10 წლის ბიჭმა შეპეტოვკიდან მთელი თავისი დანაზოგი იმაში დახარჯა, რომ უკრაინელი სამხედროებისთვის მზის ენერგიაზე მომუშავე პორტატული დამტენი შეეძინა.
ოსტაპისა და მისი საჩუქრის ფოტო თავის ფეისბუქგვერდზე უკრაინის გენშტაბმა გამოაქვეყნა.
ოსტაპმა საჩუქარში ის 300 დოლარი გადაიხადა, რომელიც ოჯახის წევრებმა და ნათესავები დაბადების დღეებსა და დღესასწაულებზე აჩუქეს.
„მოვიდა და მითხრა, რომ თავისი დანაზოგით ჯავშანჟილეტის ყიდვა უნდოდა. სამხედროებს სჭირდებათ, ისინი ხომ ჩვენ გვიცავენ და ვინმეს სიცოცხლეს მაინც გადაარჩენსო“, – ამბობს ოსტაპის დედა ნატალია.
თუმცა აღმოჩნდა, რომ დანაზოგი ჯავშანჟილეტის შეძენას არ ჰყოფნიდა, ამიტომ დედა-შვილმა გადაწყვიტა, სამხედროებისთვის პორტატული დამტენი ეყიდა.
10 წლის ოსტაპის საჩუქარი/ფოტო: უკრაინის გენშტაბის ფეისბუქგვერდიდან
„მას შეეძლო სათამაშო ან „როვერი“ ეყიდა, მაგრამ ჩვენთვის დახარჯა. ძალიან ბედნიერები ვართ, რადგან ეს ნიშნავს, რომ უკრაინას ნამდვილი პატრიოტები ეზრდებიან. ყველაფერი აუცილებლად კარგად იქნება სწორედ ისეთი ბავშვების გამო, როგორიც ოსტაპია“, – წერს უკრაინის გენშტაბი.
ეს პირველი შემთხვევა არ არის, როდესაც უკრაინელი ბავშვები სამხედროების დახმარებას ცდილობენ: ლვოვში მოზარდებმა მცენარეების გაყიდვა დაიწყეს, რათა უკრაინის შეიარაღებული ძალებისთვის ფული შეეგროვებინათ; 9 წლის გოგონამ ჩერნიგოვიდან თავისი გრძელი თმა ჩააბარა; 11 წლის მაქსიმმა კი ჩერნოვცის ოლქში იმდენი გამოიმუშავა, რომ უკრაინელ სამხედროებს 22 ჯავშანჟილეტი უყიდა.
