Batumelebi

„ოცნების“ პრემიერი ირაკლი კობახიძე გერმანიის ელჩს, პეტერ ფიშერს აკრიტიკებს, რომელიც 16 მაისს, ბათუმში დაესწრო მზია ამაღლობელის სასამართლო პროცესს. ამის შესახებ კობახიძემ „პირველი არხის“ ეთერში ისაუბრა 28 მაისს.

ამავე დროს, კობახიძემ ისაუბრა ბათუმში მომხდარ ინციდენტზე, როცა გერმანიის ელჩს სიტყვიერი შეურაცხყოფა მიაყენა მოქალაქე ვალერი ქოჩიაშვილმა, რომელიც ყოფილი სამხედრო მოსამსახურეა და გამოირჩევა ოპოზიციის, სამოქალაქო საზოგადოებისა და პროევროპული აქციების ლანძღვით.

„ერთი საინტერესო დეტალია. ბათუმში როცა იმყოფებოდა გერმანიის ელჩი, მასთან მივიდა კონკრეტული მოქალაქე და შეაწუხა, ამასთან დაკავშირებით საგარეო საქმეთა სამინისტროში შემოვიდა გერმანიის საგარეო საქმეთა სამინისტროდან ნოტა, სადაც ამბობენ რას – რომ ეს ყოფილა სისხლის სამართლის დანაშაული.

კაცი ჩავიდა ბათუმში იმისათვის, რომ გაეპრავებინა პოლიციელისთვის ხელის გარტყმა და რომ შეაწუხა ვიღაცამ სიტყვიერად და სული შეუბერა, თურმე ეს ყოფილა სისხლის სამართლის დანაშაული. ამას წერს გერმანიის საგარეო საქმეთა სამინისტრო.

მარიამ ლაშხს და სხვა დეპუტატებს რომ მიუვარდნენ, შეურაცხყოფას რომ აყენებდნენ, მაშინ რატომ არ არის ეს სისხლის სამართლის დანაშაული, რატომ შეიძლება, ჩვენთან მოქმედებდეს ორმაგი სტანდარტი? ფიშერთან მივიდა და სისხლის სამართლის დანაშაულია, ლაშხთან მივიდა და ეს არის გამოჩენილი სამოქალაქო აქტივისტი? რაშია საქმე? პოლიციელზე ხელის გარტყმის, ძალადობის გასამართლებლად ჩავიდა ბათუმში და ვიღაც რომ მივიდა, სიტყვიერად რომ შეაწუხა, თურმე ეს ყოფილა სისხლის სამართლის დანაშაული.

ხომ სამარცხვინოა ეს ყველაფერი? სად არის გერმანია, სად არის აქ სამართლიანობა? სად არის ის, რასაც მე ვსწავლობდი 20 წლის წინ გერმანიაში? საერთოდ ხაზი გადაუსვეს ყველაფერს. ტრაგიკულია ეს მდგომარეობა, რაც მართლა შემაშფოთებელია, ტენდენციაც არის შემაშფოთებელი, აღარ არსებობს არაფერი წმინდა, რასაც ჰქვია სამართლებრივი პრინციპები, ადამიანის უფლებები, სამართლის უზენაესობა, სამართლებრივი სახელმწიფო, ყველაფერს აქვს ხაზი გადასმული“ – თქვა კობახიძემ.

„ოცნების“ პრემიერის კრიტიკის სამიზნე არა მხოლოდ ელჩი, არამედ გერმანიაც გახდა. კობახიძემ განაცხადა, რომ გერმანიაში სწავლობდა სამი წელი და „ფეხზე ჰკიდიათ“ ადამიანის უფლებები.

„გერმანიაში ვსწავლობდი სამი წელი და რასაც მასწავლიდნენ, საერთოდ არ აინტერესებთ, ფეხზე ჰკიდიათ სამართლებრივი პრინციპები, სამართლის უზენაესობა, სამართლებრივი სახელმწიფო, ადამიანის უფლებები, სასამართლოს დამოუკიდებლობა, საერთოდ არ აინტერესებთ, ხაზი აქვთ გადასმული ყველაფერზე, ეს არის დღევანდელი ტრაგიკული მდგომარეობა მთლიანად ევროპულ ბიუროკრატიაში, რადგან „დიფ სთეითი“ არის, რომელსაც არ აქვს არავითარი პრინციპები“ – თქვა კობახიძემ.

აქამდე კობახიძე ხაზგასმით აღნიშნავდა, რომ განათლება გერმანიაში, დიუსელდორფში ჰქონდა მიღებული. 2020 წლის არჩევნებზე მან საკუთარი თავის წარდგენისას თქვა, რომ არის „დიუსელდორფის უნივერსიტეტის სამართლის მაგისტრი, დიუსელდორფის უნივერსიტეტის სამართლის დოქტორი“.

ეს არ არის პირველი შემთხვევა, როცა „ოცნების“ ლიდერები გერმანიის ხელისუფლებას და ელჩ პიტერ ფიშერს აკრიტიკებენ.

შეგახსენებთ, რომ 26 მაისს, საქართველოს დამოუკიდებლობის დღესთან დაკავშირებით, გერმანიის კანცლერმა, ფრიდრიხ მერცმა, საფრანგეთის პრეზიდენტმა ემანუელ მაკრონმა და პოლონეთის პრემიერ-მინისტრმა დონალდ ტუსკმა ერთობლივი განცხადება გაავრცელეს, რომლითაც ევროპის ქვეყნების ლიდერებმა დამოუკიდებლობის დღე ქართველ ხალხს მიულოცეს და დაგმეს „საქართველოს ხელისუფლების ყველა ქმედება, რამაც დემოკრატიული უკუსვლა გამოიწვია:

„ვგმობთ თავდასხმებს სამოქალაქო საზოგადოებაზე, მედიასა და ხელისუფლების კრიტიკოსებზე. საქართველოს მოსახლეობას არ უნდა წაერთვას ის შესაძლებლობები, რომელიც დაკავშირებულია ქვეყნის ევროპულ გზასთან“ – ნათქვამია განცხადებაში.

2025 წლის 3 მარტს, როცა კანცლერი ოლაფ შოლცი იყო, გერმანიის საგარეო საქმეთა სამინისტრო გამოეხმაურა ჟურნალისტისა და მედიამენეჯერის, მზია ამაღლობელის სასამართლო პროცესს და განაცხადა, რომ მზია ამაღლობელი დაუყოვნებლივ უნდა გათავისუფლდეს.

მაშინ კობახიძემ განაცხადა, რომ „გერმანიას ვერ ცნობს“.

„საქართველო-გერმანიის ურთიერთობა ყველაზე დაბალ ნიშნულზეა ბოლო 35 წლის განმავლობაში. ასეთი ცუდი ურთიერთობა გერმანიასთან არასდროს არ გვქონია“ – აღნიშნა „ბათუმელებთან“ ინტერვიუში საგარეო პოლიტიკის მრჩეველმა ბუნდესტაგში – მიხეილ სარჯველაძემ გერმანიის არჩევნების შემდეგ, 2025 წლის მარტში.

2025 წლის 24 მარტს გერმანიამ სანქციები დაუწესა ქართველ ოფიციალურ პირებს, რომლებიც საპროტესტო აქციების დარბევაზე არიან პასუხისმგებელნი.

ამავე თემაზე: 

31 მაისს „ოცნების“ მორიგი რეპრესიული კანონი ამოქმედდება, რომელსაც „ოცნება“ ამერიკული კანონის ანალოგს, „ფარას“ უწოდებს.

ვისზე შეიძლება გავრცელდეს „ოცნების ფარა“ და რა ფორმით? – ამ თემაზე „ბათუმელები“ იურისტ ნიკა სიმონიშვილს ესაუბრა.

• ბატონო ნიკა, თითქოს ბევრი განმარტება იყო „ოცნების“ მეორე რუსულ კანონთან დაკავშირებით, რომელსაც „ოცნება“ ამერიკულ „ფარას“ ეძახის, თუმცა გვინდა კიდევ ერთხელ განვუმარტოთ მოსახლეობას, რა ფორმით აპირებს „ქართული ოცნება“ სამოქალაქო ორგანიზაციების და მედიის შეზღუდვას? ეს კანონი ეხება ფიზიკურ პირებსაც თუ ისინი „ოცნების“ ხელისუფლებას გააკრიტიკებენ?

„უცხოური აგენტების“ კანონზე, ე.წ „ფარაზე“, როგორც „ქართული ოცნება“ მას ეძახის, გვეუბნებიან, პირდაპირ ამერიკული კანონიდან ვთარგმნეთო, თუმცა, გარდა იმისა, რომ პირდაპირი თარგმანია, მას ამერიკულ „ფარასთან“ არც კონტექსტურად და არც შინაარსობრივად, ბევრი არაფერი აქვს საერთო.

ერთია ის, რომ კანონი გადმოითარგმნა, მაგრამ მეორეა ის, რომ რადიკალურად განსხვავებულ კონტექსტშია გადმოღებული და რადიკალურად განსხვავებულ კონტექსტში აპირებს „ოცნება“ მის აღსრულებას.

ამ კანონის „ქართული ოცნებისეული“ თარგმანი ეხება ნებისმიერ უცხოურ დაფინანსებას, პოლიტიკური საქმიანობისთვის.

• ხელისუფლების კრიტიკაც შეიძლება ჩაითვალოს „პოლიტიკურ საქმიანობად“?

გარკვეულ განმარტებებს იძლევა ეს „ფარა“, მაგრამ ეს განმარტებები არის ძალიან ბუნდოვანი. რამდენიმე დღის წინ ანტიკორუფციული ბიუროს ხელმძღვანელმა რაჟდენ კუპრაშვილმა ძალიან ფართოდ განმარტა ეს კანონი და მისი განმარტებიდან ჩანს, რომ ისინი ძალიან ფართო მასებზე აპირებენ ამ კანონის გავრცელებას.

ამ კანონის მიხედვით, „უცხოურ პრინციპალად“ შეიძლება ჩაითვალოს ნებისმიერი წყარო უცხოეთიდან, ნებისმიერი მოქალაქე, რომელიც მუდმივად ცხოვრობს უცხოეთში. მათ შორის საქართველოს მოქალაქე ასევე შეიძლება ჩაითვალოს უცხოურ პრინციპალად, თუ უცხოეთში ცხოვრობს.

• საქართველოს მოსახლეობის უდიდესი ნაწილი თავს ირჩენს ემიგრაციიდან გამოგზავნილი ფულით. თუკი ასეთი ადამიანი პოლიტიკურად აქტიური იქნება, მას დაავალდებულებენ ამ კანონით, რომ აგენტების რეესტრში დარეგისტრირდეს?

ამ საკითხზე რაჟდენ კუპრაშვილის განმარტება იყო ასეთი, რომ ჩემი ოჯახის წევრიც რომ მირიცხავდეს თანხას, თუ მე ამის შემდეგ გარკვეულ პოლიტიკურ აქტივობას გავწევ, შესაძლოა მომაქციონ „ფარას“ მოქმედების ქვეშო.

ეს არის ამ კანონის ძალიან ფართო განმარტება და გამომდინარე იქიდან, რომ ეს კანონი „ქართული ოცნების“ ხელში უნდა აღსრულდეს, დიდი ალბათობით, ორმაგი მოქალაქეობის მქონე პირების გადმორიცხვებზეც გავრცელდება ეს კანონი.

•  „შეიძლება მოგაქციოთო“ – ასე თქვა კუპრაშვილმა? მაშინ, გამოდის, კეთილ ნებაზე ყოფილა დამოკიდებული ვისზე გაავრცელებენ კანონს.

„ქართული ოცნების“ გაგებით, ამ კანონის მთელი „მუღამიც“ ამაშია, რომ, ვისაც უნდათ შეახებენ, ვისაც უნდათ – არ შეახებენ.

მაგალითად, რუსეთიდან დაფინანსებულ ორგანიზაციებს, რომლებიც პირდაპირ რუსულ ინტერესს ატარებენ, არც კი ახსენებენ. ისინი პირდაპირ ებრძვიან დასავლურ ფულს, ამიტომ ამ კონტექსტითაც კი განსხვავდება „ოცნების ფარა“ და ამერიკული „ფარა“.

ამერიკული „ფარა“ მიემართებოდა რუსულ და ჩინურ ფულს და ამის გამოსააშკარავებლად იყო, ხოლო „ოცნების ფარა“ ამერიკულ და ევროპულ ფულს ეწინააღმდეგება. არ ახსენებენ საერთოდ რუსულ ფულს.

ის, რომ ემიგრანტების მიერ გადმორიცხულ ფულსაც შეეხება, კანონში ასე პირდაპირ არ წერია და არც იკითხება, მაგრამ რაჟდენ კუპრაშვილმა თქვა, რომ ისინი ასე აღასრულებენ, თუ დასჭირდებათ. ანუ ამ კანონს ისინი ასე კითხულობენ და ასე უნდათ, რომ წაიკითხონ.

ეს არის ერთ-ერთი დამალული საფრთხე, რომელიც შეიძლება კანონში პირდაპირ არ იკითხება, მაგრამ კუპრაშვილს წამოსცდა და თქვა, რომ შესაძლებელია ფულს იღებდეს პირი კომერციულად, ამით ფარავდეს პოლიტიკურ აქტიურობას და მათზეც უნდა გავავრცელოთო.

ამიტომ ვამბობ, რომ ვისზეც მოუნდებათ, იმაზე გაავრცელებენ.

თუ ერთ დღეს, თქვენი ოჯახის წევრი, რომელიც იმყოფება საზღვარგარეთ, გადმორიცხავს თანხას თქვენს ანგარიშზე, შეიძლება რაჟდენ კუპრაშვილმა თქვას, ამ თანხას იყენებთ პოლიტიკური საქმიანობისთვის, რადგან თქვენ პოსტავთ ფეისბუქზე, დადიხართ საპროტესტო აქციაზე, ეწინააღმდეგებით „ქართული ოცნების“ არაკონსტიტუციურ გადაწყვეტილებებსო, დაგადანაშაულებენ თქვენი ოჯახის წევრის აგენტობაში და შეიძლება მოგიწიოთ სისხლის სამართლებრივ პასუხისგებაში მიცემა.

აი, ასეთ განმარტებას აკეთებს რაჟდენ კუპრაშვილი ამ კანონზე.

• როგორც ვიცი, რაჟდენ კუპრაშვილმა ამ შეხვედრაზე ახსენა ჯილდოებიც. თუ მაგალითად პედაგოგი, სტუდენტი ან მეცნიერი, რომელიც არის პოლიტიკურად აქტიური, აიღებს საერთაშორისო ჯილდოს, შესაძლოა მასაც მოსთხოვონ აგენტების რეესტრში დარეგისტრირება?

აქ არ არის ერთმნიშვნელოვანი პასუხი არასდროს, რადგან ეს კანონი არის ისე წაკითხვადი, როგორც ეს მის აღმასრულებლებს დასჭირდება.

კანონში კი წერია, რომ თითქოს არსებობს გამონაკლისები, მაგალითად საგანმანათლებლო, სამეცნიერო საქმიანობა და ასე შემდეგ, მაგრამ საგანმანათლებლო საქმიანობის ინტერპრეტირებას როგორ მოახდენენ, შეახებენ თუ არა ამას, მაგალითად, სასწავლო გრანტებს, ეს ჩვენ ჯერ არ ვიცით.

• მაგალითად, თუ ადამიანი არის მეცნიერი ან მკვლევარი და ამ საქმიანობას ახორციელებს დასავლური გრანტით, მაგრამ ამავე დროს კრიტიკულად არის განწყობილი „ოცნების“ ხელისუფლების მიმართ, ამ შემთხვევაში მოსთხოვენ, რომ დარეგისტრირდეს აგენტების რეესტრში?

„ფარაში“ კი წერია, რომ სამეცნიერო საქმიანობისთვის მიღებულ დაფინანსებას ეს არ ეხებაო, მაგრამ აქ შემოდის მეორე, გრანტების შესახებ კანონი და ასეთ უნივერსიტეტს არ დართავენ ნებას მიიღოს გრანტი, თუნდაც იმიტომ, რომ „ქართულ ოცნებაში“ არ მოსწონთ კონკრეტული ლექტორი, თანამშრომლის პოლიტიკური შეხედულებები ან უნივერსიტეტის პოლიტიკა ცალკეულ საკითხებთან დაკავშირებით.

ამიტომ, რასაც „ფარა“ ვერ დაფარავს, იმას „გადააზღვევს“ გრანტების შესახებ კანონი.

შეიძლება დაჭერამდე არ მივიდეს საქმე, მაგრამ საერთოდ დაფინანსებას ვერ მიიღებ და თუ მაინც მიიღებ, მიღებული თანხის ორმაგი ოდენობით დაგაჯარიმებენ.

„ქართულ ოცნებას“ ასევე უნდა მოკლას დამოუკიდებელი მედია და არც ამას გააჩნია რაიმე სამართლებრივი ახსნა.

ამიტომ აქ წავა „ქართული ოცნების“ აღვირახსნილი სურვილები და მათი ნებართვის გარეშე გრანტს ვერავინ მიიღებს. თუ მიღებული გაქვს და არ დარეგისტრირდი რეესტრში, ამის გამო დაგიჭერენ.

• „რადგან მაკრიტიკებ, აგენტი ხარ“ – ეს საკმარისი იქნება ადამიანების დასადანაშაულებლად?

ერთია კანონში რა წერია და მეორე – როგორ აღასრულებენ. რაჟდენ კუპრაშვილი კი ამბობდა, როგორც ამერიკაშია, ისე აღვასრულებო, მაგრამ „ფიცი მწამს, ბოლო მაკვირვებს“ ჰქვია ამას, რადგან საქართველოში არც პოლიტიკური კონტექსტია ამ კანონის აღსრულების და ამერიკული „ფარას“ მიზნებიც რადიკალურად განსხვავებულია.

აშშ-ში „ფარა“ არც არასამთავრობო ორგანიზაციებზე ვრცელდება, არც თავისუფალ მედიაზე, არამედ ვრცელდება იმ კონკრეტულ პირებზე, რომლებიც პირდაპირი დავალების ფარგლებში ასრულებენ უცხოელი პრინციპალის დაკვეთას.

მაგრამ რაჟდენ კუპრაშვილი ამბობს, რომ თუ იღებ უცხოეთიდან დაფინანსებას და უბრალოდ პოლიტიკურად აქტიურობ, ამ შემთხვევაში კანონის ქვეშ ექცევიო.

თუ შენ ხარ დამოუკიდებელი და არ ექცევი „ქართული ოცნების“ დაწესებულ ჩარჩოებში, უნდათ, რომ შენი საქმიანობა შეზღუდონ. თუ არ არის დაფინანსება და არავის მხრიდან არ ხორციელდება კონტროლი, ეს კანონი წესით არ უნდა გავრცელდეს, მაგრამ, მთელი პრობლემა იმაშია, რომ ეს კანონი არის დამატებითი ინსტრუმენტი თავისუფალ აზრთან საბრძოლველად.

ვერ იპოვიან ამ კანონში სათანადო ჩანაწერს? სხვა კანონში იპოვიან. ან გააჩენენ ასეთ ჩანაწერს და დაგაჯარიმებენ.

რუსთაველზე დგომა თურმე არ შეიძლება, ფანარი არ შეიძლება – კანონდარღვევაა, ნიღაბი არ შეიძლება – კანონდარღვევაა… მაქსიმალურად ცდილობენ საპროტესტო სივრცის შეზღუდვას.

ამიტომ ვამბობ, რომ თუ უნდათ, რომ გაგაჩუმონ, რაჟდენ კუპრაშვილის მხრიდან ამ კანონის კეთილსინდისიერ ინტერპრეტირებას არ მოველი.

აქედან გამომდინარე, ის შეიძლება ბოროტადაც იყოს წაკითხული, სადმე რაიმე უცხოური გადმორიცხვა რომ დაგიფიქსირონ და შენი პოლიტიკური აქტიურობა არ იყოს მათთვის სასურველი, ჩათვლიან, რომ შენ იმ უცხოური გადმორიცხვით აკეთებ აგენტურულ საქმეს.

ოკუპირებული აფხაზეთის დე ფაქტო პრეზიდენტმა ბადრა გუნბამ რუსულ პროგანდისტულ მედია „ტასსთან“ ინტერვიუში რუსეთის თავდაცვის სამინისტროსთან ურთიერთქმედების მნიშვნელობაზე ისაუბრა და თქვა, რომ რუსეთის თავდაცვის სამინისტროს მეშვიდე სამხედრო ბაზა, ისევე როგორც რუსეთის უშიშროების სამსახურის სასაზღვრო დეპარტამენტი, რომელიც მდებარეობს აფხაზეთის ტერიტორიაზე, არის „ქვეყანაში მშვიდობისა და სტაბილურობის შენარჩუნების დამატებითი გარანტია“.

„მართლაც, ჩვენთვის ძალიან მნიშვნელოვანია რუსეთის ფედერაციის თავდაცვის სამინისტროსთან თანამშრომლობის გაგრძელება. მეშვიდე რუსული სამხედრო ბაზა მდებარეობს აფხაზეთის რესპუბლიკის ტერიტორიაზე და იქ არის განთავსებული რუსეთის ფედერალური უშიშროების სამსახურის სასაზღვრო დეპარტამენტი.

რა თქმა უნდა, ამ ქვედანაყოფების აფხაზეთის ტერიტორიაზე ყოფნა დამატებითი შესაძლებლობაა აფხაზეთის ტერიტორიაზე მშვიდობისა და სტაბილურობის შესანარჩუნებლად.

აფხაზეთის მოსახლეობა მადლობას უხდის რუსეთის ფედერაციის ხელმძღვანელობას მიღებული გადაწყვეტილების გამო“, – თქვა მან.

გუნბას თქმით, ოკუპირებული აფხაზეთის დე ფაქტო ხელისუფლება მუდმივ კონტაქტშია აფხაზეთის ტერიტორიაზე არსებულ რუსულ ქვედანაყოფებთან. „მე დარწმუნებულები ვარ, რომ მათი ყოფნა კვლავაც ხელს შეუწყობს მშვიდობისა და სტაბილურობის შენარჩუნებას“, – თქვა გუნბამ.

სააგენტო „ტასსი“ წერს, რომ იქამდე რუსეთის თავდაცვის მინისტრმა ანდრეი ბელუსოვმა, აფხაზეთის დე ფაქტო თავდაცვის მინისტრთან მოლაპარაკებებისას აფხაზეთს უწოდა „სარწმუნო მოკავშირე ამიერკავკასიაში“ და აღნიშნა, რომ ალიანსისა და სტრატეგიული პარტნიორობის შესახებ ხელშეკრულების ფარგლებში, რუსეთი და აფხაზეთი „საერთო თავდაცვით სივრცეს“ აყალიბებენ.

2025 წლის მაისში რუსეთის პრეზიდენტმა, ვლადიმერ პუტინმა ოკუპირებული აფხაზეთისა და სამხრეთ ოსეთის დე ფაქტო მოქალაქეებისთვის რუსეთის ფედერაციის მოქალაქეობის მინიჭების პროცედურები გაამარტივა.

ამიერიდან, აფხაზეთსა და სამხრეთ ოსეთში მცხოვრებლებს რუსეთის მოქალაქეობის მისაღებად არ მოეთხოვებათ იმ პირობების დაცვა, რაც სხვებისთვის აუცილებელია. მათ შორის, მათთვის სავალდებულო არ იქნება რუსული ენისა და რუსეთის ისტორიის ცოდნის დადასტურება.

აჭარის ტელევიზიამ უარი უთხრა „ბათუმელებს“ კადრების მიწოდებაზე, რომელიც ასახავს 2025 წლის 12 იანვარს მზია ამაღლობელის დაკავებამდე რამდენიმე წუთით ადრე, დაკავებისთანავე და შემდგომ განვითარებულ მოვლენებს.

„გაცნობებთ, რომ თქვენ მიერ მოთხოვნილი კადრები არ წარმოადგენს საჯარო ინფორმაციას, რადგან შეიცავს პერსონალურ მონაცემებს,“ – ასე ასაბუთებს აჭარის ტელევიზიის დირექტორი ვლადიმერ ტატიშვილი თავის უარს, გადასცეს „ბათუმელებს“ კადრები.

მზია ამაღლობელის წინააღმდეგ სისხლის სამართლებრივი დევნა დაიწყო აჭარის ტელევიზიის მიერ გავრცელებული და პროკურატურისათვის გადაცემული კადრების საფუძველზე. მზია ამაღლობელის ბრალი დგას 44-წამიან ვიდეო კადრზე, რომელშიც ჩანს როგორ აწნის მზია ამაღლობელი სილას ირაკლი დგებუაძეს.

აჭარის ტელევიზიას დღემდე არ გაუვრცელებია 12 იანვარს განვითარებული მოვლენების ამსახველი კადრები, გარდა ამ 44-წამიანი ვიდეო ფაილისა, მიუხედავად იმისა, რომ ეს კადრი მოჭრილია სხვა ვრცელი კადრიდან, რაც უდაოდ გააჩნია “აჭარის ტელევიზიას”.

ცნობისათვის, 12 იანვარს, მზია ამაღლობელის მიერ ირაკლი დგებუაძისთვის სილის გაწვნის ეპიზოდს წინ უძღოდა 10 წუთიანი ჭყლეტა პოლიციასა და მოქალაქებს შორის, ამ ჭყლეტაში მოხვდა მზია ამაღლობელი და ექსპერტიზითაც დადასტურებულია, რომ მას დაზიანებული ჰქონდა როგორც მარცხენა, ისე მარჯვენა მხარი. ასევე დაზიანებები ჰქონდა მკერდის ქვედა ნაწილში.

ამ ჭყლეტაში მზია ამაღლობელი წაიქცა, მას  გასძვრა ფეხსაცმელი და აქციის მონაწილეებმა მის გამო სასწრაფო დახმარებაც კი გამოიძახეს. თუმცა როცა სასწრაფო დახმარების მანქანა აჭარის პოლიციის დეპარტამენტის წინ მივიდა, მზია ამაღლობელი უკვე დაკავებული იყო.

„ბათუმელებმა“ კადრების გადაცემის მოთხოვნამდე წერილობითი დასტური მიიღო აჭარის ტელევიზიის მენეჯმენტისგან, რომ მათთან ნამდვილად ინახება 2025 წლის 11 და 12 იანვარს აჭარის პოლიციის დეპარტამენტის წინ მიმდინარე მოვლენების ამსახველი ვიდეომასალა.

საქმე იმაშია, რომ 7 აპრილს, მზია ამაღლობელის სასამართლო პროცესზე მოწმე პოლიციელმა/გამომძიებელმა განაცხადა, რომ აჭარის ტელევიზიამ გამოძიებას გადასცა მხოლოდ 44-წამიანი ვიდეოკადრი. გამომძიებელმა არ განმარტა, რატომ არ ამოიღო სრული ვიდეო ჩანაწერი, რომლითაც შესაძლებელი იქნებოდა 11-12 იანვარს აჭარის პოლიციის დეპარტამენტის წინ განვითარებული მოვლენების ქრონოლოგიის აღდგენა და მათ შორის იმ კომუნიკაციის აღდგენას, რაც წინ უსწრებს სილის გაწვნის ეპიზოდს.

კადრების გასაჯაროების შემთხვევაში საზოგადოებისათვის გასაგები გახდებოდა, თუ რა უძღოდა წინ სილის გაწვნის ეპიზოდს, რამ განაპირობა მზია ამაღლობელის ქცევა და ასევე გამოაშკარავდებოდა ირაკლი დგებუაძის საპასუხო ქმედება.

„ბათუმელებმა“ წერილობით მიმართა აჭარის ტელევიზიას, პასუხად კი ტელევიზიის დირექტორმა დაადასტურა რომ 11-12 იანვრის მოვლენების ამსახველი კადრები მათთან ინახება, თუმცა ეს კადრები არც გამოძიებამ გახადა საჯარო და არც თავად ტელევიზიამ.

„საზოგადოებრივი მაუწყებლის აჭარის ტელევიზია და რადიო“ ხალხის მიერ გადახდილი გადასახადებით ფინანსდება და მისი წლიური ბიუჯეტი 17 მილიონ ლარზე მეტია.

————————————————-

მთავარი ფოტო: სქრინი აჭარის ტელევიზიის 44 წამიანი კადრიდან

უკრაინის პრეზიდენტი, ვოლოდიმირ ზელენსკი ქართველ ხალხს დამოუკიდებლობის დღეს ულოცავს.

„ვულოცავ ქართველ ხალხს დამოუკიდებლობის დღეს და გულწრფელად ვუსურვებ, რომ საქართველო იყოს ძლიერი და ბედნიერი. უკრაინელები ყოველთვის გრძნობდნენ თბილ ემოციურ კავშირს საქართველოსთან.

ჩვენმა სახელმწიფომ მხარი დაუჭირა საქართველოს სუვერენიტეტსა და თავდაცვას 2008 წელს რუსეთის შემოჭრის რთულ პერიოდში. და ჩვენ ყოველთვის გვერდით ვიქნებით ხალხების – ევროპის ყველა ხალხის თავისუფალი და ღირსეული ცხოვრებისკენ ერთობლივ მისწრაფებაში, რაც წარმოუდგენელია უკრაინისა და საქართველოს გარეშე.

მადლობა ყველას, ვინც მხარს უჭერს ჩვენს ხალხს. გაუმარჯოს დამოუკიდებელ საქართველოს! დიდება უკრაინას!“ – წერს ზელენსკი.

დღეს, 26 მაისს, საქართველოს დამოუკიდებლობის დღეს, ორგანიზაცია „მედიის ადვოკატირების კოალიცია“ ცისფერი გალერეის წინ მზია ამაღლობელის მხარდამჭერი ინიციატივით წარსდგა.

„მედიის ადვოკატირების კოალიციამ“ „ბათუმელებისა“ და ნეტგაზეთის“ დამფუძნებლისა და დირექტორის, მზია ამაღლობელის მხარდასაჭერი კუთხე მოაწყო, სადაც მოქალაქეები მზია ამაღლობელისათვის გასაგზავნ წერილებს წერენ.

დღეს, 26 მაისს, გაზეთი „ბათუმელები“ 24 წლის გახდა. „ბათუმელების“ პირველი ნომერი 2001 წლის 26 მაისს გამოვიდა. გამოცემა დააარსა ორმა ახალგაზრდა ჟურნალისტმა, მზია ამაღლობელმა და ეთერ თურაძემ.

მზია ამაღლობელი 4 თვეზე მეტია უკანონო პატიმრობაშია.

ამავე თემაზე:

„ოცნების“ პარლამენტის თავმჯდომარე, შალვა პაპუაშვილი საფრანგეთის პრეზიდენტის ემანუელ მაკრონის, პოლონეთის პრემიერ-მინისტრის – დონალდ ტუსკისა და გერმანიის კანცლერის – ფრიდრიხ მერცი ერთობლივ განცხადებას „სამარცხვინო თავდასხმას“ უწოდებს.

„სამარცხვინო თავდასხმა ქართველ ხალხზე და ქართულ სახელმწიფოზე მისი ეროვნული დღესასწაულის დღეს“ – წერს პაპუაშვილი ფეისბუქზე.

დღეს, 26 მაისს, საქართველოს დამოუკიდებლობის დღესთან დაკავშირებით საფრანგეთის პრეზიდენტმა ემანუელ მაკრონმა, პოლონეთის პრემიერ-მინისტრი დონალდ ტუსკმა და გერმანიის კანცლერმა ფრიდრიხ მერცმა ერთობლივი განცხადება გაავრცელეს.

„ჩვენ გვსურს ქართველ ხალხს გადავცეთ გზავნილი, რომელიც შეიცავს მეგობრობასა და სოლიდარობას და კვლავ გამოვხატოთ ჩვენი ურყევი მხარდაჭერა საქართველოს ტერიტორიული მთლიანობისა და სუვერენიტეტისადმი.

ჩვენ მხარს ვუჭერთ ქართველი ხალხის დემოკრატიულ და ევროპულ მისწრაფებებს. ეს მისწრაფებები ასახავს ევროპული ოჯახის წევრობის სურვილს.

ამიტომაც, ჩვენ ვგმობთ საქართველოს ხელისუფლების ყველა ქმედებას, რამაც დემოკრატიული უკუსვლა გამოიწვია, ვგმობთ თავდასხმებს სამოქალაქო საზოგადოებაზე, მედიასა და ხელისუფლების კრიტიკოსებზე.

შეკრების და გამოხატვის თავისუფლება დაცული უნდა იყოს.

ცნობები გადაჭარბებული ძალადობის შესახებ უნდა გამოიძიონ.

კანონები, რომლებიც ეწინააღმდეგება ევროპულ სტანდარტებს, უნდა შეიცვალოს. საჭირო რეფორმების პროცესი ახლიდან უნდა დაიწყოს.

საქართველოს ხელისუფლების წარმომადგენლებმა უნდა აღადგინონ დიალოგი ოპოზიციასთან და სამოქალაქო საზოგადოებასთან.

საქართველოს მოსახლეობას არ უნდა წაერთვას ის შესაძლებლობები, რომელიც დაკავშირებულია ქვეყნის ევროპულ გზასთან“, – ნათქვამია ერთობლივ განცხადებაში.

ბათუმში ერთი პირი დააკავეს მკვლელობის ბრალდებით.

შსს-ს ინფორმაციით, ბრალდებულმა, ბათუმში, ყოფით თემაზე დაწყებული დაპირისპირებისას, დანის გამოყენებით სხეულზე ჭრილობები მიაყენა 2 ადამიანს, „რის შემდეგაც შემთხვევის ადგილიდან მიიმალა“.

მათივე ინფორმაციით, დაჭრილი კაცები საავადმყოფოში მოათავსეს, სადაც ერთ-ერთი მათგანი მიღებული დაზიანებების შედეგად მალევე გარდაიცვალა.

პოლიციის ინფორმაციით, ბრალდებული დაკავებულია.

გამოძიება სისხლის სამართლის კოდექსის 19-108 -ე მუხლით მიმდინარეობს.

„მზია ამაღლობელის სასამართლო პროცესი პრესაზე რეჟიმის უპრეცენდენტო თავდასხმის სიმბოლოა,“ – ამ სათაურით აქვეყნებს ფრანგული გამოცემა „ლე მონდი“ ვრცელ სტატიას, რომელიც მზია ამაღლობელის საქმეს ეძღვნება.

სტატიაში აღწერილია მზია ამაღლობელის დაკავების და შემდგომ უკანონო პატიმრობის დეტალები.

„ლე მონდმა“ კითხვები ქალთა კოლონიაში გაუგზავნა პატიმრობაში მყოფ მედიამენეჯერს.

„მტრობა და ჟურნალისტების მიმართ ასეთი სიძულვილი. ასეთი რამ აქამდე არც ერთ მთავრობას არ გამოუვლენია.  დღეს ოლიგარქიულმა რეჟიმმა მიიღო აბსურდული კანონები, რაც დიქტატურისათვის დამახასიათებელი იყო.

ჩემი კოლეგების ცხოვრება თავგანწირვის სინონიმი გახდა. ვნანობ, რომ არა ვარ მათ გვერდით ამ რთულ დროს“, – წერს მზია ამაღლობელი “ლე მონდს”.

მზია ამაღლობელი „ლე მონდთან“ ასევე ეხმაურება მის მიმართ „ქართული ოცნების“ მაღალი თანამდებობის პირების მიერ  წარმოებულ ცილისმწამებლურ კამპანიას. „ქართული ოცნების“ მაღალჩინოსნები უკანონო პატიმრობაში მყოფ მედიამენეჯერს მოიხსენიებენ „აგენტად“ და ამტკიცებენ, რომ მან „პოლიციელზე თავდასხმა დაგეგმა“.

მზია ამაღლობელი „ლე მონდის“ კითხვაზე პასუხად კი წერს, რომ ბათუმის პოლიციის უფროსისთვის მოქნეული სილა „არც გააზრებული იყო და არც დაგეგმილი“.

„თავს უკანონო პატიმრად მივიჩნევ. ჩემს ადვოკატებთან, თანამოაზრეებთან ერთად ვცდილობ ეს სასამართლოს გზითაც დავამტკიცო. თუმცა, მოულოდნელი არ იქნება ჩემთვის დღევანდელმა ქართულმა მართლმსაჯულებამ 7 წელი რომ მომისაჯოს „სილის გაწვნისათვის“.

პატიმრობაში ვიქნები თუ პატიმრობის მიღმა შევეცდები კარგი მოქალაქე ვიყო. მოქალაქე, რომელიც თავისი უნარებით, პროფესიით, წინააღმდეგობით ყოველთვის იბრძოლებს სამართლიანობისა და დემოკრატიისათვის. იბრძოლებს რუსული გავლენების, ოლიგარქებისა და დიქტატორების წინააღმდეგ,“ – წერს მზია ამაღლობელი „ლე მონდს“ რუსთავის ქალთა კოლონიიდან.

,,ბათუმელები”/,,ნეტგაზეთის” თანადამფუძნებელი და მედიამენეჯერი მზია ამაღლობელი 4-ზე მეტი თვე უკანონო პატიმრობაშია.

მას პროკურატურა ბათუმის პოლიციის უფროს ირაკლი დგებუაძისათვის სილის გაწვნის გამო „პოლიციელზე თავდასხმას“ ედავება. სილის გაწვნისთვის ჟურნალისტს 4-დან 7-მდე წელი პატიმრობა ემუქრება.

მზია ამაღლობელის მორიგი სასამართლო პროცესი ბათუმის საქალაქო სასამართლოში 30 მაისს გაიმართება.

„ბიძინა ივანიშვილს უნდა, რომ ჩვენ ახალგაზრდებმა ამ თავისუფლებისთვის და დამოუკიდებლობისთვის ბრძოლა შევწყვიტოთ რადგან ხელი არავინ შეუშალოს ამ ქვეყნის იქეთ წაყვანისკენ, საითკენაც მიჰყავს“-ამბობს მოძრაობა „ახალგაზრდული ძალას“ ხელმძღვანელი, სტუდენტი თედო ზოიძე „ბათუმელებთან“.

ის ბათუმში შეხვედრებს მართავს პოლიტიკით დაინტერესებულ ახალგაზრდებთან.

„ჩვენი დამოუკიდებლობა და თავისუფლება როგორც არასდროს, ისეა დასაცავი, მიუხედავად იმისა, რომ ჩვენმა წინაპრებმა ამ თავისუფლებისთვის ბევრი სისხლი დაღვარეს.

ბევრი მსხვერპლის ფასად მოვიტანეთ ჩვენი დამოუკიდებლობა დღემდე, მაგრამ სამწუხაროდ, 21-ე საუკუნეშიც გვიწევს თავისუფლებისთვის ბრძოლა, ამაზე ზრუნვა და ამისთვის ფიქრი.

ჩვენს თავისუფლებას არავინ დაიცავს ჩვენს გარდა, რადგან ბიძინა ივანიშვილს უნდა, რომ ახალგაზრდებმა ამ თავისუფლებისთვის და დამოუკიდებლობისთვის ბრძოლა შევწყვიტოთ რადგან ხელი არავინ შეუშალოს ეს ქვეყანა წაიყვანოს იქ, საითკენაც მიჰყავს.

უნდა რომ გავჩერდეთ და ვთქვათ, – ბრძოლას აზრი აღარ აქვს, მაგრამ ბრძოლას ნამდვილად აქვს აზრი და ხშირ შემთხვევაში შედეგის მიღწევას სჭირდება დრო.

სულ იმაზე მეფიქრება, რომ ჩვენი პოლიტიკური პატიმრები, მათ შორის ქალი პატიმარი მზია ამაღლობელი, რომლებიც არიან ტყვეობაში, გვაძლევენ მოტივაციას, რომ ვიბრძოლოთ.

ამიტომ არ უნდა მივცეთ თავს უფლება, დავნებდეთ. ბრძოლა იქნება ბოლომდე.

ჯერ ეს ადამიანები უნდა გამოვიყვანოთ, რადგან ჩვენი პასუხიმსგებლობა და ვალია, რომ სოლიდარულები ვიყოთ მათ მიმართ, რადგან ნებისმიერი ჩვენგანი შეიძლება ყოფილიყო დღეს ციხეში. ამიტომ „ქართული ოცნება“ უნდა გავისტუმროთ იქ, სადაც არის მათი ადგილი“-ამბობს თედო ზოიძე.

თედო, თანამოაზრეებთან ერთად რეგიონებში გეგმავს მოსახლეობასთან შეხვედრებს. ერთ-ერთი შეხვედრა ბათუმის „დემოკრატიული ჩართულობის ცენტრში“ გუშინ, 24 მაისს გაიმართა, სადაც ახალგაზრდებმა წინააღმდეგობის გაძლიერების მნიშვნელობაზე ისაუბრეს.

„ჩვენი მთავარი მიზანია, რაც შეიძლება მეტი ახალგაზრდა შემოვიდეს პოლიტიკურ პროცესებში.

ამიტომ, ბათუმშიც პოლიტიკით დაინტერსებულ ახალგაზრდებს შევხვდი.

შევხვდებით ადამიანებს სოფლებშიც და ქალაქებშიც და მოვისმენთ მათ აზრს მიმდინარე პოლიტიკურ პროცესებზე და იმაზეც, როგორ ხედავენ პროტესტის გაგრძელების გზებს, რადგან ახალგაზრდები ვართ ამ პროტესტის წინა ხაზზე.

26 მაისს, ცხადია ვუერთდებით აქციას თბილისში და როგორც ვიცი, ბათუმშიც იგეგმება საპროტესტო აქცია და ჩემი თანამოაზრეები შეუერთდებიან ბათუმის პროტესტს“-ამბობს თედო ზოიძე.

მგზავრების ინფორმაციით, ოზურგეთი-თბილისის მატარებელი სადგურ რიონთან გაჩერდა.

მგზავრების თქმით, თითქმის ერთი საათია ელოდებოდნენ მატარებლის დაძვრას.

„გაფუჭებულ მატარებელს სხვა ელმავალი ჩააბეს და ასე გაიყვანეს“- ეუბნება „ბათუმელებს“ ერთ-ერთი მგზავრი.

„ბათუმელები“ დაუკავშირდა „საქართველოს რკინიგზას“, სადაც გვითხრეს, რომ ინფორმაციას გადაამოწმებენ.

სულხან თამაზაშვილი „ქართული ოცნების“ მიერ აჭარის არალეგიტიმური მთავრობის თავმჯდომარეობის კანდიდატად 4 აპრილს დასახელდა, მას შემდეგ, რაც აჭარის მთავრობის თავმჯდომარის პოსტიდან ფეისბუქით გადადგა თორნიკე რიჟვაძე.

თამაზაშვილი, რომელიც იქამდე თბილისის პოლიციის დეპარტამენტის დირექტორი იყო, აჭარის არალეგიტიმურმა უმაღლესმა საბჭომ 7 აპრილს დაამტკიცა მთავრობის თავმჯდომარის პოსტზე.

დიდი ბრიტანეთის მიერ სანქცირებული პოლიციის პოლკოვნიკი სულხან თამაზაშვილი მანამდე უჩინარი იყო სოციალურ ქსელებში. ფეისბუქზე მისი გვერდი 9 აპრილს გამოჩნდა – ჯერ პირადი ფოტოსურათით, შემდეგ კი 9 აპრილისადმი მიძღვნილი ქარდით. „მადლობა თავისუფლებისთვის“ – ასე მშრალად გამოეხმაურა რუსი სამხედროების მიერ თავისუფლებისთვის დაღუპული ქართველი გმირების ხსოვნას სულხან თამაზაშვილი.

ფეისბუქზე გამოქვეყნებული პოსტების თანახმად, თამაზაშვილის პირველი შეხვედრები მუნიციპალიტეტების მერებთან და მერიის თანამშრომლებთან გაცნობითი შეხვედრებით დაიწყო და სასულიერო პირებთან სტუმრობით გაგრძელდა.

სულხან თამაზაშვილი ჯერ ღიად პრორუს სასულიერო პირს, სხალთის მთავარეპისკოპოს სპირიდონს შეხვდა. სპირიდონ აბულაძე უკვე წლებია ამბიონიდან ქადაგებს კრემლის პოლიტიკას და არ მალავს დასავლეთის მიმართ სიძულვილს.

თამაზაშვილს შემდეგი შეხვედრა უკვე მუსლიმებთან ჰქონდა – იგი დასავლეთ საქართველოს მუფთს, ადამ შანთაძეს შეხვდა. ამ ვიზიტის შესახებ საზოგადოებამ ფეისბუქზე გამოქვეყნებული ფოტოებით გაიგო. უცნობია, ისაუბრეს თუ არა მუფთმა და თამაზაშვილმა მუსლიმთა პრობლემებზე რეგიონში, მაგალითად იმაზე, როგორ დაჰპირდა ბიძინა ივანიშვილი 2012 წელს მუსლიმებს ახალი მეჩეთის მშენებლობაში დახმარებას, მაგრამ პირობა დაარღვია.

დახმარების ნაცვლად მუსლიმებმა მიიღეს ხელშეშლა, რადგან ბათუმის მერია მუსლიმებს უფლებას არ აძლევს თავიანთი ფულით შესყიდულ მიწაზე ააშენონ ახალი მეჩეთი. მიუხედავად იმისა, რომ მუსლიმები წლებია დავობენ სასამართლოში და ირღვევა მათი კონსტიტუციური უფლება, ბათუმის მერია მათ მშენებლობის ნებართვას არ აძლევს.

კიდევ ერთი ვიზიტი ბათუმისა და ლაზეთის მიტროპოლიტთან, დიმიტრისთან შედგა. ეს შეხვედრაც დახურულ კარს მიღმა წარიმართა.

სულხან თამაზაშვილმა ახალ პოსტზე დანიშვნის პირველ დღეებში უცხოელი სტუმრებისთვისაც გამონახა დრო და პირველი სტუმარი, ფეისბუქის მიხედვით, უზბეკეთიდან მიიღო – სპორტის მინისტრი ადჰამ იკრამოვი. „ეს შეხვედრა მნიშვნელოვანი შესაძლებლობა იყო, რათა განგვეხილა სპორტის სფეროში ორმხრივი თანამშრომლობის პერსპექტივები და ჩვენს ქვეყნებს შორის არსებული მეგობრული ურთიერთობების გაღრმავება“ – დაწერა თამაზაშვილმა ფეისბუქზე.

23 აპრილს სულხან თამაზაშვილმა, როგორც თავადვე წერს, „ქობულეთის უხუცესებთან და საპატიო ხინოწმინდელებთან ერთად“, ხინოწმინდის იოანე ნათლისმცემლის თავის კვეთის ტაძარი მოილოცა.

29 აპრილს, მან ბათუმში აწ უკვე ყოფილ მერთან, არჩილ ჩიქოვანთან ერთად რუსთაველის ქუჩაზე მიმდინარე სამუშაოები დაათვალიერა, პირველ მაისს კი – ახალი, მშენებარე სკვერი თამარის დასახლებაში. მის ფეისბუქის გვერდზე, სადაც მხოლოდ ფოტოებია გამოქვეყნებული, ვერ ვნახეთ ინფორმაცია, როდის დასრულდება სამუშაოები რუსთაველზე, ქალაქის ერთ-ერთ ცენტრალურ ქუჩაზე, რომელიც თითქმის ოთხ თვეზე მეტია გადათხრილია.

სულხან თამაზაშვილი, ფეისბუქზე გამოქვეყნებული ფოტოების თანახმად, ჩინეთის სახალხო რესპუბლიკის უცხო ქვეყნებთან მეგობრობის სახალხო ასოციაციის პრეზიდენტს, იანგ ვანმინგს შეხვდა, თურქეთის კონსულს ბათუმში – ადნან ალთაი ალთინორს, და, ასევე, აზერბაიჯანის ელჩს საქართველოში, ფაიგ გულიევს.

ფეისბუქზე გამოქვეყნებული ინფორმაციის თანახმად, ოფიციალური შეხვედრების გარდა მემორიალების სტუმრობა სულხან თამაზაშვილის დღის წესრიგში ერთ-ერთი მთავარი აქტივობაა.

ის ყვავილებით და სანთლებით ხელში ჯერ ზურაბ გორგილაძის საფლავზე იყო, შემდეგ ანატოლი კაჭარავას საფლავი მოინახულა.

ასევე, დაესწრო შუახევში გამართულ სახალხო დღესასწაულ „მარეთობას“, სადაც გმირთა მემორიალი შეამკო ყვავილებით.

თუმცა სულხან თამაზაშვილმა გმირთა მემორიალთან მისვლა ვეღარ შეძლო ბათუმში 9 აპრილს, რადგან სამოქალაქო აქტივისტებმა, რომლებიც მეექვსე თვეა ქვეყანაში „ოცნების“ ანტიკონსტიტუციური ხელისუფლების პრორუსულ კურსსა და რეპრესიებს აპროტესტებენ, აჭარაში „ოცნების“ წევრებს უფლება არ მისცეს მისულიყვნენ იმ გმირების მემორიალთან, რომლებიც 9 აპრილს დაიღუპნენ, „ოცნების“ ხელისუფლება კი მათ მიერ გაღებულ მსხვერპლს ფუჭს უწოდებს და აუფასურებს მათ ბრძოლას რუსული რეჟიმის წინააღმდეგ.

შესაბამისად, გმირთა მემორიალთან სულხან თამაზაშვილი ყვავილებით ხელში არავის უნახავს.

სულხან თამაზაშვილის ფეისბუქ გვერდზე რელიგიური დღესასწაულების მოსალოც ბარათებს, შიგადაშიგ, სხვადასხვა სახეობაში წარმატებული სპორტსმენების ფოტოები ანაცვლებს.

მაგალითად, 11 მაისს სულხან თამაზაშვილმა სარაგბო კლუბ „ბათუმის“ საქართველოს ჩემპიონობა მოგვილოცა, 12 მაისს კი – „ღვთისმშობლის წილხვედრობა“.

14 მაისს  სულხან თამაზაშვილმა ბათუმის მერის მოვალეობის შემსრულებელი გიორგი მურვანიძე წარადგინა. მას არ უთქვამს, რატომ გადადგა არჩეული მერი, რომელთან ერთადაც წინა დღეებში ინფრასტრუქტურულ პროექტებს ათვალიერებდა და ფოტოებს იღებდა.

17 მაისს, სულხან თამაზაშვილმა „ოჯახის სიწმინდის დღე“ მოგვილოცა ფეისბუქზე. მისი აზრი არც ამ დღეს მოგვისმენია, მაგალითად, ოჯახში გახშირებული ძალადობის, ქალთა და ბავშვთა მიმართ ძალადობის, ქალთა მკვლელობების, ოჯახების სიღარიბის, გაზრდილი ემიგრაციისა და უმუშევრობის შესახებ.

ასევე, არ მოგვისმენია, რას ფიქრობს თამაზაშვილი ამ პრობლემებზე და როგორ წარმოუდგენია, მაგალითად, ქართული ოჯახების რეალური გაძლიერება და სიღარიბეში მცხოვრები ბავშვების დახმარება.

როგორც ჩანს, სულხან თამაზაშვილს მედიასთან ურთიერთობა არ მოსწონს და არ სურს. აჭარის მთავრობის თავმჯდომარედ დანიშვნიდან დღემდე, თითქმის ორი თვე გავიდა და აჭარის ტელევიზიის ვებგვერდზე, რომელიც აჭარის მთავრობას აქტიურად აშუქებს, საძიებო ველით არ იძებნება სულხან თამაზაშვილის არც ერთი კომენტარი. „ოცნების“ მთავრობის თავმჯდომარე მხოლოდ კადრებში ჩანს, კომენტარებს კი სხვა ოფიციალური პირები აკეთებენ.

აჭარის ტელევიზიის ვებგვერდზე სულხან თამაზაშვილზე გამოქვეყნებული ბოლო მასალა, რომელშიც თამაზაშვილი სკოლის დამთავრებას ულოცავს მე-12 კლასელებს, მის ფეისბუქპოსტზე დაყრდნობითაა  მომზადებული.

სულხან თამაზაშვილს რომ მედიასთან ურთიერთობა არ სურს, ეს ფაქტობრივად მისი დანიშვნის პირველსავე დღეს გახდა აშკარა, როცა აჭარის უმაღლეს საბჭოში სხდომა, რომელზეც იგი უნდა აერჩიათ, დახურულ ფორმატში გაიმართა – სხდომაზე არ დაუშვეს ჟურნალისტები და ასევე, სხდომა არ გადაიცემოდა პირდაპირ ეთერში.

სულხან თამაზაშვილი, რომელიც აქამდე თბილისის პოლიციის დეპარტამენტის უფროსი იყო, შს მინისტრთან და სხვა მაღალჩინოსნებთან ერთად 2024 წლის ბოლოს დაასანქცირა დიდმა ბრიტანეთმა, როგორც ჟურნალისტებსა და მშვიდობიან მომიტინგეებზე ძალადობრივ თავდასხმაზე პასუხისმგებელი პირი. პოლიციაში მუშაობის დროს, მან, როგორც პოლიციის უფროსმა, ვერ ან არ უზრუნველყო და დაიცვა ჟურნალისტები მოძალადეების თავდასხმებისგან.

მეტიც, ძალოვანი სტრუქტურების წარმომადგენლები მიზანმიმართულად მოქმედებდნენ ჟურნალისტების წინააღმდეგ, რამაც რიგ შემთხვევებში მძიმე ფიზიკური დაზიანება და ჰოსპიტალიზაცია გამოიწვია. „მედიაკოალიციის“ ცნობით, მიზანმიმართული თავდასხმის და აქციის დარბევის შედეგად აღრიცხულია მედიის წარმომადგენლების ფიზიკურად დაზიანების 70-მდე შემთხვევა, სამუშაო აღჭურვილობის ჩამორთმევის 20-მდე ფაქტი და მედიის წარმომადგენელთა დაკავების 10-მდე შემთხვევა.

მას შემდეგ, რაც სულხან თამაზაშვილი მთავრობის თავმჯდომარის პოსტზე დანიშნა „ოცნებამ“, მან ერთხელაც კი არ გახსნა კარები ჟურნალისტებისთვის. ყველა სხდომა თუ შეხვედრა დახურულ კარს მიღმა ტარდება.

„ბათუმელებმა“ ჯერჯერობით მხოლოდ ერთხელ შეძლო მისგან კომენტარის მიღება პირდაპირ ჩართვაში. კითხვაზე სულხან თამაზაშვილმა მხოლოდ ერთი სიტყვით გვიპასუხა – „მოგვიანებით“.

„ისინი ქარაფშუტულად ვარაუდობდნენ, რომ გამოვცხადდებოდით ამ კომისიაზე და ჩვენთვის ეს ღირსების აყრის ტოლფასი იქნებოდა“, – ამბობს პარტია „ახლის“ერთ-ერთი ლიდერი ნიკა მელია, რომელსაც თეა წულუკიანის კომისიაზე გამოუცხადებლობის გამო, 50 000-ლარიანი გირაო აქვს შეფარდებული, თუმცა გადახდას არ აპირებს.

22 მაისს ამავე ბრალდებით ზურაბ გირჩი ჯაფარიძე დააკავეს სასამართლოში.

ზურაბ ჯაფარიძისგან განსხვავებით, ნიკა მელია სასამართლოში მისვლას არ აპირებს. „მათ სხვა ადგილზე დაველოდები“, – ამბობს ის.

როგორ შეიძლება განვითარდეს პროტესტი, თუკი ნიკა მელიას და ოპოზიციის სხვა ლიდერებს დააკავებენ? – ამ თემაზე ესაუბრა მას „ბათუმელები“.

• ბატონო ნიკა, 29 მაისს სასამართლოში ხართ დაბარებული გირაოს გადაუხდელობის საქმეზე. თქვენ თქვით, რომ არ აპირებთ სასამართლოში მისვლას, რატომ და რა შეიძლება მოჰყვეს ამას?

ზურა გირჩი ჯაფარიძის ე.წ. სასამართლო პროცესის მიმდინარეობისას დავინახე, რამდენად აბუჩად აიგდეს იქ მისული გულშემატკივრები, არ შეუშვეს არც ეზოში, არც შენობაში. არ შეუშვეს არც საერთაშორისო პარტნიორების წარმომადგენლობა, დიპლომატიური კორპუსის წარმომადგენლები. დარბაზში რაც ხდებოდა, ეს ჩემზე კარგად იხილეთ. აქედან გამომდინარე, იქვე მივიღე გადაწყვეტილება, რომ არ მინდა ეს ხალხი გაწვალდეს 29 მაისს.

ნამდვილად არ ღირს, რომ 4-5 საათი ქუჩაში ელოდო წინასწარპროგნოზირებად გადაწყვეტილებას.

ამიტომ გადავწყვიტე არ დავესწრო სასამართლოს. სად ვიქნები ჯერ არ ჩამოვყალიბებულვარ, მაგრამ უახლოეს დღეებში ჩამოვყალიბდები.

დაველოდები სხვა სივრცეში, გეოგრაფიულად სხვა ადგილზე.

• ელოდებით დაკავებას იმავე დღეს?

29 მაისს გასდის ჩემთვის დაკისრებულ გირაოს გადახდას ვადა. ღამის 12 საათამდე მაქვს დრო, წესით და რიგით. გაცხადებული მაქვს და ცნობილია, რომ არ გადავიხდი გირაოს და არც სამი წლის წინ გადავიხადე.

ისინი ალბათ ჩათვლიან, რომ ჩემი არგამოცხადების შემთხვევაში (მათი გადმოსახედიდან), გირაოს პირობები დავარღვიე და რას მოიფიქრებენ ღმერთმა უწყის, მაგრამ მე უფრო მინდა ვიფიქრო იმაზე, ჩვენ რას გავაკეთებთ.

ვფიქრობ, ის ნაბიჯი, რომელსაც ჩვენ ვდგამთ, მორალურად, პოლიტიკურად, სამართლებრივადაც არის გამართლებული, რომ არ მიიღო ივანიშვილის ძალიან ბინძური თამაშის წესები. მორალური უპირატესობით ამ ბრძოლაში ყოფნა, მე პირადად, ყველაზე მნიშვნელოვანი მგონია.

წულუკიანს, უბრალოდ, სურვილი გაუჩნდა, აიღო ტელეფონი და დამიბარა. არ მივიღე მე ეს უსამართლო გამოძახება არალეგიტიმურ პარლამენტში და ამის გამო თუ ციხეში უნდა წავიდეს ხალხი, ვფიქრობ, ეს მხოლოდ გააძლიერებს პროტესტს, რომელშიც ვიმყოფებით თვეებია. ასევე გაზრდის ივანიშვილის საერთაშორისო იზოლაციას. ამაში ვარ დარწმუნებული.

ყასიდადაც ვერ იმართლებს თავს რეჟიმი, შეუძლებელია.

ეს ჩვენი მორალური, პოლიტიკური ვალდებულებაა, რადგან 50-ზე მეტი უკანონო პატიმარია და თითოეულ მათგანს თავისუფლად შეუძლია გირაოს გადახდის პირობებში გამოვიდეს იქიდან… თუ ისინი ითანამშრომლებენ „ოცნების“ ხელისუფლებასთან.

მზია ამაღლობელთან დაკავშირებით მე, პირადად, მოსმენილი მაქვს განცხადება „ოცნების“ მხრიდან, რომ „სულ ოდნავ მაინც მოინანიოს“. იგივე თქვეს სხვა სინდისის პატიმრებთან დაკავშირებითაც, მდინარაძის განცხადება მახსოვს, რომ „მოინანიოს და მე ჩავუდგები თავდებში“.

• თუმცა ესეც არ არის იმის გარანტია, რომ გამოუშვებენ და ჩვენ ვნახეთ ამის მაგალითი. უბრალოდ, აღიარების მიღწევა უნდათ?

რა თქმა უნდა. როცა რეჟიმთან ხარ დაპირისპირებული, მორალურად თუ გატყდი, კომპრომისზე წახვედი, შენი მთავარი ძალა დაასუსტე. ჩემი აზრით, ამ შემთხვევაში ყველა ტიპის ორთაბრძოლას წააგებ.

• როგორ ფიქრობთ, რა ნიშნით არჩევს წულუკიანი, ვინ უნდა დაიბაროს ე.წ. კომისიაზე. რატომ ჯაფარიძე ან თქვენ და არა ვთქვათ ის პირები, ვისაც შესაძლოა უფრო მაღალი თანამდებობა ეკავა წინა ხელისუფლების დროს?

ვერ გეტყვით. ალბათ იქიდან გამომდინარე მიიღეს გადაწყვეტილება, ვინც მიმდინარე პროცესშია აქტიური, ან მომავალში მეტი რესურსი აქვს აქტიურობის.

წარმოუდგენელია, ზურასთან ან ჩემთან დაკავშირებითაც, რადგან 2013 წლიდან გავხდი ოპოზიციური პარტიის წევრი (შევედი ენმ-ში). როგორ შეიძლება ასეთ ადამიანებს დაურეკო, დაიბარო და დაუპირო გამოკითხვა 2004-2012 წლებთან დაკავშირებით.

ეს აბსურდია.

როგორც ჩანს, წულუკიანი ძალიან გაერთო და გადაამლაშა ამ სატელეფონო ზარებით, რადგან თუ დააკვირდებით, ბოლო დროს ისეთს არავის აღარ იბარებენ, ვინც შეიძლება თეორიულადაც კი უარი თქვას კომისიასთან გამოცხადებაზე.

მჯერა, რომ გზადაგზა იღებენ ამ გადაწყვეტილებებს. როცა, მაგალითად, მე 2021 წელს უკვე დაკისრებულ გირაოზე მეორე გირაო დამაკისრეს და როცა ვთქვი, რომ გირაოს არ გადავიხდიდი, გზადაგზა ფიქრობდნენ რა გაეკეთებინათ და მერე მოიქცნენ ისე, როგორც მოიქცნენ. აქაც გზადაგზა მიიღეს გადაწყვეტილება.

უბრალოდ, ისინი ქარაფშუტულად ვარაუდობდნენ, რომ გამოვცხადდებოდით და ჩვენთვის ეს ღირსების აყრის ტოლფასი იქნებოდა.

ალბათ ჩათვალეს, რომ დილემის წინაშე მდგომი სხვადასხვა ადამიანი მაინც თავისუფლებას არჩევდა და გამოცხადდებოდა წულუკიანთან აბსოლუტურად არალეგიტიმურ პარლამენტში, არალეგიტიმურ კომისიაზე.

ასევე ჰქონდათ ბანალური მოტივაცია, რომ ჩვენი იქ მისვლით, პირდაპირ თუ არაპირდაპირ, მათი ლეგიტიმაცია მოხდებოდა, მაშინ, როცა დემოკრატიულმა მსოფლიომ ისინი არ აღიარა და ეს არის ფაქტი.

ამიტომ, რაღაც ხომ უნდა აკეთოს „ქართულმა ოცნებამ“, რადგან 26 ოქტომბერს, ვინც თუნდაც გულწრფელად მისცა მათ ხმა, 7-თვიანი კრიზისისთვის და 50-ზე მეტი პოლიტპატიმრისთვის ხომ არ მიუციათ ხმა? არც „ოცნებაა“ კომფორტულ მდგომარეობაში მათი ამომრჩევლის წინაშე – მათი ამომრჩევლის ნახევარი დასავლურად არის განწყობილი.

ისინი რატომღაც ისევ ელიან, რომ აშშ-სთან ურთიერთობა დარეგულირდება – ივანიშვილმა, კობახიძემ და სხვებმა უთხრეს, რომ დაარეგულირებენ.

მაგრამ რაც დრო გადის, მით უფრო რწმუნდება ბევრი, რომ ეს ფუჭი იმედია. შესაბამისად, რაღაც ხომ უნდა აკეთოს „ოცნებამ“, როცა თითქმის 200 დღეა უწყვეტი პროტესტია.

• რუსული კანონის მიღების პირველი მცდელობიდან მოყოლებული საზოგადოება მათ ადანაშაულებდა სამშობლოს ინტერესების ღალატში და ძალიან ხშირად ესმოდათ მათ სიტყვა „მოღალატე“. როგორც ფიქრობთ, აქედან ყურადღების გადატანას ხომ არ ემსახურება ეს კომისია და რამდენად ახერხებენ ამას?

ისინი ცდილობენ, პოლიტიკური დღის წესრიგი არ იყოს პროტესტის ხელში, რადგან ქვეყანაში დღის წესრიგი არის რუსთაველზე მიმდინარე პროტესტის ხელში.

ყველა ჩვენი პარტნიორი სახელმწიფოს წარმომადგენლები, რომლებიც წლებია საქართველოს საუკეთესო ქომაგები არიან, სულ უფრო მეტად ფხიზლდებიან.

ამიტომ, მათთვის ეს იყო მოჯადოებული წრე, რომელიც უნდა გაერღვიათ და ეს კომისია წესრიგს შექმნიდა – წარმოაჩენდნენ 20 წლის წინანდელ გადაცდომებს თუ დანაშაულებს.

მაგრამ 3 და 4 წლის წინ რომ დანაშაული მოხდა, საზოგადოებას ესეც აინტერესებს ხომ?

რამდენად დიდი ცინიზმია, როცა კომისიაზე მიჰყავთ ის ხალხი, ვინც სამართალი დღემდე ვერ იპოვა „ქართული ოცნების“ პირობებში და რამდენიმე მათგანმა ეს „ზეიმი“ წულუკიანს გაუფუჭა კიდეც პირდაპირ ეთერში.

ეს ყველაფერი, თავიდან ბოლომდე არის ალტერნატიული დღის წესრიგის შექმნის ძალიან უსუსური მცდელობა. საბოლოო ჯამში, ეს მათთვის შედეგის მომცემი არ იქნება.

მოხდა ის, რაც ამ ქვეყანაში არასდროს მომხდარა. თითქმის 200 დღეა ქვეყანაში პროტესტია და არ ჩერდება. სხვადასხვა მასშტაბის, სხვადასხვა სიმძლავრის, მაგრამ პროტესტია ყველგან.

• გუშინ პოლიტიკის ანალიტიკოსი გია ნოდია წერდა, რომ მართალია მორალური მხარე ხალხის და ოპოზიციისკენ არის, მაგრამ რესურსები მაინც რეჟიმის ხელშია. თქვენ როგორ ხედავთ პროცესების განვითარებას?

ეს პროტესტი და საერთაშორისო იზოლაცია უნდა გაძლიერდეს. აშშ-ს როლი, „მეგობარ აქტთან“ დაკავშირებული, იქნება ძალიან მნიშვნელოვანი.

ამ პროტესტს უნდა შევმატოთ თანმიმდევრულობა, დისციპლინირებული მოქმედება და მკაფიოობა. განსაკუთრებით პოლიტიკურმა პარტიებმა. სიცხადე ყველა საკითხში.

აი, მაგალითად, 26 მაისს, საზოგადოების საპროტესტო ნაწილმა, მთლიანად საზოგადოებამ აუცილებელია იცოდეს, რომ ე.წ. არჩევნებად წოდებულ თვითმმართველობის არჩევნებზე მონაწილეობას არავინ არ იღებს.

საზოგადოებას აქვს გაორების განცდა. ის შენ გიყურებს, როგორც პოლიტიკურ ძალას, რომელიც უშვებს, რომ შენ შეიძლება შეხვიდე ივანიშვილის მიერ დანიშნულ, უთანასწორო, უსამართლო საარჩევნო პროცესში და ბოლომდე ვერ გენდობა, ეს ამუხრუჭებს საპროტესტო მოძრაობას.

ამიტომ ამ საკითხში უნდა იყოს სრული მკაფიოობა, სიცხადე.

როდესაც პოლიტიკური პარტიები არ შევიდნენ „ოცნების“ პარლამენტში, ბოიკოტი გამოაცხადეს, განსხვავებით 2021 წლისგან, საზოგადოებამ ჩათვალა, რომ ღირს ბრძოლა.

იზრდება საერთაშორისო მხარდაჭერაც, მაგრამ თუ შენ რეჟიმისთვის პროცესის ნორმალიზებას მოახდენ, რა თქმა უნდა, ის ბედნიერი იქნება. ამას დარდობს და განიცდის ბევრი ადამიანი.

ამ ეტაპზე არ წყდება ორი სოფლის დამაკავშირებელი გზის შეკეთების საკითხი, რაც არის თვითმმართველობის არჩევნების ბუნება, ზოგადად. ამ ქვეყანაში წყდება ეგზისტენციალური, ცივილიზაციური საკითხი – ჩვენ როგორც ქართველები, როგორც სახელმწიფო, ვიქნებით სუვერენული, თავისუფალი, დასავლური ორიენტაციის, ეროვნული, თუ ვიქნებით რუსული გავლენის ქვეშ.

• აშშ-ის სახელმწიფო მდივნის, მარკო რუბიოს განცხადებაშიც იგრძნობა, რომ ისინი დააკვირდებიან ამ ქვეყანაში მიმდინარე პროცესებს და შემდეგ მიიღებენ გადაწყვეტილებას. პროტესტის გარდა რა არის გასაკეთებელი, საქართველო დასავლეთის მხედველობის არეალიდან რომ არ ამოვარდეს?

მუშაობაა საჭირო ოპოზიციური პარტიების მხრიდან, მაგრამ ამ მუშაობას ფასი არ ექნებოდა, რომ არა პროტესტი და არც რუბიო გააკეთებდა ამ განცხადება.

საბედნიეროდ, აღმოჩნდა ათასობით აქტიური ადამიანი, რომლებიც პრობლემის არსში ერკვევიან. არიან მეამბოხე ადამიანები, რომლებიც თავიანთ სიმართლეს იცავენ. ბევრისთვის უიმედო მდგომარეობაში მყოფი ქვეყანა, ასეთმა ადამიანებმა გაიყვანეს იმ ეტაპზე, როცა უკვე ხელშესახებია გამარჯვება.

ცხადია, ვაშინგტონის, ბრიუსელის და სხვების მხარდაჭერა მნიშვნელოვანია, მაგრამ ყველამ უნდა დავიჯეროთ, რომ ამ ქვეყნის ბედი გადაწყდება თბილისში. მე მჯერა, რომ ეს ხალხმა ირწმუნა.

თუ გინდა, რომ იყო ევროპული მისწრაფებების სახელმწიფო, შენ, როგორც ერთმა მოქალაქემ უნდა დაიბრუნო რწმენა, რომ შენი ერთი ხმა, ერთი ადამიანის პოზიცია, უმნიშვნელოვანესია.

ივანიშვილის ავტოკრატიულ რეჟიმს უნდა, რომ რუხ ფერებში იყოს ყველაფერი, რომ ადამიანმა თვითრწმენა დაკარგოს და პროცესში მონაწილეობის სურვილი არ ჰქონდეს. სუვერენული სახელმწიფო რა არის, ეს მათ ვერ წარმოუდგენიათ. სუვერენიტეტად მიაჩნიათ ივანიშვილის კარზე მორჩილება.

ხშირად, წარუმატებლობის მაგალითები ადამიანებს დაუწერიათ ისეთ დროს, როდესაც გამარჯვება და წარმატება ძალიან ახლოს იყო, მაგრამ სულ ბოლო მომენტში დანებდნენ. ჩვენ არ გვაქვს უფლება, რომ ამ მაგალითის საესტაფეტო ჯოხი ავიღოთ.

ძალიან ახლოს ვართ წარმატებასთან. უბრალოდ, გამძლეობა და რწმენაა საჭირო, რომ შენ ხარ მთავარი – მოქალაქე. შენზეა დამოკიდებული ეს ქვეყანა როგორ გამოიჭედება. ამ ქვეყნის, სახელმწიფოს ბედის მჭრელი შენ ხარ და არა კობახიძე, ივანიშვილი და ზარქუა.

როგორც ბევრ სხვა პატარა ქალაქში, თელავშიც უწყვეტი პროევროპული აქციები აქვთ მოქალაქეებს. მოთხოვნები აქაც იგივე და უცვლელია – გაათავისუფლონ რეჟიმის ტყვეები და სამართლიან გარემოში ჩატარდეს ხელახალი საპარლამენტო არჩევნები.

როგორ აქ აქციის მონაწილეებმა გვითხრეს, თელავში უწყვეტი პროტესტი 30 ნოემბრის ღამეს დაიწყო, ირაკლი კობახიძის განცხადებიდან ორი დღის შემდეგ, როცა თქვა, რომ „ქართული ოცნება“ ქვეყნის ევროკავშირში გაწევრიანების თაობაზე მოლაპარაკებებს 2028 წლამდე აჩერებს.

სამართალმცოდნე ბელა ბეჟანიშვილი ერთ-ერთია, ვინც ყოველდღიურ საპროტესტო აქციებს უერთდება თელავში. როგორც ბელასგან ვიგებთ, მოქალაქეებმა უწყვეტი პროტესტის თელავში 30 ნოემბერს დაიწყეს და დღემდე გრძელდება.

„ყოველ საღამოს გამოვდივართ ქალაქ თელავის მერიის შენობის წინ და ვაპროტესტებთ იმ უკანონობას, რაც ჩვენს ქვეყანაში ხდება. რა თქმა უნდა, სოლიდარობა, პირველ რიგში, ჩვენს პოლიტპატიმრებს, საქართველოს მომავლისთვის შეწირულ ახალგაზრდებს, რომლებიც ჩაყარეს ციხეში. არ ვაღიარებთ ამ არჩევნებს და ვითხოვთ ხელახალ არჩევნებს. ჩვენს საპროტესტო ბანერებზე სწორედ ეს მოთხოვნები გვაქვს დატანილი. სოლიდარობას ვუცხადებთ ჟურნალისტ მზია ამაღლობელს.

ერთობისკენ მოვუწოდებთ და ყოველთვის ვესაუბრებით. ზამთარი ისე გამოვიარეთ, ერთი დღე არ ჩაგვიგდია თელავში და არც ერთხელ გვქონია შიშის შეგრძნება, ფიქრი, რომ ამა თუ იმ მიზეზის გამო შეგვეწყვიტა პროტესტი. ამდენი პოლიცია გვახვევია გარს, ყოველ საღამოს ფოტოებს გვიღებენ და კი ვართ საშიშროების წინაშე, ე.წ. ტიტუშკებიც კი მოგვიგზავნეს, საკმაოდ აგრესიულად შემოვიდნენ, მაგრამ… წავიდნენ. არ ვიცი რა იყო ეს, ალბათ მცდელობა, რომ შევჩერებულიყავით, შეგვშინებოდა, აღარ გამოვსულიყავით გასაპროტესტებლად, მაგრამ ეს ვერ მიიღეს. გუნდში ერთობაა და გვაქვს ერთი მიზანი – სამშობლოს სადარაჯოზე ბოლომდე, გამარჯვებამდე, სანამ ჩვენს მიზანს არ მივაღწევთ“, – გვეუბნება ბელა ბეჟანიშვილი.

მოქალაქის თქმით, ყოველ ახალ დღეს, აქციაზე გასასვლელად ისე ემზადება, როგორც სამსახურში წასვლის წინ  – „უნდა მოვწესრიგდე, ჩავიცვა, წავიდე და შევასრულო ჩემზე დაკისრებული მოვალეობა. აი, ეს შეგრძნება ჩამომიყალიბდა – უნდა მივიდე, არ უნდა გავჩერდე, ყველამ ერთად უნდა გავაჟღეროთ ის პრობლემები, რაც დღეს ქვეყანაშია. ეს ჩემთვის უკვე აუცილებელია, რომ ყოველ ახალ დღეს ისევ და ისევ შევუერთდე პროტესტს“, – გვიზიარებს ბელა ბეჟანიშვილი.

მისი თქმით, თბილისსა და ყველა სხვა რეგიონში, „პროტესტის გული ერთნაირად ცემს“ და განსხვავება მხოლოდ პროტესტში მონაწილე მოქალაქეების რაოდენობაა. „მცირე რაოდენობით ვიკრიბებით თელავში, თუმცა აქციების უწყვეტობას ვინარჩუნებთ, რაც ჩვენთვის ძალიან საამაყოა. ჩვენი აქ დგომა, ვფიქრობ, რომ ამ დიდ საქმეში ერთი აგურის დადებაა. აქცია არ უნდა იყოს მხოლოდ თბილისში, უნდა იყოს ყველგან, ყველა ქალაქში, რომ დაფიქსირდეს საქართველოს და მსოფლიოს მასშტაბით – ქვეყნის ყველა რეგიონში ვართ უკმაყოფილო შექმნილი მდგომარეობით, ამიტომ ყველგან უნდა გამოვიდეთ და ვთქვათ ჩვენი სათქმელი.

მინდა ვუთხრა ყველა თანამებრძოლს, ვინც სხვა ქალაქებსა და რეგიონებში აპროტესტებს – გაუძელით! ბევრს ავიტანთ, ბევრს გავიტანთ ჩვენი სამშობლოს გულისთვის. არ შევშინდეთ, არ შევდრკეთ და ვიბრძოლოთ ბოლომდე ყველა ერთად და ერთი ყველასთვის“, –  ამბობს ბელა და ამ გზავნილით ასრულებს ჩვენთან საუბარს.

თელავში ყოველდღიურ საპროტესტო აქციაზე დგას ივანე დემინაშვილი. მან პროტესტი გასული წლის 27 ოქტომბერს, ქვეყანაში ჩატარებული საპარლამენტო არჩევნების მეორე დღეს დაიწყო და აქედან მოყოლებული, ივანე დემინაშვილი პროტესტის ნიშნად არ იჭრის თმასა და წვერს.

„დამკვირვებელი ვიყავი საარჩევნო უბანზე და რაც ვნახე, ეს იყო ყველაფერი, გარდა არჩევნებისა და მით უმეტეს სამართლიანი არჩევნებისა.

50-100 ლარად გაიყიდა ხმები…

აუცილებელია პროტესტი, გინდაც ერთი კაცი იდგეს – ჩემთვის ეს იმედის მომცემია. მე პატარა ბავშვი არ ვარ, 59 წლის ვარ. ჩემს შვილებს ჰქვიათ ზვიადი და მერაბი, თქვენ როგორ წარმოგიდგენიათ, მე რუსეთში? ეს არის ჩემთვის კატასტროფა, წითელი ხაზი. 2012 წელს რომ ვიძახდი, „ჩვენ უბედურებაში“ შევდივართ, არ დამიჯერეს სამწუხაროდ და აი, ამ უბედურებაში ამოვყავით თავი ყველამ ერთად.

პროტესტის შეწყვეტის შემთხვევაში გავხდებით მეორე ჩეჩნეთის რესპუბლიკა. არავითარი ბელარუსი… რაც არის ჩეჩნეთში, როგორც მართავენ კრიმინალები, მაფიოზური კლანი [რესპუბლიკას], ანალოგიურად იქნება აქ.

მე ვიმალებოდი, როცა მხედრიონი დამდევდა, ტყეში, ღრეში… თუ აქამდე მალავდა [„ქართული ოცნება“] და შენიღბულად აკეთებდა, ახლა პირდაპირ ლაპარაკობენ, რომ რუსეთი კარგია თურმე…

„ყურძენი სად გავასაღოს“ იქეთ კაცს რომ არაფერი ეყურება, არ ფიქრობს სად მოხვდება იმისი შვილი და შვილიშვილი, არ ვიცი, რაღა უნდა ვთქვა“, – გვეუბნება ივანე დემინაშვილი.

კაცის თქმით, თელავის აქციებს სხვადასხვა დღეს სხვადასხვა რაოდენობის მოქალაქეები უერთდებიან და ამიტომ, რთულია თქვა „რამდენი?“ – „ზოგს ეშინია, ხელფასი რომ არ დაკარგოს და ამის გულისთვის არ გამოდის.

ახლა ენის მოჩლექით ვეღარავის დავუწყებ მე ლაპარაკს… წინააღმდეგობა თუ არ ვისწავლეთ, ჩვენ ერთ წრეზე ვიტრიალებთ.

მზია ამაღლობელის საქმე რომ ავიღოთ, როცა იქნება, [ირაკლი დგებუაძემ], როგორც პოლიციელმა კი არა, როგორც მოქალაქემ, როგორ უნდა იცხოვროს საქართველოში?

მე მრცხვენია მის მაგივრად, როგორც კაცს. წავა ეს ხელისუფლება, მოვა ახალი, მაგრამ თვითონ როგორ უნდა იცხოვროს აქ? ძალიან უხერხულია.

2024 წლის 26 ოქტომბერს ვთქვი, ვინც „ქართულ ოცნებას“ ხმას მისცემს, ჩემს ოჯახში ვეღარ შემოვა. საკუთარი ძმაც რომ ყოფილიყო – გვეუბნება ივანე დემინაშვილი და ჩვენთან საუბრის ბოლოს თანამებრძოლებს მიმართავს საქართველოს სხვადასხვა წერტილში: „ყველა მეამაყებით. თქვენ ხართ პატრიოტი ადამიანები… ზეპირად ვიცი რომელ ქალაქებსა და მუნიციპალიტეტებშია პროტესტი“.

თელავში პროტესტის მონაწილე მოქალაქეები ადგილობრივი პროტესტის შესახებ ინფორმაციას, ფოტოსა და ვიდეოს აზიარებენ ფეისბუქ ჯგუფში – თელავი დემოკრატიისთვის 

___

ამავე თემაზე: