კონგრესს რომ მიეღო იმ ტიპის რეზოლუცია, რაც ევროპარლამენტმა მიიღო.

• ესეც ხომ მკაფიოდ ჩანს, სად აღმოჩნდება საქართველო დასავლეთისგან იზოლაციის შემთხვევაში? 

შესაძლოა, ეს რიტორიკა შეცვალონ კანდიდატის სტატუსზე მიღებული გადაწყვეტილების შემდეგ, შეარბილონ და ასე შემდეგ. მე ამას არ გამოვრიცხავ ვითარებაში, რომელშიც ახლა ვიმყოფებით.

ცხადია, დასავლური სტრუქტურებისგან იზოლაცია ბუნებრივად წარმოშობს ორიენტაციას რუსეთზე.

შესაძლოა, ვინმე ფიქრობდეს – აი, რატომ რუსეთზე? საქართველოს შეუძლია იყოს თვითკმარი სახელმწიფო, რომელიც ნაციონალური ინტერესების განვითარებაზე იფიქრებს და არ იქნება არავის პროტექტორატის ქვეშ. მაგალითად, ამ იდეას აჟღერებს „პატრიოტთა ალიანსი,“ რომ ჩვენ პრორუსები კი არა, პროქართველები ვართ, მაგრამ ეს ხომ ილუზიაა? საქართველოს არ შეუძლია მსოფლიოსგან იზოლირებულად არსებობა, ის რომელიღაც გავლენის ორბიტაზე უნდა აღმოჩნდეს.

თუ ჩვენ არ გვინდა აღმოვჩნდეთ ევროკავშირის და, ზოგადად, დასავლური სტრუქტურების გავლენის ორბიტაზე, მაშინ იძულებული ვიქნებით, აღმოვჩნდეთ ალტერნატიულ ორბიტაზე. ყველაზე ძლიერი ალტერნატივა დასავლური სტრუქტურებისა კი რუსეთია. ეს არის ყველაზე შემაშფოთებელი.

ჯერ კიდევ ასატანი იყო აქამდე, როცა „ქართული ოცნების“ კრიტიკა მიემართებოდა ინდივიდებს, ახლა კი ის მიემართება მთლიანად ინსტიტუციებს. ეს არაკონსტიტუციურია, რადგან კონსტიტუციის 78-ე მუხლი პირდაპირ ავალდებულებს ხელისუფლებას, რომ ხელი შეუწყოს დასავლურ სტრუქტურებთან ინტეგრაციას.

შესაბამისად, ჩვენ ვიღებთ ორ რამეს: ანტიკონსტიტუციურ ქმედებას და დასავლეთისგან იზოლაციას, რაც გულისხმობს თავისთავად რუსულ ორბიტაში მოქცევას.

• ვიდრე კვლევები ჩატარდება, რა შეიძლება იყოს საზომი იმისთვის, რომ გავიგოთ, როგორ აღიქვამს ხელისუფლებას ამგვარ პოზიციონირებას ამომრჩეველი, განსაკუთრებით კი, ე.წ. გადაუწყვეტელი ამომრჩეველი, რომელიც აქამდე პოლიტიკური არჩევანის არქონის გამო პასიურ მდგომარეობაში რჩებოდა? 

არ შეიძლება ცალსახად იმის თქმა, რომ ორიენტაციის შეცვლა არის წინააღმდეგობაში საზოგადოების განწყობებთან. ერთი შეხედვით თითქოს ასე ჩანს, რომ აშკარად წინააღმდეგობაშია, თუ გავითვალისწინებთ საზოგადოებრივი აზრის გამოკითხვებს, რომ 80 პროცენტზე მეტი ევროკავშირში გაწევრიანების მომხრეა, მაგრამ ჯერ კიდევ არ ვიცით, რამდენად მყიფე და სტაბილურია ასეთი საზოგადოებრივი აზრი.

საქმე რაშია: ევროკავშირში, დასავლეთის სტრუქტურებში ინტეგრაციის მიმართ საზოგადოების მხარდაჭერა, ჩემი აზრით, შესაძლოა იყოს ზემოდან პოლიტიკური ელიტებისგან პროვოცირებული მას შემდეგ, რაც საქართველომ მოიპოვა დამოუკიდებლობა. რამდენად არის ევროპა საქართველოს მოქალაქეების შინაგანი, ანუ ინტერნალური ორიენტაცია, ამას სჭირდება შემოწმება.

• ეს გამოჩნდება ამ დღეებში? 

დიახ, გამოჩნდება ეს ერთი და მეორეც – ევროკავშირზე ორიენტაცია მხოლოდ ზოგადი განაცხადი ხომ არ არის? ეს გულისხმობს გარკვეული ღირებულებების პატივისცემას. ეს ორიენტაცია შეიძლება დავშალოთ გარკვეულ ინდიკატორებად, მაგალითად, უმცირესობის უფლებების დაცვა, რელიგიური უმცირესობები, სექსუალური უმცირესობები და სხვა. არის აქ ევროპული ორიენტაციის კონტექსტში საზოგადოება მზად დაიცვას ეს უფლებები? – მე არ ვარ დარწმუნებული ამაში.

ასევე, მაგალითად, ევროკავშირში გაწევრიანება ნიშნავს ისეთი ფუნდამენტური ღირებულების პატივისცემას, როგორიცაა შრომის ღირებულება. ადამიანებს აქვთ წარმოდგენა, რომ ევროკავშირში გაერთიანება ნიშნავს მიერთებას რაღაც მეწველ ძროხასთან, საიდანაც მოდის სიკეთე გარკვეული გარჯის გარეშე.

მე იმედს მაძლევს ის, რომ რუსეთის ურთიერთობა საქართველოსთან მთლიანად იმდენად ტრავმულია, იმდენი უბედურება მოუტანა და მოაქვს რუსეთს საქართველოსთვის, რომ ეს შესაძლოა ევროპასთან ინტეგრაციის იდეის მხარდასაჭერად საკმარისი გახდეს. ეს ნეგატიური მობილიზაცია არის ახლა მნიშვნელოვანი, რადგან საქართველოს მოქალაქეების ცნობიერება შეიძლება არ არის მზად ევროპული ღირებულებებისთვის, მაგრამ ის არის მზად რუსული სივრცის უარსაყოფად, რაც არაა მცირე ფაქტორი.

ეს შესანიშნავად იცის ხელისუფლებამაც და ამიტომაცაა, რომ ანტიდასავლურ რიტორიკას ავითარებენ, თუმცა, ამავე დროს, რუსეთზე დადებითად არ საუბრობენ.

• ახლა, როცა ევროპაზე მმართველი პოლიტიკური პარტია პრაქტიკულად უარს ამბობს, რამდენად იმუშავებს, თქვენი დაკვირვებით, „ოცნების“ მთავარი პოლიტიკური გზავნილი – „ყველაფერი ნაციონალური მოძრაობის ბრალია“? 

ამ შემთხვევაში უკვე „ნაციონალური მოძრაობა“ აღარაა წინა პლანზე და „ოცნებისთვის“ გაფართოვდა  „საქართველოს მტრების“ ჰორიზონტი, უკვე გლობალური სია აქვს მმართველ ძალას და თუკი აქამდე გაიტანა ის გზავნილი, რომ აი, „ნაცები“ ცუდები არიან და ჩვენ – კარგები, ახლა მოუწევს დაამტკიცოს, რომ ევროპა ცუდია და ჩვენ კარგები. ვფიქრობ, ეს გაუჭირდება.

• დღეს ისმოდა შეფასებები, რომ პრეზიდენტის მიერ დაანონსებული პარალელური აქცია დაქსაქსავს საზოგადოების განწყობას, რადგან გაურკვევლობა მუშაობს ცუდად. თქვენ რა მოლოდინი გაქვთ? 

მესმის ერთგვარი წყენა „სირცხვილიას“ და სხვების, მაგრამ აქ მთავარია მიზანი: რისთვის იკრიბებიან ადამიანები? ეს ხომ „უცნობის“, ან „ქართული ოცნების“ ორგანიზებული აქცია არ არის? ამ აქციის მიზანია ევროპაში ინტეგრაციის მხარდაჭერა, აქაც უნდა მივიდეთ და იქაც.

მე ყველას დავუფასებდი აქტიურობას.

„ერთ თვეზე მეტია აჭარის დასაქმების სააგენტოსთან და დასაქმების ხელშეწყობის სახელმწიფო სააგენტოსთან ერთად ვმუშაობთ. ყველა დეტალი გავიარეთ, როგორ უნდა ყოფილიყო უფრო კომფორტული გარემო შშმ პირებისთვის… ეს პირველი მცდელობა იყო, ერთიან სივრცეში მოგვეხდინა დასაქმების მსურველი შშმ პირებისა და სოციალური პასუხისმგებლობის მქონე დამსაქმებლების მობილიზება. მომავალ წელს კიდევ უფრო ფართო მასშტაბის იქნება,“ – ამბობს დეა ერემაშვილი.

დეა ერემაშვილი, სხვადასხვა კითხვარის საშუალებით, სამუშაოს მაძიებელი შშმ პირებისა და შრომის ბაზრის მოკვლევას აწარმოებს. ის ამბობს, რომ ერთ-ერთი ძირითადი პრობლემა შშმ პირებს შორის უმუშევრობის მაღალი მაჩვენებლისა, სკოლის შემდეგი განათლების კომპონენტია, რომელიც შშმ ადამიანების დიდ ნაწილს გამოტოვებული აქვს.

„მოკვლევიდან რეალურად გამოჩნდა, რომ 18 წლის ასაკის ზემოთ შშმ პირების უმრავლესობას სკოლის გარდა სხვა განათლება არ აქვს მიღებული. შესაბამისად, ეს პრობლემას ქმნის იმ მხრივ, რომ ვაკანსია არის, მაგრამ არ გვყავს შესაბამისი ცოდნის მქონე შშმ პირი, რომელიც შესაძლოა დასაქმდეს ამ პოზიციაზე.

განათლების გარეშე შანსი ძალიან დაბალია იმისა, რომ ნორმალური ანაზღაურებით სამსახური იშოვოს ადამიანმა. იმას თუ გავითვალისწინებთ, რომ შშმ პირს მეტი ხარჯი აქვს, თუნდაც ასეთი უამინდობის დროს, რომ შეეძლოს ტაქსით გადაადგილება, მათთვის დასაქმება ძალიან მნიშვნელოვანია.

ბევრია სამუშაო ოჯახებთან, რომ ბავშვებს გააგრძელებინონ სკოლის შემდეგ სწავლა, მით უმეტეს, როცა საქართველოში არის პროფესიულში უფასოდ სწავლის საშუალება. სამწუხაროა, მაგრამ ათიდან დაახლოებით ორი აგრძელებს სკოლის შემდეგ განათლებას, რაც რეალური პრობლემაა. ამას შეიძლება ახლა ვერ ვხედავთ, მაგრამ 10-15 წლის შემდეგ ძალიან დიდი გამოწვევის წინაშე დავდგებით, ისევე მწვავედ, როგორც ახლა დგას 2000 წლამდე დაბადებული შშმ პირების პრობლემა, რომელთაც არ აქვთ სკოლის ატესტატი. არიან ოჯახები, რომელთაც არ ასწავლეს შვილებს სკოლებში, მათ არ შეუძლიათ კოლეჯებში ჩაბარება, რადგან ატესტატია საჭირო და მხოლოდ მოკლევადიანი კურსებია მათთვის ხელმისაწვდომი.

„ბრიუსელში დამხვდა გაფუჭებული საქმე“ – განაცხადა საქართველოს პრეზიდენტმა გუშინ, საგანგებო ბრიფინგზე. ევროპიდან დაბრუნებული სალომე ზურაბიშვილი საქართველოს მთავრობას აკრიტიკებს და ამბობს, რომ მთავრობამ მიზანმიმართულად გადადგა ნაბიჯები, რაც ქვეყნის ევროინტეგრაციის წინააღმდეგ არის მიმართული და რაც აისახა კიდეც ევროპარლამენტის რეზოლუციაში.

სალომე ზურაბიშვილმა ჩამოთვალა კონკრეტული საკითხები, რომლებიც, მისი აზრით, აზიანებს ქვეყნის მომავალს ევროინტეგრაციის გზაზე და „ქართული ოცნება“ ამას შეგნებულად აფუჭებს.

„ბათუმელებმა“ საქართველოს ახალგაზრდა იურისტთა ასოციაციის ხელმძღვანელს, ნიკა სიმონიშვილს ჰკითხა, მთავრობის მიერ გაფუჭებული საქმეებიდან, როგორც პრეზიდენტი ამბობს, რომელ საქმეზე შეეძლო თავად პრეზიდენტს სამართლებრივი ან პოლიტიკური ზემოქმედება. რა არ ან ვერ გამოასწორა?

სალომე ზურაბიშვილის თქმით, ევროპარლამენტმა უარყოფითი დასკვნა დადო შემდეგი საქმეების გამო:

„5 ივლისის საქმეზე არაშედეგიანი, არაქმედითი გადაწყვეტილებები მიიღო მთავრობამ“.

ნიკა სიმონიშვილი: პრეზიდენტის უფლებამოსილებიდან გამომდინარე, ცოტა რთული წარმოსადგენია, რა შეეძლო მას გაეკეთებინა 5 ივლისის საქმესთან მიმართებით, რადგან მას არ აქვს სამართლებრივი ზემოქმედების მექანიზმი მთავრობაზე.

თუმცა მას შეეძლო პოლიტიკური განცხადებების გაკეთება და პრინციპში გვახსოვს კიდევაც მისი კრიტიკული განცხადებები ხელისუფლების წარმომადგენლების მიმართ, რომ აუცილებელია დაცული იყოს გამოხატვის თავისუფლება, თანასწორობის უფლება და ასე შემდეგ. აქ პრეზიდენტის ბრალს ნაკლებად ვხედავთ, რადგან ის რეალურად არ არის აღჭურვილი რაიმე ქმედითი აღმასრულებელი ნაბიჯებით. შესაბამისად, ვერავითარ გავლენას ვერ იქონიებდა.

რა თქმა უნდა, სახელმწიფოს მხრიდან დარღვეული იყო კონსტიტუცია, არ გატარებულა პრევენციული ღონისძიებები და სახელმწიფომ ვერ შეასრულა თავისი პოზიტიური როლი ამ საქმეში. გამოძიების ნაწილში, არც ერთი ორგანიზატორი არ დასჯილა, სახელმწიფოს მხრიდან, ფაქტობრივად, გამოძიება არ ყოფილა წარმოებული. სახელმწიფოს პასუხისმგებლობა ძალიან ცხადად ჩანს, პრეზიდენტს მეტი ზემოქმედების ბერკეტი არ ჰქონია.

სალომე ზურაბიშვილი: „უარის თქმა გენპროკურორის ახალი არჩევის წესთან დაკავშირებით, რომელიც ასევე უკავშირდებოდა შარლ მიშელის დოკუმენტს.“

ნიკა სიმონიშვილი: ამ ნაწილში აუცილებელი იყო საკანონმდებლო ცვლილება და რადგან ეს ცვლილება არ მოხდა, ეს არის პრობლემა, რადგან ეს ეფუძნება პოლიტიკური ნების არარსებობას ხელისუფლების მხრიდან და ამ შეთანხმების ანულირებას. პრეზიდენტს არც ამ შემთხვევაში აქვს მთავრობაზე ზემოქმედების ბერკეტი, რადგან ის ვერავის აიძულებს, მიიღოს რაღაც კანონი. პრეზიდენტს შეუძლია რაღაც კანონის პროცესი შეაჩეროს ვეტოთი, მაგრამ ის, რომ ვიღაც აიძულოს მიიღოს რაიმე კანონი, ამის უფლებამოსილება მას არ აქვს.

სალომე ზურაბიშვილი: „დეკემბერში კიდევ ერთი სასწაული გააკეთა მთავრობამ, გააუქმა სახელმწიფო ინსპექტორის სამსახური გაუფრთხილებლად და ესეც აჩქარებული ტემპით“.

ნიკა სიმონიშვილი: ამ შემთხვევაში პრეზიდენტს შეეძლო გამოეყენებინა თავისი დისკრეციული უფლება – ვეტო, ინსპექტორის სამსახურის კანონთან დაკავშირებით. ასევე საერთო სასამართლოების შესახებ კანონთან დაკავშირებით.

თავის დროზე მან ძალიან უარყოფითად შეაფასა სახელმწიფო ინსპექტორთან დაკავშირებული გადაწყვეტილება და ბევრს ჰქონდა იმის მოლოდინი, რომ პრეზიდენტი ვეტოს უფლებას გამოიყენებდა, თუმცა ეს არ გააკეთა.

ეს ახსნა იმით, რომ თითქოს კონსტიტუციურ-სამართლებრივი არგუმენტები არ აძლევდა ამის შესაძლებლობას. რეალურად კი, ვეტო მხოლოდ სამართლებრივი მექანიზმი არ არის, არამედ პოლიტიკურიცაა და პოლიტიკური მიზანშეუწონლობითაც შეეძლო მას ვეტოს დადება კანონზე, არაფერი უკრძალავდა ამას.

არასამთავრობო და საერთაშორისო ორგანიზაციებიც ვსაუბრობდით არა მარტო პროცესის უსწორობაზე, არამედ ამ გადაწყვეტილების და კანონის არაკონსტიტუციურობაზე.

საია წარმოადგენს სახელმწიფო ინსპექტორს ამ დავაში, სახალხო დამცველიც დავობს ამ საქმეში არაკონსტიტუციურობასთან დაკავშირებით: ძალიან ცხადია ამ ნორმების არაკონსტიტუციურობა, ამიტომ პრეზიდენტს შეეძლო კონსულტაციები გაევლო თუნდაც სახალხო დამცველთან, ჩვენთან, მოესმინა მოსაზრებები და ამის შემდეგ ემსჯელა, არსებობდა თუ არა სამართლებრივი არგუმენტები.

მან არ დაადო ვეტო არც ინსპექტორის სამსახურთან დაკავშირებულ კანონს, არც საერთო სასამართლოების შესახებ კანონში შეტანილ ცვლილებას, რომლითაც კლანს გაუმარტივდა მოსამართლეების დასჯის შესაძლებლობა. თუ არ უნდა გამოეყენებინა პრეზიდენტს ეს უფლება, აბა დღეს რატომ დგას და აკრიტიკებს მთავრობას, რომ ეს ყველაფერი იყო ძალიან ცუდი.

გასაგებია, რომ პრეზიდენტის ვეტო შედეგობრივად ვერაფერს შეცვლიდა, რადგან „ქართული ოცნება“ ვეტოს მარტივად გადალახავდა, თუმცა პრეზიდენტმა იმ კონკრეტულ შემთხვევაში თავისი პრინციპული პოზიცია არ დაიცვა და არ დარჩა ბოლომდე იმ მხარეს, რომელიც თავიდან აირჩია. სამწუხაროდ, ვეტოზე უარის თქმით, ხაზი გადაუსვა თავის პირველ ნათქვამს.

სალომე ზურაბიშვილი: „ნოემბერში იუსტიციის უმაღლესი საბჭოს წევრების დანიშვნა“.

ნიკა სიმონიშვილი: ეს ერთ-ერთი მნიშვნელოვანი და საკვანძო საკითხია. ჩვენ ვიხილეთ ბოლო ორი წლის განმავლობაში უზენაეს სასამართლოში როგორ დანიშნეს მოსამართლეები. უზენაესი სასამართლოს მოსამართლეობის კანდიდატები პარლამენტში ჰაერიდან არ მოდიან, მათ ირჩევს იუსტიციის უმაღლესი საბჭო. საბჭო წარუდგენს პარლამენტს კანდიდატებს და პარლამენტი 76 ხმით ამტკიცებს ამ კანდიდატებს.

საბჭოში როგორ მიიღება გადაწყვეტილება? – რეალურად, საბჭოს გარეშე ეს კანდიდატები პარლამენტში ვერ მოხვდებოდნენ. საბჭოში კი გვაქვს ასეთი მოცემულობა, რომ საბჭო შედგება 15 წევრისგან, რომელთაგან დღეს 10 წევრია სახეზე: პარლამენტის მიერ 4 წლის წინ არჩეულ ყველა წევრს უფლებამოსილება გაუვიდა და იმის გამო, რომ 90 ხმა არც ერთ პარტიას არ აქვს, პარტიები კი ვერ აღწევენ კონსენსუსს, ეს 5 წევრი ჰაერშია დარჩენილი.

ამიტომ საბჭო მუშაობს არა 15, არამედ 10 წევრით. ამ ათიდან ცხრა არის მოსამართლე, ხოლო ერთი წევრი არის პრეზიდენტის მიერ დანიშნული. საბჭომ გადაწყვეტილება რომ მიიღოს მოსამართლეების დანიშვნაზე, პარლამენტისთვის კანდიდატურის წარდგენაზე, აუცილებელია რომ საბჭოში 10 ხმა მაინც იყოს.

პრეზიდენტის მიერ დანიშნული წევრის გარეშე საბჭო გადაწყვეტილებას ვერ მიიღებს. შესაბამისად, ვერც პარლამენტი დაამტკიცებდა იმ მოსამართლეებს, რომელთა დამტკიცებაზეც დღეს პრეზიდენტს აქვს პრეტენზიები.

ამიტომ, პრეზიდენტის მიერ დანიშნული წევრის მონაწილეობის გარეშე, ეს პროცესი ვერ წარიმართებოდა. მეტიც, შეუძლებელი იქნებოდა უზენაესში მოსამართლეების დანიშვნა, რომ არა პრეზიდენტის მიერ დანიშნული წევრის წვლილი ამ ყველაფერში. ის იყო ბოლო ხმა, რომელიც კლანს აკლდებოდა მოსამართლეების კანდიდატურაზე მხარდასაჭერად. ის ბოლო ხმა აღმოჩნდა სწორედ პრეზიდენტის მიერ დანიშნული წევრი.

სალომე ზურაბიშვილი: „უზენაეს სასამართლოში აჩქარებული წესით ოთხი მოსამართლის დანიშვნა და სექტემბერში როცა გვთხოვდნენ ამის შეჩერებას დროებით“.

ნიკა სიმონიშვილი: უშუალოდ პრეზიდენტს ამ პროცესის შეჩერება არ შეეძლო, ამის საკანონმდებლო ფუნქცია არ აქვს, თუმცა, როგორც უკვე ვთქვი, პრეზიდენტის მიერ დანიშნულმა წევრმა ამ ყველაფერს ხელი შეუწყო. პრეზიდენტს შეეძლო ეს წევრი გამოეხმო და ამით შეეწყო პროცესებისთვის ხელი. არც ეს გააკეთა. პრეზიდენტს არც ადრე არ გამოუყენებია ეს მექანიზმი და არც ახლა გამოიყენა.

სალომე ზურაბიშვილი: „მიყურადების კანონში ცვლილებების შეტანა“.

ნიკა სიმონიშვილი: აქაც იგივე ხდებოდა, რაც ინსპექტორის და საერთო სასამართლოების კანონთან დაკავშირებით. პრეზიდენტს შეეძლო ვეტოს დადება ამ კანონპროექტზე, მით უმეტეს, როდესაც ამ კანონმდებლობასთან დაკავშირებით არაერთ ორგანიზაციას თუ მოქალაქეს აქვს სარჩელი შეტანილი საკონსტიტუციო სასამართლოში და დავობს ამ ნორმების არაკონსტიტუციურობაზე.

პრეზიდენტს საიამ მიმართა საჯარო განცხადებით, რომ ვეტოს მექანიზმი გამოეყენებინა. სამწუხაროდ, მან აქაც გვაჩვენა, რომ პრინციპული არ იყო თავის გადაწყვეტილებებში.

ვიმეორებ, „ქართული ოცნება“ ამ ვეტოსაც გადალახავდა, თუმცა ზურაბიშვილს შეეძლო ამით ეჩვენებინა თავისი პოლიტიკური ნება და პრინციპულობა.

სალომე ზურაბიშვილი: „გვარამიას უდროო დაკავება და სასჯელის ყველაზე მძიმე ფორმის, პატიმრობის გამოყენება, როცა უკვე ვიცოდით, რომ ეს საკითხები დადგებოდა ევროპარლამენტის რეზოლუციაში. მე მითხრეს, რომ სასამართლოს დროულობა არ ახასიათებს, თუმცა პოლიტიკას კი. და ჩვენ თუ გვინდა შედეგიანი პოლიტიკა ყველაფერზე დროულად უნდა ვიფიქროთ“.

ნიკა სიმონიშვილი: ამ საკითხს რამდენიმე კუთხით უნდა შევხედოთ. შეგვიძლია დავინახოთ პრეზიდენტის ლოგიკის დამადასტურებელი  და ამის საწინააღმდეგო არგუმენტებიც.

როცა პრეზიდენტი საუბრობს იმაზე, რომ დაკავების დრო არ იყო შესაფერისი და სასჯელიც არ იყო შესაბამისი, აქვე, პირველ რიგში, უნდა დაისვას კითხვა, ნიკა გვარამიას მიმართ გამოტანილი გადაწყვეტილება იყო კი საერთოდ დასაბუთებული და კანონიერი?

საიამ, სახალხო დამცველმა, „საერთაშორისო გამჭვირვალობა – საქართველომ“, მოვამზადეთ დასკვნა, ასევე საკონსტიტუციო სასამართლოს ყოფილმა მოსამართლემ მაია კოპალეიშვილმაც მოამზადა ამაზე დასკვნა და ყველა შევთანხმდით, რომ გვარამიას მიმართ განაჩენი იყო დაუსაბუთებელი და უკანონო, მოსამართლე კი მიკერძოებული.

თუ ვსაუბრობთ იმაზე, რომ განაჩენი დაუსაბუთებელია და ნიკა გვარამიას, უდანაშაულო ადამიანის მიმართ ეს განაჩენი არ უნდა ყოფილიყო გამოტანილი,  მაშინ საერთოდ როგორ ვსაუბრობთ იმაზე, დროული იყო მისთვის თავისუფლების აღკვეთა თუ არა?

როცა უდანაშაულო ადამიანზე ვსაუბრობთ, სასჯელის პროპორციულობა მეორეხარისხოვანი ხდება. თუმცა, ვეთანხმები პრეზიდენტს იმაში, რომ ნამდვილად უდროო იყო გვარამიას დაკავება და ხელისუფლებამ ეს სწორედაც შეგნებულად გააკეთა. რა თქმა უნდა, სასჯელიც არაპროპორციული იყო. თუმცა პრეზიდენტს ავიწყდება ძალიან მნიშვნელოვანი კომპონენტი, როგორიცაა ნიკა გვარამიას უდანაშაულობა ამ საქმესთან მიმართებით.

როცა განაჩენი არის დაუსაბუთებელი და პოლიტიკურად მოტივირებული, ამ შემთხვევაში პრეზიდენტმა სწორადაც რომ უნდა გამოიყენოს თავისი დისკრეციული უფლება. რატომ არიდებს ამ საკითხს თავს და რატომ არ იწყალებს არ ვიცი. არ მოგვისმენია მისგან დასაბუთება, თუმცა, თუ შეიწყალებს გვარამიას, ამის სრული უფლება გააჩნია.

სალომე ზურაბიშვილი: „ეს ყველაფერი გარედან როგორ იკითხება? ეს ყველა ნაბიჯი ისეა გადადგმული, რომ იკითხება – ჩვენ დიდად არ ვანიჭებთ მნიშვნელობას ევროკავშირის რეაქციებს და არ ვაჩვენებთ ჩვენს პოლიტიკურ ნებას, რომ ვიაროთ ამ მიმართულებით“.

ნიკა სიმონიშვილი: ვეთანხმები პრეზიდენტს იმ შეფასებაში, რომ მთავრობის ნაბიჯები არათუ არ ყოფილა მიმართული ევროკავშირში ინტეგრაციისკენ, არამედ პირდაპირ იყო მიმართული იქითკენ, რომ ჩვენ კანდიდატის სტატუსი არ მიგვეღო.

როცა კონსტიტუციაში გვიწერია, რომ აუცილებელია მთავრობამ გააკეთოს ყველაფერი იმისათვის, რომ ჩვენ წავიდეთ ევროკავშირისკენ, მთავრობა არათუ არ აკეთებს არაფერს, არამედ სპეციალურად აკეთებს ყველაფერს, რომ ჩვენ არ მივიღოთ კანდიდატის სტატუსი. ეს, რა თქმა უნდა, კონსტიტუციის დარღვევაა.

კონსტიტუცია არაერთხელ დაარღვია ამ მთავრობამ, თუნდაც 5 ივლისს, როცა მან თავისი პოზიტიური ვალდებულება არ შეასრულა და სხვა შემთხვევებშიც. თუმცა, პრეზიდენტს მთავრობის დათხოვნის უფლება არ გააჩნია ამ შემთხვევაში.

ერთადერთი, ვისაც მთავრობის პოლიტიკური პასუხისმგებლობის დაყენება შეუძლია სამართლებრივად, პარლამენტია, მაგრამ თუ პარლამენტი და მთავრობა ერთსა და იმავე თამაშს თამაშობენ და ხალხის დაკვეთას არ შეესაბამება მათი ქმედებები, აქ ერთადერთი მექანიზმია – საზოგადოებამ მოითხოვოს პოლიტიკური პასუხისმგებლობა სწორედ იმის გამო, რომ ისინი რეალურად ასცდნენ ამ გზას.

სალომე ზურაბიშვილს, როგორც პრეზიდენტს, ამ შემთხვევაში შეუძლია მხოლოდ განცხადების გაკეთება და იმის თქმა, რომ მთავრობა დასათხოვია.

დაავადებათა კონტროლის ეროვნული ცენტრის ინფორმაციით, საქართველოში „მაიმუნის ყვავილის“ პირველი შემთხვევა დადასტურდა.

„ლაბორატორიული კვლევების შედეგად  დადასტურდა  „მაიმუნის ყვავილის“ ვირუსის ერთი შემთხვევა. პაციენტს ვირუსული დაავადების მსუბუქი ფორმა აღენიშნებოდა და შესაბამისი მკურნალობის შემდეგ, მალევე გაეწერა სამედიცინო დაწესებულებიდან.

მას აქვს ევროპაში მოგზაურობის ისტორია. ასევე მიმდინარეობდა კონტაქტებზე დაკვირვება და არც ერთ შემთხვევაში კლინიკური ნიშნები არ გამოვლინდა,“- განაცხადა დაავადებათა კონტროლის ეროვნულმა ცენტრმა.

ორგანიზაციის განცხადებით, საჭიროების შემთხვევაში ისინი გააგრძელებენ საეჭვო შემთხვევების შესწავლას.

ჯანმოს ევროპის ოფისმა ვირუსული დაავადების – „მაიმუნის ყვავილის“ გავრცელების შესახებ განცხადება 19 მაისს გაავრცელა, მას შემდეგ, რაც ევროპის ქვეყნებთან ერთად, დაავადების პირველი შემთხვევა აშშ-მაც დაადასტურა.

___________________________

ამავე თემაზე:

დღეს, 15 ივნისს, აჭარაში ოფიციალურად იწყება 2022 წლის ზაფხულის ტურისტული სეზონი.

სეზონის პირველი ღონისძიება ზაფხულის ფესტივალია, სლოგანით – „ზაფხული იწყება აქ“.

ზაფხული და ტურისტული სეზონი ოფიციალურად დაიწყო, თუმცა სეზონის პირველივე დღეს წვიმიანმა ამინდმა აიძულა ორგანიზატორები, მცირე ცვლილებები შეეტანათ დღევანდელი ფესტივალის პროგრამაში.

კერძოდ, ამინდის გამო დღეს ბათუმში აღარ გაიმართება ფრანების შოუ, ხოლო კოლონადებთან დაგეგმილი სპორტული და გასართობი ღონისძიებების ნაწილი გაიმართება იქვე მდებარე საზაფხულო თეატრის შენობაში.

რაც შეეხება საზაფხულო ფესტივალის საღამოს პროგრამის მუსიკალურ ნაწილს, ღონისძიებები 18 საათზე დაიწყება ანბანის კოშკის მიმდებარე ტერიტორიაზე.

ყველა ღონისძიებაზე დასწრება უფასოა. 

პროგრამა ასე გამოიყურება:

• 17:00 -18:00 ჯაზ-ბიგბენდის კონცერტი საზაფხულო თეატრში
• 18:00 – 21:00 ბენდები ანბანის კოშკთან – TECHNO BAND OFFSIDE, ასეა სულ, See Side
• 21:00 – 00:00 – გალა კონცერტი-  მგზავრები, KILLAGES, თამადა
• 23:00 – ფეიერვერკი
• 00:00 – 03:00 DJ გურული, DJ ჩიკი

„ზაფხულის ფესტივალი“ აჭარის ტურიზმის დეპარტამენტის ტურისტული პროდუქტების განვითარების სააგენტოს, აჭარის განათლების, კულტურისა და სპორტის სამინისტროს, ბათუმის მერიისა და ბულვარის ადმინისტრაციის ორგანიზებით იმართება.

დღეს, 14 ივნისს, შეზღუდული შესაძლებლობის მქონე პირთა უფლებების დაცვის დღესთან დაკავშირებით ბათუმში მსვლელობა გაიმართა.

მსვლელობაში მონაწილეობა შეზღუდული შესაძლებლობის მქონე პირებმა, მათმა მხარდაჭერებმა და ამ საკითხზე მომუშავე ორგანიზაციებმა მიიღეს.

„ერთად შევცვალოთ“ – ასე ერქვა აქციას, რომელიც დღის ოთხ საათზე, ევროპის მოედანზე დაიწყო და ბათუმის ცენტრალურ პარკში დასრულდა.

აქცია ორგანიზაციების – „ცვლილებები თანაბარი უფლებებისთვის” და “კოალიცია დამოუკიდებელი ცხოვრებისთვის” ინიციატივით გაიმართა, ევროკავშირის პროექტის ფარგლებში.

აქციის ერთ-ერთი მონაწილის, 14 წლის ეტლით მოსარგებლე ანიტა ტაკიძის თქმით, მისი მთავარი გამოწვევა თავისუფლად გადაადგილებაა.

მან გვითხრა, რომ აქციას შეუერთდა, რადგან სურს ბათუმში ქუჩები ადაპტირებული იყოს და ეტლით მოსარგებლეებსა და სხვა შეზღუდული შესაძლებლობის მქონე ადამიანებს თავისუფლად გადაადგილების საშუალება ჰქონდეთ.

„ჩვენი უფლებები მინდა შევახსენო ხალხს. ჩვენც ჩვეულებრივი მოქალაქეები ვართ და ადაპტირებული გარემო გვჭირდება საცხოვრებლად.

ავტობუსის მძღოლები ხშირად არ წევენ ავტობუსის პანდუსებს. ეზარებათ, ეტლით მოსარგებლეებს როცა ხედავენ, არ სიამოვნებთ და არ ჩამოდიან საჭიდან.

დამხმარის გარეშე ჩვენ ვერ შევძლებთ ავტობუსში ასვლას. წესით, დამოუკიდებლად ცხოვრების უფლება ყველას აქვს, ჩვენ ამ უფლების გამოყენება გვინდა, რისთვისაც სხვების ხელშეწყობა გვჭირდება“.

ანიტა ფსიქოლოგობას აპირებს. ამბობს, რომ სკოლა, სადაც სწავლობს, ადაპტირებულია, მაგრამ საქართველოს ბევრ სკოლა დღემდე არაადაპტირებულია და აუცილებელია, რომ ეს პრობლემა საბოლოოდ მოგვარდეს, რათა ყველა შშმ პირს მიეცეს განათლების მიღების საშუალება.

„გარემო, რომელიც შეზღუდული შესაძლებლობის მქონე ადამიანებს ზღუდავს გადაადგილებაში, ინფორმაციის მიღებაში, განათლებაში, დასაქმებაში და მათ შორის, ამ გარემოებებში შედის საზოგადოების დამოკიდებულებები, რომელიც არ არის ჯანსაღი და სტერეოტიპებითაა გაჯერებული, უნდა შეცვალოს.

გვინდა, რომ რაც შეიძლება მეტი ადამიანი ჩაერთოს ამ კამპანიაში. მთელი ივნისი ჩვენი უფლებების დაცვისაა“, – ამბობს თომა კაკაბაძე, ორგანიზაციის – „ცვლილებები თანაბარი უფლებებისთვის“ თავმჯდომარე.

თომას თქმით, ორგანიზაცია ივლისის განმავლობაში 7 ვიდეოს გამოაქვეყნებს და საზოგადოებას გააცნობს სხვადასხვა რეგიონში მცხოვრებ შშმ პირებს, რომლებიც იმ მთავარ გამოწვევებზე ისაუბრებენ, რასაც თავიანთ მუნიციპალიტეტებში ხვდებიან.

ბათუმში შეზღუდული შესაძლებლობის მქონე პირების უმთავრეს გამოწვევად თომა კაკაბაძე ინფრასტრუქტურულ მიუწვდომლობას ასახელებს. მისი თქმით, ეტაპობრივად გვარდება რაღაც საკითხები, თუმცა ეს არ არის საკმარისი.

„ჩვენ არ უნდა გვიწევდეს კონკრეტული ლოკაციების არჩევა, რათა სერვისებით სარგებლობა შევძლოთ. ჩვენ უნდა შეგვეძლოს ნებისმიერ ადგილზე მისვლა და ის სიკეთეები, რაც საზოგადოების დანარჩენი ნაწილისთვისაა ხელმისაწვდომი, ჩვენთვისაც უნდა იყოს ხელმისაწვდომი“.

აქციის მსვლელობისას, როცა მონაწილეებმა ევროპის მოედნიდან ბათუმის ცენტრალურ პარკში გადაწყვიტეს გადანაცვლება, თომა არაადაპტირებულ გადასასვლელთან გაჩერდა და კიდევ ერთხელ აღნიშნა, რომ ისინი სწორედ ამ სიტუაციის შეცვლას ითხოვენ.

აქციის კიდევ ერთმა მონაწილემ, ნატალი სხალთელმა გვითხრა, რომ ის სმენის არმქონე 18 წლის გოგოს დედაა.

მათ აქცია ნახევარი საათით ადრე საქართველოს ყრუთა კავშირის ფილიალის, აჭარის ადგილობრივი ორგანიზაციის შენობიდან დაიწყეს ევროპის მოედნის მიმართულებით.

ნატალი ამბობს, რომ სურდათ გზად უფრო მეტ ადამიანს ენახა მათი ტრანსპარანტები და მოთხოვნები.

„მართალია, მსვლელობის მონაწილეები ჟესტურად აჟღერებდნენ მოთხოვნებს, თუმცა მე  ვცდილობდი, მათი სათქმელი ხმამაღლაც გამეჟღერებინა.

ნატალია საქართველოს განათლების სამინისტროსგან ჟესტური ენის გაკვეთილების დაფინანსებას ითხოვს სმენის არმქონეების მშობლებისთვის და სხვა მსურველთათვის, რათა მშობლებს შვილებთან სრულყოფილი ურთიერთობის საშუალება მიეცეთ.

„ჩვენ არ გვაქვს შემდგარი დედაშვილური, მამაშვილური ურთიერთობები საკუთარ შვილებთან, რაც ყოვლად მიუღებელი და ძალიან სამწუხაროა“ – ამბობს ნატალი.

მისი თქმით, მის შვილს განათლების მიღება საკუთარი ქალაქისგან შორს, ქუთაისის სპეცსკოლაში მოუწია, ახლა უკვე ზრდასრულია და სჭირდება მეტი კომუნიკაციის საშუალება ადამიანებთან.