ნიკა მელია აღკვეთი ღონისძიების სახით პატიმრობის შეფარდებას ვერ გაასაჩივრებს. ასეთია სისხლის სამართლის საპროცესო კოდექსის მოთხოვნა, რადგან საქმე სასამართლოში უკვე არსებითი განხილვის ეტაპზეა. აღკვეთის ღონისძიება მხოლოდ საბოლოო გადაწყვეტილების მიღების შემდეგ შეიძლება გასაჩივრდეს.
„ვფიქრობ, რომ ეს ნორმატიული შინაარსი წინააღმდეგობაშია კონსტიტუციის მოთხოვნებთან, რადგან პირს ეზღუდება გაასაჩივროს ის გადაწყვეტილება, რომლითაც პირს ერთმევა თავისუფლება და პატიმრობაში მიდის,“ – ამბობს ნიკა მელიას ადვოკატი, დიტო საძაგლიშვილი. ის არ გამორიცხავს ამ კუთხით ნიკა მელიამ საკონსტიტუციო სასამართლოს ან ევროსასამართლოს მიმართოს.
„ჯერ პოზიცია ჩამოყალიბებული არ გვაქვს, იმდენად ელვის სისწრაფით ვითარდება მოვლენები, მაგრამ ფაქტია, რომ ეს პრობლემაა,“ – აღნიშნა დიტო საძაგლიშვილმა „ბათუმელებთან“.
გასაჩივრება არა, მაგრამ შესაძლებელია აღკვეთი ღონისძიების გაუქმება, თუკი რომელიმე მხარე მიმართავს იმავე ინსტანციის სასამართლოს და მოთხოვნა დაკმაყოფილდება. ამ ეტაპზე ნიკა მელიას დაცვის მხარეს არ მიუმართავს სასამართლოსთვის აღკვეთი ღონისძიების გაუქმების მოთხოვნით.
___
დღეს, 18 თებერვალს, პრემიერმა გიორგი გახარიამ თანამდებობა დატოვა. მისი თქმით, ნიკა მელიას დაკავების საკითხზე გუნდში აზრთა სხვადასხვაობა იყო. პრემიერის გადადგომის შემდეგ შსს-მ ინფორმაცია გაავრცელა, რომ ნიკა მელიას დაკავება დროებით გადადო.
თბილისის საქალაქო სასამართლომ „ერთიანი ნაციონალური მოძრაობის“ თავმჯდომარეს – ნიკა მელიას აღკვეთის ღონისძიების სახით 17 თებერვალს პატიმრობა შეუფარდა მას შემდეგ, რაც მელიამ პროტესტის ნიშნად უარი თქვა გირაოს გადახდაზე.
