რუსეთის მმართველ ელიტებში განსხვავებული მოსაზრებები აქვთ რუსეთის მიერ მორიგი იერიშის წამოწყებაზე. როგორც „როიტერსი“ იუწყება, ამის შესახებ სახელმწიფო დეპარტამენტის წარმომადგენელმა ჟურნალისტებს ანონიმურობის დაცვის პირობით უთხრა და აღნიშნა, რომ ვაშინგტონი კიევის მხარდაჭერას ნებისმიერ შემთხვევაში განაგრძობს.
„რა თქმა უნდა, არიან ისინი, ვისაც უკრაინაში [ახალი] იერიშის წამოწყება სურთ. არიან ისინიც, ვისაც აქვთ რეალური კითხვები რუსეთის შესაძლებლობაზე, იერიშის დაწყება მოახერხოს“, – ამბობს იგი.
სახელმწიფო დეპარტამენტის წარმომადგენლის თქმით, რუსეთს აქვს ტყვია-წამლის „სერიოზული“ ნაკლებობა, ხოლო მობილიზებულები ვერ წარმოადგენენ მნიშვნელოვან ძალას. თუმცაღა იგი დასძენს, რომ ეს „ძალიან დიდი [სამხედრო] მანქანაა“.
უკრაინის შეიარაღებული ძალების მთავარსარდლის, ვალერი ზალუჟნის თქმით, რუსეთი ამზადებს 200 000 ჯარისკაცისგან შემდგარ ახალ ჯარს. ამ ეტაპზე უცნობია, როდის გადავა ეს ძალა შეტევაზე ან სად. უკრაინელმა გენერალმა ივარაუდა, რომ იერიში გაზაფხულზე დაიწყება და შესაძლოა ჩრდილოეთიდან, ბელარუსის ტერიტორიიდანაც მოდიოდეს.
- ბელარუსის ომში ჩართვაზე იხილეთ ISW-ის ანალიზი: პრიგოჟინი ძირს უთხრის პუტინს – ISW-ის ანგარიში
გამოცემის რესპონდენტის თქმით, აშშ-მ აჩვენა, რომ საჭიროებისამებრ, ომის ახალ რეალობასთან სწრაფად შეუძლია ადაპტირება.
„თუ საჭირო იქნება, რეაქცია გვექნება. ასევე ვმუშაობთ იმის უზრუნველყოფაზე, რომ უკრაინელებს სიტუაციასთან გასამკლავებლად ყველაფერი ჰქონდეთ, რაც სჭირდებათ“, – ხაზს უსვამს იგი.
