Batumelebi

დღეს, პირველ ოქტომბერს, „ოცნებამ“ ოფიციალურ ფეისბუქგვერდზე გამოაქვეყნა ბიძინა ივანიშვილის წერილი, რომლითაც ივანიშვილი 2012 წლის საპარლამენტო არჩევნებში „ოცნების“ გამარჯვების 13 წლისთავს ეხმიანება.

ამავე დროს ივანიშვილი წერს, რომ „ფეხი არ უნდა დაგვიცდეს“ და წერს გუნდში „ღალატზეც“:

„კარგად უნდა გავიაზროთ, რომ დღეს კვლავ ბეწვის ხიდზე გავდივართ და არ გვაქვს უფლება, ფეხი დაგვიცდეს. უნდა გვესმოდეს, რომ სუვერენიტეტისა და დამოუკიდებლობისთვის მუდმივ ბრძოლას მუდმივი სიფხიზლე სჭირდება.

რა თქმა უნდა, განვლილ 13 წელიწადში იყო შეცდომებიც, თუმცა, საბედნიეროდ, არა იმ ხარისხის, რომ ჩვენს სახელმწიფოებრიობას თუ ფიზიკურ არსებობას საფრთხე დამუქრებოდა, არა იმ ხარისხის, რომლის გამოსწორება და აღმოფხვრაც შეუძლებელი იქნებოდა.

პირადად ჩემთვის, უმძიმესია, რომ განვლილ წლებში ჩვენი გუნდის შიგნით იყო მუხანათური ღალატიც, რამაც არამხოლოდ „ქართული ოცნება“ დააყენა კრიზისის წინაშე, არამედ, ქართველ ხალხსა და ჩვენს ქვეყანას შეუქმნა განვითარების ტრაექტორიიდან აცდენის, ქვეყნის სათავეში უცხო ინტერესების მორჩილი ძალების დაბრუნების რეალური საფრთხე.

წარსულში ჩვენი გუნდის არაერთმა წევრმა გადაწყვიტა, რომ გავლენიანი უცხო ძალების მორჩილებაში გადასვლას ან ჩვენი მოქალაქეების ინტერესების დაზიანების ხარჯზე პირადი კომფორტისთვის ზრუნვას, მათთვის დიდი სარგებლის მოტანა შეეძლო, შესაბამისად, გუნდისა და ქვეყნის ინტერესების გვერდით გადადებაც ღირდა, თუმცა, ჩვენ ამასაც გავუძელით! ამ პროცესში, ისე, როგორც 2011 წლიდან მოყოლებული, ქართული საზოგადოების, ჩვენი ბრძენი ხალხის გვერდში დგომა მაძლევდა და გვაძლევდა ბრძოლის შემართებას, გვიმყარებდა რწმენას, რომ ყველა სირთულის გადალახვა შეგვეძლო“.

ამავე დროს, ივანიშვილი ახსენებს „გარე მტრებსა“ და „აგენტებს“. „ოცნების“ ლიდერი აგენტებს პირდაპირ უწოდებს ოპოზიციურ პარტიებსა და არასამთავრობო სექტორს:

„…ამ ფონზე, ქვეყნის შიგნით მოქმედი მათი დასაყრდენი აგენტები, რომლებიც ოპოზიციურ პარტიებსა და ე.წ. არასამთავრობო სექტორში უხვად არიან გაბნეული, ერთი შეხედვით დასუსტდნენ, თუმცა, კარგად უნდა გვესმოდეს, რა ძალები ცდილობენ ჩვენი ქვეყნის საკუთარი ინტერესებისთვის დაქვემდებარებას.

მათთვის არანაირ პრობლემას არ წარმოადგენს, ჩვენი მოქალაქეების თვალის ასახვევად, ერთი ცნობადი სახის სხვა ადამიანით, ერთი პარტიის სხვა პარტიით, ან თუნდაც, ერთი ტელევიზიის სხვა ტელევიზიით ჩანაცვლება. მათ შეუძლიათ საქართველოს წინააღმდეგ მოქმედი ახალ-ახალი უცხოელი პოლიტიკოსები, ე.წ. გავლენიანი ექსპერტები გამოიყვანონ სცენაზე, რომლებიც სიცრუეში უკვე მხილებულ, მსგავსი რანგის ადამიანებს ჩაანაცვლებენ, თუმცა, უჭირთ გააზრება, რომ ვეღარ მოგვატყუებენ“ – ვკითხულობთ ივანიშვილის წერილში.

ივანიშვილი საკუთარი გუნდის წარმატებად მიიჩნევს „თავსმოხვეული იდეოლოგიის განეიტრალებას“:

„საზოგადოებასთან ერთად, წარმატებით გავანეიტრალეთ თავსმოხვეული ფსევდოლიბერალური იდეოლოგია, რომელიც დამნაშავე რეჟიმს დემოკრატიის შუქურად წარმოაჩენდა, ხოლო, ჭეშმარიტად დემოკრატიულ ხელისუფლებას დიქტატურას უწოდებს. დღეს ჩვენ აღარ გვეშლება ხარისხობრივი შეფასება იმისა, თუ ვინ მეგობარია და ვინ – მტერი“ – წერს ივანიშვილი.

წერილში მოკლედ აღნიშნულია, რომ ივანიშვილი არავისთან პარტნიორობაზე „უარს არ ამბობს“. ამავე დროს, ვრცელ წერილში ნახსენები არ არის რუსეთი.

„არავისთან პარტნიორობაზე უარს არ ვამბობთ, თუმცა, ეს არ უნდა მოხდეს ჩვენი ქვეყნის სუვერენიტეტის დასუსტების და საქართველოს გამოყენების ხარჯზე. მტკიცედ ვდგავართ პოზიციაზე, რომ პარტნიორობა და მეგობრობა უნდა იყოს ორმხრივი“ – ვკითხულობთ ივანიშვილის წერილში.

წერილი სრულდება 4 ოქტომბრის ადგილობრივი თვითმმართველობის არჩევნებში მონაწილეობისკენ მოწოდებით.

2012 წლის 1-ელ ოქტომბერს საქართველოში გაიმართა საპარლამენტო არჩევნები, რომელშიც ივანიშვილის მიერ დაფუძნებულმა „ოცნებამ“ კოალიციით გაიმარჯვა. „ოცნება“ უკვე 13 წელია მართავს ქვეყანას. ამ პერიოდში ივანიშვილი პოლიტიკიდან ფორმალურად ორჯერ „წავიდა“ და შემდეგ ისევ „დაბრუნდა“, რეალურად კი ბიძინა ივანიშვილი 13 წლის განმავლობაში რჩება ქვეყნის ჩრდილოვან მმართველად.

_____________

ფოტოზე: ბიძინა ივანიშვილი. ფოტო: ევროპის პრესფოტო სააგენტო. EPA-EFE/DAVID MDZINARISHVILI

მარი კაიშაური რვა წელია საფრანგეთში, სტრასბურგში ცხოვრობს ოჯახთან ერთად. მისი თქმით, თუ ქართველმა ხალხმა დაკარგა ევროპაში თავისუფალი მიმოსვლის უფლება, ის დაკარგავს ბევრ სიკეთეს, „პირველ რიგში კი, ჯანდაცვის უფლებას“.

„ბათუმელები“ მარის ვიზალიბერალიზაციის შეჩერების საფრთხეებზე ესაუბრა.

„ცივილურ სამყაროს მოვწყდებით სამუდამოდ.

გარდა ამისა, ძალიან დიდი პრობლემები შეექმნებათ ადამიანებს ჯანდაცვის სფეროში, რადგან ვიზალიბერალიზაციამ ასეულობით ქართველს მისცა შესაძლებლობა, ჩამოსულიყვნენ საფრანგეთში და შეენარჩუნებინათ სიცოცხლე.

გავრილოვის ღამის მერე აქტივისტი გავხდი, ასოციაცია „თამარიელის“ დამფუძნებელი ვარ და სხვა ემიგრანტებთან ერთად ვიბრძვი ჩვენი ქვეყნის ევროპული მომავლისთვის.

საქართველოშიც ადამიანის უფლებების მიმართულებით ვმუშაობდი და ვიცი, რამდენ სფეროში და როგორ ირღვევა მოწყვლადი ჯგუფების უფლებები ჩვენს ქვეყანაში.

 ვიზალიბერალიზაციის დაკარგვა უკიდურეს მდგომარეობამდე მიიყვანს ბევრ ადამიანს ბევრი მიმართულებით. ვერ შეძლებენ მკურნალობას ევროპაში და თუ დაიწყებენ მკურნალობას, ვერ შეძლებს მკურნალობის ბოლომდე მიყვანას, პრობლემა იქნება ზუსტი დიაგნოსტირების, ბევრი სარისკო ოპერაციის წინაშე დადგებიან, რეაბილიტაციაზე აღარ ვლაპარაკობ საერთოდ.

ლეიკემიით და სხვა სიმსივნური დაავადებების მკურნალობა ხომ ისედაც პრობლემაა ჩვენს ქვეყანაში და ადამიანებს აღარ ექნებათ შესაძლებლობა ევროპაში ჩამოვიდნენ სამკურნალოდ.

უამრავი ადამიანი ვიცი, რომელიც მხოლოდ იმიტომ გადარჩა, რომ ევროპაში ჩამოვიდა სამკურნალოდ. სიმსივნურის გარდა, სხვა უამრავი დაავადება არსებობს, რომლის მკურნალობაზეც უბრალოდ აღარ ექნებათ წვდომა ადამიანებს.

ამ ყველაფერს დღეს გვაძლევს ევროპა და ახლა ვკარგავთ ერთი დიქტატორის ხუშტურის და რუსეთის გამო. თვალები უნდა გავახილოთ ყველამ და გავიაზროთ, რომ ევროპის გარეშე ვერ ვიქნებით დაცული საქართველოში.

შეიძლება ვიღაცას შენი გამოხედვა არ მოეწონოს და მარტო ამის გამო დაგიჭირონ, ან ერთი სიტყვის გამო მოგკლან. არაფერი უნდა გაგვიკვირდეს, რადგან სამართალი არ გვაქვს, სასამართლო აღარ არსებობს.

ქალზე ძალადობის პრობლემა ევროპაში ფაქტობრივად აღმოფხვრილია, მაქსიმალურად დაცულია ქალი ოჯახის წევრების ძალადობისგანაც და სხვა ტიპის ძალადობისგანაც, რადგან პრევენციული ზომები მუშაობს. ჩვენთან კი ყველა წითელი ხაზი გადაკვეთილია.

დაუცველი არიან ბავშვები და ხშირად განიცდიან ფსიქოლოგიურ წნეხს. მუდმივი სტრესის ქვეშ ყოფნა კი აავადებს ადამიანებს და თუ ასე დიდხანს გაგრძელდა, ფსიქოლოგიური განადგურებაც გვემუქრება?!

ევროპასთან თავისუფალი მიმოსვლის დაკარგვა მძიმედ აისახება ჩვენზე, ემიგრანტებზეც, რადგან დავკარგავთ კავშირებს ოჯახებთან, ახლობელ ადამიანებთან. პრობლემები შეიქმნება ფულის გადარიცხვებშიც. 90-იანებშიც ემიგრაციამ შეინახა საქართველო და ახლაც ემიგრაცია ინახავს, მაგრამ ევროპას თუ დავშორდებით, ეკონომიკური ურთიერთობებიც გართულდება.

ქართველ ხალხს გენოციდისკენ მიაქანებს „ოცნების“ მთავრობა. პირადი გამდიდრების იქეთ არაფერი ამოძრავებთ, მიტაცებული აქვთ ქვეყანა. 

ევროპაში ვარ ამდენი წელია და ვხედავ რას მაძლევს ის. ეკონომიკური სიკეთეების გარდა მაქვს ადამიანური სიმშვიდე, მყარად და დაცულად ვგრძნობ აქ თავს. ადამიანი ვერ განვითარდება თუ არ აქვს სტაბილურობის და დაცულობის შეგრძნება.

ამიტომ, ჩვენივე მომავლისთვის ჩვენვე უნდა ვიბრძოლოთ. ნუ დაველოდებით სხვას, რადგან მასე ველოდეთ ვიღაცებს და მივიღეთ ბიძინა.

ყველამ ვიპოვოთ საკუთარ თავში პასუხისმგებლობა, ჩვენი მომავალი ჩვენი გადასაწყვეტია. ინდივიდუალური პასუხისმგებლობებია საჭირო და მაქსიმუმი უნდა გავაკეთოთ ჩვენი სახელმწიფოს დასაბრუნებლად“ – ამბობს მარი კაიშაური.

იგი ამბობს, რომ ემიგრანტები ცდილობენ ხმა მიაწვდინონ ევროპის პარლამენტს. არაერთი წერილით თუ პეტიციით მიმართეს აშშ-ის, დიდი ბრიტანეთის მთავრობებს, ევროპარლამენტს და მოითხოვენ, სანქციები დაუწესონ ყველა იმ პირს, რომელიც ხელს უშლის საქართველოს ევროინტეგრაციას და აძლიერებს რუსულ რეჟიმს ქვეყანაში.

„პლატფორმა „ერთობის” ბორდის დამფუძნებელიც ვარ, ვთანამშრომლობ სხვადასხვა ემიგრანტულ ასოციაციებთან, ვცდილობთ ჩავშალოთ თემები და წინ წამოვწიო ყველა მნიშვნელოვანი პრობლემა. ვსაუბრობთ იმაზე, რომ საქართველოში ადამიანის უფლებები დარღვეულია და ქვეყანა მიექანება დიქტატურისკენ.

მართალია, ივანიშვილი და მისი გარემოცვა ცდილობს ყველაფერი მიიტაცოს ჩვენს ქვეყანაში, მაგრამ მიწას ხომ ვერ მიიბამენ სხეულზე? თუ მივაღწევთ იმას, რომ დავიბრუნოთ ქვეყანა, მიტაცებულ მიწა-წყალსაც დავიბრუნებთ. როცა კანონი იმუშავებს და სასამართლო სასამართლოს დაემსგავსება.

საქართველო ჩვენია, მოქალაქეების და არა ერთეულების. არც ივანიშვილის ბაღჩაა, საქართველო სახელმწიფოა და ხალხს გვეკუთვნის“- ამბობს მარი კაიშაური.

მისი თქმით, ივანიშვილის რეჟიმის პირობებში საქართველოში ჩამოსვლას უკვე ვეღარ ახერხებს, რადგან არ არის გამორიცხული რომ დააკავონ.

„თეა წულუკიანი რომ იყო სტრასბურგში, მაშინ აქ ემიგრანტებმა საკადრისი პასუხი გავეცით და არ მივეცით საშუალება თავისუფლად ესეირნათ ქუჩებში. ამის გამო, როგორც ვიცი, მიჩივის წულუკიანი და გამოძიებაც არის დაწყებული. რომ ჩამოვიდე, დარწმუნებული ვარ, დამაკავებენ.

თუმცა არ ვჩერდები, არც მე და არც სხვა ემიგრანტები და ვცდილობთ ყველაფერი გავაკეთოთ აქედან რეჟიმის შესაცვლელად“- გვეუბნება მარი.

საუბარში მარი კაიშაური თვითმმართველობის არჩევნებსაც შეეხო. მისი თქმით, არალეგიტიმური ხელისუფლების მიერ ჩატარებული არჩევნებიც უკანონოა და მასში მონაწილეობა არავინ უნდა მიიღოს.

„თუ ვამბობთ, რომ არალეგიტიმური მთავრობა გვყავს და არ ვაღიარებთ, როგორ შეიძლება მათ მიერ ბაღის გახსნაც კი ლეგიტიმურად ჩავთვალოთ. როცა მათ მიერ ჩატარებულ არჩევნებში შედიხარ, გამოდის, მის აღიარებას უწყობ ხელს.

იმ ხალხს, ვინც არჩევნებში შედის, თუ ქართველობის ოდნავი ნაპერწკალი შერჩათ, მაინც უნდა დადგნენ ხალხის მხარეს და არჩევნებში მონაწილეობის მიუხედავად, გავიდნენ რუსთაველზე.

თუ ეს მომენტი გავუშვით, თუ დავკარგეთ ვიზალიბერალიზაცია, ალბათ საუკუნეები დაგვჭირდება იმისთვის, რომ უკან დავიბრუნოთ ჩვენი საქართველო.

ასმაგად ტრავმულია ჩემი აქ ყოფნა, როცა ვერ ვახერხებ ფიზიკურად მანდ ყოფნას, მაგრამ სულით მანდ ვარ და აქედან ვიბრძვი ჩემი ქვეყნის თავისუფლებისთვის“- ამბობს მარი კაიშაური.

დღეს, 29 სექტემბერს, სტრასბურგში, ევროსაბჭოს საპარლამენტო ასამბლეის შემოდგომის სესიის გახსნაზე დაასახელეს ვაცლავ ჰაველის პრემიის ლაურეატი. ჰაველის პრემია 2025 წელს გადაეცა უკრაინელ ჟურნალისტს, მაქსიმ ბუტკევიჩს, რომელმაც ორ წელიწადზე მეტი გაატარა რუსების პატიმრობაში, სანამ 2024 წლის ოქტომბერში ტყვეთა გაცვლის დროს გაათავისუფლებდნენ.

მაქსიმ ბუტკევიჩთან ერთად ჰაველის პრემიის ფინალისტთა სიაში იყვნენ მზია ამაღლობელი და აზერბაიჯანელი ჟურნალისტი ულვი ჰასანლი.

მზია ამაღლობელს სტრასბურგში მისი ადვოკატი და უფლებადამცველი, მაია მწარიაშვილი წარმოადგენდა, რომელმაც ასამბლეაზე გამართულ ცერემონიაზე მზია ამაღლობელის გზავნილი წაიკითხა და მიმართა ასამბლეას:

„ვაცლავ ჰაველის სახელობის პრიზის ნომინანტებს შორის დასახელება უდიდესი პატივია, პატივი მორალური გამბედაობისთვის, სიმართლისთვის, წინააღმდეგობის ძალისთვის, მაგრამ ის ასევე არის სიგნალი, საგანგაშო სიგნალი, რომ ჩემს ქვეყანაში, მზიას ქვეყანაში, ყველაფერი რიგზე არ არის. უფრო სწორად, კი ძალიან ცუდად არის.

დღეს, 50 წლის ასაკში, მზია საკუთარ ქვეყანაში სინდისის პატიმარია. ის, ამავდროულად პოლიტიკური დევნის ობიექტიცაა.

მან არ დაიბრალა, რაც არ ჩაუდენია.

მან არ მიიღო შეთავაზება საპროცესო შეთანხმებაზე, თავისუფლების სანაცვლოდ.

მან თქვა, რომ არ ითამაშებდა რეჟიმის წესებით და არც ითამაშა.

მზიას საქმის დამკვეთებმა და შემსრულებლებმა სცადეს, ის ექციათ სიჩუმის, მორჩილებისა და სინანულის სიმბოლოდ, მაგრამ ის იქცა სიმამაცის ხმად.

მზიას ბრძოლა განასახიერებს ბრძოლას იმ ინსტრუმენტებით, რომლებიც თავისუფალ საზოგადოებას აყალიბებს: ესაა სიტყვა, საჯაროობა, პრინციპულობა, კანონის წინაშე თანასწორობა და კანონისადმი მორჩილება, მაგრამ არა შეგუება უსამართლობასთან.

პატივცემულო ასამბლეის წევრებო,

გთხოვთ, არ დაივიწყოთ, რომ მზია კვლავ უკანონო პატიმარია, უფრო სწორად კი მძევალია. მას თითქმის სრულად აქვს დაკარგული მხედველობა. დღეში მხოლოდ რამდენიმე გვერდის წაკითხვა შეუძლია, ამიტომ ძირითადად წერს“ – განაცხადა მაია მწარიაშვილმა. 

მან ასამბლეაზე მზია ამაღლობელის წერილი წაიკითხა და დასასრულს თქვა:

„ვიდრე მზიას ხმა ამ დარბაზსა და სხვა დარბაზებში გაისმის, კვლავაც არსებობს იმედი იმისა, რომ ციხე არ გახდება ის ადგილი, სადაც მზიასა და სხვების ხმას დაადუმებენ.

თუმცა, თუკი დადუმდება სასამართლო დარბაზები, თუკი გაქრება კრიტიკული მედია, თუკი დამოუკიდებელი ადვოკატები და უფლებადამცველები აღარ იარსებებენ და თუკი მათ, ვინც მიიღო გადაწყვეტილება მზიას საპატიმროში გამოკეტვის შესახებ, ირწმუნეს, რომ ცივილიზებული მსოფლიო მათ თვალს არ ადევნებს, და მართლმსაჯულების გამრუდება დაუსჯელია, მაშინ ვშიშობ, ციხე იქცევა იმ ადგილად, საიდანაც აქ, ევროპაში ხმა ვეღარ მოაღწევს.

არ დაუშვათ ეს“.

„ბათუმელებისა“ და „ნეტგაზეთის“ დამფუძნებელი, ჟურნალისტი და მედიამენეჯერი მზია ამაღლობელი 261 დღეა უკანონო პატიმარია.

ამავე თემაზე: 

„ფიშერის განცხადებები გულზე ხვდებათ „ქართული ოცნების“ წარმომადგენლებს. მეორე მხრივ, საქართველოს სამოქალაქო საზოგადოება გრძნობს გერმანიის ძლიერ მხარდაჭერას. ეს ძალიან მნიშვნელოვანია, როცა ჩვენ ამ სიტუაციაში და ამ დაპირისპირებაში არ ვართ მიტოვებული „ქართული ოცნების“ ამარა და რომ ქართველ ხალხს, საქართველოს სამოქალაქო საზოგადოებას, ჰყავს ძალიან ძლიერი მოკავშირე და ისტორიული, ტრადიციული მეგობარი გერმანიის სახით,“ – ამბობს ანალიტიკოსი ზაალ ანდრონიკაშვილი. მას ვესაუბრეთ თემაზე – რატომ ესხმის თავს „ქართული ოცნება“ გერმანიის ელჩს.

რატომ არის პეტერ ფიშერი „ოცნების“ განსაკუთრებული სამიზნე? – პოლიტიკის ანალიტიკოსის აზრით, „ოცნება“ მოქმედებს რუსეთის დაკვეთით და აკეთებს ყველაფერს, რომ საქართველოს ევროპაში მეგობრები აღარ ჰყავდეს.

ზაალ ანდრონიკაშვილის დაკვირვებით, მნიშვნელოვანია ელჩის, პეტერ ფიშერის პერსონალური გამბედაობა, თუმცა „ეს არის პირდაპირი გამოხატულება გერმანიის საგარეო პოლიტიკისა საქართველოს მიმართ… პეტერ ფიშერის ზურგს უკან დგას გერმანიის საგარეო საქმეთა სამინისტრო, გერმანიის საგარეო პოლიტიკა – სრულიად გამიზნული და მიზანდასახული,“ – ამბობს ზაალ ანდრონიკაშვილი.

• ბატონო ზაალ, თქვენი აზრით, რატომაა გერმანიის ელჩი პეტერ ფიშერი „ოცნების“ არალეგიტიმური მთავრობის განსაკუთრებული სამიზნე? 28 სექტემბერს თბილისში გაიმართა უშუალოდ ელჩის მხარდასაჭერი და ქართულ-გერმანული მეგობრობის მარში. 

მინდა სრული სოლიდარობა გამოვუცხადო მარშს და გერმანიის ელჩს, რომელიც მართლა ძალიან დიდ საქმეს აკეთებს და ძალიან დიდ მეგობრობას უწევს საქართველოს, განსაკუთრებით ამ ძალიან რთულ პერიოდში.

„ქართული ოცნების“ რამდენიმე ფიგურა, როგორც იცით, გერმანიასთან არის დაკავშირებული, მათ დაიცვეს დისერტაციები გერმანიაში და, როგორც ჩანს, ჰქონდათ ამის იმედი, რომ შეძლებდნენ გერმანია დაერწმუნებინათ თავიანთი პოლიტიკური კურსის სისწორეში.

ალბათ გემახსოვრებათ კობახიძის ვიზიტი გერმანიაში, როდესაც ის ჯერ კიდევ 2 წლის წინ ცდილობდა დაერწმუნებინა მაშინდელი კანცლერი იმაში, რომ ე.წ. კანონი გამჭვირვალობის შესახებ, რომელიც გერმანიასაც მიაჩნდა არამართებულად, თითქოს არანაირ საფრთხეს არ უქმნიდა საქართველოს სამოქალაქო საზოგადოებას, მაგრამ გერმანიის ამაში დარწმუნება კობახიძემ ვერ შეძლო.

გემახსოვრებათ ისიც, რომ მკვეთრად შეიცვალა საქართველოს ამჟამინდელი მთავრობის დამოკიდებულება გერმანიის მიმართ. დაიწყო თავდასხმები გერმანიის ელჩზეც და ივანიშვილის პრემიერ-მინისტრმა კობახიძემ რამდენჯერმე უწოდა გერმანიის ელჩს საქართველოში „ეგრეთ წოდებული ელჩი“.

არამეგობრული ნაბიჯებისა და ძალიან არამეგობრული რიტორიკის მთელი კასკადი, როგორც „ქართული ოცნების“ წამყვანი პოლიტიკური ფიგურებისგან, ასევე, შედარებით მეორე რანგის პოლიტიკოსების მხრიდანაც დამთავრდა იმით, რომ გერმანიის ელჩი დაიბარეს საგარეო საქმეთა სამინისტროში.

გერმანიის საგარეო საქმეთა სამინისტრომ ძალიან მკაფიოდ დააფიქსირა თავისი პოზიცია ამასთან დაკავშირებით – ეს არის არამეგობრული ნაბიჯი, ანუ ეს არის დიპლომატიურ ენაზე სანქცია, რომელიც მიმართულია, როგორც წესი, არამეგობრულად განწყობილი ქვეყნების მიმართ. შესაბამისად, გერმანიის საგარეო საქმეთა სამინისტრომ ეს შეაფასა, როგორც არამეგობრული ნაბიჯი გერმანიის მიმართ და ამავდროულად სრული მხარდაჭერა გამოუცხადა გერმანიის ელჩს.

გერმანიის საგარეო საქმეთა სამინისტრომ უარყო სამთავრობო პარტია „ქართული ოცნების“ სტაბილურად აგრესიული რიტორიკა საქართველოში გერმანიის ელჩის მიმართ. გერმანიის საგარეო საქმეთა სამინისტრომ აღნიშნა, რომ ელჩი წარმოადგენს ფედერალური მთავრობის პოზიციას და ის ვენის კონვენციასთან სრულ შესაბამისობაში მოქმედებს.

ევროკავშირის ელჩის მიმართაც კეთდება „ქართული ოცნების“ მხრიდან მსგავსი განცხადებები, ასევე ბრიტანეთის ელჩის მიმართ, რომელიც არ არის ევროკავშირის წევრი, მაგრამ მნიშვნელოვანი ქვეყანაა და ისიც დაიბარეს საგარეო უწყებაში…

ეს ნაბიჯები პირდაპირი გამოხატულებაა „ქართული ოცნების“ ანტიევროპული პოლიტიკისა. ჩვენ არ უნდა შევაფასოთ ეს, როგორც მათი პოლიტიკის მარცხი ან ჩავარდნა, არამედ პირდაპირ შეგვიძლია შევაფასოთ, როგორც „ქართული ოცნების“ მიზანმიმართული პოლიტიკა – საქართველო მთლიანად მოსწყვიტოს ევროპას.

• ევროპულ ქვეყნებს შორის განსაკუთრებული სამიზნე არიან „ოცნებისთვის“ გერმანიის და ევროკავშირის ელჩები, ასევე საფრანგეთის უკვე ყოფილი ელჩი. ეს პირდაპირ უკავშირდება ამ ელჩების ძალიან მწვავე შეფასებებს „ოცნების“ მიმართ?

რა თქმა უნდა. ვიცით, რომ გერმანია და საფრანგეთი წამყვანი ქვეყნები არიან ევროკავშირში და მათი პოლიტიკა მნიშვნელოვანწილად განსაზღვრავს ევროკავშირის საგარეო პოლიტიკას. ამიტომაც, არ არის გასაკვირი, რომ სწორედ ეს საელჩოები და განსაკუთრებით გერმანიის საელჩო ხდება ამ განცხადებების სამიზნე.

ისიც უნდა გავითვალისწინოთ, რომ გერმანიის ელჩი საქართველოში, ბატონი პეტერ ფიშერი ძალიან აქტიური ელჩია. ის ძალიან მკაფიოდ აფიქსირებს ხოლმე თავის პოზიციებს, სინდისის პატიმრების სასამართლო პროცესებსაც ესწრება, გერმანიის ელჩის განცხადებები „ქართული ოცნების“ გაღიზიანებას იწვევს და „ოცნება“ არც მალავს ამ გაღიზიანებას. ისინი სრულიად აბსურდულად, ელჩს ბრალს სდებენ ვენის კონვენციის დარღვევაში.

გერმანიის საგარეო საქმეთა სამინისტრომაც ხაზგასმით აღნიშნა, რომ ეს სრული აბსურდია – არანაირი ვენის კონვენციის დარღვევა ეს არ არის და ელჩი სრულიად არის უფლებამოსილი, მაგალითად, შეხვდეს, როგორც მთავრობის, ისევე ოპოზიციის წარმომადგენლებს.

ეს პოლიტიკა მთლიანად არის მიმართული იქითკენ, რომ საქართველო მაქსიმალურად დააშორონ ევროკავშირს.

პერსონალური მომენტიც, რა თქმა უნდა, რაღაც დოზით გასათვალისწინებელია, მით უმეტეს, იმ ფონზე, რომ გასულ წლებში გერმანიას ჰყავდა ელჩები, რომლებიც ძალიან მეგობრულად იყვნენ განწყობილნი საქართველოს მთავრობის მიმართ და „ქართული ოცნების“ მიმართ.

თუმცა ძალიან მკაფიოდ მინდა ხაზი გავუსვა იმას, რომ ყოველგვარი პერსონალიზაციის მიღმა გერმანიის საგარეო პოლიტიკა ყოველთვის არის ძალიან ფრთხილი, მაქსიმალურად ფრთხილი და ის, რომ გერმანიის ელჩი იქცევა ისე, როგორც იქცევა, ეს არის პირდაპირი გამოხატულება გერმანიის საგარეო პოლიტიკისა საქართველოს მიმართ. ანუ საგარეო საქმეთა სამინისტროს მყარი, აბსოლუტურად ურყევი მხარდაჭერის გარეშე დიდი ალბათობით გერმანიის ელჩი ამ ნაბიჯებს არ გადადგამდა. არავის არ უნდა ჰქონდეს იმის ილუზია, რომ ეს არის ელჩის პირადი ინიციატივა. ეს არის გერმანიის საგარეო პოლიტიკა, რომელსაც წარმოადგენს საქართველოში დღეს ელჩი – პეტერ ფიშერი და მის ზურგს უკან დგას გერმანიის საგარეო საქმეთა სამინისტრო, გერმანიის საგარეო პოლიტიკა – სრულიად გამიზნული და მიზანდასახული.

• რა როლი შეიძინა, თქვენი დაკვირვებით, გერმანიის ელჩის შეფასებებმა მიმდინარე პოლიტიკურ პროცესებში? 

ცხადია, რომ ფიშერის განცხადებები ძალიან ნეგატიურად ხვდება გულზე „ქართულ ოცნებას“ და მის წარმომადგენლებს. მეორე მხრივ, ასე ვთქვათ, საქართველოს სამოქალაქო საზოგადოება გრძნობს გერმანიის ძლიერ მხარდაჭერას. ეს ძალიან მნიშვნელოვანია, რომ ჩვენ ამ სიტუაციაში და ამ დაპირისპირებაში არ ვართ მიტოვებული „ქართული ოცნების“ ამარა და რომ ქართველ ხალხს, საქართველოს სამოქალაქო საზოგადოებას, ჰყავს ძალიან ძლიერი მოკავშირე და ისტორიული, ტრადიციული მეგობარი გერმანიის სახით.

• ივანიშვილი რა გათვლით მოქმედებს ამ დროს, როცა ის თავს ესხმის გერმანიის ელჩს?

ეს სრულიად მიზანმიმართული პოლიტიკაა „ქართული ოცნების“ და ამ პოლიტიკის მიზანია საქართველო მაქსიმალურად ჩამოაშოროს ევროკავშირს, მთლიანად დაუხუროს მას ევროპული პერსპექტივა. ეს ძალიან ნათლად ამოსაცნობი მიზანია, თუ შევხედავთ „ქართული ოცნების“ მიერ გადადგმულ ყველა ნაბიჯს, იქნება ეს შიდა თუ საგარეო პოლიტიკაში.

• მაგრამ საქართველოში მოსახლეობის უმრავლესობის დაკვეთა არის ევროინტეგრაცია და ეს კარგად იცის ივანიშვილმაც. სავარაუდოდ ამიტომაც ჯერ კიდევ ანტიდასავლური რიტორიკით გამორჩეული „ოცნება“ ვერ ამბობს ღიად, რომ საქართველომ ევროპულ ინტეგრაციაზე აღარ უნდა იფიქროს.

დიახ, პირდაპირ ამას ვერ ამბობს, ჯერჯერობით რიტორიკის დონეზე არის ლაპარაკი იმაზე, რომ აი, ჩვენ გვინდა ევროპა, ოღონდ ჩვენ გვინდა ისეთი ევროპა, რომელიც ჯერ არ არის…

პრაქტიკულ დონეზე კი, „ოცნების“ ყველა ნაბიჯი მიმართულია იმისკენ, რომ საქართველო ევროპულ გზას დაშორდეს.

ევროპასთან ურთიერთობის გაწყვეტა ხდება არა ერთი ძლიერი დარტყმით – როგორც ეს იყო, მაგალითად, უკრაინაში იანუკოვიჩის დროს – იმიტომ რომ იციან, ამან შეიძლება გამოიწვიოს ძალიან მძაფრი რეაქცია, არამედ ეს ხდება პატარ-პატარა ნაბიჯებით, მათ შორის ასეთი ნაბიჯებით, რაც არის ელჩებზე თავდასხმა.

„ქართულ ოცნებას“ ასევე აქვს გათვლა, რომ ევროპასთან დაშორება გაასაღოს ისე, თითქოს ეს ევროკავშირის გადაწყვეტილებაა და არა საქართველოს.

• „ოცნება“ ამ ეტაპზე ცდილობს, გერმანიის და ევროკავშირის ელჩები წარმოადგინოს, როგორც „რადიკალური დღის წესრიგის“ წამხალისებლები. ეს რაზე მიუთითებს? 

ეს სუფთა რუსული ნარატივია. ეს არის ის, რასაც ამბობს რუსეთის საგარეო საქმეთა სამინისტრო და რაც ახლაც თქვა გაეროში ლავროვმა. რუსული საინფორმაციო და პროპაგანდისტული არხებიდან გვესმის მუდმივად, რომ რუსეთის თავდასხმა უკრაინაზე, არ არის რუსეთის ბრალი, არამედ არის ევროკავშირის ბრალი, რომ თურმე რუსული სამხედრო თვითმფრინავების შეფრენა ევროკავშირის ტერიტორიაზე და ევროკავშირის მხრიდან მათი ჩამოგდების მუქარა, არის ესკალაცია არა რუსეთის მხრიდან, არამედ ევროკავშირის მხრიდან.

პირდაპირ ვხედავთ, რომ გადაბრალება ევროპაზე, ევროკავშირზე რადიკალიზმისა და რაღაც არამეგობრული ნაბიჯებისა – ეს არის რუსული საინფორმაციო სტრატეგიის ნაწილი, რომელსაც ახორციელებს „ქართული ოცნება“.

• თქვენი აზრით, ევროპული სახელმწიფოების ელჩებზე თავდასხმაც რუსეთის მითითებით ხდება?

დიდი ალბათობით, ასეა.

პრინციპში ყველაფერი მიგვანიშნებს იმაზე, რომ საქართველო მოქმედებს დიდი რუსული ჩარჩოს შიგნით.

ყველაფერი, რასაც „ქართული ოცნება“ აკეთებს, არის მიმართული იმაზე, რაც აწყობს რუსეთს და არის მიმართული საქართველოს სუვერენული ეროვნული ინტერესების წინააღმდეგ, საქართველოს კონსტიტუციის წინააღმდეგ, რომელშიც პირდაპირ არის ჩაწერილი ევროინტეგრაცია და ინტეგრაცია ევროატლანტიკურ სტრუქტურებში.

• რას ნიშნავს საქართველოსთვის გერმანიასთან ურთიერთობის გაფუჭება და რა შანსია უკვე დაზიანებული ურთიერთობის გამოსწორების? 

ეს ნიშნავს იმას, რომ ივანიშვილის რეჟიმი პირდაპირ ჭრის იმ ტოტს, რომელზეც ჩვენ ვსხედვართ.

ივანიშვილი გვაშორებს ჩვენს მეგობრებს და ცდილობს, დაგვაახლოვოს საქართველოს მტრებთან. აი, ეს ემუქრება საქართველოს.

საქართველო იქნება ქვეყანა, რომელსაც აღარ ეყოლება მეგობრები და სტრატეგიული პარტნიორები.

გერმანია პირველი სახელმწიფო იყო, რომელმაც აღიარა საქართველოს დემოკრატიული რესპუბლიკა 1918 წელს, გერმანია იყო პირველი სახელმწიფო, რომელმაც აღიარა საქართველოს დამოუკიდებლობა მეორე რესპუბლიკის დროს. გერმანიაზე მყარი და ერთგული პარტნიორი საქართველოს არ ჰყოლია. საქართველოს დემოკრატიული რესპუბლიკის დაარსება 1918 წელს, პირდაპირ არის დაკავშირებული მაშინდელი გერმანიის მხარდაჭერასთან.

გერმანია არის ჩვენი საკვანძო პარტნიორი ევროკავშირში და, რა თქმა უნდა, მასთან ურთიერთობის გაფუჭება საქართველოსთვის არის უკიდურესად საზიანო.

ყველამ, ვინც ლაპარაკობს გერმანიის სახელით, არაერთხელ და ძალიან მკაფიოდ დააფიქსირა თავისი მხარდაჭერა ქართველი ხალხის და საქართველოს სამოქალაქო საზოგადოების მიმართ. გასაგებია ცალსახად, რაზეა ლაპარაკი: ვის უჭერს მხარს გერმანია და ვის – არა.

ის, რომ ქართველი ხალხი იბრძვის და არ ნებდება, იბრძვის თავისი ევროპული მომავლისთვის, ეს, რა თქმა უნდა, აძლევს საფუძველს და ენერგიას ჩვენს მეგობრებს ევროკავშირში, რომ უჭერდნენ მხარს ქართველ ხალხს. არავინ რომ ხმას არ იღებდეს, გერმანიის და ამ ქვეყნის საგარეო პოლიტიკა უკვე სხვაგვარი იქნებოდა. ისინი ჩათვლიდნენ, რომ ქართველი ხალხიც ეთანხმება მთავრობას, რომელიც ახლა ჰყავს და მის საგარეო კურსს.

მაგრამ რადგანაც ეს პროტესტი არსებობს, რადგანაც არსებობს ისეთი ხალხი, როგორიც არის მზია ამაღლობელი, რომელიც სრულიად უსამართლოდ ზის ციხეში, ციხეში არიან სინდისის სხვა პატიმრები, ეს ყველაფერი აძლევს საფუძველს ევროკავშირის ქვეყნებს და კონკრეტულად გერმანიას, რომ მხარი დაუჭიროს ამ ადამიანებს, რომლებიც იბრძვიან საქართველოს ევროპული მომავლისა და დემოკრატიისთვის.

გერმანია ყოველთვის მზად არის, სრულიად აღადგინოს ურთიერთობები საქართველოსთან. როგორც კი საქართველოს პოლიტიკა შეიცვლება, იმ წუთასვე საქართველოს კვლავ გაეხსნება ევროპული პერსპექტივა და გერმანია, როგორც ახლა, დარჩება საქართველოს და ქართველი ხალხის მეგობრად.

პეტერ ფიშერი, გერმანიის ელჩი საქართველოში, მადლობას უხდის მხარდაჭერისთვის საქართველოს მოქალაქეებს, რომლებიც გუშინ, 28 სექტემბერს, „ქართულ-გერმანული მეგობრობის“ მარშში მონაწილეობდნენ. მსვლელობა პეტერ ფიშერის მხარდასაჭერად გაიმართა.

„დიდი პატივისცემა და მადლობა ყველას, ვინც გუშინ ღამით თბილისში გამოვიდა, რათა მადლიერება გამოეხატა გერმანიის მიმართ და სოლიდარობა – ჩემ მიმართ.

მადლობა უცხოელ დიპლომატებზე თავდასხმების შეწყვეტის მოთხოვნისა და  დემოკრატიისა და ევროპული გზის განვითარებაში ჩვენი წვლილის აღიარებისთვის. ევროკავშირი უხმობს საქართველოს. გერმანია და ევროკავშირი ამისთვისაა აქ“ – წერს პეტერ ფიშერი, გერმანიის ელჩი საქართველოში X-ზე.

გერმანიის ელჩი საქართველოში უკვე რამდენიმე თვეა „ოცნების“ მთავრობის თავდასხმის სამიზნეა.

24 სექტემბერს პეტერ ფიშერი საქართველოს საგარეო უწყებაშიც კი დაიბარეს.

„ქართული ოცნება“ საქართველოს პარტნიორი ქვეყნების ელჩებს ვენის კონვენციის დარღვევაში, ქვეყნის შიდა საქმეებში ჩარევასა და „რადიკალური დღის წესრიგის წახალისებაში“ ადანაშაულებს, რასაც დიპლომატები უარყოფენ  და „ოცნებას“ ადანაშაულებენ დეზინფორმაციული ნარატივის გატარებაში.

იმავე დღეს, 24 სექტემბერს, ელჩის დაბარებას საგარეო საქმეთა სამინისტროში გამოეხმაურა გერმანიის მთავრობა.

„ჩვენ კატეგორიულად ვგმობთ „ქართული ოცნების“ წარმომადგენლების მხრიდან აგრესიულ რიტორიკას საქართველოში გერმანიის ელჩის მიმართ და მის უსაფუძვლო დაბარებას. ელჩი წარმოადგენს ფედერალური მთავრობის პოზიციას და მოქმედებს ვენის კონვენციის სრული დაცვით“, — ნათქვამია გერმანიის საგარეო საქმეთა სამინისტროს განცხადებაში.

დღეს, 29 სექტემბერს, სტრასბურგში, საპარლამენტო ასამბლეის შემოდგომის სესიის გახსნაზე დაასახელეს ვაცლავ ჰაველის პრემიის ლაურეატი.

ჰაველის პრემია 2025 წელს გადაეცა უკრაინელ ჟურნალისტს, მაქსიმ ბუტკევიჩს, ადამიანის უფლებათა დაცვის ცენტრის „ზმინასა“ და „ჰრომადსკე რადიოს“ თანადამფუძნებელს, პაციფისტს, რომელიც რუსეთის უკრაინაში შეჭრის შემდეგ მოხალისედ ჩაეწერა და ქვეყნის დასაცავად იბრძოდა, სანამ ტყვედ არ ჩავარდა. მან ორ წელზე მეტი გაატარა რუსების პატიმრობაში, სანამ 2024 წლის ოქტომბერში ტყვეთა გაცვლის დროს გაათავისუფლებდნენ.

მაქსიმ ბუტკევიჩთან ერთად ფინალისტთა სიაში იყვნენ მზია ამაღლობელი და აზერბაიჯანელი ჟურნალისტი ულვი ჰასანლი.

მზია ამაღლობელს სტრასბურგში მისი ადვოკატი და უფლებადამცველი, მაია მწარიაშვილი წარმოადგენდა, რომელმაც ასამბლეაზე გამართულ ცერემონიაზე მზია ამაღლობელის გზავნილი წაიკითხა.

„ბათუმელები“ უცვლელად გთავაზობთ მზია ამაღლობელის წერილს.

მზია ამაღლობელის წერილი: 

„თავისუფლების, დემოკრატიის გზაზე მიმავალს, იშვიათად მიმაჩნდა რამე შეუძლებელი…

თუმცა წარმოუდგენლად ემოციურია და დღემდე მიჭირს იმის დაჯერება, რომ ჩემი სახელი და გვარიც არის „ჰაველის“ ჯილდოს ნომინანტებში.

ყოველთვის აღფრთოვანებული და შთაგონებული ვიყავი იმ აზერბაიჯანელი ჟურნალისტებით, რომლებიც დევნის მიუხედავად რჩებოდნენ სამშობლოში და აგრძელებდნენ პროფესიულ საქმიანობას. ჩემი პატივისცემა ულვი ჰასანლის შეუვალობას.

სოციალურ მედია X-ზე, ჩემს ქავერზე დღემდე უნდა იყოს ფოტო, წარწერით – „იყავი ისეთი მამაცი, როგორიც უკრაინაა“. მაქსიმ ბუტკევიჩს მინდა ვუთხრა, რომ გულწრფელად მჯერა უკრაინის გამარჯვების.

ეს ნომინაცია არ არის მხოლოდ ჩემი. მე მას ვიღებ ჩემი კოლეგების სახელით, იმ ჟურნალისტების სახელით, რომლებიც დამოუკიდებელ, კრიტიკულ მედიაში მუშაობენ.

საქართველოში ჟურნალისტად ყოფნა დღეს მსხვერპლის გაღებას ნიშნავს.

ჩემს კოლეგებს მტრულ და საფრთხისშემცველ გარემოში უწევთ ყოველდღიურად მუშაობა. მათ დევნიან, აშანტაჟებენ, ავიწროებენ, მიზანმიმართულად ესხმიან თავს და ფიზიკურად უსწორდებიან.

ერთპარტიულმა „ქართული ოცნების“ პარლამენტმა დაჩქარებული წესით დაგვიმტკიცა „რუსული კანონები“, რითაც სიტყვის თავისუფლება პრაქტიკულად აკრძალა, ხოლო საგრანტო ინვესტიციების მოზიდვა და საერთაშორისო ორგანიზაციებთან თანამშრომლობა, აგენტობას და ღალატს გაუთანაბრა – ზუსტად ისე, როგორც ეს რუსეთში მოხდა.

დღეს ჩემს სამშობლოში, საქართველოში, ხელისუფლება მიტაცებული აქვს რუსული ინტერესების გამტარ რეჟიმს. დღეს ქვეყანას 60-ზე მეტი პოლიტიკური პატიმარი ჰყავს – მსახიობი, პოეტი, მასწავლებელი, კომიკოსი, სტუდენტი, ჟურნალისტი.

თუმცა ქართველები ვაგრძელებთ ევროპული მომავლისთვის ბრძოლას.

300 დღეზე მეტია ჩემი ქვეყნის მოქალაქეები ქუჩაში უწყვეტ პროტესტს მართავენ, რადგან ჩვენ, ქართველებს გვჯერა, რომ დემოკრატიული ღირებულებების გარანტი ევროკავშირია.

ჩვენ თქვენს გვერდით ვხედავთ ჩვენს თავს, ამიტომ მინდა გთხოვოთ – მანამ, სანამ გვიანი არ არის, ნუ დაგვტოვებთ რუსეთთან პირისპირ და მარტო!

იდექით ჩვენს გვერდით, თავისუფლებისთვის ბრძოლაში“.

საქართველოს მეხუთე პრეზიდენტი, სალომე ზურაბიშვილი არჩევნებში გამარჯვებას ულოცავს მოლდოვის პრეზიდენტს, მაია სანდუს, რომლის პროევროპულმა პარტიამ არჩევნებზე, წინასწარი შედეგების თანახმად, ხმების 50.14% მიიღო.

„ბრავო! თქვენი გამარჯვება საუკეთესო ამბავია ევროპისთვის, დემოკრატიისთვის და ძლიერი პასუხია რუსეთისა და მისი ჰიბრიდული ომის წინააღმდეგ.

პროევროპული საქართველო თქვენ გვერდით დგას და მისი წინააღმდეგობა რუსეთის ჩარევის წინააღმდეგ ურყევია“ – წერს სალომე ზურაბიშვილი X-ზე.

წინასწარი შედეგებით, სანდუს „მოქმედების და სოლიდარობის პარტიამ“ ხმების 50.14 % მიიღო, პრორუსულმა კოალიცია „პატრიოტულმა  ბლოკმა“ კი – 24.19%. დათვლილია ხმების 99.87% ამ შედეგების მიხედვით, სანდუს პარტია პარლამენტში უმრავლესობას შეინარჩუნებს.

დღეს, 28 სექტემბერს, 18:00 საათზე, სპორტის სასახლიდან კურიერების საპროტესტო მსვლელობა გაიმართება.

„მოვიდეთ საქართველოს დროშებით, ვაჩვენოთ, რომ ჩვენი დროშა პარტიულზე მეტია!

ბათუმში რამდენიმე კურიერი „ქართულ ოცნებას“ აქტივისტად ემსახურა, მაგრამ ათასები შეურაცხყოფილნი დარჩნენ.

ჩვენ ვიდექით ნამოხვანში, მაღაროელებთან, ევოლუშენის გაფიცულებთან და გამოსახლებულებთან, დღესაც ვიბრძვით! ჩვენი პასუხია – არა მოღალატე მთავრობას!“- ნათქვამია განცხადებაში, რომელიც საპროტესტო მსვლელობის ორგანიზატორებმა გაავრცელეს.

მათივე ინფორმაციით, კურიერები ასევე გეგმავენ დიდ საპროტესტო მსვლელობას 4 ოქტომბერს. მარში დაიწყება 12:00 საათზე „თბილისი მოლის“ ტერიტორიიდან, შემდეგ კურიერები შეუერთდებიან საერთო სახალხო აქციას, რომელიც 16:00 საათზე დაიწყება რუსთაველზე.

შსს-ს ინფორმაციით, საქართველოში 50 მილიონის  ღირებულების ნარკოტიკის შემოტანის ფაქტზე ერთი პირი დააკავეს.

„განსაკუთრებით დიდი რაოდენობის ნარკოტიკი, 200კგ ჰეროინი ამოვიღეთ. ამოღებული ნარკოტიკის ღირებულება ე.წ შავ ბაზარზე 50 მილიონს აღემატება.

აღნიშნულ ფაქტზე დაკავებულია ირანის ისლამური რესპუბლიკის მოქალაქე.

ბრალდებულის მართვის ქვეშ მყოფი ავტომობილიდან, რომელიც დატვირთული იყო თევზის საკვებით, ნანახი და ამოღებულია ტვირთში დამალული 8 ტომარა, რომელშიც 200 კგ ნარკოტიკული საშუალება ჰერონი იყო მოთავსებული.

აღნიშნული ავტომობილი ირანიდან საქართველოში შემოვიდა, აზერბაიჯანის გავლით, სასაზღვრო პუნტქ წითელი ხიდიდან“ – განაცხადა ალექსანდრე დარახველიძემ, შს მინისტრის მოადგილემ.

განსაკუთრებით დიდი რაოდენობის ნარკოტიკის ამოღების ფაქტზე დღეს, 27 სექტემბერს, განაცხადეს.

2025 წლის 4 ოქტომბრის არჩევნები საქართველოში, ფაქტობრივად, გამოცდილი და დამოუკიდებელი დამკვირვებლების გარეშე ჩატარდება.

ცესკოს მონაცემების მიხედვით, არჩევნებს საქართველოში რამდენიმე ორგანიზაცია დააკვირდება, თუმცა როგორც „სამართლიანი არჩევნებისა და დემოკრატიის საერთაშორისო საზოგადოების“ აღმასრულებელი დირექტორი განმარტავს „ბათუმელებთან“, ამ სქემას საერთაშორისო დონეზე კარგად იცნობენ, როგორც „ყალბ დაკვირვებას“.

„ყველა არჩევნებზე ჩვენ ვხედავთ გარკვეულ ჯგუფებს, ორგანიზაციებს, რომლებიც რეგისტრირდებიან ხოლმე სადამკვირვებლო ორგანიზაციებად. ამ ფენომენს საერთაშორისო დონეზე მოიხსენებენ ასე – „ყალბი დამკვირვებლები“. ეს გავრცელებული მოვლენაა ისეთ ქვეყნებში, როგორიც არის საქართველო – არიან გარკვეული ჯგუფები, რომლებიც გარკვეული თანხის სანაცვლოდ შეიძლება დააკვირდნენ არჩევნებს და შექმნან ილუზია იმისა, რომ რეალურად ადგილი აქვს არჩევნებზე დაკვირვებას.

შეიძლება ანგარიშებიც გამოაქვეყნონ ხოლმე, რომელიც, როგორც წესი, დადებითია,“ – ამბობს ლევან ნატროშვილი, სამართლიანი არჩევნებისა და დემოკრატიის საერთაშორისო საზოგადოების“ აღმასრულებელი დირექტორი.

არჩევნების ექსპერტების შეფასებით, „ოცნების“ არალეგიტიმურმა მთავრობამ ყველა პირობა შექმნა იმისთვის, რომ რეალური, სამართლიანი და დემოკრატიული არჩევნები არ ჩატარდეს. ამიტომაც, 2025 წლის არჩევნებს არ დააკვირდებიან გამოცდილი ადგილობრივი და საერთაშორისო ორგანიზაციები:

31-წლიანი არსებობის განმავლობაში ახალგაზრდა იურისტთა ასოციაცია პირველად არ აკვირდება არჩევნებს. 4 ოქტომბრის არჩევნებს არც „სამართლიანი არჩევნები“ დააკვირდება – ეს ორგანიზაცია 1995 წლიდან ყველა არჩევნებს აკვირდებოდა საქართველოში.

4 ოქტომბრის არჩევნებს საქართველოში არც ეუთო/ოდირი დააკვირდება. ეს ყველაზე ცნობილი და ავტორიტეტული საერთაშორისო ორგანიზაციაა, რომელიც მსოფლიოს მასშტაბით აკვირდება არჩევნებს. ეუთო/ოდირი საქართველოში მუდმივად აკვირდებოდა არჩევნებს. „ქართული ოცნების“ არალეგიტიმურმა და ანტიკონსტიტუციურმა მთავრობამ კი, ეუთო/ოდირი მოიწვია იმ დროს, როცა ამ ორგანიზაციის არჩევნებზე დაკვირვების მომზადების პერიოდი უკვე გასული იყო.

„ახალგაზრდა იურისტთა ასოციაციის“ განცხადება 2025 წლის 4 ოქტომბრის არჩევნებზე:

„2025 წლის 4 ოქტომბერს დაგეგმილი ადგილობრივი თვითმმართველობის არჩევნები საქართველოს თანამედროვე ისტორიაში ერთ-ერთ ყველაზე რთულ და მძიმე პოლიტიკურ და სამართლებრივ გარემოში ტარდება.

ქვეყანაში დემოკრატიის უკუსვლა, სამოქალაქო საზოგადოების ორგანიზაციებისა და მედიის წინააღმდეგ გატარებული რეპრესიული პოლიტიკა, შემზღუდველი კანონების მიღება, ასევე, საარჩევნო კანონმდებლობით დამკვირვებლის სამართლებრივი ჩარჩოს გაუარესება, ჩვენთვის პრაქტიკულად შეუძლებელს ხდის სრულფასოვანი სადამკვირვებლო მისიის ფორმირებას და არჩევნებზე დაკვირვებას.

საია გააგრძელებს ადამიანის უფლებების და სამართლის უზენაესობის დაცვას და მიმდინარე სამართლებრივი გარემოს შეფასებას საზოგადოებას პერიოდულად წარუდგენს“ – ვკითხულობთ საიას მიერ 2025 წლის 24 სექტემბერს გავრცელებულ განცხადებაში.

„სამართლიანი არჩევნების“ შეფასებით კი, ვენეციის კომისიის საარჩევნო ნორმათა კოდექსის ის სამი პირობა, რაც მოიცავს ძირითადი უფლებების პატივისცემას, საარჩევნო კანონმდებლობის სტაბილურობასა და პროცედურული გარანტიების არსებობას, დიდწილად არ არის დაცული, რითაც თავისუფალი, სამართლიანი და კონკურენტული არჩევნების ჩატარების შესაძლებლობა მნიშვნელოვნად არის შეზღუდული.

აქედან გამომდინარე, „სამართლიანი არჩევნები” მუნიციპალიტეტის ორგანოთა არჩევნებს სტანდარტული სადამკვირვებლო მისიითა და მეთოდოლოგიით არ დააკვირდება, თუმცა, ორგანიზაცია აგრძელებს მიმდინარე პოლიტიკური და საარჩევნო პროცესების მონიტორინგს და შეფასებას,“ – აღნიშნული იყო „სამართლიანი არჩევნების“ მიერ 2025 წლის 21 აგვისტოს გავრცელებულ ინფორმაციაში.

„სამართლიან არჩევნებში“ მიიჩნევენ, რომ საარჩევნო გარემოს კუთხით არაფერი გაუმჯობესებულა. ამიტომაც, „სამართლიანი არჩევნები“ 4 ოქტომბრის არჩევნებზე ტრადიციული მეთოდით დაკვირვებას არ გეგმავს.

ლევან ნატროშვილს, „სამართლიანი არჩევნების“ ხელმძღვანელს ვკითხეთ – რას ნიშნავს არჩევნები დამკვირვებლის გარეშე?

„ამ არჩევნებზე არ იქნებიან არც ადგილობრივი და არც საერთაშორისო დამკვირვებლები, რომლებსაც აქვთ გარკვეული რეპუტაცია, ვის სიტყვას და პროფესიონალიზმს ენდობიან. ეს, რა თქმა უნდა, მნიშვნელოვან ჩრდილს მიაყენებს, სხვა ფაქტორებთან ერთად, ამ არჩევნებს.

იმ ქვეყნებზე, სადაც არ არის მაღალი ხარისხის დემოკრატია, განსაკუთრებით მნიშვნელოვანია არჩევნებზე დაკვირვების კომპონენტი, ვინაიდან საქართველო არ არის იმ ქვეყნების რიგში, სადაც დემოკრატია უკვე ჩამოყალიბებულია და ნდობა საარჩევნო პროცესების მიმართ მაღალია,“ – ამბობს ლევან ნატროშვილი.

ლევან ნატროშვილის ვკითხეთ საერთაშორისო ორგანიზაციების შესახებ, რომლებიც არჩევნებს დააკვირდებიან საქართველოში: რა გამოცდილება აქვთ ამ ორგანიზაციებს და როგორია მათი ნდობის მაჩვენებელი?

„როგორც წესი, საერთაშორისო დამკვირვებლებში რამდენიმე ჯგუფი გამოიყოფა ხოლმე. ერთია პროფესიონალი სადამკვირვებლო ორგანიზაციები, როგორიც არის ეუთო/ოდირი, NDI-ის, IRI-ს მისიები და სხვადასხვა რეგიონული ორგანიზაცია. ეს არის გრძელვადიანი სადამკვირვებლო მისია და მათ შეუძლიათ სრულყოფილად შეაფასონ პროცესები.

ჩვენებიც მიდიან ხოლმე, ქართველები, სხვა ქვეყნებში, ანუ ცესკოს წევრები. აქ ძირითადად იგულისხმება ის, რომ რამდენიმე ადამიანი ჩამოდის სხვადასხვა ქვეყნის საარჩევნო კომისიებიდან, ან იმ უწყებებიდან, რომლებიც არიან არჩევნებთან რაიმე კავშირში. მათ დამკვირვებლის სტატუსი აქვთ მინიჭებული, მაგრამ მათი საქმიანობა არ არის ხოლმე არჩევნებზე დაკვირვება, როგორც, მაგალითად, ეუთო/ოდირის შემთხვევაშია. ისინი არც აფასებენ პროცესს, ანგარიშს არ წერენ. ამიტომაც, ვერ აღიქმებიან საერთაშორისო დამკვირვებლებად.

შესაბამისად, მათი არსებობა პრობლემას ვერ ხსნის,“ – გვითხრა ლევან ნატროშვილმა ცესკოში რეგისტრირებული საერთაშორისო დამკვირვებლების შესახებ.

რაც შეეხება ადგილობრივ დამკვირვებლებს, ცესკოში 22-მა ორგანიზაციამ გაიარა რეგისტრაცია დაკვირვებაზე. ლევან ნატროშვილი გვიყვება, რაში სჭირდება ეს ორგანიზაციები რეალურად „ქართულ ოცნებას“:

„ეს ორგანიზაციები რეგისტრირდებიან იმისთვის, რომ პარტიებმა გამოიყენონ ხოლმე მათი კვოტები საარჩევნო კომისიებში, როგორც დამკვირვებლების კვოტები. ზოგიერთ ორგანიზაციას ჰყავს რამდენიმე ათასი დამკვირვებელი რეგისტრირებული და ვიცით, რომ ეს ადამიანები, ვინც მათ სახელით რეგისტრირდებიან დამკვირვებლად, რეალურად პარტიებთან დაკავშირებული პირები არიან. დიდი მასშტაბით, როგორც წესი, გამოირჩევა მმართველი პარტია. ესაა ხრიკი, რომ სხვა ორგანიზაციის სახელით საკუთარი პარტიის წარმომადგენლებს აფორმებენ ხოლმე, რომ მისი მეტი წარმომადგენელი იყოს უბანზე.

ასევე, ეს ჯგუფები შეიძლება გამოყენებულ იქნას იმისთვის, რომ სხვა სადამკვირვებლო ორგანიზაციებს, რომლებიც არიან დამოუკიდებელი ორგანიზაციები ან ოპოზიციური პარტიის წარმომადგენლებს საქმიანობაში ხელი შეუშალონ. ასეთებიც არიან ამ არჩევნებზეც დარეგისტრირებულნი, თან საკმაოდ ბევრნი,“ – გვითხრა ლევან ნატროშვილმა.

25 სექტემბრის მონაცემებით[ცესკო], 4 ოქტომბრის არჩევნებს საქართველოში 26 საერთაშორისო ორგანიზაცია დააკვირდება:

1. Association „ALTERFACT
2. „იორდანიის დამოუკიდებელი საარჩევნო კომისია“ (IEC)
3. „ტუნისის რესპუბლიკის დამოუკიდებელი უმაღლესი საარჩევნო ორგანო“
4. „თურქეთის რესპუბლიკის უმაღლესი საარჩევნო საბჭო“
5. „მალდივის რესპუბლიკის საარჩევნო კომისია“
6. „ეთიოპიის ეროვნული საარჩევნო საბჭო“ (NEBE)
7. „მონტენეგროს სახელმწიფო საარჩევნო კომისია“
8. „ბოსნია და ჰერცეგოვინას ცენტრალური საარჩევნო კომისია“
9. „სამხრეთ აფრიკის საარჩევნო კომისია“
10. „ბულგარეთის რესპუბლიკის ცენტრალური საარჩევნო კომისია“
11. „ყირგიზეთის რესპუბლიკის ცენტრალური საარჩევნო და სარეფერენდუმო კომისია“
12. „აზერბაიჯანის რესპუბლიკის ცენტრალური საარჩევნო კომისია“
13. „ფიჯის საარჩევნო ოფისი“ (FEO)
14. „უნგრეთის ეროვნული საარჩევნო ოფისი“
15. „სლოვაკეთის რესპუბლიკის შინაგან საქმეთა სამინისტროს არჩევნების, რეფერენდუმისა და პოლიტიკური პარტიების დეპარტამენტი“
16. „სომხეთის რესპუბლიკის ცენტრალური საარჩევნო კომისია“
17. „ფილიპინების რესპუბლიკის საარჩევნო კომისია“
18. „ესტონეთის სახელმწიფო საარჩევნო კომისია“
19. „ალბანეთის რესპუბლიკის ცენტრალური საარჩევნო კომისია“
20. „გაერთიანებული სამეფოს საარჩევნო კომისია“
21. „მალაიზიის საარჩევნო კომისია (ECM)“
22. „მეხიკო სითის საარჩევნო ინსტიტუტი (IECM)“
23. „მექსიკის ეროვნული საარჩევნო ინსტიტუტი“
24. „უზბეკეთის რესპუბლიკის ცენტრალური საარჩევნო კომისია“
25. „ბელარუსის რესპუბლიკის ცენტრალური საარჩევნო კიმისია“
26. „შვეიცარიის საელჩო საქართველოში“

4 ოქტომბრის არჩევნებს 22 ადგილობრივი ორგანიზაცია დააკვირდება:

1. ა(ა)იპ „ადვოკატთა და იურისტთა საერთაშორისო ობსერვატორია“
2. ა(ა)იპ „საარჩევნო და პოლიტიკური ტექნოლოგიების ანალიტიკურ-კომპილაციური ცენტრი
3. ა(ა)იპ „საქართველოს პროფესიული განათლებისა და კვალიფიციური კადრების მომზადების მუშაკთა და სტუდენტთა პროფესიული კავშირი
4. ა(ა)იპ „დემოკრატიისა და უფლებების დაცვის ცენტრი“
5. ა(ა)იპ „მასმედიისა და უფლებების დაცვის ცენტრი“
6. ა(ა)იპ „პოლიტიკის და სამართლის ობსერვერი“
7. ა(ა)იპ „სამოქალაქო განვითარების და მონიტორინგის ცენტრი“
8. ა(ა)იპ „რეგიონული განვითარების და ხელშეწყობის ცენტრი“
9. ა(ა)იპ „ასოციაცია თავისუფალი თაობა“
10. ა(ა)იპ „საერთაშორისო ასოციაცია დაიცავი შენი წილი სამშობლო“
11. ა(ა)იპ „საქართველოს ტრენინგებისა და განვითარების ინსტიტუტი“
12. ა(ა)იპ „ყოფილი პოლიტპატიმრები-ადამიანის უფლებებისათვის“
13. ა(ა)იპ „ერთსულოვნება საზოგადოების უფლებებისათვის“
14. ა(ა)იპ „მომზადებისა და გადამზადების ცენტრი პროფესიონალი“
15. ა(ა)იპ „დემოკრატიული მრავალფეროვნების კვლევის ცენტრი“
16. ა(ა)იპ „მოძრაობა ამომრჩეველთა ლიგა“
17. ა(ა)იპ „საერთაშორისო ასოციაცია ქალთა მოძრაობა თანასწორობისათვის“
18. ა(ა)იპ „წინ-სვლა“
19. ა(ა)იპ „კავშირი საერთო-სამოქალაქო მოძრაობა მრავალეროვანი საქართველო“
20. ა(ა)იპ „საქართველოს მოხალისეთა გაერთიანება“
21. ა(ა)იპ „საზოგადოებრივი დამცველი“
22. ა(ა)იპ „ახალგაზრდა ექსპერტთა კლუბი“

არჩევნებს ბოიკოტს უცხადებს და მასში არ მონაწილეობს 8 ოპოზიციური პარტია: „ნაციონალური მოძრაობა“, „სტრატეგია აღმაშენებელი“, „გირჩი – მეტი თავისუფლება“, „დროა“, „ახალი“, „ფედერალისტები“, „თავისუფლების მოედანი“ და „ევროპული საქართველო“ .

ოპოზიციიდან არჩევნებში მონაწილეობას იღებს „ძლიერი საქართველო-ლელო“, „გახარია საქართველოსთვის“ და „გირჩი“.

4 ოქტომბრისათვის ქვეყნის მასშტაბით 3 051 საარჩევნო უბანი 84 საარჩევნო ოლქში გაიხსნება. აქედან 2 284 უბანზე კენჭისყრა ელექტრონული იქნება, ხოლო 767 უბანზე, ძველი წესით გაიმართება.

ქვეყნის მასშტაბით უნდა აირჩიონ 64 ქალაქის მერი და 64 ქალაქის საკრებულოს 2 058 წევრი. ცენტრალური საარჩევნო კომისიის მონაცემებით, 2025 წლის 4 ოქტომბრისთვის ამომრჩეველთა რაოდენობა ერთიან სიაში 3 476 140 – ია.

ამავე თემაზე:

კრემლის პროპაგანდისტი მარგარიტა სიმონიანის ქმარი, ასევე პროპაგანდისტი ტიგრან კეოსაიანი მოკვდა. ამის შესახებ ინფორმაცია თავად სიმონიანმა გაავრცელა. „დღეს ღამით ტიგრანი წავიდა შემოქმედთან“, – დაწერა მან Telegram-ზე.

ტიგრან კეოსაიანი ცხრა თვე კომაში იმყოფებოდა. რეჟისორი, პროდიუსერი და ტელეწამყვანი კეოსაიანი, აქტიურად მუშაობდა რუსეთის ტელეკომპანიებში სხვადასხვა პროექტზე. „მედუზას“ ცნობით, 2022 წელს კეოსაიანი ევროკავშირის სანქციების სიაში შეიყვანეს „რუსულ მედიაში ანტიუკრაინული პროპაგანდის გავრცელების“ გამო.

ტელეწამყვანის რანგში ის მუშაობდა REN TV-ზე, Rossiya-სა და NTV-ზე. მისი უახლესი პროექტი იყო სატირული პროპაგანდისტული შოუ – „საერთაშორისო ხერხის ქარხანა“.

მარგარიტა სიმონიანი  RT-ს (Russia Today) მთავარი რედაქტორია. ის ასევე ხელმძღვანელობს რუსეთის სახელმწიფო მედიაჰოლდინგს Rossiya Segodnya-ს, რომელიც 2013 წელს ვლადიმირ პუტინის ბრძანებით შეიქმნა და აერთიანებს ისეთ პროპაგანდისტულ საინფორმაციო სააგენტოებს, როგორიცაა РИА Новости და Sputnik-ი. ეს უკანასკნელი ათეულობით ენაზე ავრცელებს რუსულ პროპაგანდას.

__

ამავე თემაზე: