ბათუმის საქალაქო სასამართლოს მოსამართლე გულიკო კაჟაშვილი, რომელმაც დღეს, 27 მაისს, სტუდენტ ლუკა ნაცვლიშვილს 12-დღიანი პატიმრობა შეუფარდა, ბათუმის საქალაქო სასამართლოში 2022 წლიდან მუშაობს.
ამ მოსამართლემ წელს უკვე მეორედ შეუფარდა 19 წლის სტუდენტს, ლუკა ნაცვლიშვილს 12-დღიანი ადმინისტრაციული პატიმრობა.
ლუკა ნაცვლიშვილის საქმე გულიკო კაჟაშვილმა პირველად 2025 წლის 14 იანვარს განიხილა კიდევ ერთ სტუდენტ, ელიზბარ ჩხიკვაძის საქმესთან ერთად. მაშინ აქტივისტ სტუდენტებს შსს პოლიციის კანონიერი მოთხოვნისადმი დაუმორჩილებლობას ედავებოდა და მოსამართლე კაჟაშვილმა ორივე სტუდენტს 12-დღიანი პატიმრობა შეუფარდა.
სწორედ ამ საქმის განხილვის შემდეგ ესტონეთმა გულიკო კაჟაშვილი დაასანქცირა.
დღეს, 27 მაისს, ოთხ თვე-ნახევრის შემდეგ, ბათუმის სასამართლოს დარბაზში კვლავ გულიკო კაჟაშვილმა განიხილა ლუკა ნაცვლიშვილის ადმინისტრაციული საქმე. შსს სტუდენტს კვლავ პოლიციისადმი დაუმორჩილებლობას ედავება და წვრილმან ხულიგნობას. შსს-ს მოწმეები კვლავ პოლიციელები არიან და იგივეა მოსამართლის გადაწყვეტილებაც – 12-დღიანი პატიმრობა ლუკა ნაცვლიშვილს.
საია-ს იურისტის, ირმა აბაშიძის შეფასებით, მოსამართლე გულიკო კაჟაშვილმა ლუკა ნაცვლიშვილის მიმართ დაარღვია სამართლიანი სასამართლოს უფლება, რადგან მან უარი უთხრა დაცვის მხარეს სრული ვიდეო ჩანაწერის მტკიცებულების სახით წარმოდგენაზე. საუბარია ვიდეოზე, რომელზეც ლუკა ნაცვლიშვილის ადმინისტრაციული წესით დაკავებაა ასახული.
გულიკო კაჟაშვილი 36 წლისაა.
მოსამართლედ მუშაობის გარდა, იგი ბათუმის შოთა რუსთაველის უნივერსიტეტში ასწავლის სტუდენტებს.
- ნახეთ ვიდეო 2025 წლის იანვრის არქივიდან: ბათუმის შოთა რუსთაველის უნივერსიტეტის პროფესორის მიმართვა მოსამართლე გულიკო კაჟაშვილს
ოფიციალური ღია წყაროების თანახმად, გულიკო კაჟაშვილმა უმაღლესი განათლება თსუ-ში მიიღო, ასევე, მის ბიოგრაფიაში აღნიშნულია, რომ 2006 წელს დაამთავრა აშშ-ს ჩრდილოეთ კაროლინის ისტ ფორსაისის უმაღლესი სკოლა; 2008 წელს ჩეხეთში, პრაღაში გაიარა სასწავლო კურსი პოლიტიკურ და ეკონომიკურ სწავლებაზე და ასევე, გერმანიაში, ფრანკფურტში გავლილი აქვს სასწავლო კურსი – „ადამიანის უფლებათა დაცვის ევროპული სტანდარტები“.
გულიკო კაჟაშვილი 2013 წლიდან მუშაობს ბათუმში. თავდაპირველად ის ბათუმის საკრებულოს თავმჯდომარის თანაშემწის მოვალეობის შემსრულებლის პოზიციაზე იყო, 2014 წლიდან – საკრებულოს თავმჯდომარის სამდივნოს უფროსის მოვალეობის შემსრულებელი.
გულიკო კაჟაშვილი მუშაობდა ბიზნესშიც – 2015 წლიდან ის კომპანია „გორგიაში“ მთავარი იურისტი იყო, 2019 წლიდან კი – ამავე კომპანიის იურიდიული სამსახურის უფროსი აჭარაში.
გულიკო კაჟაშვილმა ბათუმის საქალაქო სასამართლოში 2022 წელს, იმავე პერიოდში დაიწყო მუშაობა, როცა სასამართლოში მოსამართლედ დაინიშნა ნინო სახელაშვილი, რომელიც მზია ამაღლობელის საქმის მოსამართლეა.
მოსამართლეა გულიკო კაჟაშვილის დაც – ლიანა კაჟაშვილი ის მოსამართლეა, რომელმაც სკანდალური „სკინტლის საქმე“ განიხილა თბილისის საქალაქო სასამართლოში. მან „ქართული ოცნების“ ღიად მხარდამჭერი ბიზნესმენის, ლაშა პაპაშვილის სარჩელი დააკმაყოფილა, რომელიც სკინტლს ძროხებს აჭმევდა და მის სასარგებლოდ მოპასუხეს დაახლოებით 5 მილიონი ლარის გადახდა დააკისრა. ამ საქმეზე ჟურნალისტური გამოძიება „რადიო თავისუფლებამ“ მოამზადა.
ასევე მოსამართლეა გულიკო კაჟაშვილის კიდევ ერთი ნათესავი – მისი დის, ლიანა კაჟაშვილის ქმარი, ამირან ძაბუნიძე 2021 წლიდან უვადოდ არჩეული უზენაესი სასამართლოს მოსამართლეა.
