დღეს, 26 ნოემბერს, საქართველოს კონსტიტუციის დარღვევით, გაიმართა აჭარის ავტონომიური რესპუბლიკის ახალარჩეული უმაღლესი საბჭოს პირველი სხდომა. სხდომაზე სცნეს უსკოს შემაჯამებელი ოქმის მიხედვით არჩეული დეპუტატების უფლებამოსილება.
26 ნოემბერს გამართულ უმაღლესი საბჭოს სხდომას არ ესწრებოდა არცერთი ოპოზიციური პარტია და „ქართული ოცნების“ დეპუტატები სხდომათა დარბაზში მარტო იყვნენ. ოპოზიციური პარტიები არ ცნობენ 26 ოქტომბრის არჩევნების შედეგებს, თვლიან, რომ ხმები მოპარულია, არჩევნები გაყალბებულია, ამიტომ არ აპირებენ მანდატების მიღებას.
აჭარის უმაღლესი საარჩევნო კომისიის შემაჯამებელი ოქმის მიხედვით, 21 სადეპუტატო მანდატიდან 13 მანდატი მიიღო „ქართულმა ოცნებამ“, ხოლო 8 მანდატი მიიღეს ოპოზიციურმა პარტიებმა. კერძოდ, „კოალიცია ცვლილებისთვის გვარამია მელია გირჩი დროა“ – 1 მანდატი; ერთიანობა-ნაციონალური მოძრაობა“ – 4 მანდატი; „ძლიერი საქართველო – ლელო ხალხისთვის, თავისუფლებისთვის“ – 1 მანდატი; „გახარია საქართველოსთვის“ – 2 მანდატი.
დღეიდან აჭარას ანტიკონსტიტუციური უმაღლესი საბჭო ჰყავს, ანტიკონსტიტუციური პარლამენტის მსგავსად.
2024 წლის 26 ოქტომბრის საპარლამენტო და აჭარის უმაღლესი საბჭოს არჩევნების შედეგები საქართველოს პრეზიდენტს გასაჩივრებული აქვს საქართველოს საკონსტიტუციო სასამართლოში.
აჭარის ა/რ უმაღლესი საბჭოს რეგლამენტის 72-ე მუხლის მეხუთე პუნქტის თანახმად, უმაღლესი საბჭოს წევრთა უფლებამოსილების ცნობის თაობაზე უმაღლესი საბჭოს დადგენილებაში არ შეიტანება იმ პირის გვარი, რომლის უმაღლესი საბჭოს წევრად არჩევის კანონიერება გასაჩივრებულია სასამართლოში.
კონსტიტუციონალისტების განმარტებით, საკონსტიტუციო დავის დასრულებამდე პარლამენტის და აჭარის უმაღლესი საბჭოს უფლებამოსილების ცნობა უკანონოა.
26 ნოემბრის სხდომაზე აჭარის ანტიკონსტიტუციური უმაღლესი საბჭოს თავმჯდომარედ „ქართული ოცნების“ 13-მა დეპუტატმა დავით გაბაიძე აირჩია, ხოლო თავმჯდომარის მოადგილედ – რამაზ ჯინჭარაძე.
დღესვე ოპოზიციურმა პარტიებმა განცხადება გააკეთეს და თქვეს, რომ ისინი არ მისცემენ ლეგიტიმაციას “ქართულ ოცნებას”, არ აღიარებენ მიტაცებულ არჩევნებს და არ შევლენ აჭარის უმაღლეს საბჭოში.
