Batumelebi

„საქართველოს ჟურნალისტური ეთიკის ქარტიამ“ აჭარის საზოგადოებრივი მაუწყებლის 6 თვის მონიტორინგის შედეგები გამოაქვეყნა. გთავაზობთ ამონარიდს ამ ანგარიშიდან, რომელიც საინფორმაციო გამოშვებების ხარისხს შეეხება.

„მონიტორინგის პერიოდში გამოიკვეთა მნიშვნელოვანი ამბების მიჩქმალვის/არგაშუქების ტენდენცია, რაც განსაკუთრებით თვალშისაცემი და საგანგაშოა. ეს ტენდენცია განსაკუთრებით თვალშისაცემია, თუ შევადარებთ 2020 წლის მარტამდე არსებულ ვითარებას, როდესაც აღნიშნული საინფორმაციო გამოშვების ძირითადი თემა ხშირად იყო თავად აჭარის მაუწყებელში მიმდინარე მნიშვნელოვანი პროცესები. მაუწყებლის ჟურნალისტები და წამყვანები ხშირად მიუთითებდნენ კრიტიკული სარედაქციო პოლიტიკის შეცვლის საფრთხეზე“, – ნათქვამია ქარტიის ანგარიშში.

ამავე ანგარიშში წერია, რომ სამონიტორინგო პერიოდში, საინფორმაციო სამსახურის ხელმძღვანელობისა და გადაცემის წამყვანების ცვლილების შემდეგ, აჭარის მაუწყებელში მიმდინარე პროცესები „საერთოდ ამოვარდა მთავარი საინფორმაციო გამოშვების დღის წესრიგიდან“.

„…საინფორმაციო გამოშვების ეთერში საერთოდ ვერ მოხვდა სახალხო დამცველის რეკომენდაცია, რომლითაც ომბუდსმენმა აჭარის მაუწყებლის დირექტორ გიორგი კოხრეიძეს 3 თანამშრომლის სამსახურში აღდგენისკენ მოუწოდა. ასევე, არ გაშუქდა ამავე არხის გადაცემა „ჰეშთეგისა“ და ალტერნატიული პროფკავშირის დამფუძნებლის, მალხაზ რეხვიაშვილის საჯარო წერილი, რომლითაც ის მაუწყებლის დირექტორის, გიორგი კოხრეიძის რეპრესიულ პოლიტიკას აკრიტიკებდა.

ნაკლები პრიორიტეტი მიენიჭა თეონა თურმანიძის ფეისბუქპოსტის გამო ეთერიდან გათავისუფლების ამბავს – 21 აპრილის გადაცემაში ამის შესახებ მაყურებელს გამოშვების ბოლოს, მე-15 ამბად, ამინდის პროგნოზის წინ მიაწოდეს ინფორმაცია. 11 მაისს კადრსინქრონად გაშუქდა მალხაზ რეხვიაშვილის სამსახურიდან გათავისუფლება, ამ ამბავზე საერთაშორისო ორგანიზაციის „რეპორტიორები საზღვრებს გარეშე“ გამოხმაურება კი საერთოდ არ გაშუქებულა.

გარდა აჭარის მაუწყებელთან დაკავშირებული საკითხებისა, მთავარი 20:00 საათზე ყურადღების მიღმა ტოვებდა სხვა, არანაკლებ მნიშვნელოვან, ხელისუფლების მიმართ კრიტიკულ საკითხებს. მაგალითად, 12 მაისს მაუწყებელმა ვრცლად გააშუქა ისეთი თემები, როგორიცაა პრემიერის ვიზიტი და ეკონომიკის მინისტრის შეხვედრები, თუმცა არ დაინტერესდა აჭარის უმაღლესი საბჭოს წევრების არასრულად შევსებული ქონებრივი დეკლარაციებით. ამ დღეს „საერთაშორისო გამჭვირვალობა საქართველომ“ გამოაქვეყნა განცხადება, რომ აჭარის უმაღლესი საბჭოს წევრებს ქონებრივი დეკლარაციები არასრულად და შეცდომით აქვთ შევსებული, მათ შორისაა აჭარის მთავრობის თავმჯდომარე თორნიკე რიჟვაძეც“, – წერია ანგარიშში.

მონიტორინგის მასალებში საუბარია 27 აპრილს „ბათუმელების“ მიერ გამოქვეყნებულ ჟურნალისტურ გამოძიებაზე, რომელიც შეეხებოდა კორუფციულ სქემას საერთაშორისო გადამზიდავებთან დაკავშირებით. ანგარიშში წერია, რომ „აღნიშნულ თემას არაერთმა ცენტრალურმა ტელევიზიამ დაუთმო მნიშვნელოვანი ყურადღება, თუმცა აჭარის მაუწყებლის მთავარ საინფორმაციო გამოშვებაში ეს საკითხი არც 27 აპრილს გაშუქებულა და არც შემდგომ დღეებში“, – წერია ანგარიშში.

მონიტორინგის მასალებში ყურადღებაა გამახვილებული სხვა დეტალებზეც: „30 აპრილს ბათუმის მერი საკრებულოს წინაშე წარსდგა ყოველწლიური ანგარიშით, თუმცა, როგორც სხვა მედიასაშუალებებმა აღნიშნეს, მისი ანგარიში არ იყო სრულყოფილი და სიტყვიერი მოხსენების ნაცვლად, მერმა საკუთარი საუბრის ვიდეოჩანაწერი წარმოადგინა. მერმა და მისმა წარმომადგენლებმა არც საკრებულოს წევრთა კითხვებს დაუთმეს ადეკვატური დრო. მერის საკრებულოში მისვლის ამბავი „მთავარში“ გაშუქდა, თუმცა აღნიშნული დეტალები ნახსენები საერთოდ არ ყოფილა.

19 მაისს TV-25-ის საინფორმაციო სამსახურის უფროსმა სულხან მესხიძემ გაავრცელა განცხადება, რომ თორნიკე რიჟვაძე მინისტრებს მათთან ურთიერთობას უკრძალავს. ამბავი გააშუქა ადგილობრივმა და ცენტრალურმა მედიამაც, აჭარის ტელევიზიის საინფორმაციო ბადეში კი ეს ამბავი საერთოდ ვერ მოხვდა“.

„მონიტორინგის პერიოდში „მთავარში“ 20:00 საათზე, რიგ შემთხვევებში, ბალანსი არ იყო დაცული, რაც გამოიხატებოდა ხელისუფლების მიმართ კრიტიკული მოსაზრებისთვის ნაკლები პრიორიტეტის მინიჭებაში ან საერთოდ არგაშუქებაში.

მაგალითად, 2020 წლის 21 აპრილის გადაცემაში გასული სიუჟეტი – „საგანგებო მდგომარეობა 22 მაისის ჩათვლით გაგრძელდა“ ეხებოდა საგანგებო მდგომარეობის დამატებითი ვადით გაგრძელებას.

სიუჟეტში არ იყო გაშუქებული ოპოზიციის კრიტიკა და არგუმენტები, თუ რატომ არ უჭერენ ისინი მხარს საგანგებო მდგომარეობის გაგრძელებას. მართალია, ამავე გადაცემაში ჰქონდათ პირდაპირი ჩართვა დამოუკიდებელ დეპუტატ ლევან კობერიძესთან, რომელსაც ასევე ჰქონდა საწინააღმდეგო მოსაზრებები, თუმცა არ გაშუქებულა ორი ძირითადი საპარლამენტო ოპოზიციური პარტიის – „ერთიანი ნაციონალური მოძრაობისა“ და „ევროპული საქართველოს“ დამოკიდებულება ამ საკითხის მიმართ.

გარდა ამისა, მთავარში 20:00 საათზე ყოველდღე პირდაპირ ეთერში გადიოდა ინტერვიუ რესპონდენტთან სხვადასხვა მნიშვნელოვან საკითხზე. გადაცემის ამ ნაწილის სტუმრები, ძირითადად, ხელისუფლებისა და მმართველი პარტიის წარმომადგენლები, ან მათთან აფილირებული ექსპერტები იყვნენ“.

ანგარიშის მიხედვით, მონიტორინგის პერიოდში აჭარის საზოგადოებრივი მაუწყებლის საინფორმაციო გამოშვებების კონტენტი, „ძირითადად დაცლილი იყო ხელისუფლების კრიტიკისგან“.

„საინფორმაციო გამოშვება სჯერდებოდა მიმდინარე ამბების მხოლოდ მშრალად გაშუქებას, არ ცდილობდა ხელისუფლების ამა თუ იმ გადაწყვეტილების კრიტიკულად გაანალიზებას და მაყურებლისთვის საკითხის შესახებ მრავალმხრივი მოსაზრებების მიწოდებას. შესაძლოა, ბალანსი ფორმალურად დაცული და მაყურებლისთვის შეთავაზებული ყოფილიყო სხვადასხვა მოსაზრება, თუმცა, მთლიანი აღქმით, ეს არ არის კრიტიკული გაშუქება.

საინფორმაციო გამოშვება არ ცდილობდა, მაყურებლისთვის მიეწოდებინა განსხვავებული ინფორმაცია ან ფოკუსი ამა თუ იმ საკითხის შესახებ. ასევე, არ ცდილობდა თავად მოეძიებინა პრობლემური თემები დაეყენებინა ხელისუფლების პასუხისმგებლობის საკითხი არაერთ პრობლემასთან დაკავშირებით, რაც მოსახლეობას აწუხებდა, თუნდაც, პანდემიის პირობებში.

საინფორმაციო გამოშვებები, უმეტესად მიყვებოდა დღის წესრიგს და იმ მოვლენების გაშუქებას, რომელსაც საზოგადოებას პოლიტიკოსები, ძირითადად კი, ხელისუფლების წარმომადგენლები სთავაზობენ.

მაგალითად, 29 მაისს „მთავარის“ 20:00 საათიან საინფორმაციო გამოშვებაში გავიდა სიუჟეტი ბათუმის საკრებულოს იმ სხდომის შესახებ, სადაც ბათუმის მერმა საკრებულოს თავმჯდომარეს მოკლე ტექსტური შეტყობინება გაუგზავნა და უთხრა, რომ საკითხი არ უნდა ამოეღო. საქმე ეხებოდა ბათუმის ბულვარის ცენტრში დამატებით მიწის ნაკვეთის გადაცემას იმ კომპანიისთვის, რომელიც ოთხსართულიანი მშენებლობის 15 სართულამდე გაზრდას ითხოვს.

ამბის გაშუქებისას აჭარის ტელევიზიამ აქცენტის გაკეთება ამჯობინა იმაზე, რომ ბათუმის ბიუჯეტი დაზარალდებოდა, თუკი საკითხი ჩავარდებოდა.

გადაცემაში შუქდებოდა მთავრობის ანტიკრიზისული გეგმა ტურიზმთან, სოფლის მეურნეობასთან, ფერმერებისათვის 200-ლარიანი სუბსიდირების გადაცემასა და განათლებასთან დაკავშირებით. თუმცა გაშუქება იყო კრიტიკისგან დაცლილი და მაყურებელი ვერ იღებდა მრავალმხრივ დაბალანსებულ ინფორმაციას. ამ გეგმებთან დაკავშირებით არ ისმოდა სათანადო კრიტიკა. ხშირად წამყვანს ისევ ხელისუფლების წარმომადგენელი ჰყავდა ეთერში. იყო შემთხვევებიც, როდესაც გადაცემაში სტუმრად ჰყავდათ კონკრეტული სფეროს წარმომადგენელი, მაგრამ ამ შემთხვევაში ყველაზე მნიშვნელოვანი ის არის, რომ ჟურნალისტის მხრიდან არ ისმოდა კრიტიკული კითხვები, ძირითადად, წამყვანის კითხვები ეხებოდა პროცედურულ საკითხებს და განმარტებებს, თუ რას მოიცავს ესა თუ ის პაკეტი, როგორ შეუძლიათ ადამიანებს მისი მიღება და ა.შ. საინფორმაციო გამოშვებაში ტენდენციური ხასიათი ჰქონდა ხელისუფლების წარმომადგენლებისთვის უფრო მეტი პრიორიტეტის მინიჭებას, ვიდრე მათ კრიტიკას.

მაგალითად, 14 მაისის გადაცემაში მთავრობის ანტიკრიზისული გეგმის თემა გაშუქდა უმუშევრად დარჩენილთა კომპენსაციაზე. ამ თემაზე სასაუბროდ ჩართვაში ჰყავდათ ხელისუფლების წარმომადგენელი ჯანდაცვის მინისტრის მოადგილე თამარ ბარკალაია. წამყვანს არ დაუსვამს კრიტიკული კითხვები და აქცენტი ძირითადად პროცედურებზე იყო გამახვილებული“, – წერია მონიტორინგის მასალებში.

საქართველოს ჟურნალისტური ეთიკის ქარტიამ მონიტორინგის მასალები დღეს, 20 ივლისს, გამოაქვეყნა.

____

აჭარის ტელევიზიის მიერ ამ საკითხზე მომზადებულ სიუჟეტში მაუწყებლის საზოგადოებასთან ურთიერთობის მენეჯერი, ფირუზ ბოლქვაძე ამბობს, რომ ანგარიშში არის უზუსტობები, შესაბამისად, ის ეჭვობს, რომ ქარტია ამ ანგარიშით ცდილობს საზოგადოება შეიყვანოს შეცდომაში.

„ქართველ მუსლიმთა კავშირის“ ყოფილი თავმჯდომარე ტარიელ ნაკაიძე, 2020 წლის საპარლამენტო არჩევნებზე მაჟორიტარობის კანდიდატი იქნება „ევროპული საქართველოდან“. როგორც ტარიელ ნაკაიძე „ბათუმელებთან“ ამბობს, სავარაუდოდ, ოპოზიციიდან მას კონკურენტები არ ეყოლება და დაპირისპირება მხოლოდ მმართველი პარტიის კანდიდატთან მოუწევს.

• ბატონო ტარიელ, რატომ გადაწყვიტეთ პოლიტიკაში წასვლა, რა არის ამის მთავარი მიზეზი?

მე არ მომინდა პოლიტიკაში წასვლა, მე, უბრალოდ, წარმოვადგენ იმ საზოგადოებას, რომლის წარმომადგენლებიც, ვფიქრობ უკვე დროა, ხელისუფლებაში იყვნენ. უფრო მეტი მრავალფეროვნება ხელისუფლებაში, ნიშნავს უფრო მეტ დემოკრატიულ განვითარებას, სეკულარიზმს. მე ვარ მუსლიმი თემის უფლებების დამცველი ამ შემთხვევაში. შესაბამისად, ძალიან საინტერესო იქნება და შეიძლება ისტორიულიც ჩემი პოლიტიკაში შემოსვლა. ამიტომ, ეს არ არის მხოლოდ ჩემი სურვილი, არამედ საზოგადოების ინტერესიც.

ბოლო რვა თვის განმავლობაში შემოვიარე მთელი საქართველო, მოვინახულე ყველა ეკომიგრანტი, რომელიც ზემო აჭარიდან ჩასახლებულია საქართველოს სხვადასხვა მხარეში. მე მოვისმინე მათი ინტერესები და, ზოგადად, ამ მიმართულებით ამ თემში არის სურვილი, რომ საკანონმდებლო ორგანოში არსებობდნენ ადამიანები, ვინც მათი ინტერესების დაცვაში მიიღებენ მონაწილეობას. შესაბამისად, მე ამ ბიძგმა, ტალღამ მიმაღებინა ეს გადაწყვეტილება.

• ფიქრობთ, რომ თქვენ იქნებით საქართველოს მუსლიმი მოქალაქეების ინტერესების დამცველი პარლამენტში?

არა მარტო მუსლიმების, მაგრამ მე რადგან ამ მიმართულებით მაქვს ნამუშევარი, მათ ინტერესებსაც წარმოვადგენ. მე ვიქნები ჩემი კუთხიდან წასული ადამიანების, მათ შორის საქართველოს ყველა მოქალაქის დამცველი, თუ მათ ექნებათ რაიმე სახის პრობლემა. ის, რაც დეპუტატის კომპეტენციებში შედის, მე ამ მიმართულებით ვიმუშავებ. რა თქმა უნდა, ჩემი მთავარი პრიორიტეტი არ იქნება ტენდერებში გამარჯვება და ფინანსური მაქინაციები შემოსავლების მიღების მიზნით, რომელიც, სამწუხაროდ, დღეს ღიად შეინიშნება დეპუტატებში.

• მმართველმა პარტიამ დღეს ოფიციალურად დაასახელა ანზორ ბოლქვაძე, რომელიც თქვენი კონკურენტი იქნება აჭარის ოთხ მუნიციპალიტეტში. რას ფიქრობთ მასზე, როგორც კონკურენტზე და რა იქნება თქვენი უპირატესობა. ის უკვე იყო სამი მოწვევის პარლამენტის დეპუტატი ზემო აჭარიდან.

ჩემი უპირატესობა იქნება მოსახლეობისთვის ჩვენს მიერ შეთავაზებული პროგრამები და პრიორიტეტები, ჩვენი ბეგრაუნდი და რეალური დაპირებები, რომელსაც პროგრამული სახით წარვუდგენთ. ანზორ ბოლქვაძე არის სახელისუფლებო კანდიდატი. არის მოლოდინი, რომ სერიოზული ზეწოლები დაიწყება მოსახლეობაზე, თუმცა დარწმუნებული ვარ, მოსახლეობას ვერ გატეხს.

ამის მოლოდინი არსებობს, რადგან ამის პრაქტიკაც არსებობდა, როცა ჩაერთვება მთელი სახელისუფლებო მანქანა წინასაარჩევნოდ, ეს ყოველთვის ასე ხდება. არც ამ არჩევნებზე იქნება გამონაკლისი.

• თქვენ გყავთ ისეთი მყარი ამომრჩეველი, რომელიც გაუძლებს ზეწოლებს?

რა თქმა უნდა. ასე რომ არ იყოს, არც ამ ნაბიჯს გადავდგამდი. მე ვიქნები მაჟორიტარობის კანდიდატი აჭარაში [ოთხ მუნიციპალიტეტში] და ასევე შეიძლება ვიყო პროპორციულ სიაშიც. თუმცა ჯერ ეს დაზუსტებული არ არის. კანდიდატი ვიქნები „ევროპული საქართველოდან“.

დღეს დავტოვე „ქართველ მუსლიმთა კავშირის“ თავმჯდომარეობა, ასევე გამოვედი გამგეობის წევრობიდან და დავტოვე ბათუმში ახალი მეჩეთის მშენებლობის ფონდის გამგეობის წევრობაც.

• ოპოზიციიდან მხოლოდ თქვენ იქნებით მაჟორიტარობის კანდიდატი, თუ სხვა კონკურენტებიც გეყოლებათ?

ამასთან დაკავშირებით მიდის მოლაპარაკებები. სავარაუდოდ, არ იქნება ოპოზიციიდან სხვა კანდიდატი.

• ჩვენ გვახსოვს ბათუმში ახალი მეჩეთის მშენებლობის საკითხზე თქვენი აქტიურობა. ასევე ის რეაქციები, რაც თქვენთან დაკავშირებით ვლინდებოდა სოციალურ ქსელებში. იყო ძალიან ნეგატიური შეფასებები: „მოღალატე“, „თურქეთის აგენტი“ და ა.შ არ ელით, რომ როცა დაიწყებთ წინასაარჩევნო კამპანიას, თქვენი მისამართით განახლდება მსგავსი შემოტევა. როგორ აპირებთ დაუპირისპირდეთ ამ ტალღას?

ჩვენ შავ პიარს აქამდეც ვუპირისპირებდით სიმართლეს და, შესაბამისად, დღესაც დავუპირისპირებთ. ამის მოლოდინი არის და არც პიროვნულად არ ვარ ამისგან დაზღვეული. ეს უფრო მეტს მომცემს ჩემს პოლიტიკურ სვლაში, რადგან საზოგადოება ნათლად ხედავს, ვინ ვინ არის, ვინ მოღალატეა და ვინ – არა, ვინ პატრიოტია. რეალობა ერთია, ფაქტი ერთია და ჩვენ ამაზე გავაკეთებთ აქცენტებს. ჩვენ სიმართლეს დავუპირისპირებთ ყველა არასწორ შემოსევას, რომელიც შეიძლება ჩემს მიმართ იყოს. ეს არ მაშინებს, რადგან გამოცდილება მაქვს მიღებული. არც არაფერი გამოსვლიათ მათ, ვინც რაღაც იარლიყების მიწებებას ცდილობდა.

• როგორ ფიქრობთ, თუკი შეხვალთ პარლამენტში, დაეხმარება თქვენი იქ ყოფნა ბათუმში მეჩეთის მშენებლობის საკითხს? წლებია, მშენებლობის ნებართვის მიღებას ვერ მიაღწია მუსლიმმა თემმა?

ვფიქრობ, ხელისუფლება უნდა შეიცვალოს. შესაბამისად, ხელისუფლების ცვლილება დადებითად იმოქმედებს არსებულ სიტუაციაზე, რადგან ის ძალები, რომლებიც ცვლილების მოლოდინში არიან, უფრო ლიბერალური და სწორი ხედვებით მიიღებენ საკულტო ნაგებობების მშენებლობებზე გადაწყვეტილებას.

მე ამ პროცესში შევიტან დადებით როლს და არა მარტო მუსლიმურ საკულტო ნაგებობებთან, სხვა რელიგიური უმცირესობების საკულტო ნაგებობებთან დაკავშირებითაც – ერთხელ და სამუდამოდ საქართველოში უნდა დასრულდეს დამოკიდებულება, რომ მე ვარ ბევრი, დომინანტი და ამან უნდა შეუშალოს ხელი უმცირესობას, რომელსაც კონსტიტუციური უფლება აქვს, რაღაც აიშენოს და ღვთისმსახურება შეასრულოს.

დღეს, 20 ივლისს, „ქართულმა ოცნებამ“ მაჟორიტარობის 30 კანდიდატიდან მხოლოდ ერთი ქალი კანდიდატი წარადგინა. წარდგენისას ქალი კანდიდატის ღირსებად 4 შვილის დედობა დაასახელეს. „ქართული ოცნების“ სიას ფეისბუქში უკვე გამოეხმაურა საზოგადოება და მას გენდერულად არასენსიტიური უწოდა. რაზე მეტყველებს „ქართული ოცნების“ მაჟორიტარობის კანდიდატების სია? – „რესპუბლიკელ“ თამარ კორძაიას შეფასებით, ეს აჩვენებს, რომ „ქართული ოცნება“ ქალებს ვერ ხედავს პოლიტიკაში, „რაც ყველაზე დიდი პრობლემაა“.

„როგორ შეიძლება „ქართულმა ოცნებამ“ შექმნას დაბალანსებული პოლიტიკა, როდესაც 30 მაჟორიტარობის კანდიდატიდან მარტო 1 ქალია წარდგენილი? ჩვენ ვხედავთ, რომ საქართველოს პარლამენტი ფორმალურად იღებს გადაწყვეტილებებს იმიტომ, რომ არის საზოგადოებრივი ზეწოლა, მოთხოვნა. როდესაც მასზეა დამოკიდებული, გადაწყვეტილებას იღებს გარეგანი ჩარევის გარეშე, ვხედავთ, რომ მათთვის აბსოლუტურად უმნიშვნელოა ქალების ყოფნა პოლიტიკაში და ეს დაადასტურა კიდეც მაჟორიტარი კანდიდატების წარდგენამ“, – ამბობს კორძაია.

ერთადერთი ქალი კანდიდატის წარდგენისას, მის მთავარ ღირსებად მმართველმა პარტიამ 4 შვილის დედობა დაასახელა.

„ის, რომ პოლიტიკაში წარმოდგენილ სუბიექტებს ოჯახები აქვთ, შვილები ჰყავთ და ა.შ. ეს საზოგადოებისთვის საინტერესო საკითხია, მაგრამ შვილებისა და მათთან ურთიერთობის მხოლოდ ქალის შემთხვევაში აღინიშნა, მენტალური პრობლემაა. ქალი მათთვის მაინც ასოცირებულია შვილებთან, ოჯახთან და თუ კარგი დედაა, ამიტომ უნდა დაფასდეს საზოგადოებრივ ასპარეზზე. შეიძლება ადამიანი არ იყოს დედა, მაგრამ ბრწყინვალე იყოს საზოგადოებრივ ასპარეზზე.

კაცის შემთხვევაში არ იყო ოჯახი და შვილები ნახსენები. შესაბამისად, „ქართული ოცნების“ პოზიციონირება საზოგადოების წინაშე ნათლად აჩვენებს მათ სახეს. თანასწორობის იდეა „ქართული ოცნებისთვის“ არ არის თავსებადი, გააზრებულიც კი არ აქვთ. ეს გაუაზრებლობა ამ ტექსტებშიც კი ჩანს“, – ამბობს თამარ კორძაია.

მისი შეფასებით, გენდერული თანასწორობა, ქალების პოლიტიკაში ყოფნა „ქართული ოცნებისთვის“ საერთოდ არ არის თემა და ვერც კი ხვდებიან, ეს რა მასშტაბის პრობლემა შეიძლება იყოს.

„მათ ისეთ კანდიდატებზე გააკეთეს აქცენტი, რომლებიც პატარა მამასახლისებად არიან წარმოდგენილები თავიან რეგიონებში. თუნდაც იგივე ანზორ ბოლქვაძე, რომელზეც არაერთი გადაცემა გაკეთდა, მის უკანონო მოქმედებებთან დაკავშირებით, ძალოვანი უწყებების წარმომადგენლები და ა.შ. არიან კაცები, რომლებსაც ე.წ. კაცური გავლენა აქვთ თავიანთ რაიონებში და ფეოდალურ სივრცეს ქმნიან თავიანთ გარშემო, სადეპუტატო, სამაჟორიტარო ტერიტორიაზე. რა აქვთ ამ ადამიანებს გაკეთებული ხალხისთვის, ამაზე არ ყოფილა წარდგენისას საუბარი. ამიტომ, მათი პრიორიტეტები ნათელი და ცალსახაა“, – ამბობს კორძაია.

„ქართულ ოცნებას“ გენდერულად დაუბალანსებელი სია ჰქონდა თვითმმართველობის არჩევნების დროსაც. ქალი არ დაუსახელებიათ მერობის არც ერთ კანდიდატად.

„არც საკრებულოში იყო ქალების წარმომადგენლობა სერიოზული. ამიტომ, ეს არის „ქართული ოცნების“ ხედვა – ისინი ვერ ხედავენ ქალებს პოლიტიკაში. ეს არის მათი პრობლემა“, – ამბობს თამარ კორძაია.

მან ასევე შეაფასა მმართველი პარტიის თავმჯდომარის, ბიძინა ივანიშვილის გამოსვლაც. კორძაიას თქმით, მთელი კამპანია ივანიშვილს აწყობილი ჰქონდა პანდემიაზე და მის წარმატებით გავლაზე, „არც ერთი სიტყვა არ თქმულა სოციალური პრობლემების დაძლევაზე, იმაზე, რომ გაჭირვება გვაქვს და რომ კეთილდღეობა და განათლება იქნება ყველაზე მნიშვნელოვანი გამოწვევა“.

____

მთავარი ფოტო: ქართული ოცნების მაჟორიტარი კანდიდატები

„ქართულმა ოცნებამ“ დღეს 20 ივლისს, მაჟორიტარი კანდიდატები ოფიციალურად დაასახლება.

ბათუმში მმართველი პარტიის მაჟორიტარობის კანდიდატი რესან კონცელიძე იქნება. ის წლების განმავლობაში სამართალდამცავ უწყებებში მუშაობდა, არის პოლიციის გენერალ-მაიორი.

აჭარის მაღალმთიან რეგიონში (ხულო-შუახევი, ქედა, ხელვაჩაური) „ქართული ოცნების“ მაჟორიტარობის კანდიდატი ისევ ანზორ ბოლქვაძე იქნება. ის წინა მოწვევების პარლამენტშიც იყო მაჟორიტარი.

ქობულეთში კი „ქართულმა ოცნებმა“ აჭარის ჯანდაცვის მინისტრი ზაალ მიქელაძე დაასახელა მაჟორიტარობის კანდიდატად.

კანდიდატების წარდგენას ესწრებოდა „ქართული ოცნების“ თავმჯდომარე ბიძინა ივანიშვილიც. „ჩვენ ერთგული ვრჩებით ევროპის და ევროატლანტიკური კურსის, რომელიც ქართველი ხალხის ურყევმა ნებამ განაპირობა და ჩვენი სახელმწიფოს ფუნდამენტია. მინდა მადლობა გადავუხადო მათ, ვინც მხარს უჭერს ქართველ ხალხს ამ საქმეში, ჩვენს დასავლელ მეგობრებს, ევროკავშირს, ჩვენს სტრატეგიულ პარტნიორს – ამერიკის შეერთებულ შტატებს.

ჩვენ პოლიტიკურად რთულ სამეზობლოში ვცხოვრობთ, ამიტომ ვალდებული ვართ, მაქსიმალურად შევამციროთ რისკები, თავიდან ავიცილოთ ყველა შესაძლო პროვოკაცია, რომელმაც შესაძლოა ზიანი მიაყენოს ქვეყნის სტაბილურობას და მშვიდობიან განვითარებას. ჩვენ უნდა გავამთლიანოთ საქართველო და ყველა საერთაშორისო ბერკეტი უნდა გამოვიყენოთ ამისთვის“, – განაცხადა ბიძინა ივანიშვილმა.

ბიძინა ივანიშვილმა ასევე განაცხადა, რომ „ჩვენ მშვიდობიანად, ნდობის გაჩენის, შერიგებისა და პატივისცემით გზით უნდა შემოვაბრუნოთ ჩვენსკენ აფხაზი და ოსი ძმები“.

ბიძინა ივანიშვილმა ამ დღეს ნაკლებად ისაუბრა ქვეყანაში შექმნილ მძიმე სოციალურ მდგომარეობაზე და უფრო მეტი ილაპარაკა იმაზე, თუ რამდენად ეფექტურად გაუმკლავდა ხელისუფლება კოვიდ-19-ისგან გამოწვეულ კრიზისს.

სურსათის ეროვნული სააგენტო 2020 წელს სუდანის/საღებავის ლაბორატორიული კვლევისთვის 34 ნიმუშს აიღებს. სააგენტოს მიღებული აქვს თანხმობა, რათა თევზის ნიმუშებისა და სურსათში საღებავების ლაბორატორიულ კვლევაზე ხელშეკრულება, ჯამში 32 898 ევროს ფარგლებში, ტენდერის გარეშე გააფორმოს.

„ისე, როგორც გასულ წელს, ამჯერადაც, ჩატარებული ბაზრის კვლევის შედეგების მიხედვით, საჭირო ლაბორატორიულ კვლევებზე, უმცირესი ფასი შემოგვთავაზა სურსათის უვნებლობის, ცხოველთა დაცვისა და გარემოს ინსიტუტმა “BIOR” (ლატვია). შემოთავაზებულმა ფასმა საერო ჯამში შეადგინა 32 898 ევრო.

აქედან: თევზის ნიმუშების ლაბორატორიული კვლევა – 28 818 ევრო [30 ნიმუში X 960.6 ევრო] და სუდანის/საღებავის ლაბორატორიული კვლევა – 4 080 ევრო [34 ნიმუში X 120 ევრო]“ – აღნიშნულია სურსათის ეროვნული სააგენტოს განაცხადში.

ამავე განაცხადის მიხედვით, აკრედიტაციის ცენტრის ვებგვერდზე განთავსებული ოფიციალური ინფორმაციის თანახმად, საქართველოში არსებული ლაბორატორიები ვერ უზრუნველყოფენ თევზის ნიმუშების და სურსათში საღებავების (Sudan I; Sudan II; Sudan III; Sudan IV; Sudan orange G; Sudan Red 7n და Para Red) იმ მაჩვენებლებზე სრულყოფილი ლაბორატორიული კვლევების ჩატარებას, როგორც ეს განსაზღვრულია საქართველოში მოქმედი შესაბამისი რეგულეციებით.

„ამასთან, ბაზრის კვლევამ აჩვენა, რომ საქართეველოში მოქმედი ლაბორატორიები ვერ გვთავაზობენ აღნიშნულ მომსახურებას უცხოური, ქვეკონტრაქტორი ლაბორატორიების მეშვეობითაც“, – აცხადებს სურსათის ეროვნული სააგენტო.

შესაბამისი ხელშეკრულება ლაბორატორიულ კვლევაზე, 19 ივლისის მდგომარეობით, შესყიდვების გვერდზე ჯერ ატვირთული არ არის.

„2020 წლის სურსათის უვნებლობის სახელმწიფო კონტროლის წლიური პროგრამის თანახმად, განსაზღვრულ ვადებში, სურსათში საღებავებისა და თევზის ნიმუშების კვლევასთან დაკავშირებული ვალდებულებების სრულად შესრულება, ქართული წარმოების სუნელებისა და თევზის ევროკავშირში ექსპორტის აუცილებელ პირობას წარმოადგენს“, – აცხადებს სურსათის სააგენტო.

—

Momxmarebeli.ge-ს ინფორმაციით, აკრძალული საღებავი „სუდანი“ ბოლოს, თბილისის სხვადასხვა მაღაზიაში შეძენილი 41 დასახელების სასურსათო პროდუქტიდან, ხუთი დასახელების ნიმუშში აღმოჩნდა.

საქართველოში და საზღვარგარეთ წარმოებული პროდუქცია: წითელი წიწაკა, აჯიკა, ტყემალი, ტომატის საწებელი, ტომატპასტა და კეტჩუპი, გერმანიის ლაბორატორია „ევროფინსში“ შემოწმდა.

ამ თემაზე:

ანზორ ბოლქვაძეს „ქართული ოცნება“ ხულოს, ქედის, შუახევისა და ხელვაჩაურის მაჟორიტარობის კანდიდატად ხვალ დაასახელებს. „ბათუმელებს“ ეს ინფორმაცია რამდენიმე ინფორმირებულმა წყარომ დაუდასტურა. ანზორ ბოლქვაძე მოქმედი დეპუტატია.

2020 წლის საპარლამენტო არჩევნებში გამარჯვების შემთხვევაში, ანზორ ბოლქვაძე მეოთხედ გახდება მაჟორიტარი დეპუტატი. შესაბამისად, ჯამში ის 16 წელს დაჰყოფს საკანონმდებლო ორგანოში.

თავდაპირველად ანზორ ბოლქვაძე პარლამენტში 2008 წელს „ერთიანი ნაციონალური მოძრაობის“  კვოტით, მაჟორიტარული წესით მოხვდა. 2012 წელს კი, მას შემდეგ, რაც „ნაციონალური მოძრაობა“ დამარცხდა არჩევნებში, ანზორ ბოლქვაძემ საკანონმდებლო ორგანოში „ოცნების“ სახელით გააგრძელა საქმიანობა.

2016 წელს მან ხულოს, შუახევისა და ქედის საარჩევნო ოლქები ისევ „ოცნების“  სახელით მოიგო, ამჯერადაც, ის, როგორც მაჟორიტარი კანდიდატი წარადგინეს.

ინფორმაცია იმის შესახებ, რომ ხულოს, შუახევის, ქედის და ხელვაჩაურის მაჟორიტარობის კანდიდატად პარტიაში აჭარის მთავრობის თავმჯდომარეს, თორნიკე რიჟვაძესაც განიხილავდნენ, არ დადასტურდა. ერთი ვერსიით ეს არც თავად თორნიკე რიჟვაძემ მოინდომა, სხვა ვერსიით კი, პარტიის შიდა გამოკითხვამაც აჩვენა, რომ რიჟვაძეს არჩევნების მოგება ამ სამაჟორიტარო ოლქებში გაუჭირდებოდა.

____

უკვე ცნობილია „ქართული ოცნების“ სამივე მაჟორიტარი – ბათუმის საარჩევნო ოლქში რესან კონცელიძეს, ხოლო ქობულეთში ზაალ მიქელაძეს წარადგენს მმართველი პარტია.

ზაალ მიქელაძე აჭარის ჯანდაცვის მინისტრია 2016 წლიდან, რესან კონცელიძე კი წლების განმავლობაში აჭარის პოლიციის დეპარტამენტში სხვადასხვა თანამდებობაზე მუშაობდა.

„ოცნება“ მაჟორიტარ კანდიდატებს ხვალ, 20 ივლისს წარადგენს, ასევე ჩვენი ინფორმაციით, ხვალ არ დასახელდებიან მოჟორიტარი კანდიდატები, რომლებსაც მმართველი პარტია აჭარის უმაღლესი საბჭოს არჩევნებისთვის დაასახელებს: „ეს ჯერ გადაწყვეტილი არ არის.“

აჭარაში 2020 წლის არჩევნებისთვის სამი მაჟორიტარული საარჩევნო ოლქი იქნება:

• N28 მაჟორიტარული ოლქი – ბათუმის მუნიციპალიტეტი;
• N29 მაჟორიტარული ოლქი – ქობულეთის მუნიციპალიტეტი და ხელვაჩაურის მუნიციპალიტეტის მახინჯაურის ადმინისტრაციული ერთეული [ამ ერთეულში შედის სოფლები: მახინჯაური, შუა მახინჯაური, განთიადი];
• N30 მაჟორიტარული ოლქი – ხელვაჩაურის (მახინჯაურის ადმინისტრაციული ერთეულის გარდა, ხელვაჩაურის ყველა დანარჩენი სოფელი), ქედის, შუახევისა და ხულოს მუნიციპალიტეტები;

„ოცამდე ცხენი გვყავს, ოცდახუთიც ძროხა. ახლა ტურისტები აღარ არიან, ვეღარ ჯირითობენ ცხენები და მოსუქდნენ მთაში“, – ამბობს ევა კაპიტანოვა, რომელმაც რამდენიმე წლის წინ თბილისში სამსახური მიატოვა, თუშ კაცზე დაქორწინდა და მთაში გაყვა, მერე კი ევა და გოჩა ალვანში დასახლდნენ. ევა სანამ დაქორწინდებოდა, სამსახურს გიდობასაც უთავსებდა და ტურისტებს თუშეთს აცნობდა. ყველაზე რთულ, საცხენოსნო ტურს სთავაზობდა უცხოელებს. ჯირითი თავიდან თბილისის იპოდრომზე ისწავლა, ბარის ცხენებზე. ახლა ამბობს, რომ თუშეთში გაზრდილი ცხენები ბევრად განსხვავდებიან იპოდრომის ცხენებისგან: პატარები არიან, ტყე-ღრეს შეჩვეულები და ბევრად საიმედოები. ევას და გოჩას ახლა საკუთარი ცხენები ჰყავთ.

როცა გოჩა შირაქიდან თუშეთისკენ მიერეკება საქონელს საძოვრებზე ევაც მიყვება, გზადაგზა ფოტო და ვიდეომასალას იღებს, პოტენციურ ტურისტებს პირუტყვის გასავლელ გზას ათვალიერებინებს, მესაქონლეობის თავისებურებებზე უამბობს და სხვანაირ თუშეთს აცნობს. ამბობს, რომ მესაქონლეობას, პირუტყვის გადარეკვის პროცესს თუშეთში და გზას, რასაც მწყემსები გადიან, დიდი პოტენციალი აქვს იქცეს ეგზოტიკურ ტურად, რითაც ბევრი უცხოელი დაინტერესდება.

„მანავში ცხოვრობს ერთი ფრანგი გოგო, რომელიც ქართველზე დაქორწინდა, პროფესიით მწყემსია, შვეიცარიელ სტუმრებთან ერთად წავედით თუშეთში პირუტყვის გადასარეკად, 5, 10 დღეს მიდიან ერთად ცხვრები, ძროხები, ცხენები, ათასნაირ ხევს და ქარაფს გადიან, ულამაზესი სანახაობაა. ძალიან მოეწონათ. მწყემსი გოგო გვეუბნებოდა, რომ ევროპაში ასე აღარავინ ერეკება პირუტყვს, ვერცკი წარმოუდგენიათ, რომ ძროხა შეიძლება იალაღზე თავისუფლად გაუშვა და არაფერი მოუვიდეს. მიჰყავთ ტრანსპორტით საძოვრებამდე და მერე შემოსაზღვრულ ტერიტორიებზე ჰყავთ, მესაქონლეობის ინფრასტრუქტურა საფრანგეთსა და შვეიცარიაში სრულიად განსხვავებულია. აქ თან საქონელს მივერეკებოდით, გზადაგზა ვისვენებდით, საღამოობით ცოტას ვსვამდით, ერთ ჭერქვეშ გვეძინა და საქმეც კეთდებოდა. ეს მთელი ამბავი იყო მათთვის. ამ გამოცდილებამ დამაფიქრა პირუტყვის გადარეკვის სამომავლო ტურზე“, – ამბობს ევა.

მას შემდეგ, რაც რძე დაგროვდება მთაში ევა და გოჩა ყველს, კარაქს და სულგუნს აკეთებს. ევა ყვება, რომ თუშური გუდის ყველი აუცილებლად სპეციალური შემდედებლით, ,,კვეთით“ უნდა გაკეთდეს და არა პეპსინით. როცა თავად მიერეკებიან საქონელს, რძეც მათია და ყველიც, მაგრამ თუ სხვა მწყემსს ჩააბარებენ ყველაფერს, მხოლოდ ყველის ნაწილს მისცემენ პატრონს – ყველს და რძის პროდუქტებს საქონლის ჯოგიდან იმის მიხედვით აძლევენ პატრონს, რამდენსაც ისინი იწველებიან – ასეთია მწყემსების დაუწერელი კანონი.

თუშური გუდის ყველი საკმაოდ ძვირი ღირს, კილოგრამის ფასი 25 ლარია. შესაბამისად, საქონლის პატრონებისთვის ეს კარგი შემოსავალია, თუმცა დიდი შრომის ფასად. თუშეთში ფერმები არ არის, არის მხოლოდ ცხვრის ბინები, სადაც ყველს ამზადებენ და ცხვრის ბაკი – სადაც პირუტყვს აბინავებენ. ყველს ხელით აკეთებენ, დიდ კასრებში. როგორც ევა ამბობს, ახლა, როცა კორონავირუსის პანდემიის გამო ტურიზმი შეფერხებულია, თუშები მთლიანად მესაქონლეობაზე არიან დამოკიდებულები, აქამდე კი ადგილობრივები ითავსებდნენ გიდობას და ცხენებსაც აქირავებდნენ საცხენოსნო ტურებისთვის ვაშლოვანის ნაკრძალში.

„თუშეთში გიდად მუშაობის დროსაც ხშირად დავდიოდი, მაგრამ ყველაფერი სხვანაირად დავინახე, რაც ამ დიდი თემის ოჯახის წევრი გავხდი, – ამბობს ევა. – დღემდე შთაბეჭდილების ქვეშ ვარ. ურთულესია მესაქონლეობა და დიდ ენერგიას მოითხოვს, საქონლის გადარეკვაც ძალიან დამღლელია, მაგრამ არსებობს სხვა მხარე ამ ყველაფრის. ერთხელ თუ წახვალ თუშეთში, მერე სულ იქით მიგიწევს გული“. ყვება დაცარიელებული სოფლების წესებზე, დღეობებზე და დაუწერელ კანონებზე, რასაც დღემდე ზედმიწევნით იცავენ თუშები.

ამ წესების მიხედვით, თუ მამა-პაპისეული კარმიდამო გაქვს თუშეთში, შეგიძლია იქ აძოვო შენი საქონელი, სხვის ტერიტორიაზე პირუტყვის გაშვება აკრძალულია, იმის მიუხედავად ცხოვრობს თუ არა იქ ვინმე. მთაში კოლექტივიზაცია საბოლოოდ 1956 წელს გაუქმდა და თუშებიც აიძულეს ჩამობარგებულიყვნენ. ძირითადად ქვემო, ზემო ალვანსა და ლალისყურში დასახლდნენ. გადმოსახლებულმა თუშებმა იციან, ვინ რომელი სოფლიდანაა, რომელი გვარი საიდანაა და სოფლელები ერთმანეთზე დღემდე არ ქორწინდებიან.

თუშეთში ყველა სოფელს თავისი დღეობა აქვს, რომელიც წელიწადში ერთხელ იმართება. სოფელი შეიძლება დაცლილი იყოს, მაგრამ იქაურები ბარიდან დღეობაზე მაინც ადიან. სოფლის დღეობა ტრადიციების პატივისცემისა და წინაპართა ხსოვნის ერთგვარი დადასტურებაა.

„დღეობას 3, 5 მასპინძელი ოჯახი ჰყავს, მათ მნათეები ჰქვიათ. მნათეებს დღეობისთვის შემთხვევითობის პრინციპით ირჩევენ, მასპინძლებს დღეობაზე მიაქვთ უამრავი ხორაგი, კლავენ საკლავს, იწვევენ ადამიანებს და შეიძლება ორასამდე სტუმრის გამასპინძლება მოგიხდეს. დღეობა 3 დღეს გრძელდება, მესამე დღეს იხარშება უამრავი ხინკალი. მნათეები ვალდებულები არიან უმასპინძლონ სოფელში ყველა გამვლელ-გამომვლელს. მარტო არიან მნათეები, მათ ასევე შემთხვევითობის პრინციპით არჩეული ოჯახები ეხმარებიან კერძების დამზადებასა და ალაგება-დალაგებაში. დამხმარეებს მაკალათები ჰქვიათ. ჩვენც ვიყავით უკვე მნათეები ჩვენს სოფელ გირევში. ივლისის ბოლოს თუ დაიწყებ მოგზაურობას თუშეთში აუცილებლად მოხვდები რომელიმე სოფლის დღეობაზე“, – ამბობს ევა.

დღეობაზე იხარშება ლუდი, იკვლება საკლავი და კეთდება უამრავი ხინკალი. სოფლის მასპინძლებმა დღეობაზე სოფელს რაიმე უნდა შესწირონ.

დღეობის პირველ დღეს მნათეები გამთენიისას ცივ მდინარეში წვებიან სამჯერ, მერე სალოცავ ჭონთიოში მიდიან ახალი დროშით, დროშას ყველა ოჯახი თავის ალამს აბამს. მნათეები ახალ დროშას ტოვებენ სალოცავში და უკან მოაქვთ წინა წლის დროშა.

დღეობებზე სტუმრები სვამენ, ცეკვავენ და მღერიან. ასეა ყოველ წელს, ყველა თუშურ სოფელში.

როგორც ევა გვეუბნება შემოდგომაზე, როცა ცხვრებს თუშეთიდან უკან, შირაქის საძოვრებზე მოერეკებიან ყველაფერი სხვანაირია. ეს სექტემბრის ბოლოს ხდება.

„სიტყვა ფერიცვალების მნიშვნელობას ყველაზე კარგად გრძნობ, თუ შემოდგომაზე მოხვდები თუშეთში. ამ დროს ყველაფერი ფერადია, გარემო სხვანაირი ხდება. სექტემბერში სულ სხვანაირ პეიზაჟებს ხედავ, ვიდრე ასვლისას ხედავდი“, – ამბობს ევა.

კვირას, 19 ივლისს, მცხეთაში, გუდაურის გადასახვევთან და სენაკში, ფოთი-ზუგდიდის  გზაზე შეხვდებით ადამიანებს, რომლებიც ნიკა ღვინჯილიას გადასარჩენად ფულს აგროვებენ. ეს პირველი აქცია არ არის, უკვე 2 თვეა ნიკას ოჯახის წევრები და მეგობრები ფულს აგროვებენ, რომ ნიკამ გულის გადანერგვა შეძლოს.

ნიკა ღვინჯილია 32 წლისაა. 2020 წლის აპრილში, როცა კორონავირუსის პანდემიის გამო ქვეყანა ფაქტობრივად კარანტინის რეჟიმში ცხოვრობდა, ნიკას ექიმებმა დაუსვეს დიაგნოზი – გულის დილატაციური კარდიომიოპათია. მას გულის გადანერგვა ესაჭიროება, ოჯახს კი ამის ფინანსური საშუალება არა აქვს, ამიტომაც მისი ოჯახის წევრები, მეგობრები და კოლეგები ყველა გზას მიმართავენ, რომ საჭირო თანხა შეგროვდეს და ნიკას გადარჩენა შეძლონ. 

ნიკას გადარჩენისთვის აქციებს მისი და, ეკა ღვინჯილია უწევს ორგანიზებას. ეკამ გვითხრა, რომ გულის გადანერგვის ოპერაცია ბელორუსში, ცნობილ კლინიკაში უნდა ჩატარდეს. საჭიროა 100 ათასი დოლარი, რაც 300 ათას ლარზე მეტია. ორ თვეზე მეტია ეკა ძმის გადასარჩენად ფულს აგროვებს, ორგანიზებას უწევს აქციებს, მოქალაქეებს მოუხმობს მხარდაჭერისკენ და სულ ახსოვს, რომ ყველა დღეს აქვს მნიშვნელობა.

აქციების შედეგად, დღეის მონაცემებით, შეგროვდა საჭირო თანხის ნახევარი – 171 ათასი ლარი, თუმცა ეს საკმარისი არ არის.

ნიკა ღვინჯილიას ოჯახი აფხაზეთიდან დევნილია. ნიკა და ეკა სენაკში გაიზარდნენ, სადაც ახლა ნიკას დედა და ბებია ცხოვრობს. ნიკას 86 წლის ბებიამ არ იცის შვილიშვილის დიაგნოზის შესახებ, მას  ორი შვილი [ნიკას მამა და მამიდა] ახალგაზრდა ასაკში გარდაეცვალა.

ნიკა პროფესიით მზარეულია. მისი სიცოცხლის გადასარჩენად აქციაში მისი კოლეგები, მზარეულებიც ჩაერთვნენ. მზარეულები ნიკასთვის – ასეთი ჰეშთეგით ქვეყნდება ფეისბუქზე ვიდეოები, რომელშიც ქართველი მზარეულები ნიკას მხარდასაჭერად ერთიანდებიან.

ფეისბუქზე ნახავთ ჯგუფს – ნიკასთვის, სადაც ყველა აქტივობა ზიარდება. გაიგებთ, როგორ ჩაერთო ნიკას გადარჩენის აქციაში 2 წლის ასაკში, დილატაციური კარდიომიოპათიის შედეგად გარდაცვლილი ანიტა ფაცაციას ბებია, თამუნა გლურჯიძე, რომელიც ამბობს, რომ ამ აქციაში ჩართვით მას აქვს განცდა, რომ ანიტას ეხმარება; ნახავთ პატარა გაბრიელ წიქარიშვილის ვიდეოს, რომელიც ყვება, როგორ დაზოგა ტკბილეულის ფული ნიკას დასახმარებლად რომ ჩაერიცხა და ბევრს სხვა ამბავს, რომელთაც ერთი რამ აერთიანებთ – 32 წლის ახალგაზრდა კაცის გადარჩენისათვის ბრძოლა.

ახლა ნიკა და ეკა თბილისში ცხოვრობენ, ბინაში, რომელიც მათ ნათესავმა დაუთმო დროებით. ნიკა დადის ექიმთან, სახლში აქვს ჟანგბადის ბალონი, რომელიც სუნთქვის გაძნელებისას მდგომარეობას უიოლებს და ელის, როდის შეგროვდება საჭირო თანხა, რომ გულის გადანერგვა შეძლოს.

ნიკა ღვინჯილია: „ველი ახალ სიცოცხლეს… ველი, როდის შეიკრიბება თანხა, რომ დონორის რიგში ჩამაყენონ”.

______________________

ნიკას დახმარების მსურველთათვის:

მაგთი | ბილაინი 0901701542 ზარის ღირებულება 1 ლარი