Batumelebi

მოძრაობა „რიონის ხეობის გადარჩენისთვის“ აქტივისტი ვარლამ გოლეთიანი ამბობს, რომ ქუთაისში ნამახვანჰესის საწინააღმდეგო აქციიდან მალხაზ მაჩალიკაშვილი მათ არ გაუძევებიათ და ამ ფაქტთან რიონის ხეობის დამცველებს კავშირი არ აქვთ. გოლეთიანის კომენტარს ინტერნეტგამოცემა „პუბლიკა“ ავრცელებს.

„ინტერნეტ სივრცეში ისტერიულად ვრცელდება ინფორმაცია იმასთან დაკავშირებით, რომ რიონის ხეობის მცველებმა ბატონი მაჩალიკაშვილი გააძევეს აქციიდან, რაც არის მიუღებელი აბსოლიტურად, არანაირი კავშირი არ გვაქვს ამ ყველაფერთან.

ბატონი მალხაზსაც შევეხმიანეთ და მასაც ავუხსენით ეს ყველაფერი. ზოგადად, აქ მოსვლას რაც შეეხება, არავისთვის აკრძალული არაა. თუ რამე დაპირისპირება მოხდა ჩვენ ყველანაირ დაპირისპირებას ვემიჯნებით“-ამბობს ვარლამ გოლეთიანი „პუბლიკასთან“ საუბარში.

ის, რომ რიონის ხეობის დამცველთა წინააღმდეგ პროვოკაციები იგეგმებოდა, ამის შესახებ ვარლამ გოლეთიანმა ჯერ კიდევ 15 აპრილს გააკეთა განცხადება, სადაც ამბობდა რომ ხეობაში თავს იყრიდნენ ერთმანეთთან დაპირისპირებული ჯგუფები, რამაც მათ პროტესტს შესაძლოა საფრთხე შეუქმნას.

„გამომდინარე აქედან, არ გვინდა რომ ამ თემას მოჰყვეს შემდეგი გაგრძელებები ინტერნეტსივრცეში, რომ თითქოს ჩვენ დაპირისპირება გვაქვს ამა თუ იმ ადამიანთან. გვინდოდა ამასთან დაკავშირებით გაგვეკეთებინა განცხადება, რომ აღარ იყოს სპეკულაცია ამ თემებთან დაკავშირებით“-ამბობს გოლეთიანი.

შეგახსენებთ, რომ საპროტესტო აქცია გუმათში დღესაც გრძელდება. აქციის მონაწილეები მოითხოვდნენ გუმათჰესთან პოლიციის მიერ აღმართული რკინის კედლის აღებას, რაც მხოლოდ ნაწილობრივ დაკმაყოფილდა, ხეობის დამცველების განცხადებით, პოლიციამ ბოლომდე უნდა გაათავისულოს გზა რომ ადამიანებს არ შეეზღუდოდ გადაადგილება.

ბოლო 24 საათში  საქართველოში კორონავირუსით 9 ადამიანი გარდაიცვალა. გამოვლინდა ვირუსით ინფიცირების 1 219 ახალი შემთხვევა.

ინფიცირების ყველაზე მაღალი მაჩვენებელი გამოვლინდა თბილისში – 676 შემთხვევა, შემდეგ კი აჭარაში – 126 შემთხვევა.

იმერეთი – 61, ქვემო ქართლი – 51, შიდა ქართლი – 55, გურია – 46, სამეგრელო – ზემო სვანეთი – 123, კახეთი – 39, მცხეთა-მთიანეთი – 29, სამცხე-ჯავახეთი – 9, რაჭა-ლეჩხუმი და ქვემო სვანეთი – 4.

ბოლო 24 საათში ქვეყნის მასშტაბით 34 046 კვლევა ჩატარდა, მათ შორის 21 754 კვლევა ანტიგენის ტესტით და 12 292 PCR ტესტით.

დადებითობის დღიური მაჩვენებელი 3.58 პროცენტია. ბოლო 7 დღის მანძილზე – 3.26 პროცენტი იყო.

ბათუმში დაკავებულ ძმებ წულუკიძეებს და ჭელიძეებს ქუთაისის საქალაქო სასამართლომ აღკვეთი ღონისძიების სახით წინასწარი პატიმრობა შეუფარდა. სასამართლო სხდომა გუშინ, 16 აპრილს, ღამით ჩატარდა.

წულუკიძეების ადვოკატის, ირაკლი შავაძის ინფორმაციით, მოსამართლემ პატიმრობა შეუფარდა 20 წლის ბრალდებულსაც, როცა კანონით არასრულწლოვნის შემთხვევაში მძიმე დანაშაულებზე განრიდება უნდა განიხილონ. კანონის ეს ნორმა 21 წლამდე ასაკის ადამიანებს ეხებათ.

გუშინ, 16 აპრილს, ვიდრე მოსამართლე ქეთევან თხელიძე გადაწყვეტილებას მიიღებდა, ბრალდებულებმა პროტესტის ნიშნად სასამართლო სხდომა დატოვეს. პროცესი დატოვეს ადვოკატებმა – დალი სულაქველიძემ და ირაკლი შავაძემაც.

სასამართლო სხდომა 16 აპრილს პროცესში სახელმწიფო იურიდიული დახმარების ცენტრის იურისტების ჩართვის მოტივით გადაიდო.

“სხდომა ღამით ჩატარდა და ჩვენ აღარ დაგვიშვეს სხდომაზე. მე სხდომა დავტოვე დღისით, იმიტომ, რომ ჩემი დაცვის ქვეშ მყოფებმა დატოვეს სხდომა და უნდა გამერკვია აცილების საკითხი. სხდომიდან მოსამართლეს არ გავუძევებივარ და არც შენიშვნა მოუცია, შესაბამისად, ეს გადაწყვეტილებაც უკანონოა, “- ამბობს ადვოკატი ირაკლი შავაძე.

ირაკლი შავაძემ გუშინ სხდომაზე პროცესის გადადება ითხოვა, თუმცა ამ შუამდგომლობაზე, ასევე მოსამართლის აცილებაზე უარი მიიღო.

ადვოკატებმა ხაზი გაუსვეს იმას, რომ სასამართლომ ერთ საათში ჩანიშნა სხდომა, როცა იქ აღკვეთი შეფარდების შესახებ შუამდგომლობა შევიდა, ამ დროში კი 6 ბრალდებულის საქმის გაცნობა მოსამართლისთვის ფიზიკურად შეუძლებელი იყო. სასამართლოს შეეძლო ეს საქმე დღეს დღის 4 საათამდე განეხილა.

სპორსტმენები რეზო და ფირუზ წულუკიძეების, ასევე თამაზ, ირაკლი, თორნიკე და გელა ჭელიძეები რიონის ხეობის დაცვის აქციაში 12 აპრილს მონაწილეობდნენ. ბრალდებულებს გამოძიება 225-ე მუხლის დარღვევას ედავება, რაც გულისხმობს ჯგუფური ძალადობის ორგანიზებას, ხელმძღვანელობას ან მასში მონაწილეობას.

გამოძიების ვერსიით, ბრალდებულებმა 12 აპრილს ქუთაისში, გუმათჰესის დასახლებაში „ნამახვანჰესის” მშენებლობასთან დაკავშირებით მიმდინარე საპროტესტო აქციაზე ჯგუფურად იძალადეს და ფიზიკური დაზიანებები მიაყენეს აქციაზე მყოფ სამ პირს. ასევე, დააზიანეს ერთ-ერთი დაზარალებულის კუთვნილი ავტომანქანა.

ბრალდებულები ბათუმში 15 აპრილს დააკავეს.

ნამახვანჰესის მშენებლობის წინააღმდეგ გამართული აქციების ერთ-ერთი ორგანიზატორი მირზა ნოზაძე ამბობს, რომ აქციაზე მყოფი ადამიანები, რომლებიც დააკავეს, პროვოკაციას წამოაგეს რელიგიური ნიშნით.

ბრალდებულები წარდგენილ ბრალს არ აღიარებენ.

ადვოკატი ირაკლი შავაძე ყურადღებას ამახვილებს ერთ გარემოებაზე – გამოძიება 225-ე მუხლის მეორე ნაწილის მიხედვით დაიწყო:

“მეორე ნაწილი გულისხმობს მონაწილეობს ჯგუფურ ძალადობაში, მაგრამ თავად ჯგუფურ ძალადობაზე, ანუ ამ მუხლის პირველი ნაწილით საერთოდ არ არის დაწყებული გამოძიება. ერთია, რომ შესაძლოა ამას ვერ ამტკიცებდეს პროკურატურა, მაგრამ გამოძიება არ არის საერთოდ დაწყებული,”- აღნიშნავს ადვოკატი ირაკლი შავაძე.

_____________

რევაზ და ფირუზ წულუკიძეები არაერთხელ მიუციათ წარსულში სისხლის სამართლის პასუხისგებაში. ისინი მიიჩნევენ, რომ მათ განსხვავებული პოლიტიკური შეხედულებების გამო სჯიან.

ბოლო შემთხვევის დროს სპორტსმენი და ევროპის ჩემპიონი ჭიდაობაში ფირუზ წულუკიძე ამბობდა, რომ მისი ძმა – რეზო წულუკიძე იმიტომ დასაჯეს, რომ მან ხელისუფლებას წინასაარჩევნოდ დახმარებაზე უარი უთხრა.

რეზო წულუკიძის ძმამ, ფირუზ წულუკიძემ, აჭარის მთავრობის აპარატთან გამართულ ერთ-ერთ აქციაზე თქვა, რომ მათ წინასაარჩევნოდ დახმარებას და პრაქტიკულად, ზონდერჯგუფის შექმნას სთხოვდნენ. ამ საქმეზე საბოლოოდ ბათუმის საქალაქო სასამართლომ ძალადობა დაადგინა და არა ჯგუფური ხულიგნობა, რასაც პროკურატურა ედავებოდა რეზო წულუკიძეს ელდარ ანთაძესთან ერთად.

შს სამინისტროს ინფორმაციით, 1958 წელს დაბადებული თ.ს. წინასწარი შეცნობით თოთხმეტი წლის ასაკს მიუღწეველი პირის მიმართ ჩადენილი გარყვნილი ქმედების ბრალდებით  დააკავეს.

შსს-ს პრესრელიზში საუბარია გარყვნილი ქმედების ორ ეპიზოდზე.

„ჩატარებული გამოძიებით დადგინდა, რომ 2019 წელს, საცხოვრებელ კორპუსთან განთავსებულ ავტოფარეხში, თ.ს.-მ გარყვნილი ქმედება განახორციელა მისთვის წინასწარი შეცნობით თოთხმეტი წლის ასაკს მიუღწეველ, 7 წლის ლ.ბ.-ის მიმართ. ამასთან, 2021 წლის 8 აპრილს, არასრულწლოვანმა ლ.ბ.-მ ქუჩაში დაინახა თ.ს., შეეშინდა და გაიქცა, შემდგომ კი თხრილში ჩავარდა.

გამოძიებით დადგინდა ასევე, რომ 2021 წლის იანვარში, თ.ს.-მ გარყვნილი ქმედება განახორციელა ლ.ბ.-ის მეგობრის, მისთვის წინასწარი შეცნობით 16 წლის ასაკს მიუღწეველ, მ.ზ.-ის მიმართ.

ჩატარებული საგამოძიებო მოქმედებების შედეგად, სამართალდამცველებმა თ.ს. წინასწარი შეცნობით თოთხმეტი წლის ასაკს მიუღწეველი პირის მიმართ ჩადენილი გარყვნილი ქმედების ბრალდებით, თბილისში დააკავეს“-ნათქვანმია შსს განცხადებაში.

გამოძიება სისხლის სამართლის კოდექსის 141-ე მუხლის პირველი და მეორე ნაწილის „ვ“ ქვეპუნქტებით მიმდინარეობს.

დანაშაული 8-დან 12 წლამდე ვადით თავისუფლების აღკვეთას ითვალისწინებს.

ბინის ყიდვა გსურთ და დაახლოებით მაინც იცით, როგორ გარემოში გინდათ ცხოვრება, წარმოგიდგენიათ როგორი უნდა იყოს ოთახები: ნათელ ფერებში გადაწყვეტილი თუ შედარებით მუქი და ექსტრავაგანტური. ინტერიერის დიზაინი გემოვნების საკითხია, მაგრამ ბინის ყიდვისას, სანამ ინტერიერამდე მივა საქმე, მნიშვნელოვანია დავაკვირდეთ კორპუსის სამშენებლო მასალების ხარისხს, ბინამდე მიყვანილ კომუნიკაციებს, სადარბაზოს სტანდარტს, ლიფტის ხარისხს, პარკინგის ხელმისაწვდომობას და ა.შ.

ბინის ყიდვისას უამრავი წვრილმანია გასათვალისწინებელი, რაც სამომავლოდ მყარ გარანტიებს და უსიამოვნო სიურპრიზებისგან თავის არიდებას ნიშნავს. არქიტექტორი გიორგი რამიშვილი იმ ძირითად საკითხებზე გვიზიარებს პროფესიონალურ რჩევებს, რასაც აუცილებლად უნდა მივაქციოთ ყურადღება საცხოვრებელი ბინის შეძენისას.

სამშენებლო მასალები

აუცილებლად უნდა შემოწმდეს ქვა, ე.წ. ბლოკი, რითაც სახლი შენდება. არის ქვა, რომელიც ხელითაც კი იმტვრევა. გასათვალისწინებელია კორპუსის, ბინის გარე კედლის სისქე. გარე კედელი 25 სმ-იანი სიგანის „ბლოკით“ უნდა იყოს ნაშენი. საქართველოში ძირითადად 20 სმ-იანი ქვით აშენებენ გარე კედელს, რაც არ არის იდეალური, რადგან კონდენსატს – ნესტსა და ობს იდებს ასეთი სისქის კედელი.

ზოგადად, თბური დაცვის ხარისხი სხვადასხვა სამშენებლო მასალას სხვადასხვაგვარი აქვს. ყველაზე ხელსაყრელი ამ მხრივ აგურია, მაგრამ მაღალი ფასის გამო საქართველოში იშვიათად ვხვდებით აგურით ნაშენ გარე კედლებს ახალ კორპუსებში. თუ ასეთს იპოვით – საუკეთესო შემთხვევისთვის მიგიგნიათ.

თბომედეგობა სხვადასხვა მასალას სხვადასხვა აქვს, კარგ საშენ მასალად მიიჩნევა გარე კედლისთვის მსუბუქი პემზა, რომელიც კარგად უზრუნველყოფს გამტარობას.

სამშენებლო კომპანიის სანდოობა

თუ მშენებარე ბინას ყიდულობთ, აუცილებელია გადაამოწმოთ სამშენებლო კომპანიის სანდოობა, არსებობს სპეციალური ბაზები, სადაც ამა თუ იმ კომპანიის მიერ განხორციელებული პროექტების სია შეგიძლიათ ნახოთ და ადგილზევე დაათვალიეროთ შენობა, ასევე შესაძლებელია მოძიება რამდენად კეთილსინდისიერად წარმართავს კომპანია მშენებლობის პროცესს, აქვს თუ არა დარღვევები მშენებლობის პროცესში და დროულად, გათვალისწინებულ ვადაში ასრულებს თუ არა მშენებლობებს. თუ სამშენებლო კომპანია ბევრჯერაა დაჯარიმებული, არღვევს წესებს და აქვს ანგარიშზე რამდენიმე შენობა, რომლებიც ვერ დაასრულა, არსებობს შანსი, რომ თქვენი მშენებარე ბინაც ვერ ჩაბარდეს დროულად.

სამწუხაროდ, საქართველოში არ ფუნქციონირებენ შუამავალი საკონსულტაციო კომპანიები, რომლებიც დაეხმარებოდნენ ბინის მყიდველებს მთელ ამ პროცესში და შესაბამისად ბინის მყიდველს უწევს თავად გაარკვიოს ნაცნობი სპეციალისტების დახმარებით ბევრი რამ.

მნიშვნელოვანია იურიდიული მხარე, ხომ ნამდვილად თავისუფალია ბინა, არავის სახელზეა და ხომ არ არსებობს გადაყიდვის შესაძლებლობა – უმარავი თაღლითია, ვინც ერთსა და იმავე ბინას რამდენიმე ადამიანზე ყიდის, ყველასგან იღებს თანხას და გარბის. მნიშვნელოვანია იცოდეთ, ბინა ჩაბარებულია თუ არა ქალაქის მერიას, ანუ მიღებულია თუ არა ექსპლუატაციაში. ჩაუბარებელ ბინაში ცხოვრება არასახარბიელოა: ეს ნიშნავს, რომ მშენებელს ჯერ არ აქვს დასრულებული სამშენებლო პროექტით გათვალისწინებული ვალდებულებები.

ლიფტი

მნიშვნელოვანია დავაკვირდეთ ლიფტს: რომელი და როგორი კომპანიის ლიფტია დამონტაჟებული, ხომ არ არის თვითნაკეთი, აქვს თუ არა გავლილი შემოწმება, სასურველია, თუ შენობის ყველა დანადგარის შემოწმების დოკუმენტს გავეცნობით, რადგან ხშირად სახელმწიფო ზერელედ ასრულებს ამგვარ სამუშაოებს.

როცა ბინა ლიფტის გვერდითაა

სასურველია ბინა ლიფტის გვერდით არ იყოს. საბჭოთა ეპოქაში იყო სტანდარტი, რომ საძინებელი და მისაღები ოთახი არ ყოფილიყო ლიფტთან ახლოს. მაგრამ თუ ეს ასე მოხდა, უნდა გაითვალისწინოთ, რომ მოსალოდნელია მუდმივი ხმაური, რაც გაღიზიანებას იწვევს. ლიფტთან საერთო კედელი თითქმის გარე კედელია. თუმცა არსებობს ულტრათანამედროვე ლიფტები, რომლებსაც ხმა თითქმის არ აქვთ, მაგრამ ასეთ კედელს, რომელიც ლიფტის გვერდითაა, მაინც სჭირდება სპეციალური დამუშავება ხმაურის და ტემპერატურის ცვალებადობისგან დასაცავად.

თუმცა უნდა აღინიშნოს, რომ ლიფტის შახტის კედელი შენობაში ყოველთვის მდგრადია და ჩამოსხმული კედლისგანაა ნაშენი.

ვენტილაცია

დერეფნის ტიპის კორპუსებში, როგორებიც ახლა შენდება საქართველოში, ძირითადად არის ბინები, რომლებსაც ფანჯრები მხოლოდ ერთ მხარეს აქვს და არ არის გამჭოლი.

არ აქცევენ ხშირად ყურადღებას შენობის სანიტარულ პირობებს, განათებას, განიავებას, ვენტილაციას, გამჭოლ განიავებას, ყველაზე ცუდ შემთხვევაში მინიმუმ უნდა იყოს კუთხის განიავება ბინაში.

თუ დერეფნული სისტემისაა კორპუსი, აუცილებლად უნდა იყოს დამონტაჟებული  ვენტშახტები გასანიავებლად.

თანამედროვე მიდგომებით სადარბაზოს სასურველია ჰქონდეს სივრცე: ველოსიპედის, საბავშვო ეტლების გასაჩერებლად, ფოსტის ყუთების განსათავსებლად და ა.შ. დაუშვებელია სადარბაზოს ფასადზე ღიად გადიოდეს  სხვადასხვა კომუნიკაციის მილები.

აუცილებელია ასევე მოვითხოვოთ დენის, გაზისა თუ წყლის კომუნიკაციების გამოცდის აქტი, რაც აჩვენებს, რომ ამ ყველაფრის მილები გამოცდილია და ექსპლუატაციისთვის უსაფრთხოა.

ინსოლაცია

ბინაში მინიმუმ 2-საათიანი განუწყვეტელი ინსოლაცია უნდა იყოს, ეს არის აუცილებელი დრო,  რომ მზემ მიკრობები და ბაქტერიები გაანადგუროს საცხოვრებელ სივრცეში.

იმისთვის, რომ მზე კარგად ეფინებოდეს სახლს, სამხრეთ აღმოსავლეთის მხარეა საუკეთესო, სამხრეთ დასავლეთის მხარეც არ არის ურიგო ამ მხრივ, ჩრდილოეთით მდებარე ბინას ცხადია მზე არ მიადგება.

განვითარებულ ქვეყნებში არის პრაქტიკა ხელოვნური კლიმატის რეგულირებისა სასტუმროებში – ძირითადად, ხანდახან საცხოვრებელ ბინებშიც. რაც ნიშნავს, რომ რეგულირდება ტენიანობა, გათბობა-გაგრილება სტანდარტულად და გარკვეული პერიოდულობით იცვლება ოთახში ჰაერი სპეციალური დანადგარებით.

ქუჩის თუ ეზოს მხარე?

როგორც გიორგი რამიშვილი გვეუბნება, ჰქონია შემთხვევა, როცა კორპუსში ეზოს მხარეს ბინებს მხოლოდ უცხოელები ყიდულობდნენ, ადგილობრივები კი არჩევდნენ ბინას ქუჩის მხარეს. რატომღაც მიიჩნევა, რომ ბინა ქუჩის მხარეს სჯობს, თუმცა ასეთი მდებარეობის საცხოვრებელში ხშირად ხმაურია, მაღალ სართულებზეც. ეზოს მხარეს ბინა შედარებით მშვიდია. მყუდროდ ცხოვრების მოყვარულები, თუ ბინას ეზოსა და ქუჩის მხარეს თანაბარი მოცემულობები აქვს, არჩევენ ბინას ეზოს მხარეს. თუმცა ბინა ქუჩის ხედით გაცილებით ინტერაქციულია და ვისაც ხმაური არ აღიზიანებს, შეიძლება ძალიანაც მოსწონდეს ასეთ ბინაში ცხოვრება.

ჭერის სიმაღლე

არსებობს გაბატონებული აზრი, რომ მაღალი ჭერი კარგი და პრესტიჟულია. ვიზუალურად ეს მართლაც ასეა: სივრცე ჩანს დიდი. თუმცა თუ ასეთ ბინას ვარჩევთ საცხოვრებლად, უნდა გვახსოვდეს, რომ დაგვჭირდება სახლის იმაზე მეტად გათბობა, ვიდრე საშუალო სიმაღლის ჭერის მქონე ბინას დასჭირდებოდა. მაღალჭერიანი ბინა ნაკლებად ენერგოეფექტურია – ზამთარში თბილი ჰაერი მაღლა ადის და გათბობის  მაღალ ტემპერატურაზე ჩართვა დაგჭირდებათ მუდმივად, ოთახების თანაბრად გასათბობად. ამერიკაში ჭერის სიმაღლის სტანდარტი სწორედ ენერგოეფექტურობის შესანარჩუნებლად არცისე მაღალია: 2,40 მ. საერთოდ კი, ოპტიმალურ სიმაღლედ, ზოგადად, მიიჩნევა 2,70-დან 3 მეტრამდე ჭერი.

თუ  ბინის ფართობი დიდია, შესაბამისად ჭერიც მაღალი სჯობს. მაღალჭერიან ბინას ასევე სჭირდება გაცილებით მეტი ჰაერი და უფრო ხშირი, ხანგრძლივი განიავება.

წინ რამეს ხომ არ ამიშენებენ?

არანაირი გარანტია არ გაქვთ, რომ თქვენი საცხოვრებელი ბინის წინ რაიმეს არ ააშენებენ, მით უფრო იმ შემთხვევაში, თუ წინ კერძო სახლები ან სულაც ცარიელი ადგილია. თქვენივე ბინის მშენებელი კომპანიის დაპირება, რომ „წინ არაფერი აშენდება“ ფუჭია. ასეთი დაპირების გაცემა შეუძლებელია. ერთადერთი, რაც შეგიძლიათ, დაკვირვებაა: თუ წინ კერძო სახლებია ან ცარიელი ნაკვეთი, დიდი ალბათობით თქვენ წინ ერთხელაც რამეს ააშენებენ.

ღია გრუნტი კორპუსის ეზოში

ყველა  ცალკე აღებულ სამშენებლო ადგილას უნდა დარჩეს ღია გრუნტი, რომელიც გაატარებს ამ ნაკვეთზე მოსული ნალექისგან დარჩენილ წყალს, ანუ გრუნტში გაჟონავს,  ნაკვეთზე მოსული ნალექი წვიმისა და თოვლის სახით, მთლიანად არ უნდა მოხვდეს სანიაღვრე ქსელში. სანიაღვრე ქსელი, რომელიც მთელ ქალაქში მოსულ ნალექს დაიტევს, გაატარებს და სადმე გადაისვრის, არსად არსებობს.

კარგად დააკვირდით, არის თუ არა მიწის დაუბეტონებელი გრუნტი დატოვებული თქვენს ეზოში. ასეთი გრუნტი სამშენებლო ნაკვეთის  10, 15 % -ს უნდა შეადგენდეს. ამ მოცულობის მიწას შეუძლია მოსული ნალექისგან წარმოქმნილი წყლის 40%-ის გატარება, თანაც ისე უნდა იყოს მოწყობილი სივრცე, რომ წყლის ნაკადი მიემართებოდეს გრუნტისკენ.  წინააღმდეგ შემთხვევაში წვიმისა და თოვლის შემდეგ ეზოში მუდმივად დაგუბებულ ტბებს უნდა ელოდოთ.

არსებობს ფორმალური მოთხოვნები ახალი კოდექსის ამოქმედებასთან ერთად, რომ უკვე ექსპლუატაციაში შესული სახლის მონიტორინგიც განხორციელდეს და გაკონტროლდეს რა როგორ მუშაობს, მაგრამ ამ საქმის შემსრულებელი რეალური სამსახური ჯერ არ არსებობს, მხოლოდ მშენებლობის პროცესში ხდება ბინის შემოწმება.

სამწუხაროდ სამშენებლო მასალების სერტიფიცირებაც საქართველოში ნებაყოფლობითია, უმეტეს მასალაზე ასეა. უკეთეს შემთხვევაში სამშენებლო კომპანია არმატურას ცდის სპეციალური დანადგარებით – გაწყვეტასა და ბეტონშეკუმშვაზე, რაღაც პერიოდულობით ცდიან უძლებს თუ არა ნორმატიულ დაწოლას არმატურა, ეს საკითხები შეეხება შენობის საიმედოობას, სიმტკიცესა და მდგრადობას – კარგია, თუ ჰკითხავთ ბინის ყიდვისას მენაშენეს, აქვს თუ არა ჩატარებული ძირითად სამშენებლო მასალებზე მსგავსი ცდები.

საპენსიო სააგენტოს ინფორმაციით, 2021 წლის 12 აპრილის მდგომარეობით საპენსიო აქტივების მოცულობამ 1 მილიარდ 37 მილიონი ლარი შეადგინა. აქედან 140 მილიონი ლარი დარიცხული სარგებელია.

„საპენსიო აქტივები განთავსებულია ქართულ კომერციულ ბანკებში და ერიცხება ეფექტური წლიური 10.7% სარგებელი. საპენსიო აქტივების 65% განთავსებულია სადეპოზიტო სერტიფიკატებში და ვადიან დეპოზიტებში, ხოლო 35% სარგებლიან მიმდინარე ანგარიშებზე.“ – აცხადებენ სააგენტოში.

დაგროვებითი პენსიით უკვე ისარგებლა 765-მა ადამიანმა. მათ შორის: საპენსიო ასაკის შესრულების საფუძვლით ისარგებლა 323-მა, შეზღუდული შესაძლებლობების მქონე პირის სტატუსით – 321-მა, საზღვარგარეთ მუდმივსაცხოვრებლად გადასვლის გამო 1-მა და მემკვიდრის უფლებით 120-მა პირმა.

12 აპრილის მდგომარეობით საპენსიო სქემაში სულ ჩართულია 1 137 380 პირი. სქემაში ჩართულ კერძო ორგანიზაციათა რაოდენობა კი 74 646-ია. საპენსიო სააგენტოს ინფორმაციით, თვეში საშუალოდ 11 000-ზე მეტი ადამიანი ემატება სქემას.

საპენსიო სააგენტო გეგმავს შეიძინოს Bloomberg-ის ტერმინალი, რისთვისაც 63 563 აშშ დოლარს გადაიხდის. სააგენტოს განცხადებით, „Bloomberg-ტერმინალს აქვს მომსახურების სხვადასხვა პაკეტები, რომლებსაც შესაბამისი ღირებულება აქვთ. აღნიშნული მომსახურების პაკეტებიდან შერჩეულ იქნა მინიმალური ღირებულების პაკეტი“.

„აღნიშნული პროდუქტი წარმოადგენს პროგრამას, რომელიც საინვესტიციო რისკების გაზომვისა და შეფასების საუკეთესო საშუალებაა. საპენსიო სააგენტოს რისკის კონტროლის სამსახურის საქმიანობის ძირითად მიმართულებას წარმოადგენს საინვესტიციო რისკების იდენტიფიცირება, გაზომვა, შეფასება, კონტროლი და მონიტორინგი. აღნიშნული საქმიანობის სრულყოფილად განხორციელებისათვის აუცილებელია Bloomberg-ტერმინალის გამოყენება.“ – აცხადებს სააგენტო.

—

საპენსიო სააგენტოს დირექტორად 2021 წლის 15 დეკემბრიდან გიორგი დანელია მუშაობს, რომელიც ამ დრომდე საპარტნიორო ფონდის აღმასრულებელი დირექტორის მოადგილე იყო:

ბათუმის ბულვარის ადმინისტრაცია დღესაც ამტკიცებს, რომ ბულვარის განაშენიანების გეგმა სრულად არ ჩაჰბარებია, კომპანია „ბაუ დიზაინი“ კი ამტკიცებს, რომ ჩააბარა. დოკუმენტი არც ინსპექტირების ჯგუფის წევრებს მიუღიათ.

დღეს, 16 აპრილს, ბათუმის ბულვარის ადმინისტრაციაში განგვიმარტეს, რომ შპს „ბაუ დიზაინს“ ბულვარის განაშენიანების გეგმა სრულად  ისევ არ ჩაუბარებია მიუხედავად იმისა, რომ დოკუმენტის ჩაბარების ბოლო ვადა იყო 14 აპრილი. „ბათუმელებმა“ ამ დოკუმენტის ასლი 15 აპრილს გამოითხოვა, თუმცა ის არ მოგვაწოდეს იმავე მიზეზით, რომ ის არ არის ჩაბარებული სრულად.

კომპანია „ბაუ დიზაინმა“ კი ფეისბუქის საკუთარ გვერდზე დაწერა, რომ პარტნიორთან ერთად დაასრულა ბულვარის განაშენიანების გეგმაზე მუშაობა და დოკუმენტი დამკვეთს, ბულვარის ადმინისტრაციას გადასცა. კომპანია დაახლოებით ერთ  კვირაში დოკუმენტის საჯარო განხილვის მოწყობას გეგმავს. სატელეფონო საუბრისას იგივე ინფორმაცია კომპანიის დირექტორმა, მიხეილ ბალიაშვილმა „ბათუმელებსაც“ დაუდასტურა.

ბულვარის ადმინისტრაციაში კი გვარწმუნებენ, რომ კომპანიას მათთვის დოკუმენტი სრულად არ ჩაუბარებია:

„ნამდვილად ასეა, სრულად არ არის ჩაბარებული. რაღაც ნაწილი ინგლისურ ენაზეა, ყოველ თითო საათში რაღაც-რაღაცებს ამატებენ და ტვირთავენ. ჩვენთან არ არის მოსული და თქვენთან რას ამბობენ,  ნამდვილად არ ვიცი. ალბათ იტყუებიან, ჩვენთან დოკუმენტი ნამდვილად არ არის მოსული სრულად. შეგიძლიათ გადაამოწმოთ“.

ბულვარის ადმინისტრაციის დირექტორის მოვალეობის შემსრულებელი, დავით სურგულაძე არც იმას გამორიცხავს, რომ კომპანია დოკუმენტის ჩაბარების დაგვიანებისთვის დააჯარიმონ:

„დედლაინი იყო 14 აპრილს, იმ დროიდან ყველა ვადაგადაცილებულ დღეზე არის საჯარიმო სანქცია. ჩვენი მიზანია ეს დოკუმენტი მივიღოთ, გავასაჯაროოთ და საჯარო განხილვაც მოვაწყოთ, როგორც წესი და რიგია.“

იმის გასარკვევად, თუ ვინ ამბობს სიმართლეს, დავუკავშირდით ინსპექტირების ჯგუფის წევრს, ნათია აფხაზავას. ნათიას თქმით, დოკუმენტი არც ინსპექტირების ჯგუფისთვის გადაუციათ. ნათია ამ ჯგუფში შედის როგორც „ბათომის“ წარმომადგენელი.

მას შემდეგ, რაც მიმწოდებელი კომპანია დოკუმენტის საჯარო განხილვას მოაწყობს, დამკვეთის შენიშვნებისა და საჯარო განხილვის შედეგად დაფიქსირებული მოსაზრებების საფუძველზე, დოკუმენტი შეიძლება შეიცვალოს, რაც საბოლოო ვერსია იქნება.

კომპანია აღიარებს ასევე, რომ გარკვეული მიზეზების გამო, დოკუმენტის მცირე ნაწილის მიწოდება დამკვეთისთვის 1 დღით დააგვიანა:  „თუმცა ამ მომენტისთვის ის სრულად არის ჩაბარებული“.

ქუთაისის საქალაქო სასამართლოში დაიწყო ძმები წულუკიძეების, ჭელიძეების და კიდევ ორი პირის სასამართლო პროცესი აღკვეთის ღონისძიების შესახებ.

პროკურატურა მათ ჯგუფური ძალადობის ორგანიზებას და მასში მონაწილეობას ედავება. ფაქტზე გამოძიება საქართველოს სისხლის სამართლის კოდექსის 225-ე მუხლითაა დაწყებული.

ბრალდებულების ინტერესებს ორი ადვოკატი – ირაკლი შავაძე და დალი სულაქველიძე იცავს.

ადვოკატების ინფორმაციით, სასამართლო სხდომა პროკურატურის შუამდგომლობიდან ერთ საათში ჩაინიშნა, ეს დრო კი არასაკმარისი იქნებოდა საქმის მასალების გასაცნობად.

სხდომის დაწყებისას დაკავებულების ადვოკატმა ირაკლი შავაძემ მოსამართლის აცილების შუამდგომლობა დააყენა. მიზეზად კი დაასახელა, რომ არასაკმარისი დრო ჰქონდა მტკიცებულებების გასაცნობად.

ადვოკატმა მოსამართლეს მოუწოდა, რომ უზრუნველყოს დაკავებულთა სამართლიანი სასამართლოს უფლებით სარგებლობის უფლება.

„მხოლოდ ფირუზ წულუკიძის გამოკითხვის ოქმი 13 ფურცელია. მარტო იმის წასაკითხად გჭირდებათ დრო. არ იცნობთ კარგად საქმის მასალებს. გთხოვთ, აიცილოთ საქმე ან გადადოთ მისი განხილვა, რომ კვალიფიციურად მოვახერხოთ ჩვენი დაცვის ქვეშ მყოფების დაცვა,”- უთხრა მოსამართლეს ირაკლი შავაძემ.

მოსამართლის აცილების საკითხი დააყენა ჭელიძეების ადვოკატმაც.

ქუთაისის საქალაქო სასამართლოს მოსამართლემ ქეთევან თხელიძემ ადვოკატების შუამდგომლობა არ დააკმაყოფილა და საქმის განხილვა დაიწყო.

მოსამართლის მიერ აცილებაზე უარის მიღების შემდეგ ადვოკატმა პროცესის გადადება მოითხოვა. “არ მქონდა შესაძლებლობა სრულად გავცნობოდი საქმის დეტალებს. გთხოვთ, გადადოთ პროცესი 17 აპრილის დილის 11 საათისთვის”, – უთხრა მოსამართლე ქეთევან თხელიძეს ადვოკატმა ირაკლი შავაძემ. მოსამართლემ არც ეს მოთხოვნა გაითვალისწინა.

ბრალდებულები რიონის ხეობის დაცვის აქციაში მონაწილეობის შემდეგ 15 აპრილს დააკავეს. დღეს, 16 აპრილს დაკავებულების მხარდასაჭერად ქუთაისის სამხარეო პოლიციის წინ საპროტესტო აქცია გაიმართა.

ფირუზ და რეზო წულუკიძეს, ასევე კიდევ 4 ბრალდებულს დღეს, 16 აპრილს, წარუდგინეს ბრალი სისხლის სამართლის კოდექსის 225-ე მუხლის მიხედვით, რაც გულისხმობს ჯგუფური ძალადობის ორგანიზებას, ხელმძღვანელობას ან მასში მონაწილეობას.

________________

ფოტო: „ბათუმელები“/მანანა ქველიაშვილი

ქუთაისის სამხარეო პოლიციის შენობის წინ საპროტესტო აქცია მიმდინარეობს. აქციის მონაწილეები რიონის ხეობის დაცვის აქციაში მონაწილეობის შემდეგ 6 პირის და, მათ შორის, ძმები წულუკიძეების დაკავებას აპროტესტებენ. ისინი 15 აპრილს დააკავეს.

ფირუზ და რეზო წულუკიძეს, ასევე კიდევ 4 ბრალდებულს დღეს, 16 აპრილს, წარუდგინეს ბრალი სისხლის სამართლის კოდექსის 225-ე მუხლის მიხედვით, რაც გულისხმობს ჯგუფური ძალადობის ორგანიზებას, ხელმძღვანელობას ან მასში მონაწილეობას.

გამოძიების ვერსიით, ბრალდებულებმა 12 აპრილს ქუთაისში, გუმათჰესის დასახლებაში „ნამახვანჰესის” მშენებლობასთან დაკავშირებით მიმდინარე საპროტესტო აქციაზე, ჯგუფურად იძალადეს და ფიზიკური დაზიანებები მიაყენეს აქციაზე მყოფ სამ პირს. ასევე, დააზიანეს ერთ-ერთი დაზარალებულის კუთვნილი ავტომანქანა.

საპროტესტო აქციის მონაწილეები დაკავებულების გათავისუფლებას ითხოვენ. ადვოკატების თქმით, ბრალდებულები წარდგენილ ბრალს არ აღიარებენ. აქციის მონაწილეები ქუთაისში ძირითადად ბათუმიდან ჩავიდნენ.

ნამახვანჰესის მშენებლობის წინააღმდეგ გამართული აქციების ერთ-ერთი ორგანიზატორი მირზა ნოზაძე ამბობს, რომ აქციაზე მყოფი ადამიანები, რომლებიც დააკავეს, პროვოკაციას წამოაგეს რელიგიური ნიშნით.

ადვოკატი ირაკლი შავაძეც ადასტურებს იმას, რომ საქმე პროვოკაციასთან გვაქვს.

„მათ არანაირი პოლიტიკური გაცნხადება არ გაუკეთებიათ აქციაზე, დაზარალებულები ადასტურებენ ჩვენებაში, რომ დაკავებულებს უთხრეს, რომ „ნაცმოძრაობის“ წევრები ხართ და არ უნდა იყოთ ამ აქციაზეო…

___

რეზო და ფირუზ წულუკიძეები არაერთხელ მიუციათ წარსულში სისხლის სამართლის პასუხისგებაში. ისინი მიიჩნევენ, რომ მათ განსხვავებული პოლიტიკური შეხედულებების გამო სჯიან. ბოლო შემთხვევის დროს სპორტსმენი და ევროპის ჩემპიონი ჭიდაობაში ფირუზ წულუკიძე ამბობდა, რომ მისი ძმა – რეზო წულუკიძე იმიტომ დასაჯეს, რომ მან ხელისუფლებას წინასაარჩევნოდ დახმარებაზე უარი უთხრა. რეზო წულუკიძის ძმამ, ფირუზ წულუკიძემ, აჭარის მთავრობის აპარატთან გამართულ ერთ-ერთ აქციაზე თქვა, რომ მათ წინასაარჩევნოდ დახმარებას და პრაქტიკულად, ზონდერჯგუფის შექმნას სთხოვდნენ. ამ საქმეზე საბოლოოდ ბათუმის საქალაქო სასამართლომ ძალადობა დაადგინა და არა ჯგუფური ხულიგნობა, რასაც პროკურატურა ედავებოდა რეზო წულუკიძეს ელდარ ანთაძესთან ერთად.

18 აპრილს, კვირას, 14:00 საათზე, ბათუმის ბულვარის კოლონადებთან აქცია იგეგმება.

„ვიკრიბებით ბულვარისა და სამოქალაქო ღირსების დასაცავად.

ბულვარი არის საქართველოს თითოეული მოქალაქის საკუთრება და არა ფულიანი ხალხის, რომლებმაც მიიტაცეს ჩვენი საგანძურის უნიკალური ტერიტორიები, დგამენ იქ ცათამბჯენებს და სახინკლეებს, ღობავენ სანაპიროებს და იზომავენ უნიკალურ მწვანე სივრცეებს საკუთარ ეზოდ. ამის წინააღმდეგ მებრძოლი ბულვარის დირექტორი კი სამსახურიდან უსამართლოდ გაუშვეს. რითაც თითოეული ბათუმელის ღირსება და თავისუფლება შელახეს! შეწყდეს ბულვარის განადგურება და ადამიანების უსამართლოდ ჩაგვრა! ბათუმი აღარ ითმენს უკიდურეს უსამართლობას და უკანონობას,“ – ვკითხულობთ ფეისბუქზე, ღონისძიების გვერდზე.

აქციის ორგანიზატორია საზოგადოება „ბათომი“.

ბათუმის ბულვარში მშენებლობებისა და პლაჟის გასხვისების წინააღმდეგ, ასევე, ბათუმის ბულვარის ყოფილი დირექტორის, ირაკლი ჯინჭარაძის მხარდასაჭერად აქცია 14 აპრილსაც გაიმართა აჭარის მთავრობასთან.

ბათუმის ბულვარის დირექტორი ირაკლი ჯინჭარაძე 12 აპრილს გაათავისუფლეს თანამდებობიდან.

ჯინჭარაძის გათავისუფლებას წინ უძღოდა მისი კრიტიკული განცხადება ბათუმის საკრებულოს სხდომაზე იმის შესახებ, რომ ბათუმის ბულვარში პლაჟების გასხვისება არ შეიძლება.

ირაკლი ჯინჭარაძის გათავისუფლების ოფიციალურ მიზეზად აჭარის მთავრობამ 2019 წლის აუდიტის დასკვნა დაასახელა, სადაც, მთავრობის განცხადებით, თანხების არამიზნობრივი ხარჯვა იკვეთება, თუმცა მოქალაქეები, იურისტები და არასამთავრობო ორგანიზაციები მიიჩნევენ, რომ ბულვარის დირექტორის გათავისუფლება შეიცავს დისკრიმინაციის ნიშნებს.

ბულვარის დირექტორის გათავისუფლებაზე საქართველოს სახალხო დამცველმა განსხვავებული მოსაზრების ნიშნით სავარაუდო დისკრიმინაციის შესწავლა უკვე დაიწყო.

______________

ფოტო: საზოგადოება „ბათომი“

რა უნდა იყოს ჩვენი რეაქცია ძალადობის შემთხვევებზე – ამ თემაზე დღეს, 16 აპრილს, ფეისბუქში ლაივშეხვედრა გაიმართება. დისკუსია საღამოს 7 საათზე დაიწყება.

Facebook Live დისკუსიის დროს კითხვებს უპასუხებენ უფლებადამცველი თამარ გურჩიანი,  ექსპერტი ქალთა მიმართ და ოჯახში ძალადობის საკითხებზე  – გოგა ხატიაშვილი და თამარ დეკანოსიძე – ორგანიზაცია „თანასწორობა ახლა“.

შეხვედრის მოდერატორი იქნება ბათუმის დემოკრატიული ჩართულობის ცენტრის კოორდინატორი თეონა დიასამიძე.

ამ დისკუსიის მიზანი მსახიობ ნინუცა მაყაშვილის მიმართ სოლიდარობის გამოხატვაა, რომელმაც ყოფილი მეუღლე ოჯახში ძალადობაში ამხილა.

დისკუსიაში მონაწილეობის მისაღებად გადადით ფეისბუქის ამ გვერდზე 

საქართველოს ფინანსთა სამინისტროს საგამოძიებო სამსახურის ინფორმაციით, 2021 წლის თებერვალ-მარტში, მარკირებას დაქვემდებარებული დიდი ოდენობით აქციზური საქონლის აქციზური მარკის გარეშე შენახვა-გადაზიდვის 77 ფაქტი გამოვლინდა, დანაშაულის ჩადენაში მხილებულია 79 პირი, რომელთა შორის 44 დაკავებულია.

„საგამოძიებო მოქმედებების შედეგად, დანაშაულში მხილებული პირებისგან ამოღებულია სარეალიზაციოდ განკუთვნილი, სხვადასხვა დასახელების ჯამში 106 532 კოლოფი უაქციზო სიგარეტი, რომლის საბაზრო ღირებულება 446 000 ლარს აღემატება.

გამოძიება მიმდინარეობს საქართველოს სისხლის სამართლის კოდექსის მე-200 მუხლის პირველი, მე-2 და მე-3 ნაწილებით, რაც სასჯელის სახით ითვალისწინებს თავისუფლების აღკვეთას 6-დან 8 წლამდე ვადით,“ – აცხადებს საგამოძიებო სამსახური.