ამერიკის შეერთებული შტატები უკრაინას მორიგ, 1,8 მილიარდი დოლარის ღირებულების სამხედრო დახმარების პაკეტს გამოუყოფს. იუწყება „ესოშიეითიდ პრესი“ (AP) ანონიმურ წყაროებზე დაყრდნობით.
გამოცემის ცნობით, ვაშინგტონი პირველად გადასცემს კიევს საზენიტო-სარაკეტო კომპლექს „პატრიოტს“. გარდა ამისა, პაკეტი მოიცავს მაღალი სიზუსტის ბომბებს ავიაციისთვის.
1 მილიარდის ღირებულების შეიარაღებას უკრაინას პენტაგონის [აშშ-ის თავდაცვის დეპარტამენტი] მარაგებიდან გადასცემენ. დანარჩენ 800 მილიონის – „უკრაინის უსაფრთხოების ხელშეწყობის ინიციატივის“ ფარგლებში.
როგორც გამოცემა წერს, დახმარების ამ პაკეტის შესახებ ოფიციალურად ხუთშაბათს გამოცხადდება. ამასთან ერთად, აშშ-ის კონგრესმა, პრეზიდენტ ვოლოდიმირ ზელენსკის ვიზიტის ფონზე, უნდა მიიღოს დახმარების კიდევ ერთი – 44-მილიარდიანი პაკეტი.
„პატრიოტის“ კომპლექსი, „ესოშიეთიდ პრესის“ ცნობით, დასავლეთის მიერ უკრაინისთვის მიწოდებული ყველაზე დახვეწილი და თანამედროვე შეიარაღებაა. ერთი კვირის წინ მოსკოვმა განაცხადა, რომ კომპლექსის უკრაინისთვის მიწოდება „პროვოკაციული ნაბიჯი“ იქნებოდა და შესაძლოა, კრემლის საპასუხო რეაქცია გამოეწვია.
ამ ეტაპზე უცნობია, როდის შეძლებს უკრაინა „პატრიოტის“ გამოყენებას – კომპლექსის ოპერირებისთვის უკრაინელებმა ამერიკელი სამხედროების წვრთნა უნდა გაიარონ, რასაც შეიძლება რამდენიმე კვირა დასჭირდეს. მოსალოდნელია, რომ წვრთნები გერმანიაში ჩატარდება.
მარტში ამერიკული მხარე აცხადებდა, რომ ვერ მოახერხებდა „პატრიოტის“ გადაცემას უკრაინისთვის, რადგანაც მისი გამოყენებისთვის ადგილზე ამერიკელი სამხედროების დისლოცირება იქნებოდა საჭირო, რაც მიუღებელი იყო ბაიდენის ადმინისტრაციისთვის.
რას არის „პატრიოტი“?
„პატრიოტის“ კომპლექსის ამოცანა რაკეტების ჩამოგდებაა. სარაკეტო სისტემას ამერიკაში, სამხედრო შეიარაღების მწარმოებელი კომპანია „რეითეონი“ უშვებს. შემუშავებულია კომპანია გამოიყენება აშშ-ისა და რიგი მოკავშირე სახელმწიფოების მიერ. გამოიყენებოდა სხვადასხვა კონფლიქტში, მათ შორის 1991 და 2003 წლების ერაყის ომებში.
სისტემა აღჭურვილია მართვადი რაკეტებით, რომელთა სხვადასხვა მოდიფიკაცია 30-დან 160 კილომეტრამდე რადიუსში გამოიყენება.
რაკეტებს გასროლის ზედაპირიდან 24 კილომეტრის სიმაღლეზე ასვლა შეუძლიათ.
ერთი კომპლექსის ღირებულება დაახლოებით 1 მილიარდი დოლარია, მისი ერთი რაკეტა კი 4 მილიონი ღირს.
ეს მნიშვნელოვნად შეცვლის ვითარებას უკრაინაში. ეს არ არის ომის მოგების საშუალება, მაგრამ Patriot-ის სისტემები ნამდვილად გაზრდის უკრაინის ჰაერიდან დაცულობას, რითაც შეიზღუდება რუსული ტერორი, რომელიც მიმართულია ქვეყნის ენერგეტიკულ და ეკონომიკურ ინფრასტრუქტურაზე. ეს კი კიევს მისცემს საბრძოლო მოქმედებების გაგრძელების საშუალებას“, – აცხადებს გადამდგარი გენერალი ვახტანგ კაპანაძე.
____
ვრცლად:
რა შეუძლია PATRIOT-ს, რომელიც უკრაინას უნდა გადაეცეს
