უკრაინის პრეზიდენტის მრჩეველი, მიხაილო პოდოლიაკი წერს, რომ ბრძოლის ზოგიერთ მონაკვეთში რუსეთისა და უკრაინის შეიარაღების თანაფარდობა ათი ერთზეა. მისი თქმით, ყოველდღიურად იღებს შეტყობინებებს ბრძოლის ველიდან – უკრაინის დამცველები ეკითხებიან, როდისთვის ელოდონ დამატებით იარაღს.
მიხიალო პოდოლიაკი აღნიშნულ შეკითხვას ბრიუსელში გასამართ საგარეო საქმეთა მინისტრთა საკონტაქტო ჯგუფის შეხვედრაზე ამისამართებს: „ბრიუსელი, ჩვენ გადაწყვეტილებას ველოდებით,“ – წერს იგი.
„ზოგიერთ არეალში რუსეთ-უკრაინის არტილერიის თანაფარდობა: 10/1. ფრონტის ხაზი – 1000-ზე მეტი კილომეტრი. ყოველდღიურად ვიღებ შეტყობინებებს დამცველებისგან: „ჩვენ ვუძლებთ, მხოლოდ გვითხარით: როდისთვის ველოდოთ იარაღს?“. ამ შეკითხვას რამშტაინის მონაწილეებთან ვამისამართებ. ბრიუსელი, ჩვენ გადაწყვეტილებას ველოდებით“, – წერს უკრაინის პრეზიდენტის მრჩეველი.
Ratio 🇷🇺/🇺🇦 artillery in some areas: 10 to 1. Front line — more than 1000 km. Daily, I receive a message from the defenders: “We are holding on, just say: when to expect the weapons?”. I address this question to the Rammstein participants. Brussels, we are waiting for a decision.
— Михайло Подоляк (@Podolyak_M) June 15, 2022
რამშტაინის ფორმატი არის სხვადასხვა ქვეყნის საგარეო საქმეთა მინისტრთა შეხვედრა უკრაინის თავდაცვითი შესაძლებლობების გაძლიერების განსახილველად. ეს ფორმატი ამერიკის შეერთებული შტატების მიერაა ინიცირებული და გერმანიაში არსებული ამერიკული საჰაერო-სამხედრო ბაზის სახელთანაა დაკავშირებული. სწორედ აღნიშნულ ბაზაზე აპრილის ბოლოს აშშ-ის თავდაცვის მდივანმა ლოიდ ოსტინმა უკრაინის თავდაცვითი შესაძლებლობების გაძლიერების განსახილველად 40 ქვეყანას უმასპინძლა.
ამერიკულ სამხედრო ბაზაზე მიწვეულ ქვეყნებს შორის იყვნენ არა მხოლოდ ვაშინგტონის ევროპელი მოკავშირეები, არამედ ისეთი ქვეყნები, როგორიცაა: იაპონია ან ავსტრალია, ასევე, ისრაელი. კონფერენციაში მონაწილეობდნენ ფინეთი და შვედეთიც, მათ შორის არ იყო საქართველო. საქართველოს თავდაცვის სამინისტრომ ეს ფაქტი იმით ახსნა, რომ განხილვის მთავარი თემა კიევისთვის იარაღის მიწოდება და უკრაინის პოსტსაომარ პერიოდში აღდგენა იყო, საქართველოს როლი კი არა სამხედრო, არამედ პოლიტიკური და ჰუმანიტარული მხარდაჭერით შემოიფარგლება.
შემდეგი შეხვედრა ბრიუსელში 15 ივნისსაა ჩანიშნული. მიხაილო პოდოლიაკმა 13 ივნისს უკრაინისთვის საჭირო შეიარაღების სიაც გამოაქვეყნა, კონკრეტული დასახელებებითა და რაოდენობით. როგორც უკრაინის პრეზიდენტის მრჩეველი წერდა, სწორედ ამ პაკეტს მოითხოვს უკრაინა ბრიუსელში.
