უმაღლესი საარჩევნო კომისიის [უსკო] სამ ახალ წევრს, მათ შორის, თავმჯდომარის მოადგილეს, უფლებამოსილების ვადა გაუვიდა, უმაღლესმა საბჭომ ისინი სამი ახალი წევრით უნდა ჩაანაცვლოს.
კანდიდატების სია უმაღლეს საბჭოში უკვე შესულია, აჭარის მთავრობის თავმჯდომარემ თითოეულ ვაკანტურ პოზიციაზე ორ-ორი კანდიდატურა, სულ ექვსი პირი წარადგინა, ეს პირები კონკურსის წესით შეარჩიეს.
მათგან უმაღლესი საბჭო სამ წევს შეარჩევს, რომლებიც კომისიაში შევლენ, შემდეგ კი კომისია თავმჯდომარის ახალ მოადგილეს აირჩევს.
ამ დრომდე უსკოს თავმჯდომარის მოადგილის თანამდებობას თორნიკე მჟავანაძე იკავებდა, რომელსაც უფლებამოსილების ვადა ამოეწურა. იმავე მიზეზით უსკოს კომისიას დატოვებენ რამაზ გოლომანიძე და ზურაბ გოლიაძეც.
წარდგენილებს შორის არიან: რამაზ ბოლქვაძე – ხულოს საოლქო კომისიის ყოფილი თავმჯდომარე [2006-2010] წლებში.
ირაკლი გვარჯალაძე – ის ბათუმის საოლქო საარჩევნო კომისიაში დროებით წევრად მუშაობდა.
მარიამ გუგუნავა – აჭარის უმაღლესი საბჭოს აპარატის თანამშრომელი და აჭარის მთავრობის თავმჯდომარის თორნიკე რიჟვაძის აპარატის იურიდიული დეპარტამენტის უფროსის მეუღლე. პროფესიით იურისტია და როგორც თვითონ გვითხრა, საარჩევნო მიმართულება ყოველთვის აინტერესებდა: „ამ თემაზე ვწერ სამაგისტრო ნაშრომსაც“.
სოფო დიასამიძე – სტომატოლოგი, რომელსაც საუბნო კომისიებში მუშაობის გამოცდილება აქვს.
ნოდარ მელაძე – ხულოს საოლქო კომისიის მოქმედი თავმჯდომარე.
დავით ფარტენაძე – ის სსიპ ტექნიკური და სამშენებლო ლაბორატორიის თანამშრომელია და აქვს საუბნო საარჩევნო კომისიაში მუშაობის გამოცდილება.
