ბათუმში ჰაერში მყარი ნაწილაკების შემცველობა მეორე დღეა დამაკმაყოფილებელ ნორმას აჭარბებს.
ატმოსფერული ჰაერის დაბინძურების მონიტორინგის ავტომატური სადგურის მონაცემებით, 14 ოქტომბრის დღის 3 საათისთვის ბათუმში, ჰაერში მყარი ნაწილაკების [PM10] მაჩვენებელმა 63,41 შეადგინა, რაც ცუდი მაჩვენებელია. ცუდია, ასევე მყარი ნაწილაკების [PM2,5] შემცველობაც – 27,26.
PM2.5 – ჰაერში ამ ნაწილაკების შემცველობის მაჩვენებელი 0-დან 20-მდე არის კარგი, 20-ს ზემოთ კი – საშუალო და ცუდი.
PM10 – ამ ნაწილაკების შემცველობის მაჩვენებელი 0-დან 35-მდე არის ძალიან კარგი და კარგი, 35-დან-50-მდე არის „საშუალო“, ხოლო 50-ს ზემოთ – ცუდი.
ამ ნაწილაკების ჰაერში გაფრქვევის ძირითადი წყაროა: სამშენებლო პროცესები, ღია გრუნტი, შეშის ღუმელები, დიზელის ძრავები, ქვანახშირზე მომუშავე თბოელექტროსადგურები, მრეწველობის სექტორი, ქარის მიერ მიმოფანტული მტვერი და სხვ.
PM2.5 და PM10 ნაწილაკების გავლენა ჯანმრთელობაზე: თვალის გაღიზიანება, ასთმა, ბრონქიტი, ფილტვის დაზიანება, სიმსივნე, მძიმე ლითონებით მოწამვლა, უარყოფითი ზემოქმედება გულსისხლძარღვთა სისტემაზე.
მონიტორინგის ავტომატური სადგურის მონაცემებით, ჰაერის მტვრის მყარი ნაწილაკებით დაბინძურების მაჩვენებელი – „ცუდი“ ბოლოს ბათუმში ივლისში დაფიქსირდა.
გაზაფხულზე კი, პანდემიის გამო დაწესებული შეზღუდვების ფონზე ჰაერის ხარისხი მნიშვნელოვნად იყო გაუმჯობესებული.
ამ თემაზე:
მთავარი ფოტო არქივიდან: კარანტინი ბათუმში / 2020 / ფოტო: მანანა ქველიაშვილი/„ბათუმელები“
