რუსეთის პრეზიდენტი ვლადიმერ პუტინი 2022 წელს არ გამოვა ყოველწლიური სიტყვით რუსეთის ფედერალური კრების (პარლამენტის) წინაშე, იუწყება „კომერსანტი“ პრეზიდენტის ადმინისტრაციასთან დაახლოებულ სამ წყაროზე დაყრდნობით.
წყაროების თქმით, ნოემბერსა და დეკემბერში მიმდინარე მზადება პუტინის გამოსვლისთვის მოგვიანებით შეჩერდა, ახლა კი სულაც არ მიმდინარეობს.
ასეთ გადაწყვეტილებას გამოცემის წყარო უკრაინის ფრონტზე არსებული მდგომარეობით ხსნის და დასძენს, რომ პუტინისთვის უმჯობესია გამოსვლა მაშინ, როცა ვითარება ფრონტზე უფრო გასაგები იქნება.
„პუტინის მიმართვა ყოველთვისაა დაკავშირებული მომავლის რაღაც სურათთან“, – ამბობს „კომერსანტის“ სხვა წყარო და ამატებს, რომ პუტინს მოუწევს ომზე ლაპარაკი, თუმცა პროგნოზის გაკეთება გაუჭირდება.
რუსეთის კონსტიტუციით, პრეზიდენტმა საკანონმდებლო ორგანოს ყოველ წელს უნდა მიმართოს. აქამდე პუტინის მიმართვა მხოლოდ ერთხელ, 2017 წელს გადაიდო.
გარდა ამისა, 12 დეკემბერს ცნობილი გახდა, რომ პუტინი არ ჩაატარებს დიდ პრესკონფერენციას. გაერთიანებული სამეფოს სამხედრო დაზვერვა მიიჩნევს, რომ ამ გადაწყვეტილების მიზეზი უკრაინაში მიმდინარე ომის „არასანქცირებული განხილვის“ თავიდან არიდების სურვილია.
