შს სამინისტროს ინფორმაციით, დადგენილია პირი, რომელმაც 10 ივნისს ბათუმის დელფინარიუმის შენობაზე პუტინის ომის სიმბოლო – „Z“ დაახატა.
შსს-ს ინფორმაციით, გამოძიება ადმინისტრაციულ სამართალდარღვევათა მუხლით მიმდინარეობს.
შს სამინისტროში არ დაგვიკონკრეტეს, დადგენილი პირი საქართველოს მოქალაქეა თუ უცხო ქვეყნის.
სიმბოლო „Z“, რუსეთ-უკრაინის ომის დროს, 2022 წლის თებერვლიდანვე გამოჩნდა. სიმბოლო გამოსახულია რუსულ საბრძოლო ტექნიკაზე. ბალტიისპირეთის ქვეყნებში უკრაინაში მიმდინარე ომის შემდეგ „Z“-ი, როგორც ომის სიმბოლო, აკრძალეს. ასევე აკრძალულია ეს სიმბოლოები გერმანიის ზოგიერთ მიწაზე.
10 ივნისს ბათუმში, დელფინარიუმის კედლის გარდა, დააზიანეს გრაფიტი მემედ აბაშიძის ქუჩაზე, სადაც უკრაინის დროშა იყო მოხატული და მასზე ფაშისტური სიმბოლიკები გამოსახეს. კედელი ამ დროისთვის აღდგენილია, დელფინარიუმის კედლიდან წაშლილია ფაშისტური სიმბოლიკაც.
