დიდი ბრიტანეთის თავდაცვის სამინისტროს დაზვერვა დღეს, 27 მაისს, რუსეთ-უკრაინის ომის ყოველდღიურ მოკლე მიმოხილვაში წერს, რომ კერძო სამხედრო დაჯგუფება „ვაგნერის“ ძალებმა, სავარაუდოდ, ბახმუტის გარშემო მდებარე ზოგიერთი პოზიციიდან გასვლა დაიწყეს.
25 მაისს „ვაგნერის“ მფლობელმა ევგენი პრიგოჟინმა განაცხადა, რომ ბახმუტიდან ძალების გაყვანა დაიწყო და პოზიციების გადაცემა რუსეთის თავდაცვის სამინისტროსთვის 1 ივნისამდე გაგრძელდება.
ბრიტანული დაზვერვა და, ასევე, ომის შესწავლის ამერიკული ინსტიტუტი, წერენ, რომ რუსეთის რეგულარული არმიას, სავარაუდოდ, ჯერ კიდევ არ ჩაუბარებია „ვაგნერის“ პოზიციები ბახმუტში და მათ ნაცვლად პოზიციების გადაბარება დაიწყეს თვითგამოცხადებული დონეცკის რესპუბლიკის ქვედანაყოფებმა.
„მიუხედავად პრიგოჟინის მუდმივი უთანხმოებისა რუსეთის თავდაცვის სამინისტროსთან, „ვაგნერი“ სავარაუდოდ გამოყენებული იქნება შემდგომი შეტევითი ოპერაციებისთვის დონბასში, ძალების აღდგენის შემდეგ“, – ნათქვამია ბრიტანული დაზვერვის მიმოხილვაში.
ომის შესწავლის ამერიკული ინსტიტუტი [ISW] მიიჩნევს, რომ რუსეთს შესაძლოა გაუჭირდეს ბახმუტში „ვაგნერის“ შეცვლა, ნაწილობრივ – უკრაინის შეზღუდული, მაგრამ წარმატებული, ლოკალიზებული კონტრშეტევების გამო.
„ბახმუტის რაიონში რუსული თავდასხმითი ოპერაციების შენელება, სავარაუდოდ, კიდევ უფრო მეტ ინიციატივას მისცემს უკრაინულ ძალებს ამ რაიონში, რომ განახორციელონ ოპერაციების ახალი ეტაპი ქალაქის ირგვლივ, სურვილის შემთხვევაში“, – წერენ ამერიკელი ანალიტიკოსები.
