„ოცნების“ პარლამენტის თავმჯდომარე, შალვა პაპუაშვილი კვლავ აკრიტიკებს გერმანიის ელჩს საქართველოში, პეტერ ფიშერს.
ამჯერად პაპუაშვილი უკმაყოფილოა, რომ პეტერ ფიშერი ჟურნალისტისა და მედიამენეჯერის, მზია ამაღლობელის სასამართლო პროცესს დაესწრო ბათუმში და „ბათუმელებს“ ინტერვიუ მისცა პლაკატის ფონზე – „თავისუფლება მზიას“.
მცდარია პაპუაშვილის განცხადება, რომ „გერმანიის ელჩი კონკრეტული გზავნილების გადმოსაცემად მხატვრულ მეთოდებს იყენებს და შერჩეული ფონის მეშვეობით გვესაუბრება“.
პეტერ ფიშერთან ინტერვიუ „ბათუმელებმა“ რედაქციის ოფისში, საკონფერენციო დარბაზში ჩაწერა, სადაც მზია ამაღლობელის დაკავების შემდეგ, ანუ 4 თვეა ეს პლაკატია გაკრული და ყველა ოფიციალური ინტერვიუ „ბათუმელებში“ სწორედ ამ პლაკატის ფონზე იწერება.
„თავისუფლება მზიას“ არის „ბათუმელების“ განაცხადი უკანონო პატიმრობაში მყოფი ჟურნალისტისა და მედიამენეჯერის, მზია ამაღლობელის გათავისუფლების მოთხოვნით. ამ პლაკატის ფონზე „ბათუმელებმა“ არაერთი ინტერვიუ ჩაწერა.
ამავე დროს პაპუაშვილი ელჩს ადანაშაულებს სასამართლოზე ზეწოლაშიც, იმის გამო, რომ პეტერ ფიშერი ბათუმში ესწრებოდა მზია ამაღლობელის სასამართლო პროცესს.
„იმ ფონზე, რომ ელჩმა ქართული არ იცის და დარბაზშიც არავინ უთარგმნიდა, ცხადია, რომ ამ „დაკვირვების“ მიზანი არა პროცესის მსვლელობის დეტალების გაგება იყო, არამდე მოსამართლისთვის განწყობის ჩვენება, რომ მას „დიდი ძმა“ აკვირდება და თუ ის სასურველ გადაწყვეტილებას არ მიიღებს, შედეგსაც მოიმკის. მით უმეტეს, რომ გერმანიის ელჩს გვერდით ესტონელი კოლეგა ეჯდა, რომლის მთავრობამაც სწორედ ამ მოსამართლეს ესტონეთში შესვლა აუკრძალა, ესტონეთის მთავრობისთვის სასურველი გადაწყვეტილებების არმიღების გამო. რა თქმა უნდა, როგორც პროცესზე ამგვარი “თვალთვალი”, ისე გერმანიის ელჩის ამ ლოზუნგის ფონზე გამოჩენა მართლმსაჯულებაზე ზეწოლაა, რაც დიპლომატიური ურთიერთობების შესახებ ვენის კონვენციის ცალსახა დარღვევაა“, – წერს პაპუაშვილი.
შალვა პაპუაშვილის მიერ გავრცელებული ეს ინფორმაცია არ შეესაბამება სინამდვილეს, რადგან გერმანიის ელჩს, ისევე როგორც შვედეთისა და ესტონეთის ელჩებს, რომლებიც 16 მაისს სასამართლო პროცესს ესწრებოდნენ, მთელი სასამართლოს მიმდინარეობის განმავლობაში მიეწოდებოდათ სინქრონული, წერილობითი თარგმანი, რადგან სასამართლო დარბაზში ხმამაღალი თარგმანი გამოიწვევდა ხმაურს და შეაფერხებდა სასამართლო სხდომას.
შესაბამისად, პაპუაშვილის ეს განცხადება არ შეესაბამება სინამდვილეს.
გერმანიის ელჩის კრიტიკის ფონზე პროფესიით იურისტი შალვა პაპუაშვილი არ იმჩნევს „ოცნების“ პრემიერი, ასევე პროფესიით იურისტი ირაკლი კობახიძე როგორ არღვევს მზია ამაღლობელის უდანაშაულობის პრეზუმფციას ყველა ჯერზე, როცა მზია ამაღლობელის საქმეს ახსენებს და მეტიც – კობახიძე დეზინფორმაციას ავრცელებს მზია ამაღლობელზე.
ეს პირველი შემთხვევა არ არის, როდესაც შალვა პაპუაშვილი გერმანიის ელჩს, პეტერ ფიშერს აკრიტიკებს. 2025 წლის 16 მაისს პაპუაშვილს არ მოეწონა გერმანიის ელჩის განცხადება – „თუ გსურთ შეუერთდეთ ისეთ ორგანიზაციას, როგორიცაა ევროკავშირი, არ არის კარგი იდეა მასზე ასე ცუდად საუბარი“.
პაპუაშვილმა ფეისბუქზე დაწერა, რომ ესაა „საბჭოური აზროვნება“.
სქრინი პაპუაშვილის ოფიციალური ფეისბუქგვერდიდან
გერმანიის ელჩი პეტერ ფიშერი გასულ კვირას სამთავრობო, პროპაგანდისტული მედიის, „იმედის“ სამიზნეც გახდა. ბათუმში ჩამოსულ ელჩზე, რომელიც მედიას და არასამთავრობო სექტორს შეხვდა რეგიონში, „იმედმა“ პროპაგანდისტული სიუჟეტი მოამზადა, თითქოს პეტერ ფიშერი ბათუმში „ინსტრუქციას აძლევდა რადიკალურ ოპოზიციას“.
პეტერ ფიშერმა ბათუმში ყოფნისას, მზია ამაღლობელის სასამართლო პროცესის გასაშუქებლად მოსულ „იმედის“ გადამღებ ჯგუფს თავად ჰკითხა, რატომ გაავრცელეს ყალბი ინფორმაცია. ელჩის შეკითხვა უპასუხოდ დარჩა.
ამავე თემაზე:
ინტერვიუ გერმანიის ელჩთან, რომელიც „ბათუმელების“ საკონფერენციო დარბაზშია ჩაწერილი.
