„უნდა გაიხსნას დარბაზები, ასე არ გამოვა, ყველას ჭამა გვინდა, ბანკის ვალებია, ჩემთან, მაგალითად, 50 კაცი იყო დასაქმებული… რეგულაციებით ქორწილის გადახდა რატომაა დანაშაული?“ – კითხულობს სარიტუალო დარბაზის „დავითის“ ხელმძღვანელი – ომარ ქამადაძე. ის ერთ-ერთია მათ შორის, ვინც დღეს „ეუფორია ბათუმის“ წინ საპროტესტო აქციაზე გამოვიდა. სარიტუალო დარბაზების მფლობელები და იქ დასაქმებული პირები ქორწილების და ქელეხების გამართვის უფლებას ითხოვენ.
„მოდის კლიენტი, თარიღს ვერ ვუნიშნავ, ვრეკავ 144-ზე, მპასუხობენ, რომ სიახლე რამე არ არის… რა საფრთხეა ასეთი, აღარ დასრულდა? ბოლო-ბოლო დაგვიწესონ რეგულაციები ორმეტრიანი დისტანცია, ცალ-ცალკე მაგიდები და იქნება, ბევრი რამის მოფიქრება შეიძლება…“ – გვითხრა ომარ ქამადაძემ.
საპროტესტო აქციის მონაწილეები ამბობენ, რომ თუკი მუშაობის გაგრძელების საშუალება არ მიეცემათ, აქციები პერმანენტულ ხასიათს მიიღებს.
სარიტუალო დარბაზების მუშაობა საგანგებო მდგომარეობის გამოცხადების დროს, მარტში შეჩერდა. ჯერ უცნობია, როდის განახლდება მუშაობა სარიტუალო დარბაზებში.
დღეს მოქმედი იზოლაციისა და კარანტინის წესების მიხედვით, „იზღუდება 10-ზე მეტი ფიზიკური პირის ისეთი თავშეყრა, რომელიც დაკავშირებულია საზოგადოებაში დამკვიდრებულ სოციალურ ღონისძიებებთან (მაგ.: ქორწილი, ნებისმიერი იუბილე, ქელეხი და ა.შ.)“.
