Batumelebi

ძალიან იწვალებ, არ ღირს ამ ბავშვთან ერთად მომავალში ცხოვრება და მოდი, გამოვურთოთ აპარატი, რად გინდა ,,ინვალიდ“ შვილთან ერთად ცხოვრებაო, უთხრეს 18 წლის წინ ნატალი დავითაძეს, მარიამის დედას. მარიამი დღენაკლული დაიბადა.

ნატალიმ ექიმებს არ მოუსმინა:

„მერე აღარ ვენდობოდი ექიმებს, ბავშვს მარტო არ ვტოვებდი მათთან და დღემდე მაქვს შენახული ჩანაწერები: ვინ და რა ნემსი გაუკეთა, სახელებით და გვარებით. ბავშვს ყველგან თავზე ვედექი – დღე და ღამე. მე თვითონ ამ დროს 19 წლის ვიყავი. ვთქვი, რომ ჩემი შვილი იცოცხლებდა და იბრძოლებდა ჩემთან ერთად“, – ამბობს ნატალი დავითაძე, სმენის არმქონე 18 წლის შშმ გოგოს დედა.

მარიამის დაბადებამ ნატალი დაარწმუნა, რომ ძალა უნდა მოეკრიბა და შვილის ირგვლივ სამყარო შეეცვალა. ცვლილებები კი ოჯახიდან და სამედიცინო პერსონალიდან უნდა დაეწყო.

ჰიდროცეფალიამ მარიამს სმენა წაართვა, მას მეოთხე ხარისხის, ტოტალური სიყრუე აქვს. ხელოვნური ყურის ნერვის ჩასმით ძვირადღირებული კოხლეარული იმპლანტაცია გაუკეთეს მხოლოდ ცალ ყურში, 9 წლის ასაკში, საკმაოდ გვიან. მანამდე აჭარის მთავრობა არ აფინანსებდა ასეთ იმპლანტებს, მარიამის ოჯახს კი არ ჰქონდა შესაძლებლობა, შეეძინა ეს ძალიან ძვირადღირებული საშუალება.

მარიამს შეუძლია ბგერების და მარტივი სიტყვების წარმოთქმა – ესეც იმპლანტის დამსახურებაა.

მარიამის დედა გვეუბნება, რომ შშმ ბავშვების დედებს უწევთ ბავშვის დაბადებიდანვე გაერკვნენ შვილების უფლებებში. მშობლებს უწევთ ფიქრი შშმ შვილების მომავალზე, რაც ლოგიკურად ითხოვს მშობლებისგან იმის გათვითცნობიერებასაც, თუ რა მდგომარეობაა ახლა. ნატალი დავითაძე საკუთარი გამოცდილებით გვეუბნება, რომ პრობლემური, არასწორი დამოკიდებულებები შშმ პირების მიმართ სამედიცინო რგოლშიც კი იგრძნობა:

„თავად ექიმებისგან გამიგონია: უიმე, ეს დაქორწინდა? ამან შვილი როგორ გააჩინა? და ა.შ.

ბევრისგან მსმენია, როცა შშმ გოგო, ქალი, მარტო მიდის ექიმთან, გინეკოლოგთან განსაკუთრებით, ეკითხებიან: მარტო მოხვედი? დედა სად გყავს? აბა, რა ხდება, რა დააშავე?

როცა ქუჩაში მიდის ეტლით მოსარგებლე ბიჭი ან გოგო და გვერდით შეზღუდვის არმქონე ადამიანი მიჰყვება, ხშირად ხმამაღლა აღნიშნავენ: „ნეტა, ისეთი რა ხდება, რომ ამასთან მეგობრობს, ან ამაზე რომ დაქორწინდა. ხშირად ასეთია დამოკიდებულება“, – ამბობს ნატალი დავითაძე.

შშმ გოგოს დედა იმასაც აღნიშნავს, რომ თუ შშმ პირი რომანტიკულ ურთიერთობაშია ვინმესთან, გარშემომყოფებს ბევრი დაუსაბუთებელი შიში უჩნდებათ:

„არსებობს სტერეოტიპი, რომ თითქოს შშმ პირებთან ანგარების მიზნით იწყებენ რომანტიკულ ურთიერთობას. ეს დამთრგუნველი და შეურაცხმყოფელი წარმოდგენაა, როგორც შშმ პირების, ასევე მათთან რომანტიკულ ურთიერთობაში მყოფი ადამიანებისთვის“, – ამბობს ნატალი და იმ შიშსაც არ მალავს საუბრისას, რასაც ბოლომდე ახლაც ვერ ერევა, როგორც შშმ გოგოს მშობელი.

ნატალი სულ შიშობს, დაიცავენ თუ არა მომავალში მარიამის უფლებებს ადამიანები, რომლებიც გოგოს ირგვლივ იქნებიან? ნატალის ხშირად უფიქრია, მირჩევნია მხოლოდ ჩემ გვერდით იყოს ჩემი შვილი ყოველთვის და დარწმუნებული ვიყო, მის უფლებებს არავინ დაარღვევსო.

ნატალიმ იცის, რომ მშობლის ეს შიშები გადასალახი აქვს, თუმცა შიში მხოლოდ მაშინ გადაილახება, თუ შეძლებს მარიამი დამოუკიდებელი გახადოს. ნატალის სხვა გზა არ აქვს, რადგან სახელმწიფო ვერ უზრუნველყოფს გახადოს მისი შვილი დამოუკიდებელი. შშმ პირების სხვა დედების მსგავსად, ეს პასუხისმგებლობა სრულად ნატალის აკისრია:

„ყველაფერს ვცდილობ, როცა მარიამის გვერდით არ ვარ, ან როცა აღარ ვიქნები, არ გაუჭირდეს და დამოუკიდებლად ცხოვრება შეძლოს.

მარიამმა იცის, რა რისკებთანაა დაკავშირებული მისი დაავადება: ჰიდროცეფალია. საერთოდაც სმენის არქონა მისი მთავარი დიაგნოზი არ არის, ჰიდროცეფალიაა სმენის დაკარგვის მიზეზი და მთავარი დიაგნოზი.

ერთხელ ექიმმა გვაჩვენა ფეხმძიმეების, შვილიანი ქალების ფოტოები, რომლებსაც მარიამის მსგავსი დაავადება აქვთ და შეძლეს შვილის გაჩენა. მარიამის სიხარულს საზღვარი არ ჰქონდა, როცა ნახა, რომ წარმატებული ორსულობის მაგალითები არსებობს მისი დიაგნოზის მქონე ქალებში.

ხედავ დედა? არ დამჭირდება ვიშვილო ბავშვი, ჩემითაც შემეძლება გაჩენა, როცა მომინდებაო. ანუ იმაზეც ჰქონდა ნაფიქრი, რომ შვილი უნდა აეყვანა, თუ ვერ გააჩენდა“, – გვიყვება ნატალი.

ნატალი იხსენებს იმასაც, თუ რა რთული იყო მარიამთან ჟესტების ენით საუბარი სქესობრივი და რეპროდუქციული ჯანმრთელობის საკითხებზე, იმ პირობებში, როცა დედამ ჟესტების ენა კარგად არ იცის.

სმენის არმქონე გოგოების გათვითცნობიერება სქესობრივი და რეპროდუქციული ჯანმრთელობის საკითხებში, ინფორმაციის მიწოდება სრულად მათ მშობლებსაა მინდობილი, რაც არასახარბიელო რეალობაა.

ნატალი გვიყვება, რომ მან, როგორც მშობელმა, არაერთი ტრენინგი და სემინარი მოისმინა ამ თემების შესახებ, რის შემდეგაც შეძლო შვილისთვის მიეწოდებინა ინფორმაცია შეძლებისდაგვარად სრულფასოვნად, მაგრამ ნატალი აღნიშნავს, რომ ყველა მშობელს ამის რესურსი და მზაობა არ აქვს.

მართალია, დიდი ძალისხმევის და მონდომების შედეგად ნატალი ახერხებს ჟესტურ ენაზე შვილთან საუბარს, მაგრამ ამისთვის მან სწავლების არაერთი კურსი გაიარა, დამოუკიდებლად გაართვა თავი ყველაფერს, რაც სმენის არმქონე ყველა გოგოს მშობელმა შეიძლება ვერ მოახერხოს.

აჭარაში ჟესტური ენის სულ 3 სპეციალისტია, ბათუმის ყრუთა კავშირში კი – 600-მდე ადამიანი.

რომც არ იყოს ჟესტური ენის სპეციალისტების დეფიციტი, მათი ნაწილი უნდა ერკვეოდეს კიდეც სქესობრივი და რეპროდუქციული ჯანმრთელობის საკითხებში, სმენის არმქონეებს სწორი ინფორმაცია რომ მიაწოდოს შესაბამისი ფორმით.

„არასაიმედო წყაროებია ინტერნეტში, უნდა ურჩიო რას უყუროს, რას არა, სპეციფიკური მიდგომაა საჭირო: გამოცდილი ადამიანები, სათანადო ინსტიტუციები, რომლებიც სმენის არმქონე გოგოებს ინფორმაციას მიაწვდიან.

სულ მქონდა შიში, ვაითუ ვერ მივაწოდე სწორად რაიმე, ან ვერ აღიქვა ჩემი ნათქვამი სწორად მარიამმა-მეთქი. თავიდან როცა დავიწყეთ საუბრები, მეუბნებოდა, დედა რეებზე მელაპარაკები, სირცხვილია, გაჩუმდიო. მარიამის გაოცებას საზღვარი არ ჰქონდა, რადგან სკოლაში, მას სქესობრივ საკითხებზე არ ესაუბრებოდნენ, მეც თავს ვიკავებდი, მეგონა, სკოლა მიაწვდიდა მას ამ ინფორმაციას“, – ამბობს ნატალი.

მას მიაჩნია, რომ მხოლოდ მშობლებს არ უნდა უწევდეთ სმენის არმქონე შვილებთან სქესობრივი და რეპროდუქციული ჯანმრთელობის, უფლებების შესახებ საუბარი. ამ თემებზე შშმ გოგონებს ჟესტურ ენაზე უნდა ესაუბრებოდნენ გადამზადებული სპეციალისტები.

ნატალის თქმით, მას რომ არ აეხსნა მარიამისთვის რა რისკებს უკავშირდება მისი დიაგნოზი, შესაძლოა გოგოს სამომავლოდ ჯანმრთელობის პრობლემები შეჰქმნოდა. ამ შემთხვევაში ნატალიმ იცის ჟესტური ენა და შეუძლია შვილთან კომუნიკაცია, მაგრამ არიან მშობლები, რომლებსაც ეს ცოდნა არ აქვთ.

ჟესტური ენის სპეციალისტების ნაკლებობა ავტომატურად გულისხმობს იმას, რომ სმენის არმქონეებს ვერც სქესობრივი და რეპროდუქციული საკითხების თემებზე დაელაპარაკება ვინმე მათთვის გასაგები ენით და ვერც სხვა საკითხებზე.

„ჰიდროცეფალია გულისხმობს, რომ ტვინის პარკუჭები წყლითაა დაფარული და მარიამს ჩადგმული აქვს შუნტი თავის ტვინიდან მუცლის ღრუმდე. ეს ძალიან მოსაფრთხილებელი რამაა, ყველაფერმა, მათ შორის ფეხმძიმობამ, სიმძიმის აწევამ, გადაღლილობამ, შეიძლება საფრთხე შეუქმნას ჩემი შვილის ჯანმრთელობას. ეს მას უნდა ჰქონდეს გააზრებული, ოჯახის შექმნა რომ მოინდომოს, ამას ყურადღება უნდა მიაქციოს და ამის შესახებ მე მიწევს მასთან საუბარი. მე რომ ეს არ შემეძლოს, რა იქნებოდა?“ – ამბობს შშმ გოგოს დედა.

ჟესტური ენის თარჯიმნების დიდი დეფიციტი სმენის არმქონე შშმ პირების უფლების შეზღუდვაა. საქართველოს კანონი შეზღუდული შესაძლებლობების მქონე პირთა უფლებების შესახებ ამბობს, რომ სახელმწიფო „უზრუნველყოფს შშმ ქალებისა და გოგონების ძირითად უფლებებისა და თავისუფლებების რეალიზებას სხვა ქალებთან თანასწორად“.

ამავე კანონით, სახელმწიფო ხელს უნდა უწყობდეს შეზღუდული შესაძლებლობის მქონე ქალთათვის რეპროდუქციული ჯანმრთელობის დაცვის უფლების ხელმისაწვდომობას სხვებთან თანასწორად.

_______________________________________

საქართველოს ჟურნალისტური ეთიკის ქარტიამ ქარტიის პრიზის ახალი კატეგორიის – „ხალხის რჩეულის“ ფინალისტების ვინაობა გამოაქვეყნა.

ჟიურის გადაწყვეტილებით რუსეთ-უკრაინის ომის თემაზე საუკეთესო ნამუშევარი მკითხველმა 4 მედიასაშუალებიდან უნდა აირჩიოს. საუკეთესო ნამუშევრებს შორის მოხვდა „ბათუმელების“ მიერ მომზადებული მასალები.

გამარჯვებულის არჩევა მოქალაქეებს შეუძლიათ ხმის მიცემის საშუალებით.

კატეგორია „ხალხის რჩეულის“  ფინალისტები არიან:

• ბათუმელები –  „რა არის შენი სუპერძალა? – მე უკრაინელი ვარ“ | რეპორტაჟი უკრაინიდან. მასალას გაეცანით აქ

ხმის მისაცემად გადადით ბმულზე

•  დავით ქაშიაშვილი – ომის მეათე დღე მასალას გაეცანით აქ

ხმის მისაცემად გადადით ბმულზე

•  ეკა ქადაგიშვილი/ანანო ბაკურაძე – ნინო ქათამაძე & ნიკოლოზ რაჭველი მასალას გაეცანით აქ

ხმის მისაცემად გადადით ბმულზე

•  ნინო თარხნიშვილი – უკრაინაში დაღუპული ქართველი მებრძოლები – 2022 მასალას გაეცანით აქ

ხმის მისაცემად გადადით ბმულზე

ხმის მიცემა დასრულდება 23 დეკემბერს, 23:59 საათზე.

საქართველოს მესამე პრეზიდენტი, მიხეილ სააკაშვილი დღეს, 22 დეკემბერს, თავის სასამართლო პროცესზე ონლაინ ჩაერთო, თუმცა ის მალევე გამოეთიშა პროცესს. ადვოკატის თქმით, სააკაშვილი ცუდად გახდა.

ვინ იტყუება – სააკაშვილი თუ „ქართული ოცნება“, როცა ამბობს, რომ მესამე პრეზიდენტის მდგომარეობა „უნიჭო სიმულაციაა“? – ამ თემაზე „ბათუმელები“ თეოლოგ ბექა მინდიაშვილს ესაუბრა.

• ბატონო ბექა, როგორც მოქალაქეს მინდა გკითხოთ, როგორი შთაბეჭდილება დატოვა თქვენზე დღეს მიხეილ სააკაშვილმა. ფიქრობთ, რომ მისი ჯანმრთელობის მდგომარეობა მძიმეა?

არა მგონია, ძნელად შესამჩნევი იყოს მისი მდგომარეობა, მისი ფიზიკური მონაცემებიდან გამომდინარე, რომელიც მას აქამდე ჰქონდა. ასეთ მდგომარეობაში ადამიანი ფიზიკურად ჯანმრთელი ვერ იქნება.

ჩვენ გვახსოვს, როცა ხელისუფლება იძახდა, რომ სააკაშვილი არ შიმშილობსო და შემდეგ ვნახეთ, რომ მართლაც შიმშილობდა. დღევანდელი კადრები განსაკუთრებით შოკისმომგვრელია, ძნელია ადამიანს ასეთ მდგომარეობაში უყურო, ვინც არ უნდა იყოს ის.

უკიდურესი ნაძირალაც რომ იყოს ადამიანი, არ შეიძლება მას ასე მოეპყრო, არ შეიძლება ადამიანს ხედავდე ჯანმრთელად და შემდეგ მთელი წლის განმავლობაში ხედავდე, როგორ უარესდება მისი მდგომარეობა თვალსა და ხელს შორის და არაფერს აკეთებდე.

ჩემთვის სანდოა სახალხო დამცველის პოზიცია და მის მიერ მობილიზებული ექსპერტების ჯგუფი, რომლებიც აცხადებენ, რომ მძიმე მდგომარეობასთან გვაქვს საქმე.

ზოგადად, ჩემი პოზიციაა, რომ მიხეილ სააკაშვილი არის პოლიტიკური პატიმარი და ეს თვითონ პრემიერმაც განაცხადა ღიად, როცა სააკაშვილი დააპატიმრეს და მან თქვა, რომ ის დააპატიმრეს იმიტომ, რომ სააკაშვილი პოლიტიკაში დარჩა და არ წავიდა პოლიტიკიდან.

ეს ნიშნავს იმას, რომ ის პოლიტიკური მოტივაციით არის დაკავებული და არა იმ სავარაუდო დანაშაულის გამო, რომლისთვისაც ის იხდის სასჯელს.

სააკაშვილის გადაყვანის, მისი სამკურნალოდ გადაყვანის კადრებიც შეიცავდა წამებისა და დამამცირებელი მოპყრობის აშკარა ნიშნებს, ამაზე უფლებადამცველებიც საუბრობდნენ და ამ ადამიანის ციხეში ჯდომა, ამ თვალსაზრისითაც კითხვის ნიშნის ქვეშ უნდა დამდგარიყო.

• ფიქრობთ, რომ ეს არის ივანიშვილის პირადი შურისძიება სააკაშვილის მიმართ, თუ პუტინის მიმართ მთავრობის ლოიალობის ჩვენება?

ღარიბაშვილმა იმ დღეს, როცა სააკაშვილის დაკავებაზე განცხადება გააკეთა, მოგვილოცა ბიძინობა და ისე გამოჩნდა, თითქოს ბიძინა ივანიშვილს უძღვნიდა ამ საჩუქარს. ეს მიანიშნებს იმაზე, რომ ეს ეამებოდა ოლიგარქს, რომელიც დღეს რეალურად მართავს ქართულ პოლიტიკურ სისტემას.

სააკაშვილის დაკავებას გეოპოლიტიკური განზომილებაც აქვს, რადგან ის იყო ერთადერთი მთავრობის მმართველი, რომელმაც არჩევნებით დათმო ხელისუფლება.

ეს ჩვეულებრივი ამბავია დემოკრატიულ ქვეყნებში, მაგრამ იმ პირობებში, როდესაც ჩვენ გამოვიარეთ სამოქალაქო წინააღმდეგობა და ომი, იმ პირობებში, როდესაც გამოვიარეთ „ვარდების რევოლუცია“ და ყველა საუბრობდა სააკაშვილის სისტემის ავტორიტარულობაზე, ეს იყო საკმარისი წინაპირობა ჩვენს რეალობაში და ამასთან დაკავშირებით უნდა ყოფილიყო პოლიტიკური გადაწყვეტილება, რომ ყოველგვარი დევნა სააკაშვილის ხელისუფლების წინააღმდეგ შეწყვეტილიყო და ცარიელი ფურცლიდან დაწყებულიყო ქართული პოლიტიკა.

რაც შეეხება რუსეთს, ვიცით ასევე ძალიან კარგად, რა ტიპის ბოროტებასთან გვაქვს საქმე. როცა ვსაუბრობთ რუსეთზე, რაიმე ტიპის შეთანხმებები ამ საკითხზე არ გვინახავს, მაგრამ იქიდან გამომდინარე, რომ პუტინი მუდმივად იმუქრებოდა, რომ შურს იძიებდა სააკაშვილზე და შეურაცხმყოფელი ფრაზებიც ჰქონდა გამოყენებული, რასაკვირველია, სააკაშვილის მიმართ ანგარიშსწორების ინტერესი რუსეთის ხელისუფლებას მუდმივად ჰქონდა და ამას არც მალავდა.

ამიტომ, ამის იგნორირება და თქმა, რომ არა, სააკაშვილის მხოლოდ მისი დანაშაულების გამო იხდის სასჯელს, არის გულუბრყვილობა პოლიტიკური და სამოქალაქო თვალსაზრისითაც.

• კობახიძე ამბობს, რომ სააკაშვილი არ არის ავად და ეს მხოლოდ სიმულაციაა – რას ფიქრობთ ამ განცხადებაზე?

ჩემი დამოკიდებულება ხელისუფლებისადმი უაღრესად კრიტიკულია. პირველ რიგში იმიტომ, რომ მიმაჩნია, საქართველოს ხელისუფლებამ უღალატა საქართველოს კონსტიტუციას, შეცვალა კურსი. დღეს ხელისუფლება ლანძღავს დასავლეთს, უკრაინას და ელაციცება რუსულ სივრცეს, მუდმივად იმეორებენ, რომ ჩვენ ვმდიდრდებით და ასე შემდეგ. ეს ყველაფერი უკრაინის ომის ხარჯზე, იმიტომ, რომ არ შეუერთდა ხელისუფლება სანქციებს და იქეთ ვესხმით ვერბალურად თავს უკრაინას.

ამ ტიპის ხელისუფლებისგან, რომელიც ყველაზე მეტად წააგავს 1921 წელს საქართველოში შემოსულ ბოლშევიკების ბანდას, რა ჰუმანიზმს უნდა ელოდო. ისინი მოქმედებენ თავიანთი ძალადობრივი ლოგიკით.

ამიტომ, სხვა ტიპის ქმედება მათგან არც იყო მოსალოდნელი. ესაა ხელისუფლება, რომელიც ფუნდამენტურად ეწინააღმდეგება საქართველოს უმთავრეს ინტერესებს, რომ აშენდეს ადამიანის უფლებებზე დაფუძნებული ლიბერალი დემოკრატია, სადაც პატივს უნდა სცემდნენ ადამიანის ღირსებას და ზოგადად ადამიანს.

დღეს გვყავს, ფაქტობრივად, კოლაბორაციული ხელისუფლება, რომელიც რუსეთის ინტერესებს ემსახურება, ამიტომ მისი ქმედებები აბსოლუტურად ლოგიკურია.

აქ პრობლემა არის ის, რომ პოლიტიკური სპექტრი, სამოქალაქო საზოგადოება, თითოეული ჩვენგანი, მეც მათ შორის, თითქოს სათანადოდ ვერ ვიაზრებთ ამ საფრთხეებს.

• რა არის მოცემულ შემთხვევაში საზოგადოებაზე დამოკიდებული? ბევრი კრიტიკა ისმის იმაზე, რომ საზოგადოება არ არის აქტიური. 

ჩვენი, მოქალაქეების საქმე არის პროტესტი, რაც არ ჩანს. პროტესტი უნდა იყოს მასობრივი, მძლავრი, რომ იძულებული გახდეს ხელისუფლება, შეცვალოს ბევრი რამ. მათ შორის მოპყრობა სააკაშვილისადმი ან მიიღოს გადაწყვეტილება მისი გაგზავნის შესახებ.

რატომ არ არის პროტესტი, ამაზე ალბათ მთელი სოციოლოგიური კვლევაა ჩასატარებელი. ერთი შეხედვით, არის სრული ინდიფერენტულობა პოლიტიკური ოპოზიციისადმი, იმიტომ, რომ ოპოზიცია არ არის თანმიმდევრული, არ აჩვენებს მზაობას ერთიანი, კონკრეტული ნაბიჯების გადასადგმელად. ოპოზიცია არ აჩვენებს, რომ შეუძლია რაღაც საკითხების წამოყენება და დაცვა, არ აჩვენებს, რომ მზად არის ხელისუფლება შეცვალოს.

ჩემი აზრით, საზოგადოება თითქოს ველოდებით რა შედეგით დასრულდება რუსეთ-უკრაინის ომი, როდის დაესმება წერტილი რუსეთის აგრესიას და გვგონია, რომ ყველაფერი თავისით შეიცვლება ამის შემდეგ. მე ასეთი განცდა მაქვს, რომ ახლა, ამ კრიტიკულ ვითარებაში, არავის არაფრის შეცვლა არ სურს.

• სოციალურ ქსელებში არაერთი ადამიანი წერდა, რომ არ სურს იყოს საქართველოს პრეზიდენტის მკვლელობის თანამონაწილე. თუ სააკაშვილს რაიმე მოუვა ციხეში, როგორც მოქალაქეს, გექნებათ დანაშაულის განცდა?

პირველ რიგში, ჩვენ მკაფიოდ ჩამოყალიბებული პოზიცია უნდა გვქონდეს იმაზე, რომ არსებული ხელისუფლებაა დამნაშავე იმაში, რაც მოსდის სააკაშვილს.

ეს არის ღირსების შემლახავი მოპყრობა, ეს არის წამება, ეს არის უკანონო პატიმრობა და ამაში სრულად ვარ დარწმუნებული, რომ მისი პატიმრობა არის პოლიტიკური და არა მის დანაშაულებთან დაკავშირებული.

მაგრამ დღეს ადამიანები ყოველდღიურობით არიან მოცული, რომ როგორმე თავი გადაირჩინონ, უამრავი ადამიანი ფიქრობს ქვეყნიდან წასვლაზე, ყველა თავის საზრუნავშია ჩაფლული.

კრიტიკულ შემთხვევაში საზოგადოებას მხოლოდ მორალური სიცხადე და ღრმა სამოქალაქო ცნობიერება თუ ეხმარება, რომ რაღაც ტიპის მოვლენებისადმი ჰქონდეს საერთო დამოკიდებულება, ჰქონდეს პროტესტი, რაც ჩვენ არ გვაქვს. ამის ნაკლებობა ნამდვილად არსებობს.

ჩვენ არ ვიცით რა არის აბსოლუტურად მიუღებელი, რა შეიძლება შეიწყნარო და რა არ შეიძლება შეიწყნარო. რისი ატანა შეიძლება და რისი – არ შეიძლება.

იმის ატანა, რაც სააკაშვილს თავს ხდება და რასაც გვიჩვენებენ, რითაც შეტევას ახორციელებენ ჩვენს ფსიქიკაზე, ცნობიერებაზე, მორალზე – აი, ამის ატანა არ შეიძლება.

არ შეიძლება ქართველი ჯარისკაცის შეურაცხყოფის ატანა, რადგან ამაზე დგას ჩვენი მშვიდობა. ხელისუფლება კი მთელი კვირის განმავლობაში შეურაცხყოფდა ქართველ მეომრებს.

არ შეიძლება ჩამოეკიდო რუსეთს, დაუშვებელია ამის ატანა და ჩვენ ამაზე რეაქცია უნდა გვქონდეს.

ამ ინდიფერენტიზმსაც აქვს თავისი მიზეზები – იყო იმედგაცრუებები სამოქალაქო სექტორის, პოლიტიკური ოპოზიციის მიმართ, ის ბოროტება, რასაც სჩადის რუსეთი უკრაინაში და ასევე, უკიდურესად ნეგატიური განწყობა სააკაშვილის ხელისუფლების მიმართ, რაც საზოგადოების გარკვეულ ნაწილს აქვს დღემდე, სხვადასხვა მიზეზების გამო.

როცა  არ გვაქვს საერთო ფასეულობები, რომელიც გვიკარნახებს ასეთ სიტუაციებში, რომ აი, ეს არის ზღვარი, ჯამში ვიღებთ ასეთ ინერტულობას, ასეთ შეწყნარებას იმისა, რისი შეწყნარებაც შეუძლებელი და დაუშვებელია მორალური საზოგადოებისთვის.

• საქართველოს ხელისუფლებამ უნდა შეასრულოს პირობები ევროკავშირის კანდიდატი ქვეყნის სტატუსის მისაღებად, ხელისუფლება კი ამის საწინააღმდეგოდ იქცევა. თქვენ როგორც მოქალაქეს, რა მოლოდინი გაქვთ?

მე მიმაჩნია, რომ „ქართული ოცნება“ კოლაბორაციონისტული ხელისუფლებაა და მას არანაირი მისწრაფება არ აქვს დასავლეთისკენ და იმ 12 პუნქტის შესრულებაზეც ყოველდღე იცინის.

ამას ამტკიცებს კიდეც, ომბუდსმენის ვერ არჩევით და კომპეტენტურ კანდიდატებზე უარის თქმით, როცა პოლიტიკური პატიმრების მიმართ ასეთ დემონსტრაციულ, საქვეყნო შურისძიებას აწარმოებს, როცა არანაირი საუბარი არ სურს დეოლიგარქიზაციაზე, სადაც კონკრეტულად წერია, რომ ეს ოლიგარქი ბიძინა ივანიშვილია და არა ვიღაც სხვა, აქ არც რაიმეს მოლოდინი არ უნდა გვქონდეს მოქალაქეებს და უბრალოდ თავს ვიტყუებთ.

იმის შემდეგ რაც 5 ივლისს მოხდა თბილისში, ან გარეჯის ოპერაცია როცა დაგეგმეს, როგორ უნდა ეგონოს ადამიანს, რომ ამ ხელისუფლებას დასავლეთის მიმართ ინტერესი შეიძლება ჰქონდეს.

ბელარუსის სპეცსამსახურებთან რომ ხელშეკრულებას გააფორმებ თანამშრომლობაზე, რა ლოგიკით უნდა გეგონოს, რომ ეს ხელისუფლება კონსტიტუციის ერთგულია.

ბათუმში და ხუთ მუნიციპალიტეტში საახალწლო ღონისძიებების მოსაწყობად, სცენის გამართვისთვის, ნაძვი ხეების შეძენა-მონტაჟისა და ინფრასტრუქტურის სადღესასწაულოდ გასაფორმებლად 5 მილიონამდე ლარი იხარჯება. აქედან ყველაზე მეტი – 4 მილიონამდე ლარი ბათუმის მერიის ხარჯია [მათ შორის 50 000 ლარი აჭარის განათლების სამინისტროს ბიუჯეტიდან თანამონაწილეობაა].

600 000-ზე მეტი ლარი კი აჭარის ხუთი მუნიციპალიტეტის ბიუჯეტებიდან დაიხარჯება, შესაბამისი შესყიდვები უკვე გაფორმებულია.

საახალწლო დღეებში ბათუმის გაფორმების სამუშაოების შესყიდვაზე მერიის ინფრასტრუქტურისა და კეთილმოწყობის სამმართველომ ხელშეკრულება ტენდერში გამარჯვებულ კომპანიასთან, შპს „აჭარგანათებასთან“ 5 დეკემბერს გააფორმა. შესყიდვის ღირებულება 1 მილიონ 993 000 ლარია. ამავე კომპანიას, გადაუდებელი აუცილებლობის მოტივით, ტენდერის გარეშე, გაუფორმეს ქალაქისთვის ახალი ნაძვის ხის შესყიდვა-მონტაჟის სამუშაოები 968 387 ლარად.

2022 წლის 15 დეკემბერს ბათუმის მერმა, არჩილ ჩიქოვანმა, აჭარის განათლების მინისტრ მაია ხაჯიშვილს მისწერა, რომ ქალაქის საახალწლო ღონისძიებების ხარჯი 700 000 ლარია და ამ საქმეში თანამონაწილეობა სთხოვა. განათლების სამინისტრო რამდენიმე მომსახურების დაფინანსებას – ჯამში 50 000 ლარის გამოყოფას დაჰპირდა ქალაქის მერს.

ბათუმის მოედანზე საახალწლო ღონისძიების მოსაწყობად ბიუჯეტიდან 53 000 ლარს დახარჯავს ბათუმის სპორტული ცენტრი, შესაბამისი მომსახურება ცენტრმა ტენდერის გარეშე შეისყიდა. სატენდერო დოკუმენტების მიხედვით, ღონისძიებაზე დასწრება ყველა მსურველს შეეძლება.

დოკუმენტებში წერია ისიც, რომ ღონისძიება 200 კაცზე გათვლილი ფურშეტით დასრულდება, რისთვისაც 8000 ლარი გაითვალისწინეს. სატენდერო მოთხოვნის მიხედვით, „ფურშეტის მენიუ უნდა შედგებოდეს: 2 სახის კანაპე; მინილობიანი, მინიხაჭაპური, მინიეკლერი, მინიშუ, ხილის ტორტი მარწყვით ყავა, ჩაი, გამაგრილებელი სასმელი, შუშხუნა ღვინო ბოკალით.“

ღონისძიება ყინულის სასახლეში იმართება.

ბათუმის კულტურის ცენტრმა საახალწლო ღონისძიებების ორგანიზება 293 000 ლარად შეისყიდა, ხელშეკრულება შპს „ბეტა პრინტს“ გაუფორმეს. კომპანიას საახალწლო კონცერტისთვის შესაბამისი გარემოს მოწყობა-აღჭურვის, აპარატურით მომსახურება, ბანერების დაბეჭდვა, ვიდეორგოლებით მომსახურება, კარვებით უზრუნველყოფა და სხვა ღონისძიებების ორგანიზებასთან დაკავშირებული სამუშაოები დაუკვეთეს.

რაც შეეხება ხელვაჩაურს – აქ საახალწლო დღეებში ორი კონცერტია დაგეგმილი: 2022 წლის 26 დეკემბერს „ღამის შოუს ბენდი“ იმღერებს, ხოლო 2023 წლის 13 იანვარს, კონცერტი საქართველოს მთავრობის დავალებით ჩატარდება. კონცერტებში ადგილობრივი ბიუჯეტიდან, ჯამში, მინიმუმ 173 363 ლარი დაიხარჯება.

კონცერტი 30 000 ლარად – ვინ ითხოვს „ღამის შოუს ბენდს“ ხელვაჩაურში?!

მთავრობის განკარგულებით, საახალწლო კონცერტები აჭარის ხუთივე მუნიციპალიტეტში ჩატარდება. 2023 წლის 6 იანვარს ქობულეთში პრემიერის განკარგულებით დაგეგმილი კონცერტისთვის ბიუჯეტიდან 134 891 ლარი, ხოლო ქედაში 198 506 ლარი დაიხარჯება [ქედაში კონცერტი 2023 წლის 3 იანვარს ჩატარდება].

წელს ახალი ნაძვის ხე ქობულეთის მუნიციპალიტეტმაც შეისყიდა. ბათუმის მერიისგან განსხვავებით, ქობულეთმა ნაძვის ხე 145 740 ლარად, ტენდერის გზით იყიდა და არა გადაუდებელი აუცილებლობით. ტენდერი ნაძვის ხის შესყიდვის მიზნით ქობულეთის მერიამ 2022 წლის ნოემბერში გამოაცხადა.

ქობულეთის მერიამ საახალწლო ღონისძიებების მომსახურება 230 200 ლარად შეისყიდა. სატენდერო დოკუმენტების მიხედვით, შესყიდვა საახალწლო ღონისძიებების მოწყობას 25 დეკემბრიდან 2 იანვრის ჩათვლით პერიოდში ითვალისწინებს.

საახალწლო ღონისძიებების ორგანიზება ხულოს მუნიციპალიტეტმა ყველაზე დაბალ ფასად – 23 000 ლარად შეისყიდა. სატენდერო დოკუმენტების მიხედვით, ამ თანხით საახალწლო აქსესუარები შეისყიდეს. მერიაში გვითხრეს, რომ საახალწლო კონცერტიც ჩატარდება და მონაწილეობას ადგილობრივი შემსრულებლები მიიღებენ.

„ტროლინგის მიზანი არის, გაავრცელოს არასწორი საინფორმაციო დისკურსი, რადგან ხელისუფლებას არ უნდა ვინმემ რაიმე ტიპის დღის წესრიგი გარედან შესთავაზოს. ამიტომ ის ყოველმხრივ ცდილობს, პროაქტიულად შექმნას თავისი დღის წესრიგი, რომელიც, რა თქმა უნდა, ეფუძნება ტროლებს“, – ასე ხსნის ჟურნალისტი, მედია მკვლევარი ზვიად ქორიძე მიზეზს, თუ რატომ ცდილობენ ტროლები მნიშვნელოვანი დისკუსიების ჩაშლას.

თუ სოციალურ სივრცეში მიმდინარე დისკუსიებს დააკვირდებით, აუცილებლად აღმოაჩენთ, რომ სადაც კი მნიშვნელოვანი თემების განხილვა იწყება, იქ აუცილებლად ჩნდებიან ე.წ. ტროლები და ამ დისკუსიის ჩაშლას ცდილობენ. ხშირ შემთხვევაში შლიან კიდეც.

„ბათუმელები“ ამ სტატიაში გამოცემის ფეისბუქგვერდზე, 18 დეკემბრის საღამოს განვითარებულ მოვლენებზე დაკვირვების შედეგებს გიზიარებთ.

18 დეკემბერს მრავალსართულიანი საცხოვრებელი კორპუსის ბოლო სართულზე განთავსებული რესტორანი დაიწვა. მეხანძრე-მაშველები ცეცხლს 4 საათზე მეტი ხნის განმავლობაში აქრობდნენ.

“ბათუმელები“ ხანძარს და მის სალიკვიდაციო სამუშაოებს პირდაპირ ეთერში აშუქებდა. ფეისბუქლაივის ქვეშ ხანძრით შეშფოთებული მოქალაქეები საკუთარ მოსაზრებებს ტოვებდნენ.

„სად არის მთავრობა? ვერტმფრენს რატომ არ გამოუძახეს? უპატრონო ქვეყანაში ვცხოვრობთ. არ ეცოდებათ ხალხი, რას შველის ეს სახანძროები“

„ასე ხომ შეიძლება მოედოს მთელ უბანს, რას ელოდებიან, სეირს უყურებენ? იმედია არავინ დაშავდება“

„ვერტმფრენები სადაა, ვერტმფრენებით რომ ჩააქრონ“

„ამხელა კორპუსების მშენებლობის უფლებას რომ აძლევს ხელისუფლება, რატომ არ ყიდულობენ შესაბამის ტექნიკას, რატომ?“

„ღმერთო, დაუჯერებელია, რა ხდება. ამდენი მაღალი შენობა ღმერთის იმედადაა და არანაირი ტექნიკა, მომარაგება არ აქვს ქვეყანას, ქალაქებს, ღმერთო“

„ლეოგრანდის დაწვის შემდეგ მაინც უნდა მიეღოთ საჭირო ზომები ასეთი სიტუაციებისთვის“, „მერი წვიმას ელოდება“, – ასეთი იყო ლაივის ქვეშ დაწერილი კომენტარების დიდი ნაწილი.

საერთო ჯამში, ხანძრის ლაივზე 3 ათასზე მეტი კომენტარი დატოვეს მოქალაქეებმა.

ლაივის ჩართვისა და მოქალაქების აქტიურობიდან მოკლე ხანში ლაივის ქვეშ ტროლები გამოჩნდნენ და მოქალაქეების ყურადღების გადატანა სცადეს.

„სიმინდი, სიმინდიი“, „რამ დარირო, რიმდარირო“ – ამ და  მსგავსი კომენტარებით ცდილობდა ერთ-ერთი ტროლი დისკუსიაში დისონანსის შემოტანას. მას შემდეგ, რაც მოქალაქეები არ აყვნენ, ლაივზე ახალი ტროლი გამოჩნდა.

„ვყიდი 3 ძროხას ჭიათურაში“, „3 ჯიშიანი ძროხა ხალხო“, „ვყიდი სამ ჯიშიან გერმანულ ბოჩოლას ჭიათურაში, დეტალები პირადში“, – ტროლ ექაუნთი სახელით Natashka Natashka არაერთგზის შეეცადა დისკუსიის მიმდინარეობის შეცვლას.

მას შემდეგ, რაც არც ამან იმუშავა და ხალხი ისევ წერდა საქმიან კომენტარებს – კითხულობდნენ, სად იყო ვერტმფრენი, რატომ ვერ აქრობდნენ ხანძარს, ტროლებმა ახალი თემის შემოტანა და ხანძართან საქართველოს მესამე პრეზიდენტის, მიხეილ სააკაშვილის დაკავშირება სცადეს.

ბოლოს, როცა არც ამაზე არ ჰქონიათ მოქალაქეებს რეაქცია, დისკუსიაში გაჩნდა ახალი ტროლი სახელით Norman Norman, რომელმაც დაწერა: „აჭარლებო, მაგრად არ მევასებით, რაღაცნაირი ხალხი ხართ, სოხუმლები გჯობიათ“.

განსხვავებით წინა ტროლებისგან, ამ კომენტარის ავტორ ტროლს „გაუმართლა“ – მის კომენტარს მოქალაქეები გამოეპასუხნენ და საკმაოდ აგრესიულადაც. თანდათან დისკუსია, რომლის მთავარი შინაარსი ხანძარი, სახანძრო უსაფრთხოება და ხელისუფლების უმოქმედობა იყო, ნაწილობრივ შეიცვალა – წინამორბედებისგან განსხვავებით, ამ ტროლმა მიზანს მიაღწია.

„რაც არ უნდა მოაწყო, იმ ინფორმაციას ვერ წაშლი, რომ მაღალსართულიანი კორპუსის სხვენზე რესტორანი დაიწვა. ამას ვერ დამალავ, მთელი ქალაქი უყურებდა როგორ იწვოდა ეს შენობა. მაშინ რატომ გამოიყვანეს ტროლები და რატომ სცადეს დღის წესრიგის შეცვლა? ამ შემთხვევაში არა ვიღაცის წინააღმდეგ მოქმედება იყო ამ ტროლების ამოცანა, ამ ტროლების ამოცანა იყო დღის წესრიგი შეგვეცვალა. ისინი შეეცადნენ შემოეტანათ თემები, რომლებიც გადაფარავდა კითხვებს – თუ რამდენად კორუმპირებულია ადგილობრივი მმართველობა, ვის აქვს ეს შენობა აშენებული, რა პირობით აქვს გადაცემული, სახანძრო უსაფრთხოების წესები როგორ არის დაცული, ზოგადად უსაფრთხოების რა მექანიზმები არსებობს.

ბევრი ასეთი საკითხი გამოვიდა წინა პლანზე, როდესაც ეს ხანძარი გაჩნდა,“ – ამბობს მედია მკვლევარი ზვიად ქორიძე.

19 დეკემბერს აჭარის უმაღლესი საბჭოს დეპუტატს, გიორგი კირთაძეს, ქუჩაში იმ დროს დაესხნენ თავს, როდესაც ის ტელეკომპანია „ფორმულას“ პირდაპირ ეთერში ერთვებოდა.

მედიამკვლევარი ზვიად ქორიძე, ხანძარს, ტროლებსა და გიორგი კირთაძეზე თავდასხმას შორის პირდაპირ კავშირს ხედავს და ამბობს, რომ ენმ-ის რეგიონულ ლიდერზე თავდასხმა ხანძრის ირგვლივ გაჩენილი დისკუსიის გადასაფარად მოხდა.

„ჰიპოთეტური ტროლია, უბრალოდ სახელი-გვარი ჰქონდა მას, ვინც მეორე დღეს რატომღაც მიუვარდა ენმ-ის ლიდერს ბათუმში და ფიზიკურად გაუსწორდა.

რატომ გააკეთა ეს? იმიტომ, რომ საზოგადოებრივი დისკუსია სხვა მიმართულებით წასულიყო.

მთავარი თემა იყო ხანძარი, არა როგორც ხანძარი, არამედ ხანძარი ყველა მისი წინარე ისტორიებით, ყველა მისი მიმდინარე პროცესით და რა კითხვებიც გაჩნდა საზოგადოებაში, ყველა აქტუალური იყო.

მაგრამ ეს უნდა გადაფარო, რადგან თუ ეს დომინანტური კითხვები გაჩნდა, მაშინ, რა თქმა უნდა, ზარალდება ხელისუფლება. იმისათვის, რომ ხელისუფლება არ დაზარალდეს, თავად ხელისუფლება რთავს აი, ამ ტროლების მექანიზმს და იღებს კიდევაც გარკვეულ შედეგს. შეიძლება ისეთი ტიპის დისკუსია წამოვიდეს, რომელმაც იმწუთას ყურადღება გაუფანტოს აქტიური საზოგადოების რაღაც ნაწილს და გადაიყვანოს სხვა რელსებზე. ტროლის მიზანიც ეს არის, ამისთვის არსებობს.

ეს ხომ ჩვეულებრივი დეზინფორმაციული და მანიპულაციური მანქანაა. ტროლინგის მიზანი არასწორი საინფორმაციო სადისკუსიო დღის წესრიგის გავრცელებაა,“- ამბობს ზვიად ქორიძე.

მედია მკვლევარის თქმით, ტროლების მეშვეობით მთავრობა დღის წესრიგს პროაქტიულად ქმნის, რადგან „ხელისუფლებას არ უნდა, რაიმე ტიპის დღის წესრიგი ვინმემ გარედან  შესთავაზოს და თვითონ ჩადგეს თავისმართლების რეჟიმში“.

„ბათუმელების“ კითხვაზე, რა აძლევს იმის თქმის საფუძველს, რომ ტროლები ხელისუფლებისგან იმართება, მედია მკვლევარი ფინანსებზე მიუთითებს.

„ტროლების შესანახად არის დიდი ფინანსები საჭირო. ამიტომაც შეგვიძლია ვივარაუდოთ, რომ ყველაზე უფრო მეტად ეს შედის ხელისუფლების ინტერესებში. ხელისუფლებას შეუძლია ასეთი მექანიზმების მართვა.

[ხელისუფლებისთვის] პრობლემაა ქვეყანაში საზოგადოებრივი დისკუსიების არსებობა. რადგან მერე ხელისუფლებას უწევს ამ განწყობებისთვის ანგარიშის გაწევა,“ – ამბობს ზვიად ქორიძე.

ვინ არიან ტროლები და რას საქმიანობენ

ტროლი არის სოციალურ ქსელში ანონიმურად მოქმედი ანგარიში, რომელიც რეალური იდენტობის მითითების გარეშე მოქმედებს. არსებობს მათი ორი კატეგორია. პირველი, ვინც მეტი დამაჯერებლობისთვის სხვა ადამიანის იდენტობას იპარავს – რაც ნიშნავს იმას, რომ სხვა სახელის და გვარის მქონე ადამიანის ფოტოებს იყენებს თავის პროფილზე. მეორე კატეგორია, რომელიც მაიდენტიფიცირებელ ინფორმაციას მალავს.

„რაც უფრო ზრუნავს ტროლი თავისი პროფილის შექმნასა და იდენტობის ჩამოყალიბებაზე, ნდობის მოპოვებაზე, მით უფრო რთულია მისი, როგორც ტროლის ამოცნობა. თუ პროფილის სახელად მხოლოდ „გიო გიო“ უწერია, პირად ფოტოებს არ აქვეყნებს, ან მხოლოდ ყვავილებისა და ჩიტების ფოტოები აქვს გამოქვეყნებული, დამატებით, თუ მოწონებული აქვს კონკრეტულ პარტიასთან დაკავშირებული გვერდები და ამასთან, ვინმეს მხარდამჭერ ან მადისკრედიტებელ კომენტარებს ტოვებს, ამ დროს უფრო ადვილად შეგვიძლია მივხვდეთ, რომ საქმე ყალბ ანგარიშთან გვაქვს.

მაგრამ როცა ისეთი ფოტოები აქვს გამოქვეყნებული, რომლებიც შთაბეჭდილებას ტოვებენ, რომ ნამდვილი ადამიანია ამ ფოტოებზე, პოსტებზე აქვს კომენტარები, ლაიქები, ჰყავს ბევრი მეგობარი, ხშირად აზიარებს სხვადასხვა ფოტოს და ჩექინდება სხვადასხვა ადგილიდან, ეს ჩვეულებრივ მომხმარებელს არ უჩენს ეჭვს, რომ შეიძლება იყოს ყალბი ანგარიში. ხშირად ეს იმის გამოც ხდება, რომ სოციალური ქსელის მომხმარებლებს ყოველთვის არ გვაქვს დრო ყველა დეტალს ჩავუღრმავდეთ და ყველა საეჭვო კომენტარის ავტორის პროფილები გავაანალიზოთ,“. – ამბობს ანი ქისტაური, მედიის განვითარების ფონდის (MDF) მკვლევარი.

მისივე თქმით, ამ ფაქტორით ხშირად ბოროტად სარგებლობენ ყალბი ანგარიშები და ცდილობენ ჯანსაღ დისკუსიას ხელი შეუშალონ.

„ცდილობენ დისკუსია ჩაშალონ, საღი აზრი ჩაახშონ ან არსებული პრობლემისგან ისრები სხვა მიმართულებით გადაიტანონ. ხშირად ტროლები ცდილობენ, შექმნან იმის ილუზია, რომ უმრავლესობას წარმოადგენენ და ამით სოციალური ქსელის სხვა მომხმარებლებს აბრკოლებენ, ხელს უშლიან, რომ მათგან განსხვავებული აზრი დააფიქსირონ,“ – ამბობს ანი ქისტაური.

როგორ შლიან ტროლები საზოგადოებრივ დისკუსიებს

„ტროლები რატომ არსებობენ? იმიტომ არსებობენ, რომ დისკურსები შეცვალონ. ტროლები არსებობენ იმიტომ, რომ ის, რაც არის მნიშვნელოვანი აქცენტები, რაზეც შეიძლება საზოგადოება ბჭობდეს და ის, რაც საზოგადოების განვითარებას ემსახურება – დაანგრიონ,“ – ამბობს მედიამკვლევარი ზვიად ქორიძე და იქვე განმარტავს, თუ რატომ ცდილობენ ტროლები საზოგადოებრივი დისკუსიების ჩაშლას.

„ტროლი შედის იმ ჯგუფების ან ინსტიტუციების ინტერესებში, ვისაც უნდა, რომ საზოგადოებრივი დისკუსიები არ შედგეს. საზოგადოებრივი დისკუსია იწვევს მოქალაქეების გააქტიურებას, მოქალაქეების მობილიზებას, საზოგადოებრივი დისკუსია იწვევს ჯანსაღ პოლიტიკურ და საზოგადოებრივ პროცესს. ბუნებრივია, ამ დისკუსიების ჩაშლა ვის ინტერესებშიც შედის, ის ქმნის ამ ტროლებს, უშვებს საჯარო სივრცეში და იწვევს საკომუნიკაციო ველის მოშლას, მონგრევას.

იმიტომ, რომ აჩენს პარალელურ მოძრაობებს, აჩენს ეჭვებს, აჩენს სკეპტიციზმს იმ საკითხების მიმართ, რაზეც საზოგადოება უკვე მეტ-ნაკლებად თანხმდება. ტროლი კი არის დესტრუქციული.

ეს არის აპრობირებული ტექნოლოგია, ამაზე მუშაობს ძალიან ბევრი ინსტიტუტი, შედეგსაც აღწევენ გარკვეულწილად, რადგან ხშირ შემთხვევაში ტროლების მიერ ამოყირავებული სადისკუსიო მაგიდა მერე ხდება მეინსტრიმული.

შედეგად ეს უფრო მეტ გავლენას ახდენს გადაწყვეტილების მიღების პროცესში მყოფ მოქალაქეებზე. მერე გადაწყვეტილება ან საერთოდ აღარ მიიღება, ან მოქალაქეები ხდებიან უფრო მეტად ინერტულები და უფრო მეტად პესიმისტურად განწყობილები იმ კონკრეტული საკითხის მიმართ,“ – ამბობს ზვიად ქორიძე.

მედიამკვლევარი იხსნებს ტროლების ბოლო „ნამუშევარს“ – ე.წ. „აბა, ომი გინდათ“ დისკურსს, რომელიც პოლიტიკურ დღის წესრიგად იქცა.

„ყველაზე მნიშვნელოვანი დისკუსია, რომელიც ახლა მიდის ქართულ საზოგადოებაში, ეფუძნება ტროლების მიერ შექმნილ დისკურსს, რომელსაც მერე დაეშენა პოლიტიკური დღის წესრიგი. „ომი გვინდამ“ იმდენად შეცვალა მნიშვნელოვანი საზოგადოებრივი დღის წესრიგი ამ ტროლების აქტიურობით, რომ პრაქტიკულად მთელი პოლიტიკური დღის წესრიგი დაეშენა ამ მოგონილ თემას.

თემა აბსოლუტურად მოგონილია. რადგან საზოგადოებას უნდა ჰქონდეს გააზრებული, რა მასშტაბის პროცესები მიდის ახლა უკრაინაში. საზოგადოებას უნდა ჰქონდეს მეტი ინფორმაცია ამ ომზე. ომზე, როგორც ომზე და ომზე, როგორც პოლიტიკურ, საზოგადოებრივ პროცესზე.

რას ცვლის ეს ომი არა მხოლოდ უკრაინაში ან რუსეთში, ან პოსტსაბჭოთა სივრცეში, არამედ მთელ მსოფლიოში. იცოდეს, რატომ უნდა იყოს ჩართული ამ ომის დღის წესრიგში, როგორ უნდა ხედავდეს თავს, როგორც საომარ პროცესში და ასევე პოლიტიკურში. იმიტომ, რომ ამ ომის შედეგად აბსოლუტურად იცვლება არამხოლოდ ევროპის პოლიტიკური რუკა , არამედ იცვლება აქცენტებიც. იცვლება პოლიტიკური ალიანსები, იცვლება დღის წესრიგი ამ სახელმწიფოების და ა.შ. შენ უნდა ხედავდე შენს ადგილს აი, ამ ცვლილებათა ნაკადში.

ამ დროს ტროლებმა საზოგადოებას შესთავაზეს დისკურსი – რომ ვინც აი, ამ პროცესში გამოხატავს ლოიალობას უკრაინელების მიმართ ან თავის სიმპათიას, დამოკიდებულებას ამ პროცესის მიმართ, იმათ უნდათ ომი. ქვეყნის ომში ჩართვა.

როგორც  კი ეს თემა დამუშავდა, მომენტალურად წამოვიდა პოლიტიკური დღის წესრიგი – რომ „ომი გვინდა“.

რა თქმა უნდა, ამას ღიად არ ამბობს მმართველი ელიტა, ისინი არიან გაყურსულები. ამბობენ, რომ ჩვენ ომი არ გვინდა, მაგრამ ყველა სხვა დანარჩენი, ვინც ქმნის ამ მოსაზრებებს, საზოგადოებრივ აზრს, ისინი მთლიანად არიან ტროლები, ბოტები და ისინი აჯერებენ საზოგადოებას.

ტროლინგის საუკეთესო მაგალითია „ხალხის ძალა“, პოლიტიკური დაჯგუფება, რომელიც ყალიბდება ნელ-ნელა, როგორც პოლიტიკური ძალა და აბსოლუტურად ტროლინგზეა აწყობილი: ისეთ დღის წესრიგს სთავაზობს საზოგადოებას ნდობის მოსაპოვებლად, რომელიც ტყუილია.

ეს იმდენად კვალიფიციურად მომზადებული ტყუილია, რომ საზოგადოების დიდ ნაწილს მიაჩნია სიმართლედ,“ – ამბობს ზვიად ქორიძე.

ევროპარლამენტის წევრი, ვიოლა ფონ კრამონი, ეხმაურება მიხეილ სააკაშვილის ჯანმრთელობის მდგომარეობის საკითხს და ამბობს, რომ როცა საქართველოს ყოფილი პრეზიდენტი ბოლოს ნახა, „იგი ჯანმრთელი ადამიანი იყო“.

„ახლა იგი ასე გამოიყურება, ქართულ ციხეში ერთ წელიწადზე ოდნავ მეტის გატარების შემდეგ. საქართველოს ხელისუფლება პასუხისმგებელია სააკაშვილის და ყველა პატიმრის ჯანმრთელობაზე“, – წერს ევროპარლამენტარი „ტვიტერში“.

ფონ კრამონმა პოსტს ორი ფოტო დაურთო: პირველი მისი და სააკაშვილის შეხვედრიდან 2021 წლის ივნისში, მეორე კი სააკაშვილის დღევანდელი ჩართვიდან სასამართლო პროცესზე.

See more

🇬🇪 Last time I met Mikheil #Saakashvili he was a healthy man. This is how he looks today a bit over a year in a Georgian prison. The well-being of every prisoner including Saakashvili is a responsibility of the Government of #Georgia. pic.twitter.com/XY6fbhnfNy

— Viola von Cramon 🇺🇦🇪🇺 (@ViolavonCramon) December 22, 2022

ვიოლა ფონ კრამონი აქტიურად ეხმაურება საქართველოში მიმდინარე პროცესებს და ბოლო წლებში „ქართულ ოცნებას“ აკრიტიკებს. „ნაციონალური მოძრაობის“ ხელისუფლების დროს იგი სააკაშვილს აკრიტიკებდა და როგორც თავად ამბობს, 2012 წელს „ნაციონალური მოძრაობის“ დამარცხება გაუხარდა.

საქართველოს ყოფილ მოქალაქეს, რომელმაც საქართველოს მოქალაქეობა სხვა ქვეყნის მოქალაქეობის მოპოვების გამო დაკარგა, უფლება აქვს, 2024 წლის 31 დეკემბრამდე მიმართოს სახელმწიფო სერვისების განვითარების სააგენტოს საქართველოს მოქალაქეობის აღდგენის წესით მინიჭების მოთხოვნით.

შესაბამისი ცვლილება „საქართველოს მოქალაქეობის შესახებ“ საქართველოს ორგანულ კანონში შევიდა. ამ ცვლილებამდე ეს ბოლო ვადა 2022 წლის 31 დეკემბერი იყო.

ამასთან, ახალი ცვლილებით, „საქართველოს მოქალაქეს, რომლის მიმართაც 2018 წლის 15 აგვისტომდე არ ყოფილა მიღებული გადაწყვეტილება სხვა ქვეყნის მოქალაქეობის მოპოვების გამო საქართველოს მოქალაქეობის დაკარგვის შესახებ, უფლება აქვს, 2024 წლის 31 დეკემბრამდე მიმართოს სააგენტოს საქართველოს მოქალაქეობის შენარჩუნების მოთხოვნით.“.

ცვლილებამდე ეს ბოლო ვადაც 2022 წლის 31 დეკემბერი იყო.

ამ თემაზე არქივიდან:

საქართველოს მოქალაქეობის აღდგენა-შენარჩუნების მოთხოვნის ვადები გახანგრძლივდა

See more

ხვალ, 23 დეკემბერს, ფრიდონ ხალვაშის გამზირზე სასმელი წყალი ისევ გაითიშება. „ბათუმის წყლის“ ინფორმაციით, ამ ქუჩაზე წყალი დილის 9 საათიდან შეწყდება ღამის 12 საათამდე.

კომპანიის პრესცენტრში განმარტავენ, რომ ეს გეგმური სარემონტო სამუშაოა და „წყლის მილია დაზიანებული“.

რატომ ხდება საჭირო ფრიდონ ხალვაშის გამზირზე სარემონტო სამუშაოს ჩატარება ისევ, როცა ერთი თვის წინ, 24 ნოემბერს, ამავე ქუჩაზე შეწყდა წყლის მიწოდება და 3 დღეს ტარდებოდა სარემონტო სამუშაოები? – „ბათუმის წყლის“ პრესცენტრში გვითხრეს, რომ ამ კუთხით კვლევა არ ჩაუტარებიათ, რატომ სჭირდება ამ ინტენსივობით ფრიდონ ხალვაშის ქუჩაზე წყლის მილებს რემონტი. „დაზიანება სხვა ლოკაციაზეა,“ – დასძინეს „ბათუმის წყლის“ პრესცენტრში.

24 ნოემბერს ფრიდონ ხალვაშის გამზირზე წყლის მიწოდების შეწყვეტის დროს მოსახლეობა 3 დღე დარჩა წყლის გარეშე. „ბათუმის წყალი“ არც ხვალისთვის აპირებს კანონით სავალდებულო მოთხოვნის შესრულებას და მოსახლეობისთვის რეზერვუარით სასმელი წყლის მიწოდებას.

„ჩვენ გვაქვს 24-საათიანი წყალმომარაგების ვალდებულება, თუმცა დაზღვეული არ ვართ ავარიული და გეგმური სამუშაოებისგან,“ – განმარტეს „ბათუმის წყლის“ პრესცენტრში. საია-ს შეფასებით კი, არათუ გეგმური სამუშაოების დროს, ფორსმაჟორის დროსაც კი, კომპანიამ უნდა იზრუნოს წყლის ალტერნატიული გზით მიწოდებაზე.

საკუთარი ოფისებისთვის კომპანია „ბათუმის წყალი“ სასმელ წყალს  ყიდულობს. ტენდერის შესახებ ინფორმაცია ნახეთ აქ.

 

შპს „ბათუმის წყალი“ სასმელ წყალს ყიდულობს. ტენდერი უკვე გამოცხადებულია.

სატენდერო დოკუმენტაციის მიხედვით, შესყიდვის სავარაუდო ღირებულება 6 600 ლარია. წინადადებების მიღება 28 დეკემბერს დასრულდება.

„ბათუმის წყალი“ ყიდულობს არა წყალს ბოთლებით, რასაც, მაგალითად, ოფიციალურ შეხვედრებზე გამოიყენებს, არამედ 660 ცალ ბოცას სასმელი წყლით.

„სასმელი წყლის მიწოდება განხორციელდება 19-ლიტრიანი ჭურჭლით, პოლიკარბონატის ბოცით, რომელიც განკუთვნილია წყლის
დისპენსერებზე დასადგმელად; შენახვის ვადა ჩამოსხმის თარიღიდან შეადგენს 3 თვეს, ხოლო მიწოდების პერიოდისთვის შენახვის ვადა შეადგენს მინიმუმ 2 თვეს.

თითოეულ მოწოდებულ წყლის ჭურჭელზე მითითებული იქნება წყლის შემადგენლობა, ჩამოსხმისა და ვარგისიანობის ვადა, ჩამომსხმელი ქვეყანა, მწარმოებელი, სამარკო ნიშანი,“ – ვკითხულობთ სატენდერო განაცხადში.

„ბათუმის წყალი“ ამავე შესყიდვით შეიძენს სასმელი წყლის მიწოდების 16 ცალ დისპენსერს.

კომპანია „სოკარის“ ცნობით, 23 დეკემბერს ბათუმსა და ქობულეთში გაზი რამდენიმე მისამართზე გაითიშება.

ბათუმში გაზის მიწოდება 23 დეკემბრის 10:00 საათიდან შეუწყდებათ ვაჟა-ფშაველას #53 ქუჩის აბონენტებს. „სოკარის“ ცნობით, გაზის მიწოდება დაიწყება 23 დეკემბრის 13:00 საათიდან და სრულად აღდგება 23 დეკემბრის დღის ბოლომდე.

23 დეკემბრის 11:00 საათიდან ქობულეთის მუნიციპალიტეტში გაზმომარაგება შეუწყდება ნინოშვილის, ჭავჭავაძის, აღმაშენებლისა და ლესელიძის  ქუჩის აბონენტებს.

„სოკარის“ ცნობით, ქობულეთში გაზის მიწოდება დაიწყება 23 დეკემბრის 16:00 საათიდან და სრულად აღდგება 23 დეკემბრის დღის ბოლომდე.

„სოკარის“ ცნობით, გაზის მიწოდების შეწყვეტის მიზეზი გაზსადენზე დაგეგმილი სარემონტო საექსპლუატაციო სამუშაოებია.

კომპანია აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

2022 წელს მილიონობით ადამიანი იქცა დევნილად, მიგრანტად ან იძულებით გადაადგილებულ პირად. ევროპის პრესფოტო სააგენტოს ეს ფოტორეპორტაჟი ასახავს ადამიანებს სხვადასხვა ქვეყნიდან.

კრემლის პროპაგანდისტმა ტელეწამყვანმა, ვლადიმერ სალოვიოვმა თავის გადაცემაში ქართველების დამაკნინებელი და ქსენოფობიური პაროდია გააკეთა. მისი აზრით, ამგვარად დასცინა საქართველოს მოქალაქეებს და რუსებს, რომლებიც უკრაინაში შეჭრის შემდეგ საქართველოში გამოიქცნენ.

უცხოეთში წასულ რუსებზე საუბრისას, სალოვიოვმა თქვა, რომ მათ გაიჩინეს ახალი სამშობლო – მათ შორის საქართველო. ამის შემდეგ კი „გააჯავრა“ ქართველები, რომლებსაც, მისი წარმოდგენით, ჩამოსული რუსები „პ***რასტები“ ჰგონიათ.

თარგმანში მაქსიმალურად შენარჩუნებულია სალოვიოვის სტილი.

„ესე იგი, დავკარგეთ მილიონ-ნახევარი ადამიანი, რომლებმაც მოულოდნელად ახალი სამშობლო გაიჩინეს, – უცბად იგრძნეს თავი ყაზახებად, სომხებად, უზბეკებად, ტაჯიკებად, ყირგიზებად, ქართველებად – და მიიღეს მედალი ზემო ლარსის შტურმისთვის“, – თქვა მან.

• მედალი „ზემო ლარსის“ შტურმისთვის ინტერნეტ-მიმი გახდა „ტვიტერის“, „ტელეგრამისა“ და სხვა სოციალური ქსელების რუსულენოვან სეგმენტში, როცა „ნაწილობრივი მობილიზაციის“ გამოცხადების შემდეგ რუსეთის ათასობით მოქალაქე საქართველოს სახმელეთო საზღვართან უზარმაზარ რიგში იდგა.

მიმი – „მედალი ზემო ლარსის აღებისთვის“. წყარო: „ლაივჯორნალი“, მომხმარებელი Colonel Cassad

ამ სიტყვების შემდეგ სალოვიოვი გაურკვეველ ხმებს გამოსცემს, რითაც, დიდი ალბათობით, ქართული მუსიკის პაროდირებას ცდილობს და რუსულ-ქართულად აგრძელებს:

„გამარჯობა გენაცვალე! როგორა ხარ? კარგად! ყველაფერი ისწავლეს, რაც იცოდნენ [sic!], მაგრამ ვერ იპოვეს აუცილებელი საჭმელი, მათი პ***რასტული მაღაზიების ქსელებით განაზებული რუსეთიდან.

რა ერქვა იმას, სადაც, აი, ეს, ყვაოდა, ლგბტ… „ვკუსვილი“!.. ვკუშვილა, ლატეიშვილი, შვილი… შპილი-ვილის უშვრებიან ერთმანეთს [იგულისხმება სექსუალური კონტაქტი ორ კაცს შორის]… შემდეგ რა არის?“

„ვკუსვილი“ რუსული ქსელური მაღაზიაა, რომელიც ასევე ინტერნეტ-მიმი გახდა მას შემდეგ, რაც რუსეთიდან საქართველოში წამოსულმა ზოგმა ადამიანმა დაწერა, რომ არ მოსწონდა „თბილისი“, რადგანაც ქალაქში „ვკუსვილი“ არ იყო. ამას „ტვიტერის“ რუსულენოვან სეგმენტში ხუმრობა მოჰყვა.

პროკურატურის ცნობით, მეუღლის მიმართ განსაკუთრებული სისასტიკით და დამამძიმებელ გარემოებებში განზრახ მკვლელობის მცდელობის ფაქტზე პირს სასამართლომ 19 წლით თავისუფლების აღკვეთა მიუსაჯა.

„ახალციხის რაიონულმა სასამართლომ სრულად გაიზიარა პროკურატურის მიერ წარდგენილი მტკიცებულებები და მეუღლის მიმართ განსაკუთრებული სისასტიკით, გენდერის ნიშნით შეუწყნარებლობის მოტივით განზრახ მკვლელობის მცდელობის ფაქტზე და ძალადობის ორ ეპიზოდზე ბრალდებული პირი დამნაშავედ ცნო.

სასამართლო პროცესზე გამოკვლეული მტკიცებულებებით დადასტურდა, რომ ოჯახში ძალადობისთვის და მუქარისთვის ნასამართლევმა პირმა განსაკუთრებული სისასტიკით, დანის დარტყმით სხეულის სხვადასხვა არეში ჭრილობები მიაყენა მეუღლეს და ფიზიკური ძალადობა განახორციელა მეუღლის დედის მიმართ. დროული სამედიცინო დახმარების გაწევის შედეგად მოხერხდა დაზარალებულის გადარჩენა“ – იუწყება პროკურატურა.

სამართალდამცველებმა ბრალდებული იმავე დღეს დააკავეს.

ახალციხის რაიონულმა სასამართლომ ბრალდებული სრულად ცნო დამნაშავედ წარდგენილ ბრალდებებში და 19 წლით თავისუფლების აღკვეთა მიუსაჯა.

ავარიული სახლების პროგრამაში მონაწილეობის მსურველი კომპანიების განაცხადები ბათუმის მერიაში თანდათან იზრდება. როგორც მოსალოდნელი იყო, ბიზნესი პირველ ეტაპზე ქალაქის ცენტრში მდებარე ავარიული სახლებით არის დაინტერესებული და ორსართულიანი სახლების ათვისების სანაცვლოდ მინიმუმ 15-სართულიანი კორპუსების აშენება სურთ.

კომპანიებს მხოლოდ ზღვასთან ახლოს მდებარე ავარიული სახლები აინტერესებთ

შპს „ემ-კვადრატი“ ბათუმში ფიროსმანის #1-ში, ზღვასთან ახლოს ავარიული სახლის დემონტაჟის ხარჯზე, ახალი, 18-სართულიანი კორპუსის აშენებას გეგმავს. კომპანიამ ბათუმის მერიას ახალი მრავალბინიანი სახლის პროექტი და ავარიულ სახლში მცხოვრებლებთან მოლაპარაკების შესახებ ამხანაგობის ოქმი, ასევე ხელშეკრულებები წარუდგინა. სამშენებლო ტერიტორია 1159 კვ.მეტრია და მაღალი ინტენსივობის საცხოვრებელ ზონაში მდებარეობს.

მშენებელი ზონაში დადგენილი კოეფიციენტის 9,0 -მდე გაზრდას ითხოვს.

კომპანია პროექტის შეთანხმების შემთხვევაში განაშენიანების კოეფიციენტის [კ2] გაზრდას და სხვა დადგენილი პარამეტრების გადამეტების უფლება ითხოვს.

ბათუმის მერიისთვის მშენებლობის მსურველი კომპანიის დირექტორის მიერ გაგზავნილი წერილიდან ამონარიდს სტილის დაცვით გთავაზობთ:

„ვინაიდან მიწის ნაკვეთი და ირგვლივ განაშენიანების პარამეტრები არ გვაძლევს სასურველ მონაცემებს, რომელიც განსაზღვრავს საპროექტო შენობის სართულიანობას და გაბარიტებს, შესაბამისად შენობის განთავსების წესებს, პარკირებას და სხვა სავალდებულო მოთხოვნებს, მიზანშეწონილად მიგვაჩნია ხელშემწყობი ღონისძიებების სახით განხორციელდეს მიწის ნაკვეთის განაშენიანების ინტენსივობის კოეფიციენტების ზღვრული მაჩვენებლების გადამეტება, ასევე კანონმდებლობით დადგენილი მოთხოვნებისაგან: შენობა-ნაგებობის მაქსიმალური სიმაღლე, სატრანსპორტო და გამწვანების რეგულაციები, მიჯნის ზონისა და შენობა-ნაგებობის განთავსება, ავტოსადგომების რაოდენობა. რაც გულისხმობს განსხვავებული პირობებით ქალაქთმშენებლობითი და სამშენებლო დოკუმენტაციის დამტკიცებას.

ზემოთაღნიშნული ხელშემწყობი ღონისძიების გატარების შემთხვევაში, ჩვენი კომპანია მზად არის აღნიშნულ მისამართზე ავარიული სახლების ჩანაცვლების პროგრამის შესაბამისად ბათუმში, ფიროსმანის ქუჩა N1-ში არსებული ავარიული მრავალბინიანი საცხოვრებელი სახლის ჩანაცვლებაზე და წარმოდგენილი არქიტექტურული პროექტის შესაბამისად 18 სართულიანი მრავალბინიანი საცხოვრებელი სახლის მშენებლობის განხორციელებაზე.“

წარდგენილი პროექტის პარამეტრების მიხედვით, 1159 კვ.მეტრზე კომპანია 13 300 კვ.მ ფართობის მშენებლობას გეგმავს. აქედან:

•   სარეალიზაციო საცხოვრებელი/საზაფხულო ფართობი: 7643,9 კვ.მეტრი.
• კომერციული ფართობი: 893,1 კვ.მეტრი.
• ტერასის ფართობი 477,7 კვ.მეტრი.
• მიწისქვეშა სარდაფის/ სათავსოს ფართობი: 463,9 კვ.მეტრი.
• ხანძრის მართვის ცენტრის ფართობი: 19,0 კვ.მეტრი
•  დამხმარე სათავსო კომუნიკაციების განთავსების მიზნით: 150,7
•  კიბის უჯრედის, სადარბაზოს, ლიფტის შახტების საერთო ფართობი: 463,9

პროექტის ავტორი „მოდერნ არქიტექტ  ჯგუფის“ არქიტექტორი მამუკა ჩავლეიშვილია.

ფიროსმანის #1-ში მდებარე სახლის მდგრადობასთან დაკავშირებით აქ მცხოვრები მოსახლეობა დიდი ხანია საუბრობს, პრობლემის თაობაზე მათ მერიას არაერთხელ მიმართეს. სახლი მართლაც ცუდ მდგომარეობაშია, დაზიანებული სახურავიდან წყალი ჟონავს, კედლები დაბზარულია. ამ სახლში ფართობი აჭარის მთავრობასაც აქვს, შესაბამისად მთავრობასაც  ჰქონდა ინფორმაცია აქ არსებულ ვითარებაზე.  ადგილზე მოსახლეობა „ბათუმელებთან“ აცხადებდა, რომ სახლს გასამაგრებლად ძვირადღირებული სამუშაოები სჭირდებოდა, რისი საშუალებაც მათ არ ჰქონდათ. წლების შემდეგ კი მდგომარეობა თანდათან უფრო დამძიმდა.

პროექტის განთავსების გეგმის მიხედვით, ახალი კორპუსი მიმდებარედ არსებული მრავალბინიანი სახლის მცხოვრებთა საცხოვრებელ პირობებს შეცვლის: მათ ხედი დაეფარებათ, მე-18 სართულამდე მცხოვრებთა ბინებში კი [ღიობები ფიროსმანის ქუჩის მხარეს აქვს], მზის შუქის მიღების პრობლემა შეიქმნება.

საქართველოს მთავრობის დადგენილებით, საქართველოს ზოგადი ადმინისტრაციული კოდექსით განსაზღვრულ ადმინისტრაციულ ორგანოებში დასაქმებულთათვის 2023 წლის 3 იანვრიდან 6 იანვრის ჩათვლით დღეები უქმე დღეებად გამოაცხადა.

„ადმინისტრაციული ორგანო განსაზღვრავს მის დაქვემდებარებაში მყოფ/მის სისტემაში შემავალ სამსახურებს/მოსამსახურეებს, რომელთა მიმართაც არ გავრცელდება ეს დადგენილება, თუ მათი ფუნქციების შესრულება სახელმწიფო ხელისუფლების განხორციელებისა და საზოგადოების ნორმალური ფუნქციონირებისთვის წარმოადგენს გადაუდებელ აუცილებლობას.“ – აღნიშნულია დადგენილებაში.

ამასთან, ეს დადგენილება არ ვრცელდება საქართველოს ეროვნული ბანკის ზედამხედველობას დაქვემდებარებული პირების წინაშე შესასრულებელ ფინანსურ ვალდებულებებზე.

დადგენილება ასევე არ ვრცელდება „სახელმწიფო შესყიდვების შესახებ“ საქართველოს კანონით გათვალისწინებულ სახელმწიფო შესყიდვებთან დაკავშირებულ საქმიანობაზე, მათ შორის, ამავე კანონის მე-3 მუხლის პირველი პუნქტის „ა.თ“ ქვეპუნქტით გათვალისწინებულ შესყიდვებთან დაკავშირებულ და სახელმწიფო შესყიდვებთან დაკავშირებული დავების განხილვის საბჭოს საქმიანობაზე.“

____________

ფოტოზე: საცივი. ფოტო: ვიკიპედია