მთავარი,სიახლეები

წაბლანიდან ბათუმში აქციის გასამართად – „900 ამომრჩეველია ჩვენთან, არჩევნები არ ჩატარდება“ 

05.09.2020 • 1890
წაბლანიდან ბათუმში აქციის გასამართად – „900 ამომრჩეველია ჩვენთან, არჩევნები არ ჩატარდება“ 

„900 ამომრჩეველია ჩვენს უბანზე. არც ერთი ბიულეტენი არ ჩავარდება საარჩევნო ყუთში, თუ არ გაგვირემონტებენ ბინებს“, – აცხადებენ ერას მოედანზე შეკრებილი აქციის მონაწილეები. ისინი სოფელ წაბლანიდან არიან და დღეს ბათუმში სპეციალურად ჩამოვიდნენ აქციის გასამართად.

რა ბინების გარემონტებას ითხოვს წაბლანის მოსახლეობა ან რატომ არის ვალდებული სახელმწიფო მათ საცხოვრებელი გაურემონტოს? – ამ კითხვის პასუხად აქციის ერთ-ერთი მონაწილე აცხადებს, რომ ეს სახელმწიფოს ვალდებულებაა: „ჩვენ დამეწყრილი ოჯახები ვართ. თუ სახელმწიფო მშენებლობას ანიჭებს სოციალურ სტატუსს, ეს იმას ნიშნავს, რომ ეს კორპუსი უნდა გაარემონტოს კიდეც“.

აქციის კიდევ ერთი მონაწილის თქმით, მათი კორპუსის გვერდით სახელმწიფომ კორპუსი ააშენა დევნილებისთვისაც. დევნილების ბინები გაარემონტეს, მათი კი არა.

„მთელ საქართველოში, კახეთიდან დაწყებული, თბილისის შემოგარენში, ხულოს ჩათვლით, თუ ნახავთ ერთ სოციალური სტატუსის მქონე სახლს, რომელიც არ გაარემონტა და ისე გადასცა მოქალაქეებს სახელმწიფო, მაშინ ჩვენ გავჩერდებით. ერთადერთი ჩვენ ვართ, ვისაც აუშენეს სახლები სოციალური სტატუსით და არ გაარემონტეს. ისინი თუ ხელისუფლების ან მთავრობის შეცდომით გახდნენ ლტოლვილები, ჩვენც ბუნებამ დაგვმეწყრა და გავხდით ეკომიგრანტები. რაც იმათ ერგებათ, იგივე გვერგება ჩვენც“, – თქვა აქციის კიდევ ერთმა მონაწილემ.

აქციის მონაწილეები მიმართავენ საქართველოს მთავრობას, ყურადღება მიაქციონ მათ პრობლემას, ხოლო აჭარის მთავრობის თავმჯდომარეს მათთან შეხვედრისკენ მოუწოდებენ: „ჩვენ ვითხოვთ, შეგვხვდეს თორნიკე რიჟვაძე. თუ გვეტყვის, რომ ჩვენ რამეს უკანონოდ ვითხოვთ, ჩვენ ვართ დამნაშავე, წავალთ სახლში. მაგრამ გაგვცეს რეალური პასუხები. მოვიდეს ამ აქციაზე და გვიპასუხოს, რატომ გადასცა ეკომიგრანტებს გაურემონტებელი ბინები? “

ევროპის მოედანზე შეკრებილები ამბობენ, რომ ეს იყო გამაფრთხილებელი აქცია და მეტად აქციის ჩატარებას აღარ გეგმავენ. „ახლა ბურთი მათ მოედანზეა. არანაირი პროტესტის გაგრძელებას არ ვაპირებთ, მაგრამ ჩვენ ვიცავთ ჩვენ უბნებს, სადაც ერთი ბიულეტენი არ ჩავარდება,“ – ამბობს აქციის მონაწილე.

წაბლანის მცხოვრებლებს სახელმწიფომ მიწის ნაკვეთი ბათუმში 2018 წელს გამოუყო, სადაც კორპუსი ააშენა და ამ კორპუსში წაბლანელებს ბინები გადასცეს.

1989 წელს წაბლანაში მეწყერი ჩამოწვა, რის შედეგადაც 19 ადამიანი დაიღუპა. მაშინ სახელმწიფომ წაბლანის გადარჩენილი მოსახლეობა ბათუმში, პანსიონატებში შეასახლა, ბინების გადაცემის პირობით. 29 წლის განმვალობაში ეს პირობა შეუსრულებელი დარჩა, ამიტომ წაბლანელები ისევ დაბრუნდნენ თავიანთ სოფელს.

რას პასუხობს აჭარის მთავრობა აქციის მონაწილეების მოთხოვნებს? – ვკითხეთ აჭარის მთავრობას. „ბათუმელები“ მთავრობის პოზიციას მიღების შემთხვევაში შემოგთავაზებთ.

გადაბეჭდვის წესი


ასევე: