„რუსეთი დაინტერესებულია პოლიტიკური და დიპლომატიური შეთანხმების რაც შეიძლება მალე მიღწევით, რაც საბრძოლო მოქმედებების შეჩერებას გახდიდა შესაძლებელს. თუმცა მოსკოვსა და კიევს შორის მოლაპარაკებები ამ დროისთვის უკრაინულ მხარეს აქვს გაყინულია,“ – განაცხადა რუსეთის უშიშროების საბჭოს მდივანმა ნიკოლაი პატრუშევმა, 15 ივნისს BRICS-ის ქვეყნების უსაფრთხოების საკითხებზე პასუხისმგებელი უმაღლესი წარმომადგენლების შეხვედრაზე. აღნიშნულის შესახებ ინფორმაციას რუსული საინფორმაციო სააგენტო TASS-ი ავრცელებს.
როგორც TASS-ი ციტირებს პატრუშევს, იგი რუსეთ-უკრაინის დიალოგის შეწყვეტას „ამერიკის შეერთებული შტატების, ბრიტანეთისა და მათი მოკავშირეების დესტრუქციულ ქმედებებს“ აბრალებს.
პატრუშევმა, ასევე კიდევ ერთხელ გაიმეორე, რომ რუსეთი წლების განმავლობაში მოუწოდებდა ამერიკას და ნატოს, „არ წაეხალისებინათ უკრაინის ნატოში გაწევრიანების ამბიციები“. ამასთან, მან კვლავ გაუსვა ხაზი რუსეთის რიტორიკას იმის შესახებ, რომ „კიევის რეჟიმს საომარი, ნეონაცისტური და რუსოფობიური სენტიმენტები“ ჰქონდა.
რუსეთის უშიშროების საბჭოს მდივანმა უკრაინა ჰიტლერის ნაცისტურ გერმანიასაც შეადარა და აღნიშნა, რომ „ვაშინგტონი და ლონდონი იმავენაირად მოიქცნენ მეორე მსოფლიო ომის დაწყებამდეც. ამჯობინეს რა ჰიტლერის აგრესიული გეგმების იგნორირება ან ხელიც კი შეუწყეს მათ იმ იმედით, რომ ნაცისტურ რეჟიმს მოსკოვის წინააღმდეგ მიმართავდნენ“.
BRICS 5 განვითარებადი ეკონომიკის ქვეყნის ასოციაციაა. მასში შედიან ბრაზილია, რუსეთი, ინდოეთი, ჩინეთი და სამხრეთ აფრიკა. 2009 წლიდან BRICS-ის წევრი სახელმწიფოების მთავრობები ყოველწლიურ ფორმალურ სამიტებზე იკრიბებიან. 2022 წელს მე-14 სამიტი მიმდინარეობს, ამჯერად ჩინეთის ხელმძღვანელობით.
____
მთავარი ფოტო: რუსეთის უშიშროების საბჭოს მდივანი ნიკოლაი პატრუშევი ისრაელის პრემიერ-მინისტრთან, ბენიამინ ნეთანიაჰუსთან (სურათზე არ არის გამოსახული) შეხვედრისას იერუსალიმში, ისრაელი, 2019 წლის 24 ივნისი. EPA-EFE/RONEN ZVULUN / POOL
