სტუდენტი ლუკა ნაცვლიშვილი, რომელიც ბათუმში 26 მაისს, ღამით, საპროტესტო აქციაზე ადმინისტრაციული წესით დააკავეს, წინასწარი დაკავების იზოლატორში რჩება.
მისი საქმის მასალები შსს-ს ბათუმის საქალაქო სასამართლოსთვის ამ დრომდე არ გადაუცია.
ლუკა ნაცვლიშვილს შს სამინისტრო ადმინისტრაციულ სამართალდარღვევათა კოდექსის 166-ე [წვრილმანი ხულიგნობა] და 173-ე მუხლებით [პოლიციელის შეურაცხყოფა, პოლიციელის კანონის მოთხოვნის დაუმორჩილებლობა] გათვალისწინებულ სამართალდარღვევის ჩადენას ედავება.
ახალგაზრდა იურისტთა ასოციაციის აჭარის ფილიალის ხელმძღვანელი, თამარ წულუკიძე, რომელიც ლუკა ნაცვლიშვილის ინტერესებს იცავს, „ბათუმელებთან“ ამბობს, რომ საქმის მასალები მისთვის ამ დრომდე არ ჩაუბარებიათ, შესაბამისად, ჯერ კიდევ უცნობია, კონკრეტულად რას ედავებიან ლუკა ნაცვლიშვილს.
ასევე უცნობია, გაათავისუფლებენ თუ არა სტუდენტს ხელწერილის საფუძველზე, ვიდრე სასამართლო სხდომა გაიმართება.
წინასწარი დაკავების იზოლატორში ადმინისტრაციული წესით დაკავებული პირი მაქსიმუმ 48 საათი შეიძლება გააჩერონ.
მუხლებში, რომლებითაც შსს-მ ლუკა ნაცვლიშვილის წინააღმდეგ სამართალდარღვევის ოქმები შეადგინა, გაზრდილია პასუხისმგებლობის ზომა, მაგალითად, ასკ-ის 173-ე მუხლი [პოლიციელის შეურაცხყოფა ან წინააღმდეგობის გაწევა] ითვალისწინებს დაჯარიმებას 2 000-იდან 5 000-მდე ლარით ან ადმინისტრაციულ პატიმრობას 60 დღემდე ვადით.
