უკრაინელებმა ახალი სამხედრო მარკის დიზაინი შეარჩიეს გამოკითხვის შედეგად. ახალ საფოსტო მარკაზე გამოსახული იქნება ტრაქტორი უკრაინის დროშით, რომელიც ტანკს მიათრევს.
უკრაინის ფოსტამ 5 გამოსახულება შესთავაზა უკრაინელებს ახალი მარკის დიზაინის შესარჩევად. ტრაქტორს უკრაინის დროშით ხმა მისცა გამოკითხულთა 41-მა პროცენტმა. უკრაინის ფოსტის ინფორმაციით, გამოკითხვაში ერთი კვირის განმავლობაში 834 000 ადამიანი მონაწილეობდა.
„ჩვენმა ხალხმა აირჩია ის, რაც ნაცნობია ყველასთვის. სინათლე ყოველთვის სძლევს წყვდიადს, პატიოსანი შრომა კი – ქურდობას. და ამისთვის არაა აუცილებელი ტანკები გქონდეს“ – წერს უკრაინის ფოსტა.
მცირე ზომის ტრაქტორი უკრაინის დროშით, რომელიც ჩაბმულ ტანკს მიათრევს, უკრაინა-რუსეთის ომის ერთ-ერთ ყველაზე კარგად ნაცნობ გამოსახულებად იქცა.
რუსეთის უკრაინაზე თავდასხმიდან მოკლე ხანში ინტერნეტში გავრცელდა ვიდეო, რომელზეც ჩანს, როგორ მიათრევს ტრაქტორი ტანკს. მალევე გავრცელდა ცნობები იმის შესახებ, რომ უკრაინელმა ბოშებმა და ფერმერებმა მინიმუმ 200 რუსული ტანკი ჩაიგდეს ხელში.
ეს ინფორმაცია ინტერნეტში არაერთი ხუმრობის თემა გახდა. ტრაქტორი უკრაინის დროშით, რომელიც რუსულ ტექნიკას მიათრევს, გამოჩნდა ნახატებზეც და იქცა ამ ომში უკრაინელების შეუპოვრობის, შრომისა და მონდომების სიმბოლოდ.
