Batumelebi

საქართველოს მთავრობის გადაწყვეტილებით, მცირე და დიდ ქალაქებში არსებული ავტოსადგურები, რომლებიც შიდა საქალაქო გადაზიდვებს ემსახურებიან, სერტიფიცირებას დაექვემდებარებიან.

ამის შესახებ დღეს, 29 მაისს, განაცხადა ეკონომიკის მინისტრმა ლევან დავითაშვილმა.

ცვლილება შევა საავტომობილო ტრანსპორტის შესახებ კანონში, რომელიც გულისხმობს მუნიციპალიტეტებში შიდა სამგზავრო გადაყვანების მოქცევას სანებართვო სისტემაში.

„პროექტის მიხედვით, იქნება კონკრეტული მოთხოვნები ავტოსადგურების მიმართ და ამის მიხედვით 3 ტიპის ავტოსადგური განისაზღვრება, პირველი, მეორე და მესამე კლასის. დიდ ქალაქებში იქნება პირველი კლასის ავტოსადგურები, რომლებიც საერთაშორისო სტანდარტების შესაბამისი იქნება, პატარა მუნიციპალიტეტებში კი იქნება ავტოსადგურები მცირე მოთხოვნებით, მაგრამ თანამედროვე ვიზუალის და ყველა იმ მინიმალური კომფორტისა და უსაფრთხოების პირობების გათვალისწინებით, რომელიც ჩვენს მგზავრებს სჭირდება“ – განაცხადა ლევან დავითაშვილმა.

მისი თქმით, დღეს ქვეყანაში ბევრი ავტოსადგურია, რომლებიც არანაირ რეგულაციაში არ არის მოქცეული, სტანდარტი არ არის დაცული და ხარისხი არის ძალიან დაბალი.

„სერტიფიცირების ჩატარების წესი მთავრობის მიერ განისაზღვრება, თითოეული მუნიციპალიტეტი თავის ტერიტორიაზე ავტოსადგურის  მიზანშეწონილობას განსაზღვრავს და მუნიციპალიტეტებსაც თავიანთი უფლებამოსილებები განესაზღვრებათ.

ამ შემთხვევაში ჩვენ მივიღებთ ორ რამეს. პირველი ის, რომ ავტოსადგურები იქნება მოწესრიგებული, თანამედროვე, ცივილიზებული პრინციპების შესაბამისად და სტანდარტებში მოექცევა და ასევე, ავტოსატრანსპორტო საშუალებები და გადამზიდავებიც სერტიფიცირებული იქნება, სანებართვო წესებს დაექვემდებარება და უნდა დააკმაყოფილონ მინიმალური სტანდარტები“ – განაცხადა ლევან დავითაშვილმა.

მისივე თქმით, ამ სტანდარტების შემდეგ ავტოსადგურებში ბილეთების გაყიდვის სისტემაც იქნება გამჭვირვალე და ელექტრონული.

მან აღნიშნა, რომ ეს პროცესი ეტაპობრივად განხორციელდება, მანამდე კი ეკონომიკის სამინისტრო აღნიშნული ცვლილებებისთვის პარლამენტში კანონპროექტს წარადგენს.

_______________

ფოტოზე: ბათუმის ავტოსადგური

კომპანია „სოკარის“ ცნობით, 31 მაისის 02:00 საათიდან ბათუმს შემოერთებულ ტერიტორიებზე გაზის მიწოდება რამდენიმე საათით შეწყდება.

გაზი გაითიშება შემდეგ ქუჩებზე:

სარფი, ა. პირველწოდებულის გზატკეცილი, აფსაროსის გზატკეცილი, მატათა მოციქულის, სვიმონ კანანელის, პეტრე იბერის, იოანე ლაზის, კახაბრის, ნუცუბიძის, შარაშიძის, ჩოხელის, ნაჭყებიას, კვინიტაძის, ფრ. ხალვაშის 42-დან 180-მდე.

გაზის მიწოდება დაიწყება 31 მაისს 10:00 სთ-დან და სრულად აღდგება 31 მაისის დღის ბოლომდე.

„სოკარის“ ცნობით, გაზის შეწყვეტის მიზეზი გეგმური სარემონტო სამუშაოებია.

კომპანია „სოკარ ჯორჯია გაზი“ აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

ხელვაჩაურში, ჭოროხის შემოვლით გზაზე, ავტოავარია მოხდა. ერთმანეთს მსუბუქი ავტომოვილი და სამგზავრო მიკროავტობუსი შეეჯახა.

თვითმხილველთა თქმით, ავარიის შედეგად დაშავებულები სასწრაფო დახმარების სამსახურმა კლინიკებში გადაიყვანა.

შსს-ს თქმით, ავარიის შედეგად არავინ დაღუპულა. ამ ეტაპზე ადგილზე მუშაობენ შესაბამისი სამსახურები – პატრული და სასწრაფო დახმარების ჯგუფი.

ავარიის გამო დროებით შეზღუდული იყო მოძრაობა ჭოროხის შემოვლით გზაზე.

ჭოროხის შემოვლითი გზით სარგებლობა მოქალაქეებმა მას შემდეგ დაიწყეს, რაც გზების დეპარტამენტმა ბათუმი-ხელვაჩაურის დამაკავშირებელი გზა სარემონტო სამუშაოების გამო ჩაკეტა.

დღეს, 27 მაისს, ბათუმში, ტაბიძის ქუჩაზე, ავტოავარია მოხდა.

„ბათუმელების“ ინფორმაციით, ავტომანქანა 15 წლამდე ბავშვს დაეჯახა.

ინფორმაცია სასწრაფო სამედიცინო სამსახურში დაგვიდასტურეს. აქ გვითხრეს, რომ მოზარდი ტრავმული დაზიანებებით გადაიყვანეს იაშვილის კლინიკაში.

„ბათუმელების“ ინფორმაციით, გადაყვანისას ბავშვი კონტაქტური იყო.

„ადგილი არ არის და რა ვქნათ“ – ამ არგუმენტით ბათუმში უკვე მერიის თანამშრომლებიც ამართლებენ პარკინგის წესების დარღვევას, ისინიც აჩერებენ მანქანებს ტროტუარებზე, ველობილიკებზე, ავტობუსის გაჩერების ადგილებზე.

ერთი მხრივ მერია აღიარებს ქალაქში პარკირების ადგილების ნაკლებობას, როგორც გამოწვევას, მეორე მხრივ კი საკრებულოსთან ერთად ამტკიცებს სამშენებლო პროექტებს, რომლებიც პარკინგების ადგილების მოწყობას, ბინების რაოდენობის პროპორციულად, არ ითვალისწინებს.

ამას ემატება ის გარემოებაც, რომ ახალი, მრავალფუნქციური კომპლექსების მშენებლობისთვის კომპანიები მიწის საკუთრებაში არსებულ ნაკვეთს თითქმის სრულად ითვისებენ, პარკინგისთვის ადგილი კი ძირითადად ე.წ. ნულ სართულზე [მიწისქვეშა სართული] აქვთ გათვალისწინებული, ეზოს სივრცეში ძირითადად მცირე ადგილს, მაქსიმუმ ოცამდე მანქანის ადგილს ტოვებენ, გამონაკლის შემთხვევებში მეტს ან ნაკლებსაც კი.

ეზოს სივრცეში დატოვებული ადგილები არის უფასო ადგილი პარკინგისთვის, მიწისქვეშა სართულზე პარკინგისთვის გათვალისწინებულ სივრცეში კი ერთი მანქანის ადგილის ღირებულება 10-12 ათასი დოლარია.

ამ კომპლექსების მშენებლობის დასრულების შემდეგ ქალაქში პარკინგის ადგილების პრობლემა კიდევ უფრო გამწვავდება. თუმცა, ეს არ არის და არც მომავალში იქნება მშენებლის პრობლემა, რომელიც მერიისგან განაშენიანების მაქსიმალურ კოეფიციენტს [ კ2] ითხოვს და იღებს კიდეც.

კოეფიციენტი განაშენიანების ფართობის მიხედვით გამოითვლება, თუმცა მარტივად რომ ავხსნათ, ეს კონკრეტულ ზონაში დადგენილი პარამეტრების გადამეტებას, შედეგად კი მაქსიმალურად მაღალი შენობის მშენებლობას გულისხმობს, იმისთვის, რომ მშენებელმა მეტი ფართობი მიიღოს და მეტი მოგება ნახოს.

„დავავალდებულოთ, რომ პარკინგის ადგილი არ გაყიდოს, ასეთი პირობით მივცეთ თანხმობა კოეფიციენტის გაზრდაზე“ – ეს იდეა საკრებულოს გასულ სხდომაზე „ერთიანი ნაციონალური მოძრაობის“ ფრაქციის თავმჯდომარემ, ნოდარ დუმბაძემ გააჟღერა.

ამ სხდომაზე საკრებულომ სამშენებლო პროექტის განაშენიანების ინტენსივობის კოეფიციენტი [კ2] გაუზარდა კომპანიას, რომელიც ბათუმში, პუშკინისა და მელიქიშვილის ქუჩების კვეთაში ორი 32-სართულიანი და ერთი 25-სართულიანი კორპუსის მშენებლობას გეგმავს. კომპანიამ აქ კ2 კოეფიციენტის 17.0 – მდე გაზრდა მოითხოვა.

იმავე სხდომაზე საკრებულომ დაამტკიცა განაშენიანების გეგმის კონცეფცია, რომელიც ბათუმში ბაგრატიონის #135-ში 40-სართულიანი კორპუსის მშენებლობას გულისხმობს.

ორივე პროექტის წარდგენისას მომხსენებელმა, ბათუმის მერიის ქალაქმშენებლობისა და ურბანული პოლიტიკის სამსახურის უფროსმა, მამუკა რამიშვილმა ხაზგასმით განმარტა, რომ კომპანიები კოეფიციენტის გაზრდით მიღებული ფართობის 10 პროცენტს მერიას გადასცემენ, მერია კი ამ ფართობს მომავალში სოციალური მიზნებისთვის გამოიყენებს.

მელიქიშვილისა და პუშკინის კვეთაში დაგეგმილი პროექტის პარკინგისთვის გათვალისწინებული ადგილების სავარაუდო ოდენობა მამუკა რამიშვილმა ვერ დაასახელა, პროექტის შეთანხმების ეტაპზე დაზუსტდებაო – აღნიშნა მან.

შპს „ჯი არ აი“- ის მიერ წარდგენილი კონცეფციის მიხედვით კი 40-სართულიანი კორპუსისთვის კომპანია ეზოს შიდა სივრცეში 54 ადგილის გათვალისწინებას ახერხებს, ე.წ. მიწისქვეშა სართულზე კი 160 ერთეული ადგილი იქნება.

საკრებულოს წევრმა ნოდარ დუმბაძემ მოითხოვა კოეფიციენტის მაქსიმალურად გაზრდის შემთხვევებში კომპანია დაავალდებულონ მიწისქვეშა პარკინგი არ გაყიდოს:

„დიდი გამოცდილებიდან გამომდინარე ვიცით, რომ ქვედა საპარკინგე ადგილს არ ყიდულობს 90 პროცენტი. 10 ათასი დოლარია მინიმუმ საპარკინგე ადგილი, ამიტომ ვერ ყიდულობს.  ჩვენ ვავალდებულებთ კომპანიას პარკინგის ადგილების მოწყობას, რომ არ შეიქმნას საცობი, არ იყოს პარკინგის პრობლემა ქუჩაში, არ დაიტვირთოს ქუჩა. როდესაც დათმობაზე მიდის მუნიციპალიტეტი, ხომ არ დავამატოთ ის, რომ მიწისქვეშა პარკინგის გაყიდვის უფლება არ ჰქონდეს?“

სხდომაზე ეს საკითხი სერიოზულად არ განუხილავთ, მიუხედავად იმისა, რომ იგივე სხდომაზე ქალაქში პარკინგთან დაკავშირებულ პრობლემებზე „ოცნების“ ფრაქციის წევრებმაც ისაუბრეს.

მოგვიანებით ფრაქციის თავმჯდომარეს ვკითხეთ, ხომ არ აპირებს სხდომაზე გაჟღერებული იდეა პროექტის სახით მოამზადოს და საკრებულოში ოფიციალურად დაარეგისტრიროს განსახილველად. ნოდარ დუმბაძის თქმით, ამ საკითხზე მუშაობენ:

„განგვიმარტეს, რომ შესაძლოა მსგავსი ცვლილების შეტანის უფლება არ გვქონდეს. ახლა ვაზუსტებთ დეტალებს. თუ აღმოჩნდება, რომ მსგავსი ცვლილების უფლება არ გვაქვს, უმაღლესი საბჭოს გავლით ამ საკითხს აუცილებლად დავაინიციირებთ პარლამენტში“ – გვითხრა მან.

პარკინგის ადგილების პრობლემა რომ კიდევ უფრო გამწვავდება ქალაქის ცენტრში, ამ მოლოდინის საფუძველსაც ბათუმის მერიისა და საკრებულოს დამტკიცებული პროექტები გვაძლევს.

13 თებერვალს ბათუმის საკრებულომ 4 ნაკვეთის განაშენიანების დეტალური გეგმა დაამტკიცა. აქედან ორი, ბათუმის ბულვართან ახლოს, რუსთაველის ქუჩის #20-სა და 21-ში ითვალისწინებს მშენებლობას. პროექტების მიხედვით, არც ერთ მათგანს ეზო არ ექნება და კომპანიები სამშენებლო მიწის ნაკვეთს სრულად გამოიყენებენ შენობის განსათავსებლად.

გდგ დოკუმენტის მიხედვით, 83-ბინიანი ახალი კორპუსის აშენების შემდეგ მთელ კვარტალში იქნება 397 ბინა, სადაც დაახლოებით 993 ადამიანი იცხოვრებს. ამას დაემატება კომერციული ობიექტები [350 კვ. მეტრი], ავტოსადგომის, სარდაფისა და ტექნიკური სათავსოებისთვის კომპანიამ 797 კვ. მეტრი გაითვალისწინა.

ბათუმის მერიის ქალაქგანვითარებისა და ურბანული პოლიტიკის სამსახურის უფროსის განმარტებით, პროექტი პარკინგისთვის 20 ადგილს ითვალისწინებს შენობის ნულოვან სართულზე და 6 ადგილს – გარე პერიმეტრზე. გამოდის, რომ 83-ბინიან სახლს, დამატებით კომერციული ფართობებით, პირველ სართულზე მხოლოდ 26 ავტომანქანის ადგილი ექნება. გდგ დოკუმენტის მიხედვით, კომპანია შიდა პარკინგზე გათვალისწინებული 20 ადგილის გაყიდვას გეგმავს.

გდგ დოკუმენტს თან ახლავს პროექტის ეკონომიკური დასაბუთება, სადაც ვკითხულობთ, რომ კომპანია ამ პარკინგის ოცი ადგილის გაყიდვას, ჯამში, 392 000 დოლარად გეგმავს – ერთი ადგილის ფასი 19 600 დოლარია.

გდგ დოკუმენტში სპეციალისტები ადასტურებენ, რომ გეგმარებითი ტერიტორია სატრანსპორტო ნაკადებით დატვირთულ ზონაში მდებარეობს და ახალი კორპუსის მცხოვრებლების უსაფრთხოდ გადაადგილებისთვის დამატებითი შეზღუდვების შემოღება იქნება საჭირო.

დღეს, 26 მაისს, საქართველოს პრეზიდენტმა სალომე ზურაბიშვილმა, საქართველოს დამოუკიდებლობის დღისადმი მიძღვნილ ღონისძიებაზე სიტყვით გამოსვლის დროს, ქართველი გმირების – გიგა ოთხოზორიასა და გიორგი ანწუხელიძის ოჯახებს ბოდიში მოუხადა.

„ამ ტრიბუნიდან მინდა მივმართო გიორგი ანწუხელიძისა და გიგა ოთხოზორიას ოჯახებს. მე, როგორც ამ ქვეყნის უმაღლესი მთავარსარდალი, ბოდიშს გიხდით იმ შეურაცხყოფისთვის, რომელიც არა მხოლოდ თქვენი, არამედ მთელი ქვეყნის შეურაცხყოფაა“ – განაცხადა სალომე ზურაბიშვილმა.

მან საქართველოს მთავრობა გააკრიტიკა რუსეთთან ლოიალური პოლიტიკისა და ქვეყნის ევროპული არჩევანის მიმართ ბუნდოვანი პოლიტიკისთვის.

„არ არსებობს ხალხი, რომელსაც ომის არ ეშინია, ომის სისასტიკე ჩვენსავით ცოტამ თუ იცის, მაგრამ საკუთარ საზოგადოებაში, იმ ქვეყანაში, რომელსაც  უამრავი შემოსევა და დაპყრობა ახსოვს, ომის შიშის გაღვივება და მანიპულირება, ვერ გახდება წარმატებული მართვის ფორმა.

გაუგებარია, როცა ევროპასა და ამერიკას აბრალებ მეორე ფრონტის გახსნის მცდელობას, ქართველობის წართმევას, გარყვნილებას და მაინც საკუთარ შვილებს, ევროპასა და ამერიკაში უშვებ, საქართველოში კი ახალ თაობას ევროპულ მომავალს უსპობ“ – განაცხადა სალომე ზურაბიშვილმა.

მისი თქმით, ჩვენი ისტორიის მქონე ერმა, როგორ უნდა დაიჯეროს, რომ რუსეთის პოლიტიკა შეიძლება ვინმეს კარგ ან ცუდ საქციელზე, ან რომელიმე განცხადებაზე იყოს დამოკიდებული, ყველაფერზე გარდა საკუთარი ინტერესისა?

„რა იყო უკრაინაზე დამოკიდებული, როცა რუსეთმა ომი დაიწყო? ვინც ფიქრობს,  რომ რუსეთი ტერიტორიებს დაგვიბრუნებს ჩვენი დათმობების სანაცვლოდ, მას ჩვენი ისტორიიდან არაფერი უსწავლია.

ან კიდევ როგორ დავიჯეროთ, რომ ოკუპანტი შეიძლება ჩვენი თანამემამულეების კეთილდღეობაზე ზრუნავდეს? ნუთუ გვავიწყდება ჩვენს მოქალაქეებს აფხაზეთში, ცხინვალში, ვინ ავიწროებს და ვინ იტაცებს?

კარგად ვხედავთ, დღეს ვინ ცდილობს უკრაინის ოკუპაციას და იმასაც ვხედავთ, რომ მსოფლიო იცვლება, რუსეთის უძლეველობის მითი დამსხვრეულია და ხვალინდელ გეოპოლიტიკურ სივრცეში აღარ უნდა არსებობდეს ოკუპირებული ტერიტორიები. დღეს 26 მაისია და ჩვენს უკრაინელ მეგობრებს მინდა ვუსურვო ქვეყნის გამარჯვება და გამთლიანება.

ამ ახალი მსოფლიო წესრიგის მოლოდინში დღეს ჩვენი საზოგადოება, როგორც ხელისუფლება, გზაგასაყარზეა.

საზოგადოებამ თავისი სიტყვა თქვა და გამოხატა თავისი ნება – საქართველომ უნდა გააგრძელოს დამოუკიდებლობის გამყარებისა და გამთლიანების, ევროპული დემოკრატიის ჩამოყალიბებისა და ევროპულ ოჯახთან შეერთების გზა.

ნათელია, რომ საზოგადოება არ დათმობს საკუთარი შვილების მომავალს, არ დათმობს თავის ევროპულ არჩევანს. დემოკრატიის პირველი წესია, რომ უნდა შეასრულო ის, რისთვისაც ხალხმა აგირჩია“- განაცხადა სალომე ზურაბიშვილმა.

______________

ამავე თემაზე:

26 მაისი საქართველოს დამოუკიდებლობის აღდგენის დღეა. დღეს დამოუკიდებლობის დღესთან დაკავშირებით ოფიციალური ცერემონია იმართება თბილისში.

ახალწვეულთა ფიცის დადების შემდეგ სიტყვით გამოვიდა საქართველოს პრეზიდენტი სალომე ზურაბიშვილი.

მან სიტყვით გამოსვლისას საქართველოს მთავრობა გააკრიტიკა ქვეყანაში რუსეთის საგარეო საქმეთა მინისტრის, სერგეი ლავროვის დასანქცირებული ოჯახის წევრების შემოსვლის გამო.

„გაუგებარი და შეურაცხმყოფელია, როცა ჩვენი ხელისუფლება საკუთარი მოქალაქეების პატივსა და ღირსებაზე არ ფიქრობს. გაუგებარი და შეურაცხმყოფელია, როცა ჩვენს პოლიციას შეუძლებელ ამოცანას ვუსახავთ და გამოწვევის წინაშე ვაყენებთ.

ყველას კარგად გვესმის, რომ ქვეყანა, რომელსაც ოკუპირებული ტერიტორიები გააჩნია და მის ტერიტორიაზე რუსის ჯარია, განსაკუთრებულად უნდა იცავდეს სტაბილურობას, სწორედ ამიტომ, ხელისუფლებას ევალება, რომ არ დაუშვას ისეთი სიტუაციის წარმოქმნა, რომელსაც უთუოდ მოჰყვება ვნებათაღელვა და ესკალაცია.

ხელისუფლებას ევალება პრევენცია და არა საკუთარი ხალხის მოთმინების გამოცდა. ხელისუფლებას ევალება ტერიტორიის დაცვა და საზღვრების მართვა. უნდა იცოდე ვინ შემოდის და ვინ გადის ქვეყნიდან. ძნელი დასაჯერებელია, რომ ოკუპანტის ქვეყნის უმაღლესი პოლიტიკური წრის წევრები ქვეყანაში წინასწარი გაფრთხილებისა და გარანტიების მიღების გარეშე შემოსულიყვნენ.

მაშინ როცა მუდმივად აპელირებენ მშვიდობაზე და სიფრთხილეზე, ნუთუ ამ დროს ხელისუფლებაში ვერავინ დაინახა ესკალაციის საფრთხე. გავრილოვის მაგალითი მაინც არ გვქონდეს.

არ შეიძლება ოკუპაციის კანონის და მეგობარი პარტნიორების მიერ დაწესებული სანქციების გაუთვალისწინებლობა, რადგან ამან შესაძლოა ქვეყნის შიგნითაც გამოიწვიოს პროტესტი და მეორეს მხრივ, უთანხმოება ჩვენს სტრატეგიულ პარტნიორებთან“ – განაცხადა სალომე ზურაბიშვილმა.

მისი თქმით, ასევე გაუგებარი და შეურაცხმყოფელია, როცა ქვეყნის მმართველი ქსენოფობიას გაბრალებს:

„ჩვენს ისტორიას ასეთი ბრალდება არ ახსოვს. ქვეყნის მიმართ, რომელმაც საუკუნეების მანძილზე, სტუმართმოყვარეობით და შემწყნარებლობით გაითქვა სახელი.

დღესაც, როცა ოკუპანტი ქვეყნიდან უსიტყვოდ მივიღეთ და ვაცხოვრებთ 80 ათასამდე იმიგრანტს და მთელი ამ დროის განმავლობაში, არცერთი სერიოზული ინციდენტი არ ყოფილა.

ეს ბრალდება ასევე სახიფათოა ქვეყნის უსაფრთხოებისთვის. რადგან ყველამ კარგად ვიცით, რომ რუსეთი მეზობლებზე თავდასხმებს რუსულენოვანი ხალხის დაცვით ამართლებს.

დამოუკიდებლობა, რომელსაც დღეს ვზეიმობთ, საკუთარი მოქალაქეების დაცვასაც გულისხმობს. სახელმწიფოებრიობა ისაა, როცა ქვეყანა წესებით და კანონებით იმართება.

ეს არის სახელმწიფო მიდგომა, რომელიც ქველაზე უნდა ვრცელდებოდეს.

ამიტომ, გაუგებარია, რატომ არანაირი ზომა და სამართლიანი რეგულაციები არაა მიღებული რუსეთიდან მასიურად შემოსულებისთვის და მათი საქმიანობისთვის. განსაკუთრებით კი ისეთ სფეროებში, როგორიცაა ჯანდაცვა და განათლება. ან თუნდაც უძრავი ოქნების შეძენა და დაწესებული გადასახადების გადაუხდელობა“-ამბობს ზურაბიშვილი.

მისივე განცხადებით, ჩვენმა წინაპრებმა, დიპლომატია, დაბალანსებული პოლიტიკა და სიფრთხილეც კარგად იცოდნენ, „თუმცა ეს ღირსებას და პრინციპულობას მოკლებული არასოდეს ყოფილა“.

„არ არსებობს ხალხი, რომელსაც ომის არ ეშინია. ომის სისასტიკე ჩვენსავით, ცოტამ თუ იცის და ცოტას თუ ესმის, მაგრამ საკუთარ საზოგადოებაში შიშის გაღვივება (რაც ადვილია იმ ქვეყანაში, რომელსაც უამრავი შემოსევა და დაპყრობა ახსოვს) ან ამით მანიპულირება ვერ გახდება წარმატებული მართვის ფორმულა. ყველასთვის გასაგები რომ იყოს, რასაც ვგულისხმობ, გავიხსენოთ იმედზე გასული ომის მოდელირებული ქრონიკა“ – განაცხადა ზურაბიშვილმა.

მან ასევე აღნიშნა, რომ გაუგებარი გახდა საქართველოს საგარეო პოლიტიკა.

„ასევე გაუგებარი გახდა ჩვენი საგარეო პოლიტიკა, მაშინ როცა კონსტიტუციაში ევროპაა ჩაწერილი, სად გაქრა სიტყვები, „ევროპა ჩვენი ცივილიზაციური არჩევანია“- განაცხადა ზურაბიშვილმა.

25 მაისს, ღამით, ხანძარი გაჩნდა ფიროსმანის ქუჩაზე მდებარე მაღალსართულიანი კორპუსის ბინაში, თვითმხილველების თქმით, მე-16 სართულზე.

ადგილზე მობილიზებულია სახანძრო-სამაშველო სამსახური. ამჟამად [12:00 სთ] ხანძრის კერა მეხანძრეებმა უკვე ჩააქრეს, თუმცა სართულები დაკვამლიანებულია.

პირველადი ინფორმაციით, ხანძრის შედეგად არავინ დაშავებულა. როგორც ადგილზე ამბობენ, ბინა უცხოელ სტუდენტებს აქვთ ნაქირავები, რომლებიც სახლში არ იმყოფებოდნენ.

კორპუსში მცხოვრები მოსახლეობის ნაწილი ამ დროისთვის [12:23 სთ] თავს იკავებს სახლში შესვლისგან. შენობაში ხანძრის გამო გამორთული იყო ელექტროენერგია.

ფიროსმანისა და ინასარიძის ქუჩების კვეთა, რომელიც ხანძრის გამო ჩაკეტილი იყო, ამჟამად გახსნილია, თუმცა ჩაკეტილი რჩება გენერალ აბაშიძის ქუჩა.

წელს, თბილისსა და ბათუმში, დამოუკიდებლობის დღის აღსანიშნავად მორთული საჯარო სივრცეებიდან გაქრა ევროკავშირის დროშა, რომელიც ყოველთვის, მათ შორის 26 მაისს, ქართული სახელმწიფო დროშის გვერდით იყო აღმართული, ქართული სახელმწიფოს ევროპული მისწრაფებების ნიშნად. რისი მანიშნებელია ევროკავშირის დროშების მიჩქმალვა, მაშინ როცა წლის ბოლოს ქვეყანა კანდიდატის სტატუსის მინიჭებაზე პასუხს ელოდება ევროკავშირისგან? – ამ თემაზე „ბათუმელები“ პარლამენტის წევრს, არმაზ ახვლედიანს ესაუბრა.

• ბატონო არმაზ, პირველი შემთხვევაა, როცა ევროკავშირის დროშა აღარ გამოფინეს სახელმწიფო დროშის გვერდით. არის ამაში რაიმე საგანგაშო თქვენი აზრით?

უპირველესად უნდა ვთქვათ, რომ დემოკრატია ქართული სახელმწიფო სივრციდან რა ხანია გაქრა და მე ვიტყოდი, აქა-იქ არის შემორჩენილი მისი ნარჩენები. ამან მიგვიყვანა იქამდე, რომ ევროპა, დასავლეთი, საქართველოს ისტორიული არჩევანი, სრულიად მიუღებელი გახდა დღევანდელი ხელისუფლებისთვის,  „ქართული ოცნებისთვის“.

იმიტომ, რომ სრული შეუსაბამობაა ქართველი ხალხის მისწრაფებებსა, ევროპულ ღირებულებებსა და „ქართულ ოცნების“ მიზნებს შორის. ამიტომ, რა გასაკვირია, რომ გაქრა ევროკავშირის დროშები. ჩვენ უნდა ვთქვათ პირდაპირ, რომ ევროპული სულისკვეთება დიდი ხანია გამქრალი და წაშლილია „ქართულ ოცნებაში“.

არაფერი ევროპული, არაფერი სამართლებრივი, დემოკრატიული და შესაბამისად, ეროვნული, იქ აღარ დარჩა რახანია.

დროშა სიმბოლოა, გამოხატულებაა, ამიტომ მისი  ჩამოხსნა, მანამდე კი  დაწვის წაქეზება და ამაზე წაყრუება, ბრძოლა, არა მარტო სიმბოლოებთან, არამედ ევროპული არჩევანთან, იმის დასტურია, რომ „ქართულმა ოცნებამ“ მმართველობის მე-11 წელს საბოლოოდ გადაწყვიტა საქართველო „გაათავისუფლოს“ სამართლებრივი და დემოკრატიული მომავლისგან.

ასე ათავისუფლებს სახელმწიფოს ევროპული შიგთავსისგანაც, რაც ასე ორგანული და ბუნებრივია, დღეს ჩვენთვის და ასე სასიცოცხლოდ აუცილებელი ჩვენი სახელმწიფოსთვის და ჩვენი ერისთვის.

• ეს რას ნიშნავს, რომ ხელისუფლებას უკვე ღია, გაცხადებული კურსი აქვს აღებული რუსეთისკენ?

ეს ნიშნავს, რომ „ქართულმა ოცნებამ“ საბოლოოდ გადაწყვიტა ნებისმიერ ფასად, იქნება ეს შიდა პოლიტიკაში ოპონენტების განადგურება, დამოუკიდებელი მედიის დახურვა, დასავლელ პარტნიორებთან  ურთიერთობის საბოლოოდ გაფუჭება, ყველა ხიდის ჩანგრევა.

ის მზად არის, ნებისმიერ ფასად შეინარჩუნოს 2024-ში ძალაუფლება და რა თქმა უნდა, ჩვენ ამ კონტექსტში უნდა განვიხილოთ მისი პირდაპირი თუ ფარული კავშირები კრემლთან.

ძალაუფლების შენარჩუნების ამ ბოროტ განზრახვაში და გეგმაში, „ქართული ოცნების“ ერთადერთი მოკავშირე შეიძლება იყოს კრემლი და მის ორბიტაზე მყოფი რამდენიმე სატელიტი სახელმწიფო და დიქტატორი.

• თუ ყველაფრის ფასად აპირებს „ქართული ოცნება“ ძალაუფლების შენარჩუნებას, ეს იმას ნიშნავს, რომ „ოცნება“ მიითვისებს არჩევნებსაც. მაშინ რა დარჩა საზოგადოებას, ვინც ელოდება კანდიდატის სტატუსს წლის ბოლოს და რაღაც ცვლილებებს უკეთესობისკენ?

ჩვენ ყველას მკაფიოდ უნდა გვესმოდეს, რომ კანდიდატის სტატუსი „ქართული ოცნებისთვის“ არის მისი ბუნების საწინააღმდეგო. მისი ბუნების საწინააღმდეგოა ევროპის კავშირი და ევროპული ღირებულებები, მისი ბუნების საწინააღმდეგოა საქართველოს ნორმალური, წარმატებული, დალხინებული, დემოკრატიული, სამართლებრივი მომავალი.

შესაბამისად, უნდა ვაცნობიერებდეთ რომ ახლა „ქართული ოცნება“ მზად არის ფაქტობრივად ყველა მექანიზმი გამოიყენოს რაც აქამდე არ გამოუყენებია წინა არჩევნებში. ყველა გზით და საშუალებით მოახერხოს და შეინარჩუნოს ძალაუფლება.

ისმის კითხვა, რა გავაკეთოთ ამ დროს ჩვენ, მოქალაქეებმა, საზოგადოებამ?

თუ ჩვენ მართლა შემდგარი საზოგადოება ვართ და არა მასა, როგორც აღგვიქვამს ხოლმე „ქართული ოცნება“, არამედ ვართ პასუხისმგებლობიანი, შემდგარი საზოგადოება, მაშინ უნდა ვიბრძოლოთ და დავიცვათ საქართველოს თავისუფლება, მისი დემოკრატიული, ევროპული მომავალი.

სწორედ ჩვენს ხელშია ახლა ამის დაცვა. რა თქმა უნდა, ჩვენ გვყავს არაერთი მოკავშირე, გარდა „ქართული ოცნებისა“.

ამიტომაც ჩვენი პირველი ამოცანაა, ვიბრძოლოთ და რას ნიშნავს ვიბრძოლოთ?!

შესაძლოა ვინმეს ზოგად სიტყვად მოეჩვენოს, მაგრამ ვიბრძოლოთ ნიშნავს იმას, რომ როგორც არ გავატანინეთ რუსული კანონი მარტის თვეში ერთობით, მტკიცედ დგომით, ასევე არ შევარჩინოთ „ქართულ ოცნებას“ ეს მზაკვრული პოლიტიკა, რომელსაც ის ატარებს, რომელიც არის სრულიად ანტიეროვნული და ანტისახელმწიფოებრივი.

მე ვარ ის ადამიანი, ვინც ყოველთვის შეგნებულად ერიდებოდა ამ სიტყვის გამოყენებას, მაგრამ ახლა ხმამაღლა ვიტყვი, რომ რასაც ახლა „ქართული ოცნება“ სჩადის, ეს არის საქართველოს სახელმწიფო ინტერესების ღალატი.

ამიტომ, ჩვენ, საზოგადოება [და ღრმად მწამს, რომ აბსოლუტურ უმრავლესობაში ვართ საქართველოში, ვისაც მიგვაჩნია, რომ საქართველოში სამართლებრივი სახელმწიფოს პერსპექტივას ალტერნატივა არ გააჩნია], ვისაც მიგვაჩნია, რომ ევროპულ გზას და მომავალს ალტერნატივა არ აქვს, ყველა უნდა გავერთიანდეთ და ჩვენი „არა“ ვუთხრათ „ქართულ ოცნებას“.

გასაგებია, რომ ისინი ყველაფერს გააკეთებენ რომ არჩევნები არათუ გაყალბდეს, არამედ წინასაარჩევნო გარემოც იყოს უპრეცედენტოდ არადემოკრატიული, მაგრამ ჩვენ ამას არ შევეგუებით და გაცილებით მეტი ადამიანი მივა საარჩევნო ყუთებთან და ეტყვის „ოცნებას“ არას.

• რუსეთთან ფრენების აღდგენა, ქვეყნისთვის დამაზიანებელი განცხადებების გაკეთება, ახლა კი ევროკავშირის დროშების ჩამოხსნა, როგორ ფიქრობთ, მიიყვანს ქვეყანას დასანქცირებამდე? რა პროცესებს წარმოშობს ეს ქვეყანაში, თქვენი აზრით?

„ქართულ ოცნებას“ ერთადერთ შემთხვევაში შეიძლება მკრთალად სურდეს კანდიდატის სტატუსი, თავისი ბინძური შავი საქმეების სახიდან ჩამოსაბანად და მიიღოს იმ შემთხვევაში, თუკი დასავლეთი დათანხმდება, რომ „ოცნებამ“ თავისებურად, არადემოკრატიულად მართოს ქვეყანა, რაც, ისედაც ვხვდებით, რომ შეუძლებელია.

შესაბამისად, კანდიდატის სტატუსს ყველა კანონზომიერების მიხედვით, ეს მმართველობა არ იმსახურებს.

• ბოლო დღეებში ძალიან გაააქტიურეს აფხაზეთის დაბრუნების თემა, რომ თითქოს ახლა მთავარი მიზანი არა ევროკავშირი, არამედ დაკარგული ტერიტორიებია. ნატოს და ევროკავშირის გარეშე, რამდენად წარმოსადგენია ჩვენი ტერიტორიული მთლიანობის აღდგენა და სად მიჰყავს ამ პროპაგანდას რეალურად ქვეყანა?

„ქართული ოცნების“ ამ მავნებლურ რიტორიკას და ქმედებას საქართველო პირდაპირ მიჰყავს იქეთ, რომ ვკარგავთ სახელმწიფოებრიობას, ვკარგავთ ისტორიულ პერსპექტივას, რომ საქართველო გახდეს სამართლებრივი სახელმწიფო და ევროპის შემადგენელი ნაწილი, ვკარგავთ პარტნიორებს და რაც მთავარია, ვკარგავთ ჩვენსავე საზოგადოებას, რომელიც ამ უპერსპექტივობით დაუძლურებული და დაღლილი ტოვებს ქვეყანას და გარბის უცხოეთში.

ამიტომ ვამბობ მკაფიოდ, რომ ჩვენ უნდა ვიბრძოლოთ ყოველდღე, იქნება ეს მიტინგი, აქცია, თუ ნებისმიერი სხვა ფორმა ჩვენი ურყევი ნების გამოხატვისთვის, რომ არ დავთმობთ საქართველოს დემოკრატიულ, ევროპულ მომავალს.

ამის შანსი რა თქმა უნდა არსებობს და თუკი „ქართული ოცნება“ თავისას მაინც არ მოიშლის და ხელისუფლების შენარჩუნებისთვის გამოიყენებს უკიდურეს პოლიციურ მეთოდებს, რა თქმა უნდა, მაშინ ჩვენ, ხალხს და გაბედულ, პასუხისმგებლობიან, დემოკრატიულ ოპოზიციას, გვაქვს სრული უფლება, ჩვენი სახელმწიფოებრიობის, თავისუფლების შესანარჩუნებლად მივმართოთ ყველა მეთოდს, რაც კი დაშვებულია კონსტიტუციით.

მტკიცედ და ბოლომდე, რადგან ეს არის ისტორიული შანსი, რომელსაც „ქართული ოცნების“ ხელში საქართველო პირდაპირ, დღისით, მზისით კარგავს.

• როგორც ხელისუფლება ამბობს, წლევანდელი 26 მაისის სლოგანია – „მე რუსთაველის ქვეყნიდან ვარ“. თქვენთვის რას ნიშნავს ეს სიტყვები? 

ამ უვიცებმა უნდა იცოდნენ, რომ იყო რუსთაველის ქვეყნიდან დღეს ნიშნავს საქართველოს ევროპაში, მრავალფეროვნებაში, წარმატებაში და სამართლიანობაში, რაც ვიმეორებ,  შეუთავსებელია „ქართული ოცნების“ მზაკვრულ პოლიტიკასთან.

„ქართული ოცნების“ ბინძური რუსული პროპაგანდა ყველასთვის ცნობილია შინ და გარეთ. ამიტომაც, თუ ჩვენ არ ვიბრძოლებთ ბოლომდე, თუ ამას შევარჩენთ და გავატანინებთ, ეს იქნება იმის მაუწყებელი, რომ თანდათან, უახლოეს ხანებში, საქართველოში დამკვიდრდება და გამეფდება საშინელი პოლიციური რეჟიმი.

ამიტომაც, ახლა უნდა ვიბრძოლოთ, უკომპრომისოდ უნდა ვიბრძოლოთ, რომ არ დავთმოთ ყველაზე სანუკვარი, ყველაზე ძვირფასი – ჩვენი ქვეყნის ისტორიული არჩევანი, რომ ვიყოთ თავისუფალი, ძლიერი, ევროპული  სახელმწიფო.