Batumelebi

უმაღლესი საარჩევნო კომისიის ინფორმაციით, 15 საათის მდგომარეობით აჭარის რეგიონში ამომრჩეველთა აქტივობამ ყველა საარჩევნო უბანზე ჯამში 35.97 პროცენტი შეადგინა, რაც რაოდენობრივად 112 023 ამომრჩეველია. ყველაზე მაღალი აქტივობა აჭარის რეგიონში შუახევში დაფიქსირდა.

ბათუმის კენჭისყრაში მონაწილეობა მიიღო 45 466-მა ამომრჩეველმა, რაც 32.22%-ს შეადგენს; ქობულეთში – 26 316 ამომრჩეველი დაფიქსირდა, რაც 37.86%-ია; ხელვაჩაურში 16 100 ამომრჩეველი მივიდა ხმის მისაცემად, რაც 38.05%-ია; ქედაში – 6 353 ამომრჩეველი, რაც 40.42%-ია; შუახევში 6369 ამომრჩეველი გამოაცხადდა, რაც 42.03%-ს შეადგენს და ხულოში – 8921 ამომრჩეველი, რაც 36.32%-ს შეადგენს.

2016 წლის არჩევნებზე, უსკოს 15 საათის მონაცემებით ამომრჩეველთა აქტივობა შეადგენდა 35.32%-ს (108 983 ამომრჩეველი).

უსკოში ამ დროისთვის 17 საჩივარია შესული, მათგან 11 ბათუმის ოლქში დაფიქსირდა, 1 – ქობულეთის ოლქში, დანარჩენი 5 საჩივარი – #30 ხელვაჩაურის, ქედის, შუახევის, ხულოს მაჟორიტარულ საარჩევნო ოლქში.

უსკოს განმარტებით საჩივრები ძირითადად ეხება პროცედურულ ხარვეზებს.

უმაღლესი საარჩევნო კომისიის ინფორმაციით აჭარაში, 12 საათის მონაცემებით, 55 933-მა ადამიანმა, ანუ ამომრჩეველთა 17.76%-მა მიიღო მონაწილეობა.

აჭარაში სამი მაჟორიტარული ოლქია. 12 საათის მონაცემებით აქტივობა ოლქებში ასე გამოიყურება:

• #28 ბათუმის საარჩევნო ოლქი – 16.52% [24 331 ამომრჩეველი];
• #29 ქობულეთის საარჩევნო ოლქი  – 18.38% [13 018 ამომრჩეველი];
• და #30 ხელვაჩაურის, ქედის, შუახევის, ხულოს მაჟორიტარული საარჩევნო ოლქი – 19.20% [18 584 ამომრჩეველი];

დღეს საქართველოს პარლამენტის და აჭარის ავტონომიური რესპუბლიკის უმაღლესი საბჭოს არჩევნები მიმდინარეობს.

აჭარის სამ მაჟორიტარულ ოლქში 314 889 ამომრჩეველია რეგისტრირებული. 147 292 ამომრჩეველია ბათუმში, 70 837 – ქობულეთში, ხოლო 96 760 ამომრჩეველია რეგისტრირებული ხელვაჩაურში, ქედაში, შუახევსა და ხულოში.

“ეზოში არიან შეკრებილი, იქნებ შემოვიდნენ, რა ვიცი… ჯერჯერობით მარტო კომისიის წევრებმა მივეცით ხმა. 8 კონვერტია ჩაგდებული ყუთში,”- ამბობს “ბათუმელებთან” ბიჭიკო შანთაძე. ის ხულოში, სოფელ წაბლანას საარჩევნო უბნის კომისიის თავმჯდომარეა. ამ სოფელში დღეს არჩევნებზე არავინ მიდის.

არჩევნებს ბოიკოტს უცხადებენ სხალთის თემის სოფელ წაბლიანშიც. დღეს არც აქ მოსილა ამომრჩეველი უბანზე.

წაბლანელები რომ არჩევნებზე არ მიდიოდნენ, ამის შესახებ მათ ჯერ კიდევ 5 სექტემბერს თქვეს, როცა ბათუმში საპროტესტო აქცია მოაწყვეს. წაბლანელები ეკომიგრანტები არიან. ისინი აპროტესტებენ, რომ მთავრობა მათ საკუთრებაში გადაცემულ საცხოვრებელ ბინებს არ არემონტებს. წაბლანელები აცხადებენ, რომ მათ მისცეს შავი კარკასი, რომლის გარემონტების საშუალება მათ არ აქვთ.

“რატომაა შერჩევითი მიდგომა, დევნილებს თუ გაურემონტეს ბინები, ჩვენ რა დავაშავეთ?”- კითხულობენ წაბლანელები.

“გადასატან ყუთზე საერთოდ არ შემოსულა მოთხოვნა… სამი დამკვირვებელი გვყავს უბანზე, მეტი არავინ,”- გვითხრა წაბლიანის საუბნო კომისიის თავმჯდომარემ, შალვა თავართქილაძემ.

წაბლიანში 301 ამომრჩეველია, წაბლანაში – 658.

ამავე თემაზე: 

„ლელოს“ მაჟორიტარობის კანდიდატმა ბათუმში ირაკლი კუპრაძემ დღეს, 31 ოქტომბერს, გამართულ ბრიფინგზე საარჩევნო დარღვევებზე ისაუბრა. მისი თქმით, ბათუმის 49-ე საარჩევნო უბანზე 3 მოქალაქე, რომლებიც შარაბიძეების დასახლებაში არიან რეგისტრირებულნი, ხმის მიცემას ხელმეორედ ცდილობდა.

„ჩვენმა დამკვირვებლებმა ამის უფლება არ მისცეს, რადგან მათ უკვე ჰქონდათ მარკირება გავლილი,“- განაცხადა ირაკლი კუპრაძემ.

მისი თქმით, ამავე უბანზე სხვა დარღვევაც გამოვლინდა. კერძოდ, „წილისყრის დროს კომისიის თავმჯდომარის ნებართვით უბანზე დაგვიანებით მოსული „ქართული ოცნების“ დამკვირვებელი შეიყვანეს, მაშინ როცა სხვებს ამის უფლება არ მიეცათ“.

კუპრაძის თქმით, 58-ე საარჩევნო უბანზე გახსნილი ბიულეტენი აჩვენეს დამკვირვებლებს „რაც ასევე დარღვევაა.  63-ე უბანზე კი საკონტროლო ფურცელს არ დაასვეს ბეჭედი, ისე ჩაუშვეს ყუთში“.

ირაკლი კუპრაძის განცხადებით, ხშირია შემთხვევები, როცა ამომრჩევლებს შეცვლილი აქვთ საარჩევნო უბანი, ამის შესახებ კი მათ არ მისვლიათ საარჩევნო ბარათები.

ბათუმის 54-ე საარჩევნო უბანზე ამომრჩეველმა ხმა ვერ მისცა, რადგან იგი სპეცსიაში იყო. ამომრჩეველმა საარჩევნო კომისიას ტელეფონში აჩვენა ელექტრონული ცნობა კოვიდდაწესებულების დატოვების შესახებ, თუმცა საარჩევნო კომისიის თავმჯდომარის თქმით, ცნობა უნდა იყოს ფურცელზე.

„თუ მოიტანს ამობეჭდილს, დავაქსეროქსებთ და ხმას მისცემს,“ – ამბობენ საარჩევნო კომისიაში.

ახალგაზრდა იურისტთა ასოციაციის განმარტებით, ასეთ შემთხვევაში მოქალაქემ დოკუმენტის სახით უნდა წარმოადგინოს ცნობა საარჩევნო უბანზე.

„ერთიანი ნაციონალური მოძრაობის“ წარმომადგენელმა  მირდატ ქამადაძემ დღეს, 31 ოქტომბერს გამართულ ბრიფინგზე განაცხადა, რომ ბათუმში 84-ე საარჩევნო უბნის წინ ბოსტნეულით დატვირთული მიკროავტობუსი იდგა. მისი განცხადებით, ასე მმართველი პარტია ამომრჩევლის მოსყიდვას ცდილობს.

„კარტოფილით, ხახვით და კიდევ სხვა პროდუქტით დატვირთული მიკროავტობუსი იდგა საარჩევნო უბნის წინ და როგორც კი ჩვენმა წარმომადგენლებმა დააფიქსირა ეს ვიდეოში, ისინი გაეცალენ უბანს.

მინდა მოვუწოდო „ქართულ ოცნებას“ და ხელისუფლებას, რომ მიუხედავად იმისა, რომ ხალხი ძალიან გაჭირვებულია, ქართულ საზოგადოებას და ქართველ ამომრჩეველს არ დაუკარგავს თავმოყვარეობა და რასაც თქვენ აკეთებთ ახლა, ეს არის შეურაცხყოფა ქართველი ხალხის,“ – აცხადებს მირდატ ქამადაძე.

მან ბრიფინგზე კიდევ ერთი დარღვევის შესახებ ისაუბრა. მირდატ ქამადაძის განცხადებით, სპეციალურ სიაში მითითებული ერთ-ერთი ამომრჩეველი, რომელმაც გადასატანი ყუთით უნდა ისარგებლოს, საარჩევნო უბანზე ცდილობდა ხმის მიცემას.

„ქართული ოცნება“ ცდილობს კოვიდი გამოიყენოს არჩევნების გასაყალბებლად და ვთხოვთ ადგილობრივ თუ საერთაშორისო დამკვირვებლებს, რომ ამ ფაქტებს მიაქციონ ყურადღება.“

დღეს, 31 ოქტომბერს, საქართველოში საპარალამენტო არჩევნები მიმდინარეობს.

ხულოს მუნიციპალიტის სოფელ წაბლანაში პროტესტი გრძელდება, ამ სოფელში მოსახლეობა არჩევნებს ბოიკოტს უცხადებს.

დღეს, 31 ოქტომბერს, საარჩევნო უბნის ეზოში სოფლის მცხოვრებლები შეიკრიბნენ, თუმცა ისინი ხმის მიცემას არ აპირებენ. „ბათუმელების“ ინფორმაციით, ამ დრომდე სოფელში არჩევნებში მონაწილეობა მხოლოდ საარჩევნო კომისიის წევრებმა მიიღეს, რომლებიც ამ სოფლის მკვიდრები არ არიან.

წაბლანაში ეკომიგრანტები ცხოვრობენ, მათ გაურემონტებელი საცხოვრებელი ბინები ბათუმში მისცეს. ეკომიგრანტები ამბობენ, რომ თუკი დევნილების საცხოვრებელი კორპუსი ბიუჯეტის ხარჯზე გარემონტდა, ეკომიგრანტებსაც უნდა გამოუყონ რემონტისთვის ფული.

წაბლანა მეწყრისგან დაზარალებული სოფელია. 1989 წელს წაბლანაში მეწყერი ჩამოწვა, რის შედეგადაც 19 ადამიანი დაიღუპა. მაშინ სახელმწიფომ წაბლანის გადარჩენილი მოსახლეობა ბათუმში, პანსიონატებში შეასახლა, ბინების გადაცემის პირობით. 29 წლის განმავლობაში ეს პირობა შეუსრულებელი დარჩა, ამიტომ წაბლანელები ისევ დაბრუნდნენ თავიანთ სოფელს.

ვრცლად ამ თემაზე: 

ახალგაზრდა იურისტთა ასოციაცია დღეს, 31 ოქტომბერს, ქვეყანაში მიმდინარე საპარლამენტო არჩევნებზე გამოვლენილ დარღვევებზე საუბრობს.

საიას განცხადებით დღის 10:00 საათისთვის ხმის მიცემის პროცედურები უმრავლეს უბანზე დროულად და არსებითი დარღვევების გარეშე დაიწყო, თუმცა გამოიკვეთა ტენდენცია, რომელიც პროცედურულ დარღვევებს უკავშირდება.

„დარღვევები შეეხება უბანზე დამკვირვებლის არდაშვებას, წილისყრის პროცედურების არასათანადოდ ჩატარებასა და წილისყრით გამოვლენილი ფუნქციების შეუსრულებლობას,“-აცხადებს საია.

ამ ეტაპზე საიას სადამკვირვებლო მისიის დამკვირვებელთა მიერ დაფიქსირდა 10-ზე მეტი დარღვევა, მათ შორის:

• გარდაბნის №19 უბანზე 7 საათის შემდეგ საიას დამკვირვებელი არ შეუშვეს (დაწერილია საჩივარი);
• ზუგდიდის №65 უბანზე დაიწერა საჩივარი წილისყრის პროცედურების დარღვევასთან დაკავშირებით;
• საბურთალოს №23, თელავის №54 და მთაწმინდის №3 უბნებზე წილისყრის პროცედურების შემდეგ გამოვლენილი ფუნქციები თვითნებურად გაცვალეს – უმეტესი მათგანი გასაჩივრებულია;
• შუახევში №41 უბანზე წილისყრები ჩატარდა ერთდროულად (გადასატანი ყუთის წამღები კომისიის წევრების გამოსავლენად, აგრეთვე, სხვა ფუნქციების გასანაწილებლად). ამავე უბანზე გადასატანი საარჩევნო ყუთის წამღებმა კომისიის წევრებმა უარი თქვეს საკუთარი ფუნქციის შესრულებაზე (დაწერილია საჩივარი);
• მარნეულის №85 უბანზე წილისყრის დროს ფუნქციები სხვადასხვა ფერის ფურცლებზე დაწერეს და პროცედურა ასე ჩაატარეს.
• გარდა ამისა, საიას დამკვირვებლებმა დააფიქსირეს ფოტო-ვიდეოგადაღების წესების დარღვევის და ამომრჩეველთა მონაცემების არაკანონიერად დამუშავების ფაქტები (ჩხოროწყუს №17,ზუგდიდის №24 და ბათუმის №35 უბნები). კერძოდ, მედიასაშუალება newpost-ის წარმომადგენლები ამომრჩევლებს სურათებს უღებდნენ არსებული წესების დარღვევით, ახლო დისტანციიდან. ამასთან, არსებული ინფორმაციით, ფოტოგადაღება მიმდინარეობს სპეციალური პროგრამის მეშვეობით, რომლითაც ხდება ამომრჩეველთა სახის დასკანერება, რაც პერსონალურ მონაცემთა დაცვის შესახებ კანონის მოთხოვნათა დარღვევაა.

ამ დროისთვის დარღვევებზე საიას დამკვირვებლებმა 10-ზე მეტი საჩივარი და შენიშვნა დაწერეს.

საიას სადამკვირვებლო მისია კენჭისყრის დღეს საქართველოს ახალგაზრდა იურისტთა ასოციაციას 2020 წლის 31 ოქტომბრის საქართველოს პარლამენტის არჩევნებზე ქვეყნის მასშტაბით 700-ზე მეტი საოლქო და საუბნო დამკვირვებელი ჰყავს.

როგორც საია აცხადებს, მათი დამკვირვებლები ყურადღებას ამახვილებენ როგორც საარჩევნო პროცედურების დაცვაზე (საარჩევნო უბნის გახსნის, ხმის მიცემის და შეჯამების პროცესი), აგრეთვე, მონიტორინგს უწევენ საუბნო საარჩევნო კომისიების მიმდებარე ტერიტორიაზე განვითარებულ მოვლენებს.

„გამოვლენილ დარღვევებთან დაკავშირებით ორგანიზაცია სტრატეგიული სამართალწარმოების მექანიზმსაც გამოიყენებს საოლქო საარჩევნო კომისიებსა და სასამართლოებში“-აცხადებს საია.

______________

ფოტოზე: 31 ოქტომბრის არჩევნები. საარჩევნო უბანი სოფელ დიდაჭარაში.

დღეს, 31 ოქტომბერს, საპარლამენტო არჩევნებთან ერთად აჭარაში უმაღლესი საბჭოს არჩევნები მიმდინარეობს.

ავტონომიური რესპუბლიკის მოსახლეობა დღეს აჭარის საკანონმდებლო ორგანოს, უმაღლეს საბჭოს ირჩევს ოთხი წლის ვადით. უმაღლეს საბჭოში 21 დეპუტატი იქნება, 18 პარტიული სიით არჩეული და 3 მაჟორიტარი.

აჭარის უმაღლესი საბჭოს არჩევნებზე 25 პარტია და ერთი ბლოკია რეგისტრირებული. ასევე, 19 მაჟორიტარი დეპუტატობის კანდიდატია რეგისტირებულ ბათუმში, 13 – ქობულეთში, ხოლო 14 – ხელვაჩაურის, ქედის, შეახევისა და ხოლოს მაჟორიტარულ ოლქში.

აჭარის სამ მაჟორიტარულ ოლქში 314 889 ამომრჩეველია რეგისტრირებული. 147 292 ამომრჩეველია ბათუმში, 70 837 – ქობულეთში, ხოლო 96 760 ამომრჩეველია რეგისტრირებული ხელვაჩაურში, ქედაში, შუახევსა და ხულოში.

___________

ფოტოზე: პირველი ამომრჩეველი სოფელ დიდაჭარის #12 უბანზე. აჭარა, ხულო. ფოტო: „ბათუმელები“, თამარ ნერგაძე

დღეს, 31 ოქტომბერს, საქართველოში საპარლამენტო არჩევნები მიმდინარეობს. საქართველოს მოქალაქეები ოთხი წლით ირჩევენ მეათე მოწვევის პარლამენტს.

საარჩევნო პროცესი საქართველოში დღეს დილის რვა საათზე დაიწყო და საღამოს 8 საათამდე გაგრძელდება.

არჩევნების შედეგად საქართველოს მოსახლეობა ირჩევს პარლამენტის 150 წევრს. 120  პოლიტიკოსი პროპორციული სიით გახდება პარლამენტის წევრი, ხოლო 30 – მაჟორიტარული საარჩევნო სისტემის საფუძველზე.

საქართველოს მოსახლეობამ 48 პარტიასა და 2 ბლოკს შორის უნდა გააკეთოს არჩევანი და, ასევე, აირჩიოს პარტიებისა და საინიციატივო ჯგუფების მიერ წარდგენილი მაჟორიტარი დეპუტატობის კანდიდატები.

2020 წლის არჩევნებზე 3 526 023 ამომრჩეველი აძლევს ხმას, მათ შორის 14 170  საქართველოს მოქალაქე უცხოეთში იმყოფება.

აჭარაში სულ 314 889 ამომრჩეველია. აქედან ყველაზე მეტი, 147 292 ამომრჩეველი ბათუმში ცხოვრობს.

ცენტრალური საარჩევნო კომისიის ინფორმაციით, 2020 წლის საპარლამენტო და უმაღლესი საბჭოს არჩევნებს აკვირდება საარჩევნო სუბიექტების 80 819 წარმომადგენელი, 132 ადგილობრივი დამკვირვებელი ორგანიზაციის 46 981 და 5 საარჩევნო ადმინისტრაციის, 20 საელჩოსა და 23 საერთაშორისო ორგანიზაციის 910 დამკვირვებელი. საარჩევნო პროცესს აშუქებს 118 მედიაორგანიზაციის  5 971 წარმომადგენელი.

31 ოქტომბრის 20.00 საათამდე აკრძალულია არჩევნებთან დაკავშირებული საზოგადოებრივი აზრის გამოკითხვის შედეგების გამოქვეყნება. ოთხი ტელევიზია ეგზიტპოლის შდეგებს სწორედ 20.00 საათის შემდეგ გამოაქვეყნებს.

კოვიდდადებითი პაციენტები, რომელებიც საკუთარ ბინაში, სახლის პირობებში მკურნალობენ, ცენტრალური საარჩევნო კომისიის გადასატანი ყუთის სიაში ვერ მოხვდნენ, რამდენიმე მცდელობის მიუხედავად მათ უარი უთხრეს იმ მიზეზით, რომ ჯანდაცვის სამინისტროს მიერ გადაცემულ სიაში მათი მონაცემები არ იძებნებოდა და შესაბამისად, მათ ცესკო ვერ დაარეგისტრირებდა. მათ შორის არიან მოქალაქე ნინო სიორიძე და მისი ოჯახის კიდევ ორი წევრი.

• ქალბატონო ნინო, როდის მიმართეთ კომისიას და როგორ დაასაბუთა ცესკომ უარი გადასატანი ყუთის სიაში მოხვედრასთან დაკავშირებით?

არჩევნებზე ფიზიკურად მისვლის შესაძლებლობა არ  მეძლევა იმიტომ, რომ კოვიდდადასტურებული ვარ. პასუხი, რომ კოვიდდადებითი ვარ, გავიგე ტესტის აღებიდან სამი დღის შემდეგ.  ჩვენ სამნი ვართ, მე და ჩემი ოჯახის კიდევ ორი წევრი. ჩვენი მონაცემები არ იყო არსად ბაზაში ასახული, შესაბამისად,  როცა ვრეკავდით ცესკოს ცხელ ხაზზე და ვითხოვდით გადასატანი ყუთის სიაში მოხვედრას, გვეუბნებოდნენ, რომ არ ვართ ჯანდაცვის სამინისტროს მიერ გადაცემულ სიაში და არ შეეძლოთ  გადასატანი ყუთის სიაში ჩევეწერეთ. ჯანდაცვის სამინიტროს ცხელ ხაზზე დაკავშირება პრაქტიკულად შეუძლებელია, 20 წუთიანი ლოდინის შემდეგ საერთოდ გამეთიშა ტელეფონი. რაღაც დროის შემდეგ თავიდან დავრეკე, თუმცა იმ დღეს ვერ დავუკავშირდი, შემდეგ კი საერთოდ ჩავიქნიე ხელი, ჩავთვალე, რომ აზრი არ ჰქონდა, რადგან იმ დროისთვის ჩვენ პასუხიც არ გვქონდა ვიყავით თუ არა კოვიდდადებითი.

შემდეგ დაიდო ინფორმაცია, რომ გახანგრძლივდა რეგისტრაციის ვადა და კიდევ შეგვეძლო  გადასატანი ყუთის სიაში მოხვედრა გვეცადა. პირველად ჩვენს შემთხვევაში პრობლემა ის იყო, რომ ინფორმაცია რომ კოვიდდადასტურებულები ვიყავით გვიან მივიღეთ, თუმცა მაშინაც ცხადი იყო, რომ იზოლაციაში, ექიმის მეთვალყურეობის ქვეშ ვიყავით, ოჯახის ექიმი გვიკავშირდებოდა, 112- დანაც დაგვიკავშირდნენ.  ცესკოს პასუხი კი იყო – ასე ვინც დარეკავს ყველა უნდა ავღრიცხოთ მაშინ, წინააღმდეგ შემთხვევაში სამართლიანობა დაირღვევაო. 

• მაგრამ დაირღვა სამართლიანობა სხვა ნაწილში… 

დიახ,  ჯერ ტესტის გაკეთებაც ძალიან პრობლემური იყო. იმ პერიოდში, როდესაც ჩვენ ტესტის გაკეთება დაგვჭირდა, არ გვქონდა ტემპერატურა, თუმცა რეალურად ვიყავი ინფიცირებული პირის კონტაქტი. იყო ალბათობა იმისაც, რომ არ დაგვდასტურებოდა ვირუსი, თუმცა ოჯახის რამდენიმე წევრს უკვე ჰქონდა სიმპტომები, ტესტის გარეშეც გასაგები იყო, რომ ინფიცირებული შეიძლებოდა ყოფილიყვნენ. ჩვენი უფლებაა ვიცოდეთ რაღაც კონკრეტული დაავადებების მატარებლები ვართ თუ არა, ამიტომაც ამ პერიოდში გვინდოდა ტესტი გაგვეკეთებინა, რისთვისაც საკმაოდ დიდი ძალისხმევა დაგვჭირდა. საბოლოოდ ოჯახის ყველა წევრმა ვერ მოვახერხეთ ტესტის გაკეთება, ორნი მივედით მხოლოდ, იმ დღეს ადგილზეც პრობლემა იყო, იმიტომ, რომ არ გვქონდა იმ მომენტში ტემპერატურა და არ  გვიკეთებდნენ ტესტს.

ვისაც არა აქვს ტესტირება საერთოდ გაკეთებული, პრაქტიკულად ვერ მოხვდებოდა ცესკოს სიაში, მთელი ისტორიის მოყოლა გახდა საჭირო, რომ მანამდე კოვიდდადებითან გქონდა კონტაქტი და გვქონდა გამოხატული სიმპტომები, დავკარგეთ სუნის და გემოს შეგრძნება. ჩვენ გვინდოდა გაგვეგო ოჯახის სხვა წევრებისგან ვსაჭიროებდით თუ არა იზოლაციას.

• რატომ არ შეიტანეს თქვენი მონაცემები ბაზაში მას შემდეგ, რაც მოახერხეთ ტესტის ჩატარება და ვირუსი დაგიდასტურდათ?

ვერ გეტყვით, ეს ვერ გავარკვიეთ. როცა დავრეკეთ პოლიკლინიკის ცხელ ხაზზე, მათ გვითხრეს, ჩვენთან კეთება მხოლოდ ლაბორატორიული პროცედურა -ტესტის აღება, პასუხები სხვაგან მზადდება და ისინი უკან პოლიკლინიკას არ უბრუნდებაო, ანუ ისინი ინფორმაციას ვერ გასცემდნენ. მეუბნებოდნენენ დავკავშირებოდი 112-ს.

დავრეკე  112- შიც, მათ კი მითხრეს, რომ ასეთი ინფორმაცია მათთან არ მიდის, ჯანდაცვასთან კიდევ, რაც ხდება ცხელ ხაზზე, ეს თქვენც იცით – ამის შემდეგ ვარჩიეთ უბრალოდ ლოდინი, დავრჩით თვითიზოლაციაში და ველოდებოდით პასუხებს.

ჩემი ოჯახის მაგალითზე შემიძლია ვთქვა, რომ სამი ადამიანი ვართ, ვისაც გვინდოდა ხმის მიცემა გადასატანი ყუთის საშუალებით, მაგრამ არ გამოვიდა. ამ სიაში მოხვედრაზე გვითხრეს უარი.

• ფიქრობთ, რომ სახელმწიფო სტრუქტურებს, ვისაც ამის ორგანიზება ევალებოდა, მეტი ძალისხმევა რომ გაეღოთ, შეძლებდით თქვენი ხმის დაფიქსირებას არჩევნებზე?

ის, რომ საარჩევნო წელია, დიდი ხანია ვიცით. ვიცოდით, რომ აუცილებლად დადგებოდა პანდემიის მეორე ტალღაც, რომ ეს პერიოდი დაემთხვეოდა არჩევნებს – ასეთი მოლოდინები იყო წინასწარ, ამიტომ პირველი გონივრული ეჭვი რაც შეიძლებოდა გაჩენილიყო, იყო ის, რამდენად მაღალი იქნებოდა ამ პირობებში საზოგადოების ჩართულობა არჩევნებში.

შეიძლება ზოგი ფიქრობდა, რომ ჯამრთელობიდან გამომდინარე, გარკვეული რისკების პირობებში,  ადამიანებს უარი ეთქვათ არჩევნებში მონაწილეობაზე, მაგრამ უამრავ ადამიანს, რომელიც ამ რისკის მიუხედავად გამოთქვამს სურვილს დააფიქსიროს თავისი არჩევანი, არ ეძლევა ამის საშუალება. ფაქტია, რომ გადატვირთულია ყველა სისტემა, რომელსაც დაევალა ამ მიმართულებით, თუნდაც სტატისტიკის  მოგროვება. წარმოუდგენელია, რომ ჯანდაცვის სამინისტრო, რომელიც აბსოლუტურად სხვა საქმით არის დაკავებული, ასეთ აღრიცხვას სრულად ჩაატარებდა. ვფიქრობ, რაიმე გამოსავლის მოფიქრება შეიძლებოდა.

•  რა განცდა გაქვთ, გაბრაზებული ხართ?

ალბათ არავის არ აწყობს დაბალი აქტივობა, მაგრამ ფაქტია, რომ ამ პროცესს შევხვდით აბსოლუტურად მოუმზადებელი. შეიძლებოდა მეტი წანდახედულობის გამოჩენა, როგორც საარჩევნო, ასევე პანდემიის მეორე ტალღასთან მიმართებაში.

სოფელი, სადაც არჩევნებზე მისვლას არავინ აპირებს, წაბლანაა. ხულოს ამ სოფელში მოსახლეობა არჩევნებს ბოიკოტს უცხადებს.

„არავინ არ აპირებს მისვლას, დილით საარჩევნო უბანთან დავდგებით, იქ არავინ შევა,“ – ამბობს წაბლანაში მცხოვრები ბაჩი შაინიძე.

წაბლანელები რომ არჩევნებზე მისვლას არ აპირებდნენ, ამის შესახებ მათ აჭარის მთავრობის სახლთან 5 სექტემბერს მოწყობილ ხალხმრავალ საპროტესტო აქციაზე თქვეს. წაბლანაში ეკომიგრანტები ცხოვრობენ, მათ საცხოვრებელი ბინები ბათუმში გადასცეს, თუმცა რემონტის გარეშე. ეკომიგრანტები თვლიან, რომ თუკი დევნილების საცხოვრებელი კორპუსი ბიუჯეტის ხარჯზე გარემონტდა, ეკომიგრანტებსაც უნდა გამოუყონ რემონტისთვის ფული.

დღეს, 30 ოქტომბერს, წაბლანელებს სოფელში კრება მოუწყვიათ და კიდევ ერთხელ უმსჯელიათ, ღირს თუ არა არჩევნებში მონაწილეობა. კრებაზე ბოიკოტი ძალაში დატოვეს.

ხულოს მერის რწმუნებული სხალთაში, რაულ მხარაძე „ბათუმელებთან“ ამბობს, რომ კრებას არ დასწრებია, მაგრამ ამის შესახებ ინფორმირებულია და იცის, რომ მოსახლეობა არჩევნებს ბოიკოტს უცხადებს.

წაბლანაში ამომრჩევლის მისაღებად მზადაა საარჩევნო კომისია, თუმცა კომისიის რომელიმე წევრი ამ სოფლის მკვიდრი არავინ  არის.

„ჩვენ მზად ვართ, თუ მოვლენ, მათი ნებაა, ამომრჩეველს ძალით ხომ ვერ მოიყვან… ჩვენ დაბა ხულოდან ვართ, კომისიის რომელიმე წევრი წაბლანელი არ არის,“ – გვითხრა სოფელ წაბლანას საუბნო საარჩევნო კომისიის მდივანმა, ჯამბულ აბაშიძემ.

წაბლანის მცხოვრებლებს სახელმწიფომ მიწის ნაკვეთი ბათუმში 2018 წელს გამოუყო, სადაც კორპუსი ააშენა და ამ კორპუსში წაბლანელებს ბინები გადასცეს.

1989 წელს წაბლანაში მეწყერი ჩამოწვა, რის შედეგადაც 19 ადამიანი დაიღუპა. მაშინ სახელმწიფომ წაბლანის გადარჩენილი მოსახლეობა ბათუმში, პანსიონატებში შეასახლა, ბინების გადაცემის პირობით. 29 წლის განმავლობაში ეს პირობა შეუსრულებელი დარჩა, ამიტომ წაბლანელები ისევ დაბრუნდნენ თავიანთ სოფელს.

ამ თემაზე:

რას ფიქრობენ ბათუმის მაჟორიტარი დეპუტატობის კანდიდატები, პარტიის ლიდერები, მწვანე პოლიტიკის საკითხებზე? – ამ თემაზე მათ „ბათუმელები“ არჩევნების წინ ესაუბრა. აქ წაიკითხავთ პოლიტიკოსების შეხედულებებს ისეთ თემებზე, როგორიცაა ბათუმის განაშენიანების გენერალური გეგმა, ჰაერის ხარისხი, საჯარო მწვანე სივრცეები, ინფრასტრუქტურული მოწყობა, მშენებლობა და კულტურული მემკვიდრეობა და სხვა. მათი უმრავლესობა აღიარებს, რომ ბათუმში ამ მიმართულებით პრობლემებია.

• „გამოწვევები ექვემდებარება აღიარებას და რეაგირებას“ – თორნიკე რიჟვაძე, „ქართული ოცნება“

აჭარის მთავრობის თავმჯდომარე და „ქართული ოცნების“ უმაღლესი საბჭოს საარჩევნო სიის პირველ ნომერი – თორნიკე რიჟვაძე მიიჩნევს, რომ ერთმნიშვნელოვნად არსებობს გამოწვევები განაშენიანებასთან დაკავშირებით:

„შეცდომები, გადაცდომები შესაძლოა იყოს, თუმცა ჩვენი ხელისუფლების ხედვა, განსაკუთრებით ლოკალურ ჭრილში არის, რომ ეს გამოწვევები, პირველ რიგში, ექვემდებარება აღიარებას და რეაგირებას,“ – გვითხრა თორნიკე რიჟვაძემ.

მან აღნიშნა, რომ ახალ სამშენებლო კოდექსთან ერთად ქალაქს მალე ექნება განაშენიანების გენერალური გეგმა, რომელიც მოაწესრიგებს განაშენიანების პრობლემას: „სამწუხაროა, რომ აქამდე ვერ მომზადდა გენგეგმა, იმედია, ტენდერი ამჟამად წარმატებით ჩატარდება. მანამდე კი გარდამავალ ეტაპზე ყველა პროექტი განიხილება ქალაქის არქიტექტურული სამსახურის მიერ”.

კითხვაზე, არის თუ არა ქალაქში საკმარისი პარკები და სკვერები, აჭარის მთავრობის თავმჯდომარე ამბობს, რომ უფრო მეტია საჭირო:

„წელს, ამ თვეში დავიწყეთ სამი ახალი სკვერის მშენებლობა. არამარტო ცენტრალურ უბნებში, არამედ „პივზავოდზე“, ე.წ. სტეფანოვკაზე, თამარის დასახლებაში და ჩაქვშიც იქნება აუცილებლად სარეკრეაციო სივრცე.

რაც შეეხება ჰაერის ხარისხს, რა თქმა უნდა, კმაყოფილი არ ვარ, თუმცა ეს განგრძობადი პროცესია და ჩვენ პირველ რიგში, რა თქმა უნდა, ჩვენი მოქალაქეების ჯანმრთელობიდან და უსაფრთხოებიდან გამომდინარე ვმუშაობთ ამ საკითხზე და ამაზეც მიდის საუბარი ადგილობრივ და საპარლამენტო დონეზეც, რომ გაუმჯობესდეს ჰაერის ხარისხი, თუმცა ბათუმზე უფრო გაუარესებულია მდგომარეობა დიდ ქალაქებში და პრიორიტეტების მიხედვით მივყვებით ჩვენც“.

თორნიკე რიჟვაძე მიიჩნევს, რომ ბათუმის 3 მთავარი ურბანული პრობლემაა: დენდროლოგია, მშენებლობა და ტრანსპორტი.

• „ჯერ კიდევ შეგვიძლია ვუშველოთ ამ ქალაქს“ – გიორგი კირთაძე, „ნაციონალური მოძრაობა“ 

„ნაციონალური მოძრაობის“ მაჟორიტარობის კანდიდატმა აჭარის უმაღლეს საბჭოში, გიორგი კირთაძემ, ურბანულ თემებზე საუბარი განაშენიანების პრობლემით დაიწყო:

„ძალიან მნიშვნელოვანია „რივიერას“ თემა. მე ვთვლი, რომ იმ ადგილას ბეტონის კედელი არ უნდა აშენდეს. ცალსახად შემიძლია ვთქვა, რომ რივიერას პროექტი ამ სახით არ უნდა განხორციელდეს.

რაღაც წესები და რეგულაციები თავის დროსაც იქნა მიღებული, მაგრამ ამ წესების დარღვევით და გამონაკლისების დაშვებით ძალიან ბევრი ისეთი შენობა აშენდა, რომლებმაც ქალაქს იერსახე შეუცვალა. ვერ ვიტყვი, რომ ბოლომდე ყველაფერი გაფუჭებულია, ჯერ კიდევ შეგვიძლია, რომ ვუშველოთ ამ ქალაქს. ამისთვის საჭიროა სწორი ურბანული განვითარების სტრატეგია და გეგმა. პრობლემაა, როცა ქალაქს ქალაქმშენებლობის დოკუმენტაცია ბოლომდე წესრიგში არ აქვს და, რა თქმა უნდა, ქალაქს უნდა ჰქონდეს განვითარების გეგმა, რომელსაც არ გადაუხვევს“.

კითხვაზე, არის თუ არა ქალაქში საკმარისი გამწვანებული სივრცეები, კირთაძე ფიქრობს რომ არა, და იმის მიუხედავად, რომ გასულ წლებში ბულვარის ზოლი საგრძნობლად გაიზარდა, ქალაქში საჭიროა არსებული სივრცეების სარეკრეაციო ზონებად ქცევა:

„მათ შორის მდინარეების კალაპოტები შემოერთებული ტერიტორიებიდან, მათ შორის მდინარე ჭოროხზე, ჩვენი გეგმით, უნდა მოეწყოს სარეკრეაციო ზონები. ასევე ნავთობტერმინალთან და ქიმიურ ტერმინალთან ერთად, ნაგავსაყრელი ქმნის რთულ ეკოლოგიურ მდგომარეობას ქალაქში, მათ შორის, აბინძურებს ჰაერს.

ის, რომ ბათუმში ურბანული ქაოსია, ცხადია. მაგალითისთვის, იმ ადგილებში, სადაც გზები უნდა გასულიყო, ააშენეს კორპუსები. აღსანიშნავია ისიც, რომ ახალშემოერთებული ტერიტორიების ინფრასტრუქტურული მოწყობა უნდა დასრულებულიყო 2020 წელს და იმის ნაცვლად, რომ წელს დაეწყოთ მაინც, პანდემიის მიზეზით სრულიად ამოიღეს ბიუჯეტიდან, რაც სერიოზული დარტყმაა არამარტო შემოერთებული ტერიტორიებისთვის, ასევე მთელი ქალაქისთვისაც“ – ამბობს გიორგი კირთაძე.

• „ადამიანები ისე ცხოვრობენ ახალ კორპუსებში, რომ მზე ენატრებათ“ – არმაზ ახვლედიანი, „ევროპული საქართველო“

„ევროპული საქართველოს“ მაჟორიტარობის კანდიდატი ბათუმში, არმაზ ახვლედიანი მიიჩნევს, რომ ბოლო წლებში ქვეყნის მასშტაბით ურბანული განაშენიანების კუთხით ყველაზე მეტად ბათუმი დაზარალდა:

„ბათუმში საერთოდ იგნორირებულია სივრცითი მოწყობის თემა, კორპუსები, რომლებიც თავისთავად ძალიან შორს არიან ესთეტიკური კუთხით დახვეწილობისგან, იმავდროულად ისე ახლო-ახლო შენდება ერთმანეთთან, რომ საერთოდ გამორიცხულია ჰარმონიული განაშენიანება, ადამიანები ისე ცხოვრობენ ამ კორპუსებში, რომ მზე ენატრებათ.

ამასთან, ახლად განაშენიანებულ უბნებში იგნორირებულია მწვანე სივრცეები, საპარკინგე ადგილები. ეს არის სრული ქაოსი, რომლის გამომწვევიც არის არასწორი მართვა, მართვა ბათუმის ხელისუფლების მხრიდან, რომელიც საკმარისად არის ჩართული კორუფციაში და გარიგებებში ბიზნესთან და დეველოპერებთან“.

ახვლედიანის აზრით ასევე მნიშვნელოვანი პრობლემაა კულტურული მემკვიდრეობის დაცვის საკითხიც:

„შეიძლება ითქვას, რომ კულტურული მემკვიდრეობის არაერთი ძეგლი დანგრეული და განადგურებულია, რაც შემორჩა, მათ ეზოებშიც უსახური შენობები ჩაიდგა.“

რაც შეეხება მწვანე სივრცეებს, არმაზ ახვლედიანი მიიჩნევს, რომ რა სივრცეც არის დარჩენილი ქალაქში ამჟამად, უნდა იყოს ათვისებული მწვანე სივრცეების სასარგებლოდ, რადგან ამის ნაკლებობა იგრძნობა:

„ბულვარი უნდა იყოს თავისუფალი მშენებლობებისგან. ერთი საკითხია, რომ რაც აშენდა, ამას რა ვუყოთ, მაგრამ ამიერიდან უნდა დასრულდეს, საერთოდ უნდა შეწყდეს მშენებლობა ბათუმის ბულვარის ტერიტორიაზე და უნდა განისაზღვროს ის ზოლი, რომელშიც მშენებლობა იქნება მიუღებელი და გამორიცხული. იგივე ეხება ქალაქის ისტორიულ ნაწილსაც.”

• „მნიშვნელოვანია გაჩნდეს ახალი მწვანე სივრცეები“ – ირაკლი კუპრაძე, „ლელო“

„ლელოს“ მაჟორიტარობის კანდიდატი ბათუმში, ირაკლი კუპრაძე ბათუმის ურბანული პრობლემების სათავეს გენგეგმის არარსებობაში ხედავს:

„ჩემთვის პრობლემურია ყველა ურბანული საკითხი, რომლის თავი და თავიც არის განაშენიანების გენერალური გეგმის არარსებობა. ასევე, მნიშვნელოვანი ნაწილია კულტურული მემკვიდრეობის საკითხი, რომელიც, სამწუხაროდ, ხელისუფლებას არ ესმის, როგორც ქალაქის კულტურული ქსოვილის ნაწილი, რომელსაც ასევე შეუძლია გრძელვადიანი ეკონომიკური დოვლათის მოტანა განსხვავებით იმ კორპუსებისგან, რომლებიც შენდება და აქვს ერთჯერადი ეკონომიკური ეფექტი და შემდგომ მას არანაირი ურბანული და ეკონომიკური ღირებულება არ გააჩნია.

სკვერები და ინფრასტრუქტურა მესამე, ყველაზე მნიშვნელოვანი პრობლემაა. ბათუმში არ არის საკმარისი გამწვანება, რაც აისახება ასევე ჰაერის დაბინძურების მაჩვენებელზე. ინფრასტრუქტურის ნაწილში კი საუბარია გზებზე, სანიაღვრე და საკანალიზაციო სისტემებზე, რომელიც გაუმართავია და არ ფარავს მთლიან ბათუმს“.

კუპრაძის აზრით, ქალაქში მიმდინარე პროცესი ცალსახად ქაოსურია და შორს დგას მეცნიერული გადაწყვეტილებებისგან:

„ქალაქში არსებობს უამრავი მწვანე სივრცე, რომლებსაც არ გააჩნია სტატუსი. იმისთვის, რომ ისინი დავიცვათ და შევინარჩუნოთ, საჭიროა საკრებულომ გასცეს მათზე სარეკრეაციო ზონის სტატუსი. ასევე მნიშვნელოვანია შეიქმნას და გაჩნდეს ახალი, ღია, საჯარო, მწვანე სივრცეები მთელი ქალაქის და არამარტო ცენტრალური ნაწილის ტერიტორიაზე, რომელიც გათვლილი იქნება ადამიანების სოციალიზაციაზე, დასვენებაზე, ასევე მნიშვნელოვანია, მორგებული და ადაპტირებული იყოს ეს სივრცეები, ისევე როგორც მთელი ქალაქი, სპეციალური საჭიროებების მქონე ადამიანებისათვის,“ – ამბობს ირაკლი კუპრაძე.

• „ადამიანებს წართმეული აქვთ მშენებლობის უფლება“ = იაგო ხვიჩია, „გირჩი“ 

2020 წლის საპარლამენტო არჩევნებში იაგო ხვიჩია „გირჩის“ მაჟორიტარობის კანდიდატია ბათუმში. სხვა სუბიექტებისგან განსხვავებით, ის არ საუბრობს განაშენიანების გეგმაზე და ჰაერის დაბინძურებაზე.

„ჩემთვის ამ ქალაქში უმთავრესი პრობლემა ისაა, რომ ადამიანებს წართმეული აქვთ მშენებლობის უფლება და მათ ნაცვლად გადაწყვეტილებას ქალაქის მერია იღებს.

რაც შეეხება იმას, სწორად ვითარდება თუ არა ქალაქი, მე ამ მხრივ სპეციალური განათლება არ მაქვს და ნამდვილად ვერ ვიტყვი, მაგრამ მგონია, რომ ქალაქის განვითარებას არ სჭირდება რამე კონკრეტული გეგმა, ქალაქები ასე არ ვითარდება, ვიღაცები მოდიან, აშენებენ, ქალაქიც იზრდება. ამის გამო ვფიქრობ, რომ ქალაქის მოსახლეობას უნდა ჰქონდეს თავისუფლება, რომ თავისუფლად განვითარდეს.

როცა ინვესტორი მოდის, მან უნდა აწარმოოს მოლაპარაკებები ადგილობრივ მოსახლეობასთან, იმის თაობაზე თუ რას, როგორ ააშენებს. პატივი უნდა ვცეთ ადამიანების კერძო საკუთრებას, რომელსაც შეიძლება ზიანი მიადგეს ამგვარი შეუთანხმებელი მშენებლობით.“ – ამბობს იაგო ხვიჩია.

რაც შეეხება გამწვანებას, იაგო ხვიჩია მიიჩნევს, რომ ბათუმი კომფორტულია ფეხით გადასაადგილებლად. იგი ფიქრობს, რომ უპირველესად მნიშვნელოვანია ეკონომიკური მდგომარეობის გამოსწორება, რადგანაც მსოფლიოს მასშტაბით მწვანე საფარით და ჯანსაღი ჰაერით სწორედ მდიდარი ქვეყნის ქალაქებია გამორჩეული.

• „ამ ქალაქში დიდი ფული კეთდება მშენებლობის ნებართვებზე“ – გენრი დოლიძე, „მოქალაქეები“

„მოქალაქეების“ მაჟორიტარობის კანდიდატის, გენრი დოლიძის აზრით, ბათუმის მთავარი გამოწვევებია ქაოსური მშენებლობა, გენგეგმის არარსებობა და შემოერთებული ტერიტორიების ინფრასტრუქტურული გაუმართაობა.

„ვფიქრობ, პროფესიონალების მიერ შედგენილი ქალაქის გენგემა ამ პრობლემებს მეტწილად მოაგვარებს და ეს მანკიერი, კორუფციული მიდგომები მეტად ვეღარ დააზარალებს ქალაქს. ყველამ ვიცით, რომ ამ ქალაქში დიდი ფული კეთდება მშენებლობის ნებართვებზე, სართულების დამატებაზე და ასე შემდეგ, რასაც ასე თუ ისე გენგეგმის მიღება შეცვლის.

ჩვენ ვამუშავებთ ძალიან კარგ ეკოლოგიურ გეგმას და მალე დავდებთ, ჩვენი ლოგოც მწვანე ფერისაა და გამწვანების საკითხებში მემარცხენე პოზიცია გვიჭირავს, ეს შეიძლება პირდაპირ არ აისახებოდეს ეკონომიკაზე, მაგრამ გამწვანებაში ჩადებული ფული ნიშნავს ჯანმრთელობაში და ქალაქის სილამაზეში ჩადებულ ფულს, რაც აუცილებლად შემოიტანს ირიბ შემოსავალს და მივიღებთ ნაკლებ დანახარჯს ჯანდაცვაში“.

გენრი დოლიძე მიიჩნევს, რომ ქალაქს მეტი მწვანე ზონა სჭირდება, განსაკუთრებით გარეუბნებში, სადაც ნაკლებადაა საჯარო, სარეკრეაციო ადგილები.

• „ახალაშენებული კორპუსების მცხოვრებლებისთვის შესაძლებელია დაემატოს გამწვანება“ – ზაურ გაბაიძე, „პატრიოტთა ალიანსი“

„პატრიოტთა ალიანსის“ მაჟორიტარობის კანდიდატს ზაურ გაბაიძეს მიაჩნია, რომ ბათუმის მთავარი გამოწვევა სანიაღვრე სისტემა და გზებია. მისი აზრით გენერალური გეგმის არარსებობამ გამოიწვია ქალაქის არასწორი ურბანული განვითარება.

„გამწვანების კუთხით ნორმალურია, ბათუმს ყოველთვის ჰქონდა ბულვარი, პარკი, ახალშემოერთებული ტერიტორიებიც ფაქტობრივად სოფელია, მწვანეა. ახალაშენებული კორპუსების მცხოვრებლებისთვის შესაძლებელია დაემატოს გამწვანებები“.

ზაურ გაბაიძე მიიჩნევს, რომ ბათუმში ჰაერის პრობლემას მაღალსართულიანი სახლები ქმნის, რომლებიც, მისი აზრით, ძირითადად ჭაობში უნდა აშენებულიყო. იგი ასევე წინააღმდეგია “ბათუმი რივიერას” მშენებლობის, რომელიც, მისი აზრით, ქალაქს უფრო მეტად ჩაკეტავს, თუმცა საბოლოო ჯამში მაინც კმაყოფილია ჰაერის ხარისხით.

„როცა წვიმს, ქალაქში წყალი დგება, სანიაღვრე სისტემა ვერ იტევს. რიგ ადგილებში ველობილიკების და ტროტუარების გაყვანისთვის გზები შევიწროვდა და შეიძლება ავტომობილის სავალი ნაწილის გაფართოება გახდეს საჭირო,“ – ამბობს ზაურ გაბაიძე.

წაიკითხეთ ამავე თემაზე:

2020 წლის არჩევნების წინ ბევრი დაპირება მოვისმინეთ, მათ შორის მწვანე პოლიტიკასთან დაკავშირებულ თემებზეც. პოლიტიკოსების პოზიცია ძირითადად ასეთია – მწვანე პოლიტიკა კარგია, გვჭირდება, თუმცა იგივე გვესმოდა წინა წლებშიც, არჩევნების შემდეგ კი მწვანე პოლიტიკის საკითხები არაპოპულარული, მეორეხარისხოვანი ხდება პოლიტიკოსებისთვის და როცა არჩევანი მწვანე პოლიტიკასა და ცალკეული ბიზნესკომპანიების ინტერესებს შორის დგება, საკითხი თითქმის ყოველთვის ბიზნესის სასარგებლოდ წყდება.

უცნაურია, რომ ამ არჩევნებზე მწვანე პოლიტიკის თემა განსაკუთრებით აქტუალური არ გახდა ბათუმში, ქალაქში, რომელიც ურბანული კატასტროფის ზღვარზეა, რომლის ბეტონის კედლებში ზღვისპირა ქალაქებისთვის დამახასიათებელი ბრიზის ნაცვლად უკვე სამშენებლო მტვრის ნისლი დგას, სადაც შესაძლებელია ბეტონის ქარხანა უკანონოდ სამი წელი მუშაობდეს ქალაქის შუაგულში და სადაც მწვანე სივრცე მცირდება.

სწორედ ამიტომ გადაწყვიტა „ბათუმელებმა“ დაიწყოს მედიაკამპანია მწვანე პოლიტიკის მხარდასაჭერად. მიგვაჩნია, რომ ეს საშუალებას მოგვცემს, ხაზი გავუსვათ მწვანე პოლიტიკის აუცილებლობას ბათუმში, აჭარის რეგიონსა და საქართველოს სხვა ქალაქებსა და სოფლებში მცხოვრები ადამიანებისთვის.

გვინდა საზოგადოებას, ჩვენს მკითხველს და გადაწყვეტილების მიმღებ პირებს, პოლიტიკოსებს, მუდმივად შევახსენოთ მწვანე პოლიტიკის  მნიშვნელობა და ის შედეგებიც, რაც მის უგულებელყოფას მოჰყვება.

ეს შედეგები სახეზეა და მას ყოველ დღე ვგრძნობთ, ვსუნთქავთ და ვხედავთ.

სამშენებლო მტვერი,  ავტომანქანების გამონაბოლქვი, ქალაქის ქაოსური განაშენიანება, სკვერებისა და პარკების ნაცვლად სამშენებლო მოედნები, პარკინგის არარსებობის გამო ველობილიკებზე გაჩერებული ავტომანქანები ქმნიან გარემოს, რომელიც ამ ქალაქში მცხოვრები ადამიანების ჯანმრთელობას ემუქრება – ბათუმში ჰაერის დაბინძურების მაჩვენებელი მაღალია, რაც ფილტვის დაავადებებს, სიმსივნესა და მძიმე ლითონებით მოწამვლას იწვევს, ბავშვების 85%-ს სისხლში მომატებული აქვს ტყვიის შემცველობა, დამოუკიდებლად გადაადგილება ეტლით მოსარგებლე პირებისათვის რთულია.

ეს უკვე ახლა, ჩვენს თვალწინ ხდება.

როგორი იქნება ეს ქალაქი ხუთი, ათი წლის შემდეგ, თუკი მწვანე პოლიტიკა ისევ მეორეხარისხოვანი და მხოლოდ წინასაარჩევნო პროგრამაში გაწერილი პუნქტი იქნება? სად და როგორ ვიცხოვრებთ? როგორი ჯანმრთელობით?

ამ კითხვებზე პასუხები გვჭირდება საზოგადოებისგან, გადაწყვეტილების მიმღები პოლიტიკოსებისგან, სამშენებლო და სხვა ბიზნესის წარმომადგენლებისგან, რომელთა საქმიანობა პირდაპირ აისახება საზოგადოების საცხოვრებელ გარემოსა და ჯანმრთელობაზე, გვჭირდება მეტი ვიცოდეთ მწვანე პოლიტიკის შესახებ, რომელიც მოიცავს არა მხოლოდ ეკოლოგიურ და გარემოს დაცვით, არამედ სოციალური სამართლიანობის და სხვა მნიშვნელოვან საკითხებსაც და რომელიც სასიცოცხლოდ მნიშვნელოვანია ბათუმისა და საქართველოს სხვა ქალაქებისათვის.

ამ მედიაკამპანიაში „ბათუმელებს“ მხარს უჭერს ჰაინრიჰ ბიოლის ფონდის თბილისის ოფისი.