ბათუმი,მთავარი,სიახლეები

გენდერული სტერეოტიპები – დისკუსია ხაბელაშვილების საჯარო სკოლაში

25.05.2021 • 1856
გენდერული სტერეოტიპები – დისკუსია ხაბელაშვილების საჯარო სკოლაში

არასამთავრობო ორგანიზაცია „თავისუფალ ჟურნალისტთა სახლმა“ დისკუსიის ჩატარების იდეის კონკურსში აჭარის 10 სკოლა შეარჩია.

კონკურსის იდეა ადამიანის უფლებების თემაზე საჯარო ლექციის/დისკუსიის ჩატარებას გულისხმობდა.

შერჩევის პროცესში მონაწილეობდნენ ხულოს, შუახევის, ქედის, ხელვაჩაურის რესურსცენტრებისა და აჭარის განათლების, კულტურისა და სპორტის სამინისტროს წარმომადგენლები.

გამარჯვებული სკოლები:

[checklist]

  • დანისპარაულის საჯარო სკოლა ( ხულო)
  • განახლების საჯარო სკოლა (ხულო)
  • ხაბელაშვილების საჯარო სკოლა (შუახევი)
  • ცხემლისის საჯარო სკოლა (შუახევი)
  • დაბა ქედის საჯარო სკოლა
  • მერისის საჯარო სკოლა (ქედა)
  • მახინჯაურის საჯარო სკოლა (ხელვაჩაური)
  • მახოს საჯარო სკოლა (ხელვაჩაური)
  • ქობულეთის №5 საჯარო სკოლა
  • ლეღვას №2 საჯარო სკოლა (ქობულეთი)

[/checklist]

შერჩეულ სკოლებში შეხვედრების თემა განსხვავებულია და კონკრეტული სოფლის აქტუალურ პრობლემებს ეხება.

პირველი შეხვედრა ხაბელაშვილების საჯარო სკოლაში გაიმართა.

გენდერული სტერეოტიპების თემაზე ამავე სკოლის მოსწავლეებსა და პედაგოგებს ჟურნალისტი თამთა კახაბერიძე ესაუბრა.

შეხვედრა ხაბელაშვილების საჯარო სკოლაში

დისკუსიას მოდერაციას უწევდა ხაბელაშვილების სკოლის პედაგოგი სოფიკო ბრეგვაძე, რომელიც შეხვედრის თემატიკის იდეის ავტორია.

დისკუსიის პროცესში აქტიურად მონაწილეობდნენ მოსწავლეები და პედაგოგები.

თამთა კახაბერიძის თქმით, სკოლებს ჰქონდათ შესაძლებლობა თავად შეერჩიათ სასურველი სადისკუსიო თემა, ამ პროცესში მასწავლებლების ჩართულობა და მათ მიერ არაფორმალური განათლების წახალისება კი ძალიან მნიშვნელოვანია.

„მახსოვს, ადრე სკოლები, მასწავლებლები სკეპტიკურად უყურებდნენ არაფორმალური განათლების ფორმებს, თითქოს ვინმე ცდილობდა კონკურენცია გაეწია მათი როლისა და საგაკვეთილო პროცესისთვის. არადა, ეს ორი სრულიად დამოუკიდებელი მიმართულებებია და არის თემები, რომელთა განხილვა სწორედ არაფორმალურ გარემოში, ღია დისკუსიის ფარგლებში უფრო ნაყოფიერია მოსწავლეებისთვის. მათ უნდა შეეძლოთ თამამად გამოთქვან განსხვავებული აზრი, დასვან კრიტიკული კითხვები და ეს უნდა იყოს წახალისებული,“ – ამბობს თამთა.

შეხვედრა ხაბელაშვილების საჯარო სკოლაში

მონაწილეებმა გამოთქვეს საკუთარი მოსაზრებები და ისაუბრეს გამოცდილებაზე გენდერული ნიშნით არსებულ სტერეოტიპებთან დაკავშირებით, გამომწვევ მიზეზებსა და გადაჭრის გზებზე.

„მოსწავლეებს მოვუყევი ჩემი პირადი მაგალითები სტერეოტიპული დამოკიდებულებების შესახებ, მათ შორის ისეთები, რომლებსაც სასკოლო და საუნივერსიტეტო სივრცეში გადავაწყდი. აღმოჩნდა, რომ რიგი სიტუაციებისა, მათთვისაც არ იყო უცხო და გამიხარდა, რომ თავადაც არ შეუშინდნენ თავიანთი პირადი მაგალითების საჯაროდ განხილვას,“ – ამბობს თამთა.

შეხვედრა ხაბელაშვილების საჯარო სკოლაში

„მსგავსი ერთჯერადი შეხვედრებით და დისკუსიებით, შესაძლოა, კონკრეტულ საკითხზე სიღრმისეული ცოდნა ვერ მივცეთ მოსწავლეებს, ვერ დავარწმუნოთ რაიმე აზრის სისწორეში ან პრიქით, მაგრამ, ვფიქრობ, მიზანი ეს არც უნდა იყოს. მიზანი არა „სწორი პასუხების“ სწავლებაა მათთვის, არამედ კითხვების გაჩენა, ბევრი კითხვის და საკითხის განსხვავებული პერსპექტივებიდან დანახვის შესაძლებლობა. ამ კითხვებიდან მათთვის სწორ პასუხებამდე კი თავად უნდა მივიდნენ. ამ პროცესში როგორც ფორმალურ, ისე არაფორმალურ განათლებას ძალიან დიდი როლი აქვს,“ – ამბობს თამთა კახაბერიძე.

აღნიშნული აქტივობები იმართება „თავისუფალ ჟურნალისტთა სახლის“ მიერ, პროექტის  – „დემოკრატიული იდეებისა და ღირებულებების პოპულარიზაცია აჭარაში“ ფარგლებში.


სტატია მომზადებულია პროექტის ფარგლებში – „დემოკრატიული იდეების და ღირებულებების პოპულარიზაცია აჭარაში“. პროექტს ახორციელებს არასამთავრობო ორგანიზაცია „თავისუფალ ჟურნალისტთა სახლი“. პროექტის ფინანსური მხარდამჭერია ამერიკული ფონდი „ეროვნული წვლილი დემოკრატიისთვის“ [NED]. არ არის აუცილებელი სტატიაში გამოთქმული მოსაზრებები გამოხატავდეს დონორი ორგანიზაციის შეხედულებებს.

 

გადაბეჭდვის წესი


ასევე: