26 მაისი საქართველოს დამოუკიდებლობის დღეა.
ხვალ საქართველოში ამ დღესთან დაკავშირებით, დაგეგმილია მასშტაბური საპროტესტო აქციები.
26 მაისთან დაკავშირებული აქტივობები დაგეგმილია ბათუმშიც.
3 საათზე (კარფურთან ხიდზე) გადმოიფინება ბანერი – „დაიცავი დამოუკიდებლობა“.
19:00 საათიდან დაიწყება შეკრება საკონსტიტუციო სასამართლოსთან, სადაც 20:00 საათისთვის გაიმართება საჯარო ლექცია საქართველოს დამოუკიდებლობაზე და ისტორიულ ასპექტებზე.
დაგეგმილია ასევე მსვლელობა „ბათუმელების“ რედაქციისკენ, სადაც აქციის მონაწილეები გამოხატავენ სოლიდარობას „ბათუმელების“ დამფუძნებლის, მზია ამაღლობელის და სხვა 50-ზე მეტი სინდისის პატიმრის მიმართ, რომლებიც „ქართული ოცნების“ რეპრესიული ხელისუფლების ტყვეობაში იმყოფებიან.
საზოგადოების ძალიან დიდი ნაწილი მიიჩნევს, რომ საქართველოს სუვერენიტეტი და თავისუფლება დღესაც ისევე დასაცავია რუსული რეჟიმისგან, როგორც წლების წინ, როცა საბჭოთა რუსეთის მიერ საქართველოს ანექსია მოხდა.
დღესაც, როცა საქართველო ევროკავშირის კანდიდატი ქვეყანაა, რუსული რეჟიმი საფრთხეს უქმნის საქართველოს დამოუკიდებლობას და ჰიბრიდული ომით ცდილობს შეაჩეროს ჩვენი ქვეყნის ევროინტეგრაცია, „ქართული ოცნების“ ხელისუფლების დახმარებით.
2024 წლის 26 ოქტომბრის საპარლამენტო არჩევნების შედეგები არ აღიარა საქართველოს მოსახლეობამ. არჩევნები არც საქართველოს მეგობარმა ქვეყნებმა აღიარეს, რადგან მიიჩნევენ, რომ დაირღვა საყოველთაობის და ფარულობის პრინციპი.
არჩევნების შემდეგ, „ქართული ოცნების“ არალეგიტიმურმა პრემიერ-მინისტრმა ირაკლი კობახიძემ განაცხადა, რომ აჩერებენ ევროინტეგრაციის პროცესს, რასაც ხალხმრავალი საპროტესტო აქციები მოჰყვა.
მეშვიდე თვეა ქვეყანაში პროტესტი არ წყდება. „ოცნების“ ხელისუფლება პოლიციისა და შავნიღბიანების ძალით ცდილობს პროტესტის ჩახშობას, აპატიმრებენ ოპოზიციური პარტიების ლიდერებს, სამოქალაქო აქტივისტებს, იღებენ რეპრესიულ კანონებს თავისუფალი მედიის, არასამთავრობო ორგანიზაციების, სიტყვისა და გამოხატვის თავისუფლების წინააღმდეგ, თუმცა პროტესტი არ ჩერდება.
მთავარი მოთხოვნებია – დაინიშნოს ახალი არჩევნები სამართლიან და თანასწორ გარემოში, გათავისუფლდნენ სინდისის პატიმრები.
