„არაფორმალური განათლება ქართული საგანმანათლებლო სივრცისთვის დღემდე მნიშვნელოვანი გამოწვევაა. განსაკუთრებით მაღალმთიანი მუნიციპალიტეტებისთვის. მათ არ უნდა იგრძნონ, რომ ქალაქებში მეტი შესაძლებლობებია. მათაც უნდა შევუქმნათ გარემო, სადაც ექნებათ თავისუფალი სასაუბრო სივრცე, იქნებიან გადაწყვეტილებების მიმღები პირები. საზოგადოებაში ფესვგამდგარი მახინჯი სტერეოტიპებისა და სტიგმების დასამარცხებლად საუბარი და კომუნიკაციაა საჭირო“, – ამბობს ელზა ლემსაძე, სამოქალაქო აქტივისტი.
ადამიანის უფლებების თემაზე საჯარო ლექციებისა და დისკუსიების ჩატარების მიზნით, არასამთავრობო ორგანიზაცია „თავისუფალ ჟურნალისტთა სახლმა“ აჭარაში 10 სკოლა შეარჩია კონკურსის გზით.
თავისუფალ ჟურნალისტთა სახლის პროექტის ფარგლებში, 19 მაისს, სამოქალაქო საზოგადოების მნიშვნელობის შესახებ, დანისპარაულის საჯარო სკოლის მოსწავლეებთან შეხვედრა გაიმართა. ამ თემაზე მოსწავლეებს სწორედ ელზა ლემსაძე ესაუბრა.
შეხვედრა დანისპარაულის საჯარო სკოლაში
დანისპარაულის სკოლა ერთ-ერთია იმ საგანმანათლებლო დაწესებულებიდან, რომელიც „თავისუფალ ჟურნალისტთა სახლმა“ კონკურსის წესით შეარჩია. მანამდე ასეთი შეხვედრა გენდერული სტერეოტიპების თემაზე ხაბელაშვილების საჯარო სკოლაში გაიმართა.
დანისპარაულში შეხვედრის თემა სკოლის წარმომადგენლების ინიციატივას ეფუძნება და ადგილობრივ თემში არსებული პრობლემების შესახებ ჯანსაღ დისკუსიას და ცნობიერების ამაღლებას ისახავს მიზნად.
მონაწილეებთან ერთად მომხსენებელმა შეხვედრაზე განიხილა სამოქალაქო საზოგადოების საჭიროება, მოქალაქეთა საზოგადოებრივ პროცესებში ჩართულობისა და აქტიურობის შედეგები, ჩვენი ქვეყნის სხვადასხვა პერიოდიდან, მათ შორის უახლოესი მაგალითები.
შეხვედრა დანისპარაულის საჯარო სკოლაში
დანისპარაულის საჯარო სკოლის მოსწავლეები აქტიურად მონაწილეობდნენ დისკუსიის პროცესში, გამოხატავდნენ მოსაზრებებს და საუბრობდნენ მათ გარშემო მომხდარ შემთხვევებზე.
„საუბრისას ვგრძნობდი, მოსწავლეთა მხრიდან აქტიურ ჩართულობას, რასაც, სიმართლე გითხრათ, არ ველოდი. ხშირად მოსწავლეები მსგავსი შეხვედრებისას დუმილს ირჩევენ, რცხვენიათ საკუთარი შეხედულებების გაზიარების, რაც გამოწვეულია მსგავსი შეხვედრების ნაკლებობით. „კიდევ როდის ამოხვალთ?“, „ჩვენ ძალიან მოგვეწონა დისკუსია“, გვითხრეს და დავრწმუნდი, რომ ამ სიტყვების მიღმა იმალებოდა დიდი ენთუზიაზმი. ძალიან მნიშვნელოვანია ამ ახალგაზრდებს მივცეთ შესაძლებლობა, ღიად ისაუბრონ მათი თვალით დანახულ გამოწვევებზე და მოვუსმინოთ, თუ რაში ხედავენ გამოსავალს“, – ამბობს ელზა ლემსაძე.
მისივე თქმით, სწორედ დისკუსიებში ჩანს ყველაზე კარგად საზოგადოებაში გავრცელებული სტიგმა და სტერეოტიპები: „ამ სკოლებს სჭირდებათ მრავალფეროვნება, სიახლე და მოტივაცია“.
დისკუსიას მოდერაცია დანისპარაულის საჯარო სკოლის პედაგოგმა – ზურაბ შამანაძემ გაუწია.
შეხვედრა დანისპარაულის საჯარო სკოლაში
შეხვედრები იმართება „თავისუფალ ჟურნალისტთა სახლის“ პროექტის ფარგლებში „დემოკრატიული იდეებისა და ღირებულებების პოპულარიზაცია აჭარაში“. პროექტის მხარდამჭერია ფონდი „ეროვნული წვლილი დემოკრატიისთვის“(NED).
სტატია მომზადებულია პროექტის ფარგლებში – „დემოკრატიული იდეების და ღირებულებების პოპულარიზაცია აჭარაში“. პროექტს ახორციელებს არასამთავრობო ორგანიზაცია „თავისუფალ ჟურნალისტთა სახლი“. პროექტის ფინანსური მხარდამჭერია ამერიკული ფონდი „ეროვნული წვლილი დემოკრატიისთვის“ [NED]. არ არის აუცილებელი სტატიაში გამოთქმული მოსაზრებები გამოხატავდეს დონორი ორგანიზაციის შეხედულებებს.
